បងស្រី Ruthko បានបង្ហាញអារម្មណ៍ឈឺចាប់របស់ខ្លួននិងគ្រួសារនៅតែមិនទាន់ធ្វើចិត្តនិងកាត់ចិត្តបានជុំវិញមរណភាពប្អូនប្រុសដែលលាចាកលោកក្នុងរយៈពេលជាង១ខែមកនេះ។ ក្នុងនោះបងស្រី Ruthko ថាជនបង្កគ្មានធម៌មេត្តាមិនអើពើប្អូនប្រុសខ្លួនដេកក្នុងថ្លុកឈាមគិតតែឈរមើលឡានខូចនិងថាគ្រួសារនាងរស់នៅសោកសង្រេងចំណែកឯអ្នកប្រព្រឹត្តប្រហែលជាកំពុងបាយឆ្ងាញ់ដេកលក់ស្រួល។

នៅថ្ងៃទី១៣ កុម្ភៈ គណនីហ្វេកប៊ុកឈ្មោះថា «RieRie Ma» ដែលគេដឹងថាជាបណ្តាញសង្គមបងស្រីរបស់តារាចម្រៀង Ruthko បានរៀបរាប់ដោយអារម្មណ៍ឈឺចាប់ថា«អ្នកធ្វើឱ្យក្រុមគ្រួសារខ្ញុំវេទនា ឈឺចាប់ បែកបាក់ ខូចចិត្ត ខ្សោះកាយ។ អ្នកមិនគួរមានជីវិតកើតជាមនុស្សសោះ។ ស្រណោះម្តាយ ឪពុកអ្នកដែលបង្កើតកូនមកមានសណ្តានបែបនេះ។ ហើយគ្មានមេត្តាធម៌ គិតថាការឆក់យកជីវិតមនុស្សម្នាក់ជារឿងធម្មតា។ ប្អូនខ្ញុំដេកស្តូកស្តឹងកណ្តាលផ្លូវក្នុងថ្លុកឈាម អ្នកមិនអើពើ បែរជាទៅបារម្ភឈរមើលឡានអ្នកខូច»។

គណនីដដែលបន្តទៀតថា «គ្រួសារខ្ញុំត្រូវហែលឆ្លងទូលរែកការបាត់បង់កូនប្រុសជាទីស្រលាញ់ដែលម្តាយខ្ញុំមើលថែស្រលាញ់ស្មើជីវិត។ ខ្ញុំត្រូវបាត់បង់ប្អូនប្រុសដែលខ្ញុំស្រលាញ់ស្មើកែវភ្នែក។ ពួកខ្ញុំត្រូវទូលរែកទុក្ខមួយនេះដែលជាកំហុសរបស់អ្នកអស់មួយជីវិត។ តែអ្នកវិញកំពុងធ្វើអី? ប្រហែលកំពុងបាយឆ្ងាញ់ ដេកស្រួល សើចសប្បាយ ទាំងដែលពួកខ្ញុំជាអ្នកបាត់បង់ត្រូវហែលឆ្លងជំងឺផ្លូវចិត្តនិងភាពសោកសង្រេងទាំងពូជ»។
មួយថ្ងៃៗ សើចផង យំផង ទុក្ខបណ្តើរ ញញឹមទាំងទឹកភ្នែកហូរបណ្តើរទាំងគ្រួសារ ដូចមនុស្សគ្មានវិញ្ញាណ។ ម្តាយខ្ញុំស្គមស្គាំងរស់នៅមានតែសំបកកាយ គ្មានអារម្មណ៍ គ្មានកំលាំង។ មួយថ្ងៃៗគិតតែពីនឹកកូន។ សម្រានក្បែររូបថតកូនរាល់យប់។ នៅសុខៗក៏ស្រែកយំ។ អ្នកឯងដឹងអត់ថាវាវេទនាប៉ុណ្ណា?????

គណនី «RieRie Ma» ថា «ខ្ញុំសុំឱ្យម៉ែឪ បងប្អូនអ្នកមើលឃើញមុខអ្នកពេលណា ចងចាំអ្នកជាអ្នកណា ហើយបានធ្វើអី។ បើអ្នកមានកូននិងប្រពន្ធ សុំឱ្យពួកគាត់ចងចាំអ្នកថាអ្នកជាមនុស្សដែលឆក់យកជីវិតប្អូនខ្ញុំទាំងដែលប្អូនខ្ញុំគ្មានកំហុស។ សុំឱ្យអ្នករស់នៅក្នុងភាពងងឹត វេទនា ហើយចងចាំថាខ្លួនឯងគ្មានមេត្តាធម៌ក្នុងខ្លួន»។

គួរបញ្ជាក់ផងដែរថាតារារ៉េប Ruthko បានស្លាប់ក្នុងវ័យ២៤ឆ្នាំ ក្នុងហេតុការណ៍គ្រោះថ្នាក់ចរាចរណ៍ម៉ូតូធំ បុកជាមួយរថយន្ត LEXUS RX330 ស្លាកលេខខេមរភូមិន្ទ 2–4771 ដែលបើកបត់ឆ្លងបញ្ច្រាស ចូលបុរីប៉េងហួត ស្ថិតនៅផ្លូវ៦០ម៉ែត្រ នៅវេលាម៉ោង០១:៤០នាទីយប់រំលងអាធ្រាត ឈានចូលថ្ងៃទី៦ ខែមករា ឆ្នាំ២០២៥។ ជនបង្កមានឈ្មោះ ណឹម ណាង ភេទប្រុស អាយុ៣៥ឆ្នាំ មុខរបរកងរាជអាវុធហត្ថ៕

ជុំវិញទំនាក់ទំនងតារាចម្រៀងដ៏ស្រស់សោភា រ៉េត ស៊ូហ្សាណា និងកំលោះសង្ហា យូហៃ ដែលជាម្ចាស់ពានកម្មវិធីប្រលងចម្រៀងរ៉េបបានបង្កឱ្យទស្សនិកជនប្រើបណ្តាញសង្គមមានការចាប់អារម្មណ៍មិនតិចនោះទេ។ អ្វីដែលកាន់តែចាប់អារម្មណ៍ ហ្សាណា គឺបានបង្ហោះរូបភាពគូជាមួយ យូហៃ ខណៈ យូហៃ ស្រាប់តែទៅស៊ុបប្រាយនាងនៅលើឆាកតែម្តង។

« i’m sorry babe បើសិនបងធ្វើឱ្យភ្នែកអូនសើម Suzana Reth» ។ នេះគឺជាសារតែតារារ៉េប យូហៃ បង្ហោះទៅកាន់ ហ្សាណា បន្ទាប់ពីនាងបានបង្ហាញការខូចចិត្តថា « ញញឹមស្រស់តែបេះដូងវិញខ្ទេចខ្ទាំអស់ហើយ និងថា ត្រូវការអ្នក ស្ម័គ្រចិត្តមើលថែបេះដូង»។ មិនត្រឹមតែប៉ុណ្ណោះ កញ្ញា រ៉េត ស៊ូហ្សាណា បានបង្ហោះរូបភាពគូលើកដំបូងជាមួយនឹង យូហៃ ដោយបានចោទសួរទៅកាន់អ្នកគាំទ្រថា គួរបន្តឬបញ្ចប់។

សកម្មភាពរបស់អ្នកទាំងពីរបានធ្វើឱ្យទស្សនិកជនជាអ្នកគាំទ្រមានការចាប់អារម្មណ៍យ៉ាងខ្លាំងទាក់ទាញការចុច like រាប់ម៉ឺននិងមតិយោបល់រាប់ពាន់។ អ្នកខ្លះប៉ាន់ស្មានថា ការបង្ហោះរបស់អ្នកទាំងពីរគឺ Drama ពីបទថ្មីរបស់ខ្លួនប៉ុណ្ណោះដែលមានចំណងជើងថា «2AM» ដែលនេះជាការចាប់ដៃគ្នាជាលើកដំបូងសម្រាប់ យូហៃ និង ហ្សាណា ដែលជ្រកកោនក្នុងទ្រនំថ្មី។ ទោះបីនេះជាដំរួយអំពីរឿងរ៉ាវនៅក្នុងបទចម្រៀង ប៉ុន្តែមនុស្សជាច្រើនពេញចិត្តក្នុងការ Ship អ្នកទាំងពីរគឺជាគូស្នេហ៍នឹងគ្នា សូម្បីអ្នកបង្កើតមាតិកា សុភារាជ្យ ក៏គាំទ្រដូចគ្នា។

លើសពីរូបភាពនិងសកម្មភាពនានារបស់ ហ្សាណា និង យូហៃ ពីអ្នកខូចចិត្តរឿងស្នេហាខ្លាចជាអ្នកចម្រៀងរ៉េប អ្នកគាំទ្រក៏ស្រាប់តែញញឹមស្រែកហ៊ោរបិទមាត់មិនជិតនោះគឺ យូហៃ ស្រាប់តែទៅស៊ុបប្រាយ ហ្សាណា នៅលើឆាកតែម្តង។

ក្នុងកម្មវិធីសម្ពោធទូរសព្ទដៃថ្មីនៅរាត្រីថ្ងៃទី១២ ហ្សាណា កំពុងតែបញ្ជូលអារម្មណ៍ក្នុងការសម្តែងបទថ្មីរបស់ខ្លួនស្រាប់តែ យូហៃ ចេញមកស៊ុបប្រាយ ខណៈ ហ្សាណា បានបង្ហាញការភ្ញាក់ផ្អើលចំពោះវត្តមានរបស់ យូហៃ ដែលមកចូលរួមក្នុងកម្មវិធីនេះ ដែលហាក់ទំនងនាងមិនបានដឹងជាមុននោះទេ។ ក្រៅពីការស៊ុបប្រាយក្នុងចំណោមតារាល្បីៗនិងអ្នកចូលរួមក្នុងកម្មវិធីនេះ យូហៃ បានស្វាគមន៍ ហ្សាណា ដោយលើកដៃសំពះជម្រាបយ៉ាងសុភាពបុរស។

នៅពេលវីដេអូនេះបានរីកសាយភាពនៅលើបណ្តាញសង្គមអនឡាញ ទស្សនិកជនជាច្រើនបានបង្ហាញអារម្មណ៍រំភើបចំពោះអ្នកទាំងពីរហើយចំនួននៃការ Ship អ្នកទាំងពីរគឺកាន់តែកើនឡើងទ្វេដង។

កន្លងមក កញ្ញា រ៉េត ស៊ូហ្សាណា ពុំសូវបង្ហាញការស្និទ្ធស្នាលជាមួយដៃគូចម្រៀងបុរសណាក្រៅតែពីកូនប្រុសទី២ របស់ឧកញ៉ា ព្រាប សុវត្ថិ ឡើយ។ ដូច្នេះហើយនៅពេលតារាស្រីរូបនេះបង្ហាញភាពស្និទ្ធស្នាលមកទើបធ្វើឱ្យអ្នកគាំទ្រ Ship ពួកគេ៕

ថ្មីៗនេះសម្រស់ភរិយាតារាចម្រៀង ជា សុជាតិ នៃសមាជិកក្រុម ក្មេងខ្មែរ ទទួលរងការបន្តុះបង្អាប់ពីអ្នកមួយចំនួនស្របពេលអ្នកនាងទើបសម្រាលបុត្ររួចដែលធ្វើឱ្យអ្នកសិល្បៈ និងមហាជនប្រតិកម្មទៅកាន់អ្នកខម្មិននោះយ៉ាងខ្លាំង។ យ៉ាងណា អ្នកនាង រឹម លក្ម្សី បានចេញមកសរសេរលើបណ្តាញសង្គមថានាងមិនខឹងនឹងពាក្យទាំងនោះទេប៉ុន្តែបានកោតសរសើរស្វាមីរបស់ខ្លួនធ្វើគ្រប់បែបយ៉ាងមិនឱ្យនាងពិបាក ខណៈមើលថែកូនទោះមួយយប់គេងបាន១ម៉ោងក្តីក៏មិនដាស់នាងឡើយ។

នៅថ្ងៃទី១២ នេះអ្នកនាង រឹម លក្ម្សី ភរិយាតារាចម្រៀង ជា សុជាតិ បានបង្ហោះរូបភាពជាច្រើនសន្លឹកអមដោយការរៀបរាប់ថា«មិនអីទេមាត់ជារបស់អ្នក អ្នកអាចនិយាយអីក៏បាន មើលងាយរូបសម្រស់ខ្ញុំយ៉ាងណាក៏បាន ខ្ញុំអត់ប្រកាន់ទេ ព្រោះសម្តីរបស់អ្នកគ្មានតម្លៃក្នុងចិត្តខ្ញុំទេ។ ខ្ញុំបែរជាមានអារម្មណ៍ថាខ្លួនឯងមានសំណាងខ្លាំងដែលបានបុរសដែលមិនមានចរឹកដូចជាអ្នកមកធ្វើជាស្វាមីទៅវិញ»។

ការដែលអ្នកនាងនិយាយថាខ្លួនឯងមានសំណាងអ្នកនាង លក្ម្សី ថា ជា សុជាតិ ជាស្វាមីជាអ្នកដាំបាយ ធ្វើម្ហូប លាងចាន បោកខោអាវ ការងារប្រពន្ធលោកធ្វើទាំងអស់មិនឱ្យប្រពន្ធហត់ទេ ការងារប៉ាក្មេកម៉ាក់ក្មេកជួយគ្រប់យ៉ាងមិនដែលប្រកាន់ខ្លួនទេហត់យ៉ាងណាមិនដែលរអ៊ូទេធ្វើបានគ្រប់យ៉ាង។ មិនត្រឹមតែប៉ុណ្ណោះ ជា សុជាតិ និយាយប្រាប់ថាស្រលាញ់នាងរាល់ថ្ងៃ សរសើរប្រពន្ធស្អាត ប្រពន្ធខ្ជូតរាល់ថ្ងៃ មិនថាសម្រស់ប្រពន្ធប្រែប្រួលប៉ុណ្ណា ពេលទម្ងន់មើលថែដូចព្រះនាង មិនចង់ឱ្យប្រពន្ធទៅធ្វើការទេ ចង់ឱ្យសម្រាកឱ្យច្រើន សុខចិត្តហត់ម្នាក់ឯង ចង់ទៅណាក៏ជូនទៅដែរ មិនថាខ្លួនឯងធ្វើការហត់ អស់កម្លាំងប៉ុណ្ណា បើឮប្រពន្ធមិនស្រួលខ្លួនវិញគឺនៅមិនសុខទេភ័យធ្វើអ្វីមិនត្រូវទេ។

ភរិយាតារាចម្រៀង ជា សុជាតិ បន្ថែមទៀតថា ពេលនាងសម្រាលហើយយប់ឡើងស្វាមីនាងគេងបានតែ១ម៉ោង មើលកូនដាច់យប់ម្នាក់ឯងរាល់ថ្ងៃក៏មិនដាស់ប្រពន្ធដែរ សុខចិត្តឱ្យប្រពន្ធគេងមិនឱ្យហត់។ ពេលនាងឡើង ២៣គីឡូ នៅតែសរសើរថាប្រពន្ធស្អាតណាស់ ទោះប៉ុន្មានគីឡូក៏នៅតែស្រឡាញ់ នាងស្ថិតនៅលេខរៀងទី១ក្នុងចិត្តជានិច្ច។ អ្នកនាងថា «អ្នកមើលងាយខ្ញុំចុះ ខ្ញុំមិនប្រកាន់ទេព្រោះការលះបង់របស់ខ្ញុំមិនមែនសម្រាប់អ្នកទេ គឺសម្រាប់កូន ប្តីនិងក្រុមគ្រួសាររបស់ខ្ញុំ»។

ជាមួយគ្នានេះដែរ អ្នកនាង រឹម លក្ម្សី ក៏បានរៀបរាប់ក្នុងរយៈពេលនៃការពរពោះគឺបានបង្រៀននាងច្រើនណាស់ ទាំងការចាញ់កូន ក្អួតចង្អោរ ពិបាកគេង ពិបាកដើរ ពិបាកឈរ ពិបាកអង្គុយ គិតច្រើន រូបរាងប្រែប្រួល សម្រស់ធ្លាក់ពី100ដល់0 អាចមានជំងឺទាំងផ្លូវកាយនិងផ្លូវចិត្តបន្សល់ទុកក្រោយពេលទម្ងន់ ។ ការឈឺពោះសម្រាលជាអ្វីដែលមនុស្សប្រុសគ្មានថ្ងៃយល់។ កើតជាមនុស្សស្រីគ្មានពាក្យថាងាយស្រួលទេ ឈ្មោះជាម្តាយហ៊ានលះបង់គ្រប់បែបយ៉ាងដើម្បីពាក្យមួយឃ្លាគឺ កូនមានសុខភាពល្អ ខណៈ ជា សុជាតិ បាននិយាយដាក់ភរិយា ថាលោកអាណិតប្រពន្ធបើជាលោកវិញមិនដឹថាអាចទ្រាំបានទេនិងថានាងជាមនុស្សពូកែអស្ចារ្យ។

ចុងក្រោយអ្នកនាងលក្ម្សី បានផ្តាំផ្ញើថាអ្នកម្តាយគ្រប់រូបនៅលើពិភពលោកនេះថា«អ្នកគឺជាមនុស្សស្រីពូកែ អស្ចារ្យ និងមហិមាបំផុត អរគុណសម្រាប់ការលះបង់គ្រប់បែបយ៉ាងដើម្បីកូនៗ»៕

អង្គការយូនីសេហ្វ កម្ពុជា បានចេញសេចក្តីថ្លែងការណ៍របស់ខ្លួនហើយទាក់ទងទៅនឹងកូនប្រុសតារាចម្រៀង ជី ដេវិត។ អង្គការយូនីសេហ្វ លើកទឹកចិត្តឱ្យរាយការណ៍អំពីការប្រមាថតាមអនឡាញលើកុមារ។ ការរករឿងឈ្លោះ និងការបៀតបៀនតាមអនឡាញអាចបន្សល់ទុកស្លាកស្នាមផ្លូវចិត្តមួយជីវិតចំពោះកុមារនិងយុវជន។

នាល្ងាចថ្ងៃទី១២ កុម្ភៈ លោកបណ្ឌិត Will Parks នាយកយូនីសេហ្វប្រចាំកម្ពុជា បានចេញសេចក្តីថ្លែងការណ៍ទាក់ទងនឹងករណីរបស់កូនលោក G-Devith បន្ទាប់ពីតារាចម្រៀងរូបនេះបានដាក់បណ្ដឹងទៅអង្គការ UNICEF នៅកម្ពុជា ដើម្បីជំរុញដល់ការលុប ជាអចិន្ត្រៃយ៍គ្រប់គណនីហ្វេសប៊ុកដែលប៉ះពាល់ដល់សិទ្ធិកុមារនៅកម្ពុជាតាមគ្រប់រូបភាព។

ក្នុងសេចក្តីថ្លែងការណ៍បានឱ្យដឹងថា «នាពេលថ្មីៗនេះ បណ្តាញសារព័ត៌មាន និងអ្នកប្រើប្រាស់បណ្តាញទំនាក់ទំនងសង្គមកំពុងចែករំលែកព័ត៌មានជាច្រើន របស់លោក ងួន ចាន់ដាវិត (G-Devith) ដែលពាក់ព័ន្ធនឹងការចោទប្រកាន់អំពីការប្រមាថតាមអនឡាញមកលើកូនរបស់គាត់ យូនីសេហ្វ សូមលើកទឹកចិត្តឲ្យរាយការណ៍អំពីករណី នេះជូនដល់អាជ្ញាធរពាក់ព័ន្ធ។ ចំពោះករណីរករឿងឈ្លោះ ឬការគំរាមកំហែងតាមអ៊ីនធឺណិត ដែលពាក់ព័ន្ធនឹងកុមារ និងយុវជន សូមរាយការណ៍ដោយផ្ទាល់ក្នុងបណ្តាញទំនាក់ទំនងសង្គម ឬទៅកាន់ អគ្គស្នងការដ្ឋាននគរបាលជាតិតាមរយៈលេខ ១២៨៨ ឬ គេហទំព័រ www.hotline.police.gov.kh ដើម្បីចាត់វិធានការសមស្របតាមផ្លូវច្បាប់។

យូនីសេហ្វ ថ្លែងថា «ការរករឿងឈ្លោះ និងការបៀតបៀនតាមអនឡាញអាច បន្សល់ទុកស្លាកស្នាមផ្លូវចិត្តពេញមួយជីវិតចំពោះកុមារ និង យុវជន។ រាជរដ្ឋាភិបាល ក្រុមហ៊ុនបច្ចេកវិទ្យា វិស័យធុរកិច្ច អ្នកបង្កើតមាតិកា ឪពុកម្តាយ និងយុវជនទាំងអស់មានតួនាទីក្នុងការចូលរួមកសាងបរិយាកាសដែលកាន់តែមាន សុវត្ថិភាពសម្រាប់ទាំងអស់គ្នា ជាពិសេសសម្រាប់កុមារ និង យុវជន លើកកម្ពស់សេរីភាពក្នុងការបញ្ចេញមតិ និងទប់ស្កាត់ ការគំរាមកំហែង និងបៀតបៀនតាមអនឡាញ។

ក្នុងនោះដែរ យូនីសេហ្វ បញ្ជក់ថាអង្គការរបស់ខ្លួននៅតែចូលរួមយ៉ាងសកម្មជាមួយរាជរដ្ឋាភិបាល ក៏ដូចជាវិស័យឌីជីថល និងទូរគមនាគមន៍ ដើម្បីពង្រឹងវិធាន ការសុវត្ថិភាពតាមអ៊ីនធឺណិត ជាពិសេស តាមរយៈការដាក់ឱ្យអនុវត្តនូវគោលការណ៍ណែនាំស្តីពីកិច្ចការពារកុមារតាម ប្រព័ន្ធអនឡាញសម្រាប់ក្រុមហ៊ុនបច្ចេកវិទ្យាឌីជីថល និង យុទ្ធនាការសុវត្ថិភាពតាមអនឡាញ ដើម្បីផ្តល់ចំណេះដឹងដល់ កុមារ និងឪពុកម្តាយក្នុងការការពារខ្លួនតាមអ៊ីនធឺណិត។ កុមារគ្រប់រូបមានសិទ្ធិរស់នៅ និងលូតលាស់ក្នុង បរិយាកាសប្រកបដោយសុវត្ថិភាព និងការគាំទ្រ ទាំងនៅលើអនឡាញ និងអហ្វឡាញ៕

ថ្មីៗនេះតារាចម្រៀង វ៉ាន់ នីឡា និងតារាចម្រៀង សួន សុវណ្ណចន្នី បានធ្វើឱ្យសាធារណជនមានការចាប់អារម្មណ៍ ខណៈនាងបានបង្ហោះសំណេរថ្មីមួយទៀតបន្ទាប់ពីរងនូវការវែកញែក។ វ៉ាន់ នីឡា ថានិយាយរឿងមូស រឿងដាយណូស័រលែងបានខួរក្បាលអូតូគិតតែបំបែកសាច់រឿង។

បន្ទាប់ពីបង្ហោះសំណេរសួរថាតួអង្គយកមក Troll ជានាយក្លូ នៅរស់ឬយ៉ាងណាបានធ្វើឱ្យអូសបន្លាយជាប្រធានបទផ្សេងៗជាពិសេសនៅពេលតារាចម្រៀង សួន សុវណ្ណចន្នី ចូលមកខម្មិន ថានាងពស់សារីតែមួយជាមួយអាយដល។ អ្វីដែលកាន់តែក្តៅគគុកនោះតារាស្រីរូបនេះបានថា «ខ្ញុំចង់ចែករំលែកបទពិសោធន៍ សង្គ្រាមរវាងខ្ញុំនឹងមូស តែអត់ហ៊ាននិយាយទេព្រោះមូសឥឡូវកំពុងតែល្បី ខ្ញុំខ្លាចគេថាខ្ញុំចង់តោងវាយក View ចាំថ្ងៃណាដែលវាបាត់ពីភពផែនដីដូច ដាយណូស័រចាំបកស្រាយជូន»។

សំណេរមួយនេះបានធ្វើឱ្យអ្នកលេងបណ្តាញសង្គមជាច្រើនទៅខម្មិនវែកញែកលើនាង ខណៈអ្នកខ្លះថែមទាំងជីកកាយរឿងអតីតរបស់ វ៉ាន់ នីឡា ថែមទៀត ខណៈមកទល់ពេលនេះការបង្ហោះនោះត្រូវបានលាក់ឬលុបលើបណ្តាញសង្គមរបស់នាង។ ការបង្ហោះដែលនាំឱ្យទាញការបញ្ចេញមតិយោបល់ជាច្រើននេះ កញ្ញា វ៉ាន់ នីឡា ក៏បានចេញមកបង្ហោះពីអត្ថន័យបន្ថែមទៀតទាំងរាត្រីថ្ងៃទី១១ ខែកុម្ភៈ ថា «និយាយចេញពីចិត្តហើយ100%ពីបេះដូង អ្វីដែលខ្ញុំសរសេរអត់បានសំដៅលើអ្នកណាទាំងអស់ អ្នកទាំងអស់គ្នាអានឃើញម៉េចគឺអត្ថន័យបែបហ្នឹង។ តែមនុស្សខ្លះម៉េចខួរក្បាលអូតូគិតតែបំបែកសាច់រឿងរហូតចឹង? ក្នុងរង្វង់អ្នកសិល្បៈទាំងអស់គឺខ្ញុំអត់ដែលឈ្លោះគ្នាជាមួយអ្នកណាឡើយ ខាងណាខុសខាងណាត្រូវក៏ខ្ញុំមិនមាត់ដែរ ព្រោះសុទ្ធតែមនុស្សស្គាល់គ្នា។ មើលសូមកុំយកខ្ញុំទៅពាក់ពន្ធ័នឹងប្រធានបទអ្វីគ្រប់យ៉ាងសូម្បីពិនចុងក្រចក់ យូរៗទៅអាឯងនិយាយរឿងមូសរឿងដាយណូស័រក៏លេងបាន . Relax guys !! មិនមែនផែនដីត្រូវរលាយស្អែកទេ . ហើយខ្ញុំចូលសិល្បៈយូរហើយគិតថាខ្ញុំហ្នឹងចង់ជ្រៀតរឿងជម្លោះមែន ? ខ្ញុំដែល share ថាឱ្យសិល្បៈណាមួយអត់? ខុសរឺត្រូវគឺខ្ញុំទុកក្នុងចិត្ត »។

ម្ចាស់បទ «បងឈ្នះហើយ» បន្តទៀតថា «ខ្ញុំអត់ដែលឈ្លានពានរឺចេញពីបន្ទាត់ព្រំដែនរបស់ខ្ញុំទេ តាមពិតមានគេប្រាប់កុំឱ្យខ្ញុំតបតតែមនុស្សជាច្រើនបានយល់ច្រលំជាមួយនឹងអ្វីដែលខ្ញុំសរសេរ ។ បើខ្ញុំនិយាយអះអាងពិនហ្នឹងហើយនៅតែស្តាប់មិនបានខ្ញុំអត់មានអីត្រូវនិយាយទៀតទេ។ ហើយអ្នកជេរខ្ញុំថាឱ្យខ្ញុំនឹងគឺខ្ញុំអត់ទទួលទេ និយាយអីឌឺដងអីឱ្យអ្នកទទួលចុះ»៕