ប្រទេសតួកគី ៖ កាលពីថ្ងៃទី១៩ ខែកុម្ភៈ ឆ្នាំ២០២៥ ព្យុះព្រិលបានបោកបក់យ៉ាងខ្លាំងមកលើប្រទេសតួកគី ដែលធ្វើឱ្យរដ្ឋាភិបាលបញ្ជាឱ្យបិទសាលារៀនជាច្រើនកន្លែង និងហាមពលរដ្ឋចេញក្រៅផ្ទះ បើគ្មានការងារចាំបាច់ ។ លើសពីនេះ ក្រុមហ៊ុនអាកាសចរណ៍នានាបានប្រកាសផ្អាក ឬលុបចោលការធ្វើដំណើរតាមយន្តហោះទាំងអស់ ដើម្បីរង់ចាំឱ្យអាកាសធាតុល្អប្រសើរឡើងវិញ ។

ពលរដ្ឋតួកគីពុំអាចធ្វើដំណើរនៅតាមផ្លូវនានាបានទេ ហើយពួកគេក៏សម្រុកមកជិះរថភ្លើងក្រោមដីរហូតដល់កកស្ទះ ។ វីដេអូដែលបានផ្សព្វផ្សាយក្នុងបណ្តាញសង្គម គេបានឃើញមនុស្សជាច្រើននាក់ឈរប្រជ្រៀតគ្នាយ៉ាងណែន និងពិបាកដកដង្ហើមនៅស្ថានីយរថភ្លើងក្រោមដីក្នុងទីក្រុងអ៊ីស្តង់ប៊ុល ។

ព្យុះព្រិលធ្វើឱ្យផ្លូវនានានៅប្រទេសតួកគីគ្របដណ្តប់ទៅដោយព្រិល ខណៈសាឡាងដឹកអ្នកដំណើរបានផ្អាកបណ្តោះអាសន្ន ។ ហេតុនេះ ពលរដ្ឋក៏សម្រេចចិត្តធ្វើដំណើរតាមរថភ្លើងក្រោមដីជំនួស និងធ្វើឱ្យស្ថានីយរថភ្លើងក្រោមដីនីមួយៗមានអ្នកដំណើរណែនណាន់តាន់តាប់ ឈរប្រជ្រៀតគ្នា ដើរទៅមុខលែងរួច ។

សារព័ត៌មានបរទេសរាយការណ៍ថា ព្យុះព្រិលបានបោកបក់យ៉ាងខ្លាំងមកលើទីក្រុងអ៊ីស្តង់ប៊ុល ធ្វើឱ្យរថយន្ត និងម៉ូតូជាច្រើនគ្រឿង ដែលគ្មានកង់ពិសេសសម្រាប់បើកបរលើព្រិល រអិលធ្វើដំណើរទៅមុខលែងកើត ។ ពលរដ្ឋជាច្រើនបានចតយានជំនិះរបស់ពួកគេនៅចិញ្ចើមផ្លូវ និងដើរទៅផ្ទះ ។

ពលរដ្ឋម្នាក់រៀបរាប់ថា ផ្ទះខ្ញុំនៅឆ្ងាយពីទីនេះត្រឹមតែ៥០០ម៉ែត្រ ប៉ុន្តែខ្ញុំពុំអាចបើករថយន្តទៅផ្ទះបាន ដោយសាររថយន្តគ្មានកង់ពិសេសសម្រាប់បើកបរលើព្រិល ។ ខ្ញុំគ្មានជម្រើសទេ ក្រៅពីការអង្គុយរង់ចាំក្នុងរថយន្ត ។ បើព្រិលនៅតែធ្លាក់ខ្លាំង ខ្ញុំនឹងដើរទៅផ្ទះ ហើយចតរថយន្តនៅទីនេះ ។

រីឯពលរដ្ឋម្នាក់ទៀតប្រាប់ថា ផ្លូវនានាពិបាកធ្វើដំណើរខ្លាំងណាស់ យើងមានបញ្ហាច្រើន ធ្វើអ្វីពុំបានទេ ប៉ុន្តែយើងក៏ត្រូវប្រកបការងាររកស៊ីចិញ្ចឹមជីវិតបន្តទៀត ៕

ប្រទេសវៀតណាម ៖ មន្ត្រីក្រសួងកសិកម្ម និងអភិវឌ្ឍន៍ជនបទវៀតណាមកំពុងព្រួយបារម្ភពីការរកទីផ្សារថ្មីលក់ទុរេន ដោយសារចិនលែងទិញទុរេនវៀតណាមច្រើនដូចមុន ក្រោយចិនរកឃើញថា ទុរេនវៀតណាមមានផ្ទុកសារធាតុគីមី Cadmium និងជ្រលក់ថ្នាំពណ៌ Basic Yellow 2 ដូចទុរេនថៃ ។ ហេតុនេះ ចិនបានកាត់បន្ថយការនាំចូលទុរេនវៀតណាមយ៉ាងច្រើនដើម្បីកុំឱ្យប៉ះពាល់សុខភាពពលរដ្ឋរបស់ខ្លួន ។

តាមទិន្នន័យរបស់ក្រសួងកសិកម្ម និងអភិវឌ្ឍន៍ជនបទវៀតណាមឱ្យដឹងថា ចាប់ពីថ្ងៃទី១ ដល់ថ្ងៃទី១៥ ខែកុម្ភៈ ឆ្នាំ២០២៥ ការនាំចេញទុរេនវៀតណាមទៅចិន បានធ្លាក់ចុះយ៉ាងខ្លាំងរហូតដល់៨០% គឺវៀតណាមបាននាំចេញទុរេនត្រឹមតែ៣,៥០០តោនប៉ុណ្ណោះ ។ ការនាំចេញទុរេនវៀតណាមធ្លាក់ចុះបានប៉ះពាល់ដល់ប្រាក់ចំណូលដែលវៀតណាមទទួលបានពីការនាំចេញបន្លែ និងផ្លែឈើ ស្មើនឹង៤១៦លានដុល្លារអាមេរិក នៅខែមករា ឆ្នាំ២០២៥ គឺធ្លាក់ចុះ១១.៣% បើប្រៀបធៀបប្រចាំខែ និងធ្លាក់ចុះ៥.២% បើប្រៀបធៀបជាមួយឆ្នាំ២០២៤ ។

ការនាំចេញទុរេនវៀតណាមទៅចិនធ្លាក់ចុះ គឺបណ្តាលមកពីវិធានការត្រួតពិនិត្យគុណភាពទុរេនរបស់ចិនកាន់តែតឹងរ៉ឹង ហើយចិនរកឃើញថា ទុរេនវៀតណាមស្ទើរទាំងអស់មានផ្ទុកសារធាតុគីមី Cadmium និងជ្រលក់ថ្នាំពណ៌ Basic Yellow 2 ដូចទុរេនថៃ ។ តាំងពីដើមឆ្នាំ២០២៥ ចិនបានកំណត់ឱ្យប្រទេសនាំចេញទុរេនទាំងអស់ត្រូវភ្ជាប់លិខិតបញ្ជាក់ការទទួលស្គាល់គុណភាពទុរេន ហើយធ្វើឱ្យការនាំចេញទុរេនវៀតណាមទៅចិនយឺតយ៉ាវយ៉ាងខ្លាំង ។ លើសពីនេះ ទុរេនវៀតណាមជាច្រើនបានកកស្ទះនៅព្រំដែន ដោយសាររង់ចាំលក្ខខណ្ឌការត្រួតពិនិត្យឯកសារគុណភាពទុរេនយ៉ាងតឹងរ៉ឹង ។

Phan Thi Men គឺជា CEO របស់ Sutech Science and Technology Consulting និយាយថា ការត្រួតពិនិត្យគុណភាពទុរេនយ៉ាងតឹងរ៉ឹងរបស់ចិន បានធ្វើឱ្យការនាំចេញទុរេនវៀតណាមធ្លាក់ចុះយ៉ាងខ្លាំង ហើយថ្ងៃខ្លះ វៀតណាមពុំអាចនាំចេញទុរេនទៅចិនបានទេ ។ រីឯអនុរដ្ឋមន្ត្រីក្រសួងកសិកម្មវៀតណាមប្រាប់ថា ចិនត្រួតពិនិត្យគុណភាពទុរេនវៀតណាមជាច្រើនដំណាក់កាល ហើយក្រសួងកសិកម្មវៀតណាមបានស្នើទៅមន្ត្រីស្ថាប័នពាក់ព័ន្ធពិនិត្យគុណភាពទុរេនឡើងវិញមុនពេលនាំចេញទៅចិន ជាពិសេស ពិនិត្យរកសារធាតុគីមី ដើម្បីឱ្យត្រូវតាមស្តង់ដារកំណត់របស់ចិន ។

បច្ចុប្បន្ន រដ្ឋាភិបាលវៀតណាមកំពុងចរចាជាមួយចិនអំពីលក្ខខណ្ឌនាំចេញទុរេន ដើម្បីឱ្យចិនជួយកាត់បន្ថយលក្ខខណ្ឌការពិនិត្យគុណភាពទុរេន និងបង្កលក្ខណៈងាយស្រួលក្នុងនីតិវិធីគយ ។ ជាមួយគ្នានេះ ក្រុមហ៊ុននាំចេញទុរេនវៀតណាមមួយចំនួនកំពុងស្វែងរកទីផ្សារថ្មីៗក្រៅពីចិន ដើម្បីបញ្ចេញទុរេនវៀតណាមយ៉ាងច្រើន ។

វៀតណាមមានចម្ការទុរេនប្រមាណ ១៦ម៉ឺន ៩ពាន់ហិកតា ដែលធំជាងផ្ទៃដីដែលរដ្ឋាភិបាលកំណត់នៅឆ្នាំ២០៣០ រហូតដល់២ដង ខណៈចំនួនដើមទុរេនទើបធំលូតលាស់ និងដើមទុរេនអាចប្រមូលផល ក៏បានកើនឡើងដែរ ។ មហាជនសន្និដ្ឋានថា ចិនលែងទិញទុរេនវៀតណាមច្រើនដូចមុនក្រោយរកឃើញផ្ទុកសារធាតុគីមី និងជ្រលក់ថ្នាំពណ៌ គឺវៀតណាមអាចនឹងបញ្ចេញទុរេនទាំងនេះមកលក់ឱ្យប្រទេសជិតខាង ៕

ប្រទេសហ្វីលីពីន ៖ នៅខែកុម្ភៈ ឆ្នាំ២០២៥ អាជ្ញាធរសង្កាត់មួយនៅកណ្តាលទីក្រុងម៉ានីឡា ប្រទេសហ្វីលីពីន បានបង្កើតកម្មវិធីឱ្យពលរដ្ឋចាប់មូសប្តូរយកប្រាក់ ហើយ អាជ្ញាធរនឹងផ្តល់ប្រាក់ឱ្យពលរដ្ឋណាដែលចាប់មូសបានចាប់ពី៥ក្បាលឡើងទៅ ដើម្បីកាត់បន្ថយការឆ្លងរាតត្បាតជំងឺគ្រុនឈាមក្នុងសង្កាត់ដែលមានពលរដ្ឋរស់នៅច្រើន ។ កម្មវិធីនេះបង្កើតឡើងក្រោយពីជំងឺគ្រុនឈាមបានឆ្លងរាតត្បាតខ្លាំងនៅប្រទេសហ្វីលីពីន និងមានពលរដ្ឋស្លា.ប់ ២នាក់ ។

អាជ្ញាធរសង្កាត់និយាយថា ប្រាក់រង្វាន់សម្រាប់ផ្តល់ឱ្យពលរដ្ឋចាប់មូសបាន គឺជាប្រាក់ដែលអាជ្ញាធរទុកសម្រាប់រៀបចំការអភិវឌ្ឍនានាក្នុងសង្កាត់ ដូចជា ៖ ការបោសសម្អាតផ្លូវថ្នល់ និងកម្ចាត់ជម្រកមូស ។ បើពលរដ្ឋចាប់បានមូស៥ក្បាល ពួកគេនឹងទទួលបានប្រាក់ចំនួន១ប៉េសូ (ឬ០.០១៧ដុល្លារអាមេរិក) ហើយអាជ្ញាធរនឹងប្រគល់ប្រាក់ឱ្យពលរដ្ឋ មិនថាពួកគេចាប់បានកូនមូស ឬមូសធំ ។

ក្រោយពីចាប់មូសបាន ពលរដ្ឋជាច្រើននាក់នាំគ្នាឈរតម្រង់ជួរដើម្បីយកមូសរស់ និងមូសងាប់ ដែលពួកគេច្រកក្នុងឧបករណ៍ផ្សេងៗមកប្រគល់ឱ្យអាជ្ញាធរ ហើយអាជ្ញាធរនឹងរាប់ចំនួនមូស ។ ក្រោយពីប្រគល់ប្រាក់ឱ្យពលរដ្ឋរួចហើយ អាជ្ញាធរនឹងប្រមូលមូសរស់ ទៅកម្ចាត់ចោលដោយប្រើប្រាស់កាំរស្មី ។

កម្មវិធីឱ្យពលរដ្ឋចាប់មូសប្តូរយកប្រាក់នេះ បានទទួលការកោតសរសើរពីក្រសួងសុខាភិបាលហ្វីលីពីនថា គឺជាគំនិតដ៏ល្អមួយដើម្បីកាត់បន្ថយការឆ្លងរាតត្បាតនៃជំងឺគ្រុនឈាម ប៉ុន្តែក្រសួងសុខាភិបាលពុំបានបញ្ជាក់ថា តើកម្មវិធីចាប់មូសអាចជួយកាត់បន្ថយការឆ្លងជំងឺគ្រុនឈាមដែរបានកម្រិតណា ។

ពលរដ្ឋហ្វីលីពីនមួយចំនួននិយាយថា អាជ្ញាធរសង្កាត់បង្កើតកម្មវិធីនេះល្អដើម្បីឱ្យពលរដ្ឋទទួលបានប្រាក់ ប៉ុន្តែតើកម្មវិធីនេះអាចកាត់បន្ថយចំនួនមូសឬក៏អត់? អ្វីដែលពួកគេបារម្ភខ្លាំងនោះ គឺខ្លាចមូសកាន់តែកើនឡើងលើសមុន ដោយសារពលរដ្ឋខ្លះលួចបង្កាត់មូសក្នុងផ្ទះដើម្បីប្តូរយកប្រាក់ ។

ឆ្លើយតបទៅនឹងការបារម្ភរបស់ពលរដ្ឋ អាជ្ញាធរសង្កាត់បញ្ជាក់ថា ករណីលួចបង្កាត់មូសក្នុងផ្ទះប្តូរយកប្រាក់ គឺអាចកើតឡើងខ្លះៗ ប៉ុន្តែបើសង្កាត់គ្មានវិធានការអ្វីសោះ វានឹងធ្វើឱ្យចំនួនមូសកាន់តែកើនឡើង ។ បើការរាតត្បាតជំងឺគ្រុនឈាមធ្លាក់ចុះ សង្កាត់នឹងរៀបចំកម្មវិធីនេះបន្តទៀត ប៉ុន្តែបើជំងឺគ្រុនឈាមនៅតែរាតត្បាតខ្លាំងដដែល សង្កាត់នឹងអនុវត្តវិធីផ្សេង ៕

ប្រទេសវៀតណាម ៖ កាលពីថ្ងៃទី១៨ ខែកុម្ភៈ ឆ្នាំ២០២៥ រដ្ឋសភាវៀតណាមបានអនុម័តច្បាប់រៀបចំរដ្ឋាភិបាលថ្មីក្នុងកិច្ចប្រជុំវិសាមញ្ញនៅទីក្រុងហាណូយ ដែលនឹងកាត់បន្ថយក្រសួងចំនួន៥ និងមន្ត្រីរាជការពី១៥% ទៅ២៥% ។ អគ្គលេខាធិការបក្សកុម្មុយនិស្តវៀតណាម លោក តូ ឡឺម អះអាងថា វាជាការបង្កើនប្រសិទ្ធភាពការងាររដ្ឋបាលសាធារណៈ និងសម្រេចគោលដៅអភិវឌ្ឍន៍សេដ្ឋកិច្ច ។

នេះជាការធ្វើកំណែទម្រង់រដ្ឋាភិបាលទ្រង់ទ្រាយធំ បើធៀបនឹងរយៈពេលជាច្រើនឆ្នាំកន្លងមក ហើយនឹងធ្វើឱ្យមន្ត្រីរាជការរាប់ពាន់នាក់បាត់បង់ការងារ ។ រដ្ឋាភិបាលនឹងបិទក្រសួងចំនួន៥ ដោយសារមើលឃើញថា ការងារក្នុងក្រសួងទាំងនេះពុំសូវសំខាន់ ព្រមទាំងរួមបញ្ចូលក្រសួងផ្សេងៗ ដូចជា ៖ ក្រសួងហិរញ្ញវត្ថុ រួមបញ្ចូលជាមួយក្រសួងផែនការ និងវិនិយោគ, ក្រសួងធនធានធម្មជាតិ និងបរិស្ថាន រួមបញ្ចូលជាមួយក្រសួងកសិកម្ម, ក្រសួងដឹកជញ្ជូន រួមបញ្ចូលជាមួយក្រសួងសាងសង់ ។

ក្រៅពីនេះ រដ្ឋាភិបាលនឹងបិទប្រព័ន្ធផ្សព្វផ្សាយរដ្ឋយ៉ាងច្រើន ដូចជា ៖ ទូរទស្សន៍ កាសែត និងទស្សនាវដ្តី ព្រមទាំងត្រៀមថវិកាសម្រាប់ផ្តល់ឱ្យមន្ត្រីរាជការរាប់ពាន់នាក់ដែលត្រូវបណ្តេញចេញពីការងាររដ្ឋ ។ ឧបនាយករដ្ឋមន្ត្រីវៀតណាម លោក Nguyen Hoa Binh និយាយថា រដ្ឋាភិបាលប្រឹងប្រែងជំរុញប្រសិទ្ធភាពការងាររដ្ឋបាលឱ្យកាន់តែខ្លាំងក្លា និងកាត់បន្ថយមន្ត្រីអសមត្ថភាពក្នុងជួររដ្ឋាភិបាល ។

ការធ្វើកំណែទម្រង់រដ្ឋាភិបាលទ្រង់ទ្រាយធំនេះ បានធ្វើឱ្យមន្ត្រីរាជការរាប់ពាន់នាក់ព្រួយបារម្ភពីការស្វែងរកការងារថ្មីនៅតាមក្រុមហ៊ុនឯកជន ។ រដ្ឋាភិបាលវៀតណាមអះអាងថា វានឹងពុំប៉ះពាល់ដល់ការអនុម័តគម្រោងផ្សេងៗទេ បើទោះជាមានមតិនានាបារម្ភថា ការធ្វើកំណែទម្រង់នេះនឹងធ្វើឱ្យយឺតយ៉ាវដល់កិច្ចការគ្រប់គ្រងប្រទេសរបស់រដ្ឋាភិបាលក្តី ។

អគ្គលេខាធិការបក្សកុម្មុយនីស្តវៀតណាម លោក តូ ឡឺម និយាយថា វាមិនត្រឹមតែជួយកាត់បន្ថយការចំណាយរបស់រដ្ឋាភិបាលប៉ុណ្ណោះទេ ប៉ុន្តែវានឹងជួយឱ្យមន្ត្រីរាជការធ្វើការកាន់តែមានប្រសិទ្ធភាព ។ ពេលខ្លះ យើងត្រូវតែលេបថ្នាំល្វីងធន់នឹងការឈឺចាប់ និងវះកាត់សាច់ចេញខ្លះដើម្បីឱ្យរាងកាយរឹងមាំល្អ ។ កំណែទម្រង់នេះជាគន្លឹះមួយដើម្បីជំរុញកំណើនសេដ្ឋកិច្ចវៀតណាមឱ្យកើនឡើង៨% ដែលនាយករដ្ឋមន្ត្រីវៀតណាម លោក Pham Minh Chinh បានកំណត់នៅឆ្នាំ២០២៥ ៕

យោងតាមសារព័ត៌មាន Reuters នៅល្ងាចថ្ងៃទី១៨ ខែកុម្ភៈ ភាពយន្តគំនូរជីវចលណាចា វគ្គ២ (Ne Zha 2) របស់អ្នកដឹកនាំរឿងលោក Yang Yu ឬត្រូវបានគេស្គាល់ថា Jiaozi បានលើសចំនួន ១.៦៨ពាន់លានដុល្លារនៃភាពយន្តគំនូរជីវចល Inside Out 2 ។ ណាចាវគ្គ២ គឺជាភាពយន្តអាស៊ីតែមួយគត់ក្នុងកំពូលភាពយន្តទាំង ១០ ដែលរកចំណូលបានខ្ពស់បំផុតនៅទូទាំងពិភពលោក។ ចំណូលនេះគឺមានច្រើនជាង ៩៩% នៃចំណូលមកពីប្រទេសចិន ផ្ទុយពីភាពយន្តហូលីវូដ ដែលជារឿយៗពឹងផ្អែកលើយុទ្ធសាស្ត្រចែកចាយជាសកល។

សមិទ្ធិផលនេះបន្តធ្វើឱ្យប្រសើរឡើងព្រោះភាពយន្តនេះត្រៀមនឹងចេញលក់នៅទីផ្សារផ្សេងទៀតជាច្រើនជុំវិញពិភពលោក។ កាលពីល្ងាចថ្ងៃទី១៨ ខែកុម្ភៈ តារាសម្តែងហុងកុង ទិនហ្វី (Stephen Chow) ទទួលបានការចាប់អារម្មណ៍ នៅពេលដែលលោកបានបង្ហោះរូបថតទៅមើលរឿងនេះ។ យោងតាម Securities Times ភាពជោគជ័យរបស់ខ្សែភាពយន្តនេះមិនត្រឹមតែបង្ហាញពីសក្តានុពលដ៏ធំនៃទីផ្សារប៉ុណ្ណោះទេ ប៉ុន្តែថែមទាំងបង្ហាញពីការកើនឡើងនៃគំនូរជីវចលចិននៅក្នុងវិស័យភាពយន្តពិភពលោកផងដែរ។

ផ្នែកគំនូរជីវចលទាំងពីរវគ្គត្រូវបានដឹកនាំរឿងលោក Yang Yu ដោយបញ្ជូនសារ៖ បំបែកការរើសអើង ថាតើនរណាជាអ្នកកំណត់ដោយខ្លួនយើង មិនមែនដោយគំនិតជុំវិញទាំងអស់។ វគ្គទី ២ត្រូវបានគេវាយតម្លៃលើសពីការគិតរបស់អ្នកទស្សនាអំពីរឿងព្រេងនិទានរបស់ ណាចា ដែលបង្កឱ្យមានភាពចលាចលនៅក្នុងមហាសមុទ្រ។ នៅចុងបញ្ចប់នៃវគ្គទី២ តាមរយៈការសន្ទនារបស់តួអង្គហាក់បង្ហាញដំរួយនឹងមានអ្វីបន្ថែមទៀត៕

ប្រទេសឥណ្ឌូណេស៊ី ៖ យុវជនឥណ្ឌូណេស៊ីកាន់តែច្រើនឡើងៗចង់ទៅធ្វើការនៅបរទេស ពីព្រោះអស់សង្ឃឹមនឹង​ប្រទេសរបស់ខ្លួនគ្មានការអភិវឌ្ឍ ហើយរដ្ឋាភិបាលពុំអាចដឹកនាំប្រទេសឱ្យរីកចម្រើនជាងនេះ ។

នៅឆ្នាំ២០២៥ ប្រទេសឥណ្ឌូណេស៊ីកំពុងប្រឈមនឹងបញ្ហាយុវជនចង់ទៅធ្វើការនៅបរទេស និងពុំចង់ត្រឡប់មកវិញ ដោយសារមើលឃើញពីកត្តាអវិជ្ជមានជាច្រើន ដូចជា ៖ ស្ថានភាពសេដ្ឋកិច្ចមិនល្អ ពិបាករកការងារធ្វើ ហើយរដ្ឋាភិបាលពុំអាចដឹកនាំប្រទេសឱ្យរីកចម្រើនជឿនលឿន ។

យុវជនឥណ្ឌូណេស៊ីជាច្រើននាក់បាននិយាយពីអារម្មណ៍របស់ខ្លួនក្នុងបណ្តាញសង្គមថា ពួកគេគ្មានសេចក្តីសុខក្នុងការរស់នៅប្រទេសរបស់ខ្លួន ដោយសារពុំសូវសម្បូរការងារ សេដ្ឋកិច្ចធ្លា្លក់ ពលរដ្ឋរស់នៅក្នុងជីវភាពលំបាក ហើយរដ្ឋាភិបាលបច្ចុប្បន្ន ពុំកំណត់គោលនយោបាយជំរុញឱ្យពលរដ្ឋមានជីវភាពធូរធា ។ ហេតុនេះ ពួកគេគ្មានសង្ឃឹមថា នឹងមានអនាគតល្អប្រសើរជាងនេះទេ សម្រាប់ថ្ងៃអនាគត ។

អ្នកស្រាវជ្រាវជាន់ខ្ពស់របស់ស្ថាប័នស្រាវជ្រាវ ISEAS- Yusof Ishak នៅប្រទេសសិង្ហបុរីឱ្យដឹងថា បច្ចុប្បន្ន យុវជនឥណ្ឌូណេស៊ីស្វែងរកផ្លូវចេញទៅធ្វើការនៅបរទេស ពីព្រោះពួកគេមានអារម្មណ៍អស់សង្ឃឹមនឹងប្រទេសរបស់ខ្លួន ។ វាគ្មានអ្វីល្អប្រសើរទេនៅឥណ្ឌូណេស៊ី ទាំងផ្នែកនយោបាយ សេដ្ឋកិច្ច សង្គម និងច្បាប់ ។

យុវជនឥណ្ឌូណេស៊ីឈ្មោះ Joel Sumitro បានធ្វើការនៅអាល្លឺម៉ង់ តាំងពីឆ្នាំ២០១១ ក្រោយពីបញ្ចប់បរិញ្ញាបត្រនៅសាកលវិទ្យាល័យ Washington ។ ក្រោយមក យុវជនរូបនេះក៏បានផ្លាស់ទៅធ្វើការនៅអាមេរិក និងសិង្ហបុរី និងសម្រេចចិត្តត្រឡប់មកធ្វើការនៅឥណ្ឌូណេស៊ី នៅឆ្នាំ២០១៨ ។ ប៉ុន្តែពេលមកធ្វើការនៅឥណ្ឌូណេស៊ីបាន៤ឆ្នាំ យុវជនរូបនេះក៏ត្រឡប់ទៅធ្វើការនៅអាល្លឺម៉ង់វិញ ដោយសារយល់ថា ឥណ្ឌូណេស៊ីពុំអភិវឌ្ឍន៍ ។

លោក Sumitro ប្រាប់ថា ៖ «ខ្ញុំបានត្រឡប់មកធ្វើការនៅឥណ្ឌូណេស៊ីប៉ុន្តែទីបំផុត ខ្ញុំក៏សម្រេចចិត្តទៅធ្វើការនៅបរទេស ដោយសារចង់បានបទពិសោធន៍គ្រប់គ្រងក្រុមការងារដែលមានបុគ្គលិកច្រើនជាតិសាសន៍ ។ យុវជនឥណ្ឌូណេស៊ីដែលចង់ធ្វើការក្នុងក្រុមហ៊ុនបច្ចេកវិទ្យា គួរតែទៅធ្វើការនីសិង្ហបុរី អាំស្ទែដាំ និងតូក្យូ ពីព្រោះទីនោះ ស័ក្តិសមសម្រាប់អ្នកចង់ចាកចេញពីប្រទេស» ។

ដូចគ្នានេះ យុវជនឥណ្ឌូណេស៊ីម្នាក់ទៀតឈ្មោះ Premawan Satrio បានមករស់នៅកូរ៉េខាងត្បូងតាំងពីឆ្នាំ២០២០ ប្រាប់ថា ទោះជាបច្ចុប្បន្ន យុវជនភាគច្រើនគ្រាន់តែត្អូញត្អែរចង់ចាកចេញពីប្រទេសក្នុងបណ្តាញសង្គម ប៉ុន្តែរដ្ឋាភិបាលគួរតែភ្ញាក់ខ្លួន និងកែលម្អគោលនយោបាយផ្សេងៗឱ្យល្អជាងមុន ។ រដ្ឋាភិបាលត្រូវផ្តល់ឱកាសឱ្យពលរដ្ឋមានការងារធ្វើឱ្យបានច្រើនដើម្បីផ្គត់ផ្គង់ជីវភាពគ្រួសារ បើរដ្ឋាភិបាលពុំគិតគូរពីអនាគតពលរដ្ឋទេ ពួកគេនឹងរត់ចោលប្រទេសហើយ ៕