យើងដឹងហើយថា ការប្រើប្រាស់ Laptop គឺត្រូវសាកថ្មស្ទើរគ្រប់ពេលវេលា បើទោះជាវានៅសល់ថ្មពេញក្តី បើពេលណាដាច់ភ្លើងវិញ គឺចប់តែម្តង ដោយសារពុំបានសេវឯកសារទុក ។ ប៉ុន្តែអ្នកប្រើប្រាស់ Laptop នឹងឈប់បារម្ភ ដោយសារក្រុមហ៊ុន Lenovo គ្រោងផលិត Laptop បំពាក់ប្រព័ន្ធសូឡាស្រូបពន្លឺព្រះអាទិត្យដើម្បីដោះស្រាយបញ្ហាទាំងនេះ ហើយអ្នកប្រើប្រាស់គ្រាន់តែដាក់វាហាលថ្ងៃ រយៈពេល២០នាទី គឺអាចមើលវីដេអូបាន១ម៉ោង ។

ក្នុងកម្មវិធីបង្ហាញឧបករណ៍បច្ចេកវិទ្យា «Mobile World Congress 2025» រៀបចំនៅទីក្រុងបាសេឡូណា ប្រទេសអេស្ប៉ាញ ចាប់ពីថ្ងៃទី៣ ដល់ថ្ងៃទី៦ ខែមីនា ឆ្នាំ២០២៥ ក្រុមហ៊ុន Lenovo បានបង្ហាញ Laptop ថ្មីម៉ាក Yoga Solar PC ដែលបំពាក់ប្រព័ន្ធសូឡាស្រូបពន្លឺព្រះអាទិត្យនៅផ្នែកខាងក្រោយ ។ វាអាចបំលែងថាមពលជាមធ្យម ស្មើនឹង២៤% ហើយក្រុមហ៊ុននឹងបង្កើនកម្រិតបំលែងថាមពលឱ្យខ្ពស់ជាងនេះ ។

ទោះជា Laptop ម៉ាក Yoga Solar PC បានបំពាក់ប្រព័ន្ធសូឡាស្រូបពន្លឺព្រះអាទិត្យក្តី ប៉ុន្តែអ្នកប្រើប្រាស់ភាគច្រើនគិតថា វានឹងមានទម្ងន់ធ្ងន់ជាង Laptop ទូទៅ ។ ក្រុមហ៊ុនបញ្ជាក់ថា វាមិនធ្ងន់ដូចមនុស្សភាគច្រើនគិតទេ វាមានទម្ងន់តែជាង១គីឡូក្រាមប៉ុណ្ណោះ ។ Laptop នេះស្រាល និងស្តើង ហើយអ្នកដែលចូលចិត្តប្រើប្រាស់ Laptop ចេញថ្មី ពិតជាពេញចិត្តមិនខាន ។

ក្រុមហ៊ុនបញ្ជាក់ទៀតថា យើងគ្រាន់តែដាក់ Laptop ហាលថ្ងៃ រយៈពេល២០នាទី គឺវានឹងមានថ្មពេញ យើងអាចមើលវីដេអូ និងស្តាប់ភ្លេង រហូតដល់១ម៉ោង ហើយពុំចាំបាច់ប្រើប្រាស់ឆ្នាំងសាកដោតភ្លើងទៀតទេ ។ ក្រុមហ៊ុនបានកែប្រែទំហំប្រព័ន្ធសូឡានៅផ្នែកខាងក្រោយ Laptop ឱ្យស្រស់ស្អាត និងស្តើង ហើយប្រព័ន្ធសូឡានេះមានទំហំតូចជាងសូឡាទូទៅ ដែលយើងធ្លាប់ឃើញ ។

គួរបញ្ជាក់ថា ការបំពាក់ប្រព័ន្ធសូឡាស្រូបពន្លឺព្រះអាទិត្យជាមួយ Laptop ពុំមែនជារឿងថ្មីទេ កន្លងមក មានក្រុមហ៊ុនជាច្រើនបានផលិត Laptop ប្រភេទនេះ ។ បច្ចេកវិទ្យារបស់ក្រុមហ៊ុន Lenovo គឺអាចបំលែងថាមពលជាមធ្យម ស្មើនឹង២៤% ខណៈក្រុមហ៊ុនផ្សេងអាចបំលែងថាមពលស្មើនឹង៤៧% ។

ក្រុមហ៊ុន Lenovo បានកែសម្រួលបច្ចេកវិទ្យាដើម្បីឱ្យ Laptop អាចបំលែងថាមពលខ្ពស់ជាងនេះ និងបង្កើនប្រសិទ្ធភាពការប្រើប្រាស់ ។ អ្វីដែលគ្រប់គ្នាចង់ដឹងនោះ តើក្រុមហ៊ុននឹងលក់វាពេលណា? តម្លៃថ្លៃ ឬថោក? ក្រុមហ៊ុនប្រាប់ថា នេះគ្រាន់តែជាគម្រោងប៉ុណ្ណោះ រីឯការលក់ Laptop លើទីផ្សារ ក្រុមហ៊ុននឹងប្រកាសពេលក្រោយ ៕

ប្រទេសថៃ ៖ កាលពីចុងខែកុម្ភៈ ឆ្នាំ២០២៥ លោក សារ៉ាវង្ស ថៀនថង រដ្ឋមន្ត្រីក្រសួងទេសចរណ៍ និងកីឡាថៃឱ្យដឹងថា រដ្ឋាភិបាលថៃគ្រោងប្រមូលប្រាក់ពីភ្ញៀវទេសចរបរទេស ក្នុងម្នាក់ចំនួន៣០០បាត (ឬស្មើជាង៣ម៉ឺនរៀល) ថ្លៃជាន់ទឹកដី ហើយថៃនឹងអនុវត្តចាប់ពីចុងឆ្នាំ២០២៥ ។ ការប្រមូលប្រាក់ពីភ្ញៀវទេសចរនឹងអាចជួយសម្រាលបន្ទុកចំណាយរបស់រដ្ឋាភិបាល ខណៈកន្លងមក រដ្ឋាភិបាលបានចំណាយប្រាក់ផ្តល់ជំនួយសង្គ្រោះភ្ញៀវទេសចរពេលពួកគេមានគ្រោះថ្នាក់នៅថៃ ហើយថៃនឹងយកប្រាក់នេះសម្រាប់ថ្លៃធានារ៉ាប់រងសុខភាពភ្ញៀវទេសចរ ។

លើសពីនេះ ប្រាក់ដែលប្រមូលបានពីភ្ញៀវទេសចរ គឺរដ្ឋាភិបាលថៃនឹងចំណាយលើការគ្រប់គ្រង និងអភិវឌ្ឍន៍វិស័យទេសចរណ៍ក្នុងប្រទេសថៃ ។ មិនមែនមានតែថៃមួយទេដែលប្រមូលប្រាក់ពីភ្ញៀវទេសចរថ្លៃជាន់ទឹកដី គឺប្រទេសជាច្រើនទៀត ក៏បានប្រមូលប្រាក់ពីភ្ញៀវទេសចរដូចគ្នាដែរ ។ រដ្ឋមន្ត្រីក្រសួងទេសចរណ៍បញ្ជាក់ថា ថៃនឹងចាប់ផ្តើមប្រមូលប្រាក់ចាប់ពីចុងឆ្នាំ២០២៥ ។

បច្ចុប្បន្ន រដ្ឋាភិបាលកំពុងរៀបចំឯកសារលម្អិត ហើយសង្ឃឹមថា ពេលរៀបចំឯកសាររួច ថៃនឹងអាចចេញសេចក្តីប្រកាសប្រមូលប្រាក់ពីភ្ញៀវទេសចរ នៅខែមីនា ឆ្នាំ២០២៥ ។ បន្ទាប់មក ត្រូវរង់ចាំពី៥ខែ ទៅ៦ខែ ទើបចាប់ផ្តើមប្រមូលប្រាក់ពីភ្ញៀវទេសចរដែលធ្វើដំណើរមកថៃតាមផ្លូវអាកាស ផ្លូវគោក និងផ្លូវទឹក នៅចុងឆ្នាំ២០២៥ ពីព្រោះវាជាពេលដែលភ្ញៀវទេសចរជាច្រើនមានគម្រោងធ្វើដំណើរមកលេងថៃ ។

ប្រាក់ដែលភ្ញៀវទេសចរត្រូវបង់ពេលពួកគេធ្វើដំណើរមកដល់ថៃ (ឬប្រាក់ថ្លៃជាន់ទឹកដី) គឺថៃនឹងយកតាមការសម្រេចរបស់គណៈកម្មការគោលនយោបាយទេសចរណ៍ជាតិ មិនថាភ្ញៀវទេសចរធ្វើដំណើរតាមយន្តហោះ ផ្លូវគោក និងផ្លូវទឹក រួមមាន ៖

-បើភ្ញៀវទេសចរធ្វើដំណើរតាមផ្លូវយន្តហោះ គឺត្រូវបង់ប្រាក់ចំនួន៣០០បាតក្នុងម្នាក់ សម្រាប់ការធ្វើដំណើរ១លើក
-បើភ្ញៀវទេសចរធ្វើដំណើរតាមផ្លូវគោក និងផ្លូវទឹក ត្រូវបង់ប្រាក់ចំនួន៣០០បាតក្នុងម្នាក់ដូចគ្នា ប៉ុន្តែអាចចេញ-ចូលថៃបានច្រើនលើក ក្រោមរយៈពេលកំណត់ចាប់ពី៣០ថ្ងៃ ទៅ៦០ថ្ងៃ ។

រដ្ឋមន្ត្រីក្រសួងទេសចរណ៍បញ្ជាក់ថា យើងនឹងរង់ចាំការបញ្ជាក់ជាផ្លូវការម្តងទៀតពីរដ្ឋាភិបាល ពីព្រោះការប្រមូលប្រាក់ពីភ្ញៀវទេសចរនេះ គឺសម្រាប់ចំណាយថ្លៃធានារ៉ាប់រងសុខភាពភ្ញៀវទេសចរ ករណីពួកគេជួបគ្រោះថ្នាក់នៅថៃ ៕

តើអ្វីទៅជាទិវាសិទ្ធិនារីអន្តរជាតិ? ទិវាសិទ្ធិនារីអន្តរជាតិ គឺជាទិវាសកលលោក ដែលប្រារព្ធនូវសមិទ្ធិផលសង្គម សេដ្ឋកិច្ច វប្បធម៌ និងនយោបាយរបស់ស្ត្រី។ ទិវានេះក៏ជាការអំពាវនាវឱ្យមានសកម្មភាពពន្លឿនសមភាពយេនឌ័រផងដែរ។ សកម្មភាពសំខាន់ៗត្រូវបានមើលឃើញទូទាំងពិភពលោក នៅពេលដែលក្រុមមួយចំនួនមកជួបជុំគ្នាដើម្បីអបអរសាទរសមិទ្ធផលរបស់ស្ត្រី ឬការប្រមូលផ្តុំគ្នាដើម្បីសមភាពរបស់ស្ត្រី។ ខាងក្រោមនេះជាមូលហេតុនិងប្រវិត្តនៃទិវាសិទ្ធិនារីអន្តរជាតិ ៨មីនា។

ទិវាសិទ្ធិនារីអន្តរជាតិ (IWD) មានប្រវត្តិដ៏សម្បូរបែបដែលបានចាក់ឫសនៅក្នុងចលនាពលកម្ម និងការតស៊ូដើម្បីសិទ្ធិស្ត្រីនៅដើមសតវត្សទី 20។ វាបានចាប់ផ្តើមនៅសហរដ្ឋអាមេរិកនៅថ្ងៃទី 28 ខែកុម្ភៈ ឆ្នាំ 1909 ដោយគណបក្សសង្គមនិយមអាមេរិកបានផ្តល់កិត្តិយសដល់កម្មករកាត់ដេរដែលបានតវ៉ាទាមទារលក្ខខណ្ឌការងារឲ្យល្អជាងមុន។ ដោយមានការបំផុសគំនិតដោយចលនាអាមេរិក សកម្មជនអាល្លឺម៉ង់ Clara Zetkin បានស្នើឱ្យមានទិវានារីប្រចាំឆ្នាំនៅក្នុងសន្និសិទស្ត្រីសង្គមនិយមអន្តរជាតិក្នុងឆ្នាំ 1910 ដែលឈានទៅដល់ការបើកទិវានារីអន្តរជាតិជាផ្លូវការលើកដំបូងនៅថ្ងៃទី 19 ខែមីនា ឆ្នាំ 1911 នៅប្រទេសអូទ្រីស ដាណឺម៉ាក អាល្លឺម៉ង់ និងស្វីស ដែលមានមនុស្សជាងមួយលាននាក់បានតស៊ូមតិដើម្បីសិទ្ធិស្ត្រី និងកន្លែងធ្វើការ។

កាលបរិច្ឆេទនៃថ្ងៃទី 8 ខែមីនាបានក្លាយជាថ្ងៃសំខាន់នៅឆ្នាំ 1917 នៅពេលដែលស្ត្រីរុស្ស៊ីបានតវ៉ាសម្រាប់ “អាហារនិងសន្តិភាព” កំឡុងសង្គ្រាមលោកលើកទី 1 ដែលនាំឱ្យមានការផ្លាស់ប្តូរនយោបាយដ៏សំខាន់និងស្ត្រីទទួលបានសិទ្ធិបោះឆ្នោតនៅក្នុងប្រទេសរុស្ស៊ីផងដែរ។ នៅឆ្នាំ 1977 អង្គការសហប្រជាជាតិបានទទួលស្គាល់ជាផ្លូវការនៅថ្ងៃទី 8 ខែមីនាជាទិវាអន្តរជាតិនារី ដោយបានពង្រឹងវាជាព្រឹត្តិការណ៍សកលសម្រាប់សមភាពយេនឌ័រ។

ឥឡូវនេះ ទិវាអន្តរជាតិនារីត្រូវបានប្រារព្ធឡើងនៅទូទាំងពិភពលោក ដោយលើកតម្កើងសមិទ្ធិផលរបស់ស្ត្រី និងបន្តការតស៊ូដើម្បីសមភាពយេនឌ័រ ដោយប្រធានបទនៅឆ្នាំនេះគឺ “សម្រាប់ស្ត្រី និងកុមារីទាំងអស់៖ សិទ្ធិ ស្មើភាពគ្នា និងការពង្រឹងអំណាច” ដោយសង្កត់ធ្ងន់លើសារៈសំខាន់នៃការបង្កើតពិភពលោកឱ្យកាន់តែទូលំទូលាយ និងស្មើភាពសម្រាប់មនុស្សជំនាន់ក្រោយ៕