មិត្តភាពជាង១០ឆ្នាំមានទាំងផ្អែមមានទាំងប្រៃ ប៉ុន្តែ ទេព បូព្រឹក្ស និង ពេជ្រ សូលីកា មិនបោះបង់គ្នាចោលនោះទេទោះបីប្រឈមមុខនឹងបញ្ហារៀងខ្លួនក៏ដោយ ខណៈ ទេព បូព្រឹក្ស បានទៅលើកទឹកចិត្តជូនបាច់ផ្កាដ៏ធំទៅដល់ ពេជ្រ សូលីកា ក្នុងការប្រគំតន្រ្តីទោលលើកដំបូង។

ថ្មីៗនេះតារាចម្រៀង ពេជ្រ សូលីកា បានបញ្ចប់ការប្រគំតន្រ្តីទោលរបស់ខ្លួនលើកដំបូងប្រកបដោយភាពជោគជ័យមានទាំងអ្នកសិល្បៈនិងអ្នកគាំទ្រជាច្រើនចូលរួមសេដទាំងអស់គ្នា។ សំបុត្រការប្រគំតន្រ្តីរបស់តារាចម្រៀង ពេជ្រ សូលីកា គឺបានសាងប្រវត្តិសាស្រ្តសម្រាប់តារាចម្រៀងក្នុងស្រុកដែលឈានដល់១៤៩ដុល្លារសម្រាប់សំបុត្រ VIP លើសកំណត់ត្រាកំពូលតារាចម្រៀងក្នុងស្រុកចំនួន២រូប។

តាមរយៈវីដេអូហ្វេនៗដែលចូលរួមចែករំលែកនៅលើបណ្តាញសង្គមក្នុងកម្មវិធីប្រគំតន្រ្តីរបស់ ពេជ្រ សូលីកា គឺមានការចូលរួមស៊ុបប្រាយពីរៀមច្បង យក់ ថិតរដ្ឋា រួមទាំងតារាចម្រៀង ស៊ូ លីផេង រួមទាំងការច្រៀងជាមួយប្អូនស្រីរបស់នាងផងដែរហើយកម្លាំងចិត្តសំខាន់មួយទៀតចំពោះនាងគឺជាកូនប្រុសបណ្តូលចិត្តក៏បានទៅចូលការប្រគំតន្រ្តីម៉ាក់ៗដូចគ្នា។

ក្នុងនោះចំពោះមិត្តភាពវិញ ពេជ្រ សូលីកា ទទួលបានការស៊ុបប្រាយពីតារាចម្រៀង ទេព បូព្រឹក្ស ដោយនាងបានកាន់បាច់ផ្កាកុលាបពណ៌ក្រហមដ៏ធំនិងស្រស់ស្អាតជូនពួកម៉ាកនៅលើឆាកប្រគំតន្រ្តី។

គួរឱ្យដឹងថា កន្លងមកនេះ ទេព បូព្រឹក្ស ធ្លាប់បង្ហាញទស្សនិកជនដោយមិនលាក់លៀមដែរថានាងនិង ពេជ្រ សូលីកា ជាមិត្តភក្តិសម្លាញ់ជាង១០មកហើយ មានទាំងមិននិយាយរកគ្នាទៀត តែពេលនេះមានកូនរៀងៗខ្លួន ចាស់ចិត្តចាស់គំនិតលែងងរងក់ដាក់គ្នាហើយ៕

ប្រទេសថៃ ៖ កាលពីថ្ងៃទី២៤ ខែកុម្ភៈ ឆ្នាំ២០២៥ សារព័ត៌មានថៃរាយការណ៍ថា ប៉ូលិសអន្តោប្រវេសន៍ថៃបានឃា.ត់ ខ្លួនបុរសម្នាក់ជាកូនកាត់ថៃ-ឥណ្ឌា ករណីយកក្រដាសប្រាក់បាតថៃ ស្មើជាង១៥លានបាត ពីប្រទេសកម្ពុជាឆ្លងដែនចូលទឹកដីថៃ ។ បុរសរូបនេះសារភាពថា ប្រាក់ទាំងអស់ គឺខ្លួនបានពីការលេងល្បែងឈ្នះនៅកាស៊ីណូមួយកន្លែងក្នុងទីក្រុងប៉ោយប៉ែត ។

បុរសខាងលើបានស្ពាយកាបូបយ៉ាងធំឆ្លងដែនពីប្រទេសកម្ពុជា ចូលមកទឹកដីថៃ ប៉ុន្តែដោយសារសង្ស័យ ប៉ូលិសអន្តោប្រវេសន៍នៅខេត្តស្រះកែវ ក៏បានឃាត់ខ្លួនសាកសួរពីប្រវត្តិរូប គឺបុរសរូបនេះជាកូនកាត់ថៃ-ឥណ្ឌា អាយុ៤៧ឆ្នាំ និងមានផ្ទះស្នាក់នៅក្នុងទីក្រុងបាងកក ។ បន្ទាប់មក ប៉ូលិសអន្តោប្រវេសន៍បានត្រួតពិនិត្យកាបូបស្ពាយដ៏ធំនេះ ហើយពេលបើកកាបូប ធ្វើឱ្យប៉ូលិសភ្ញាក់ផ្អើលយ៉ាងខ្លាំង ដោយសារមានប្រាក់រហូតដល់ជាង១៥លានបាតក្នុងនោះ ។

តាមការសាកសួរជំហ៊ានដំបូង បុរសកូនកាត់សារភាពថា ប្រាក់ទាំងអស់ គឺខ្លួនបានពីការលេងល្បែងឈ្នះនៅកាស៊ីណូមួយកន្លែងនៅទីក្រុងប៉ោយប៉ែត ប្រទេសកម្ពុជា ។ ប៉ុន្តែប៉ូលិសអន្តោប្រវេសន៍ថៃពុំជឿទេ ដោយសារបុរសនេះបានលួចយកក្រដាសប្រាក់បាតថៃចូលទឹកដីថៃយ៉ាងច្រើន ដោយគ្មានការជូនដំណឹងទៅមន្ត្រីគយ ។ ដូច្នេះ ប៉ូលិសសន្និដ្ឋានថា វាជាប្រាក់បានមកពីការប្រព្រឹត្តទង្វើខុសច្បាប់ និងអាចពាក់ព័ន្ធជាមួយការឆបោកតាមអនឡាញ ។

ប៉ូលិសអន្តោប្រវេសន៍ថៃបានចោទប្រកាន់បុរសកូនកាត់ពីបទលួចនាំចូលប្រាក់បាតដោយគ្មានការជូនដំណឹងទៅមន្ត្រីគយ ។ បច្ចុប្បន្ន ប៉ូលិសអន្តោប្រវេសន៍កំពុងតែស៊ើបអង្កេតបន្ថែមទៀត ដើម្បីចាត់ការបុរសនេះតាមផ្លូវច្បាប់ ។

ប៉ូលិសអន្តោប្រវេសន៍ឱ្យដឹងថា ការយកក្រដាសប្រាក់បាតឆ្លងដែនយ៉ាងច្រើនសន្ធឹកសន្ធាប់បែបនេះ គឺល្មើសនឹងមាត្រា២៤២ នៃច្បាប់គយ ឆ្នាំ២០១៧ ព្រមទាំងល្មើសនឹងសេចក្តីប្រកាសរបស់ក្រសួងហិរញ្ញវត្ថុ ៕

សហរដ្ឋអាមេរិក ៖ កាលពីថ្ងៃទី២៣ ខែកុម្ភៈ ឆ្នាំ២០២៥ យន្តហោះរបស់ក្រុមហ៊ុនអាកាសចរណ៍ American Airlines ជើងហោះហើរ 292 ដែលបានហោះហើរពីទីក្រុងញូវយ៉ក សហរដ្ឋអាមេរិក ទៅកាន់ទីក្រុងញូវដេលី ប្រទេសឥណ្ឌា បានសម្រេចចិត្តចុះចតជាបន្ទាន់នៅអាកាសយានដ្ឋានអន្តរជាតិ Leonardo da Vinci ក្នុងទីក្រុងរ៉ូម ប្រទេសអ៊ីតាលី ក្រោយទទួលបានសារគំរា.ម ថា មានគ្រាប់បែ.ក ផ្ទុះលើយន្តហោះ ។

មុនពេលចុះចតនៅទីក្រុងរ៉ូម គេឃើញយន្តហោះចម្បាំង២គ្រឿង ហោះអមយន្តហោះរបស់ក្រុមហ៊ុនអាកាសចរណ៍ American Airlines ហើយខាងអាកាសយានដ្ឋាន Leonardo da Vinci ក៏បានត្រៀមរថយន្តពន្លត់អគ្គិភ័យចតនៅលើ Runway ផងដែរ ដើម្បីផ្តល់សុវត្ថិភាពដល់អ្នកដំណើរឱ្យចៀសផុតពីគ្រោះថ្នាក់ដោយសារគ្រាប់បែកផ្ទុះ ។ បន្ទាប់មក ភ្នាក់ងារជំនាញបានត្រួតពិនិត្យយន្តហោះ និងសម្ភារៈទាំងអស់របស់អ្នកដំណើរទយ៉ាងលម្អិត ប៉ុន្តែពុំឃើញគ្រាប់បែកឡើយ ។

ក្រុមហ៊ុនអាកាសចរណ៍ American Airlines ឱ្យដឹងថា យន្តហោះបានចុះចតបន្ទាន់នៅទីក្រុងរ៉ូម ដើម្បីឱ្យបុគ្គលិកអាកាសចរណ៍បានសម្រាក មុនពេលហោះហើរទៅកាន់ទីក្រុងញូវដេលី ប្រទេសឥណ្ឌា នៅថ្ងៃទី២៤ ខែកុម្ភៈ ។ មូលហេតុដែលអាកាសយានិកសម្រេចចិត្តចុះចតយន្តហោះនៅទីក្រុងរ៉ូមភ្លាមៗនេះ ដោយសារមានការគំរាមដាក់គ្រាប់បែកផ្ទុះលើយន្តហោះ ពេលយន្តហោះកំពុងតែហោះលើសមុទ្រ Caspian ប៉ុន្តែក្រោយការត្រួតពិនិត្យ បែរជាមិនឃើញអ្វីខុសប្លែក ។

ក្រោយពីយន្តហោះនេះចុះចតនៅអាកាសយានដ្ឋានក្នុងទីក្រុងរ៉ូម បុគ្គលិកអាកាសចរណ៍ក៏បាននាំអ្នកដំណើរទាំងអស់ជិះរថយន្តទៅកាន់អគារអ្នកដំណើរ ហើយអ្នកដំណើរគ្រប់រូប ព្រមទាំងសម្ភារៈត្រូវឆ្លងកាត់ការត្រួតពិនិត្យបន្ថែមទៀត ។ ការត្រួតពិនិត្យសម្ភារៈអ្នកដំណើរនេះធ្វើឡើងល្អិតល្អន់ និងចំណាយពេលយូររហូតដល់ជាង២ម៉ោង ។

អ្នកដំណើរម្នាក់ដែលធ្វើដំណើរពីរដ្ឋមីឈីហ្គេន សហរដ្ឋអាមេរិក ដើម្បីទៅលេងគ្រួសារនៅប្រទេសឥណ្ឌា រៀបរាប់ថា អាកាសយានិកប្រកាសថា យន្តហោះចាំបាច់ត្រូវផ្លាស់ប្តូរគោលដៅ ប្រមាណ៣ម៉ោង មុនពេលទៅដល់ទីក្រុងញូវដេលី ដើម្បីផ្តល់សុវត្ថិភាពដល់អ្នកដំណើរ ។ ពីដំបូង អ្នកដំណើរអង្គុយស្ងាត់ស្ងៀម ប៉ុន្តែក្រោយមក ពួកគេក៏ចាប់ផ្តើមតានតឹងផ្លូវចិត្ត ពេលអាកាសយានិកប្រាប់ថា នឹងមានយន្តហោះចម្បាំង២គ្រឿង ហោះអមយន្តហោះនេះទៅកាន់ទីក្រុងរ៉ូម ៕

ធម្មជាតិតែងតែជាប្រភពនៃការបំផុសគំនិត ការព្យាបាល និងភាពអស្ចារ្យ។ ក្នុងចំណោមគុណសម្បត្តិដ៏ច្រើនរបស់វា ព្រៃឈើជាជម្រកនៃភាពស្ងប់ស្ងាត់ និងជីវិត។ ព្រៃក្រាស់ ជារឿយៗត្រូវបានលាក់បាំងដោយអាថ៌កំបាំង និងភាពទាក់ទាញ ផ្តល់ឲ្យនូវការមើលឃើញដល់ប្រព័ន្ធអេកូឡូស៊ីដែលសំបូរទៅដោយជីវចម្រុះ និងសម្រស់ធម្មជាតិ។

ព្រៃឈើជុំវិញពិភពលោកបានទាក់ទាញចិត្តអ្នកចូលចិត្តផ្សងព្រេង និងអ្នកស្រលាញ់ធម្មជាតិ ឲ្យទៅកម្សាន្តក៏ដូចជាស្រង់យកបទពិសោធន៍ដ៏អស្ចារ្យពីវាផងដែរ។ខាងក្រោមនេះជាព្រៃឈើដ៏អស្ចារ្យបំផុតទាំង៥របស់ពិភពលោកសម្រាប់អ្នកចូលចិត្តដើរលេងតំបន់ព្រៃ

1. ព្រៃអាម៉ាហ្សូន អាមេរិកខាងត្បូង (Amazon Rainforest, South America)ព្រៃអាម៉ាហ្សូនលាតសន្ធឹងលើប្រទេសជាច្រើន រួមទាំងប្រទេសប្រេស៊ីល ប៉េរូ និងកូឡុំប៊ី ព្រៃអាម៉ាហ្សូនគឺជាពិភពធម្មជាតិដ៏អស្ចារ្យ។ វាគ្របដណ្តប់លើផ្ទៃដីជាង 5.5 លានគីឡូម៉ែត្រការ៉េ ហើយជាជម្រកនៃពពួករុក្ខជាតិ និងសត្វដ៏អស្ចារ្យ។ ដំបូលក្រាស់នៃព្រៃឈើ ទន្លេដែលហូរច្រោះ និងប្រភេទសត្វជាច្រើនបង្កើតបានជាប្រព័ន្ធអេកូឡូស៊ីដ៏រស់រវើក និងចម្រុះ ដែលវាជារឿយៗត្រូវបានគេហៅថាជា “សួតនៃផែនដី” ។ ជាមួយនឹងទំហំដ៏ធំរបស់វា និងជីវចម្រុះដែលមិនអាចប្រៀបផ្ទឹមបាន ព្រៃអាម៉ាហ្សូន គឺជាសក្ខីភាពនៃភាពអស្ចារ្យរបស់ធម្មជាតិ។

2. Black Forest ប្រទេសអាល្លឺម៉ង់ ស្ថិតនៅភាគនិរតីនៃប្រទេសអាឡឺម៉ង់ ព្រៃខ្មៅគឺជាទឹកដីដែលមអាថ៌កំបាំង និងដូចជារឿងព្រេងនិទាន។ តំបន់នេះត្រូវបានកំណត់លក្ខណៈដោយព្រៃក្រាស់ ភ្នំរំកិល និងភូមិប្លែកៗ។ ឈ្មោះព្រៃនេះកើតចេញពីព្រៃបៃតងចាស់គ្របដណ្តប់លើផ្ទៃដី ដែលមិនអនុញ្ញាតឲ្យពន្លឺព្រះអាទិត្យចាំងជះទៅដល់ឡើយ បង្កើតបានជាបរិយាកាសអាថ៌កំបាំង និងគួរឱ្យទាក់ទាញបំផុត។ អ្នកឡើងភ្នំ និងអ្នកចូលចិត្តធម្មជាតិសម្រុកទៅ Black Forest ដើម្បីរុករកផ្លូវលំ បឹងដ៏ស្រស់ស្អាត និងទីក្រុងដែលមានមន្តស្នេហ៍ដូចជា Baden-Baden និង Triberg ជាកន្លែងដែលដូចជារឿងនិទានដែលមានជីវិតរស់រើក។

3. ព្រៃឫស្សី ប្រទេសជប៉ុន (Bamboo Forest, Japan) ស្ថិតនៅក្នុងស្រុក Arashiyama នៃទីក្រុងក្យូតូ ព្រៃនេះគឺជាជម្រកឫស្សីដ៏ស្រស់ស្អាតនិងល្បីល្បាញជាងគេលើពិភពលោក។ ព្រៃដ៏ស្ងប់ស្ងាត់នេះ ជាកន្លែងដែលអាចឃើញមានដើមឬស្សីខ្ពស់ៗដែលបក់មកយ៉ាងទន់ភ្លន់តាមខ្យល់ និងពន្លឺថ្ងៃដែលឆ្លងកាត់តាមដើមឬស្សី បង្កើតឱ្យមានចលនារវាងពន្លឺ និងស្រមោលប្រៀបបានដូចជាវាកំពុងតែប្រលែងគ្នា ដែលធ្វើឱ្យព្រៃនេះក្លាយជាកន្លែងដ៏ល្អឥតខ្ចោះសម្រាប់ការដើរលេងដោយស្ងប់សុខ។ ព្រៃឬស្សីនេះបង្កប់នូវខ្លឹមសារនៃភាពស្ងប់ស្ងាត់ ដែលជាសក្ខីភាពនៃសម្រស់ធម្មជាតិ និងបេតិកភណ្ឌវប្បធម៌របស់ប្រទេសជប៉ុន។
4. Daintree Rainforest ស្ថិតនៅក្នុងរដ្ឋ Queensland ប្រទេសអូស្ត្រាលី ព្រៃ Daintree Rainforest គឺជាព្រៃទឹកភ្លៀងដ៏ចំណាស់ និងចម្រុះបំផុតនៅលើពិភពលោក ដែលត្រូវបានគេប៉ាន់ស្មានថាមានអាយុកាលប្រហែល 180 លានឆ្នាំមកហើយ។ តំបន់បេតិកភណ្ឌពិភពលោករបស់អង្គការយូណេស្កូនេះមានរុក្ខជាតិបៃតងខៀវស្រងាត់ ដើមឈើបុរាណ និងសត្វព្រៃដ៏សម្បូរបែប រួមទាំងបក្សីកម្រផងដែរ។ Daintree មិនត្រឹមតែមើលទៅគួរឲ្យភ្ញាក់ផ្អើលប៉ុណ្ណោះទេ ប៉ុន្តែក៏មានសារៈសំខាន់ក្នុងបរិស្ថានផងដែរ ដោយវាដូចជាការមើលទៅភពផែនដីពីអតីតកាលដូច្នេះដែរ។ អ្នកទស្សនាអាចទៅកម្សាន្តនិងរុករកព្រៃឈើនេះដោយដំណើរទេសចរណ៍ដែលមានហ្គាយន៍ណែនាំ ផ្លូវដើរលើអាកាស និងជិះទូកតាមដងទន្លេ ជ្រមុជទឹក និងមើលជីវចម្រុះច្រើនប្រភេទនៃព្រៃកំណប់ធម្មជាតិនេះ។

5. Monteverde Cloud Forest, Costa Rica ព្រៃភ្នំនេះជាដែនជម្រកសម្រាប់ជីវចម្រុះជាច្រើនប្រភេទ ដោយវាត្រូវបានគ្របដោយអ័ព្ទជាញឹកញាប់ ដែលបង្កើតបរិយាកាសដ៏អាថ៌កំបាំង។ បរិយាកាសត្រជាក់ និងសើមជានិជ្ចនេះគាំទ្រដល់ពពួករុក្ខជាតិ និងសត្វជាច្រើនប្រភេទ ពិសេសប្រភេទសត្វជាច្រើនដែលមានលក្ខណៈពិសេសសម្រាប់តែតំបន់នេះ។ ជាមួយនឹងដើមឈើដែលគ្របដណ្ដប់ដោយស្លែ វល្លិព្យួរ និងសត្វព្រៃដ៏សម្បូរបែប ព្រៃ Monteverde Cloud គឺជាឋានសួគ៌សម្រាប់អ្នកទេសចរណ៍ និងអ្នកចូលចិត្តធម្មជាតិ៕

ប្រទេសកូរ៉េខាងត្បូង ៖ ភ្នាក់ងារគ្រប់គ្រងទិន្នន័យអ្នកប្រើប្រាស់អ៊ីនធើរណេតរបស់កូរ៉េខាងត្បូងឱ្យដឹងថា កូរ៉េខាងត្បូងបានហាមឃាត់ការដោនឡូតកម្មវិធី AI ចិន DeepSeek ក្រោយពីអ្នកគ្រប់គ្រងកម្មវិធីនេះទទួលស្គាល់ថា ពុំបានគិតពីច្បាប់មួយចំនួនរបស់កូរ៉េខាងត្បូងដើម្បីការពារទិន្នន័យផ្ទាល់ខ្លួនរបស់អ្នកប្រើប្រាស់ ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី១៧ ខែកុម្ភៈ ឆ្នាំ២០២៥ ។

ភ្នាក់ងារគ្រប់គ្រងទិន្នន័យអ្នកប្រើប្រាស់អ៊ីនធើរណេតឱ្យដឹងថា កូរ៉េខាងត្បូងបានបិទការដោនឡូតកម្មវិធី AI ចិន DeepSeek កាលពីថ្ងៃទី១៥ ខែកុម្ភៈ កន្លងមក ប៉ុន្តែពលរដ្ឋអាចដោនឡូតកម្មវិធីនេះឡើងវិញ ក្រោយពីអ្នកគ្រប់គ្រងកម្មវិធីអនុវត្តតាមច្បាប់គ្រប់គ្រងទិន្នន័យអ្នកប្រើប្រាស់របស់កូរ៉េខាងត្បូង ។

ការហាមដោនឡូតកម្មវិធី DeepSeek បានធ្វើឡើងក្រោយពីក្រសួង និងស្ថាប័នជាច្រើនរបស់រដ្ឋាភិបាលកូរ៉េខាងត្បូងហាមឃាត់ការប្រើប្រាស់កម្មវិធីនេះ ដោយសារបារម្ភពីក្រុមហ៊ុនចិនពុំអាចគ្រប់គ្រងទិន្នន័យអ្នកប្រើប្រាស់ឱ្យត្រឹមត្រូវ ។ រីឯក្រុមហ៊ុនចិនទទួលស្គាល់ថា ពុំបានពិចារណាពីច្បាប់គ្រប់គ្រងទិន្នន័យអ្នកប្រើប្រាស់ក្នុងប្រទេសមួយចំនួន ។

ដោយឡែក ភ្នាក់ងារគ្រប់គ្រងទិន្នន័យអ្នកប្រើប្រាស់អ៊ីនធើរណេតរបស់ប្រទេសអ៊ីតាលី បាននិយាយកាលពីខែមករា ឆ្នាំ២០២៥ ថា បានបញ្ជាឱ្យអ្នកគ្រប់គ្រងកម្មវិធី DeepSeek ប្លុក Chatbot នៅអ៊ីតាលី ដោយសារក្រុមហ៊ុននេះពុំអាចបញ្ជាក់ឱ្យច្បាស់លាស់ពាក់ព័ន្ធនឹងការបារម្ភរបស់ភ្នាក់ងារលើគោលនយោបាយគ្រប់គ្រងទិន្នន័យអ្នកប្រើប្រាស់ ។

មន្ត្រីនាំពាក្យរបស់ក្រសួងការបរទេសចិន បាននិយាយកាលពីថ្ងៃទី៦ ខែកុម្ភៈ កន្លងមកថា រដ្ឋាភិបាលចិនផ្តល់ភាពសំខាន់យ៉ាងខ្លាំងលើទិន្នន័យផ្ទាល់ខ្លួនរបស់អ្នកប្រើប្រាស់ និងសុវត្ថិភាពទិន្នន័យ ។ ក្រៅពីនេះ រដ្ឋាភិបាលចិននឹងពុំអនុញ្ញាតឱ្យក្រុមហ៊ុន ឬបុគ្គលណាម្នាក់ប្រមូលទិន្នន័យអ្នកប្រើប្រាស់ដោយខុសច្បាប់ទេ ៕

ប្រទេសថៃ ៖ កាលពីថ្ងៃទី២៣ ខែកុម្ភៈ ឆ្នាំ២០២៥ សារព័ត៌មានថៃរាយការណ៍ថា នាយករដ្ឋមន្ត្រីថៃបានអរគុណដល់សមត្ថកិច្ចថៃ ដែលបានសហការជាមួយសមត្ថកិច្ចកម្ពុជា ជួយរំដោះពលរដ្ឋថៃ និងបរទេសពីក្រុមឆបោ.កអនឡាញក្នុងអគារមួយកន្លែងនៅទីក្រុងប៉ោយប៉ែត ។ សមត្ថកិច្ចថៃឱ្យដឹងថា ក្រុមឆបោ.កអនឡាញជនជាតិចិនបានជួលអគារដើម្បីបោ.កប្រាស់តាមអនឡាញ និងលួងលោមពលរដ្ឋថៃឱ្យមកធ្វើការនៅទីនេះ ។

លោក ជិរ៉ាយុទ្ធ ហួងសាប់ ទីប្រឹក្សានាយករដ្ឋមន្ត្រីថៃ ឱ្យដឹងថា លោកស្រី ផេថងថាន ស៊ីណាវ៉ាត់ បានទទួលដំណឹងពីសមត្ថកិច្ចកម្ពុជា និងថៃ ចុះត្រួតពិនិត្យអគារមួយនៅទីក្រុងប៉ោយប៉េត និងជួយរំដោះពលរដ្ឋថៃ និងបរទេស ជាច្រើននាក់ចេញពីអគារនេះ ។ លោកស្រីបានអរគុណដល់កម្លាំងសមត្ថកិច្ច និងមន្ត្រីពាក់ព័ន្ធទាំងអស់ដែលប្រឹងប្រែងលុបបំបាត់ក្រុមឆបោកអនឡាញ ក្រោយពីរដ្ឋាភិបាលថៃស្នើសុំការសហការដោះស្រាយបញ្ហាក្រុមឆបោកអនឡាញជាមួយកម្ពុជា ។ លោកស្រីនាយករដ្ឋមន្ត្រីបានស្នើឱ្យមន្ត្រីគ្រប់ស្ថាប័នពាក់ព័ន្ធត្រៀមខ្លួនទទួលពលរដ្ឋថៃត្រឡប់មកវិញ ព្រមទាំងត្រួតពិនិត្យអត្តសញ្ញាណឱ្យបានលម្អិត ។

ក្រោយពីទទួលដំណឹងថា មានពលរដ្ឋថៃមួយចំនួនត្រូវបានក្រុមឆបោកអនឡាញលួងលោមឱ្យមកធ្វើការនៅអគារកម្ពស់៣ជាន់ ក្នុងទីក្រុងប៉ោយប៉ែត ខេត្តបន្ទាយមានជ័យ ស្ថិតនៅទល់មុខច្រកព្រំដែនឃ្លងលឹកផ្សាររុងក្លឿ ស្រុកអារញ្ញប្រាថេត ខេត្តស្រះកែវ កម្លាំងសមត្ថកិច្ចថៃបានទំនាក់ទំនងជាមួយសមត្ថកិច្ចកម្ពុជា និងដឹកនាំកម្លាំងចុះត្រួតពិនិត្យអគារនេះដើម្បីរំដោះជនរងគ្រោះចេញពីអគារ ។ នេះបើតាមការលើកឡើងរបស់សមត្ថកិច្ចថៃ ។

សមត្ថកិច្ចកម្ពុជា និងថៃ បានរំដោះជនបរទេសចំនួន២១៥នាក់ ក្នុងនោះមានជនជាតិថៃ ១០៩នាក់ (ស្រី៥៤នាក់) ។ ក្រៅពីនេះ មានជនជាតិតៃវ៉ាន់ ៥នាក់, ប៉ាគីស្ថាន ៥០នាក់, ឥណ្ឌូណេស៊ី ៣នាក់ និងឥណ្ឌា ៤៨នាក់ ។ សមត្ថកិច្ចថៃសន្និដ្ឋានថា ក្រុមឆបោកអនឡាញជនជាតិចិនបានបោកប្រាស់តាមអនឡាញជាទ្រង់ទ្រាយធំក្នុងប្រទេសទាំងពីរ ។

នៅព្រឹកថ្ងៃទី២៣ ខែកុម្ភៈ សមត្ថកិច្ច និងមន្ត្រីកុងស៊ុលថៃបានធ្វើដំណើរទៅកាន់បរិវេណព្រំដែនឃ្លងលឹក ដើម្បីតាមដានស្ថានការណ៍នេះ និងរៀបចំឯកសារស្រាវជ្រាវប្រវត្តិរូបរបស់ពលរដ្ឋថៃទាំង១០៩នាក់ និងសាកសួរផ្ទាល់មាត់ថា តើពួកគេជាជនរងគ្រោះ ឬជាបក្ខពួករបស់ក្រុមឆបោកអនឡាញ?