ប្រទេសជប៉ុន ៖ កាលពីពាក់កណ្តាលខែមីនា ឆ្នាំ២០២៥ សារព័ត៌មានបរទេសរាយការណ៍ថា Nissan គឺជាក្រុមហ៊ុនជប៉ុនផលិតរថយន្តដ៏ល្បីល្បាញបានសាកល្បងការធ្វើដំណើរតាមរថយន្តតាក់ស៊ីបើកបរដោយស្វ័យប្រវត្តិនៅប្រទេសជប៉ុន ។ វាជាផ្នែកមួយនៃការព្យាយាមរបស់ជប៉ុនក្នុងការអភិវឌ្ឍបច្ចេកវិទ្យាបើកបរដោយស្វ័យប្រវត្តិ ដែលអាចចាប់សញ្ញាឧបសគ្គនៅចំពោះមុខ និងបន្ថយល្បឿនទុកឱ្យអ្នកថ្មើរជើងឆ្លងផ្លូវ ដោយពុំចាំបាច់មានការបញ្ជាពីមនុស្ស ។

វាជាការដោះស្រាយបញ្ហាខ្វះខាតអ្នកបើកបររថយន្តកំពុងកើនឡើងខ្លាំងនៅជប៉ុន និងកំណើនពលរដ្ឋអាយុច្រើននាពេលបច្ចុប្បន្ន ។ បច្ចេកវិទ្យាបើកបររថយន្តដោយស្វ័យប្រវត្តិរបស់ក្រុមហ៊ុន Nissan នេះ គឺដំណើរការដោយការបំពាក់កាមេរ៉ា ចំនួន១៤គ្រឿង, រ៉ាដា ៩គ្រឿង និងប្រព័ន្ធវាស់ចម្ងាយផ្លូវ ៦គ្រឿង ដើម្បីត្រួតពិនិត្យស្ថានការណ៍បើកបរនៅតាមដងផ្លូវ ។

ពលរដ្ឋជប៉ុនដែលចង់ធ្វើដំណើរតាមរថយន្តតាក់ស៊ីបើកបរដោយស្វ័យប្រវត្តិ គឺអាចប្រើប្រាស់កម្មវិធីហៅរថយន្តក្នុងទូរស័ព្ទដៃ ដើម្បីកំណត់គោលដៅការធ្វើដំណើរ ។ រីឯចង្កូតរបស់រថយន្តនឹងបង្វិលដោយខ្លួនឯង និងផ្លាស់ប្តូរការបើកបរតាមស្ថានភាពផ្លូវជាក់ស្តែង ខណៈសមត្ថភាពរបស់បច្ចេកវិទ្យា AI ដែលបំពាក់ក្នុងរថយន្ត នឹងចាប់សញ្ញាជុំវិញរថយន្តគ្រប់ពេលវេលា ដើម្បីឱ្យរថយន្តបើកបរយ៉ាងមានប្រសិទ្ធភាព ។

រថយន្តតាក់ស៊ីនេះនឹងចាប់សញ្ញាមនុស្សដើរតាមផ្លូវ និងផ្អាកការបើកបរនៅត្រង់ផ្លូវបំបែកដោយស្វ័យប្រវត្តិ ហើយវាបើកបរមិនលើសពីល្បឿនកំណត់ គឺ៤០គីឡូម៉ែត្រក្នុង១ម៉ោង ។ បើទោះជាបច្ចុប្បន្ន រថយន្តអាចបើកបរដោយស្វ័យប្រវត្តិក្តី ប៉ុន្តែបច្ចេកវិទ្យាបើកបររថយន្តតាក់ស៊ីដោយស្វ័យប្រវត្តិរបស់ក្រុមហ៊ុន Nissan ស្ថិតក្នុងលំដាប់ទី២ មានន័យថា ត្រូវមានមនុស្សត្រួតពិនិត្យការបើកបររបស់រថយន្តពីចម្ងាយ និងបញ្ជារថយន្ត ពេលករណីចាំបាច់ ។

ប្រទេសជប៉ុនបានប្រើប្រាស់បច្ចេកវិទ្យាបើកបររថយន្តដោយស្វ័យប្រវត្តិ ដើម្បីដោះស្រាយបញ្ហាចំនួនអ្នកបើកបររថយន្តធ្លាក់ចុះខ្លាំង ជាពិសេស នៅតំបន់ជនបទ ។ ក្រុមហ៊ុន Nissan មានគម្រោងដំណើរការរថយន្តបើកបរដោយស្វ័យប្រវត្តិ ចំនួន២០គ្រឿង នៅទីក្រុងយូកូហាម៉ា ព្រមទាំងមានគោលដៅដំណើរការរថយន្តបើកបរដោយស្វ័យប្រវត្តិឱ្យស្ថិតក្នុងលំដាប់ទី៤ (ឬការបើកបររថយន្តដោយស្វ័យប្រវត្តិ១០០% គ្មានការគ្រប់គ្រងពីមនុស្ស) ចាប់ពីឆ្នាំ២០២៩ ទៅឆ្នាំ២០៣០ ៕

សហរដ្ឋអាមេរិក ៖ ក្តីសុបិនចង់មានការងារធ្វើរបស់និស្សិតច្បាប់នៅអាមេរិកបានបាត់បង់ ក្រោយពីការផ្តល់ជូនការងារពីរដ្ឋាភិបាលត្រូវបានលុបចោលភ្លាមៗ ។ និស្សិតជាច្រើននាក់បាននិយាយមកកាន់ប្រព័ន្ធផ្សព្វផ្សាយ ដោយបង្ហាញពីការខឹងសម្បារ និងអស់សង្ឃឹមចំពោះក្តីសុបិនរបស់ខ្លួនថា នឹងមានការងារធ្វើ មានប្រាក់ចាយវាយក្នុងជីវិតប្រចាំថ្ងៃ ឬចិញ្ចឹមគ្រួសារ ប៉ុន្តែអ្វីគ្រប់យ៉ាងបានរលាយត្រឹមមួយប៉ព្រិចភ្នែក ។

យុវជន Andrew Nettels ជានិស្សិតច្បាប់ឆ្នាំទី៣ នៅសាកលវិទ្យាល័យ The George Washington រៀបរាប់ថា កាលពីដើមឆ្នាំ២០២៥ លោកបានត្រៀមឯកសារសម្រាប់ចាប់ផ្តើមការងារក្នុងគម្រោង Honors Program របស់ក្រសួងយុត្តិធម៌អាមេរិក ប៉ុន្តែ២-៣ម៉ោងក្រោយមក លោកទទួលបានអ៊ីម៉ែលបដិសេធការងារ ។ វាធ្វើឱ្យក្តីសុបិនលោកបាត់បង់ និងខូចអនាគត ។ លោកត្រូវបានការបដិសេធចូលធ្វើការពេញម៉ោង ក្រោយពីរៀនចប់សាកលវិទ្យាល័យ កាលពីនិទាឃរដូវឆ្នាំ២០២៥ ដោយសាររដ្ឋាភិបាលប្រកាសផ្អាកឈប់ទទួលនិស្សិតឱ្យចូលធ្វើការ ។

កាលពីឆ្នាំ២០២៣ មាននិស្សិតច្បាប់ប្រមាណ១,០០០នាក់ បានចូលបម្រើការងារជាមន្ត្រីរាជការ ហើយមាននិស្សិត២៥០នាក់ ត្រូវបានជ្រើសរើសឱ្យចូលធ្វើការក្នុងគម្រោង Honors Program ដែលមានការប្រកួតប្រជែងខ្ពស់ ។ ចំនួនការជ្រើសរើសមន្ត្រីរាជការស្ទើរតែគ្មានការផ្លាស់ប្តូរសោះតាំងពីឆ្នាំ២០១៨ ប៉ុន្តែវិធានការផ្អាកការងារលើកនេះធ្វើឱ្យប៉ះពាល់និស្សិតយ៉ាងខ្លាំង ។ នេះបើតាមទិន្នន័យរបស់សមាគមស្វែងរកការងារផ្នែកច្បាប់ ។

ដូចគ្នានេះ លោក Isaiah Gonzale ជានិស្សិតច្បាប់ ឆ្នាំទី៣ នៅសាលា Vermont Law and Graduate School ប្រាប់ថា លោកបានសុំធ្វើការក្នុងគម្រោង Honors Program ប៉ុន្តែត្រូវបដិសេធ ។ លោកបានប្រឹងប្រែងអស់រយៈពេល៣ឆ្នាំ ដើម្បីបានចូលធ្វើការក្នុងគម្រោងនេះ ហើយអ្វីៗបានបាត់បង់អស់គ្មានសល់» ។

កន្លងមក និស្សិតជាច្រើននាក់បានបដិសេធធ្វើការនៅតាមក្រុមហ៊ុនឯកជន ពីព្រោះសង្ឃឹមថា ពួកគេនឹងទទួលបានការងារជាមន្ត្រីរាជការ១០០% ប៉ុន្តែការផ្តល់ជូនការងារពីរដ្ឋាភិបាលត្រូវបានលុបចោលភ្លាមៗ ។ ដូច្នេះ ពួកគេបាត់បង់ឱកាសការងារទាំងក្នុងស្ថាប័នរដ្ឋ និងការងារក្នុងក្រុមហ៊ុនឯកជន ។

សាកលវិទ្យាល័យនានានៅអាមេរិកបានធ្វើកិច្ចប្រជុំអនឡាញ ដែលមានការចូលរួមពីនិស្សិតច្បាប់ អង្គការពុំស្វែងរកប្រាក់ចំណេញ និងភ្នាក់ងារជួយស្វែងរកការងារ ដើម្បីរកវិធីជួយនិស្សិតផ្នែកច្បាប់ដែលគ្មានការងារធ្វើ ៕

ប្រទេសឡាវ ៖ កាលពីថ្ងៃទី២៣ ខែមីនា ឆ្នាំ២០២៥ សារព័ត៌មានបរទេសរាយការណ៍ថា រដ្ឋសភាឡាវបានអនុម័តលើសេចក្តីសម្រេចមួយក្នុងកិច្ចប្រជុំ គឺការបញ្ចូលក្រសួងមួយចំនួនដើម្បីកាត់បន្ថយការចំណាយរបស់រដ្ឋាភិបាល និងបង្កើនប្រសិទ្ធភាពការងារមន្ត្រីរាជការ ។ ក្រសួងដែលត្រូវរួមបញ្ចូលគ្នា រួមមាន ៖ ក្រសួងផែនការ និងវិនិយោគ ត្រូវរួមបញ្ចូលជាមួយក្រសួងហិរញ្ញវត្ថុ រីឯក្រសួងថាមពល និងរ៉ែ ត្រូវរួមបញ្ចូលជាមួយក្រសួងឧស្សាហកម្ម និងពាណិជ្ជកម្ម ។

ក្រសួងធនធានធម្មជាតិ និងបរិស្ថាន នឹងរួមបញ្ចូលជាមួយក្រសួងកសិកម្ម និងរុក្ខាប្រមាញ់ ខណៈក្រសួងមហាផ្ទៃ នឹងបញ្ចូលជាផ្នែកមួយនៃគណៈកម្មការបុគ្គល និងអង្គការ ស្ថិតនៅក្រោមគណៈកម្មការមជ្ឈិមបក្សបដិវត្តន៍ឡាវ ។ ការកាត់បន្ថយចំនួនក្រសួងរបស់ឡាវ គឺធ្វើឡើងក្រោយពីរដ្ឋសភាវៀតណាមបានប្រជុំវិសាមញ្ញនៅទីក្រុងហាណូយ កាលពីខែកុម្ភៈ កន្លងមក ដើម្បីកាត់បន្ថយចំនួនក្រសួង ដោយមានគោលដៅបង្កើនប្រសិទ្ធភាពការងារមន្ត្រីរាជការដូចគ្នា ។

ការអនុម័តលើសេចក្តីសម្រេចរបស់រដ្ឋសភាឡាវ គឺធ្វើឡើងតាមការស្នើរបស់នាយករដ្ឋមន្ត្រីឡាវ លោក សនសៃ ស៊ីផាន់ដន (Sonexay Siphandone) ដើម្បីកាត់បន្ថយការចំណាយប្រាក់របស់រដ្ឋាភិបាល និងនិងបង្កើនប្រសិទ្ធភាពការងារមន្ត្រីរាជការឡាវ ។

ការរួមបញ្ចូលក្រសួងទាំងអស់នឹងធ្វើឱ្យរួចរាល់ នៅខែឧសភា ឆ្នាំ២០២៥នេះ ហើយដល់ពេលនោះ ចំនួនក្រសួងរបស់ឡាវនឹងធ្លាក់ចុះ ពី១៧ក្រសួង មកនៅត្រឹមតែ១៣ក្រសួងប៉ុណ្ណោះ ។ ក្រៅពីនេះ រដ្ឋសភាឡាវក៏បានឯកភាពលើសេចក្តីព្រាងវិសោធនកម្មច្បាប់ ស្តីពីការបង្កើនអាយុចូលនិវត្តន៍របស់មន្ត្រីរាជការ ចាប់ពី៦០ឆ្នាំ ទៅ៦៥ឆ្នាំ ។

គួរបញ្ជាក់ថា រដ្ឋសភាឡាវបានកាត់បន្ថយចំនួនក្រសួង រយៈពេលជាង១ខែក្រោយពីរដ្ឋសភាវៀតណាមកាត់បន្ថយក្រសួង ។ កាលពីថ្ងៃទី១៨ ខែកុម្ភៈ កន្លងមក រដ្ឋសភាវៀតណាមបានអនុម័តច្បាប់ធ្វើកំណែទម្រង់រដ្ឋាភិបាលថ្មីក្នុងកិច្ចប្រជុំវិសាមញ្ញនៅទីក្រុងហាណូយ ដោយកាត់បន្ថយក្រសួងចំនួន៥ និងមន្ត្រីរាជការពី១៥% ទៅ២៥% ។ អគ្គលេខាធិការបក្សកុម្មុយនិស្តវៀតណាម លោក តូ ឡឺម អះអាងថា វាមិនត្រឹមតែជួយកាត់បន្ថយការចំណាយរបស់រដ្ឋាភិបាលប៉ុណ្ណោះទេ ប៉ុន្តែវានឹងជួយឱ្យមន្ត្រីរាជការធ្វើការកាន់តែមានប្រសិទ្ធភាព និងសម្រេចគោលដៅអភិវឌ្ឍន៍សេដ្ឋកិច្ច ៕

សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា គ្រោងនឹងស្នើទូលទៅកាន់ព្រះមហាក្សត្រ ដើម្បីតែងតាំងអតីតសង្ឃ ជួន កក្កដា អោយក្លាយជាអនុរដ្ឋលេខាធិការ នៃក្រសួងធម្មការ និងសាសនា។

ថ្លែងក្នុងឳកាសពិធីបុណ្យទន្លេ នាខេត្តតាកែវ កាលពីថ្ងៃទី ២២ ខែមីនានេះ សម្ដេចបានលើកឡើងថា៖ ដោយការមើលឃើញពីចំណេះដឹង និងឆន្ទៈរបស់លោកជួន កក្កដា ក្នុងការជួយជ្រោមជ្រែងក្នុងវិស័យពុទ្ធសាសនា ដូចនេះរាជរដ្ឋាភិបាល នឹងស្នើតែងតាំងតំណែងមួយជូនដល់លោក ដើម្បីជួយទ្រទ្រង់វិស័យនេះបន្តទៅមុខទៀត។

សម្ដេចនាយករដ្ឋមន្រ្តី បានគូសបញ្ជាក់៖ ការលាចាកសិក្ខាបទរបស់អតីតព្រះសង្ឃ ជួន កក្កដា គឺជាការសម្រេចចិត្តរបស់លោកខ្លួនឯង មិនមាននរណាម្នាក់ចាប់បង្ខំលោកផ្សឹក ដូចមនុស្សមួយចំនួនបានចោទប្រកាន់លើរាជរដ្ឋាភិបាលនោះឡើយ។ ដោយសម្ដេចបានមានប្រសាសន៍ថា ”ដូច្នេះសូមឱ្យលោកតា លោកយាយ អ៊ុ ពូ មីង អ្នកគាំទ្រជួន កក្កដា កុំមានការយល់ច្រលំ ហើយប្រពន្ធខ្ញុំក៏គាត់ជឿខ្ញុំហើយថា ខ្ញុំអត់មានបង្ខំលោកទេ។ នេះគឺសម្រេចតាមរបស់ប្អូនបណ្ឌិត ជួន កក្កដា ដែលលោកចង់បានបន្ដការងារជួយទៅដល់សាសនាជួយដល់សង្គមជាតិ ប៉ុន្ដែគ្រាន់តែប្ដូរផ្លូវពុទ្ធចក្រទៅក្នុងផ្លូវអាណាចក្រ ហើយយើងនឹងបន្តផ្ដល់ឱកាសឱ្យលោកបណ្ឌិត បន្ដចូលរួម ដើម្បីជួយកសាងពង្រឹងព្រះពុទ្ធសាសនា ដែលជាមូលដ្ឋានសម្រាប់សង្គមជាតិយើងបន្ដទៀត”។

ឆ្លៀតក្នុងឳកាសអបអរសាទរពិធីបុណ្យទន្លេ លើកទី៩ ដដែលនេះ សម្ដេចមហាបវរធិបតី ហ៊ុន ម៉ាណែត បានអំពាវនាដល់វពុទ្ធសាសនិក បន្តគាំទ្រចំពោះគម្រោងជួយវិស័យពុទ្ធសាសនា ដែលផ្ដួចផ្ដើមដោយអតីតព្រះតេជគុណ ជួន កក្កដា ដើម្បីជាប្រយោជន៍ដល់វិស័យពុទ្ធសាសនា និងជួយកុមារជំនាន់ក្រោយដែលសិក្សានៅពុទ្ធិកសិក្សាបន្តទៅមុខទៀត៕

សហរដ្ឋអាមេរិក ៖ លោក Elon Musk ទីប្រឹក្សាជំនិតរបស់ប្រធានាធិបតីអាមេរិក លោក Donald Trump បានបង្ហាញការមិនពេញចិត្តយ៉ាងខ្លាំង ក្រោយពីសារព័ត៌មាន The New York Times រាយការណ៍ថា លោកបានទទួលព័ត៌មានសម្ងាត់ពាក់ព័ន្ធនឹងគម្រោងធ្វើសង្គ្រា.មជាមួយចិន បន្ទាប់ពីលោកចូលរួមកិច្ចប្រជុំជាមួយរដ្ឋមន្ត្រីក្រសួងការពារជាតិអាមេរិក លោក Pete Hegseth នៅក្រសួងការពារជាតិ (ឬមន្ទីរបញ្ចកោណ) ជាលើកដំបូង កាលពីថ្ងៃទី២១ ខែមីនា ឆ្នាំ២០២៥ ។

លោក Elon Musk បានឆ្លើយតបភ្លាមៗទៅកាន់ការផ្សព្វផ្សាយរបស់សារព័ត៌មាន The New York Times ដោយលោកសរសេរក្នុងបណ្តាញសង្គម X ថា ៖ «វាជាការឃោសនាសុទ្ធសាធ» ។ លោកបានអំពាវនាវឱ្យចាត់វិធានការតាមច្បាប់ទៅលើមន្ត្រីមន្ទីរបញ្ចកោណ ដែលបានបង្ហាញព័ត៌មានមិនពិតទៅប្រព័ន្ធផ្សព្វផ្សាយ ។

ប្រធានាធិបតីអាមេរិក លោក Donald Trump ក៏បានបដិសេធដែរថា យើងពុំបានជជែករឿងធ្វើសង្គ្រាមជាមួយចិនក្នុងកិច្ចប្រជុំនៅមន្ទីរបញ្ចកោណទេ ។ អ្នកបង្ហាញពីផែនការធ្វើសង្គ្រាមទៅបុគ្គលខាងក្រៅ ជាពិសេស អ្នកជំនួញដែលទទួលបានផលប្រយោជន៍នៅចិន គឺប្រឈមនឹងហានិភ័យ ។

ចំណែរដ្ឋមន្ត្រីក្រសួងការពារជាតិអាមេរិក លោក Pete Hegseth ឱ្យដឹងថា កិច្ចប្រជុំជាមួយលោក Elon Musk គឺជាការជជែកគ្នាពុំផ្លូវការ យើងផ្តោតលើប្រធានបទ «ការច្នៃប្រឌិត និងប្រសិទ្ធភាព» ហើយយើងពុំបាននិយាយពីគម្រោងធ្វើសង្គ្រាមជាមួយចិនទេ ។

លោក Elon Musk នាយកគ្រប់គ្រងក្រុមហ៊ុន SpaceX, Starlink និង Tesla បានធ្វើកិច្ចសន្យាជាច្រើនច្បាប់ជាមួយក្រសួងការពារជាតិអាមេរិក ដែលធ្វើឱ្យមហាជនមានចម្ងល់ពីបញ្ហាផលប្រយោជន៍ ។ រីឯមន្ត្រីសេតវិមានឱ្យដឹងថា លោក Elon Musk នឹងដកខ្លួនចេញពីតួនាទីក្នុងរដ្ឋាភិបាល ប្រសិនបើរកឃើញថា មានទំនាស់ផលប្រយោជន៍ ។ សមាជិកព្រឹទ្ធសភា២រូបមកពីគណបក្សប្រជាធិបតេយ្យ (Democrat) ពុំទុកចិត្ត និងផ្ញើលិខិតទាមទារឱ្យរដ្ឋមន្ត្រីការពារជាតិលាតត្រដាងព័ត៌មានអ្វីខ្លះដែលបានពិភាក្សាជាមួយលោក Elon Musk ។

តើមន្ត្រីរូបណានៅមន្ទីរបញ្ចកោណដែលបានធ្វើឱ្យបែកធ្លាយព័ត៌មានសម្ងាត់ទៅ The New York Times ថា អាមេរិកគ្រោងធ្វើសង្គ្រាមជាមួយចិន? តើលោក Elon Musk នឹងអាចចាត់ការមន្ត្រីរូបនេះដែរឬទេ? ហេតុនេះ សូមលោកអ្នករង់ចាំតាមដានការចុះផ្សាយរបស់សារព័ត៌មាន KBN បន្តទៀត ៕