តារាសម្តែង កែវ ស៊ីណាក់ ជាតួអង្គម្តាយក្នុងខ្សែភាពយន្ត «វិញ្ញាណនិស្សិតពេទ្យ» បានធ្វើឱ្យតារាចម្រៀងល្បីឈ្មោះ ណុប បាយ៉ារិទ្ធ ទប់ចិត្តមិនជាប់ចេញមកកោតសរសើរចំៗឱ្យពិន្ទុ១០លើ១០ព្រោះតែការសម្តែងបានល្អពេក។ ទេពកោសល្យសិល្បៈមួយនេះលោកក៏បាននិយាយដែរថាបែបនេះហើយហៅថាអ្នកសម្តែង។
.png)
ប្រឡូកក្នុងអាជីពសិល្បៈជាច្រើនឆ្នាំកញ្ញា កែវ ស៊ីណាក់ បានធ្វើឱ្យទស្សនិកជនចាប់អារម្មណ៍ខ្លាំងក្នុងតួនាទីក្នុងរឿង គាស់ផ្នូរ និងរឿងដែលកំពុងចាក់បញ្ចាំង «វិញ្ញាណនិស្សិតពេទ្យ» ដែលបានដើរតួធំក្នុងខ្សែភាពយន្តនេះ។ ការសម្តែងប្រកបដោយទេពកោសល្យមានភាពធម្មជាតិបានធ្វើឱ្យមានមតិកោតសរសើរយ៉ាងខ្លាំងទៅកាន់តារាសម្តែងវ័យ៤០ឆ្នាំរូបនេះសូម្បីតែតារាចម្រៀង ណុប បាយ៉ារិទ្ធ ក៏ទប់ចិត្តមិនជាប់ចេញមកសរសើរចំៗដូចគ្នា។
នៅរសៀលថ្ងៃទី១ មេសា លោក ណុប បាយ៉ារិទ្ធ បានបង្ហោះថា «ខ្ញុំអត់ទ្រាំសរសើរការសម្តែងរបស់គាត់មិនបានទេ សម្រាប់គាត់ចំពោះខ្ញុំ ខ្ញុំសូមអោយគាត់១០លើ១០ ទាំងអារម្មណ៍ ទឹកមុខ កែវភ្នែក ការប្រើប្រាស់ដង្ហើមក្នុងការសម្តែង ក្នុងការនិយាយ ខ្យស់សម្លេង គឺ perfect តែម្តង សូមសរសើរ ។ ខ្ញុំចាប់អារម្មណ៍ការសម្តែងរបស់គាត់តាំងពីរឿងភាគទូរទស្សន៍រឿងកុន ពិសេសរឿងគាស់ផ្នូរអាកុង និងរឿង វិញ្ញាណនិស្សិតពេទ្យនេះ គាត់សម្តែងបានល្អណាស់»។
តារាចម្រៀងរ័យ៤៤ឆ្នាំរូបនេះ បានបន្តទៀតថា «មួយឆាកចុងក្រោយ ឈុតមានគេសម្ភាសគាត់ក្នុងនាមជាម្តាយដែលបានបាត់បង់កូនដោយគ្រោះថ្នាក់ចរាចរណ៍ គាត់និយាយឡើងដូចជាម្តាយជនរងគ្រោះពិតៗ ដែលចុងក្រោយមិនអាចទាមទារអ្វីបានមកវិញព្រោះកូនស្លាប់ទៅហើយ ស្តាប់សម្លេងនិងអារម្មណ៍ ព្រមទាំងទឹកមុខគាត់អត់មានឃើញថាគាត់សម្តែងសោះ គឺដូចម្ចាស់រឿងដែលកើតឡើងតែម្តង។ វគ្គហ្នឹងក្បែរ10នាទី ទម្រាំខ្ញុំសម្រួលអារម្មណ៍ក្រោកឈរដើរចេញពីកៅអីបាន និងនិយាយចេញទៅកាន់អ្នកមកមើលជាមួយ ។ សូមសរសើរអស់ពីបេះដូង បែបនេះទើបហៅថាអ្នកសម្តែង »។
គួរបញ្ជាក់ផងដែរថា កន្លងមកនេះតារាចម្រៀង ណុប បាយ៉ារិទ្ធ ក៏បានចេញមកកោតសរសើរកុនខ្មែរ គាស់ផ្នូរ ផងដែរ។ កាលពីខែតុលា ឆ្នាំ២០២៤ តារាចម្រៀងរូបនេះថាកុនខ្មែរមួយនេះល្អមើលមិនចាញ់កុនរបស់ជិតខាងនោះទេ៕
