ព្រៃកោងកាងគឺជាសម្បត្តិធម្មជាតិដ៏មានតម្លៃបំផុត ដែលអាចផ្ដល់ជាជម្រកសម្រាប់មច្ឆាជាតិ ការពារសំណឹកដី ជារបៀងជម្រកតភ្ជាប់ពីតំបន់ដីគោក ឆ្នេរ និងសមុទ្រ រួមទាំងជាកន្លែងបង្កាត់ពូជ និងថ្នាលសម្រាប់សរីរាង្គសត្វសមុទ្រមួយចំនួនទៀតផង។
ព្រៃកោងកាងនៅក្នុងប្រទេសកម្ពុជា មិនត្រឹមតែជាតំបន់សហគមន៍អេកូទេសចរណ៍ មានសារៈសំខាន់ក្នុងប្រព័ន្ធអេកូឡូស៊ីប៉ុណ្ណោះទេ វាក៏បានបង្កើតប្រាក់ចំណូលដល់ប្រជាពលរដ្ឋផងដែរ។ ដូច្នេះហើយខាងក្រោមនេះគឺជាតំបន់ព្រៃកោងកាងចំនួន ៣ ដែលមានទេសភាពល្អឯកដូចផ្ទាំងគំនូរ ដែលលោកអ្នកគួរទៅលេងកម្សាន្តឱ្យបានម្តងក្នុងមួយឆាកជីវិត។
១.ឧទ្យានជាតិរាម៖ ឧទ្យានជាតិរាម មានទីតាំងស្ថិតនៅទិសនិរតីនៃប្រទេសកម្ពុជា ស្ថិតក្នុងស្រុកព្រៃនប់ ខេត្តព្រះសីហនុ ដែលនៅខាងត្បូងជាប់នឹងឈូងសមុទ្រថៃ។ ឧទ្យានជាតិនេះជាតំបន់សម្បូរទៅដោយសត្វសមុទ្រ មានទេសភាពប្រណីតនៅតាមកោះ និងឆ្នេរសមុទ្រប្រកបដោយខ្សាច់សក្បុស ទឹកសមុទ្រមានគុណភាព ជាពិសេសក៏មានព្រៃកោងកាងដ៏ស្រស់ស្អាត ដែលបានទាក់ទាញភ្ញៀវទេសចរឱ្យមកទស្សនានៅទីនេះមិនចេះជិនណាយ។
នៅពេលលោកអ្នកមកទស្សនាឧទ្យានជាតិរាម លោកអ្នកនឹង ទទួលបាននូវការកម្សាន្តយ៉ាងពិសេសដូចជា៖ គយគន់ឆ្នេរខ្សាច់ដ៏ល្អប្រណីត ស្រូបយកខ្យល់អាកាសដ៏ត្រជាក់បរិសុទ្ធតាមមាត់ឆ្នេរ ជាមួយបរិយាកាសដ៏ស្ងប់ស្ងាត់ រួមទាំងជិះទូកទៅមើលព្រៃកោងកាង ទស្សនាសត្វស្លាបជាច្រើនប្រភេទ រស់នៅតាមមាត់ព្រែក មានត្រដក់ កុក ក្រសារ មាន់ទឹក ទាទឹក ឬអាចធ្វើដំណើរកម្សាន្តក្នុងព្រៃបែបផ្សងព្រេងក៏បាន។
២.ពាមក្រសោប៖ តំបន់ពាមក្រសោបស្ថិតក្នុងភូមិពាមក្រសោប ឃុំពាមក្រសោប ស្រុកមណ្ឌលសីមា ខេត្តកោះកុង គឺជាសហគមន៍តំបន់ការពារធនធានធម្មជាតិ និងជាកន្លែងទេសចរណ៍ព្រៃកោងកាងដ៏ធំមួយរបស់ខេត្តកោះកុង។ ព្រៃ កោងកាងដុះចេញពីផ្ទៃទឹកដ៏ថ្លាឈ្វង់ ដោយមានដើមឈើដុះជាជួរដូចគេតម្រង់ បានក្លាយជាផ្ទាំងទស្សនីយភាពដ៏សម្បូរបែប និងប្រណីតបំផុត។ បច្ចុប្បន្នតំបន់ព្រៃកោងកាងនៅខេត្តកោះកុង មានប្រមាណមួយម៉ឺនហិកតា ក្នុងនោះមានពាមក្រសោប, កោះកាពិ, កោះស្រឡៅ, បឹងកាឆាង,ខេង ខូង, ជ្រោយប្រស់,តាតៃ និងទូលគគីរជាដើម។
៣.សហគមន៍នេសាទត្រពាំងសង្កែ៖ គឺជាកន្លែងទេសចរណ៍ដែលមានភាពទាក់ទាញ និងល្បីល្បាញបំផុតមួយប្រចាំខេត្តកំពត ស្ថិតនៅភូមិកំពង់កែស ឃុំត្រពាំងសង្កែ ស្រុកទឹកឈូ មានចម្ងាយត្រឹមតែ ៧ គីឡូម៉ែត្រប៉ុណ្ណោះពីរង្វង់មូលទុរេន។ សហគមន៍នេសាទត្រពាំងសង្កែ ជាកន្លែងកំសាន្តមួយដែលអភិរក្ស ហ៊ុមព័ទ្ធដោយព្រៃកោងកាងទំហំសរុប ៤៨ ហិចតាដុះលាតសន្ធឹងតាមបណ្តោយព្រែកក្បាលរមាសរហូតដល់ដៃសមុទ្រ។
ដើម្បីទៅដល់ទីនោះ ភ្ញៀវទេសចរអាចធ្វើដំណើរចេញពីទីរួមខេត្តកំពតតាមបណ្ដោយផ្លូវជាតិលេខ ៣៣ ឆ្ពោះទៅកាន់ខេត្តកែបចម្ងាយប្រហែល ៧ គីឡូម៉ែត្រ រួចបត់ស្តាំតាមផ្លូវបេតុងតូចមួយ ហើយបន្តដំណើរប្រហែល ៥០០ ម៉ែត្រទៀតនឹងបានទៅដល់ទីតាំងដ៏ស្រស់ស្អាតមួយកន្លែងនេះហើយ។ នៅពេលទៅដល់លោកអ្នកនឹងបានឃើញទិដ្ឋភាពព្រៃឈើពណ៌បៃតងយ៉ាងសម្បូរបែប ផ្ទះបឹងហ្គាឡូ បណ្ណាល័យ អាហារដ្ឋាន ទូកទេសចរណ៍ និងថ្នាលបណ្តុះកូនកោងកាងទៀតផង៕
