ប្រទេសថៃ ៖ កាលពីថ្ងៃទី៤ ខែមីនា ឆ្នាំ២០២៥ សារព័ត៌មានថៃរាយការណ៍ថា លោកស្រី ផេថងថាន ស៊ីណាវ៉ាត់ នាយករដ្ឋមន្ត្រីថៃបានស្នើឱ្យកិច្ចប្រជុំគណៈរដ្ឋមន្ត្រី និងមន្ត្រីពាក់ព័ន្ធសិក្សាពីការធ្វើជញ្ជាំងព្រំដែន និងបំពាក់កាមេរ៉ាទំនើបបន្ថែមនៅតាមព្រំដែនប្រទេសកម្ពុជា និងថៃ ដើម្បីការពារការឆ្លងព្រំដែនខុសច្បាប់ បទល្មើ.សអនឡាញ ការជួញដូរថ្នាំញៀន និងការនាំចូលទំនិញគេចពន្ធ ។

ក្រសួងការបរទេស និងក្រសួងការពារជាតិ ត្រូវទំនាក់ទំនងជាមួយមន្ត្រីពាក់ព័ន្ធ ព្រមទាំងជជែកជាមួយកម្ពុជាថា តើថៃគួរសាងសង់ជញ្ជាំងព្រំដែនបែបណា និងអាចដោះស្រាយបញ្ហាបានឬអត់ ។ ហេតុនេះ ថៃនឹងសិក្សាមុនពេលសាងសង់ជញ្ជាំងព្រំដែនដើម្បីទប់ស្កាត់បទល្មើសឆ្លងដែន និងការធ្វើដំណើរចេញ-ចូលខុសច្បាប់ ជាពិសេស មន្ត្រីនានាត្រូវសហការជាមួយកងទ័ពការពារព្រំដែន ។

នាយករដ្ឋមន្ត្រីថៃបានឱ្យមន្ត្រីពាក់ព័ន្ធត្រួតពិនិត្យការដឹកជញ្ជូនទំនិញឆ្លងដែនយ៉ាងតឹងរ៉ឹង ជាពិសេស ការដឹកទំនិញតាមរថយន្តកុងទឺន័រ បើសង្ស័យទំនិញណាមួយ ត្រូវឆែកឆេររថយន្តកុងទឺន័រ ។ ក្រៅពីនេះ មន្ត្រីពាក់ព័ន្ធត្រូវត្រួតពិនិត្យការឆ្លងដែនខុសច្បាប់ទាំងអស់ ជាពិសេស ការលួចឆ្លងដែនតាមប្រឡាយតូចៗ និងច្រកធម្មជាតិនៅភាគខាងលិច ខាងកើត និងខាងត្បូង ។

ដោយឡែក ក្រសួងមហាផ្ទៃ និងក្រសួងផ្សេងៗដែលធ្វើការពាក់ព័ន្ធនឹងសន្តិសុខជាតិ ត្រូវរៀបចំដំឡើងកាមេរ៉ា CCTV បំពាក់បច្ចេកវិទ្យា AI នៅតាមព្រំដែនកម្ពុជា-ថៃបន្ថែមទៀតដើម្បីត្រួតពិនិត្យឱ្យគ្រប់ជ្រុងជ្រោយ ពីព្រោះកាមេរ៉ានេះនឹងបញ្ជាក់ពីអត្តសញ្ញាណអ្នកឆ្លងដែនថា ជាអ្នកណា មកពីណា ក៏ដូចជាពិនិត្យទំនិញគេចពន្ធ បារីអេឡិចត្រូនិក និងថ្នាំញៀន ។ កាមេរ៉ាថ្មីនេះទំនើបជាងកាមេរ៉ាចាស់ ដោយសារកាមេរ៉ាចាស់អាចថតរូបតែម្យ៉ាង ហើយសមត្ថកិច្ចត្រូវស៊ើបអង្កេតរកអត្តសញ្ញាណជនសង្ស័យ ។ នេះបើតាមការលើកឡើងរបស់លោក Jirayu Houngsub មន្ត្រីនាំពាក្យទីស្តីការនាយករដ្ឋមន្ត្រី ។

តាមទិន្នន័យរបស់ក្រសួងការពារជាតិថៃ គឺនាយករដ្ឋមន្ត្រីថៃមានគម្រោងសាងសង់ជញ្ជាំងព្រំដែនកម្ពុជា-ថៃ ដំណាក់កាលដំបូងប្រវែង៥៥គីឡូម៉ែត្រ ហើយថៃមានគម្រោងសាងសង់ជញ្ជាំងព្រំដែនសរុបប្រវែង៨១៧គីឡូម៉ែត្រ ។ ជញ្ជាំងព្រំដែននេះនឹងការពារបទល្មើសឆ្លងដែនរវាងប្រទេសទាំងពីរ ពីព្រោះបច្ចុប្បន្ន នៅតំបន់ព្រំដែនមានតែរបងលួសប៉ុណ្ណោះ ៕

តារាសម្ដែងហុងកុង Chow Yun Fat ឬទស្សនិកជនស្គាល់ថា ស្តេចល្បែងអាចែ បានបង្ហើបថា លោកធ្លាប់ទិញរថយន្ត Rolls-Royce V8 មួយទឹកមិនមែនជាការអួតអាងសម្ភារៈនិយមអ្វីនោះទេប៉ុន្តែដើម្បីទាក់ទាញចំណាប់អារម្មណ៍របស់ខ្លួនជាមួយនឹងបច្ចេកវិទ្យារថយន្ត។

យោងតាមកាសែត The Star បានចុះផ្សាយថាក្នុងអំឡុងពេលបង្ហាញខ្លួនក្នុងកម្មវិធី YouTube «The Do Show» កាលពីកន្លងមកនេះ ស្តេចល្បែងអាចែ បានរៀបរាប់ពីបទពិសោធន៍នៃការទិញរថយន្តក្នុងអំឡុងពេលផលិតរឿងភាគ TVB ឆ្នាំ ១៩៧៩ «Man in the Net»។ លោកបាននិយាយថាលោកនឹងបើកវាទៅឈុតប្រចាំថ្ងៃ ហើយថែមទាំងចែករំលែករូបថតជាមួយក្រុមការងារភាពយន្តទៀតផង។ ទោះជាយ៉ាងណា លោកបញ្ជាក់ថា ការលើកទឹកចិត្តរបស់លោកមិនមែនដើម្បីអួតអាងពីខ្លួនឡើយ។

តារាសម្តែងភាពយន្តដ៏ល្បីល្បាញរូបនេះបាននិយាយថា «ខ្ញុំចង់យល់ពីរបៀបដែលម៉ាស៊ីន V8 អាចផ្តល់ថាមពលដល់រថយន្តធុនធ្ងន់បែបនេះខណៈពេលដែលនៅតែផ្តល់នូវការជិះរលូនបែបនេះ។ នៅពេលនោះ រថយន្តមួយទឹកមានតម្លៃថោកណាស់ ដូច្នេះបន្ទាប់ពីទិញមួយ ខ្ញុំបានបើកក្រណាត់ជាមួយម៉ាស៊ីន និងសិក្សាម៉ាស៊ីនជាមួយគ្នា។ ខ្ញុំមិនបានទិញរថយន្តដើម្បីបង្អួតទេ ខ្ញុំស្រលាញ់តែម៉ាស៊ីនឡានប៉ុណ្ណោះ»។

លោកបានបន្ថែមថា នៅកម្រិតកំពូលនៃអាជីពរបស់ខ្លួន លោកមានរថយន្តទំនើបពី ៥ទៅ ៦ គ្រឿង រួមទាំងម៉ូដែលពី Mercedes-Benz និង BMW ផងដែរ។ រថយន្តអាពាហ៍ពិពាហ៍របស់លោកសម្រាប់អាពាហ៍ពិពាហ៍ឆ្នាំ ១៩៨៣ របស់ខ្លួនជាមួយតារាសម្តែង Candice Yu គឺជារថយន្ត Rolls-Royce Silver Dawn ដ៏កម្រមួយ។ ទោះបីជាយ៉ាងណាក៏ដោយ ចាប់តាំងពីពេលនោះមក លោកបានផ្លាស់ប្តូរទៅការបើកបរ រថយន្តអគ្គិសនីដែលមិនប៉ះពាល់ដល់បរិស្ថានដោយលើកឡើងពីតម្រូវការថែទាំខ្ពស់នៃអតីតការប្រមូលរបស់លោក។ លោកបានបន្តថា៖ «ពេលវេលាត្រូវចំណាយលើការជួសជុលច្រើនជាងការបើកបររថយន្តទៅទៀត»។ ហើយខ្ញុំមិនមានពេលដើម្បីមើលថែពួកគេច្រើនដូច្នេះខ្ញុំបានបញ្ចប់ដោយលក់ពួកគេទាំងអស់» ។

លោក Chow Yun Fat មានអាយុ៦៩ឆ្នាំ ទទួលបានភាពល្បីល្បាញក្នុងអាជីពតាមរយៈស្នាដៃជាច្រើន។ នៅឆ្នាំ ២០២៣ លោកត្រូវបានគេដាក់ឈ្មោះថា Asian Filmmaker of the Year នៅក្នុងកម្មវិធីពានរង្វាន់ភាពយន្តអន្តរជាតិ Busan លើកទី ២៨ដែលធ្វើឱ្យលោកក្លាយជាតារាសម្តែងហុងកុងទីពីរបន្ទាប់ពី Tony Leung ដែលទទួលបានកិត្តិយសនេះ៕

ផ្លូវរថភ្លើងល្បឿនលឿនដំបូងគេបង្អស់នៅអាស៊ីអាគ្នេយ៍មានប្រវែងប្រហែល ១៤០ គីឡូម៉ែត្រ ដែលកាត់បន្ថយពេលវេលាធ្វើដំណើរពីជិត ៣ ម៉ោងទៅ ៤៥ នាទី។ ការសាងសង់ផ្លូវរថភ្លើងល្បឿនលឿនមានអត្ថប្រយោជន៍ជាច្រើនដូចជា៖ កាត់បន្ថយការកកស្ទះចរាចរណ៍ រួមទាំងជួយសម្រួលដល់ការដឹកជញ្ជូននអ្នកដំណើរ និងទំនិញនៅក្នុងប្រទេសជាដើម។ ដូច្នេះហើយតើអ្នកដឹងទេថា នៅអាស៊ីអាគ្នេយ៍យើងនេះប្រទេសណាដែលមានផ្លូវរថភ្លើងល្បឿនលឿនដំបូងគេបង្អស់?

នៅក្នុងតំបន់អាស៊ីអាគ្នេយ៍មានប្រទេសសរុបចំនួន ១១ ក្នុងនោះប្រទេសដែលបានសាងសង់ផ្លូវរថភ្លើងល្បឿនលឿនដំបូងគេបង្អស់គឺ «ប្រទេសឥណ្ឌូនេស៊ី» ដែលដំណើរការផ្លូវដែកល្បឿនលឿនមុនគេ ដោយមានខ្សែតែមួយតភ្ជាប់ពីទីក្រុងចាកាតា និងបានឌុង។ ខ្សែនេះបានចាប់ផ្តើមដំណើរការដំបូងនៅខែតុលា ឆ្នាំ ២០២៣ ជាមួយសមត្ថភាពផ្ទុកកៅអី ៦០០ ដោយមានប្រវែង ១៣៨ គីឡូម៉ែត្រត្រូវបានដាក់ឈ្មោះជាផ្លូវការថា Whoosh។

Whoosh គឺជាអក្សរកាត់នៃពាក្យស្លោក “Waktu Hemat, Operasi Optimal, Sistem Handal” ដែលមានន័យថា “រថភ្លើងល្បឿនលឿនដែលសន្សំសំចៃពេលវេលា ប្រតិបត្តិការល្អបំផុត និងជាប្រព័ន្ធដែលអាចទុកចិត្តបាន”។ គម្រោងនេះត្រូវបានគេដឹងថាចំណាយដល់ ៧.៣ ពាន់លានដុល្លារអាមេរិកក្នុងការសាងសង់ ជាមួយនឹងល្បឿនអតិបរមា ៣៥០ គីឡូម៉ែត្រក្នុងមួយម៉ោង ដំណើរការដោយថាមពលអគ្គិសនី ដោយមិនមានការបំភាយកាបូនផ្ទាល់នោះទេ។

រថភ្លើងល្បឿនលឿន Whoosh អាចធ្វើដំណើរពីរដ្ឋធានី Jakarta ទៅកាន់រដ្ឋធានី Bandung ក្នុងខេត្ត West Java ត្រឹមរយៈពេល ៤៥ នាទីប៉ុណ្ណោះ ដែលការធ្វើដំណើរនេះមានប្រវែងប្រហែល ១៤០ គីឡូម៉ែត្រ ខណៈពីមុនត្រូវចំណាយពេលប្រហែល ៣ ម៉ោងទើបទៅដល់។ ក្រៅពីប្រទេសឥណ្ឌូនេស៊ី ប្រទេសថៃក៏កំពុងស្ថិតក្នុងដំណើរការសាងសង់ផ្លូវរថភ្លើងល្បឿនលឿនដែលតភ្ជាប់ពីទីក្រុងបាងកក ជាមួយខេត្តនគររាជសីមាផងដែរ។

កាលពីខែកុម្ភៈ ឆ្នាំមុន រដ្ឋាភិបាលបានអនុម័តគម្រោងដំណាក់កាលទីពីរ ពីខេត្តនគររាជសីមា ទៅខេត្តណងខៃ ជាប់ព្រំដែនប្រទេសឡាវ ដែលរំពឹងថានឹងបញ្ចប់នៅឆ្នាំ ២០៣០។ នៅពេលដែលបានបញ្ចប់ គម្រោងនេះនឹងតភ្ជាប់ទៅផ្លូវរថភ្លើងល្បឿនលឿនឡាវ-ចិន ដែលអនុញ្ញាតឱ្យធ្វើដំណើរលឿនពីទីក្រុងបាងកក ទៅកាន់ទីក្រុងគុនមីង ប្រទេសចិន និងបន្ទាប់មកឆ្លងកាត់ប្រទេសឡាវ៕

ជប៉ុនគឺជាប្រទេសមួយដែលមានវិន័យ និងក្រមសីលធម៌ខ្ពស់បំផុត ទាំងការរស់នៅ ការរក្សាអនាម័យ ការគោរពពេលវេលា និងការមានអាកប្បកិរិយាល្អ រួមទាំងការខិតខំធ្វើការជាដើម ដែលច្បាប់ទម្លាប់ទាំងនេះ ភាគច្រើនកើតចេញពីប្រព័ន្ធអប់រំទាំងអស់។ យោងតាមគេហទំព័របរទេស Bright Side និង The Independent បានឱ្យដឹងថា ប្រទេសជប៉ុនគឺជាប្រទេសតែមួយគត់ក្នុងពិភពលោកដែលមានច្បាប់ចម្លែកទាំងនេះនៅក្នុងសាលារៀន។

១.ឯកសណ្ឋាន៖ នៅគ្រប់សាលារៀនទាំងអស់ក្នុងប្រទេសជប៉ុន សិស្សត្រូវតែស្លៀកពាក់ឯកសណ្ឋានតាមសាលារៀនរៀងៗខ្លួន ដោយឯកសណ្ឋានគឺជារឿងចាំបាច់បំផុតសម្រាប់សិស្ស។ កាលណាសិស្សមិនស្លៀកពាក់ឯកសណ្ឋាន នឹងត្រូវពិន័យ ឬហាមឃាត់មិនឱ្យចូលសាលាដាច់ខាត។
សិស្សប្រុសតម្រូវឱ្យពាក់អាវធំពណ៌ខ្មៅ រីឯសិស្សស្រីត្រូវស្លៀកសំពត់ខ្លី ឬត្រឹមជង្គង់ និងពាក់អាវដែលមានរចនាបទនាវិក។ ដូច្នេះសិក្សានុសិស្សទាំងអស់ត្រូវតែពាក់ឯកសណ្ឋានជារៀងរាល់ថ្ងៃចាប់ពីអនុវិទ្យាល័យ រហូតដល់វិទ្យាល័យ។

២.សិស្សស្រីត្រូវតែស្លៀកខោក្នុងពណ៌ស៖ នៅប្រទេសជប៉ុន គ្រប់សាលាទាំងអស់ គឺតម្រូវឱ្យសិស្សនារីៗស្លៀកខោក្នុងពណ៌ស ដោយសារតែខោក្នុងពណ៌សបង្ហាញពីអនាម័យល្អចំពោះស្ត្រី ដូច្នេះគ្រូស្រីៗមានកាតព្វកិច្ច និងត្រួតពិនិត្យលើរឿងនេះជារៀងរាល់ថ្ងៃ។ ទោះជាយ៉ាងណាប្រសិនបើមានសិស្សបំពានច្បាប់ នោះពួកគេនឹងត្រូវដាក់ទោសភ្លាមៗ។

៣.មិនមានគ្រូជំនួស៖ នៅពេលដែលគ្រូប្រចាំមុខវិជ្ជានីមួយៗអវត្តមាន គ្រប់សាលាទាំងអស់គឺមិនតម្រូវឱ្យមានគ្រូជំនួសឡើយ។ ក្នុងករណីនេះសិក្សានុសិស្សត្រូវបានអនុញ្ញាតឱ្យធ្វើកិច្ចការសាលាជំនួសវិញ។

៤.គ្រឿងតុបតែងមួយចំនួនត្រូវបានហាមឃាត់៖ នៅសាលារៀនប្រទេសជប៉ុនគឺហាមសិស្សមិនឱ្យ Mekeup ពាក់គ្រឿងអលង្ការ ប្រើប្រាស់របស់ថ្លៃៗ ហាមមិនឱ្យលាបក្រចកដៃ និងសូម្បីតែម៉ាសក៏មិនឱ្យពាក់ពណ៌ផ្សេង ក្រៅពីពណ៌សនោះទេ។

៥.មិនអនុញ្ញាតឱ្យយកអាហារមកពីផ្ទះ៖ សាលារៀនជប៉ុនមិនអនុញ្ញាតឱ្យសិស្សទៅញ៊ាំអាហារនៅខាងក្រៅ ឬយកអាហារមកពីផ្ទះឡើយ ព្រោះសាលាទាំងអស់នឹងផ្ដល់អាហារសុខភាពទៅឱ្យសិស្សគ្រប់គ្នាៗ។ គោលបំណងក្នុងការហាមមិនឱ្យយកអាហារផ្ទាល់ខ្លួនមកសាលា គឺដោយសារពួកគេចង់ឱ្យសិស្សទាំងអស់ទទួលបានអាហារដូចគ្នា ឬស្មើៗគ្នា បើទោះបីជាសិស្សនោះមកពីគ្រួសារក្រីក្រក៏ដោយ។ លើសពីនេះសិស្សក៏ត្រូវទទួលទានអាហារនៅក្នុងសាលាឱ្យអស់ផងដែរ បើមិនដូច្នោះទេសិស្សនឹងត្រូវពិន័យ។

៦.អំណោយដែលសាលាផ្តល់ឱ្យមិនអាចដូរបានទេ៖ អំណោយដូចជាមួកសុវត្ថិភាព កាតាប កាបូបប៊ិក ឬសម្ភារៈសិក្សាផ្សេងៗទៀត គឺសិស្សមិនត្រូវដោះដូរជាមួយមិត្តរួមថ្នាក់ឡើយ ព្រោះនេះគឺជាការខុសច្បាប់ធ្ងន់ធ្ងរបំផុត។

៧.សិស្សគឺជាអ្នកសម្អាតសាលារៀនដោយខ្លួនឯង៖ សាលាទាំងអស់របស់ជប៉ុន មិនជួលអ្នកជូតសម្អាតឡើយ ដោយ ទំនួលខុសត្រូវនេះសិស្សជប៉ុនត្រូវតែធ្វើវាដោយខ្លួនឯង រាប់ចាប់តាំងពីទីធ្លាសាលា ផ្លូវដើរចូលទៅថ្នាក់រៀន និងបន្ទប់ទឹកជាដើម។

៨.ការមានទំនាក់ទំនងស្នេហាត្រូវបានហាម៖ ទំនាក់ទំនងស្នេហាត្រូវបានហាមខាត់ជាដាច់ខាតនៅក្នុងសាលាជប៉ុន។ ការ អនុវត្តនេះមិនត្រឹមតែអនុវត្តនៅសាលាប៉ុណ្ណោះទេ តែក៏មានការចូលរួមសហការពីអាណាព្យាបាលនៅផ្ទះទៀតផង។ បើយោងទៅតាមការលើកឡើងរបស់គ្រូបង្រៀនបាននិយាយថា សិស្សនៅមានភាពក្មេងខ្លាំងណាស់ក្នុងការមានស្នេហា ហើយច្បាប់នេះគឺជួយឱ្យសិស្សផ្ដោតលើការរៀនបានពេញលេញផងដែរ៕