ថ្វីដ្បិតតែសារ៉ាយគឺជារុក្ខជាតិតូចៗក៏ពិតមែន ប៉ុន្តែវាបានផ្ដល់ផលប្រយោជន៍ច្រើនជាងរុក្ខជាតិធំៗដទៃទៀត ដោយបានផលិតអុកស៉ីហ្សែនបញ្ចេញមកឱ្យផែនដីច្រើនជាងគេបំផុត ដើម្បីទ្រទ្រង់ជីវិតផ្សេងៗដែលរស់នៅលើភពផែនដី។ មិនត្រឹមតែប៉ុណ្ណោះ តាមការស្រាវជ្រាវរបស់អ្នកវិទ្យាសាស្ត្រនាយុគសម័យបច្ចុប្បន្ននេះក៏បានរកឃើញដែរថា សារាយក៏ជាអាហារដ៏ល្អបំផុតចំពោះសុខភាពមនុស្ស ដែលគេអាចយកមកផលិតជាឱសថកែរោគ ឬបំប៉នសុខភាពទៀតផង។
យោងតាមសារព័ត៌មានថៃ “សារ៉ាយ” បានបញ្ចេញឧស្ម័នអុកស៉ីហ្សែន ដែលផលិតមកពីដំណើរការរស្មីសំយោគ។ អុកស៊ីហ្សែនទាំងអស់ដែលពួកវាបញ្ចេញមក មានបរិមាណច្រើនជាងអុកស៉ីហ្សែនរបស់ដើមឈើ និងរុក្ខជាតិនៅលើដីទាំងអស់បញ្ចេញរួមគ្នាទៅទៀត។ សារាយនៅក្នុងយុគដំបូង គឺជាធាតុផ្សំសំខាន់របស់ប្រេង និងឧស្ម័នដែលនៅក្រោមផ្ទៃផែនដី។ សារាយពណ៌បៃតងលាយពណ៌ប្រាក់ ឬហៅម្យ៉ាងទៀតថា ស្យាណូបាក់តេរី (Cyano) គឺជាធាតុផ្សំរបស់ភាវៈមានជីវិតដំបូងបំផុតនៅលើពិភពលោក ដែលត្រូវបានរកឃើញនៅក្នុងគ្រោងហ្វូស៊ីលមានអាយុប្រមាណ ៣,៦០០ លានឆ្នាំមុនមកម៉្លេះ។
ហេតុនេះសារាយគឺមានអត្ថប្រយោជន៍ជាច្រើនដល់ភពផែនដី និងមានអត្ថប្រយោជន៍ដល់សុខភាពមនុស្សផងដែរដូចជា៖
-បង្កើតគ្រាប់ឈាមក្រហមនៅខួរឆ្អឹង
– ជំនួយដល់បាក់តេរីល្អៗក្នុងពោះវៀន ដែលសម្រួលដល់ការរំលាយអាហារ
– ជួយទប់ស្កាត់ប្រឆាំងនឹងស្ត្រេស ឬអុកស៊ីតកម្ម
– បង្ការជំងឺរ៉ាំរ៉ៃដូចជា ជំងឺមហារីក និងបញ្ហារំលាយអាហារ
– ជួយបំប៉នស្បែកឱ្យមើលទៅស្រស់ថ្លាល្អ និងជួយបំប៉នសរសៃសក់ រួមទាំងជួយបង្ការជំងឺពក-កទៀតផង៕
