ប្រទេសប្រេស៊ីល ៖ កាលពីថ្ងៃទី២២ ខែកុម្ភៈ ឆ្នាំ២០២៥ សារព័ត៌មានបរទេសរាយការណ៍ថា ពលរដ្ឋជាង១,២០០នាក់ ដែលរស់នៅទីក្រុងភាគឦសានតំបន់អាម៉ាហ្សូន ប្រទេសប្រេស៊ីល បានរងគ្រោះដោយសារព្រះធរណីស្រូបផ្ទះសម្បែង និងអគារអស់រយៈពេលជាច្រើនសប្តាហ៍ ។ វាបណ្តាលមកពីភ្លៀងធ្លាក់យ៉ាងខ្លាំងធ្វើឱ្យដីក្នុងទីក្រុងនេះទន់ជ្រាយ និងបាក់ស្រុតក្លាយជារណ្តៅធំៗជាច្រើនកន្លែង ។

រយៈពេលជាច្រើនសប្តាហ៍មកនេះ ផ្ទៃដីនៅទីក្រុង Buriticupu ខេត្ត Maranhao ស្ថិតនៅភាគឦសានតំបន់អាម៉ាហ្សូន ប្រទេសប្រេស៊ីល បានបាក់ស្រុតបន្តិចម្តងៗក្លាយជារណ្តៅធំៗជាច្រើនកន្លែង ហើយរណ្តៅនីមួយៗមានជម្រៅជាច្រើនម៉ែត្រ ។ ហេតុនេះ សាលាក្រុងបានប្រកាសអាសន្នថា មានពលរដ្ឋប្រមាណ ១,២០០នាក់ កំពុងស្ថិតក្នុងស្ថានភាពគ្រោះថ្នាក់ ដោយសារផ្ទះរបស់ពួកគេបាក់ធ្លាក់ចូលក្នុងរណ្តៅជ្រៅៗ ខណៈទីក្រុងនេះ មានពលរដ្ឋរស់នៅចំនួន៥៥,០០០នាក់ ។

ការប្រកាសអាសន្នរបស់សាលាក្រុង Buriticupu កាលពីដើមខែកុម្ភៈ ឆ្នាំ២០២៥ បញ្ជាក់ថា រយៈពេលជាច្រើនខែមកនេះ រណ្តៅដីជ្រៅៗទាំងអស់កាន់តែមានទំហំធំឡើង រហូតធ្វើឱ្យអគារ និងផ្ទះសម្បែងពលរដ្ឋជាច្រើនខ្នងបាក់ធ្លាក់ចូលក្នុងរណ្តៅជាបន្តបន្ទាប់ ។

អ្នកស្រុកវ័យចំណាស់ម្នាក់ដែលរស់នៅទីក្រុង Buriticupu អស់រយៈពេលជាង២០ឆ្នាំ និយាយថា ដីនឹងបាក់ស្រុតបន្ថែមទៀត ដោយសារភ្លៀងធ្លាក់ខ្លាំងពេកធ្វើឱ្យដីទន់ជ្រាយ ។ រីឯមន្ត្រីសាលាក្រុងឱ្យដឹងថា អាជ្ញាធរគ្មានវិធានការដោះស្រាយបញ្ហាព្រះធរណីស្រូបផ្ទះសម្បែងពលរដ្ឋទេ ប៉ុន្តែសូមពលរដ្ឋតាមដានស្ថានការណ៍ឱ្យបានដិតដល់ ។

គួរបញ្ជាក់ថា ទីក្រុងនេះមានបញ្ហាដីបាក់ស្រុតក្លាយជារណ្តៅធំៗជាច្រើនកន្លែងកាន់តែញឹកញាប់ ហើយវាបានកើតឡើងអស់រយៈពេល៣០ឆ្នាំហើយ ។ អ្នកជំនាញសន្និដ្ឋានថា គឺបណ្តាលមកពីមូលហេតុជាច្រើន ដូចជា ៖ ការកាប់បំផ្លាញព្រៃឈើ, ទឹកភ្លៀងហូរច្រោះដីខ្សាច់ និងការសាងសង់អគារគ្មានផែនការច្បាស់លាស់ ហើយដីនឹងបាក់ស្រុតកាន់តែខ្លាំងពេលភ្លៀងធ្លាក់ ៕

ប្រទេសចិន ៖ កាលពីថ្ងៃទី២១ ខែកុម្ភៈ ឆ្នាំ២០២៥ សារព័ត៌មាន South China Morning Post បានផ្សព្វផ្សាយពីរបាយការណ៍មួយដែលសរសេរពីអ្នកវិទ្យាសាស្ត្រចិនមួយក្រុមបានរកឃើញមេរោគថ្មីក្នុងសត្វប្រចៀវ ហើយមេរោគនេះអាចឆ្លងពីសត្វមករាងកាយមនុស្ស ដូចជំងឺកូវីដ-១៩ ដែរ ។

ក្រុមអ្នកវិទ្យាសាស្ត្រចិនបានហៅឈ្មោះមេរោគថ្មីនេះថា HKU5 ដែលវាស្ថិតក្នុងក្រុមមេរោគ Merbecovirus និងស្ថិតក្នុងក្រុមមេរោគដែលបង្កឱ្យមានរោគសញ្ញាផ្លូវដង្ហើមនៅមជ្ឈិមបូព៌ា (Mers) ។ មេរោគថ្មីនេះត្រូវបានរកឃើញជាលើកដំបូងក្នុងសត្វប្រចៀវពូជ Japanese pipistrelle bat ដែលរស់នៅទីក្រុងហុងកុង ។

បើទោះជាគេពុំទាន់ជ្រាបពីប្រភពមេរោគក្នុងសត្វប្រចៀវច្បាស់លាស់ក្តី ប៉ុន្តែការស្រាវជ្រាវផ្សេងៗបង្ហាញថា ការវិវត្តរបស់មេរោគក្នុងខ្លួនសត្វប្រចៀវអាចឆ្លងទៅរាងកាយមនុស្សបាន ។

ក្រុមអ្នកវិទ្យាសាស្ត្រចិនបានសរសេររបាយការណ៍ស្តីពីការឃើញមេរោគថ្មីនេះ គឺដឹកនាំការសរសេរដោយលោកស្រី Shi Zhengli ឬមនុស្សភាគច្រើនហៅថា «Batwoman» ។ លោកស្រីជាអ្នកជំនាញផ្នែកមេរោគមកពីវិទ្យាស្ថានមេរោគវូហាន ស្ថិតនៅខេត្តហ៊ូប៉ី ប្រទេសចិន ។

គួរបញ្ជាក់ថា វិទ្យាស្ថានមេរោគវូហាន ត្រូវបានមហាជនរិះគន់ថា គឺជាមូលហេតុធ្វើឱ្យជំងឺកូវីដ-១៩ ធ្លាយចេញពីបន្ទប់ពិសោធន៍ និងឆ្លងរាលដាលនៅទូទាំងពិភពលោក កាលពីពេលកន្លងមក ។ ប៉ុន្តែវិទ្យាស្ថាននេះបានបដិសេធថា ពុំជាប់ពាក់ព័ន្ធនឹងការឆ្លងរាតត្បាតជំងឺកូវីដ-១៩ ទេ ៕

ប្រទេសតង់ហ្សានី ៖ បុរសម្នា្នក់បានសម្រេចចិត្តយកប្រពន្ធរហូតដល់២០នាក់ ដោយសារជឿតាមបណ្តាំរបស់ឪពុកថា កូនត្រូវតែរៀបការជាមួយនារីច្រើននាក់ដើម្បីបង្កើតជាក្រុមគ្រួសារធំ ។ បច្ចុប្បន្ន បុរសរូបនេះបានបង្កើតក្រុមគ្រួសារធំមួយតាមបណ្តាំឪពុក គឺមានកូនសរុបចំនួន១០៤នាក់ និងចៅ១៤៤នាក់ ហើយប្រពន្ធម្នាក់ៗរស់នៅយ៉ាងមានសេចក្តីសុខ និងពុំច្រណែ.ន គ្នាទេ ។

បុរសមានប្រពន្ធ និងកូនចៅច្រើននេះ ឈ្មោះ Muinushi Kapinga រស់នៅប្រទេសតង់ហ្សានី បាននិយាយមកកាន់សារព័ត៌មានថា លោករីករាយនឹងការមានសមាជិកគ្រួសារធំបែបនេះ ។ រីឯមូលហេតុដែលលោកយកប្រពន្ធច្រើន ដោយសារឪពុកផ្តាំថា ចូរកូនបង្កើតគ្រួសារធំមួយ ពីព្រោះត្រកូលរបស់ឪពុកមានសមាជិកតិចពេក ហើយឪពុកនឹងគាំទ្រកូនឱ្យរៀបការជាមួយនារីច្រើននាក់ ។

ឪពុកខ្ញុំប្រាប់ថា ក្រុមគ្រួសាររបស់យើងមានសមាជិកតិចតួច ហើយគាត់ចង់ឱ្យខ្ញុំបង្កើនសមាជិកគ្រួសារឱ្យបានច្រើន ។ ខ្ញុំបានរៀបការជាមួយភរិយាទី១ នៅឆ្នាំ១៩៦១ ហើយកូនដំបូងរបស់ខ្ញុំ កើតនៅឆ្នាំ១៩៦២ ។ ប៉ុន្តែឪពុកខ្ញុំប្រាប់ថា យកប្រពន្ធតែម្នាក់ពុំគ្រប់គ្រាន់ទេ គ្រួសាររបស់យើងត្រូវតែបង្កើនសមាជិកថែមទៀត ។ ដូច្នេះ ខ្ញុំក៏ស្តាប់តាមបណ្តាំឪពុក និងចាប់ផ្តើមយកប្រពន្ធថែម ។

ក្រោយមក លោក Kapinga ក៏បានរៀបការជាមួយនារីដែលលោកពេញចិត្តជាបន្តបន្ទាប់ត្រឹមតែរយៈពេល១ឆ្នាំ ហើយលោកក៏រៀបការជាមួយនារីជាច្រើននាក់ទៀត រហូតដល់គ្រប់២០នាក់ ក្នុងនោះប្រពន្ធ៧នាក់របស់លោក គឺជាបងប្អូននឹងគ្នា ។ លោកពុំបានរស់នៅជាមួយប្រពន្ធទាំងអស់ទេ ដោយសារប្រពន្ធខ្លះស្លាប់ចោល និងខ្លះទៀតដើរចេញពីជីវិតលោក បច្ចុប្បន្ន លោកនៅសល់ជាមួយប្រពន្ធតែ១៦នាក់ប៉ុណ្ណោះក្នុងផ្ទះជាមួយគ្នា ។ ពួកនាងពុំច្រណែនគ្នាទេ ហើយប្រពន្ធទាំងអស់ជួយគ្នាមើលថែទាំកូនៗដូចជាកូនបង្កើតរបស់ខ្លួន ។

លោកបន្តថា ឪពុកខ្ញុំបានជួយចេញថ្លៃបណ្ណាការជូនប្រពន្ធចំនួន៥នាក់របស់ខ្ញុំ ពីព្រោះគាត់ចង់ឃើញគ្រួសារពួកយើងរស់នៅជួបជុំគ្នាយូរអង្វែង ។ រីឯប្រពន្ធផ្សេងទៀត គឺខ្ញុំចេញថ្លៃបណ្ណាការខ្លួនឯង ពួកយើងរស់នៅក្នុងជីវិតសាមញ្ញ ប៉ុន្តែមានសេចក្តីសុខ ៕

ប្រទេសកូរ៉េខាងត្បូង ៖ កាលពីថ្ងៃទី១៣ ខែកុម្ភៈ ឆ្នាំ២០២៥ ក្រសួងដឹកជញ្ជូនកូរ៉េខាងត្បូងបានប្រកាសពីវិធានការរឹតបន្តឹងផ្សេងៗ និងអនុវត្តចាប់ពីថ្ងៃទី១ ខែមីនា ដើម្បីផ្តល់សុវត្ថិភាពដល់អ្នកដំណើរលើយន្តហោះ ។ ការកំណត់វិធានការនេះធ្វើឡើងក្រោយកើតហេតុការណ៍ភ្លើងឆេះយន្តហោះរបស់ក្រុមហ៊ុនអាកាសចរណ៍កូរ៉េខាងត្បូង Air Busan កាលពីថ្ងៃទី២៨ ខែមករា នៅអាកាសយានដ្ឋានអន្តរជាតិគីមហ៊ែ ភាគខាងត្បូងប្រទេស ពេលយន្តហោះនេះត្រៀមចេញដំណើរទៅទីក្រុងហុងកុង ។

សារព័ត៌មាន Reuters រាយការណ៍ថា ក្រសួងដឹកជញ្ជូនកូរ៉េខាងត្បូងបានហាមឃាត់អ្នកដំណើរយក Power Bank និងបារីអេឡិចត្រូនិកដាក់ក្នុងកាបូបទុកនៅផ្នែកខាងលើកៅអីអង្គុយ ។ ការហាមឃាត់របស់ក្រសួងដឹកជញ្ជូន គឺដូចគ្នានឹងការហាមឃាត់នាពេលកន្លងមក របស់ក្រុមហ៊ុនអាកាសចរណ៍ Air Busan ។

ប៉ុន្តែអ្នកដំណើរអាចយកថ្មចល័តទំហំ១០០វ៉ាត់ម៉ោង សម្រាប់សាកឧបករណ៍អេឡិចត្រូនិក ឡើងយន្តហោះចំនួន៥ដុំ រីឯថ្មចល័តទំហំ១៦០វ៉ាត់ម៉ោង គឺអ្នកដំណើរពុំអាចយកឡើងយន្តហោះទេ ហើយការសាកថ្មចល័តលើយន្តហោះ ក៏ត្រូវហាមដែរ ។ ការហាមឃាត់នេះដើម្បីកុំឱ្យពលរដ្ឋកូរ៉េខាងត្បូងបារម្ភពីភ្លើងឆេះយន្តហោះដោយសារថ្មចល័ត បើទោះជាកូរ៉េខាងត្បូងពុំទាន់រកឃើញមូលហេតុភ្លើងឆេះយន្តហោះរបស់ក្រុមហ៊ុនអាកាសចរណ៍ Air Busan ក្តី ។

ក្រុមហ៊ុនអាកាសចរណ៍ Air Busan ឱ្យដឹងថា បុគ្គលិកអាកាសចរណ៍បានឃើញភ្លើងឆេះនៅកន្លែងទុកកាបូបអ្នកដំណើរផ្នែកខាងលើកៅអីអង្គុយ ហើយពួកគេសង្ស័យថា វាជាមូលហេតុបណ្តាលឱ្យភ្លើងឆេះយន្តហោះ ។ រីឯអ្នកដំណើរទាំងអស់នៅលើយន្តហោះ ត្រូវបានជម្លៀសទៅកាន់កន្លែងសុវត្ថិភាព ។

អ្នកដំណើរពុំគួរដាក់ថ្មចល័តក្នុងវ៉ាលីសទេ ពីព្រោះវ៉ាលិសរបស់អ្នកដំណើរត្រូវបានបញ្ជូនទៅកន្លែងដាក់សម្ភារៈបាតយន្តហោះ ហើយវាអាចបង្កជាភ្លើងឆេះ ។ នេះបើតាមភ្នាក់ងារអាកាសចរណ៍លំដាប់ពិភពលោក ៕