រលកកម្ដៅដ៏ខ្លាំងក្លាមិនធ្លាប់មាន! យោងរបាយការណ៍ថ្មីៗនេះបង្ហាញថា ប្រទេសនានានៅទូទាំងតំបន់អាស៊ានកំពុងជួបប្រទះនឹងសីតុណ្ហភាពខ្ពស់ជាងធម្មតា ដោយនៅក្នុងប្រទេសខ្លះសីតុណ្ហភាពបានឡើងដល់ 49°C ដែលបង្កើតកំណត់ត្រាថ្មីក្នុងតំបន់ ហើយមានឱកាស 80%–100% នៃអាកាសធាតុក្តៅជាងធម្មតាក្នុងរដូវកាលបច្ចុប្បន្ន។ នេះបើយោងតាមការចុះផ្សាយរបស់ South China Morning Post។

អ្នកវិទ្យាសាស្ត្រនិយាយថា រលកកំដៅនេះមិនមែនបណ្តាលមកពីកត្តាតែមួយនោះទេ។ ផ្ទុយទៅវិញ វាគឺជាលទ្ធផលនៃការរួមបញ្ចូលគ្នានៃអែលនីញ៉ូ លំនាំអាកាសធាតុតាមរដូវ និងការប្រែប្រួលអាកាសធាតុរយៈពេលវែង ដែលទាំងអស់នេះធ្វើការរួមគ្នាទៅផ្ដុំកំដៅលើតំបន់មួយចំនួន។ ស្របគ្នានេះដែរ ជាមួយនឹងកម្រិតភ្លៀងធ្លាក់តិច មេឃស្រឡះ និងខ្យល់បក់ខ្សោយ វាបានបង្កើតលក្ខខណ្ឌកាន់តែអាក្រក់ទៅៗ ដែលអនុញ្ញាតឱ្យកំដៅកកកុញយ៉ាងឆាប់រហ័ស – ជាពិសេសនៅក្នុងទីក្រុង។

របាយការណ៍ដដែលនេះបង្ហាញថា នៅប្រទេសវៀតណាម សីតុណ្ហភាពបានឡើងដល់ 44.2°C ដែលជាកំណត់ត្រាខ្ពស់បំផុតមួយដែលមិនធ្លាប់មាននៅក្នុងប្រទេស ខណៈនៅប្រទេសថៃឯណោះ ខាងឧត្តុនិយមបានបង្ហាញការព្យាករណ៍ថាសីតុណ្ហភាពកើនឡើងដល់ 42–43°C និងមានរហូតដល់ 49°C នៅក្នុងតំបន់មួយចំនួន។ ក្រៅពីនេះ ប្រទេសមីយ៉ាន់ម៉ា ឡាវ កម្ពុជា និងប្រទេសមួយចំនួនទៀតក៏បានជួបប្រទះនឹងកំដៅខ្លាំងផងដែរ ឯសីតុណ្ហភាពអាចមានលើសពី 42°C នៅកន្លែងជាច្រើន។

អ្នកជំនាញបានព្រមានស្ថានភាពនេះថា គឺជា”រលកកម្ដៅដែលមិនធ្លាប់មានពីមុនមក” មិនមែនគ្រាន់តែជាការកើនឡើងសីតុណ្ហភាពធម្មតានោះទេ។ ជាមួយគ្នានេះ ផលប៉ះពាល់ក៏កំពុងត្រូវបានគេមើលឃើញរួចហើយដែរនៅទូទាំងប្រទេសអាស៊ាន។ គ្រោះថ្នាក់ដែលគេព្រួយបារម្ភជាងគេ គឺការកើនឡើងនៃហានិភ័យជំងឺដាច់សរសៃឈាមខួរក្បាល កង្វះជាតិទឹក និងការកើនឡើងនៃតម្រូវការថាមពលនៅទូទាំងតំបន់។

បច្ចុប្បន្នរដ្ឋាភិបាលប្រទេសនៅក្នុងតំបន់ កំពុងដោះស្រាយជាមួយនឹងការខ្វះខាតទឹក ការកើនឡើងនៃតម្រូវការអគ្គិសនី ទប់ស្កាត់ហានិភ័យភ្លើងឆេះព្រៃ និងកង្វល់សុខភាពរបស់ប្រជាជន។ នៅកន្លែងខ្លះ អាជ្ញាធរថែមទាំងកំពុងប្រើប្រាស់វិធានការបន្ទាន់ដូចជាការដាំពពកដើម្បីធ្វើឱ្យសីតុណ្ហភាពត្រជាក់ និងគ្រប់គ្រងស្ថានភាពគ្រោះរាំងស្ងួត។

អាស្រ័យហេតុនេះសូមបងប្អូនមានការប្រុងប្រយ័ត្ន ថែរក្សាសុខភាព និងទុកដាក់វត្ថុប្រើប្រាស់ជាពិសេសសម្ភារៈដែលងាយឆាបឆេះឲ្យបានត្រឹមត្រូវ ជៀសវាងកើតមានគ្រោះថ្នាក់ជាយថាហេតុណាមួយដែលមិននឹកស្មានដល់៕

ជម្រើសសាមញ្ញាងាយៗ ប៉ុន្តែអាចនឹងទទួលបានប្រសិទ្ធភាពខ្ពស់! ប្រទេសឥណ្ឌាឥឡូវនេះកំពុងពិចារណាដោះលែងពស់ពិស និងក្រពើចូលទៅក្នុងទន្លេ និងព្រៃនៅតាមបណ្ដោយព្រំដែនរបស់ខ្លួនជាមួយប្រទេសបង់ក្លាដែស ដើម្បីទប់ស្កាត់ការឆ្លងដែនខុសច្បាប់។ នេះបើយោងតាមការចុះផ្សាយរបស់ទីភ្នាក់ងារសារព័ត៌មាន CNA។

យោងតាមរបាយការណ៍ កងកម្លាំងសន្តិសុខព្រំដែនរបស់ប្រទេសឥណ្ឌាបាននឹកឃើញគំនិតដ៏មិនធម្មតាមួយ គឺការប្រើប្រាស់សត្វកា.ចសាហាវដូចជាក្រពើ និងពស់ពិសជា “របាំងធម្មជាតិ” តាមបណ្តោយផ្នែកខ្លះនៃព្រំដែនរបស់ខ្លួនជាមួយប្រទេសបង់ក្លាដែស។ ប៉ុន្តែផែនការនេះកំពុងតែស្ថិតក្រោមការពិភាក្សានៅឡើយ។

លោក Manoj Barnwal មន្រ្តីសន្តិសុខព្រំដែនជាន់ខ្ពស់នៅរដ្ឋ Kolkata ក្បែរព្រំប្រទល់បង់ក្លាដែស បាននិយាយថា សំណើនេះបានកើតឡើងនៅក្នុងកិច្ចប្រជុំផ្ទៃក្នុង និងអនុស្សរណៈ ដោយកងកម្លាំងសន្តិសុខព្រំដែនរបស់ប្រទេសឥណ្ឌាបានស្នើសុំឱ្យសិក្សាលើគៅលគំនិតនេះ ថាតើវាអាចធ្វើទៅបាន និងមានសុវត្ថិភាពដែរឬទេ។ ទោះជាយ៉ាងណា ផែនការនេះបានលើកឡើងពីការព្រួយបារម្ភយ៉ាងខ្លាំង។ អ្នកជំនាញព្រមានថា វាអាចធ្វើឱ្យអ្នកភូមិ អ្នកនេសាទ និងប្រព័ន្ធអេកូឡូស៊ីក្នុងតំបន់ប្រឈមនឹងគ្រោះថ្នាក់ ដោយសារសត្វកាចសាហាវដែលត្រូវបានដោះលែងបើកចំហទៅក្នុងទន្លេនិងព្រៃ។

គួរជម្រាបថា ប្រទេសបង់ក្លាដែសសឹងតែត្រូវបានព័ទ្ធជុំវិញទាំងស្រុងដោយឥណ្ឌា ខណៈព្រំប្រទល់ប្រទេសទាំងពីរ លាតសន្ធឹងប្រវែងជាង៤០០០គីឡូម៉ែត្រ ហើយមួយផ្នែកធំ គឺមិនមានរបងខណ្ឌចែកទេ។ ប្រទេសទាំងពីរបានទាស់ទែងគ្នាលើបញ្ហាព្រំដែនជាយូរមកហើយ ប៉ុន្តែការកើនឡើងចុងក្រោយបង្អស់បានកើតមានក្នុងឆ្នាំ២០២៤ នៅពេលដែលឥណ្ឌាបានបើកផ្លូវឲ្យ អតីតនាយករដ្ឋមន្រ្តីបង់ក្លាដែស លោកស្រី Sheikh Hasina ចូលទៅលាក់ខ្លួនក្រោយរដ្ឋប្រហារ។

ក្រៅពីនេះ ឥណ្ឌាថែមទាំងបានសងរបងព្រំដែនប្រវែងរាប់រយគីឡូម៉ែត្រ ហើយចាប់ខ្លួនជនជាតិបង់ក្លាដែសជាច្រើននាក់ ដោយចោទថាបានព្យាយាមរត់ឆ្លងដែនខុសច្បាប់ ដែលជំរុញឲ្យទំនាក់ទំនងរបស់ប្រទេសទាំងពីរកាន់ដាំក្បាលចុះងើបលែងរួច។

យ៉ាងណាមិញ ទោះជាគោលគំនិតនៃការដោះលែងសត្វល្មូននិងអសិរពិសរបស់ឥណ្ឌាស្ដាប់ទៅអាចជារឿងមិនធម្មតា ប៉ុន្តែវាក៏ស្ថិតជាជ្រើសមួយរបស់ដ្ឋាភិបាលឥណ្ឌាក្នុងការកំណត់វិធីសាស្រ្តថ្មីៗ ដើម្បីគ្រប់គ្រងព្រំដែន រួមទាំងការដាក់ពង្រាយយន្តហោះគ្មានមនុស្សបើក និងកាមេរ៉ាសុវត្ថិភាព ដែលអាចមើលឃើញច្បាស់នៅពេលយប់៕

មេដឹកនាំអ៊ុយក្រែន លោក Volodymyr Zelenskyy កាលពីថ្ងៃទី៨ ខែមេសា ឆ្នាំ២០២៦ បានបង្ហោះសារគាំទ្របទឈប់បា.ញ់រវាងអាមេរិក និងអ៊ីរ៉ង់ ហើយលោកចង់មានបទឈប់បា.ញ់ជាមួយរុស្ស៊ីដែរ ជាពិសេស ចង់ឱ្យអាមេរិកងាកមកចាប់អារម្មណ៍បញ្ចប់សង្គ្រា.មនៅអ៊ុយក្រែនឡើងវិញ បន្ទាប់ពីស្ថានការណ៍តានតឹងនៅមជ្ឈិមបូព៌ាធូរស្រាល ។ កន្លងមក មានការចរចាត្រីភាគីរវាងអ៊ុយក្រែន រុស្ស៊ី និងអាមេរិក ប៉ុន្តែការចរចារាំងស្ទះដោយសារផ្ទុះសង្គ្រា.មនៅអ៊ីរ៉ង់ ខណៈរុស្ស៊ីទាមទារកាន់កាប់ទឹកដីអ៊ុយក្រែននៅតំបន់ Donbas ។

លោក Zelenskyy បានគាំទ្របទឈប់បាញ់រយៈពេល២សប្តាហ៍រវាងអាមេរិក និងអ៊ីរ៉ង់ ហើយលោកចង់មានបទឈប់បាញ់ជាមួយរុស្ស៊ីដែរ ប្រសិនបើរុស្ស៊ីឈប់វាយប្រហារអ៊ុយក្រែន ពីព្រោះសង្គ្រាមរវាងប្រទេសទាំងពីរបានអូសបន្លាយរហូតដល់ជាង៤ឆ្នាំ ។ ប្រធានាធិបតីអ៊ុយក្រែនចង់ឱ្យអាមេរិក និងពិភពលោក ងាកមកចាប់អារម្មណ៍ការបញ្ចប់សង្គ្រាមនៅអ៊ុយក្រែន បន្ទាប់ពីស្ថានការណ៍តានតឹងក្នុងតំបន់មជ្ឈិមបូព៌ាធូរស្រាល ។

កាសែតសិង្ហបុរី The Straits Times បានរាយការណ៍ដោយដកស្រង់ការបង្ហោះសារក្នុងបណ្តាញសង្គម X របស់ប្រធានាធិបតីអ៊ុយក្រែន លោក Zelenskyy កាលពីថ្ងៃទី៨ ខែមេសា ថា អ៊ុយក្រែនគាំទ្របទឈប់បាញ់នៅមជ្ឈិមបូព៌ា រួមទាំងក្រុមប្រទេសនៅឈូងសមុទ្រអារ៉ាប់ ដើម្បីឈានទៅរកការចរចាសន្តិភាពតាមរយៈការទូត ។

លោក Zelenskyy ថា អ៊ុយក្រែនធ្លាប់កោតសរសើរការសម្រេចចិត្តរបស់អាមេរិកដែលបើកការវាយប្រហារអ៊ីរ៉ង់ជាសម្ព័ន្ធមិត្តជិតស្និទ្ធរបស់រុស្ស៊ី បន្ទាប់ពីអ៊ីរ៉ង់បញ្ជូនដ្រូនឱ្យរុស្ស៊ីវាយប្រហារអ៊ុយក្រែន ក្រោយមក អ៊ុយក្រែនក៏បញ្ជូនកងទ័ពជំនាញជាង២០០នាក់ទៅកាន់មជ្ឈិមបូព៌ាដើម្បីជួយអាមេរិកធ្វើសង្គ្រាមជាមួយអ៊ីរ៉ង់ ។ អ៊ុយក្រែនគាំទ្របទឈប់បាញ់រវាងអាមេរិក និងអ៊ីរ៉ង់ រយៈពេល២សប្តាហ៍ ។

កងទ័ពជំនាញរបស់អ៊ុយក្រែននឹងនៅតែបំពេញភារកិច្ចនៅមជ្ឈិមបូព៌ាបន្តទៀតដើម្បីជំរុញសន្តិសុខក្នុងតំបន់ ។ រីឯសង្គ្រាមរវាងរុស្ស៊ី និងអ៊ុយក្រែន គឺរុស្ស៊ីបានបើកការវាយប្រហារលើពលរដ្ឋអ៊ុយក្រែនតាំងពីខែកុម្ភៈ ឆ្នាំ២០២២ រីឯអ៊ុយក្រែនទាមទារឱ្យមានបទឈប់បាញ់រហូតមក ។

អ៊ុយក្រែនអំពាវនាវជាច្រើនលើកឱ្យរុស្ស៊ីធ្វើកិច្ចព្រមព្រៀងឈប់បាញ់ជារៀងរហូត ដើម្បីឈានទៅចរចាសន្តិភាព ប៉ុន្តែរុស្ស៊ីបានកំណត់លក្ខខណ្ឌការធ្វើបទឈប់បាញ់ លុះត្រាតែបញ្ចប់ផែនការសន្តិភាពគ្រប់ជ្រុងជ្រោយ ។ មេដឹកនាំអ៊ុយក្រែនបាននិយាយពីបទឈប់បាញ់រវាងអាមេរិក និងអ៊ីរ៉ង់ គឺអាចធ្វើឡើងបានមុនការចរចាសន្តិភាព ខុសពីអ៊ុយក្រែន និងរុស្ស៊ី ។

គួរបញ្ជាក់ថា នៅថ្ងៃដែលប្រធានាធិបតីអ៊ុយក្រែនបង្ហោះសារ (ថ្ងៃទី៨ ខែមេសា) ចង់ឱ្យមានបទឈប់បាញ់ជាមួយរុស្ស៊ីនោះ គឺកងទ័ពរុស្ស៊ី និងអ៊ុយក្រែន នៅតែវាយប្រហារគ្នាជាបន្តបន្ទាប់បណ្តាលឱ្យកងទ័ពទាំងសងខាងស្លាប់ និងរងរបួសបន្ថែមទៀត ។

ចំណែកលោក Dmitry Peskov អ្នកនាំពាក្យវិមានក្រឹមឡាំងនៅទីក្រុងមូស្គូ ប្រទេសរុស្ស៊ី ក៏បានបង្ហាញក្តីរីករាយចំពោះការកាត់បន្ថយភាពតានតឹងរវាងអាមេរិក និងអ៊ីរ៉ង់ដែរ ដោយលោកសង្ឃឹមថា ឆាប់ៗនេះ អាមេរិកនឹងមានពេលវេលាចូលរួមក្នុងជំនួបត្រីភាគី (រុស្ស៊ី អ៊ុយក្រែន និងអាមេរិក) ។ រុស្ស៊ីសង្ឃឹមអាមេរិកនឹងវិលមកជួយសម្របសម្រួលការចរចាសន្តិភាពរវាងរុស្ស៊ី -អ៊ុយក្រែន បន្ទាប់ពីជំនួបត្រីភាគីនេះផ្អាកដោយសារផ្ទុះសង្គ្រាមនៅអ៊ីរ៉ង់ ។

បើតាមអ្នកវិភាគ បទឈប់បាញ់រយៈពេល២សប្តាហ៍នឹងធ្វើឱ្យរដ្ឋាភិបាលអាមេរិកងាកមកដោះស្រាយបញ្ចប់សង្គ្រាមនៅអ៊ុយក្រែនឡើងវិញ ខណៈការចរចាមានឧបសគ្គដោយសាររុស្ស៊ីកំណត់លក្ខខណ្ឌឱ្យអ៊ុយក្រែនប្រគល់តំបន់ Donbas ប៉ុន្តែអ៊ុយក្រែនមិនព្រមប្រគល់ទឹកដីខ្លួនទៅឱ្យរុស្ស៊ី ។ ពិភពលោកនឹងរង់ចាំមើលថា តើអាមេរិកអាចបញ្ចប់សង្គ្រាមអូសបន្លាយនៅអ៊ុយក្រែនដែរឬទេ បន្ទាប់ពីផ្អាកសង្គ្រាមនៅមជ្ឈិមបូព៌ា ៕

រដ្ឋាភិបាលអាមេរិកកំពុងពិចារណាដកកងទ័ពដែលប្រចាំការនៅប្រទេសជាសមាជិកអង្គការសន្ធិសញ្ញាអាត្លង់ទិកខាងជើង (NATO) មួយចំនួនដោយសារមិនជួយអាមេរិក និងអ៊ីស្រាអែលធ្វើសង្គ្រា.មប្រឆាំងអ៊ីរ៉ង់ ហើយអាមេរិកគ្រោងបញ្ជូនកងទ័ពទៅប្រចាំការនៅប្រទេសផ្សេងវិញ ។ កន្លងមក លោកប្រធានាធិបតី Donald Trump ខឹងសម្បារសមាជិកអង្គការនេះមិនអនុញ្ញាតឱ្យប្រើប្រាស់មូលដ្ឋានកងទ័ព ទាំងដែលអាមេរិកផ្តល់ថវិកាការពារប្រទេសពួកគេ ។

បើតាមការអះអាងរបស់មន្ត្រីរដ្ឋាភិបាលអាមេរិកជាច្រើនរូប គឺអាមេរិកនឹងដកកងទ័ពដែលប្រចាំការនៅប្រទេសមួយចំនួនជាសមាជិកអង្គការ NATO ដោយសាររដ្ឋាភិបាលអាមេរិកមើលឃើញថា គ្មានប្រយោជន៍ក្នុងការធ្វើសង្គ្រាមប្រឆាំងអ៊ីរ៉ង់ ហើយអាមេរិកនឹងបញ្ជូនកងទ័ពរបស់ខ្លួនទៅប្រចាំការនៅប្រទេសផ្សេងវិញដែលគាំទ្រប្រតិបត្តិការកងទ័ពអាមេរិក ។ នេះបើតាមចុះផ្សាយរបស់កាសែត Wall Street Journal កាលពីថ្ងៃទី៨ ខែមេសា ឆ្នាំ២០២៦ ។

ទោះយ៉ាងណា គម្រោងដកទ័ពអាមេរិកចេញពីសមាជិកអង្គការ NATO មួយចំនួន គឺមិនធ្ងន់ធ្ងរដូចការគំរាមជាញឹកញាប់របស់លោកប្រធានាធិបតី Trump ពាក់ព័ន្ធនឹងការដកអាមេរិកចេញពីអង្គការ NATO នោះទេ ប៉ុន្តែលោកអាចដកអាមេរិកចេញបាន លុះត្រាតែមានការយល់ព្រមពីរដ្ឋសភា ។

អាមេរិកគ្រោងដកកងទ័ពចេញពីសមាជិកអង្គការ NATO ស្របពេលលោកប្រធានាធិបតី Trump ជួបជាមួយលោក Mark Rutte អគ្គលេខាធិការអង្គការ NATO នៅសេតវិមានកាលពីថ្ងៃទី៨ ខែមេសា ខណៈសង្គ្រាមនៅអ៊ីរ៉ង់ធ្វើឱ្យរង្គោះរង្គើដល់ទំនាក់ទំនងរវាងអាមេរិក និងសមាជិកអង្គការនេះ ។

លោក Trump ធ្លាប់ប្រកាសដកអាមេរិកចេញពីអង្គការ NATO ដែលមានសមាជិកចំនួន៣២ប្រទេស និងថ្កោលទោសសមាជិកអង្គការមិនគាំទ្រអាមេរិក និងអ៊ីស្រាអែល ក្នុងការវាយប្រហារអ៊ីរ៉ង់ ខណៈមន្ត្រីសេតវិមានថា គួរឱ្យសោកស្តាយណាស់ដែលអង្គការនេះបែរខ្នងដាក់ពលរដ្ឋអាមេរិកក្នុងរយៈពេល៦សប្តាហ៍កន្លងមក ទាំងដែលពលរដ្ឋអាមេរិកបានផ្តល់ថវិកាការពារប្រទេសពួកគេ ។

កន្លងមក លោក Trump បានហៅអង្គការ NATO គឺជាខ្លាក្រដាស ដោយសារមិនជួយសហការបើកច្រកសមុទ្រ Hormuz ព្រមទាំងខឹងសម្បារសមាជិកអង្គការនេះមិនអនុញ្ញាតឱ្យអាមេរិកប្រើប្រាស់មូលដ្ឋានកងទ័ពក្នុងទឹកដីពួកគេ ។

គួរបញ្ជាក់ថា អាមេរិក និងអ៊ីរ៉ង់ បានព្រមព្រៀងឈប់បាញ់រយៈពេល២សប្តាហ៍ ដោយមានលក្ខខណ្ឌឱ្យអ៊ីរ៉ង់បើកច្រកសមុទ្រ Hormuz ដើម្បីឱ្យនាវាដឹកប្រទេសឥន្ធនៈផ្សេងៗឆ្លងកាត់ដោយសុវត្ថិភាព ។ ប៉ុន្តែដោយសារអ៊ីស្រាអែលវាយប្រហារប្រទេសលីបង់យ៉ាងចាស់ដៃរហូតដល់ជាង១០០កន្លែង បណ្តាលឱ្យមនុស្សស្លាប់ជាង២០០នាក់ និងរងរបួសរាប់ពាន់នាក់ អ៊ីរ៉ង់ក៏ប្រកាសបិទច្រកសមុទ្រនេះជាថ្មីក្រោមហេតុផលអ៊ីស្រាអែលមិនគោរពបទឈប់បាញ់ ៕

ទីក្រុងប៉ារីស ប្រទេសបារាំង បានប្រែក្លាយជាទីក្រុងពណ៌បៃតង បន្ទាប់ពីជាច្រើនឆ្នាំមកនេះ អភិបាលក្រុងអនុវត្តគោលនយោបាយកាត់បន្ថយការប្រើប្រាស់រថយន្ត និងបង្កើនផ្លូវជិះកង់ និងថ្មើជើងសាធារណៈ ប៉ុន្តែក៏មានមតិប្រឆាំងពីក្រុមអ្នកនយោបាយ និងអ្នកប្រើប្រាស់រថយន្តផងដែរ ។ ការផ្លាស់ប្តូរមុខមាត់ទីក្រុងធ្វើឱ្យការរស់នៅរបស់ពលរដ្ឋល្អប្រសើរឡើង ដោយសារខ្យល់ពុលធ្លាក់ចុះ ប៉ុន្តែនៅជាយក្រុងវិញនៅតែធ្វើដំណើរតាមរថយន្ត ទើបអ្នកជំនាញបរិស្ថានសំណូមពរឱ្យកែលម្អផ្លូវនៅជាយក្រុងផង បើចង់ឱ្យប៉ារីសសម្រេចគោលដៅក្លាយជាទីក្រុងបៃតង ។

រយៈពេលជាង១០ឆ្នាំមកនេះ ទីក្រុងប៉ារីសបានផ្លាស់ប្តូរមុខមាត់យ៉ាងខ្លាំង គឺពីទីក្រុងដែលសម្បូរដោយរថយន្តចង្អៀតណែនពេញផ្លូវទៅជាទីក្រុងសម្បូរកង់ និងផ្លូវថ្មើជើង ដែលជាការអនុវត្តគោលនយោបាយកាត់បន្ថយចំនួនរថយន្ត និងបង្កើនចំនួនកង់ របស់អតីតអភិបាលក្រុងប៉ារីស អ្នកស្រី Anne Hidalgo ។

ពលរដ្ឋរស់នៅទីក្រុងប៉ារីសប្រាប់ថា កាលពីមុន ពួកគេមិនហ៊ានជិះកង់នៅទីក្រុងទេ ដោយសារស្ទះចរាចរណ៍ខ្លាំងពេក និងគ្មានសុវត្ថិភាព ប៉ុន្តែក្រោយពីទីក្រុងបង្កើតផ្លូវជាច្រើនសម្រាប់ឱ្យពលរដ្ឋជិះកង់ ពួកគេក៏និយមធ្វើដំណើរតាមកង់ឡើងវិញ ។

តាំងពីឆ្នាំ២០១៤ អភិបាលក្រុងប៉ារីសបានអនុវត្តគោលនយោបាយកែលម្អទីក្រុងរហូតមក រួមទាំងដាំដើមឈើរហូតដល់ជាង១សែន ៥ម៉ឺនដើម, បង្កើតផ្លូវជិះកង់រាប់រយគីឡូម៉ែត្រ, កែលម្អផ្លូវនៅមុខសាលារៀនចំនួន៣០០កន្លែងឱ្យក្លាយជាតំបន់គ្មានរថយន្តឆ្លងកាត់ រួមទាំងហាមរថយន្តបើកបរនៅមាត់ទន្លេសែន ។ ក្រៅពីនេះ ចំណតរថយន្តជាច្រើនកន្លែងបានប្រែក្លាយជាតំបន់បៃតង និងមានកន្លែងអង្គុយសម្រាប់ភោជនីយដ្ឋាន ឬហាងកាហ្វេ ដែលធ្វើឱ្យការរស់នៅរបស់ពលរដ្ឋល្អប្រសើរជាងមុន ជាពិសេស កុមារដើរទៅសាលារៀនមានសុវត្ថិភាព ។

បច្ចុប្បន្ន ប៉ារីសបានក្លាយជាទីក្រុងគំរូនៅតំបន់អឺរ៉ុប ដែលអនុវត្តគោលនយោបាយការពារបរិស្ថាន ស្របពេលប្រទេសផ្សេងៗចាប់ផ្តើមបោះបង់គោលនយោបាយនេះ ។ ប៉ុន្តែការអនុវត្តគោលនយោបាយកាត់បន្ថយចំនួនរថយន្តក្នុងទីក្រុងប៉ារីស ក៏មានមតិប្រឆាំងពីក្រុមអ្នកនយោបាយ និងអ្នកប្រើប្រាស់រថយន្តជាច្រើនផងដែរ ។

ការស្រាវជ្រាវបង្ហាញថា ប៉ារីសបានក្លាយជាទីក្រុង១ ក្នុងចំណោមទីក្រុងទាំង១៩ លើពិភពលោក ដែលអាចកាត់បន្ថយខ្យល់ពុលលើអាកាស ចាប់ពីឆ្នាំ២០១០ ដល់ឆ្នាំ២០២៤ ។ ប៉ុន្តែមានបញ្ហាមួយចំនួន គឺទោះជាពលរដ្ឋទីក្រុងប៉ារីសអាចទៅរកសេវាកម្មផ្សេងៗដោយថ្មើជើង ឬជិះកង់ ប៉ុន្តែនៅតំបន់ជាយក្រុងវិញនៅតែប្រើប្រាស់រថយន្តសម្រាប់ធ្វើដំណើរ ហេតុនេះ អ្នកជំនាញបរិស្ថានសំណូមពរឱ្យកែលម្អផ្លូវនៅជាយក្រុងផង បើចង់ឱ្យប៉ារីសសម្រេចគោលដៅក្លាយជាទីក្រុងបៃតង ៕