ប្រទេសប៉ាណាម៉ា ៖ ប្រធានាធិបតីអាមេរិក លោក Donald Trump តែងតែដាក់សម្ពាធលើប្រទេសផ្សេងៗ ដើម្បីឱ្យប្រទេសទាំងនោះធ្វើតាមតម្រូវការរបស់លោក ហើយប៉ាណាម៉ា ក៏ដូចគ្នាដែរ ។ លោក Trump បាននិយាយនាពេលកន្លងមកថា នឹងគ្រប់គ្រងប៉ាណាម៉ា ដោយសារប្រទេសនេះទទួលឥទ្ធិពលចិនខ្លាំងពេក ហើយអាមេរិកចង់ដកឥទ្ធិពលចិនចេញ ។

កាលពីថ្ងៃទី៧ ខែកុម្ភៈ ឆ្នាំ២០២៥ សារព័ត៌មានបរទេសរាយការណ៍ថា ប្រធានាធិបតីប៉ាណាម៉ាបានយល់ស្របចំពោះការលើកឡើងរបស់លោក Trump ដោយសម្រេចចិត្តដកប៉ាណាម៉ាចេញពីគម្រោងខ្សែក្រវ៉ាត់ និងផ្លូវរបស់រដ្ឋាភិបាលទីក្រុងប៉េកាំង ខណៈមន្ត្រីទូតអាមេរិកនិយាយថា នេះហើយជាជោគជ័យរបស់អាមេរិក ។

ប្រធានាធិបតីប៉ាណាម៉ា លោក Jose Raul Mulino ប្រកាសកាលពីថ្ងៃទី៦ ខែកុម្ភៈ ថា លោកបានផ្តល់ដំណឹងទៅចិនឱ្យជ្រាបជាផ្លូវការរួចហើយពីការសម្រេចចិត្តដកខ្លួនចេញពីគម្រោងវិនិយោគ និងសាងសង់ខ្នាតធំរបស់ចិនស្របតាមគម្រោងខ្សែក្រវ៉ាត់ និងផ្លូវ ក្រោយពីប៉ាណាម៉ាចុះកិច្ចព្រមព្រៀងជាមួយចិន កាលពីឆ្នាំ២០១៧ ។ លោក ពុំជ្រាបពីអ្នកដែលតាំងចិត្តចុះកិច្ចព្រមព្រៀងវិនិយោគជាមួយចិនទេ តើអ្វីដែលប៉ាណាម៉ាទទួលបាននារយៈពេលប៉ុន្មានឆ្នាំនេះ? តើអ្វីដែលល្អបំផុតបានពីគម្រោងខ្សែក្រវ៉ាត់ និងផ្លូវសម្រាប់ប៉ាណាម៉ា? ដូច្នេះ លោកសម្រេចចិត្តដកខ្លួនចេញពីគម្រោង ។

មន្ត្រីក្រសួងការបរទេសចិនបានលើកឡើងពីការជ្រៀតជ្រែករបស់អាមេរិកចំពោះការចាប់ផ្តើមគម្រោងខ្សែក្រវ៉ាត់ និងផ្លូវរបស់ប៉ាណាម៉ា ដោយការដាក់សម្ពាធ និងបង្ខំ ហើយមន្ត្រីរូបនេះប្រាប់ថា ការសម្រេចចិត្តរបស់ប៉ាណាម៉ាធ្វើឱ្យចិនខកបំណងយ៉ាងខ្លាំង ។ ចិនចង់ឃើញប៉ាណាម៉ាសម្រេចចិត្តបានត្រឹមត្រូវផ្អែកតាមសម្ព័ន្ធភាពទ្វេភាគី និងផលប្រយោជន៍រួមរបស់ប្រទេសទាំងពីរ និងចៀសផុតពីការជ្រៀតជ្រែកខាងក្រៅ ។

គួរបញ្ជាក់ថា ការសម្រេចចិត្តដកខ្លួនចេញពីគម្រោងខ្សែក្រវ៉ាត់ និងផ្លូវរបស់ចិន គឺបានកើតឡើងក្រោយពីរដ្ឋមន្ត្រីក្រសួងការបរទេសអាមេរិកធ្វើដំណើរទស្សនកិច្ចនៅប៉ាណាម៉ា ហើយលើកឡើងពីការបារម្ភរបស់លោក Trump ពាក់ព័ន្ធនឹងចិនមានឥទ្ធិពលកាន់តែខ្លាំងលើប៉ាណាម៉ា ។ មន្ត្រីទូតអាមេរិកបានហៅការដកខ្លួននេះថា ជាជោគជ័យរបស់អាមេរិក ។

ប៉ាណាម៉ា គឺជាប្រទេសអាមេរិកឡាទីនដំបូងគេ ដែលបានចូលរួមគម្រោងខ្សែក្រវ៉ាត់ និងផ្លូវរបស់ប្រធានាធិបតីចិន លោក ស៊ី ជិនពីង ក្រោយពីប៉ាណាម៉ាផ្តាច់ទំនាក់ទំនងជាមួយតៃវ៉ាន់មិនយូរប៉ុន្មានកាលពីឆ្នាំ២០១៧ ហើយប្រកាសទទួលស្គាល់អធិបតេយ្យភាពចិនលើតៃវ៉ាន់ ៕

ប្រទេសឥណ្ឌូណេស៊ី ៖ រដ្ឋាភិបាលឥណ្ឌូណេស៊ីព្យាយាមកាត់បន្ថយអត្រាការស្លា.ប់ របស់ពលរដ្ឋដោយសារជំងឺផ្សេងៗ តាមរយៈការបង្កើតគម្រោងត្រួតពិនិត្យសុខភាពពលរដ្ឋគ្រប់រូបពុំគិតថ្លៃ ហើយគម្រោងនេះចាប់អនុវត្តពីថ្ងៃទី១០ ខែកុម្ភៈ ឆ្នាំ២០២៥ តទៅ ។ ក្រៅពីនេះ រដ្ឋាភិបាលឥណ្ឌូណេស៊ី ក៏មានគម្រោងផ្តល់អាហារថ្ងៃត្រង់ពុំគិតថ្លៃដល់សិស្សសាលាផងដែរ ។

ឥណ្ឌូណេស៊ីចាប់ផ្តើមអនុវត្តគម្រោងត្រួតពិនិត្យសុខភាពពលរដ្ឋប្រចាំឆ្នាំពុំគិតថ្លៃ ក្នុងគោលបំណងឱ្យពលរដ្ឋដឹងថា តើពួកគេកើតជំងឺអ្វីខ្លះ ដើម្បីព្យាបាលបានទាន់ពេលវេលា ។ ហេតុនេះ ពលរដ្ឋគ្រប់រូបមិនថាមានអាយុប៉ុន្មាន គឺអាចត្រួតពិនិត្យសុខភាពនៅថ្ងៃកំណើតរបស់ខ្លួន ហើយគ្រូពេទ្យនឹងពិនិត្យឈាម វាស់សម្ពាធឈាម វាស់ភ្នែក ត្រចៀក ពិនិត្យហានិភ័យជំងឺបេះដូង មហារីក សុខភាពផ្លូវចិត្ត និងដាច់សរសៃឈាមខួរក្បាល ។

ឥណ្ឌូណេស៊ី គឺជាប្រទេសមានពលរដ្ឋច្រើនលំដាប់ទី៤ លើពិភពលោក ហើយពលរដ្ឋឥណ្ឌូណេស៊ីភាគច្រើនស្លាប់ដោយសារជំងឺបេះដូង ដាច់សរសៃឈាមខួរក្បាល និងរបេង បើការត្រួតពិនិត្យរកឃើញជំងឺ គឺពលរដ្ឋនឹងអាចព្យាលជំងឺទាន់ពេលដើម្បីកាត់បន្ថយអត្រាការស្លាប់ ។ មន្ត្រីក្រសួងសុខាភិបាលនិយាយថា គម្រោងពិនិត្យសុខភាពពលរដ្ឋពុំគិតថ្លៃ នឹងចំណាយថវិកាច្រើនរហូតដល់ជាង១៨ម៉ឺនដុល្លារអាមេរិក ដែលចាត់ទុកថា គឺជាគម្រោងផ្នែកសុខាភិបាលដ៏ធំបំផុតរបស់ឥណ្ឌូណេស៊ី ។

ពីដំបូង រដ្ឋាភិបាលមានបំណងចំណាយថវិកាច្រើនជាងនេះសម្រាប់គម្រោងពិនិត្យសុខភាពពលរដ្ឋ ប៉ុន្តែថវិកាគម្រោងនេះត្រូវបានកាត់បន្ថយមួយចំនួនក្រោយពីប្រធានាធិបតីឥណ្ឌូណេស៊ី លោក Prabowo Subianto ថ្លែងថា នឹងបែងចែកថវិកាខ្លះសម្រាប់ចំណាយក្នុងគម្រោងផ្សេង ដែលលោកធ្លាប់សន្យាពេលរកសំឡេងឆ្នោត ដូចជា ៖ គម្រោងផ្តល់អាហារថ្ងៃត្រង់ពុំគិតថ្លៃដល់សិស្សសាលា ។

មន្ត្រីអគ្គនាយកដ្ឋានសុខភាពបឋម និងសហគមន៍នៃក្រសួងសុខាភិបាលឱ្យដឹងថា គម្រោងនេះមានតួនាទីការពារជំងឺផ្សេងៗដែលឆក់យកជីវិតពលរដ្ឋ ហើយក្រសួងសង្ឃឹមថា ការពិនិត្យសុខភាពពលរដ្ឋពុំគិតថ្លៃនឹងធ្វើឡើងចាប់ពីទារក រហូតដល់មនុស្សចាស់ ដើម្បីឱ្យពួកគេយល់ដឹងពីសុខភាពរបស់ខ្លួន ។ រហូតមកដល់ថ្ងៃទី១០ ខែកុម្ភៈ ពលរដ្ឋប្រមាណ១៧,០០០នាក់ បានមកពិនិត្យសុខភាព ហើយគោលបំណងរបស់គម្រោងពុំមែនព្យាបាលជំងឺទេ ប៉ុន្តែជាការលើកទឹកចិត្តឱ្យពលរដ្ឋព្យាបាលជំងឺទាន់ពេល ៕

ប្រទេសថៃ ៖ កាលពីថ្ងៃទី១០ ខែកុម្ភៈ ឆ្នាំ២០២៥ សារព័ត៌មានថៃរាយការណ៍ថា យន្តហោះក្រុមហ៊ុនអាកាសចរណ៍ Aeroflot ដែលចាកចេញពីខេត្តភូកេត ប្រទេសថៃ ទៅកាន់ទីក្រុងមូស្គូ ប្រទេសរុស្ស៊ី មានបញ្ហាបច្ចេកទេសពេលហោះហើរ ហើយពុំអាចធ្វើដំណើរទៅដល់គោលដៅ ។ យន្តហោះនេះបានហោះចុះឡើងនៅលើសមុទ្រអាន់ដាម៉ាន់ រហូតដល់ជាង៥ម៉ោង ក្រោយមក អាកាសយានិកក៏បានចុះចតយន្តហោះនៅអាកាសយានដ្ឋានសុវណ្ណភូមិ ដោយសុវត្ថិភាព ។

យន្តហោះ SU277 របស់ក្រុមហ៊ុនអាកាសចរណ៍រុស្ស៊ី Aeroflot បានកំណត់ការធ្វើដំណើរពីអាកាសយានដ្ឋានភូកេត ប្រទេសថៃ ទៅកាន់អាកាសយានដ្ឋាន Sheremetyevo ទីក្រុងមូស្គូ ប្រទេសរុស្ស៊ី ប៉ុន្តែយន្តហោះនេះធ្វើដំណើរយឺតយ៉ាវជាងការប្រកាស ។ ក្រោយចាកចេញពីអាកាសយានដ្ឋានភូកេត យន្តហោះក៏តម្រង់ទៅទិសពាយ័ព្យ រួចហើយ យន្តហោះពុំបានហោះទៅទីក្រុងមូស្គូទេ បែរជាហោះចុះឡើងលើសមុទ្រអាន់ដាម៉ាន់ រយៈពេលជាង៥ម៉ោង ។

គ្មានព័ត៌មានបញ្ជាក់ថា ហេតុអ្វីទើបយន្តហោះនេះពុំអាចធ្វើដំណើរទៅដល់ទីក្រុងមូស្គូ ប៉ុន្តែគេសន្និដ្ឋានថា យន្តហោះអាចមានបញ្ហាបច្ចេកទេសមួយចំនួន ទើបហោះមិនឆ្ងាយពីខេត្តភូកេត បែបនេះ ។ សារព័ត៌មានថៃរាយការណ៍ថា យន្តហោះត្រូវចុះចតជាបន្ទាន់ ទើបអាកាសយានិកចាំបាច់ត្រូវបើកយន្តហោះលើសមុទ្រដើម្បីផ្តល់សុវត្ថិភាពដល់អ្នកដំណើរ ។

យន្តហោះ SU277 របស់ក្រុមហ៊ុនអាកាសចរណ៍ Aeroflot បានចុះចតនៅអាកាសយានដ្ឋានសុវណ្ណភូមិដោយសុវត្ថិភាព ខាងអាកាសយានដ្ឋានបានត្រៀមខ្លួនទទួលការចុះចតជាបន្ទាន់ ដោយសារយន្តហោះមានបញ្ហាបច្ចេកទេស ទើបពុំអាចហោះទៅដល់គោលដៅ ។ ភ្នាក់ងារអាកាសយានដ្ឋានបានត្រួតពិនិត្យយ៉ាងតឹងរ៉ឹង និងផ្តោតសំខាន់ខ្លាំងលើសុវត្ថិភាពអ្នកដំណើរ ។ នេះបើតាមភ្នាក់ងារអាកាសយានដ្ឋានសុវណ្ណភូមិ ។

លោក គិទីផុង គិទិខាចន នាយកអាកាសយានដ្ឋានសុវណ្ណភូមិ និយាយថា លោកបានស្នើឱ្យភ្នាក់ងារពាក់ព័ន្ធត្រៀមទប់ទល់ស្ថានការណ៍ ដូចជា ៖ ភ្នាក់ងារពន្លត់ភ្លើង ភ្នាក់ងារសង្គ្រោះ គ្រូពេទ្យ និងឧបករណ៍ផ្សេងៗ ។ ក្រោយពីយន្តហោះចុះចតនៅអាកាសយានដ្ឋានសុវណ្ណភូមិដោយសុវត្ថិភាព និងឱ្យអ្នកដំណើរចុះពីយន្តហោះ ភ្នាក់ងារអាកាសយានដ្ឋានបានបញ្ជូនកម្លាំងមកថែទាំ និងចែកទឹកបរិសុទ្ធឱ្យអ្នកដំណើរ ។

ក្រុមហ៊ុនអាកាសចរណ៍ Aeroflot សម្រេចចិត្តចុះចតនៅអាកាសយានដ្ឋានសុវណ្ណភូមិ បង្ហាញឱ្យឃើញថា ពួកគេមានទំនុកចិត្តលើស្តង់ដារសុវត្ថិភាព និងការត្រៀមខ្លួនករណីកើតអាសន្ន ។ អាកាសយានិកបាននាំបុគ្គលិកអាកាសចរណ៍១៥នាក់ និងអ្នកដំណើរ ៣៣១នាក់ ទៅសម្រាកក្នុងសណ្ឋាគារ ហើយក្រុមហ៊ុនអាកាសចរណ៍នឹងស្វែងរកយន្តហោះថ្មីឱ្យអ្នកដំណើរ ៕

ប្រទេសជប៉ុន ៖ ប្រទេសជប៉ុនបានចាត់វិធានការបង្ក្រា.ប ក្រុមជនជាតិវៀតណាមដើរលួ.ច ទ្រព្យសម្បត្តិនៅជប៉ុន និងបញ្ជូនទៅប្រទេសកំណើតវិញ ក្រោយពីរកឃើញថា ពួកគេបានបញ្ជូនសម្ភារៈលួ.ច បានទៅឱ្យបក្ខពួកនៅទីក្រុងហាណូយ ប្រទេសវៀតណាម ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី១០ ខែកុម្ភៈ ឆ្នាំ២០២៥ ។

ភ្នាក់ងារស៊ើបអង្កេតជប៉ុនឱ្យដឹងថា ជនជាតិវៀតណាមទាំងនេះបានលួចសម្ភារៈផ្សេងៗពីហាងលក់ទំនិញនៅប្រទេសជប៉ុន រួចហើយ ពួកគេក៏បញ្ជូនសម្ភារៈទៅឱ្យបក្ខពួកដែលមានស្នាក់ការធំនៅទីក្រុងហាណូយ ។ កាលពីខែវិច្ឆិកា ឆ្នាំ២០២៤ ភ្នាក់ងារស៊ើបអង្កេតជប៉ុនបានឆ្មក់ចូលទីតាំងជាច្រើនកន្លែងរបស់ជនជាតិវៀតណាម ដែលត្រូវបានបង្កើតឡើងទូទាំងប្រទេសជប៉ុន ។

ភ្នាក់ងារស៊ើបអង្កេតជឿជាក់ថា មានសម្ភារៈជាច្រើនដែលជនជាតិវៀតណាមលួចពីគ្លីនិកលក់ថ្នាំពេទ្យនៅទូទាំងប្រទេសជប៉ុន ហើយពួកគេបញ្ជូនមកទីតាំងជាច្រើនកន្លែងនៅជប៉ុន ។ តាំងពីខែវិច្ឆិកា ឆ្នាំ២០២៤ សមត្ថកិច្ចជប៉ុនបានចាប់ខ្លួនជនជាតិវៀតណាមចំនួន១១នាក់ តាមលទ្ធផលការសួរចម្លើយ និងឆែកមើលទូរស័ព្ទដៃដែលរឹបអូសបានឃើញថា ពួកគេមានស្នាក់ការធំនៅទីក្រុងហាណូយ និងមានជនជាតិវៀតណាមប្រុស-ស្រី២នាក់ធ្វើដំណើរមកជប៉ុន គឺជាអ្នកទិញសម្ភារៈតាមអនឡាញ ។

កាលពីខែមករា ឆ្នាំ២០២៥ ភ្នាក់ងារផ្សព្វផ្សាយជប៉ុន (NHK) បានធ្វើដំណើរចុះតាមតំបន់នានានៅប្រទេសវៀតណាម ហើយរកឃើញអគារមួយកន្លែងស្រដៀងនឹងឃ្លាំងទំនិញ ។ បុរសវៀតណាមម្នាក់រស់នៅក្បែរអគារប្រាប់ថា បានឃើញរថយន្តដឹកទំនិញចេញ-ចូលទីនេះគ្រប់ពេលវេលា ហើយបុគ្គលិកធ្វើការក្នុងអគារប្រាប់គាត់ថា ធ្វើការផ្នែកនាំចូលថ្នាំពេទ្យពីជប៉ុន ។ ប៉ុន្តែបរិមាណទំនិញដែលពួកគេដឹកជញ្ជូន ចាប់ផ្តើមធ្លាក់ចុះតាំងពីខែធ្នូ ឆ្នាំ២០២៤ ។

គួរបញ្ជាក់ថា សមត្ថកិច្ចជប៉ុនបានចាប់ជនជាតិវៀតណាមលួចសម្ភារៈជាបន្តបន្ទាប់ ដូចជា ៖ កាលពីខែកុម្ភៈ ឆ្នាំ២០២៤ សមត្ថកិច្ចជប៉ុនបានចាប់ជនជាតិវៀតណាម ៤នាក់ ករណីលួចសម្ភារៈ ហើយពួកគេសារភាពថា ធ្វើដំណើរមកជប៉ុនដើម្បីលួចសម្ភារៈយកទៅលក់នៅវៀតណាម ។ ក្រៅពីនេះ សមត្ថកិច្ចជប៉ុនក៏បានចាប់ជនជាតិវៀតណាម ២នាក់ទៀត ដែលលួចកង់ជាង៧០គ្រឿងនៅទីក្រុងតូក្យូ និងដោះគ្រឿងកង់ចេញពីគ្នាបញ្ជូនទៅវៀតណាម ៕

សហរដ្ឋអាមេរិក ៖ កាលពីថ្ងៃទី៩ ខែកុម្ភៈ ឆ្នាំ២០២៥ មហាសេដ្ឋីអាមេរិក លោក Elon Musk ប្រធានក្រសួងប្រសិទ្ធភាពរដ្ឋាភិបាល (DOGE) បានស្នើឱ្យបិទវិទ្យុសំឡេងសហរដ្ឋអាមេរិក Voice of America (VOA) និងវិទ្យុអឺរ៉ុបសេរី Radio Free Europe/Radio Liberty (RFE/RL) ដោយលោកអះអាងថា ប្រព័ន្ធផ្សព្វផ្សាយទាំងពីរល្អ ប៉ុន្តែខ្ជះខ្ជាយថវិការបស់អ្នកបង់ពន្ធ ហើយសម្បូរពួកសកម្មជនឆ្វេងនិយម ។

វិទ្យុអឺរ៉ុបសេរី (RFE/RL) ត្រូវបានបង្កើតឡើងកាលពីឆ្នាំ១៩៥០ ដើម្បីផ្សព្វផ្សាយការឃោសនាគាំទ្រអាមេរិក និងប្រឆាំងសូវៀតនៅអឺរ៉ុប ហើយដំណើរការដំបូងដោយទីភ្នាក់ងារសម្ងាត់ CIA ។ រីឯវិទ្យុសំឡេងសហរដ្ឋអាមេរិក (VOA) ត្រូវបានបង្កើតឡើងកាលពីឆ្នាំ១៩៤០ ដើម្បីប្រឆាំងនឹងការឃោសនារបស់ណាស៊ី ហើយផ្លាស់ប្តូរទៅសហភាពសូវៀត នៅឆ្នាំ១៩៤៧ ។

វិទ្យុទាំងពីរនេះបានទទួលថវិកាឧបត្ថម្ភពីសភា និងរដ្ឋាភិបាលអាមេរិកជាអ្នកគ្រប់គ្រងដោយផ្ទាល់ ហើយវិទ្យុទាំងពីរស្ថិតនៅក្រោមការគ្រប់គ្រងរបស់ទីភ្នាក់ងារសហរដ្ឋអាមេរិកសម្រាប់ប្រព័ន្ធផ្សព្វផ្សាយសកល (United States Agency for Global Media – USAGM) ដែលជាភ្នាក់ងាររបស់រដ្ឋាភិបាលកណ្តាល ។

សំណើបិទវិទ្យុទាំងពីររបស់លោក Elon Musk ស្របនឹងការយល់ឃើញរបស់លោក Richard Grenell បេសកជនពិសេសរបស់ប្រធានាធិបតីអាមេរិក លោក Donald Trump ដែលបានរិះគន់វិទ្យុទាំងពីរលើបណ្តាញសង្គម X កាលពីថ្ងៃទី៩ ខែកុម្ភៈ កន្លងមកថា ៖ «វិទ្យុទាំងពីរជាប្រព័ន្ធផ្សព្វផ្សាយចាយវាយថវិការបស់អ្នកបង់ពន្ធអាមេរិក និងមានរដ្ឋាភិបាលជាម្ចាស់ ប៉ុន្តែវិទ្យុទាំងនេះសម្បូរពួកសកម្មជនឆ្វេងនិយម ។ យើងពុំត្រូវការប្រព័ន្ធផ្សព្វផ្សាយដែលចាយវាយថវិការដ្ឋាភិបាលទេ» ។

លោក Elon Musk ក៏បានឆ្លើយតបក្នុងបណ្តាញសង្គម X ថា ៖ «មែនហើយ បិទវិទ្យុទាំងពីរទៅ ពីព្រោះបច្ចុប្បន្ន អឺរ៉ុបមានសេរីភាពហើយ គ្មានអ្នកណាស្តាប់វិទ្យុទាំងនេះទៀតទេ ។ វានៅសេសសល់តែពួកឆ្វេងនិយមឆ្កួតៗដែលនិយាយជាមួយខ្លួនឯង ហើយខ្ជះខ្ជាយថវិការបស់អ្នកបង់ពន្ធអាមេរិក ចំនួន១,០០០លានដុល្លារក្នុង១ឆ្នាំ» ។

រយៈពេលប៉ុន្មានឆ្នាំនេះ លោក Elon Musk និងលោក Grenell បានជំទាស់យ៉ាងខ្លាំងរឿងការស្វែងរកថវិការបស់រដ្ឋាភិបាលអាមេរិកដើម្បីផ្តល់ឱ្យប្រព័ន្ធផ្សព្វផ្សាយទាំងឡាយ ដោយពួកគេអះអាងថា ពុំគួរយកថវិការបស់អ្នកបង់ពន្ធមកឧបត្ថម្ភប្រព័ន្ធផ្សព្វផ្សាយទេ ។ ក្រុមការងាររបស់លោក Elon Musk បានស្វែងរកវិធីលុបចោលការឧបត្ថម្ភប្រាក់សម្រាប់ប្រព័ន្ធផ្សព្វផ្សាយ ហើយលោករិះគន់រដ្ឋាភិបាលដែលផ្តល់ប្រាក់ឱ្យប្រព័ន្ធផ្សព្វផ្សាយផ្សេងៗ ដូចជា ៖ Politico AP និង New York Times ៕