ប្រទេសអូស្ត្រាលី ៖ កាលពីដើមខែកុម្ភៈ ឆ្នាំ២០២៥ ពលរដ្ឋនៅទីក្រុងខេនបឺរ៉ា ប្រទេសអូស្ត្រាលី បានឈរតម្រង់ជួររង់ចាំមើលផ្កាសាកស.ព រីកជាលើកទី៣ ដែលផ្កានេះមានកម្ពស់ស្មើមនុស្ស និងក្លិនស្អុយខ្លាំងដូចសាកស.ព រលួយ ។ វាពុំរីកញឹកញាប់ទេ ហើយរយៈពេលជាច្រើនឆ្នាំ ទើបវារីកម្តង ព្រោះតែលក្ខណៈប្លែករបស់ផ្កាធ្វើឱ្យពលរដ្ឋអូស្ត្រាលី និងភ្ញៀវទេសចរមកប្រមូលផ្តុំគ្នាស្រង់ក្លិន និងថតរូបផ្កាដ៏កម្រនេះ ។

អ្នកជំនាញរុក្ខជាតិអូស្ត្រាលីនិយាយថា ផ្កាប្រភេទនេះអាចធ្វើឱ្យខ្លួនវាកាន់តែក្តៅខ្លាំង ហើយពេលផ្កាញីត្រៀមខ្លួនបង្កាត់ពូជ វានឹងបញ្ចេញក្លិនស្អុយដើម្បីទាក់ទាញសត្វល្អិតយកកេសរ ឬលម្អងផ្កាទៅផ្សំជាមួយផ្កាឈ្មោល ។ ជាទូទៅ ផ្កានេះនឹងរីកចាប់ពីរយៈពេល៧ឆ្នាំ ទៅ១០ឆ្នាំ ហើយពេលរីកម្តង គឺចាប់ពី២៤ម៉ោង ទៅ៧២ម៉ោង (ឬចាប់ពី១ថ្ងៃ ទៅ៣ថ្ងៃប៉ុណ្ណោះ) វានឹងស្វិតស្រពោនតាមធម្មជាតិ ។

ការរីករបស់ផ្កាធ្វើឱ្យមនុស្សម្នាភ្ញាក់ផ្អើលយ៉ាងខ្លាំង ពីព្រោះពួកគេកម្រមានឱកាសឃើញវារីកណាស់ ។ វាជាប្រភេទផ្កាជិតផុតពូជ ហើយគេសន្និដ្ឋានថា ផ្កានេះបានដុះនៅតាមព្រៃធម្មជាតិត្រឹមតែ១ពាន់ដើមប៉ុណ្ណោះ ។ បច្ចុប្បន្ន ផ្កាសាកសព ត្រូវបានប្រទេសផ្សេងៗយកទៅបង្ហាញនៅតាមទីកន្លែងនានា ។

ក្រៅពីនេះ ក៏មានភ្ញៀវទេសចរចូលមើលផ្កាសាកសពផងដែរ អ្នកខ្លះឈរតម្រង់ជួររហូតដល់២ម៉ោង ដើម្បីថតរូបសែលហ្វី និងស្រង់ក្លិនផ្កា ។ មនុស្សជាច្រើនទទួលស្គាល់ថា ក្លិនរបស់ផ្កាស័ក្តិសមនឹងឈ្មោះពិតមែន គឺមានក្លិនដូចស្រោមជើងចាស់ៗ ឬខ្មោចជ្រូក ឬក្លិនអាហារផ្អូម ។ ផ្កាសាកសពមានត្របកធំបំផុតលើពិភពលោក វាព្យាយាមបញ្ចេញក្លិនស្អុយចេញក្រៅដើម្បីឱ្យសត្វល្អិតមកយកលម្អងរបស់វាទៅផ្សំជាមួយផ្កាផ្សេង ។

គួរបញ្ជាក់ថា ផ្កាសាកសពមានកម្ពស់ជាង៣ម៉ែត្រ ហើយត្រូវបានគេរកឃើញលើកដំបូងនៅឆ្នាំ១៨៧៨ នៅបរិវេណព្រៃត្រូពិកកោះស៊ូម៉ាត្រា ប្រទេសឥណ្ឌូណេស៊ី ។ ផ្កានេះនឹងចំណាយពេលយ៉ាងហោចណាស់ ចាប់ពី៥ឆ្នាំ ទៅ១០ឆ្នាំ ដើម្បីលូតលាស់ និងរីកលើកដំបូង ហើយផ្ការីកអាស្រ័យលើបរិស្ថានជុំវិញ ។ រីឯផ្កាខ្លះទៀតរីករយៈពេល២ឆ្នាំ ឬ៣ឆ្នាំម្តង ៕

ប្រទេសប៉ាណាម៉ា ៖ ប្រធានាធិបតីអាមេរិក លោក Donald Trump តែងតែដាក់សម្ពាធលើប្រទេសផ្សេងៗ ដើម្បីឱ្យប្រទេសទាំងនោះធ្វើតាមតម្រូវការរបស់លោក ហើយប៉ាណាម៉ា ក៏ដូចគ្នាដែរ ។ លោក Trump បាននិយាយនាពេលកន្លងមកថា នឹងគ្រប់គ្រងប៉ាណាម៉ា ដោយសារប្រទេសនេះទទួលឥទ្ធិពលចិនខ្លាំងពេក ហើយអាមេរិកចង់ដកឥទ្ធិពលចិនចេញ ។

កាលពីថ្ងៃទី៧ ខែកុម្ភៈ ឆ្នាំ២០២៥ សារព័ត៌មានបរទេសរាយការណ៍ថា ប្រធានាធិបតីប៉ាណាម៉ាបានយល់ស្របចំពោះការលើកឡើងរបស់លោក Trump ដោយសម្រេចចិត្តដកប៉ាណាម៉ាចេញពីគម្រោងខ្សែក្រវ៉ាត់ និងផ្លូវរបស់រដ្ឋាភិបាលទីក្រុងប៉េកាំង ខណៈមន្ត្រីទូតអាមេរិកនិយាយថា នេះហើយជាជោគជ័យរបស់អាមេរិក ។

ប្រធានាធិបតីប៉ាណាម៉ា លោក Jose Raul Mulino ប្រកាសកាលពីថ្ងៃទី៦ ខែកុម្ភៈ ថា លោកបានផ្តល់ដំណឹងទៅចិនឱ្យជ្រាបជាផ្លូវការរួចហើយពីការសម្រេចចិត្តដកខ្លួនចេញពីគម្រោងវិនិយោគ និងសាងសង់ខ្នាតធំរបស់ចិនស្របតាមគម្រោងខ្សែក្រវ៉ាត់ និងផ្លូវ ក្រោយពីប៉ាណាម៉ាចុះកិច្ចព្រមព្រៀងជាមួយចិន កាលពីឆ្នាំ២០១៧ ។ លោក ពុំជ្រាបពីអ្នកដែលតាំងចិត្តចុះកិច្ចព្រមព្រៀងវិនិយោគជាមួយចិនទេ តើអ្វីដែលប៉ាណាម៉ាទទួលបាននារយៈពេលប៉ុន្មានឆ្នាំនេះ? តើអ្វីដែលល្អបំផុតបានពីគម្រោងខ្សែក្រវ៉ាត់ និងផ្លូវសម្រាប់ប៉ាណាម៉ា? ដូច្នេះ លោកសម្រេចចិត្តដកខ្លួនចេញពីគម្រោង ។

មន្ត្រីក្រសួងការបរទេសចិនបានលើកឡើងពីការជ្រៀតជ្រែករបស់អាមេរិកចំពោះការចាប់ផ្តើមគម្រោងខ្សែក្រវ៉ាត់ និងផ្លូវរបស់ប៉ាណាម៉ា ដោយការដាក់សម្ពាធ និងបង្ខំ ហើយមន្ត្រីរូបនេះប្រាប់ថា ការសម្រេចចិត្តរបស់ប៉ាណាម៉ាធ្វើឱ្យចិនខកបំណងយ៉ាងខ្លាំង ។ ចិនចង់ឃើញប៉ាណាម៉ាសម្រេចចិត្តបានត្រឹមត្រូវផ្អែកតាមសម្ព័ន្ធភាពទ្វេភាគី និងផលប្រយោជន៍រួមរបស់ប្រទេសទាំងពីរ និងចៀសផុតពីការជ្រៀតជ្រែកខាងក្រៅ ។

គួរបញ្ជាក់ថា ការសម្រេចចិត្តដកខ្លួនចេញពីគម្រោងខ្សែក្រវ៉ាត់ និងផ្លូវរបស់ចិន គឺបានកើតឡើងក្រោយពីរដ្ឋមន្ត្រីក្រសួងការបរទេសអាមេរិកធ្វើដំណើរទស្សនកិច្ចនៅប៉ាណាម៉ា ហើយលើកឡើងពីការបារម្ភរបស់លោក Trump ពាក់ព័ន្ធនឹងចិនមានឥទ្ធិពលកាន់តែខ្លាំងលើប៉ាណាម៉ា ។ មន្ត្រីទូតអាមេរិកបានហៅការដកខ្លួននេះថា ជាជោគជ័យរបស់អាមេរិក ។

ប៉ាណាម៉ា គឺជាប្រទេសអាមេរិកឡាទីនដំបូងគេ ដែលបានចូលរួមគម្រោងខ្សែក្រវ៉ាត់ និងផ្លូវរបស់ប្រធានាធិបតីចិន លោក ស៊ី ជិនពីង ក្រោយពីប៉ាណាម៉ាផ្តាច់ទំនាក់ទំនងជាមួយតៃវ៉ាន់មិនយូរប៉ុន្មានកាលពីឆ្នាំ២០១៧ ហើយប្រកាសទទួលស្គាល់អធិបតេយ្យភាពចិនលើតៃវ៉ាន់ ៕

ប្រទេសឥណ្ឌូណេស៊ី ៖ រដ្ឋាភិបាលឥណ្ឌូណេស៊ីព្យាយាមកាត់បន្ថយអត្រាការស្លា.ប់ របស់ពលរដ្ឋដោយសារជំងឺផ្សេងៗ តាមរយៈការបង្កើតគម្រោងត្រួតពិនិត្យសុខភាពពលរដ្ឋគ្រប់រូបពុំគិតថ្លៃ ហើយគម្រោងនេះចាប់អនុវត្តពីថ្ងៃទី១០ ខែកុម្ភៈ ឆ្នាំ២០២៥ តទៅ ។ ក្រៅពីនេះ រដ្ឋាភិបាលឥណ្ឌូណេស៊ី ក៏មានគម្រោងផ្តល់អាហារថ្ងៃត្រង់ពុំគិតថ្លៃដល់សិស្សសាលាផងដែរ ។

ឥណ្ឌូណេស៊ីចាប់ផ្តើមអនុវត្តគម្រោងត្រួតពិនិត្យសុខភាពពលរដ្ឋប្រចាំឆ្នាំពុំគិតថ្លៃ ក្នុងគោលបំណងឱ្យពលរដ្ឋដឹងថា តើពួកគេកើតជំងឺអ្វីខ្លះ ដើម្បីព្យាបាលបានទាន់ពេលវេលា ។ ហេតុនេះ ពលរដ្ឋគ្រប់រូបមិនថាមានអាយុប៉ុន្មាន គឺអាចត្រួតពិនិត្យសុខភាពនៅថ្ងៃកំណើតរបស់ខ្លួន ហើយគ្រូពេទ្យនឹងពិនិត្យឈាម វាស់សម្ពាធឈាម វាស់ភ្នែក ត្រចៀក ពិនិត្យហានិភ័យជំងឺបេះដូង មហារីក សុខភាពផ្លូវចិត្ត និងដាច់សរសៃឈាមខួរក្បាល ។

ឥណ្ឌូណេស៊ី គឺជាប្រទេសមានពលរដ្ឋច្រើនលំដាប់ទី៤ លើពិភពលោក ហើយពលរដ្ឋឥណ្ឌូណេស៊ីភាគច្រើនស្លាប់ដោយសារជំងឺបេះដូង ដាច់សរសៃឈាមខួរក្បាល និងរបេង បើការត្រួតពិនិត្យរកឃើញជំងឺ គឺពលរដ្ឋនឹងអាចព្យាលជំងឺទាន់ពេលដើម្បីកាត់បន្ថយអត្រាការស្លាប់ ។ មន្ត្រីក្រសួងសុខាភិបាលនិយាយថា គម្រោងពិនិត្យសុខភាពពលរដ្ឋពុំគិតថ្លៃ នឹងចំណាយថវិកាច្រើនរហូតដល់ជាង១៨ម៉ឺនដុល្លារអាមេរិក ដែលចាត់ទុកថា គឺជាគម្រោងផ្នែកសុខាភិបាលដ៏ធំបំផុតរបស់ឥណ្ឌូណេស៊ី ។

ពីដំបូង រដ្ឋាភិបាលមានបំណងចំណាយថវិកាច្រើនជាងនេះសម្រាប់គម្រោងពិនិត្យសុខភាពពលរដ្ឋ ប៉ុន្តែថវិកាគម្រោងនេះត្រូវបានកាត់បន្ថយមួយចំនួនក្រោយពីប្រធានាធិបតីឥណ្ឌូណេស៊ី លោក Prabowo Subianto ថ្លែងថា នឹងបែងចែកថវិកាខ្លះសម្រាប់ចំណាយក្នុងគម្រោងផ្សេង ដែលលោកធ្លាប់សន្យាពេលរកសំឡេងឆ្នោត ដូចជា ៖ គម្រោងផ្តល់អាហារថ្ងៃត្រង់ពុំគិតថ្លៃដល់សិស្សសាលា ។

មន្ត្រីអគ្គនាយកដ្ឋានសុខភាពបឋម និងសហគមន៍នៃក្រសួងសុខាភិបាលឱ្យដឹងថា គម្រោងនេះមានតួនាទីការពារជំងឺផ្សេងៗដែលឆក់យកជីវិតពលរដ្ឋ ហើយក្រសួងសង្ឃឹមថា ការពិនិត្យសុខភាពពលរដ្ឋពុំគិតថ្លៃនឹងធ្វើឡើងចាប់ពីទារក រហូតដល់មនុស្សចាស់ ដើម្បីឱ្យពួកគេយល់ដឹងពីសុខភាពរបស់ខ្លួន ។ រហូតមកដល់ថ្ងៃទី១០ ខែកុម្ភៈ ពលរដ្ឋប្រមាណ១៧,០០០នាក់ បានមកពិនិត្យសុខភាព ហើយគោលបំណងរបស់គម្រោងពុំមែនព្យាបាលជំងឺទេ ប៉ុន្តែជាការលើកទឹកចិត្តឱ្យពលរដ្ឋព្យាបាលជំងឺទាន់ពេល ៕

ប្រទេសថៃ ៖ កាលពីថ្ងៃទី១០ ខែកុម្ភៈ ឆ្នាំ២០២៥ សារព័ត៌មានថៃរាយការណ៍ថា យន្តហោះក្រុមហ៊ុនអាកាសចរណ៍ Aeroflot ដែលចាកចេញពីខេត្តភូកេត ប្រទេសថៃ ទៅកាន់ទីក្រុងមូស្គូ ប្រទេសរុស្ស៊ី មានបញ្ហាបច្ចេកទេសពេលហោះហើរ ហើយពុំអាចធ្វើដំណើរទៅដល់គោលដៅ ។ យន្តហោះនេះបានហោះចុះឡើងនៅលើសមុទ្រអាន់ដាម៉ាន់ រហូតដល់ជាង៥ម៉ោង ក្រោយមក អាកាសយានិកក៏បានចុះចតយន្តហោះនៅអាកាសយានដ្ឋានសុវណ្ណភូមិ ដោយសុវត្ថិភាព ។

យន្តហោះ SU277 របស់ក្រុមហ៊ុនអាកាសចរណ៍រុស្ស៊ី Aeroflot បានកំណត់ការធ្វើដំណើរពីអាកាសយានដ្ឋានភូកេត ប្រទេសថៃ ទៅកាន់អាកាសយានដ្ឋាន Sheremetyevo ទីក្រុងមូស្គូ ប្រទេសរុស្ស៊ី ប៉ុន្តែយន្តហោះនេះធ្វើដំណើរយឺតយ៉ាវជាងការប្រកាស ។ ក្រោយចាកចេញពីអាកាសយានដ្ឋានភូកេត យន្តហោះក៏តម្រង់ទៅទិសពាយ័ព្យ រួចហើយ យន្តហោះពុំបានហោះទៅទីក្រុងមូស្គូទេ បែរជាហោះចុះឡើងលើសមុទ្រអាន់ដាម៉ាន់ រយៈពេលជាង៥ម៉ោង ។

គ្មានព័ត៌មានបញ្ជាក់ថា ហេតុអ្វីទើបយន្តហោះនេះពុំអាចធ្វើដំណើរទៅដល់ទីក្រុងមូស្គូ ប៉ុន្តែគេសន្និដ្ឋានថា យន្តហោះអាចមានបញ្ហាបច្ចេកទេសមួយចំនួន ទើបហោះមិនឆ្ងាយពីខេត្តភូកេត បែបនេះ ។ សារព័ត៌មានថៃរាយការណ៍ថា យន្តហោះត្រូវចុះចតជាបន្ទាន់ ទើបអាកាសយានិកចាំបាច់ត្រូវបើកយន្តហោះលើសមុទ្រដើម្បីផ្តល់សុវត្ថិភាពដល់អ្នកដំណើរ ។

យន្តហោះ SU277 របស់ក្រុមហ៊ុនអាកាសចរណ៍ Aeroflot បានចុះចតនៅអាកាសយានដ្ឋានសុវណ្ណភូមិដោយសុវត្ថិភាព ខាងអាកាសយានដ្ឋានបានត្រៀមខ្លួនទទួលការចុះចតជាបន្ទាន់ ដោយសារយន្តហោះមានបញ្ហាបច្ចេកទេស ទើបពុំអាចហោះទៅដល់គោលដៅ ។ ភ្នាក់ងារអាកាសយានដ្ឋានបានត្រួតពិនិត្យយ៉ាងតឹងរ៉ឹង និងផ្តោតសំខាន់ខ្លាំងលើសុវត្ថិភាពអ្នកដំណើរ ។ នេះបើតាមភ្នាក់ងារអាកាសយានដ្ឋានសុវណ្ណភូមិ ។

លោក គិទីផុង គិទិខាចន នាយកអាកាសយានដ្ឋានសុវណ្ណភូមិ និយាយថា លោកបានស្នើឱ្យភ្នាក់ងារពាក់ព័ន្ធត្រៀមទប់ទល់ស្ថានការណ៍ ដូចជា ៖ ភ្នាក់ងារពន្លត់ភ្លើង ភ្នាក់ងារសង្គ្រោះ គ្រូពេទ្យ និងឧបករណ៍ផ្សេងៗ ។ ក្រោយពីយន្តហោះចុះចតនៅអាកាសយានដ្ឋានសុវណ្ណភូមិដោយសុវត្ថិភាព និងឱ្យអ្នកដំណើរចុះពីយន្តហោះ ភ្នាក់ងារអាកាសយានដ្ឋានបានបញ្ជូនកម្លាំងមកថែទាំ និងចែកទឹកបរិសុទ្ធឱ្យអ្នកដំណើរ ។

ក្រុមហ៊ុនអាកាសចរណ៍ Aeroflot សម្រេចចិត្តចុះចតនៅអាកាសយានដ្ឋានសុវណ្ណភូមិ បង្ហាញឱ្យឃើញថា ពួកគេមានទំនុកចិត្តលើស្តង់ដារសុវត្ថិភាព និងការត្រៀមខ្លួនករណីកើតអាសន្ន ។ អាកាសយានិកបាននាំបុគ្គលិកអាកាសចរណ៍១៥នាក់ និងអ្នកដំណើរ ៣៣១នាក់ ទៅសម្រាកក្នុងសណ្ឋាគារ ហើយក្រុមហ៊ុនអាកាសចរណ៍នឹងស្វែងរកយន្តហោះថ្មីឱ្យអ្នកដំណើរ ៕