ប្រទេសកូរ៉េខាងត្បូង ៖ ភ្នាក់ងារគ្រប់គ្រងទិន្នន័យអ្នកប្រើប្រាស់អ៊ីនធើរណេតរបស់កូរ៉េខាងត្បូងឱ្យដឹងថា កូរ៉េខាងត្បូងបានហាមឃាត់ការដោនឡូតកម្មវិធី AI ចិន DeepSeek ក្រោយពីអ្នកគ្រប់គ្រងកម្មវិធីនេះទទួលស្គាល់ថា ពុំបានគិតពីច្បាប់មួយចំនួនរបស់កូរ៉េខាងត្បូងដើម្បីការពារទិន្នន័យផ្ទាល់ខ្លួនរបស់អ្នកប្រើប្រាស់ ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី១៧ ខែកុម្ភៈ ឆ្នាំ២០២៥ ។

ភ្នាក់ងារគ្រប់គ្រងទិន្នន័យអ្នកប្រើប្រាស់អ៊ីនធើរណេតឱ្យដឹងថា កូរ៉េខាងត្បូងបានបិទការដោនឡូតកម្មវិធី AI ចិន DeepSeek កាលពីថ្ងៃទី១៥ ខែកុម្ភៈ កន្លងមក ប៉ុន្តែពលរដ្ឋអាចដោនឡូតកម្មវិធីនេះឡើងវិញ ក្រោយពីអ្នកគ្រប់គ្រងកម្មវិធីអនុវត្តតាមច្បាប់គ្រប់គ្រងទិន្នន័យអ្នកប្រើប្រាស់របស់កូរ៉េខាងត្បូង ។

ការហាមដោនឡូតកម្មវិធី DeepSeek បានធ្វើឡើងក្រោយពីក្រសួង និងស្ថាប័នជាច្រើនរបស់រដ្ឋាភិបាលកូរ៉េខាងត្បូងហាមឃាត់ការប្រើប្រាស់កម្មវិធីនេះ ដោយសារបារម្ភពីក្រុមហ៊ុនចិនពុំអាចគ្រប់គ្រងទិន្នន័យអ្នកប្រើប្រាស់ឱ្យត្រឹមត្រូវ ។ រីឯក្រុមហ៊ុនចិនទទួលស្គាល់ថា ពុំបានពិចារណាពីច្បាប់គ្រប់គ្រងទិន្នន័យអ្នកប្រើប្រាស់ក្នុងប្រទេសមួយចំនួន ។

ដោយឡែក ភ្នាក់ងារគ្រប់គ្រងទិន្នន័យអ្នកប្រើប្រាស់អ៊ីនធើរណេតរបស់ប្រទេសអ៊ីតាលី បាននិយាយកាលពីខែមករា ឆ្នាំ២០២៥ ថា បានបញ្ជាឱ្យអ្នកគ្រប់គ្រងកម្មវិធី DeepSeek ប្លុក Chatbot នៅអ៊ីតាលី ដោយសារក្រុមហ៊ុននេះពុំអាចបញ្ជាក់ឱ្យច្បាស់លាស់ពាក់ព័ន្ធនឹងការបារម្ភរបស់ភ្នាក់ងារលើគោលនយោបាយគ្រប់គ្រងទិន្នន័យអ្នកប្រើប្រាស់ ។

មន្ត្រីនាំពាក្យរបស់ក្រសួងការបរទេសចិន បាននិយាយកាលពីថ្ងៃទី៦ ខែកុម្ភៈ កន្លងមកថា រដ្ឋាភិបាលចិនផ្តល់ភាពសំខាន់យ៉ាងខ្លាំងលើទិន្នន័យផ្ទាល់ខ្លួនរបស់អ្នកប្រើប្រាស់ និងសុវត្ថិភាពទិន្នន័យ ។ ក្រៅពីនេះ រដ្ឋាភិបាលចិននឹងពុំអនុញ្ញាតឱ្យក្រុមហ៊ុន ឬបុគ្គលណាម្នាក់ប្រមូលទិន្នន័យអ្នកប្រើប្រាស់ដោយខុសច្បាប់ទេ ៕

ប្រទេសថៃ ៖ កាលពីថ្ងៃទី២៣ ខែកុម្ភៈ ឆ្នាំ២០២៥ សារព័ត៌មានថៃរាយការណ៍ថា នាយករដ្ឋមន្ត្រីថៃបានអរគុណដល់សមត្ថកិច្ចថៃ ដែលបានសហការជាមួយសមត្ថកិច្ចកម្ពុជា ជួយរំដោះពលរដ្ឋថៃ និងបរទេសពីក្រុមឆបោ.កអនឡាញក្នុងអគារមួយកន្លែងនៅទីក្រុងប៉ោយប៉ែត ។ សមត្ថកិច្ចថៃឱ្យដឹងថា ក្រុមឆបោ.កអនឡាញជនជាតិចិនបានជួលអគារដើម្បីបោ.កប្រាស់តាមអនឡាញ និងលួងលោមពលរដ្ឋថៃឱ្យមកធ្វើការនៅទីនេះ ។

លោក ជិរ៉ាយុទ្ធ ហួងសាប់ ទីប្រឹក្សានាយករដ្ឋមន្ត្រីថៃ ឱ្យដឹងថា លោកស្រី ផេថងថាន ស៊ីណាវ៉ាត់ បានទទួលដំណឹងពីសមត្ថកិច្ចកម្ពុជា និងថៃ ចុះត្រួតពិនិត្យអគារមួយនៅទីក្រុងប៉ោយប៉េត និងជួយរំដោះពលរដ្ឋថៃ និងបរទេស ជាច្រើននាក់ចេញពីអគារនេះ ។ លោកស្រីបានអរគុណដល់កម្លាំងសមត្ថកិច្ច និងមន្ត្រីពាក់ព័ន្ធទាំងអស់ដែលប្រឹងប្រែងលុបបំបាត់ក្រុមឆបោកអនឡាញ ក្រោយពីរដ្ឋាភិបាលថៃស្នើសុំការសហការដោះស្រាយបញ្ហាក្រុមឆបោកអនឡាញជាមួយកម្ពុជា ។ លោកស្រីនាយករដ្ឋមន្ត្រីបានស្នើឱ្យមន្ត្រីគ្រប់ស្ថាប័នពាក់ព័ន្ធត្រៀមខ្លួនទទួលពលរដ្ឋថៃត្រឡប់មកវិញ ព្រមទាំងត្រួតពិនិត្យអត្តសញ្ញាណឱ្យបានលម្អិត ។

ក្រោយពីទទួលដំណឹងថា មានពលរដ្ឋថៃមួយចំនួនត្រូវបានក្រុមឆបោកអនឡាញលួងលោមឱ្យមកធ្វើការនៅអគារកម្ពស់៣ជាន់ ក្នុងទីក្រុងប៉ោយប៉ែត ខេត្តបន្ទាយមានជ័យ ស្ថិតនៅទល់មុខច្រកព្រំដែនឃ្លងលឹកផ្សាររុងក្លឿ ស្រុកអារញ្ញប្រាថេត ខេត្តស្រះកែវ កម្លាំងសមត្ថកិច្ចថៃបានទំនាក់ទំនងជាមួយសមត្ថកិច្ចកម្ពុជា និងដឹកនាំកម្លាំងចុះត្រួតពិនិត្យអគារនេះដើម្បីរំដោះជនរងគ្រោះចេញពីអគារ ។ នេះបើតាមការលើកឡើងរបស់សមត្ថកិច្ចថៃ ។

សមត្ថកិច្ចកម្ពុជា និងថៃ បានរំដោះជនបរទេសចំនួន២១៥នាក់ ក្នុងនោះមានជនជាតិថៃ ១០៩នាក់ (ស្រី៥៤នាក់) ។ ក្រៅពីនេះ មានជនជាតិតៃវ៉ាន់ ៥នាក់, ប៉ាគីស្ថាន ៥០នាក់, ឥណ្ឌូណេស៊ី ៣នាក់ និងឥណ្ឌា ៤៨នាក់ ។ សមត្ថកិច្ចថៃសន្និដ្ឋានថា ក្រុមឆបោកអនឡាញជនជាតិចិនបានបោកប្រាស់តាមអនឡាញជាទ្រង់ទ្រាយធំក្នុងប្រទេសទាំងពីរ ។

នៅព្រឹកថ្ងៃទី២៣ ខែកុម្ភៈ សមត្ថកិច្ច និងមន្ត្រីកុងស៊ុលថៃបានធ្វើដំណើរទៅកាន់បរិវេណព្រំដែនឃ្លងលឹក ដើម្បីតាមដានស្ថានការណ៍នេះ និងរៀបចំឯកសារស្រាវជ្រាវប្រវត្តិរូបរបស់ពលរដ្ឋថៃទាំង១០៩នាក់ និងសាកសួរផ្ទាល់មាត់ថា តើពួកគេជាជនរងគ្រោះ ឬជាបក្ខពួករបស់ក្រុមឆបោកអនឡាញ?

ថ្មីៗនេះយោងតាម TripAdvisor ដែលជាវេទិកាទេសចរណ៍អនឡាញឈានមុខគេរបស់ពិភពលោក បានប្រកាសពីចំណាត់ថ្នាក់នៃឆ្នេរស្អាតបំផុតក្នុងឆ្នាំ ២០២៥ ដើម្បីផ្តល់ឱ្យភ្ញៀវទេសចរនូវជម្រើសដ៏ល្អបន្ថែមទៀតប្រសិនបើពួកគេចង់ទៅទស្សនាឆ្នេរសមុទ្រ។ យោងតាម TripAdvisor និង CNN Travel បានចុះផ្សាយថា នៅចំណាត់ថ្នាក់លេខ ១ ឆ្នេរដែលស្អាតជាងគេបំផុតលើពិភពលោកនោះគឺ៖

ឆ្នេរ Elafonisi ដែលស្ថិតក្នុងប្រទេសក្រិក។ កន្លែងនេះគឺល្បីល្បាញដោយសារខ្សាច់ពណ៌ផ្កាឈូក និងទឹកថ្លាឈ្វង់ដូចកញ្ចក់ឆ្លុះដល់បាត។ ប្រសិនបើលោកអ្នកចង់មកទស្សនា ខែឧសភា ដល់ខែកញ្ញា គឺជាពេលវេលាដ៏ល្អបំផុតដើម្បីធ្វើដំណើរទៅកាន់ឆ្នេរ Elafonisi ។

រីឯចំណាត់ថ្នាក់ទី ២ បានទៅលើឆ្នេរ Banana Beach ក្នុងខេត្ត Phuket ប្រទេសថៃ ដែលជាកន្លែងដ៏ល្អបំផុតមួយសម្រាប់ការជិះទូក និងជិះឆ័ត្រយោង ហើយភ្ញៀវក៏អាចមុជចូលទៅក្នុងសមុទ្រដើម្បីមើលផ្កាថ្ម និងត្រីចម្រុះពណ៌ផងដែរ។

ចំពោះចំណាត់ថ្នាក់ទី ៣ គឺឆ្នេរ Eagle ដែលមានទីតាំងនៅ Oranjestad,Aruba ប្រទេសហូឡង់ ក៏ជាប់ក្នុងបញ្ជីឆ្នេរស្អាតបំផុតរបស់ពិភពលោកក្នុងឆ្នាំ ២០២៥ ផងដែរ។ Eagle Beach គឺជាឆ្នេរមួយដែលមានខ្សាច់សទន់ ទឹកក្តៅ និងថ្ងៃលិចដ៏គួរឱ្យចាប់ឱ្យចាប់អារម្មណ៍។

ចំណែកឆ្នេរ Siesta នៅសហរដ្ឋអាមេរិក គឺបានជាប់ចំណាត់ថ្នាក់ទី ៤ នៅក្នុងបញ្ជីរបស់ TripAdvisor ដែលឆ្នេរនេះមានខ្សាច់ល្អឥតខ្ចោះ សំបកសមុទ្រ និងទឹកថ្លាគួរឱ្យចង់គយគន់។ អ្នកទស្សនាអាចទៅលេង Siesta នៅរដូវក្តៅ និងរដូវស្លឹកឈើជ្រុះ ដោយសាររដូវទាំងពីរនេះជារដូវដែលស្ងប់ស្ងាត់ មិនសូវមានភ្ញៀវកកកុញពេកទេ។

ចុងក្រោយនៅចំណាត់ថ្នាក់ទី ៥ ឆ្នេរដែលស្អាតជាងគេនោះគឺបានទៅលើឆ្នេរ Falésia ប្រទេសព័រទុយហ្គាល់។ ឆ្នេរដ៏ស្រស់ស្អាតនេះមានភាពល្បីល្បាញដោយសារឆ្នេរខ្សាច់ពណ៌មាស និងទឹកពណ៌ខៀវថ្លា នៅក្រោមច្រាំងថ្មចោទដ៏អស្ចារ្យ៕

ប្រទេសអង់គ្លេស ៖ ក្រុមអ្នកស្រឡាញ់សត្វនៅប្រទេសអង់គ្លេស បាននាំគ្នាយកខ្ទិះដូងមកស្រោចលើក្បាលរបស់ខ្លួនតវ៉ានៅមុខស្ថានទូតថៃ ដើម្បីឱ្យថៃឈប់ប្រើប្រាស់កម្លាំងសត្វស្វាឡើងបេះផ្លែដូងសម្រាប់ផលិតខ្ទិះដូង ដោយពួកគេអះអាងថា វាជាការរំលោ.ភ សិទ្ធិសត្វ ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី២២ ខែកុម្ភៈ ឆ្នាំ២០២៥ ។

ក្រុមអ្នកស្រឡាញ់សត្វ មកពីភ្នាក់ងារ PETA (People for the Ethical Treatment of Animals) បានប្រមូលផ្តុំគ្នាតវ៉ានៅខាងមុខស្ថានទូតថៃក្នុងទីក្រុងឡុងដ៍ ប្រទេសអង់គ្លេស ដោយការស្លៀកពាក់ខោអាវឆ្នូត ពណ៌ខ្មៅលាយស ដូចអ្នកទោស និងកាន់ស្លាកសញ្ញារាងផ្លែដូង ។ ពួកគេបានសរសេរអក្សរលើស្លាកសញ្ញាថា សត្វស្វាបានរងទុក្ខវេទនាដោយសារការផលិតខ្ទិះដូងនៅប្រទេសថៃ ហើយពួកគេសំណូមពរឱ្យថៃគោរពសិទ្ធិស្វា ។

ក្រុមអ្នកតវ៉ាទាំងនេះបានសរសេរក្នុងហ្វេសប៊ុកផេករបស់ភ្នាក់ងារ PETA ថា តាមការស៊ើបអង្កេតរបស់ភ្នាក់ងារ PETA នៅតំបន់អាស៊ីបង្ហាញថា ប្រទេសថៃបានបង្ខំឱ្យស្វាឡើងបេះផ្លែដូងសម្រាប់ផលិតខ្ទិះដូង ហើយស្វាទាំងនេះត្រូវបានចងដោយខ្សែខ្លីៗ និងពិបាកកម្រើកខ្លួន ។ លើសពីនេះ ថៃបានឃុំស្វាក្នុងទ្រុង និងឱ្យវាជញ្ទូនផ្លែដូងពីកន្លែងមួយទៅកន្លែងមួយទៀតមិនឈប់ឈរ ។ សត្វដ៏ឆ្លាតនេះគួរតែរស់នៅក្នុងព្រៃតាមធម្មជាតិ និងពុំគួរចាប់វាមកចងច្រវ៉ាក់ និងប្រើឱ្យធ្វើការរហូតដល់អស់កម្លាំងទេ ។

ក្រៅពីនេះ នៅប្រទេសថៃ ថែមទាំងមានសាលាបង្ហាត់ស្វាឱ្យចេះបេះផ្លែដូងទៀតផង ក្រុមអ្នកស្រឡាញ់សត្វនៅអង់គ្លេសបានឃើញថៃចងច្រវ៉ាក់កូនស្វាតូចៗ ឃុំក្នុងទ្រុង និងប្រមូលពួកវាទៅបេះផ្លែដូងគ្មានពេលសម្រាក ។ ថៃប្រើស្វាទាំងនេះឱ្យបេះផ្លែដូងតាំងពីពួកវានៅតូចៗ រហូតដល់អាយុច្រើនធ្វើការលែងកើត ។

ក្រោយពីហ្វេសប៊ុកផេករបស់ភ្នាក់ងារ PETA ដែលមានមនុស្សតាមដានជាង៥លាននាក់ បានផ្សព្វផ្សាយពីពលរដ្ឋអង់គ្លេសតវ៉ារឿងថៃជិះជាន់កម្លាំងពលកម្មស្វា ធ្វើឱ្យអ្នកលេងបណ្តាញសង្គមជាច្រើនបញ្ចេញមតិ ។ មតិភាគច្រើនបានគាំទ្រចំពោះការតវ៉ានេះ ប៉ុន្តែអ្នកលេងបណ្តាញសង្គមថៃនិយាយថា ថៃបានផលិតខ្ទិះដូងរាប់លានប្រអប់ក្នុង១ថ្ងៃ ប៉ុន្តែថៃពុំបានប្រើកម្លាំងស្វាទាំងអស់ទេ ៕

ប្រទេសចិន ៖ ក្រុមហ៊ុនប្រេងឥន្ធនៈចិនឈ្មោះ China National Petroleum Corporation (CNPC) បានប្រកាសនៅខែកុម្ភៈ ឆ្នាំ២០២៥ ថា ការខួងរណ្តៅយក្ស «Shenditake 1» ដែលមានជម្រៅជ្រៅបំផុតលំដាប់ទី២ លើពិភពលោក និងជ្រៅជាងគេក្នុងតំបន់អាស៊ី បានបញ្ចប់ជាស្ថាពរហើយ ។ រណ្តៅនេះមានជម្រៅរហូតដល់១០,៩១០ម៉ែត្រ ស្ថិតនៅកណ្តាលវាលខ្សាច់ Taklimakan ឈូងសមុទ្រ Tarim តំបន់ Xinjiang Uygur ភាគពាយ័ព្យប្រទេសចិន ។

ការខួងរណ្តៅយក្ស គឺសម្រាប់ការស្រាវជ្រាវផ្នែកវិទ្យាសាស្ត្រ ហើយរណ្តៅនេះត្រូវបានខួងឡើងសម្រាប់ស្វែងរកប្រេងឥន្ធនៈ និងឧស្ម័ននៅក្រោមដី ព្រមទាំងសម្រាប់ស្រាវជ្រាវពីការវិវត្តនៃពិភពលោក និងផ្នែកធរណីវិទ្យា ។ ការខួងរណ្តៅយក្ស «Shenditake 1» គឺជាការបំបែកកំណត់ត្រាថ្មីផ្នែកវិស្វកម្មលំដាប់ពិភពលោក ដែលចិនបានខួងរណ្តៅជ្រៅលើស១ម៉ឺនម៉ែត្រ ដោយចំណាយពេលឆាប់រហ័សបំផុត ។

ក្រុមហ៊ុនប្រេងឥន្ធនៈ CNPC បញ្ជាក់ថា ពួកគេបានចាប់ផ្តើមខួងរណ្តៅយក្សលើកដំបូង ចាប់ពីថ្ងៃទី៣០ ខែឧសភា ឆ្នាំ២០២៣ ដែលមានជម្រៅរហូតដល់១០,៩១០ម៉ែត្រ ដោយចំណាយពេលខួងដី ចំនួន៥៨០ថ្ងៃ ។ រីឯការខួងរណ្តៅនៅដំណាក់កាលចុងក្រោយស្មើជម្រៅ៩១០ម៉ែត្រ គឺក្រុមហ៊ុនបានចំណាយពេលអស់៣០០ថ្ងៃ ។ ការខួងរណ្តៅនេះបានទម្លុះថ្ម១២ស្រទាប់ រហូតខួងដល់ស្រទាប់ថ្មមានអាយុជាង៥០០លានឆ្នាំ ។

លើសពីនេះ ដើម្បីគាំទ្រគម្រៅការខួងរណ្តៅយក្ស ក្រុមហ៊ុនចិនបានកែលម្អបច្ចេកវិទ្យាឧបករណ៍ខួងដីដោយស្វ័យប្រវត្តិ ដែលអាចខួងដីក្នុងជម្រៅជ្រៅរហូតដល់១ម៉ឺន២ពាន់ម៉ែត្រ មុនគេនៅលើពិភពលោក ហើយក្រុមហ៊ុនក៏បានបង្កើតឧបករណ៍ពិសេសសម្រាប់កត់ត្រាទិន្នន័យក្នុងរណ្តៅដ៏ជ្រៅផងដែរ ។

អ្នកវិទ្យាសាស្ត្រចិនបានប្រមូលទិន្នន័យអំពីស្រទាប់ថ្ម តាមរយៈការវិភាគដុំថ្មគំរូដែលពួកគេយកពីរណ្តៅជម្រៅ១ម៉ឺនម៉ែត្រ ដើម្បីឈ្វេងយល់ពីទិន្នន័យសំខាន់ពាក់ព័ន្ធនឹងសមាសភាពផ្ទៃផែនដី និងការផ្លាស់ប្តូរអាកាសធាតុរបស់ផែនដី ៕