សហរដ្ឋអាមេរិក ៖ នៅខែមករា ឆ្នាំ២០២៥ មហាជនបានចាប់អារម្មណ៍នឹងពាក្យចចាមអារ៉ាមមួយថា អតីតប្រធានាធិបតីអាមេរិក លោក បារ៉ាក់ អូបាម៉ា បានបញ្ចប់ជីវិតគូជាមួយភរិយា លោកស្រី មីស៊ែល អូបាម៉ា ដែលរស់នៅជាមួយគ្នា៣០ឆ្នាំ ក្រោយពីគេសង្កេតឃើញថា អ្នកទាំងពីរពុំបង្ហាញមុខជាមួយគ្នាជាសាធារណៈ រួមទាំងក្នុងកម្មវិធីនយោបាយ ។ ជាមួយគ្នានេះ មហាជនក៏បានលើកឡើងពីតារាស្រីហូលីវូដ ជេនីហ្វ័រ អានិស្តុន ថា អ្នកនាងជាស្រីស្នេហ៍ថ្មីរបស់លោក អូបាម៉ា ។

ពាក្យចចាមអារ៉ាមនេះបានផ្ទុះការចាប់អារម្មណ៍យ៉ាងខ្លាំងក្នុងបណ្តាញសង្គម ក្រោយពីទស្សនាវដ្តី InTouch ផ្សព្វផ្សាយអត្ថបទមួយមានចំណងជើងថា «The Truth About Jen & Barack» ដែលនិយាយពីទំនាក់ទំនងរវាងអ្នកនាង អានិស្តុន ជាមួយលោក អូបាម៉ា ។ បន្ទាប់មក ក៏មានពាក្យចចាមអារ៉ាមជាច្រើនថា អ្នកទាំងពីរបានសេពគប់គ្នាលួចលាក់ ប៉ុន្តែគ្មានការបញ្ជាក់ច្បាស់លាស់ពីស្នេហានេះទេ ។ ក្រៅពីនេះ មនុស្សមួយចំនួនអះអាងថា លោក អូបាម៉ា និងអ្នកស្រី មីស៊ែល ចែកផ្លូវគ្នាហើយ បច្ចុប្បន្ន អ្នកទាំងពីររាប់អានគ្នាជាមិត្តភក្តិ ។

ប៉ុន្តែអ្នកនាង អានិស្តុន បានបកស្រាយយ៉ាងឆាប់រហ័សចំពោះពាក្យចចាមអារ៉ាមនេះ អំឡុងពេលសម្ភាសន៍កម្មវិធី «Jimmy Kimmel Live» ដោយអ្នកនាងនិយាយថា ការចុះផ្សាយរបស់ទស្សនាវដ្តី InTouch ពុំមែនជាការពិតឡើយ ។ អ្នកនាងពុំខឹងសម្បារទេ ប៉ុន្តែវាពុំពិតដូចការលើកឡើង ។ នាងគ្រាន់តែជួបលោក អូបាម៉ា តែម្តងប៉ុណ្ណោះ ហើយនាងស្គាល់អ្នកស្រី មីស៊ែល ជាងស្វាមី ។

ប៉ុន្តែការសង្ស័យថា លោក អូបាម៉ា មានទំនាក់ទំនងលួចលាក់ជាមួយនាង បានផ្ទុះការចាប់អារម្មណ៍ខ្លាំងក្នុងបណ្តាញសង្គម ។ គេហទំព័រកម្សាន្តអាមេរិកដ៏ល្បី ឈ្មោះ RadarOnline ផ្សព្វផ្សាយថា លោក អូបាម៉ា និងភរិយា មានបញ្ហាក្នុងជីវិតគូ ។ ទំនាក់ទំនងធ្លាប់តែល្អូកល្អើនប្រែជាតានតឹង ហើយវាជាលើកដំបូងដែលលោក អូបាម៉ា និងភរិយា ព្យាយាមលាក់បាំងបញ្ហា និងការចាប់អារម្មណ៍ពីទំនាក់ទំនងជាមួយអ្នកនាង អានិស្តុន ។ រីឯអ្នកស្រី មីស៊ែល មានអារម្មណ៍ខកចិត្ត ពីព្រោះបច្ចុប្បន្ន អ្នកស្រីនិងស្វាមី គ្រាន់តែជាមិត្តភក្តិប៉ុណ្ណោះ ។

ទោះជាគេហទំព័រនេះចុះផ្សាយគ្មានប្រភពច្បាស់លាស់ ប៉ុន្តែមហាជនជឿជាក់លើព័ត៌មាននេះ ដោយសារមនុស្សភាគច្រើនមើលឃើញថា លោក អូបាម៉ា និងភរិយា ពុំដើរទៅណាមកណាជាមួយគ្នាជាច្រើនលើក ជាពិសេស ក្នុងកម្មវិធីសំខាន់ ដូចជា ៖ ពិធីបុណ្យសពអតីតប្រធានាធិបតីអាមេរិក លោក ជីមី ខាតធ័រ (Jimmy Carter) និងពិធីឡើងកាន់តំណែងរបស់លោក Donald Trump ជាដើម ។

ចំណែកលោក អូបាប៉ា ពុំទាន់បដិសេធនឹងពាក្យចចាមអារ៉ាមថា លោកមានទំនាក់ទំនងជាមួយតារាស្រីហូលីវូដ អ្នកនាង អានិស្តុន ទេ ។ ហេតុនេះ ធ្វើឱ្យមហាជនលើពិភពលោក តាមដានថា តើវាជាការពិត ឬយ៉ាងណា?

ប្រទេសអ៊ីស្រាអែល ៖ ស្ត្រីមេផ្ទះមួយចំនួនចូលចិត្តចូលផ្ទះបាយចម្អិនម្ហូបអាហារ ប៉ុន្តែមានបញ្ហានៅត្រង់ថា ទោះជាដាក់គ្រឿងផ្សំយ៉ាងណា ប៉ុន្តែអាហារនៅតែពុំឆ្ងាញ់ គឺប្រៃខ្លាំងពេក ឬផ្អែមពេក ប៉ុន្តែពួកនាងអាចនឹងចូលចិត្តប្រើប្រាស់ឧបករណ៍ផ្សំគ្រឿងបំពាក់បច្ចេកវិទ្យា AI ជួយឱ្យអាហារមានរសជាតិកាន់តែឆ្ងាញ់ ។

វាជាឧបករណ៍ផ្សំគ្រឿងដ៏ឆ្លាតវៃ ដែលអាចដាក់គ្រឿងផ្សំឱ្យចូលគ្នាទៅក្នុងអាហារនីមួយៗដើម្បីបង្កើនរសជាតិ និងអាចរៀនសូត្រថា អ្នកប្រើប្រាស់ចូលចិត្តរសជាតិបែបណា ។ ឧបករណ៍ផ្សំគ្រឿងឆ្លាតវៃនេះឈ្មោះ «Spicerr» ផលិតដោយក្រុមហ៊ុននៅប្រទេសអ៊ីស្រាអែល ដែលក្រុមហ៊ុនបានយកឧបករណ៍នេះមកបង្ហាញក្នុងពិព័រណ៍បច្ចេកវិទ្យា «CES 2025» នៅទីក្រុងឡាសវេហ្គាស សហរដ្ឋអាមេរិក កាលពីដើមខែមករា ឆ្នាំ២០២៥ ។

អ្នកប្រើប្រាស់អាចជ្រើសរើសវិធីចម្អិនម្ហូប និងដាក់គ្រឿងផ្សំផ្សេងៗចូលក្នុងឧបករណ៍ផ្សំគ្រឿង Spicerr ។ បន្ទាប់មក វានឹងគណនាសមាមាត្រសមស្រប និងដាក់គ្រឿងផ្សំក្នុងអាហារដោយស្វ័យប្រវត្តិ ។ ឧបករណ៍ត្រូវបានបំពាក់ដោយបច្ចេកវិទ្យា AI ដើម្បីរៀនសូត្រពីចំណង់ចំណូលចិត្តរបស់អ្នកប្រើប្រាស់ក្នុងការដាក់គ្រឿងផ្សំអាហារផ្សេងៗ ។ វាអាចផ្សំគ្រឿងសមល្មមតាមរសជាតិយើងចូលចិត្ត ដូចជា ៖ បង្កើនក្លិនគ្រឿងទេសឱ្យឈ្ងុយ ឬដាក់ស្ករថែម ។

ក្រុមហ៊ុនអះអាងថា ការផលិតឧបករណ៍នេះក្នុងគោលបំណងឱ្យអ្នកចម្អិនអាហារទាំងឡាយទទួលបានបទពិសោធន៍ និងរីករាយ ព្រមទាំងផ្លាស់ប្តូរការផ្សំគ្រឿងអាហារដដែលៗគួរឱ្យធុញទ្រាន់ ក្លាយជាអាហារមានរសជាតិឆ្ងាញ់ជាងមុន ។ លើសពីនេះ វាជួយបង្កើនទំនុកចិត្តដល់ចុងភៅថ្មីផងដែរ ដែលបានប្រើប្រាស់ឧបករណ៍បន្ថែមរសជាតិអាហារ ។

បច្ចុប្បន្ន ក្រុមហ៊ុនកំពុងតែស្រាវជ្រាវពីបច្ចេកវិទ្យាទំនើបសម្រាប់បំពាក់ក្នុងឧបករណ៍ Spicerr ដើម្បីត្រៀមលក់នៅលើទីផ្សារ ប៉ុន្តែក្រុមហ៊ុនពុំបានបញ្ជាក់ពីពេលវេលាលក់ និងតម្លៃជាផ្លូវការទេ ៕

លោក Elon Musk បានប្រតិកម្មជាមួយគេហទំព័រដ៏ល្បីល្បាញ Wikipedia ដែលបានយករូបភាពលោកធ្វើកាយវិការត្រាប់តាមមេដឹកនាំផ្តាច់.ការ អាល្លឺម៉ង់ លោក Adolf Hitler ក្នុងថ្ងៃលោក Donald Trump ឡើងកាន់តំណែងប្រធានាធិបតីអាមេរិក ។ រូបភាពនេះធ្វើឱ្យមហាជនជជែកគ្នាយ៉ាងខ្លាំងពីភាពពុំសមរម្យក្នុងបណ្តាញសង្គម បែរជាគេហទំព័រនេះយកទៅសរសេរក្នុងប្រវត្តិរូបផ្ទាល់ខ្លួនរបស់លោក ។

កាលពីថ្ងៃទី២៣ ខែមករា ឆ្នាំ២០២៥ សារព័ត៌មានបរទេសរាយការណ៍ថា លោក Elon Musk មានប្រតិកម្មជាមួយលោក Jimmy Wales ជាអ្នកបង្កើតគេហទំព័រ Wikipedia ក្រោយពីគេហទំព័រនេះសរសេរក្នុងប្រវត្តិរូបផ្ទាល់ខ្លួនរបស់លោក Elon Musk ថា កាយវិការរបស់លោក គឺជាការគោរពបែបកងទ័ពណាស៊ី ដែលប្រើប្រាស់ក្នុងសង្គ្រាមលោកលើកទី២ ឬហៅថា (Nazi salute) ។

ការសរសេរបែបនេះធ្វើឱ្យលោក Elon Musk ពុំពេញចិត្តយ៉ាងខ្លាំង ហើយលោកបានសរសេរក្នុងបណ្តាញសង្គម X ថា នេះជាទង្វើរបស់គេហទំព័រ Wikipedia ដើម្បីការផ្សព្វផ្សាយពាណិជ្ជកម្ម ។ ក្រៅពីនេះ លោកក៏បានអំពាវនាវឱ្យអ្នកគាំទ្រក្នុងបណ្តាញសង្គម X ឈប់គាំទ្រគេហទំព័រនេះ ។

ប៉ុន្តែបញ្ហាពុំបញ្ចប់ត្រឹមនេះទេ ពីព្រោះលោក Jimmy Wales អ្នកបង្កើតគេហទំព័រ Wikipedia បានបញ្ចេញមតិលើការបង្ហោះរបស់លោក Elon Musk ថា លោក Elon Musk ពុំពេញចិត្តនឹងការសរសេររបស់ Wikipedia ដោយសារលោកមានអារម្មណ៍មិនល្អ និងមានគំនិតអគតិចំពោះ Wikipedia តាំងពីលោកព្យាយាមទិញ Wikipedia កាលពីឆ្នាំ២០២២ ។

លោក Jimmy Wales បន្តថា ការសរសេរក្នុង Wikipedia ពុំមែនជាការផ្សព្វផ្សាយពាណិជ្ជកម្មទេ ប៉ុន្តែវាជាការពិត ពីព្រោះលោក Elon Musk ធ្វើកាយវិការតាមមេដឹកនាំផ្តាច់ការអាល្លឺម៉ង់ រហូតដល់ទៅ២លើក ។ លោកចង់ឱ្យមនុស្សគ្រប់គ្នាបានឃើញ និងយកទៅប្រៀបធៀបចំពោះការវិការគោរពពួកណាស៊ី ។ ហេតុនេះ វាពុំចម្លែកទេ ដែល Wikipedia សរសេរ និងបង្ហោះរូបភាពរបស់លោក ។

កន្លងមក លោក Elon Musk នាយកក្រុមហ៊ុន Tesla និង SpaceX ធ្លាប់ប្រកាសថា លោកនឹងផ្តល់ប្រាក់ចំនួន១ពាន់លានដុល្លារអាមេរិកឱ្យគេហទំព័រ Wikipedia បើយល់ព្រមផ្លាស់ប្តូរឈ្មោះទៅជា Dikipedia ៕

ប្រទេសថៃ ៖ នាយករដ្ឋមន្ត្រីថៃ លោកស្រី ផេថងថាន ស៊ីណាវ៉ាត់ បានស្នើទៅក្រសួងដឹកជញ្ជូន អនុញ្ញាតឱ្យពលរដ្ឋរស់នៅទីក្រុងបាងកក ជិះរថភ្លើងអាកាស និងរថយន្តក្រុងពុំគិតថ្លៃរយៈពេល៧ថ្ងៃ គឺចាប់ពីថ្ងៃទី២៥ រហូតដល់ថ្ងៃទី៣១ ខែមករា ឆ្នាំ២០២៥ ដើម្បីកាត់បន្ថយខ្យល់ពុលក្នុងទីក្រុងដែលកំពុងកើនឡើងខ្លាំង ។ រដ្ឋាភិបាលនឹងត្រៀមថវិកា១៤០លានបាត ទុកផ្តល់ឱ្យក្រុមហ៊ុនដឹកជញ្ជូននានាសម្រាប់ការចំណាយរយៈពេល៧ថ្ងៃនេះ ។

កាលពីថ្ងៃទី២៤ ខែមករា ឆ្នាំ២០២៥ នៅវិមានរដ្ឋាភិបាល លោក សុរិយៈ ជឹងរុងរឿងកិច ឧបនាយករដ្ឋមន្ត្រី និងរដ្ឋមន្ត្រីក្រសួងដឹកជញ្ជូន លើកឡើងថា លោកស្រី ផេថងថាន បានស្នើឱ្យក្រសួងដឹកជញ្ជូន និងស្ថាប័នពាក់ព័ន្ធរួមគ្នាដោះស្រាយបញ្ហាខ្យល់ពុលនៅលើបរិយាកាសក្នុងទីក្រុងបាងកក ដោយអនុញ្ញាតឱ្យពលរដ្ឋជិះរថភ្លើងអាកាស និងរថយន្តក្រុងពុំគិតថ្លៃ៧ថ្ងៃ គឺចាប់ពីថ្ងៃទី២៥ រហូតដល់ថ្ងៃទី៣១ ខែមករា ។

ហេតុនេះ លោកក៏បានទំនាក់ទំនងទៅរថភ្លើងអាកាស (BTS) និងក្រុមហ៊ុនផ្លូវល្បឿនលឿន ព្រមទាំងក្រុមហ៊ុនរថភ្លើងអាកាសក្រុងបាងកក (BEM) អំពីវិធានការដោះស្រាយបញ្ហាខ្យល់ពុលរបស់រដ្ឋាភិបាល ។ ក្រុមហ៊ុននានាបានទទួលប្រាក់ចំណូលប៉ុន្មានក្នុងការដឹកជញ្ជូនអ្នកដំណើររយៈពេល៧ថ្ងៃកន្លងមក គឺរដ្ឋាភិបាលនឹងផ្តល់ប្រាក់ឱ្យវិញតាមចំនួននោះ បើទោះជាមានពលរដ្ឋមកជិះរថភ្លើងអាកាស និងរថយន្តក្រុងហ្វ្រីច្រើនក្តី ។

រដ្ឋាភិបាលបានត្រៀមថវិកា ចំនួន១៤០លានបាត ទុកផ្តល់ឱ្យក្រុមហ៊ុនដឹកជញ្ជូននានាសម្រាប់ការចំណាយរយៈពេល៧ថ្ងៃនេះ ។ លោកស្រី ផេថងថាន នឹងស្នើទៅកាន់គណៈរដ្ឋមន្ត្រីដើម្បីអនុម័តថវិកាសំណង ហើយរំពឹងថា រដ្ឋមន្ត្រីគ្រប់រូបនឹងឯកភាពតាមវិធានការរបស់នាយករដ្ឋមន្ត្រី ។ ក្រៅពីនេះ ក្រសួងដឹកជញ្ជូនបានបង្កើតទីតាំងត្រួតពិនិត្យ៨កន្លែង ដើម្បីស្ទាក់ចាប់រថយន្តបញ្ចេញផ្សែងខ្មៅបើកបរក្នុងទីក្រុងបាងកក ។

លោករដ្ឋមន្ត្រីក្រសួងដឹកជញ្ជូនជឿជាក់ថា ពលរដ្ឋនឹងមកជិះរថភ្លើងអាកាស និងរថយន្តក្រុងហ្វ្រី ចាប់ពី២០% ទៅ៣០% ។ បើគ្រប់កំណត់រយៈពេល៧ថ្ងៃ ហើយខ្យល់ពុលនៅតែពុំធ្លាក់ចុះ រដ្ឋាភិបាលនឹងវាយតម្លៃឡើងវិញថា តើគួរឱ្យពលរដ្ឋប្រើប្រាស់មធ្យោបាយដឹកជញ្ជូនសាធារណៈហ្វ្រីបន្តទៀតដែរឬទេ?

ប្រជាជន Doma នៃប្រទេស Zimbabwe គឺមានភាពល្បីល្បាញខ្លាំងណាស់ ដោយសារពួកគេកើតមកមានម្រាមជើងពីរ ស្រដៀងនឹងសត្វអូទ្រីស ត្រូវបានគេហៅឈ្មោះក្រៅថា “មនុស្សអូទ្រីស”។
ប្រជាជន Doma ដែលត្រូវបានគេស្គាល់ថា Vadoma ឬ Bantwana រស់នៅភាគខាងជើងប្រទេស Zimbabwe មានកត្តាហ្សែនចម្លែកបំផុតមួយត្រូវបានគេស្គាល់ថា ectrodactyly ដែលជំងឺនេះបណ្តាលឱ្យបាត់ម្រាមជើងមួយចំនួន ផ្តល់ឱ្យជើងមានរូបរាងដូចដង្កៀប ដូច្នេះជើងរបស់ពួកគេម្នាក់ៗគឺមានម្រាមពីរប៉ុណ្ណោះ។

ទោះបីជាមានបញ្ហាដែលបណ្តាលមកពីជំងឺហ្សែន ectrodactyly ដូចជាពិបាកដើរ និងរត់ក៏ដោយ ក៏ប្រជាជន Doma មិនចាត់ទុកវាជាពិការភាពនោះទេ។ ពួកគេបានសម្របខ្លួនទៅនឹងលក្ខណៈនៃជើងរបស់ពួកគេបានយ៉ាងល្អ ហើយអ្នកខ្លះជឿថាម្រាមជើងពីរបានធ្វើឱ្យពួកគេកាន់តែខ្លាំងក្នុងការឡើងដើមឈើ ដែលជាជំនាញដ៏មានតម្លៃសម្រាប់សង្គមអ្នកប្រមាញ់ផងដែរ។ ហេតុនេះរោគសញ្ញានេះគឺជារឿងធម្មតានោះទេសម្រាប់កុលសម្ព័ន្ធ Doma។

ប្រជាជន Doma គឺជាកុលសម្ព័ន្ធអ្នកប្រមាញ់ដែលនៅសេសសល់តែមួយគត់នៅក្នុងប្រទេសហ្ស៊ីមបាវ៉េ ប៉ុន្តែសិទ្ធិទទួលបានដី និងធនធានរបស់ពួកគេគឺមានកម្រិត។ ក្នុងរយៈពេលប៉ុន្មានឆ្នាំចុងក្រោយនេះ កុលសម្ព័ន្ធបានប្រឈមមុខនឹងសម្ពាធពីរដ្ឋាភិបាល ដោយទាមទារឱ្យបញ្ឈប់ការបរបាញ់ ដោយបង្ខំពួកគេឱ្យបោះបង់ចោលរបៀបរស់នៅបែបប្រពៃណីរបស់ពួកគេ ហើយផ្លាស់ទៅរស់នៅតំបន់ទំនាបវិញ។

បច្ចុប្បន្នប្រជាជន Doma ហាក់មានការផ្លាស់ប្តូរច្រើនទៅតាមបរិបទសង្គម ដោយពួកមិនបរបាញ់សត្វព្រៃទៀតទេ ហើយប្រកបរបរកសិកម្ម និងរស់នៅក្នុងសហគមន៍តាំងទីលំនៅ សាងសង់ផ្ទះរបស់ពួកគេនៅលើដីខ្ពស់ដើម្បីការពារខ្លួនពីសត្វព្រៃ។ គួរបញ្ជាក់ដែរថា ក្រៅកុលសម្ព័ន្ធ Doma របស់ប្រទេស Zimbabwe ដែលមានម្រាមជើងដូចសត្វបក្សី កុលសម្ព័ន្ធផ្សេងទៀតដូចជា Talunda និង Taluta Kalgana នៅវាលខ្សាច់ Kalahari នៃអាហ្វ្រិកខាងត្បូងក៏មានម្រាមជើងពីរដូចសត្វបក្សីផងដែរ៕