សហរដ្ឋអាមេរិក៖ សេវាអាកាសធាតុជាតិសហរដ្ឋអាមេរិក (NWS) បានប្រកាសកាលពីថ្ងៃទី១៥ ខែមករា ថារដ្ឋកាលីហ្វ័រញ៉ាអាចនឹងប្រឈមមុខជាមួយខ្យល់បក់ខ្លាំង បណ្តាលឱ្យលក្ខខណ្ឌអាកាសធាតុកាន់តែស្ងួត បង្កើតឱ្យមានស្ថានភាពគ្រោះថ្នាក់ ទំនងជាមានភ្លើងថ្មីអាចផ្ទុះឡើងម្តងទៀត។

នេះបើយោងតាមការចុះផ្សាយរបស់សារព័ត៌មានបរទេស បានឱ្យដឹងថា ទោះបីជាការព្យាករណ៍មិនបញ្ជាក់ព្យុះកំបុតត្បូងក៏ដោយ ប៉ុន្តែអ្នកឧតុនិយម Todd Hall បាននិយាយថា ខ្យល់ព្យុះកំបុតត្បូងដែលជាបាតុភូតដ៏កម្រមួយ ប្រហែលជាកើតឡើងក្នុងពេលដំណាលគ្នាជាមួយស្ថានភាពធ្ងន់ធ្ងរនេះផងដែរ។

ខ្យល់ព្យុះកំបុតត្បូង កើតឡើងដោយកំដៅ នៅពេលដែលភ្លើងឆេះព្រៃយ៉ាងសន្ធោសន្ធៅ ឧស្ម័នដែលហុយចេញពីភ្លើង ហើយមានផ្សែង កំទេចកំទី និងអណ្តាតភ្លើងលាយឡំគ្នាច្រើនបង្កើតបានជាព្យុះកំបុតត្បូងតែម្តង។ លោក Leila Carvalho សាស្ត្រាចារ្យផ្នែកឧតុនិយម និងអាកាសធាតុនៅសាកលវិទ្យាល័យកាលីហ្វ័រញ៉ា បាននិយាយថា “ខ្យល់បក់ខ្លាំង បានបង្កើតផ្លូវមួយ និងកន្លែងដែលវាទៅ ការបំផ្លិចបំផ្លាញគឺដូចគ្នានឹងព្យុះកំបុតត្បូងផងដែរ”។ ដូច្នេះខ្យល់ព្យុះកំបុតត្បូងអាចធ្វើឱ្យភ្លើងឆេះកាន់តែខ្លាំងឡើងដោយសារការស្រូបខ្យល់។

យោងតាមលោក James Urban ជំនួយការសាស្រ្តាចារ្យនៅនាយកដ្ឋានវិស្វកម្មអគ្គីភ័យនៃវិទ្យាស្ថានពហុបច្ចេកទេស Worcester បានឱ្យដឹងទៀតថា ខ្យល់បក់ខ្លាំង និងខ្យល់ព្យុះកំបុតត្បូងគឺមិនខុសគ្នានោះទេ ពួកវាសុទ្ធតែអាចនាំភ្លើងរាលដាលទៅឆ្ងាយ ហើយបំផ្លាញគ្រប់ទីកន្លែង។ ដូច្នេះនាពេលខាងមុខនេះរដ្ឋកាលីហ្វ័រញ៉ានឹងប្រឈមមុខជាមួយខ្យល់បក់ខ្លាំង ឬព្យុះកំបុតត្បូង ដែលបង្កឱ្យមានការឆាបឆេះព្រៃម្តងទៀត។

គួររំលឹកដែរថា ក្នុងឆ្នាំ ២០១៨ ខ្យល់ព្យុះកំបុតត្បូងដែលមានទំហំប៉ុនទីលានបាល់ទាត់ចំនួន ៣ បានសម្លាប់អ្នកពន្លត់អគ្គីភ័យម្នាក់នៅពេលដែលវាបានផ្ទុះឡើងនៅក្នុងភ្លើងឆេះព្រៃដ៏ធំមួយនៅជិត Redding ចម្ងាយប្រហែល ៤០០ គីឡូម៉ែត្រភាគខាងជើងនៃទីក្រុង San Francisco និងភាគខាងត្បូងរដ្ឋកាលីហ្វ័រញ៉ា។ ក្រោយមកអ្នកវិទ្យាសាស្ត្របានពិពណ៌នាថា ពពកឡើងដល់ ១១ គីឡូម៉ែត្រនៅលើអាកាស និងបង្កើតខ្យល់បក់រហូតដល់ ២៣០ គីឡូម៉ែត្រក្នុងមួយម៉ោង។ ហេតុនេះរដ្ឋកាលីហ្វ័រញ៉ាអាចនឹងប្រឈមមុខជាមួយខ្យល់បក់ខ្លាំង ឬព្យុះកំបុតត្បូងម្តងទៀតនៅឆ្នាំ ២០២៥ នេះ៕

សហរដ្ឋអាមេរិក ៖ ក្រុមហ៊ុនផលិតមនុស្សយន្តនៅទីក្រុង Las Vegas សហរដ្ឋអាមេរិក បានបង្ហាញមនុស្សយន្តស្រីឈ្មោះ Aria ហើយក្រុមហ៊ុនសង្ឃឹមថា នឹងអាចប្រើប្រាស់មនុស្សយន្តនេះបានច្រើនមុខងារ ដូចជា ៖ ធ្វើជាមិត្តភក្តិ, ផ្តល់សេវាកម្មអតិថិជន និងការអប់រំ ដោយការបំពាក់បច្ចេកវិទ្យាឱ្យមនុស្សយន្តអាចបង្ហាញអារម្មណ៍ដូចមនុស្សពិតៗ ។

មនុស្សយន្តស្រីនេះបង្កើតឡើងដោយក្រុមហ៊ុន Realbotix ហើយនៅផ្នែកខាងក្នុងរបស់មនុស្សយន្ត គឺបំពាក់ដោយបច្ចេកវិទ្យា AI និងគំរូភាសាទំហំធំដើម្បីជួយដល់ការធ្វើការ និងឆ្លើយតបសំណួរ ។ រីឯស្បែករបស់មនុស្សយន្តផលិតពីស៊ីលីខូន ដែលស្រដៀងនឹងស្បែកមនុស្សបំផុត ខណៈនៅបរិវេណភ្នែកមនុស្សយន្ត គឺបំពាក់ប្រព័ន្ធតាមដានការសម្លឹងមើលរបស់មនុស្ស និងអាចចំណាំមុខមនុស្សម្នាក់ៗដើម្បីឱ្យមនុស្សយន្តឆ្លើយតបសំណួររបស់មនុស្ស ។

សមត្ថភាពរបស់មនុស្សយន្តក្នុងការធ្វើត្រាប់តាមមនុស្ស គឺដោយសារការដំណើរការរបស់ម៉ូទ័រចំនួន១៧ ដែលជួយឱ្យមនុស្សយន្តអាចហើបមាត់ និងភ្នែកដោយស្វ័យប្រវត្តិ ។ មនុស្សយន្តស្រីត្រូវបានផលិតឡើងជា២ប្រភេទ គឺមនុស្សយន្តមួយកំណាត់ខ្លួន និងមនុស្សយន្តមានដងខ្លួនពេញ ។

មនុស្សយន្តស្រី Aria អាចផ្លាស់ប្តូរទឹកមុខយ៉ាងឆាប់រហ័ស និងប្រើប្រាស់បានច្រើនមុខងារ ដូចជា ៖ ជជែករឿងផលិតផល, ផ្តល់ចំណេះដឹងផ្នែកវេជ្ជសាស្ត្រ និងជជែកជាមួយមនុស្សបំបាត់ការអផ្សុក ។ តម្លៃមនុស្សយន្តមួយកំណាត់ខ្លួន គឺស្មើនឹង១ម៉ឺនដុល្លារអាមេរិក រីឯតម្លៃមនុស្សយន្តទាំងមូល គិតចាប់ពីក្បាលដល់ចុងជើង ស្មើនឹង១សែន៧ម៉ឺន៥ពាន់ដុល្លារអាមេរិក ។

ក្រុមហ៊ុន Realbotix បានយកមនុស្សស្រីទៅបង្ហាញក្នុងការតាំងពិព័រណ៍បច្ចេកវិទ្យាលំដាប់ពិភពលោក CES 2025 ដែលមានការចូលរួមពីក្រុមហ៊ុនផលិតមនុស្សយន្តផ្សេងទៀត, អ្នកវិភាគ និងអ្នកគាំទ្រដ៏ធំបំផុតនៅអាមេរិក ។ នៅឆ្នាំ២០២៥ ការតាំងពិព័រណ៍បច្ចេកវិទ្យាបានរៀបចំ ចាប់ពីថ្ងៃទី៧ ដល់ថ្ងៃទី១០ ខែមករា នៅទីក្រុង Las Vegas ៕

បុរសចំណាស់លក់អាហារនៅតាមដងផ្លូវក្នុងប្រទេសប៉ាគីស្ថានបានទាក់ទាញការចាប់អារម្មណ៍ពីមហាជន ដោយសារតែមានមុខមាត់ស្រដៀងនឹងប្រធានាធីបតីអាមេរិកលោក Donald Trump។

នៅឯផ្សារដ៏មមាញឹកក្នុងខេត្ត Punjab ភាគខាងកើតប្រទេសប៉ាគីស្ថាន លោក Saleem Bagga អាយុ ៥៣ ឆ្នាំ ជារឿយៗតែងតែរុញរទេះឈើចម្រុះពណ៌របស់លោកដើរជុំវិញផ្លូវដើម្បីលក់អាហារ ខណៈថ្មីៗនេះលោកកំពុងទទួលបានការចាប់អារម្មណ៍យ៉ាងខ្លាំង ដោយសារតែមានពណ៌សក់ មុខមាត់ និងរូបរាងស្រដៀងនឹងលោក Trump ខ្លាំងពេក។

នៅពេលដែលអតិថិជនមកទិញអាហាររបស់លោក លោក Bagga បានច្រៀងចម្រៀងក្នុងស្រុកយ៉ាងសប្បាយរីករាយ ដើម្បីទាក់ទាញអតិថិជនកាន់តែច្រើន។ មនុស្សគ្រប់គ្នានៅទីនោះបាននិយាយថា ពួកគេមើលមួយភ្លេតស្មានតែ Trump កំពុងឈរលក់អាហារ តាមពិតគឺជាលោក Bagga សោះ។ បច្ចុប្បន្នបុរសវ័យ ៥៣ ឆ្នាំរូបនេះគឺមានភាពល្បីល្បាញខ្លាំងណាស់នៅក្នុងប្រទេសប៉ាគីស្ថាន ដោយមនុស្សជាច្រើនបាននាំគ្នាថតរូប Selfie ជាមួយលោក ហើយបាននិយាយថា អាហាររបស់លោកគឺពិតជាឆ្ងាញ់ណាស់។

លោក Bagga បាននិយាយថា លោកពិតជាមានអារម្មណ៍រំភើប និងសប្បាយរីករាយយ៉ាងខ្លាំងនៅពេលដែលលោកមានមុខមាត់ និងភិនភាគស្រដៀងប្រធានាធីបតីអាមេរិក ដូច្នេះលោកមិនខ្មាសអៀនក្នុងការថតរួបជាមួយអតិថិជនឡើយ។ លោក Bagga បានបន្តទៀតថា កាលដែលលោកមានសក់ពណ៌ស និងសម្បុរស គឺដោយសារលោកមានជំងឺអាល់ប៊ីន ទោះជាយ៉ាងណាសុខភាពលោកគឺល្អធម្មតាទេ ហើយបច្ចុប្បន្នការលក់ដូររបស់លោកក៏ដាច់ជារៀងរាល់ថ្ងៃផងដែរ៕

បច្ចុប្បន្ន បច្ចេកវិទ្យា AI បានក្លាយជាផ្នែកមួយនៃការងាររបស់មនុស្ស ហើយគេរំពឹងថា នាថ្ងៃអនាគត ការងារមួយចំនួននឹងលែងត្រូវការមនុស្ស ប៉ុន្តែនឹងជំនួសដោយបច្ចេកវិទ្យា AI ។ លទ្ធផលស្ទង់មតិស្តីពី «Future of Jobs» របស់ World Economic Forum (WEF) កាលពីដើមខែមករា ឆ្នាំ២០២៥ បង្ហាញថា ក្រុមហ៊ុននៅទូទាំងពិភពលោក ស្មើ៤១% គ្រោងកាត់បន្ថយ ឬបញ្ឈប់បុគ្គលិក និងប្រើប្រាស់បច្ចេកវិទ្យា AI ជំនួស នៅឆ្នាំ២០៣០ ។

វាជាការស្ទង់មតិក្រុមហ៊ុនធំៗរាប់រយនៅលើពិភពលោក ហើយលទ្ធផលស្ទង់មតិបង្ហាញទៀតថា ក្រុមហ៊ុនជាង៧៧% មានគម្រោងបណ្តុះបណ្តាលជំនាញថ្មីដល់បុគ្គលិក ចាប់ពីឆ្នាំ២០២៥ ដល់ឆ្នាំ២០៣០ ដើម្បីឱ្យបុគ្គលិកអាចធ្វើការជាមួយបច្ចេកវិទ្យា AI បានល្អ ។ តាមរបាយការណ៍ឆ្នាំ២០២៥ បង្ហាញថា បច្ចេកវិទ្យាទំនើបនឹងផ្តល់លទ្ធផលល្អ១០០% ដល់គ្រប់តួនាទីការងារ ដែលរបាយការណ៍នេះផ្ទុយពីរបាយការណ៍កាលពីឆ្នាំ២០២៣ ។

ការរីកចម្រើននៃបច្ចេកវិទ្យា AI បានផ្លាស់ប្តូរទីផ្សារការងារយ៉ាងឆាប់រហ័ស និងធ្វើឱ្យក្រុមហ៊ុននានាត្រូវការបុគ្គលិកមានជំនាញបច្ចេកវិទ្យាកាន់តែច្រើន ខណៈជំនាញផ្សេងៗធ្លាក់ចុះ ដូចជា ៖ Graphic Designer ។ បច្ចេកវិទ្យា AI បានធ្វើឱ្យផ្លាស់ប្តូរក្នុងផ្នែកឧស្សាហកម្ម និងការងារគ្រប់វិស័យ ដោយបច្ចេកវិទ្យានេះអាចបង្កើតសារ រូបភាព និងខ្លឹមសារផ្សេងៗតាមតម្រូវការអ្នកប្រើប្រាស់ ។

ចំណែកការងារដែលនាយកក្រុមហ៊ុនគិតថា ចំនួនបុគ្គលិកនឹងធ្លាក់ចុះយ៉ាងឆាប់រហ័សនាពេលឆាប់ៗ រួមមាន ៖ បុគ្គលិកប្រៃសណីយ៍, ផ្នែកបេឡា និង Graphic Designer ខណៈបុគ្គលិកមានជំនាញបច្ចេកវិទ្យា នឹងមានតម្រូវការច្រើន។ រីឯការស្ទង់មតិកាលពីឆ្នាំ២០២៤ បញ្ជាក់ថា ក្រុមហ៊ុនជិត៧០% មានគម្រោងជួលបុគ្គលិកថ្មីមានជំនាញ AI ឬអាចធ្វើការជាមួយ AI ។

គួរបញ្ជាក់ថា រយៈពេលប៉ុន្មានឆ្នាំចុងក្រោយនេះ បច្ចេកវិទ្យា AI បានចូលមកធ្វើការងារជំនួសមនុស្សជាបន្តបន្ទាប់ ។ ជាក់ស្តែង ក្រុមហ៊ុនរក្សាទុកឯកសារ ឈ្មោះ Dropbox និង Duolingo គឺជា App រៀនភាសា បានបញ្ឈប់បុគ្គលិកមួយចំនួនដោយសារបច្ចេកវិទ្យា AI ៕