សហរដ្ឋអាមេរិក ៖ ក្តីសុបិនរបស់មនុស្សគ្រប់គ្នាចង់ឃើញរថយន្តហោះនៅលើមេឃ គឺមិនយូរទៀតទេ ក្តីសុបិនពួកគេនឹងក្លាយជាការពិត ។ នៅខែកុម្ភៈ ឆ្នាំ២០២៥ ក្រុមហ៊ុនអាមេរិកឈ្មោះ Alef Aeronautics បានបង្ហាញវីដេអូរថយន្តហោះលើអាកាសដ៏ទំនើបបំផុតម៉ាក Alef Model Zero និងត្រៀមលក់ឱ្យអតិថិជនដែលកុម្ម៉ង់ទិញនៅឆ្នាំ២០២៥ ។

Alef Aeronautics គឺជាក្រុមហ៊ុនបច្ចេកវិទ្យាផ្នែកផលិតរថយន្តហោះរបស់អាមេរិក បានសាកល្បងឱ្យរថយន្តទំនើបនេះហោះលើអាកាសជាលើកដំបូង កាលពីថ្ងៃទី១៩ ខែកុម្ភៈ កន្លងមក ។ រថយន្តនេះអាចហោះទៅលើអាកាស និងហោះចុះមកក្រោមវិញនៅវាលស្មៅមួយកន្លែងក្បែរទីក្រុងសាន់តាម៉ាថេអូ រដ្ឋកាលីហ្វ័រញ៉ា ។

លោក Jim Duchovny នាយកក្រុមហ៊ុន Alef Aeronautics និយាយថា ក្រុមហ៊ុនបានសាកល្បងរថយន្តហោះដំបូងគេលើពិភពលោក ប៉ុន្តែលោកពុំបានបង្ហាញវីដេអូរថយន្តហោះលម្អិតទេ ដោយសារលោកចង់ការពារភាពជាម្ចាស់កម្មសិទ្ធិរបស់ក្រុមហ៊ុន និងធានាសុវត្ថិភាពដល់អតិថិជន មុនពេលក្រុមហ៊ុនលក់រថយន្តហោះជាផ្លូវការ ។

រថយន្តហោះមានលក្ខណៈស្រដៀងនឹងរថយន្តធម្មតាដែរ គឺវាអាចចតនៅចំណតរថយន្ត និងបើកបរនៅតាមដងផ្លូវដូចរថយន្តធម្មតា ប៉ុន្តែវាមានពិសេស គឺអាចហោះបានចម្ងាយ ១៧០គីឡូម៉ែត្រ និងបើកបរលើផ្លូវបានចម្ងាយ ៣២០គីឡូម៉ែត្រ ។ រថយន្តនេះមានប្រព័ន្ធផ្តល់សុវត្ថិភាពដល់អ្នកបើកបរ, ប្រព័ន្ធគ្រប់គ្រងការបម្លាស់ទី, ប្រើប្រាស់ថាមពលអគ្គិសនី១០០%, មានប្រព័ន្ធផ្តល់ដំណឹងពីឧបសគ្គនៅខាងមុខ និងប្រព័ន្ធជាច្រើនទៀត ។

ក្រោយការសាកល្បងលើកដំបូងទទួលបានជោគជ័យ ក្រុមហ៊ុនគ្រោងសាកល្បងរថយន្តហោះបន្ថែមទៀតដើម្បីវិភាគទិន្នន័យបច្ចេកវិទ្យាយ៉ាងលម្អិត មុនពេលក្រុមហ៊ុនដំណើរការផលិតរថយន្ត ។ រថយន្តហោះ Alef Model Zero មានការទទួលស្គាល់ពីភ្នាក់ងារគ្រប់គ្រងអាកាសចរណ៍អាមេរិក និងអនុញ្ញាតឱ្យរថយន្តនេះហោះយ៉ាងស្របច្បាប់នៅអាមេរិក ។ បច្ចុប្បន្ន មានអតិថិជនកុម្ម៉ង់ទិញរថយន្តរហូតដល់ជាង៤០០គ្រឿង ហើយក្រុមហ៊ុននឹងចាប់ផ្តើមលក់រថយន្តហោះនៅឆ្នាំ២០២៥ ក្នុងតម្លៃ ៣សែនដុល្លារអាមេរិក ៕

សហរដ្ឋអាមេរិក ៖ កាលពីថ្ងៃទី២៤ ខែកុម្ភៈ ឆ្នាំ២០២៥ សារព័ត៌មានបរទេសរាយការណ៍ថា ភ្នាក់ងារគ្រប់គ្រងទូទៅរបស់អាមេរិក General Services Administration (GSA) មានគម្រោងបិទបណ្តាញស្ថានីយសាករថយន្តអគ្គិសនីរបស់រដ្ឋនៅទូទាំងប្រទេស ដោយអះអាងថា ស្ថានីយទាំងនេះលែងចាំបាច់ទៀតហើយ ។ វាជាការអនុវត្តតាមគោលការណ៍ណែនាំរបស់រដ្ឋាភិបាលលោក Donald Trump ដែលឈប់គាំទ្រគម្រោងថាមពលកកើតឡើងវិញ ។

បច្ចុប្បន្ន ភ្នាក់ងារគ្រប់គ្រងទូទៅរបស់អាមេរិក (GSA) មានតួនាទីគ្រប់គ្រងស្ថានីយសាករថយន្តអគ្គិសនីរាប់រយកន្លែងនៅទូទាំងប្រទេស ដែលមានរន្ធដោតសរុបប្រមាណ ៨,០០០ សម្រាប់សាករថយន្តអគ្គិសនីរបស់រដ្ឋាភិបាល និងរថយន្តអគ្គិសនីរបស់មន្ត្រីរាជការ ។ រីឯមូលហេតុនៃការបិទស្ថានីយសាករថយន្តអគ្គិសនីនៅទូទាំងប្រទេស គឺភ្នាក់ងារ GSA បញ្ជាក់ថា វាជាការអនុវត្តតាមគោលការណ៍ណែនាំរដ្ឋាភិបាលក្រោមការគ្រប់គ្រងរបស់លោកប្រធានាធិបតី Donald Trump គឺឈប់គាំទ្រគម្រោងថាមពលកកើតឡើងវិញ ។

ការបិទស្ថានីយសាករថយន្តអគ្គិសនីនឹងប៉ះពាល់ដល់ការអភិវឌ្ឍប្រព័ន្ធដឹកជញ្ជូនប្រកបដោយនិរន្តរភាពរបស់រដ្ឋាភិបាល ពីព្រោះកន្លងមក រដ្ឋាភិបាលអាមេរិកស្ថិតក្រោមការគ្រប់គ្រងរបស់អតីតប្រធានាធិបតី លោក Joe Biden គឺមានគម្រោងឱ្យពលរដ្ឋផ្លាស់ប្តូរមកប្រើប្រាស់រថយន្តអគ្គិសនី ដើម្បីកាត់បន្ថយការបំភាយឧស្ម័នផ្ទះកញ្ចក់ ។ លោក Biden មានគោលដៅកាត់បន្ថយការប្រើរថយន្តប្រេងឥន្ធនៈ និងបង្កើនការប្រើរថយន្តអគ្គិសនីក្នុងរដ្ឋាភិបាល ប្រមាណ ៦៥ម៉ឺនគ្រឿង ។

ការដំឡើងសា្ថនីយសាករថយន្តអគ្គិសនីនៅអាមេរិក គឺប្រើប្រាស់ថវិកាចំនួន៩៧៥លានដុល្លារ ពីគម្រោង Inflation Reduction Act របស់លោក Biden ដើម្បីលើកកម្ពស់ការប្រើប្រស់ថាមពលស្អាត ។ ការសម្រេចចិត្តបិទស្ថានីយសាករថយន្តអគ្គិសនីរបស់ភ្នាក់ងារ GSA នឹងប៉ះពាល់ដល់គោលដៅរបស់រដ្ឋាភិបាលក្នុងការអភិវឌ្ឍប្រព័ន្ធដឹកជញ្ជូនប្រកបដោយនិរន្តរភាព និងការប្រើប្រាស់ថាមពលស្អាត នាថ្ងៃអនាគត ។ ប៉ុន្តែរហូតមកដល់ថ្ងៃទី២៤ ខែកុម្ភៈ ពុំទាន់មានការប្រកាសជាផ្លូវការពីភ្នាក់ងារ GSA ពាក់ព័ន្ធនឹងការបិទស្ថានីយសាករថយន្តអគ្គិសនីទេ ៕

ប្រទេសចិន ៖ កាលពីថ្ងៃទី២៤ ខែកុម្ភៈ ឆ្នាំ២០២៥ សារព័ត៌មានបរទេសរាយការណ៍ថា ស្ថានការណ៍កាន់តែក្តៅគគុក ដោយសារចិនធ្វើសមយុទ្ធយោធាបា.ញ់គ្រាប់ពិតនៅឈូងសមុទ្រតុងកឹង (Tonkin) ក្រោយពីវៀតណាមទើបតែប្រកាសបន្ទាត់ព្រំដែនថ្មី ដើម្បីកំណត់ដែនទឹករបស់ខ្លួន ។

ការិយាល័យសុវត្ថិភាពដែនសមុទ្រចិនបញ្ជាក់ថា សមយុទ្ធនឹងធ្វើឡើងនៅបរិវេណឈូងសមុទ្រប៉ីពូ ក្បែរប្រទេសចិន ។ រីឯវៀតណាមពុំទាន់ឆ្លើយតបនឹងការធ្វើសមយុទ្ធយោធារបស់ចិនទេ ប៉ុន្តែកន្លងមក វៀតណាមប្រកាសថា ព្រំដែនទឹករវាងវៀតណាម និងចិន គឺស្របតាមអនុសញ្ញាអង្គការសហប្រជាជាតិស្តីពីច្បាប់សមុទ្រ (UNCLOS) ហើយអនុសញ្ញានេះនឹងជួយការពារអធិបតេយ្យភាពដែនទឹករបស់វៀតណាម ។

ទោះជាចិន និងវៀតណាមបានធ្វើកិច្ចព្រមព្រៀងដែនសមុទ្រនៅឈូងសមុទ្រតុងកឹងក្តី ប៉ុន្តែប្រទេសទាំងពីរនៅតែមានជម្លោះនៅសមុទ្រចិនខាងត្បូង ជាពិសេស នៅប្រជុំកោះស្ព្រាតលី និងប៉ារ៉ាសែល ហើយចិនបានប្រើកម្លាំងប្រឆាំងអ្នកនេសាទវៀតណាមនៅប្រជុំកោះនេះ ។ ជាក់ស្តែង កាលពីខែតុលា ឆ្នាំ២០២៥ កងទ័ពចិនបានប្រើកម្លាំងលើអ្នកនេសាទវៀតណាម ១០នាក់ រហូតដល់រងរបួសធ្ងន់ ។

ចិនបានទាមទារធ្វើជាម្ចាស់កម្មសិទ្ធិស្ទើរទាំងអស់នៅសមុទ្រចិនខាងត្បូង ដោយចិនប្រើប្រាស់ខ្សែបន្ទាត់ព្រំដែនទឹកចំនួន១០ ដែលត្រួតលើគ្នាជាមួយវៀតណាម ហ្វីលីពីន ម៉ាឡេស៊ី ព្រុយណេ និងតៃវ៉ាន់ ។ រីឯឥណ្ឌូណេស៊ី ក៏ធ្លាប់ប៉ះទង្គិចជាមួយកងទ័ពជើងទឹកចិនដែរ នៅក្បែរប្រជុំកោះណាធូណា ។

កាលពីសប្តាហ៍ទី៣ ខែកុម្ភៈ ឆ្នាំ២០២៥ ឧទ្ធម្ភាគចក្ររបស់កងទ័ពជើងទឹកចិនបានហោះល្បាតមានចម្ងាយត្រឹម៣ម៉ែត្រ ពីព្រំដែនហ្វីលីពីន នៅជិតប្រជុំកោះស្កាបូរ៉ូ ដែលជាចំណុចជម្លោះរវាងចិន និងហ្វីលីពីន ។

ដោយឡែក អូស្ត្រាលី និងនូវែលសេឡង់បានរិះគន់ចិន ដោយសារចិនជូនដំណឹងយឺតយ៉ាវអំពីការធ្វើសមយុទ្ធយោធានៅសមុទ្ររបស់ប្រទេសទាំងពីរ កាលពីពេលកន្លងមក ។ ហេតុនេះ ធ្វើឱ្យយោធាចិនត្រូវដកចេញពីបរិវេណនេះភ្លាមៗ បើទោះជាពុំបានរំលោភច្បាប់អន្តរជាតិក្តី ៕

អ្នកដែលចូលចិត្តធ្វើដំណើរកម្សាន្ត តែងតែស្រមៃចង់ស្វែងយល់ពីទីតាំងដ៏ល្បីល្បាញបំផុតរបស់ពិភពលោក រីករាយជាមួយវប្បធម៌ចម្រុះ និងរសជាតិអាហារកម្រនិងអសកម្ម។

ដំណើរកម្សាន្តផ្តល់ជូននូវបទពិសោធន៍យ៉ាងទូលំទូលាយ ចាប់ពីកន្លែងសម្គាល់ប្រវត្តិសាស្ត្រ និងព្រឹត្តិការណ៍វប្បធម៌ រហូតដល់ទេសភាពដ៏ស្រស់ស្អាត និងម្ហូបឆ្ងាញ់ៗ។ខាងក្រោមនេះជាប្រទេសទាំង ១០ ដែលមានអ្នកចូលទស្សនាច្រើនជាងគេបំផុតក្នុងពិភពលោក ដោយផ្អែកលើទិន្នន័យទេសចរណ៍អន្តរជាតិ៖

១ ប្រទេសបារាំង(France) – ក្នុងចំនួនភ្ញៀវទេសចរ 100 លាននាក់ ប្រទេសបារាំងបានគ្រងដំណែងជាគោលដៅទេសចរណ៍កំពូលរបស់ពិភពលោក។ ពីប៉ម Eiffel Tower ក្នុងទីក្រុងប៉ារីស ទៅកាន់ឆ្នេរដ៏ស្រស់ស្អាតនៃសមុទ្រមេឌីទែរ៉ាណេ French Riviera ប្រទេសបារាំងផ្តល់នូវភាពទាក់ទាញជាច្រើន។ ភ្ញៀវទេសចរសម្រុកមកប្រទេសនេះសម្រាប់ប្រវត្តិដ៏សម្បូរបែប សារមន្ទីរលំដាប់ពិភពលោក និងម្ហូបអាហារឆ្ងាញ់ៗ។

២ អេស្បាញSpain – មានភ្ញៀវទេសចរចំនួន ៨៥,២ លាននាក់ អេស្បាញទាក់ទាញអ្នកធ្វើដំណើរជាមួយនឹងវប្បធម៌រស់រវើក ស្ថាបត្យកម្មដ៏អស្ចារ្យ និងទេសភាពដ៏ស្រស់ស្អាត។ Sagrada Familia របស់ Barcelona, ព្រះបរមរាជវាំង Madrid និងឆ្នេរ Costa del Sol គ្រាន់តែជាចំណុចលេចធ្លោមួយចំនួនដែលទាក់ទាញអ្នកទស្សនារាប់លាននាក់ក្នុងមួយឆ្នាំៗ។

៣ សហរដ្ឋអាមេរិក(United States ) – មានភ្ញៀវទេសចរចំនួន 66.5 លាននាក់ សហរដ្ឋអាមេរិកផ្តល់នូវបទពិសោធន៍ចម្រុះ ចាប់ពីផ្លូវដ៏មមាញឹកនៃទីក្រុងញូវយ៉ក រហូតដល់ទេសភាពដ៏ស្ងប់ស្ងាត់នៃឧទ្យានជាតិដូចជា Yellowstone និង Yosemite ។ អ្នកទេសចរក៏ត្រូវបានទាក់ទាញទៅកាន់មជ្ឈមណ្ឌលវប្បធម៌នៃទីក្រុង Los Angeles, Las Vegas និង Miami ផងដែរ។

៤ ប្រទេសអ៊ីតាលី(Italy) – មានភ្ញៀវទេសចរចំនួន 57.2 លាននាក់ ភាពទាក់ទាញ និងប្រវត្តិដ៏សម្បូរបែបរបស់ប្រទេសអ៊ីតាលី ធ្វើឱ្យវាក្លាយជាការពេញនិយមក្នុងចំណោមអ្នកធ្វើដំណើរ។ ប្រាសាទបុរាណនៃទីក្រុងរ៉ូម ព្រែកជីកដ៏រ៉ូមែនទិកនៃទីក្រុង Venice និងសម្បត្តិសិល្បៈនៃទីក្រុង Florence គឺជាតំបន់ដ៏លេចធ្លោ ដែលរួមចំណែកដល់ការទាក់ទាញមានភ្ញៀវទេសចរទៅទស្សនាប្រទេសនេះ។

៥ ប្រទេសទួរគី (Turkey )- មានភ្ញៀវទេសចរចំនួន 55.2 លាននាក់ ការបញ្ចូលគ្នានៃឥទ្ធិពលអឺរ៉ុប និងអាស៊ី ធ្វើឱ្យវាក្លាយជាគោលដៅដ៏គួរឱ្យចាប់អារម្មណ៍មួយ។ ផ្សារដ៏មមាញឹកនៃទីក្រុងអ៊ីស្តង់ប៊ុល ទេសភាពដ៏អស្ចារ្យនៃទីក្រុង Cappadocia និងទីក្រុងបុរាណនៃ Ephesus គ្រាន់តែជារតនសម្បត្តិមួយចំនួនរបស់ប្រទេសនេះប៉ុណ្ណោះ។

៦ ម៉ិកស៊ិក(Mexico ) – ភ្ញៀវទេសចរចំនួន 42.2 លាននាក់ ម៉ិកស៊ិកទាក់ទាញអ្នកទស្សនាជាមួយនឹងវប្បធម៌រស់រវើក ឆ្នេរដ៏ស្រស់ស្អាត និងអច្ឆរិយវត្ថុបុរាណវិទ្យា។ ប្រាសាទបុរាណរបស់ជនជាតិម៉ាយ៉ាននៃ Chichen Itza ឆ្នេរដ៏ស្រស់ស្អាតនៃទីក្រុង Cancun និងផ្លូវដ៏រស់រវើកនៃទីក្រុងម៉ិកស៊ិក គឺជាកន្លែងទាក់ទាញកំពូល។

៧ ចក្រភពអង់គ្លេស(United Kingdom) – អ្នកទស្សនាចំនួន 37.2 លាននាក់ ប្រវត្តិសាស្រ្តដ៏សម្បូរបែបរបស់ចក្រភពអង់គ្លេស និងកន្លែងសម្គាល់ដ៏ល្បីល្បាញធ្វើឱ្យវាក្លាយជាគោលដៅដ៏ពេញនិយមមួយ។ អ្នកទេសចរសម្រុកទៅទីក្រុងឡុងដ៍ ដើម្បីទស្សនាវិមាន Buckingham ប៉មនៃទីក្រុងឡុងដ៍ និងសារមន្ទីរអង់គ្លេស។ លើសពីរដ្ឋធានី ទីជនបទដ៏ស្រស់ស្អាត និងទីក្រុងប្រវត្តិសាស្ត្រដូចជា Edinburgh និង Bath ផ្តល់នូវការរុករកគ្មានទីបញ្ចប់។

៨ ប្រទេសអាល្លឺម៉ង់(Germany ) – ភ្ញៀវទេសចរចំនួន 34.8 លាននាក់ ភាពលាយបញ្ចូលគ្នានៃសម័យទំនើប និងប្រពៃណីរបស់ប្រទេសអាឡឺម៉ង់បានទាក់ទាញភ្ញៀវទេសចររាប់លាននាក់ក្នុងមួយឆ្នាំៗ។ ភាពរស់រវើកនៃទីក្រុងប៊ែកឡាំង ទេសភាពដ៏ស្រស់ស្អាតនៃព្រៃខ្មៅ និងប្រាសាទទេពអប្សរនៃទីក្រុងបាវ៉ារៀ គឺជាហេតុផលមួយចំនួនដែលមនុស្សចូលចិត្តទៅទស្សនាប្រទេសនេះ។

៩ ប្រទេសក្រិច (Greece)- ភ្ញៀវទេសចរចំនួន 32.7 លាននាក់ ប្រវត្តិសាស្រ្តបុរាណរបស់ប្រទេសក្រិច និងកោះដ៏ស្រស់ស្អាត ធ្វើឱ្យវាក្លាយជាគោលដៅនៃក្តីស្រមៃ។ Acropolis នៃទីក្រុង Athens ឆ្នេរដ៏ស្រស់ស្អាតនៃ Santorini និងតំបន់ប្រវត្តិសាស្រ្តនៃ Crete គឺស្ថិតក្នុងចំណោមកន្លែងទាក់ទាញកំពូលដែលធ្វើឲ្យអ្នកធ្វើដំណើរទៅកាន់ប្រទេសក្រិក។

១០ អូទ្រីស៖ (Austria )បេតិកភណ្ឌវប្បធម៌ និងសម្រស់ធម្មជាតិរបស់ប្រទេសអូទ្រីសមានអ្នកទស្សនាចំនួន 30.9 លាននាក់។ ឆាកតន្ត្រីបុរាណរបស់ទីក្រុងវីយែន ភូមិដ៏ស្រស់ស្អាតនៃភ្នំអាល់ និងទីក្រុងប្រវត្តិសាស្រ្តនៃទីក្រុង Salzburg គឺជាគោលដៅដែលមិនគួរមើលរំលង៕

កាលពីថ្ងៃទី២៥ ខែកុម្ភៈ ឆ្នាំ២០២៥ សារព័ត៌មាន Thairath រាយការណ៍ថា លើកនេះ ស្ថានការណ៍តានតឹងបានកើតឡើងម្តងទៀតនៅប្រាសាទតាមាន់ធំ គឺពលរដ្ឋថៃមួយក្រុមធ្វើដំណើរពីទីក្រុងបាងកក ដើម្បីមកទស្សនានៅប្រាសាទតាមាន់ធំ និងស្តាប់មគ្គុទ្ទេសក៍ទេសចរថៃរៀបរាប់ពីព្រំដែនខ្មែរ-ថៃ ប៉ុន្តែត្រូវបានកងទ័ពខ្មែរឈរជើងនៅប្រាសាទតាមាន់ធំ ចូលមកហាមឃាត់ ។

បើតាមវីដេអូរបស់សារព័ត៌មាន Thairath គេបានឃើញមគ្គុទ្ទេសក៍ទេសចរថៃនិយាយទៅកាន់ពលរដ្ឋថៃមួយក្រុម ដែលមកដើរលេងនៅប្រាសាទតាមាន់ធំថា ៖ «នៅចំណុចនេះ គឺជាព្រំដែនរវាងប្រទេសកម្ពុជា និងថៃ ហើយនឹងមានការថែទាំរួមគ្នារវាងកងទ័ពខ្មែរ និងថៃ ដោយពុំប្រើប្រាស់អាវុធ» ។

ពេលមគ្គុទ្ទេសក៍ទេសចរថៃកំពុងតែនិយាយរៀបរាប់ទៅកាន់ពលរដ្ឋថៃបែបនេះ កងទ័ពខ្មែរដែលឈរជើងនៅប្រាសាទតាមាន់ធំ ក៏ប្រាប់ឱ្យមគ្គុទ្ទេសក៍ទេសចរថៃនិយាយបិទមេក្រូ និងពុំបានហាមឃាត់ការដើរកម្សាន្តរបស់ភ្ញៀវទេសចរថៃទេ ។

ប៉ុន្តែថែបែរជាចោទប្រកាន់ថា កងទ័ពខ្មែរហាមភ្ញៀវទេសចរថៃដើរហួសបន្ទាត់ព្រំដែននៅលើប្រាសាទតាមាន់ធំ ធ្វើឱ្យភ្ញៀវទេសចរថៃទាំងនេះត្រូវដើរត្រឡប់ក្រោយវិញ ។

ក្រោយមក កងទ័ពថៃម្នាក់ក៏បានដើរមកពន្យល់ទៅកាន់ពលរដ្ឋថៃដែលមកដើរលេងនៅប្រាសាទតាមាន់ធំ ហើយប្រាប់ឱ្យពួកគេដើរត្រឡប់ក្រោយ ។ កងទ័ពថៃរូបនេះនិយាយថា ៖ «បន្ទាត់ព្រំដែនរបស់ថៃនៅលើប្រាសាទតាមាន់ធំ គឺកំណត់ត្រឹមដើមឈើនេះ ។ ដូច្នេះ យើងអាចមកទស្សនាប្រាសាទតាមាន់ធំបានត្រឹមចំណុចដើមឈើនេះ រីឯខាងឆ្វេងនោះ គឺជារបស់ប្រទេសជិតខាង» ។

គួរបញ្ជាក់ថា កាលពីថ្ងៃទី១៣ ខែកុម្ភៈ ពលរដ្ឋខ្មែរមួយក្រុមបានមកលេងនៅប្រាសាទតាមាន់ធំ និងច្រៀងចម្រៀងជាតិដើម្បីផ្តល់កម្លាំងចិត្តដល់កងទ័ពខ្មែរឈរជើងនៅប្រាសាទតាមាន់ធំ ស្ថិតលើភ្នំដងរែក ឃុំគោកមន ស្រុកបន្ទាយអំពិល ខេត្តឧត្តរមានជ័យ ជាប់ព្រំដែនខេត្តសុរិន្ទ ប្រទេសថៃ ប៉ុន្តែត្រូវបានកងទ័ពថៃហាមឃាត់ថា ការច្រៀងចម្រៀងនេះបង្ហាញពីអត្តសញ្ញាណជាតិខ្មែរលើទឹកដីថៃ ៕

ប្រទេសចិន ៖ កាលពីថ្ងៃទី១៨ ខែកុម្ភៈ ឆ្នាំ២០២៥ សារព័ត៌មានបរទេសរាយការណ៍ថា ក្រុមអ្នកជំនាញចិនបានប្រើប្រាស់បច្ចេកទេសកែសម្រួលហ្សែនដើម្បីបង្កើតពូជស្រូវថ្មី ដែលអាចផលិតសារធាតុ CoQ10 សម្រាប់ប្រឆាំងនឹងអុកស៊ីតកម្ម ។ អ្នកបរិភោគស្រូវថ្មីនេះនឹងទទួលបានសារធាតុចិញ្ចឹមរាងកាយដែលផ្តល់ប្រយោជន៍ដល់បេះដូងយ៉ាងខ្លាំង ។

CoQ10 គឺជាសារធាតុប្រឆាំងនឹងអុកស៊ីតកម្ម ដែលរាងកាយរបស់មនុស្សអាចផលិតដោយខ្លួនឯង ហើយវាមានសារៈសំខាន់សម្រាប់សុខភាពទូទៅ ជាពិសេស សុខភាពបេះដូង ។ ប៉ុន្តែពេលមនុស្សមានអាយុកាន់តែច្រើន សមត្ថភាពរាងកាយក្នុងការផលិតសារធាតុប្រឆាំងនឹងអុកស៊ីតកម្មរលាយក្នុងខ្លាញ់នេះកាន់តែធ្លាក់ចុះបន្តិចម្តងៗ ។ ដូច្នេះ អ្នកជំនាញចិនក៏បានបង្កើតពូជស្រូវថ្មីនេះឡើង ដែលវាអាចផលិតសារធាតុ CoQ10 ប្រឆាំងនឹងអុកស៊ីតកម្ម និងជួយសុខភាពបេះដូង ។

អ្នកជំនាញចិនបញ្ជាក់ថា មនុស្សចាស់គួរតែបរិភោគអាហារណាដែលផ្តល់នូវសារធាតុចិញ្ចឹមមានប្រយោជន៍សម្រាប់រាងកាយជាប្រភេទគ្រាប់ធញ្ញជាតិ ដូចជា ៖ បាយ ព្រមទាំងបន្លែ និងផ្លែឈើមួយចំនួនដែលមានសារធាតុ CoQ10 ច្រើន ។

ក្រោយការវិភាគពីការប្រែប្រួលធម្មជាតិរបស់ Coenzyme Q1 enzyme ក្នុងពូជស្រូវជាង១,០០០ពូជ និងប្រើប្រាស់បច្ចេកទេសរៀនសូត្ររបស់ម៉ាស៊ីន ML រួចមក អ្នកស្រាវជ្រាវចិនបានកែសម្រួលហ្សែនដើម្បីកែប្រែអាស៊ីតអាមីណូសំខាន់ចំនួន៥ របស់ Coenzyme Q1 ក្នុងគ្រាប់អង្ករ ដើម្បីបង្កើតពូជស្រូវថ្មីដែលគ្មានផលប៉ះពាល់ដល់ផលិតកម្មស្រូវ ។

អ្នកស្រាវជ្រាវចិនក៏បានប្រើប្រាស់បច្ចេកវិទ្យា AI ក្នុងការបង្កើតពូជស្រូវថ្មីផងដែរ ។ លើសពីនេះ ពួកគេបានធ្វើការស្រាវជ្រាវមានលក្ខណៈស្រដៀងគ្នានេះ និងអាចបង្កើតពូជស្រូវសាឡីថ្មី ។

គួរបញ្ជាក់ថា ក្រុមអ្នកស្រាវជ្រាវបង្កើតពូជស្រូវថ្មី រួមមាន ៖ អ្នកស្រាវជ្រាវមកពីមជ្ឈមណ្ឌលឧត្តមភាពផ្នែកវិទ្យាសាស្ត្រម៉ូលេគុលកោសិការុក្ខជាតិ, មជ្ឈមណ្ឌលស្រាវជ្រាវសៀងហៃ ចេនសាន ព្រមទាំងវិទ្យាស្ថានហ្សែន និងជីវវិទ្យាអភិវឌ្ឍន៍នៅទីក្រុងប៉េកាំង ។ ការបង្កើតពូជស្រូវថ្មីរបស់អ្នកជំនាញចិន ត្រូវបានផ្សព្វផ្សាយដោយទស្សនាវដ្តី Cell កាលពីថ្ងៃទី១៤ ខែកុម្ភៈ កន្លងមក ៕