ទោះបីបច្ចុប្បន្នបច្ចេកវិទ្យា និងវិទ្យាសាស្រ្តជឿនលឿនប៉ុណ្ណាក៏ដោយ ក៏ប្រទេសឥណ្ឌានៅតែមានជំនឿយ៉ាងខ្លាំងទៅលើរូបសំណាកអាទិទេពរបស់ពួកគេដដែល។ យោងតាមសារព័ត៌មានបរទេស CN Traveler បានឱ្យដឹងថា ប្រាសាទចំនួន ៣ នេះត្រូវបានប្រជាជនឥណ្ឌាជឿថា ពូកែសក្តិសិទ្ធ សុំអ្វីបាននឹង។

១.ប្រាសាទ Chilkur Balaji៖ គឺជាប្រាសាទមួយដែលសាងសង់នៅសតវត្សទី ១៧ មានទីតាំងស្ថិតនៅលើច្រាំងទន្លេ Osman Sagar ក្នុង Telangana ប្រទេសឥណ្ឌា។ ប្រាសាទនេះ ត្រូវបានគេស្គាល់ថាជា “ប្រាសាទ Visa Balaji”។ ខណៈពេលដែលសហរដ្ឋអាមេរិកកំពុងពង្រឹងច្បាប់ និងចាត់វិធានការបណ្តេញជនអន្តោប្រវេស ប្រជាជនឥណ្ឌាបានមកប្រាសាទនេះ ដើម្បីបួងសួងសុំទិដ្ឋាការទៅអាមេរិក មិនយូរប៉ុន្មានការដាក់ពាក្យសុំទិដ្ឋាការនៅសហរដ្ឋអាមេរិករបស់ពួកគេត្រូវបានអនុម័តយ៉ាងឆាប់រហ័ស។
ចាប់តាំងពីពេលនោះមក ប្រាសាទនេះបានក្លាយជាកន្លែងពេញនិយមសម្រាប់អ្នកដាក់ពាក្យសុំទិដ្ឋាការ ដោយសារអត្រាជោគជ័យមិនគួរឱ្យជឿ។ អ្នកកាន់សាសនាប្រហែល ១០០.០០០ នាក់ទៅទស្សនាប្រាសាទនេះជារៀងរាល់ថ្ងៃ ជាពិសេសនៅថ្ងៃចុងសប្តាហ៍គឺមានមនុស្សច្រើនកុះករខ្លាំងណាស់។

២. Chamatkarik Shree Hanumanji Mandir-Visa Hanuman៖ គឺជាប្រាសាទហនុមានតូចមួយនៅ Khadia, Ahmedabad បានស្វាគមន៍មនុស្សរាប់រយនាក់ដែលមកបួងសួងសុំទិដ្ឋាការជារៀងរាល់ថ្ងៃ។ ប្រាសាទ “Visa Hanuman” ត្រូវបានមនុស្សជឿថាអាចធ្វើអព្ភូតហេតុដើម្បីជួយឱ្យការដាក់ពាក្យសុំទិដ្ឋាការទទួលបានជោគជ័យ។ បូជាចារ្យនៅព្រះវិហារធ្វើពិធីពិសេសដើម្បីប្រសិទ្ធពរដល់អ្នកស្វែងរកទិដ្ឋាការ ហើយជាថ្នូរនឹងពួកគេត្រូវអធិស្ឋានយ៉ាងក្លៀវក្លាចំពោះព្រះអង្គម្ចាស់ហនុមាននៅ Khadia ដើម្បីឱ្យសុបិននៃការធ្វើដំណើររបស់ពួកគេក្លាយជាការពិត។

៣.Gurdwara Shaheed Baba Nihal Singh Ji៖ ប្រាសាទដែលមានអាយុកាលជិត ១៥០ ឆ្នាំនេះ គឺជាគោលដៅដ៏ពេញនិយមសម្រាប់និស្សិត កម្មករ និងក្រុមគ្រួសារដែលមានបំណងធ្វើការ និងរស់នៅបរទេស។ នៅលើដំបូលប្រាសាទក៏មានយន្តហោះគំរូដ៏ធំមួយ ដែលបានក្លាយជានិមិត្តរូបនៃជំនឿក្នុងការធ្វើដំណើរទៅក្រៅប្រទេសប្រកបដោយជោគជ័យ។
ខណៈពេលដែលប្រាសាទភាគច្រើនទាមទារការថ្វាយផ្កា ឬអាហារ ប្រាសាទ Gurudwara Shaheed Baba Nihal Singh ពោរពេញទៅដោយយន្តហោះក្មេងលេង ដែលជាតង្វាយ ដើម្បីជាការបួងសួងស្នើសុំ “ទិដ្ឋាការ” ។ ដូច្នេះភ្ញៀវអាចទិញគំរូយន្តហោះក្មេងលេងបានយ៉ាងងាយស្រួល ដើម្បីដាក់ថ្វាយព្រះក្នុងគោលបំណងទៅរស់នៅក្រៅប្រទេស៕

លោក ASHRAF MAHROUS បានបង្កើតកំណត់ត្រាពិភពលោកចំនួនបីដងជាប់ៗគ្នា ដោយការទាញរថភ្លើងទម្ងន់ ២៧៩ តោនជាមួយនឹងធ្មេញរបស់គាត់ នៅឯស្ថានីយ៍មួយក្នុងទីក្រុង Cairo ប្រទេសអេហ្ស៊ីប។
យោងតាមប្រភពព័ត៌មាន AP និង Reuters លោក Ashraf Mahrous គឺជាអ្នកចំបាប់អេហ្ស៊ីបដ៏ល្បីល្បាញម្នាក់ ដែលគាត់ធ្លាប់បានបំបែកឯតទគ្គកម្មពិភពលោកចំនួន ៣ ដងរួចមកហើយ សម្រាប់ការទាញរថភ្លើងដែលមានទម្ងន់ធ្ងន់បំផុតដោយធ្មេញ។

ការទាញរថភ្លើងដោយកម្លាំងនៃធ្មេញគឺមិនមែនជាកិច្ចការងាយស្រួលនោះទេ ហើយក៏មិនមែនជារឿងធម្មតាឡើយ។ ប៉ុន្តែសម្រាប់អ្នកចំបាប់អេហ្ស៊ីប Ashraf Mahrous គឺគាត់បានធ្វើវាដោយជោគជ័យ ដែលបង្ហាញពីភាពខ្លាំងគួរឱ្យភ្ញាក់ផ្អើលរបស់គាត់។ កាលពីថ្ងៃទី ១៣ ខែមីនា ឆ្នាំ ២០២៥ អត្តពលិករូបនេះ បានប្រើធ្មេញរបស់គាត់ដើម្បីទាញរថភ្លើងទម្ងន់ ២៧៩ តោនដោយតភ្ជាប់ខ្សែ ហើយទាញរហូតជិត ១០ ម៉ែត្រធ្វើឱ្យមនុស្សម្នាជាច្រើនកោតសរសើរនឹងកម្លាំងមហិមារបស់លោកខ្លាំងណាស់។

ដោយសារមានការអបអរសាទរដោយហ្វូងមនុស្សយ៉ាងច្រើនសន្ធឹកសន្ធាប់ សមាជិកនៃអង្គការកំណត់ត្រាពិភពលោក Guinness នៅស្ថានីយ៍រថភ្លើង Ramses កណ្តាលទីក្រុងគែរ ក៏បានទទួលស្គាល់លោក Mahrous ថាជាបុរសខ្លាំងបំផុតក្នុងពិភពលោក។ គួរបញ្ជាក់ដែរថា លោក Mahrous បច្ចុប្បន្នមានអាយុ ៤០ ឆ្នាំ គឺជាប្រធានសហព័ន្ធកីឡាចំបាប់អាជីពអេហ្ស៊ីប ធ្លាប់ត្រូវបានទទួលស្គាល់ដោយ Guinness ក្នុងខែកុម្ភៈ ឆ្នាំ ២០២៤ សម្រាប់ការបំបែក និងទទួលទានស៊ុតឆៅចំនួន ១១ គ្រាប់ក្នុងរយៈពេល ៣០ វិនាទី។

ហើយនៅក្នុងខែមិថុនា ឆ្នាំ ២០២១ លោកក៏បានទទួលស្គាល់ម្តងទៀត សម្រាប់ការទាញឡានដឹកទំនិញទម្ងន់ជិត ១៦ តោនដោយធ្មេញរបស់លោក។ យោងតាមលោក Dawlet Elnakeb អ្នករៀបចំព្រឹត្តិការណ៍អូសរថភ្លើង បាននិយាយថា លោក Mahrous គឺបានហ្វឹកហាត់អស់រយៈពេល ២០ ថ្ងៃហើយមុនពេលបង្កើតកំណត់ត្រាទាំងនេះ៕

ប្រទេសចិន ៖ កាលពីថ្ងៃទី១៣ ខែមីនា ឆ្នាំ២០២៥ សារព័ត៌មានជប៉ុនរាយការណ៍ថា ភ្ញៀវទេសចរជប៉ុន២នាក់ មានអាយុប្រមាណ២០ឆ្នាំ ត្រូវបានអាជ្ញាធរចិនឃុំខ្លួនរយៈពេល២សប្តាហ៍ មុនពេលបណ្តេញចេញពីប្រទេសចិន ដោយសារពួកគេថតរូបពុំសមរម្យបង្ហាញគូ.ទ នៅមហាកំផែងរបស់ចិន ។ ប៉ុន្តែភ្ញៀវទេសចរជប៉ុននិយាយថា ពួកគេធ្វើបែបនេះ គ្រាន់តែជាការលេងសើចប៉ុណ្ណោះ ហើយពុំដឹងថា ការថតរូបបង្ហាញរាងកាយនៅទីសាធារណៈ ខុសច្បាប់នៅចិន ។

សារព័ត៌មាន NTV រាយការណ៍ថា ភ្ញៀវទេសចរជប៉ុន២នាក់ គឺប្រុសម្នាក់ និងនារីម្នាក់ បានទៅលេងនៅមហាកំផែងចិន ដែលជាសម្បត្តិបេតិកភណ្ឌពិភពលោក ស្ថិតនៅក្បែរទីក្រុងប៉េកាំង ។ ពេលនោះ ភ្ញៀវទេសចរប្រុសបានស្រាតខោរបស់ខ្លួនបង្ហាញគូទ ហើយឱ្យនារីមកជាមួយគ្នាជួយថតរូប ។

នៅថ្ងៃទី១៤ ខែមីនា ឆ្នាំ២០២៥ ក្រសួងការបរទេសជប៉ុនបានចេញសេចក្តីថ្លែងការណ៍ថា ៖ «បើតាមស្ថានទូតជប៉ុននៅប្រទេសចិន គឺកាលពីថ្ងៃទី៣ ខែមករា កន្លងមក ភ្ញៀវទេសចរជប៉ុន២នាក់ ត្រូវបានអាជ្ញាធរចិនចាប់ខ្លួននៅមហាកំផែង ។ ក្រោយមក អាជ្ញាធរចិនក៏បានដោះលែងពួកគេវិញ ហើយពួកគេបានធ្វើដំណើរត្រឡប់មកជប៉ុននៅខែមករា» ។

ចំណែកមន្ត្រីស្ថានទូតជប៉ុននៅទីក្រុងប៉េកាំង បដិសេធនិយាយបញ្ហានេះជាមួយប្រព័ន្ធផ្សព្វផ្សាយ ។ សារព័ត៌មានចិនរាយការណ៍ថា ភ្ញៀវទេសចរជប៉ុនទាំង២នាក់ ត្រូវបានភ្នាក់ងារសន្តិសុខនៅមហាកំផែងចិនចាប់ខ្លួនមកឃុំឃាំង រយៈពេល២សប្តាហ៍ ។

ទង្វើរបស់ភ្ញៀវទេសចរជប៉ុនធ្វើឱ្យពលរដ្ឋចិនពុំពេញចិត្តយ៉ាងខ្លាំង ពលរដ្ឋចិនភាគច្រើនលើកឡើងពីកងទ័ពជប៉ុនឈ្លានពាន និងគ្រប់គ្រងចិន ចាប់ពីឆ្នាំ១៩៣០ ដល់ឆ្នាំ១៩៤០ ។ ព័ត៌មានចិនចាប់ខ្លួនភ្ញៀវទេសចរជប៉ុន ដោយសារប្រព្រឹត្តទង្វើពុំសមរម្យនៅមហាកំផែង គឺមានចំនួនចូលទស្សនារហូតដល់ជាង៦០លានលើក នៅលើ Weibo កាលពីថ្ងៃទី១៤ ខែមីនា ហើយមនុស្សជាច្រើនបានរិះគន់ភ្ញៀវទេសចរជប៉ុនទាំង២នាក់ ខណៈអ្នកខ្លះទៀតស្ពប់ខ្ពើមអ្នកទាំង២ ។

លោក Chen Yitian ជាតារាសម្តែងចិន ដែលមានមនុស្សតាមដានក្នុង Weibo ជាង៧លាននាក់ បានរិះគន់ភ្ញៀវទេសចរជប៉ុនថា ៖ «ប្រព្រឹត្តទង្វើគួរឱ្យខ្មាស់អៀននៅមហាកំផែងរបស់ខ្ញុំ» ។ ពលរដ្ឋចិនខ្លះទៀតបានអំពាវនាវឱ្យរដ្ឋាភិបាលចិនហាមឃាត់ជនជាតិជប៉ុនទាំងអស់ចូលប្រទេសចិន ៕

ទីក្រុងតូចមួយបានបំផុសខ្លួនឡើងជាមួយទេសភាពស្រស់ស្អាតប្លែកភ្នែកកណ្ដាលវាលខ្សាច់ធំល្វឹងល្វើយ បានទាក់ទាញចំណាប់អារម្មណ៍មនុស្សទូទាំងពិភពលោកអោយចង់មកទស្សនាដោយផ្ទាល់ ព្រមទាំងផ្ដល់ជាចម្ងល់ជាច្រើនផងដែរថាវាមានពិត ឬជាការកាត់ត ព្រោះវាចម្លែកណាស់ដែលទីក្រុងមួយបែរជាកសាងឡើងនៅកណ្ដាលវាលខ្សាច់ដូចនេះ។

ជាការពិតណាស់! ទីក្រុងនេះមានឈ្មោះថា ហ៊ូអាកាឈីណា (Huacachina) មានទីតាំងស្ថិតនៅក្បែរទីក្រុង “អ៊ីកា” ក្នុងប្រទេសប៉េរូ។ វាជាភូមិតូចមួយដែលមានប្រជាជនរស់នៅត្រឹម ១០០នាក់ប៉ុណ្ណោះ ប៉ុន្តែទាក់ទាញភ្ញៀវទេសចររាប់ពាន់នាក់ក្នុងមួយឆ្នាំៗ។ សំណួរសួរថា តើអ្នកណាជាអ្នកកសាងវាឡើងមក ហើយចាប់តាំងពីពេលណា?

សម្រាប់ទេសភាពរបស់វាដែលមានដូចជាបឹង និងដើមឈើដុះព័ទ្ធជុំវិញនោះ គឺមិនមាននរណាបង្កើតវាឡើងមកនោះទេ ពោលគឺបឹង និងរុក្ខជាតិភាគច្រើននៅទីនោះកើតឡើងដោយធម្មជាតិតាំងពីរាប់ពាន់ឆ្នាំមុនមកម្ល៉េះ ប៉ុន្តែក្រោយមកខ្ទង់ឆ្នាំ១៩០០ ក៏មានមនុស្សរកឃើញទីតាំងនេះ ហើយពួកគេក៏បានតាំងទីរស់នៅជាបន្តបន្ទាប់។ ក្រោយៗមកទៀត ដោយយល់ឃើញថាទីនេះមានបរិយាកាសអំណោយផលពីធម្មជាតិល្អ វាបានក្លាយជាកន្លែងរបស់ក្រុមអ្នកមានអំណាចនៅប្រទេសប៉េរូសម្រាប់លម្ហែរកាយ ហើយគេជឿថាទឹកដីនេះមានប្រសិទ្ធភាពក្នុងការព្យាបាលជំងឺជាច្រើន។

ដោយការអភិវឌ្ឍន៍ចេះតែបន្ត បច្ចុប្បន្នគេបានកសាងអូតែ រីសត និងភោជនីយដ្ឋានជាហូរហែ ហើយវាបានក្លាយជាកន្លែងដ៏ពេញនិយមសម្រាប់ភ្ញៀវទេសចរមកពីជុំវិញពិភពលោក។ សកម្មភាពកម្សាន្តជាច្រើននៅទីនេះមានដូចជា៖ ជិះឡាន រឺជិះស្គីលើជម្រាលខ្សាច់, ជិះទូកមើលទេសភាព, ទស្សនាថ្ងៃលិច, ញ៉ាំអាហារ និងភេសជ្ជៈប្រចាំតំបន់ រួមទាំងសកម្មភាពផ្សេងៗទៀត។

យ៉ាងណាមិញ ថ្វីត្បិតមានភ្ញៀវទេសចរទៅកម្សាន្តរាប់ពាន់នាក់ក្នុងមួយឆ្នាំៗក្ដី ប៉ុន្តែថ្មីៗនេះរដ្ឋាភិបាលកំពុងព្រួយបារម្ភពីស្ថានភាពរបស់ទឹកបឹង ខណៈអាកាសធាតុមានការប្រែប្រួលហើយទឹកបឹងចាប់ផ្ដើមរីងស្រក ដូច្នេះវិធីតែមួយគត់ដើម្បីរក្សាបឹងនេះអោយនៅមានជីវិត គឺគេត្រូវបូមទឹកពីទីក្រុង អ៊ីកា មកបញ្ចូលទៅក្នុងបឹងនេះជាប់ជានិច្ច៕

ប្រទេសអ៊ីរ៉ង់ ៖ បាតុភូតធម្មជាតិដ៏ចម្លែកមួយបានធ្វើឱ្យមនុស្សម្នាភ្ញាក់ផ្អើលយ៉ាងខ្លាំង និងបារម្ភថា វាជាប្រផ្នូលប្រាប់ពីហេតុការណ៍អាក្រក់កើតឡើង គឺក្រោយពីភ្លៀងធ្លាក់ខ្លាំងបានធ្វើឱ្យឆ្នេរខ្សាច់ និងទឹកសមុទ្រនៅកោះមួយរបស់ប្រទេសអ៊ីរ៉ង់ ប្រែជាពណ៌ក្រហមស្រស់ដូចឈា.ម ។

កាលពីថ្ងៃទី១២ ខែមីនា ឆ្នាំ២០២៥ សារព័ត៌មានបរទេសរាយការណ៍ថា ប្រជុំកោះ Hormuz របស់ប្រទេសអ៊ីរ៉ង់ ស្ថិតនៅឈូងសមុទ្រ Persian បានធ្វើឱ្យពលរដ្ឋរស់នៅក្នុងតំបន់ និងភ្ញៀវទេសចរបរទេសភ្ញាក់ផ្អើលយ៉ាងខ្លាំង ពេលពួកគេឃើញបាតុភូតធម្មជាតិដ៏ចម្លែក គឺភ្លៀងធ្លាក់ខ្លាំងបណ្តាលឱ្យឆ្នេរខ្សាច់ និងទឹកសមុទ្រក្លាយជាពណ៌ក្រហម មិនខុសគ្នាពីឈាម ។

ក្រោយពីអ្នកប្រើប្រាស់ Instagram ម្នាក់ឈ្មោះ «@hormoz_omid» បានបង្ហោះវីដេអូបាតុភូតធម្មជាតិនេះ ធ្វើឱ្យអ្នកលេងបណ្តាញសង្គមទូទាំងពិភពលោក ចម្លែកចិត្ត ហើយវីដេអូនេះមានចំនួនទស្សនារហូតរាប់លាននាក់ ។ ម្ចាស់វីដេអូចង់ចែករំលែករូបភាពឱ្យមនុស្សម្នាបានឃើញពីបាតុភូតធម្មជាតិនៅតាមបណ្តោយឆ្នេរខ្សាច់កោះរបស់អ៊ីរ៉ង់ ដែលក្លាយជាពណ៌ក្រហមស្រស់ ក្រោយពីភ្លៀងធ្លាក់ ។

បាតុភូតធម្មជាតិដ៏ចម្លែកបង្ហាញពីឱ្យឃើញពីបម្រែបម្រួលអាកាសធាតុនាពេលបច្ចុប្បន្ន ក្នុងវីដេអូ គឺមានទឹកពណ៌ក្រហមខាប់ធ្លាក់ពីលើច្រាំងថ្ម និងហូរចូលសមុទ្រ ស្របពេលមេឃកំពុងធ្លាក់យ៉ាងខ្លាំង ។ រូបភាពនេះធ្វើឱ្យភ្ញៀវទេសចរដែលមកកម្សាន្តនៅឆ្នេរខ្សាច់រំភើបចិត្តយ៉ាងខ្លាំង និងនាំគ្នាពាក់អាវភ្លៀងមកឈរមើលទិដ្ឋភាពដែលកម្របានឃើញ ។

ក្រៅពីនេះ មានបុរសម្នាក់ដើរចុះទឹកសមុទ្រ ដែលពណ៌ទឹកសមុទ្រ មិនខុសគ្នាពីឈាម ។ ទោះជាមើលទៅ ដូចជារូបភាពកាត់ត ប៉ុន្តែពលរដ្ឋក្នុងតំបន់អះអាងថា វាជាបាតុភូតធម្មជាតិកើតឡើងពិតប្រាកដ និងពុំមែនជារូបភាពកាត់តទេ ។

ទោះជាមនុស្សភាគច្រើនខ្លាចរូបភាពនេះ ប៉ុន្តែអ្នកជំនាញបកស្រាយថា វាជាបាតុភូតធម្មជាតិ គឺកើតឡើងពីកំហាប់ខ្ពស់របស់អ៊ីកស៊ីតជាតិដែក (Iron Oxide) ដែលមានបរិមាណយ៉ាងច្រើនក្នុងតំបន់ ។ ហេតុនេះ ទើបសារធាតុរ៉ែផ្សេងៗនៅក្នុងដីបានផ្សំគ្នាជាមួយទឹកសមុទ្រ បង្កើតទៅជាបាតុភូតធម្មជាតិដ៏ចម្លែក ហើយវាពុំមែនជាប្រផ្នូលហេតុការណ៍អាក្រក់អ្វីឡើយ ។

ក្រោយការបង្ហោះរូបភាពប្លែកភ្នែកក្នុងបណ្តាញសង្គម ធ្វើឱ្យភ្ញៀវទេសចរជាច្រើននាក់ប្រាថ្នាចង់មកឃើញភ្លៀងធ្លាក់នៅឆ្នេរខ្សាច់ក្លាយជាពណ៌ឈាមដោយផ្ទាល់ភ្នែកក្នុងមួយជីវិត ។ បច្ចុប្បន្ន រដ្ឋាភិបាលអ៊ីរ៉ង់អនុញ្ញាតឱ្យភ្ញៀវទេសចរមកកម្សាន្តឆ្នេរខ្សាច់នេះ និងទស្សនាទេសភាពដ៏ស្រស់ស្អាតលើកោះពេញមួយឆ្នាំ ៕

តៃវ៉ាន់ ៖ ក្រសួងការបរទេសតៃវ៉ាន់បានចេញសេចក្តីថ្លែងការណ៍មួយ ដើម្បីដាស់តឿនពលរដ្ឋរបស់ខ្លួនរស់នៅក្រៅប្រទេស ឬធ្វើដំណើរទៅបណ្តាប្រទេសជិតស្និទ្ធជាមួយចិន គឺត្រូវប្រយ័ត្នខ្លួន ឬប្រយ័ត្នរងការគំរា.មពីចិន ឬអាជ្ញាធរចិនចាប់សួរចម្លើយយកទៅកាត់ទោ.ស ជាពិសេស ក្រុមនិស្សិតតៃវ៉ាន់ និងក្រុមសកម្មជនដែលប្រឆាំងនឹងគោលនយោបាយដាក់បញ្ចូលតៃវ៉ាន់ជាទឹកដីមួយផ្នែករបស់ចិន ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី១៣ ខែមីនា ឆ្នាំ២០២៥ ។

កាសែត Taipei Times របស់តៃវ៉ាន់បានរាយការណ៍ដោយយោងតាមសេចក្តីថ្លែងការណ៍ជាផ្លូវការថា នាពេលថ្មីៗនេះ រដ្ឋាភិបាលតៃវ៉ាន់បានដាស់តឿនពលរដ្ឋរបស់ខ្លួនឱ្យប្រុងប្រយ័ត្នការពារសុវត្ថិភាពឱ្យខ្លាំង ពេលធ្វើដំណើរទៅបណ្តាប្រទេសជាមិត្តរបស់ចិន ដូចជា ៖ បណ្តាប្រទេសនៅតំបន់អាស៊ីអាគ្នេយ៍ និងក្រុមប្រទេសនៅទ្វីបអាហ្វ្រិក ។

ការដាស់តឿនពលរដ្ឋរបស់រដ្ឋាភិបាលតៃវ៉ាន់ គឺក្រោយពីរដ្ឋាភិបាលចិនបញ្ជាឱ្យស្ថាប័នពាក់ព័ន្ធពិនិត្យឯកសារ ចំនួន២២ច្បាប់ តាំងពីខែមិថុនា ឆ្នាំ២០២៤ ដើម្បីឱ្យតុលាការចិនកាត់ទោសប្រហារជីវិតក្រុមសកម្មជនទាមទារឯករាជ្យឱ្យតៃវ៉ាន់ ហើយចុងចោទពុំចាំបាច់បង្ហាញខ្លួននៅបន្ទប់សវនាការ ។ រដ្ឋាភិបាលចិនក៏បានអនុវត្តតាមឯកសារទាំង២២ច្បាប់ នៅបណ្តាប្រទេសជាមិត្តរបស់ចិនផងដែរ តាំងពីចុងខែកុម្ភៈ ឆ្នាំ២០២៥ ក្រោយពីធ្វើកិច្ចប្រជុំសម្ងាត់ ២ថ្ងៃ រវាងភ្នាក់ងារសន្តិសុខចិន និងទីប្រឹក្សាជិតស្និទ្ធបំផុតជាមួយប្រធានាធិបតីចិន លោក ស៊ី ជិនពីង ព្រមទាំងសមាជិកគណៈកម្មការនយោបាយគណបក្សកុម្មុយនិស្តចិន ។

ស្ថានទូត និងស្ថានីយប៉ូលិសចិននៅបណ្តាប្រទេសជិតស្និទ្ធជាមួយចិន នឹងបំពេញតួនាទីជំនួសរដ្ឋាភិបាលចិន ដើម្បីអនុវត្តតាមឯកសារទាំង២២ច្បាប់ ។ ហេតុនេះ តៃវ៉ាន់ចាំបាច់ត្រូវតែដាស់តឿនពលរដ្ឋដែលរស់នៅក្រៅប្រទេស ឬធ្វើដំណើរទៅបណ្តាប្រទេសជិតស្និទ្ធជាមួយចិន ឱ្យប្រយ័ត្នខ្លួន ។ រដ្ឋាភិបាលតៃវ៉ាន់បានដាស់តឿនពលរដ្ឋ កម្រិតពណ៌លឿង (គួរប្រុងប្រយ័ត្ន) និងកម្រិតពណ៌ទឹកក្រូច (គួរប្រយ័ត្នឱ្យខ្លាំង) ពេលធ្វើដំណើរទៅទីក្រុងហុងកុង និងម៉ាកាវ ។ រីឯពលរដ្ឋតៃវ៉ាន់ធ្វើដំណើរទៅបណ្តាប្រទេសក្នុងតំបន់អាស៊ីអាគ្នេយ៍ ក៏ទទួលការដាស់តឿនពីរដ្ឋាភិបាលដែរ ក្នុងកម្រិតពណ៌ទឹកក្រូច ៕