ប្រធានាធិបតីចិន លោក Xi Jinping នៅថ្ងៃទី១០ ខែមេសា ឆ្នាំ២០២៦ បានទទួលស្វាគមន៍ដំណើរទស្សនកិច្ចរបស់មេគណបក្សប្រឆាំងដ៏ធំរបស់តៃវ៉ាន់មកកាន់ទីក្រុងប៉េកាំង ដោយលោកបញ្ជាក់ថា ពលរដ្ឋចិននិងតៃវ៉ាន់ គឺសុទ្ធតែជាក្រុមគ្រួសារតែមួយដែលត្រូវការសន្តិភាព ហើយចិនគ្មានថ្ងៃអនុញ្ញាតឱ្យតៃវ៉ាន់ទទួលបានឯករាជ្យឡើយ ខណៈមេគណបក្សប្រឆាំងតៃវ៉ាន់ចង់ឃើញការកាត់បន្ថយភាពតានតឹងនៅតៃវ៉ាន់ ។

មេគណបក្ស Kuomintang (KMT) ដែលជាគណបក្សប្រឆាំងដ៏ធំនៅតៃវ៉ាន់ លោកស្រី Cheng Li-wun បានចូលជួបប្រធានាធិបតីចិននៅសាលប្រជាជនក្នុងទីក្រុងប៉េកាំងនៅថ្ងៃទី១០ ខែមេសា ដែលក្នុងឱកាសនេះ លោក Xi និយាយថា ពលរដ្ឋចិន-តៃវ៉ាន់សុទ្ធតែជាក្រុមគ្រួសារតែមួយ ទំនាក់ទំនងពេលអនាគតស្ថិតក្នុងដៃពលរដ្ឋចិន ។ ពិភពលោកបច្ចុប្បន្ន គ្មានសន្តិភាពពេញលេញទេ គឺសន្តិភាពមានតម្លៃ ។

សេចក្តីថ្លែងការណ៍ផ្សាយក្នុងកញ្ចក់ទូរទស្សន៍របស់តៃវ៉ាន់ លោក Xi ថា ពលរដ្ឋចិន និងតៃវ៉ាន់ គឺជាគ្រួសារតែមួយដែលត្រូវការសន្តិភាព ការអភិវឌ្ឍ ការផ្លាស់ប្តូរ និងសហការ ។ យើងជួបគ្នាថ្ងៃនេះ (ថ្ងៃទី១០ ខែមេសា) ដើម្បីការពារសន្តិភាព និងសន្តិសុខមាតុភូមិរបស់យើងដើម្បីលើកកម្ពស់ទំនាក់ទំនង ជំរុញឱ្យក្មេងជំនាន់ក្រោយមានអនាគតល្អ ។ ចិនរីករាយសហការជាមួយគណបក្សផ្សេងៗ រួមទាំងគណបក្ស Kuomintang ហើយប្រឆាំងការបំបែកខ្លួនរបស់តៃវ៉ាន់ ។

ចិនបដិសេធមិនចរចាជាមួយប្រធានាធិបតីតៃវ៉ាន់ លោក Lai Ching-te ដោយសារមានគោលជំហរទាមទារឯករាជ្យ ហើយរដ្ឋាភិបាលរបស់លោក Lai ប្រាប់ឱ្យលោកស្រី Cheng ប្រាប់ទៅចិនឈប់គំរាមតៃវ៉ាន់ និងឱ្យចិនទទួលស្គាល់រដ្ឋាភិបាលតៃវ៉ាន់ ដែលកាន់តំណែងតាមរយៈការបោះឆ្នោតបែបលទ្ធិប្រជាធិបតេយ្យនៅទីក្រុងតៃប៉ិ ។

លោកស្រី Cheng បានធ្វើដំណើរទស្សនកិច្ចប្រទេសចិន ក្នុងគោលបំណងកាត់បន្ថយស្ថានការណ៍តានតឹង បន្ទាប់ពីចិនដាក់សម្ពាធលើតៃវ៉ាន់ដោយការប្រើប្រាស់កម្លាំងកងទ័ព ដែលចិនអះអាងជាទឹកដីរបស់ខ្លួន ។ លោកស្រីនិយាយទៅកាន់លោក Xi ថា ទំនាក់ទនងរវាងភាគីទាំងពីរជាផលប្រយោជន៍រួមគ្នា និងជាអ្វីដែលពលរដ្ឋទាំងពីរចង់បាន លោកស្រីក៏បានអញ្ជើញលោក Xi បំពេញទស្សនកិច្ចនៅតៃវ៉ាន់ផងដែរ និងចង់ឃើញគ្មានភាពតានតឹងនៅតៃវ៉ាន់ ។

គួរបញ្ជាក់ថា អាមេរិកបានគាំទ្រ និងបញ្ជូនអាវុធឱ្យតៃវ៉ាន់ជាបន្តបន្ទាប់ បើទោះជាគ្មានទំនាក់ទំនងការទូតជាផ្លូវការក្តី ហើយរដ្ឋាភិបាលក្រុងប៉េកាំងអំពាវនាវជាច្រើនលើកឱ្យរដ្ឋាភិបាលក្រុងវ៉ាស៊ីនតោនឈប់បញ្ជូនអាវុធឱ្យតៃវ៉ាន់ ៕

ប្រធានាធិបតីរុស្ស៊ី វ្ល៉ាឌីមៀរ ពូទីន បានប្រកាសបទឈប់បាញ់រយៈពេល៣២ម៉ោង ជាមួយអ៊ុយក្រែនដោយផ្អែកលើ «ហេតុផលមនុស្សធម៌» ខណៈបទឈប់បា.ញ់នេះធ្វើឡើងបន្ទាប់ពីប្រទេសរុស្ស៊ី បានប្រគល់សា.កស.ពទាហានអ៊ុយក្រែន ចំនួន ១,០០០នាក់ ទៅឱ្យអ៊ុយក្រែន ក្នុងអំឡុងពេលនៃពិធីបុណ្យ Easter ។ នេះបើយោងតាមទីភ្នាក់ងារសារព័ត៌មានTASS។

ផ្អែគតាមសេចក្តីប្រកាសពីវិមានក្រឹមឡាំង បទឈប់បា.ញ់បណ្តោះអាសន្នរយៈពេលខ្លី នឹងចាប់អនុវត្តពីម៉ោង ៤ រសៀលថ្ងៃសៅរ៍ទី១១ខែមេសា រហូតដល់ពាក់កណ្តាលអធ្រាត្រថ្ងៃអាទិត្យទី១២ខែមេសាឆ្នាំ ២០២៦ (ពេលវេលានៅរុស្ស៊ី)។ ចលនានេះត្រូវបានចាត់ទុកថាជាកាយវិការមនុស្សធម៌ ដើម្បីអបអរសាទរពិធីបុណ្យ Easter នៃសាសនាគ្រិស្តអូស្សូដក់អាចជួបជុំសាច់ញាតិ និងប្រារព្ធពិធីបុណ្យសាសនាដ៏សំខាន់នេះបានដោយសន្តិវិធី។

ក្នុងពេលជាមួយគ្នានេះ ទីភ្នាក់ងារសារព័ត៌មានអ៊ុយក្រែន RBC បានដកស្រង់សម្តីលោក Shamsail Saraliev ដោយរាយការណ៍ថា រុស្ស៊ីបានប្រគល់សា.កសពទាហានអ៊ុយក្រែន ចំនួន ១,០០០នាក់ ទៅឱ្យអ៊ុយក្រែន ជាថ្នូរនឹងការប្ដូរយកសាកសពទាហានខ្លួនចំនួន ៤១នាក់ ត្រឡប់មកវិញ ។ មន្ត្រីបាននិយាយថា ការផ្លាស់ប្តូរបែបនេះបានក្លាយជារឿងធម្មតាទៅហើយនៃសង្គ្រាម ដែលទោះជាយ៉ាងណាវាបានអនុញ្ញាតឱ្យក្រុមគ្រួសារអស់ចិត្ត និងកំណត់អត្តសញ្ញាណមនុស្សជាទីស្រលាញ់របស់ពួកគេ។

បើទោះបីជាមានការប្រកាសពីបទឈប់បា.ញ់ក៏ដោយ ការប្រយុទ្ធគ្នានៅតែបន្តនៅក្នុងតំបន់ជាច្រើន ហើយទំនុកចិត្តរវាងភាគីទាំងពីរនៅតែមានកម្រិតទាបខ្លាំង។ អ្នកវិភាគព្រមានថា បទឈប់បាញ់រយៈពេលខ្លីដូចនេះ ទំនងជាមិននាំទៅរកសន្តិភាពយូរអង្វែងនោះទេ ជាពិសេសនៅពេលដែលសង្គ្រាមកាន់តែធ្ងន់ធ្ងរឡើង ហើយការយកចិត្តទុកដាក់របស់ពិភពលោកផ្លាស់ប្តូរទៅរកជម្លោះផ្សេងទៀត រួមទាំងមជ្ឈិមបូព៌ាផងដែរ។

សរុបមក បទឈប់បាញ់ផ្តល់នូវការផ្អាកប្រយុទ្ធគ្នាមួយរយៈពេលខ្លី បូកផ្សុំនឹងការវិលត្រឡប់មកវិញនៃសាកសពជាច្រើន គឺជាការរំលឹកដ៏មានឥទ្ធិពលមួយថា សង្គ្រាមនេះនៅមិនទាន់អាចបញ្ចប់នៅឡើយទេ៕

ប៉ុន្មានខែមុនបន់ឲ្យតែទឹកស្រក ពេលនេះស្រកជ្រុលចាប់ផ្ដើមភ័យ! ប្រទេសថៃឥឡូវនេះកំពុងប្រឈមនឹងហានិភ័យនៃវិបត្តិគ្រោះរាំងស្ងួតដែលអាចប៉ះពាល់ដល់ការរស់នៅរបស់មនុស្សរាប់លាននាក់ ព្រោះមានទឹកនៅសល់ដែលអាចប្រើប្រាស់បានត្រឹមតែ ៤៩% ប៉ុណ្ណោះនៅក្នុងអាងស្តុកទឹកទូទាំងប្រទេស ។ នេះបើយោងតាមការចុះផ្សាយរបស់ Khaosod។

យោងតាមការិយាល័យធនធានទឹកជាតិ ជាធម្មតាអាងស្តុកទឹកនៅទូទាំងប្រទេសថៃមានសមត្ថភាពផ្ទុកទឹកបម្រុងសម្រាប់ប្រជាជនប្រើប្រាស់បាន ៦៤% ជារួម ប៉ុន្តែឆ្នាំនេះទឹកដែលអាចប្រើប្រាស់បានមានកម្រិតទាបជាងគួរឱ្យកត់សម្គាល់ ដែលបង្កើនការព្រួយបារម្ភអំពីការផ្គត់ផ្គង់ក្នុងរដូវប្រាំង។ ក្នុងនោះដែរ តំបន់ទំនាបកណ្តាល គឺជាតំបន់ដែលប្រឈមនឹងហានិភ័យខ្លាំងបំផុត ដោយកម្រិតទឹកនៅក្នុងអាងស្តុកបានស្រកចុះមកត្រឹម ៤១% ប៉ុណ្ណោះគិតមកត្រឹមពេលនេះ។

យោងតាមការិយាល័យធនធានទឹកជាតិ ការធ្លាក់ចុះយ៉ាងខ្លាំងនេះត្រូវបានផ្សារភ្ជាប់ទៅនឹងអត្រាភ្លៀងធ្លាក់តិច សីតុណ្ហភាពខ្ពស់លើសធម្មតា និងតម្រូវការទឹកកើនឡើង។ កត្តាទាំងនេះបានជំរុញឲ្យអាងស្តុកទឹកសំខាន់ៗទូទាំងប្រទេសថៃកំពុងស្ថិតនៅក្រោមសម្ពាធ ជាពិសេសនៅពេលដែលរដូវប្រាំងនៅតែបន្ត ហើយកំដៅបន្តកើនឡើងឥតថមថយ។

ផលប៉ះពាល់ត្រូវបានគេមើលឃើញយ៉ាងទូលំទូលាយ ដោយមន្ត្រីបាននិយាយថា គ្រោះរាំងស្ងួតអាចប៉ះពាល់ដល់វិស័យកសិកម្ម ការផ្គត់ផ្គង់ទឹកស្អាត និងការផលិតអគ្គិសនី ជាពិសេសនៅតំបន់ជនបទដែលពឹងផ្អែកយ៉ាងខ្លាំងលើការទទួលបានទឹកជាប្រចាំ។ បច្ចុប្បន្នកសិករកំពុងត្រូវបានជំរុញឱ្យប្រើប្រាស់ទឹកដោយសន្សំសំចៃ និងកែសម្រួលផែនការដំណាំដើម្បីជៀសវាងការខាតបង់ធ្ងន់ធ្ងរ។

ជាមួយគ្នានេះ អ្នកជំនាញបានព្រមានថា ស្ថានភាពនេះឆ្លុះបញ្ចាំងពីនិន្នាការតំបន់ធំជាង ដោយសារការប្រែប្រួលអាកាសធាតុ និងអាកាសធាតុអាក្រក់ធ្វើឱ្យគ្រោះរាំងស្ងួតកាន់តែកើតមានញឹកញាប់ និងកាន់តែខ្លាំងឡើងនៅទូទាំងអាស៊ីអាគ្នេយ៍។ ដូច្នេះប្រសិនបើលក្ខខណ្ឌមិនប្រសើរឡើងក្នុងពេលឆាប់ៗនេះទេ ប្រទេសថៃអាចប្រឈមមុខនឹងរដូវប្រាំងដ៏លំបាកបំផុតមួយ ក្រោយខានកើតមានអស់រយៈពេលជាច្រើនឆ្នាំ៕

វិទ្យាស្ថាន Milken របស់អាមេរិកបានចាត់ចំណាត់ថ្នាក់ម៉ាឡេស៊ីស្ថិតក្នុងលំដាប់ទី១ ជាប្រទេសទាក់ទាញការវិនិយោគបំផុតនៅអាស៊ីអាគ្នេយ៍ក្នុងឆ្នាំ២០២៦ ដោយការវាយតម្លៃលើកត្តាចំនួន៥ គឺម៉ាឡេស៊ីមានភាពលេចធ្លាជាងប្រទេសនានា ។ លើសពីនេះ ម៉ាឡេស៊ីបានជាប់ចំណាត់ថ្នាក់ទី២៣ ជាប្រទេសទាក់ទាញការវិនិយោគលើពិភពលោក ដោយប្រធានវិទ្យាស្ថាន Milken ថា ប្រទេសផ្សេងៗក៏ទាក់ទាញការវិនិយោគដែរ ប៉ុន្តែក្រុមវិនិយោគិនពិចារណាយ៉ាងលម្អិតមុននឹងសម្រេចចិត្តវិនិយោគនៅប្រទេសណាមួយ ។

យោងតាមរបាយការណ៍សន្ទស្សន៍ឱកាសវិនិយោគសកល (GOI) ប្រចាំឆ្នាំ២០២៦ របស់វិទ្យាស្ថានអាមេរិក Milken គឺម៉ាឡេស៊ីបានជាប់ចំណាត់ថ្នាក់ទី១ ជាប្រទេសទាក់ទាញការវិនិយោគបំផុតនៅតំបន់អាស៊ីអាគ្នេយ៍ បើប្រៀបធៀបនឹងប្រទេសផ្សេងៗដែលទាក់ទាញការវិនិយោគក្នុងតំបន់ ខណៈការចំណាត់ថ្នាក់លើពិភពលោកវិញ ម៉ាឡេស៊ីស្ថិតក្នុងលំដាប់លេខរៀងទី២៣ ។

វាជាចំណាត់ថ្នាក់ល្អបំផុត បើប្រៀបធៀបនឹងប្រទេសមានសេដ្ឋកិច្ចរីកចម្រើនផ្សេងទៀតក្នុងតំបន់អាស៊ីអាគ្នេយ៍ដែលបានទាក់ទាញការវិនិយោគដូចគ្នា ហើយការជាប់ចំណាត់ថ្នាក់នេះដោយសារម៉ាឡេស៊ីមានសេដ្ឋកិច្ចរឹងមាំ និងស្ថាប័ននានាមានគុណភាព ។ នេះបើតាមការចុះផ្សាយរបស់សារព័ត៌មានបរទេសនៅថ្ងៃទី១០ ខែមេសា ឆ្នាំ២០២៦ ។

តាមរបាយការណ៍សន្ទស្សន៍ឱកាសវិនិយោគសកល (GOI) ប្រចាំឆ្នាំ២០២៦ របស់វិទ្យាស្ថាន Milken គឺម៉ាឡេស៊ីលេចធ្លោជាងបណ្តាប្រទេសក្នុងតំបន់ រួមទាំងដំណើរការល្អក្នុងផ្នែកហិរញ្ញវត្ថុ និងអាជីវកម្ម ។ ការចាត់ចំណាត់ថ្នាក់ប្រទេសទាក់ទាញការវិនិយោគបំផុតនៅអាស៊ីអាគ្នេយ៍ និងពិភពលោក បានវាយតម្លៃលើកត្តាចំនួន៥ រួមមាន ៖ ការយល់ដឹងពីអាជីវកម្ម, មូលដ្ឋានគ្រឹះសេដ្ឋកិច្ច, ការគ្រប់គ្រងហិរញ្ញវត្ថុ, ក្របខ័ណ្ឌស្ថាប័ន និងស្តង់ដារ-គោលនយោបាយអន្តរជាតិ ។

របាយការណ៍នេះបញ្ជាក់ថា ប្រទេសចំនួន៦ ក្នុងតំបន់អាស៊ីអាគ្នេយ៍បានទាក់ទាញទឹកប្រាក់ការវិនិយោគពីក្រៅប្រទេសសរុបស្មើ៨.២% ចាប់ពីឆ្នាំ២០២១ ដល់ឆ្នាំ២០២៤ ហើយការវិយោគផ្ទាល់ពីបរទេស (FDI) ស្មើជាង៧០% នៃការវិនិយោគសរុប ។

ចំណែកវៀតណាមជាប់ចំណាត់ថ្នាក់ទី២ គឺជាប្រទេសទាក់ទាញការវិនិយោគបំផុតនៅអាស៊ីអាគ្នេយ៍ក្នុងឆ្នាំ២០២៦ និងជាប់ចំណាត់ថ្នាក់ទី៣៩ លើពិភពលោក ដោយសារកំណើនផលិតផលក្នុងស្រុកសរុប (GDP) របស់វៀតណាមកើនឡើងខ្ពស់រហូតដល់៦.៥% កាលពីឆ្នាំ២០២៥ ព្រមទាំងមានលក្ខខណ្ឌពាណិជ្ជកម្មអំណោយផល និងអត្រាអតិផរណាទាប ។

លោក Matthew Aleshi ប្រធានផ្នែកភូមិសាស្ត្រសេដ្ឋកិច្ចរបស់វិទ្យាស្ថាន Milken ដែលបានចូលរួមចាត់ចំណាត់ថ្នាក់ថា សេដ្ឋកិច្ចរីកចម្រើនរបស់ប្រទេសនានាក្នុងតំបន់អាស៊ីអាគ្នេយ៍បានទាក់ទាញការវិនិយោគដូចគ្នា ប៉ុន្តែវិនិយោគិនចាប់ផ្តើមពិចារណាយ៉ាងលម្អិតមុននឹងសម្រេចចិត្តវិនិយោគនៅប្រទេសណាមួយ ។ យើងមើលឃើញប្រាក់វិនិយោគហូរចូលប្រទេសទើបមានសេដ្ឋកិច្ចរីកចម្រើនថ្មីៗជាបន្តបន្ទាប់ ក្នុងនោះប្រទេសនៅអាស៊ីអាគ្នេយ៍ទទួលបានប្រយោជន៍ច្រើន បច្ចុប្បន្ន ក្រុមប្រទេសអាចរក្សាស្ថិរភាពសេដ្ឋកិច្ច និងបង្កើនការអភិវឌ្ឍប្រព័ន្ធហិរញ្ញវត្ថុ នឹងមានឱកាសទាក់ទាញការវិនិយោគយូរអង្វែង ៕

តើបទឈប់បា.ញ់ដ៏ផុយស្រួយរវាងអ៊ីរ៉ង់ និងសហរដ្ឋអាមេរិកជិតដល់ទីបញ្ចប់ហើយមែនទេ? ក្រោយចូលជាធរមានទើបបានប៉ុន្មានថ្ងៃប៉ុណ្ណោះឥឡូវនេះវាអាចប្រឈមនឹងការរំលាយចោលវិញ ដោយអ៊ីរ៉ង់ព្រ.មានថានឹងដកខ្លួនចេញពីកិច្ចព្រមព្រៀងទាំងស្រុង ព្រោះតែអ៊ីស្រាអែលបន្តវា.យប្រ.ហារលើលីបង់ដែលបណ្ដាលឲ្យស្លា.ប់មនុស្សរហូតដល់ ២៥៤នាក់។ នេះគឺជាវាយប្រហារដ៏ខ្លាំងក្លាបំផុតមិនធ្លាប់មាន ចាប់តាំងពីសង្គ្រាមផ្ទុះឡើងកាលពីចុងខែកុម្ភៈ។

យោងតាមសារដែលបានបង្ហោះនៅលើបណ្ដាញសង្គម X រដ្ឋមន្ត្រីការបរទេសអ៊ីរ៉ង់ លោក Abbas Araghchi បាននិយាយថា «លក្ខន្តិកៈនៃបទឈប់បាញ់រវាងអ៊ីរ៉ង់ និងអាមេរិកនិយាយច្បាស់ណាស់ថាអាមេរិកត្រូវតែជ្រើសរើសយកបទឈប់បាញ់ ឬបន្តធ្វើសង្គ្រាម, ត្រូវរើសមួយ អត់មួយ, មិនអាចយកទាំង២បានឡើយ។ ពិភពលោកមើលឃើញអំពើសម្លា.ប់រង្គាលនៅលីបង់។ គ្រាប់បាល់កំពុងស្ថិតនៅក្នុងដៃរបស់អាមេរិក។ ពិភពលោកកំពុងតាមដានបញ្ហានេះដើម្បីចង់ដឹងថាតើអាមេរិកនឹងអនុវត្តដូចការសន្យារបស់ខ្លួនដែរឬទេ»។

មន្ត្រីអ៊ីរ៉ង់ រួមទាំងប្រធានាធិបតីលោក Masoud Pezeshkian បានថ្កោលទោសការវាយប្រហាររបស់អ៊ីស្រាអែលទៅលើលីបង់ ដោយនិយាយថាពួកគេធ្វើឱ្យការចរចាដែលកំពុងបន្ត ក្លាយជារឿង«គ្មានន័យ»។ ទោះជាយ៉ាងណាក៏ដោយ អ៊ីស្រាអែលមិនយល់ស្របចំពោះការចោទប្រកាន់នេះឡើយ ដោយនាយករដ្ឋមន្រ្តីអ៊ីស្រាអែល លោក Benjamin Netanyahu បាននិយាយថាបទឈប់បាញ់រវាងអ៊ីរ៉ង់ និងសហរដ្ឋអាមេរិកមិនរាប់បញ្ចូលប្រទេសលីបង់ទេ ហើយកងកម្លាំងអ៊ីស្រាអែលនឹងបន្តប្រតិបត្តិការប្រឆាំងនឹង Hezbollah។

តាមលោក Netanyahu លក្ខខណ្ឌតែមួយគត់ដែលអ៊ីស្រាអែលត្រូវការដើម្បីបញ្ចប់ការបង្ហូរឈា.មនៅលីបង់ គឺការទាមទារឲ្យក្រុមសកម្មប្រយុទ្ធ ហេសប៊ូឡា ទម្លាក់អាវុធចុះ និងដកកម្លាំងទ័ពចេញពីទីក្រុង បេរូត នោះការចរចាក្នុងការស្ដារទំនាក់ទំនងនឹងអាចប្រព្រឹត្តទៅបានយ៉ាងឆាប់រហ័ស។ ទោះជាយ៉ាងណា ស្ថានភាពឥឡូវនេះមានភាពផុយស្រួយខ្លាំង ខណៈលីបង់មិនទាន់បង្ហាញគោលជំហររបស់ខ្លួនឆ្លើយតបនឹងការលើកឡើងរបស់អ៊ីស្រាអែលនោះឡើយ។

រឿងនេះនៅតែជាបញ្ហាដែលស្មុគស្មាញខ្លាំង នៅពេលអ៊ីរ៉ង់ព្រមានដកខ្លួនចេញពីបទឈប់បាញ់ និងបិទច្រកសមុទ្រម្ដងទៀត ប្រសិនបើគ្មានការធានាសន្តិភាពនៅលីបង់ ដែលជាសម្ព័ន្ធមិត្តរបស់ខ្លួន។ ខណៈភាគីទាំងអស់ បន្តចោទប្រកាន់គ្នាទៅវិញទៅមកថាបានបំពានកិច្ចព្រមព្រៀង អ្នកជំនាញព្រមានថាបទឈប់បាញ់ដ៏ផុយស្រួយនេះអាចនឹងដួលរលំនៅពេលឆាប់ៗនេះមិនខាន ដែលអាចបង្កឱ្យមានជម្លោះក្នុងតំបន់កាន់តែរីកធំទូលំទូលាយ និងគ្រោះថ្នាក់ជាងមុន៕

យោធាអ៊ីស្រាអែលបានអះអាងថាខ្លួនបានសម្លា.ប់ លោក Naim Qassem មេដឹកនាំហេសបូឡា បានដោយជោគជ័យ នៅក្នុងការវា.យប្រហារតាមអាកាសថ្មីៗនេះ។ នេះបើយោងតាមការចុះផ្សាយរបស់សារព័ត៌មាន The Times of Isreal របស់អ៊ីស្រាអែល។

យោងតាមរបាយការណ៍បឋម យោធាអ៊ីស្រាអែលបាននិយាយថា ការវាយប្រហារនេះផ្តោតលើថ្នាក់ដឹកនាំជាន់ខ្ពស់ហេសបូឡានៅទីក្រុងបេរូត ដែលជាផ្នែកមួយនៃយុទ្ធនាការដែលកំពុងបន្តរបស់ខ្លួនប្រឆាំងនឹងក្រុមដែលគាំទ្រដោយអ៊ីរ៉ង់។ ប្រសិនបើត្រូវបានបញ្ជាក់ ហេតុការណ៍នេះនឹងជាការកើនឡើងដ៏ធំមួយ ដោយសារលោក Qassem បានក្លាយជាប្រធានហេសបូឡាចាប់តាំងពីឆ្នាំ 2024 បន្ទាប់ពីការសម្លា.ប់អ្នកកាន់តំណែងមុនរបស់គាត់។

ទោះជាយ៉ាងណាក៏ដោយ ព័ត៌មានពីប្រភពផ្សេងទៀតបានបង្ហាញពីរបាយការណ៍ខុសគ្នាថា អ៊ីស្រាអែលបានបានសម្លា.ប់តែជំនួយការជិតស្និទ្ធ និងជាក្មួយប្រុសរបស់លោក Qassem ប៉ុណ្ណោះ មិនបញ្ជាក់ថាជាលោក Qassem ផ្ទាល់នោះទេ។ ជាមួយគ្នានោះ ក្រុមហេសបូឡាស ក៏មិនទាន់ចេញសេចក្ដីប្រកាសថាមួយណាគឺជាការពិតនោះដែរ។ ភាពផ្ទុយគ្នានេះបង្ហាញថាព័ត៌មាននៅតែកំពុងវិវត្ត ហើយមិនទាន់ត្រូវបានផ្ទៀងផ្ទាត់ពេញលេញនៅឡើយ។

គួរជម្រាបថា លោក Naim Qassem បានបម្រើការជាឥស្សរជនជាន់ខ្ពស់នៅក្នុងក្រុមហេសបូឡាអស់រយៈពេលជាងបីទសវត្សរ៍មកហើយ ហើយត្រូវបានតែងតាំងជាមេដឹកនាំក្រុមនេះបន្ទាប់ពីអ៊ីស្រាអែលបានធ្វើឃាត មេដឹកនាំចាស់វស្សា លោក Hassan Nasrallah ក្នុងឆ្នាំ ២០២៤ ។ ក្រុមហេសបូឡាត្រូវបានបង្កើតឡើងក្នុងឆ្នាំ ១៩៨២ ដោយមានការគាំទ្រពីកងឆ្មាំបដិវត្តន៍អ៊ីស្លាមរបស់អ៊ីរ៉ង់ ហើយក៏ជា ក្រុមដ៏សំខាន់ក្នុងជួយអ៊ីរ៉ង់ក្នុងការវាយប្រហារផ្សេងៗ។

ការវាយប្រហារទាំងនេះកើតឡើងចំពេលមានការវាយប្រហារយ៉ាងខ្លាំងដោយអ៊ីស្រាអែលទៅលើគោលដៅក្រុមហេសបូឡានៅក្នុងប្រទេសលីបង់ ដែលបានបណ្តាលឱ្យមានមនុស្សរាប់រយនាក់ស្លា.ប់ និងបង្កើនការភ័យខ្លាចនៃសង្គ្រាមក្នុងតំបន់កាន់តែទូលំទូលាយ។ ជាមួយគ្នានេះ ក្រុមហេសបូឡាបានឆ្លើយតបវិញយ៉ាងចាស់ដៃដោយការបា.ញ់គ្រាប់រ៉ុក្កែត ហើយភាពតានតឹងកាន់តែបន្តកើនឡើង៕