ប្រទេសថៃ ៖ កាលពីថ្ងៃទី២១ ខែមីនា ឆ្នាំ២០២៥ សារព័ត៌មានថៃរាយការណ៍ថា នាយកដ្ឋានពន្ធដារប្រទេសថៃបារម្ភពីក្រុមយុវជនដែលប្រកបមុខរបរជា Influencer និងលក់ផលិតផលអនឡាញ ប្រឈមមុខនឹងការផាកពិន័យខ្ពស់ពីរដ្ឋ ដោយសារតាមការពិនិត្យមើលឯកសារការបង់ពន្ធឃើញថា ក្រុមយុវជនជាច្រើននាក់ដែលទទួលបានប្រាក់ចំណូលខ្ពស់ស្របតាមការកំណត់ ប៉ុន្តែពុំព្រមបង់ពន្ធប្រាក់ចំណូលជូនរដ្ឋ ។

នាយកដ្ឋានពន្ធដារថៃបានកំណត់ឱ្យពលរដ្ឋដែលទទួលបានប្រាក់ចំណូលពីការប្រកបមុខរបរទាំងអស់ ត្រូវមកបង់ពន្ធប្រាក់ចំណូលជូនរដ្ឋ ចាប់ពីថ្ងៃទី២១ ខែមីនា រហូតដល់ថ្ងៃទី៣១ ខែមីនា ឆ្នាំ២០២៥ ប៉ុន្តែបើពលរដ្ឋបង់ពន្ធប្រាក់ចំណូលតាមអនឡាញ គឺអាចបង់រហូតដល់ថ្ងៃទី៨ ខែមេសា ឆ្នាំ២០២៥ ។

លោក ពីនសាយ ស៊ូរ៉ាត់សាវ៉ាឌី ប្រធាននាយកដ្ឋានពន្ធដារនិយាយថា បច្ចុប្បន្ន ការប្រមូលពន្ធប្រាក់ចំណូលពីពលរដ្ឋធម្មតា គឺជាប្រាក់ចំណូលលំដាប់ទី៣ របស់នាយកដ្ឋានពន្ធដារ ។ នាយកដ្ឋានពន្ធដារបានប្រមូលពន្ធប្រាក់ចំណូលពលរដ្ឋ ស្មើប្រមាណ៤សែនលានបាតក្នុង១ឆ្នាំ ហើយនៅឆ្នាំ២០២៥ នាយកដ្ឋានពន្ធដារបានប្រមូលពន្ធប្រាក់ចំណូលពលរដ្ឋ ជិត៣ខែហើយ ។

តាមទិន្នន័យគិតត្រឹមថ្ងៃទី១៣ ខែមីនា ឆ្នាំ២០២៥ ពលរដ្ឋថៃបានបង់ពន្ធប្រាក់ចំណូល ស្មើនឹង៧លាន៤សែនបាត និងខ្ពស់ជាងឆ្នាំ២០២៤ ១៣% ដែលស្មើត្រឹមតែ៣លាន៥សែនបាត ។ បច្ចុប្បន្ន នាយកដ្ឋានពន្ធដារបានទទួលការបង់ពន្ធប្រាក់ចំណូលពលរដ្ឋ ស្មើនឹង៨២% ហើយពលរដ្ឋ១៨% ទៀត ពុំទាន់បង់ពន្ធប្រាក់ចំណូល ដោយសារមានបញ្ហាឯកសារ ព្រោះពួកគេមានប្រាក់ចំណូលផ្សេងទៀតក្រៅពីការងារ ។ នាយកដ្ឋានពន្ធដារសង្ឃឹមថា ពលរដ្ឋនឹងមកបង់ពន្ធប្រាក់ចំណូលបន្តទៀត ។

លោក ពីនសាយ បន្តថា ពលរដ្ឋជាអ្នកធ្វើការបានបង់ពន្ធប្រាក់ចំណូលរបស់ខ្លួនធម្មតា និងគ្មានអ្វីគួរឱ្យបារម្ភទេ ប៉ុន្តែអ្វីគួរឱ្យបារម្ភ គឺក្រុមយុវជនដែលមានប្រាក់ចំណូលខ្ពស់ស្របតាមការកំណត់ ពុំបង់ពន្ធជូនរដ្ឋ ។ តាមទិន្នន័យកាលពី៣ឆ្នាំកន្លងមក បង្ហាញថា ពលរដ្ឋពុំបង់ពន្ធប្រាក់ចំណូល គឺជាក្រុមយុវជនដែលធ្វើការពាក់ព័ន្ធនឹងឌីជីថល ដូចជា ៖ អ្នកលក់ផលិតផលអនឡាញ និង Influencer ។ ហេតុនេះ មន្ត្រីនាយកដ្ឋានពន្ធដារបានពិភាក្សាគ្នាផ្តល់ភាពសំខាន់លើការបង់ពន្ធប្រាក់ចំណូលរបស់ក្រុមយុវជន ។

តាមការពិនិត្យមើលក្នុងបណ្តាញសង្គម គឺយុវជនថៃជាច្រើនបានប្រកបមុខរបរជា Influencer និងលក់ផលិតផលអនឡាញ ហើយលោក ពីនសាយ ក៏បានស្រង់ឈ្មោះក្រុមយុវជនមកឱ្យមន្ត្រីពន្ធដារពិនិត្យមើលក្នុងឯកសារ ព្រោះចង់ដឹងថា តើពួកគេបានបង់ពន្ធប្រាក់ចំណូលឬនៅ? ប៉ុន្តែតាមការពិនិត្យឃើញថា ពួកគេពុំបានបង់ពន្ធប្រាក់ចំណូលទេ តាំងពី៣ឆ្នាំ-៤ឆ្នាំមុន មកម្ល៉េះ ។ នាយកដ្ឋានពន្ធដារមានអំណាចឱ្យយុវជនបង់ពន្ធប្រាក់ចំណូលកាលពី២ឆ្នាំកន្លងមក ហើយនាយកដ្ឋានពន្ធដារមានសិទ្ធិពិនិត្យឯកសារបង់ពន្ធរបស់យុវជន កាលពី៥ឆ្នាំមុន ។

បើនាយកដ្ឋានពន្ធដារពិនិត្យឃើញថា យុវជនដែលមានប្រាក់ចំណូលខ្ពស់ស្មើនឹងការកំណត់របស់រដ្ឋ ប៉ុន្តែពុំព្រមបង់ពន្ធ គឺពួកគេនឹងតម្រូវឱ្យបង់ពន្ធប្រាក់ចំណូល ព្រមទាំងបង់ប្រាក់ការផាកពិន័យ ។ ឧទាហរណ៍ ៖ បើយុវជនម្នាក់លក់ផលិតផលអនឡាញ ឬជា Influencer ត្រូវបង់ពន្ធចំនួន១ម៉ឺនបាត គឺនាយកដ្ឋានពន្ធដារនឹងតម្រូវឱ្យពួកគេបង់រហូតដល់៥ម៉ឺនបាត (រួមទាំងប្រាក់ពិន័យ) នាយកដ្ឋានពន្ធដារពុំចង់ឃើញយុវជនបង់ប្រាក់ពិន័យបែបនេះទេ ៕

ប្រទេសអង់គ្លេស ៖ ក្រុមហ៊ុនបច្ចេកវិទ្យាអង់គ្លេសបានអភិវឌ្ឍន៍បច្ចេកវិទ្យាដ៏ទំនើបសម្រាប់ការផលិតពេជ្រនៅលើអវកាស ហើយក្រុមហ៊ុនសង្ឃឹមថា នឹងអាចផលិតគ្រាប់ពេជ្របរិសុទ្ធ មិនកខ្វក់ និងមានគុណភាពល្អ ទុកប្រើប្រាស់ក្នុងឧស្សាហកម្មផ្សេងៗ ។ ក្រៅពីនេះ ពេជ្រដែលផលិតលើអវកាសនឹងអាចបង្កើតជាវត្ថុផ្សេងៗក្នុងលំហរ ដែលអាចប្រើប្រាស់ជាប្រយោជន៍ដល់មនុស្ស នាថ្ងៃអនាគត ។

ពេជ្រ គឺជាវត្ថុរឹងបំផុតលើពិភពលោក ដែលអាចយកទៅប្រើប្រាស់ជាមួយវត្ថុដុសខាត់ និងឧបករណ៍កាត់តម្រឹម រួមទាំងមានប្រយោជន៍សម្រាប់ប្រើប្រាស់ក្នុងការរុករកលើអវកាស ដូចជា ៖ ប្រើជាឧបករណ៍កាត់អាចទប់ទល់នឹងកំដៅខ្លាំងលើអាចម៍ផ្កាយ ។ ហេតុនេះ Space Forge គឺជាក្រុមហ៊ុនស្រាវជ្រាវអវកាសមានគោលដៅបញ្ជូនបន្ទប់ពិសោធន៍ដំបូងទៅកាន់លំហរ ដើម្បីសាកល្បងផលិតគ្រាប់ពេជ្រ ឬដាំពេជ្រលើលំហរគ្មានទម្ងន់ ។ ក្រុមហ៊ុនសង្ឃឹមថា នឹងទទួលបានគ្រាប់ពេជ្របរិសុទ្ធ និងមិនកខ្វក់ដូចពេជ្រលើផែនដី ។

ក្រុមហ៊ុន Space Forge បញ្ជាក់ថា ការផលិតពេជ្រនេះ គឺធ្វើឡើងក្នុងបន្ទប់ពិសោធន៍លើអវកាស ដែលបន្ទប់នេះដើរតួនាទីដូចគ្នានឹងមីក្រូវ៉េវពិសេស ។ ក្រុមហ៊ុននឹងដាក់សារធាតុប្រតិកម្ម២ប្រភេទក្នុងបន្ទប់ពិសោធន៍ រួចហើយ បញ្ចូលអ៊ីដ្រូសែន និងមេតាន ។ បន្ទាប់មក ពេលបើកបន្ទប់សោធន៍ ក្រុមហ៊ុននឹងទទួលបានសារធាតុ Plasma ជាច្រើនក្នុងនោះ ដែលវានឹងជួយឱ្យឧស្ម័ន និងសារធាតុទាំង២ប្រភេទ មានប្រតិកម្មជាមួយគ្នាក្លាយជាស្រទាប់ៗ រហូតបង្កើតជាគ្រាប់ពេជ្រមានគុណភាពល្អ ។

គ្រាប់ពេជ្រមានគុណភាពល្អទាំងនេះ ពុំមែនសម្រាប់ផលិតជាគ្រឿងអលង្ការទេ ប៉ុន្តែក្រុមហ៊ុននឹងយកវាទៅប្រើជាចំហាយកំដៅក្នុងឆ្នាំងសាករថយន្តអគ្គិសនី ឬធ្វើជាឧបករណ៍ពង្រីកសេវាវិទ្យុក្នុងប្រព័ន្ធទូរគមនាគមន៍ និងប្រើប្រាស់ក្នុងឧស្សាហកម្មផ្សេងៗ ។ ប៉ុន្តែក្រុមហ៊ុនប្រឈមនឹងបញ្ហាមួយ តើគួរធ្វើដូចម្តេច ទើបអាចយកគ្រាប់ពេជ្រផលិតនៅអវកាសមកកាន់ផែនដីយ៉ាងមានសុវត្ថិភាព? ក្រុមហ៊ុនបានបង្កើតស្រទាប់ការពារកំដៅបែប Origami ហៅថា «Pridwen» ដែលឈ្មោះនេះ គឺដាក់តាមគ្រឿងសឹករបស់ព្រះមហាក្សត្រអង់គ្លេស ព្រះនាម Arthur ដែលល្បីល្បាញក្នុងប្រវត្តិសាស្ត្រជាវីវៈបុរសសម័យមជ្ឈិម ។

ស្រទាប់ការពារកំដៅនេះនឹងជួយការពារគ្រាប់ពេជ្រដែលផលិតលើអវកាស មិនឱ្យទទួលកំដៅខ្លាំងពេលបញ្ជូនមកផែនដី ។ ជំហានដំបូង គ្រាប់ពេជ្រដែលបានពីអវកាសនឹងត្រូវប្រើប្រាស់នៅមជ្ឈមណ្ឌលបង្ហោះរ៉ុក្កែតនៅអាមេរិក នៅខែមេសា ឆ្នាំ២០២៥ ។ បន្ទាប់មក ក្រុមហ៊ុននឹងបញ្ជូនគ្រាប់ពេជ្រទាំងនេះទៅប្រើប្រាស់ក្នុងឧស្សាហកម្មផលិតវត្ថុផ្សេងៗ នាថ្ងៃអនាគត ៕

ប្រទេសចិន ៖ កាលពីថ្ងៃទី២៤ ខែមីនា ឆ្នាំ២០២៥ មន្ត្រីក្រសួងការពារជាតិរបស់ចិនឱ្យដឹងថា ចិនគ្រោងធ្វើសមយុទ្ធកងទ័ពកណ្តាលសមុទ្រជាមួយថៃ នៅក្បែរទីក្រុងចាងជៀង ខេត្តក្វាងទុង ស្ថិតនៅភាគខាងត្បូងប្រទេសចិន ចាប់ពីចុងខែមីនា រហូតដល់ដើមខែមេសា ឆ្នាំ២០២៥ ។ ការធ្វើសមយុទ្ធកងទ័ពនេះ គឺក្នុងគោលបំណងពង្រឹងសម្ព័ន្ធភាពរវាងកងទ័ពទាំង២ប្រទេស និងការពារការគំរា.មកំហែ.ង ។

នេះជាការហ្វឹកហាត់រួមគ្នារវាងកងទ័ពជើងទឹកទាំង២ប្រទេស ដើម្បីពង្រឹងទំនាក់ទំនងសន្តិសុខ និងការពារការគំរាមកំហែងក្នុងតំបន់អាស៊ីអាគ្នេយ៍ ។ ការធ្វើសមយុទ្ធមានគោលដៅសំខាន់ គឺពង្រឹងកិច្ចសហការរួមគ្នាក្នុងសង្គ្រាមនៅសមុទ្រ និងទប់ស្កាត់ការគំរាមកំហែងនៅសមុទ្រ នាថ្ងៃអនាគត ។

មន្ត្រីក្រសួងការពារជាតិចិនបញ្ជាក់ថា ការធ្វើសមយុទ្ធកងទ័ពនឹងមានការហ្វឹកហាត់ផ្នែកយុទ្ធសាស្ត្រ, ការហ្វឹកហាត់ការពារខ្លួនពីការគំរាមកំហែងដោយសារនាវាមុជទឹក, វិធីការពារខ្លួនពីការវាយប្រហារផ្លូវអាកាស ព្រមទាំងការជួយសង្គ្រោះជីវិតមនុស្សពេលមានអាសន្ន ។

នេះជាការពង្រឹងកិច្ចសហការផ្នែកកងទ័ពរវាងចិន និងថៃ ដែលប្រទេសទាំងពីរមើលឃើញថា សន្តិសុខក្នុងតំបន់ជារឿងសំខាន់ ។ ហេតុនេះ ការធ្វើសមយុទ្ធរួមគ្នានឹងជួយបង្កើនការយល់ដឹងអំពីយុទ្ធសាស្ត្រ និងប្រតិបត្តិការរួមគ្នាក្នុងស្ថានការណ៍ជាក់ស្តែង ។

ម្យ៉ាងទៀត ការធ្វើសមយុទ្ធកងទ័ពមានសារៈសំខាន់ ដើម្បីបង្ហាញឱ្យឃើញពីទំនាក់ទំនងជិតស្និទ្ធរវាងចិន និងថៃ ជាពិសេស ទំនាក់ទំនងកងទ័ព និងការរក្សាសន្តិភាពនៅតំបន់អាស៊ីអាគ្នេយ៍ ។ វាក៏មានសារៈសំខាន់សម្រាប់សេដ្ឋកិច្ច និងពាណិជ្ជកម្មរវាងប្រទេសទាំង២ ផងដែរ ។

វាជាការបើកឱកាសឱ្យកងទ័ពប្រទេសទាំង២ អាចផ្លាស់ប្តូរចំណេះដឹង និងបច្ចេកវិទ្យាផ្នែកកងទ័ពទៅវិញទៅមក ព្រមទាំងពង្រឹងសន្តិសុខក្នុងតំបន់អាស៊ី និងពិភពលោក យ៉ាងមានប្រសិទ្ធភាព ។ នេះជាលើកទី៦ហើយ ដែលកងទ័ពជើងទឹកប្រទេសទាំង២ បានធ្វើសមយុទ្ធរួមគ្នា ៕

ប្រទេសចិន ៖ កាលពីថ្ងៃទី២២ ខែមីនា ឆ្នាំ២០២៥ គេហទំព័រ CTWANT រាយការណ៍ថា នៅលើកម្មវិធីលក់ផលិតផលជជុះតាមអនឡាញរបស់ចិនបានដាក់លក់ផ្លែឈើចម្លែកដែលមានសំបកពណ៌បៃតង ស្រដៀងនឹងផ្លែក្រូចសើច គឺ១ផ្លែតម្លៃ៥០០យាន់ (ឬស្មើប្រមាណ៧០ដុល្លារ) ដែលធ្វើឱ្យមហាជនចាប់អារម្មណ៍ និងជជែកគ្នាយ៉ាងច្រើនក្នុងបណ្តាញសង្គម ។ ការពិត វាពុំមែនជាផ្លែឈើចម្លែកអ្វីទេ គឺជាផ្លែក្រូចដុះផ្សិតព័ទ្ធជុំវិញ ប៉ុន្តែហេតុអ្វីម្នាក់ៗយកក្រូចដុះផ្សិតមកលក់បែបនេះ?

សារព័ត៌មានចិនបានចុះផ្សាយពីស្ត្រីម្នាក់រស់នៅខេត្តសានទុង ភាគខាងកើតប្រទេសចិន បានឃើញក្រូចរបស់នាងដុះផ្សិតពេញទាំងអស់ រហូតដល់ផ្លែរបស់វាប្រែជាពណ៌បៃតង ពីដំបូង នាងចង់បោះវាចោល ប៉ុន្តែមិត្តភក្តិប្រាប់ថា កុំបោះចោល គឺអាចលក់វាតាមអនឡាញបាន ។ នាងភ្ញាក់ផ្អើលខ្លាំងណាស់ដែលដឹងថា អាចលក់វាបាន ហើយនាងកាន់តែស្រឡាំងកាំងថែមទៀតពេលដឹងថា មានមនុស្សច្រើនណាស់យកក្រូចដុះផ្សិតបែបនេះមកលក់ ។ បន្ទាប់មក នាងក៏លក់ក្រូចដុះផ្សិតតាមអនឡាញ មិនយូរប៉ុន្មាន ក្រូចរបស់នាងក៏បានលក់ដាច់ ។

ក្រោយពីសារព័ត៌មានចុះផ្សាយពីរឿងការលក់ក្រូចដុះផ្សិតធ្វើឱ្យមហាជនភ្ញាក់ផ្អើល និងក្លាយជាប្រធានបទជជែកពេញបណ្តាញសង្គម ។ មនុស្សជាច្រើនពុំយល់ថា ហេតុអ្វីអាចលក់ក្រូចដុះផ្សិតបាន? ថែមទាំងអាចលក់ថ្លៃទៀតផង តើមានអ្នកទិញវាមែនឬអត់? តើពួកគេទិញវាយកទៅធ្វើអ្វី? អ្នកប្រើប្រាស់បណ្តាញសង្គមម្នាក់សួរថា តើពិតជាលក់ដាច់មែនទេ ក្រូច១ផ្លែ មានតម្លៃរហូតដល់៧០ដុល្លារ?

តាមការពិនិត្យមើលក្នុងកម្មវិធីលក់ផលិតផលជជុះតាមអនឡាញឃើញថា មនុស្សជាច្រើនបានយកក្រូចដុះផ្សិតមកលក់តាមអនឡាញ ហើយអ្នកលក់សរសេរថា វាស័ក្តិសមសម្រាប់ការពិសោធន៍ និងអាចយកទៅប្រើប្រាស់សម្រាប់ការស្រាវជ្រាវ និងសិក្សាផ្នែកវិទ្យាសាស្ត្រ ។ ប៉ុន្តែមហាជនបារម្ភពីការរក្សាទុកក្រូចដុះផ្សិតនៅផ្ទះ អាចបង្កជាតិពុលមានគ្រោះថ្នាក់ដល់សុខភាព ដូច្នេះ ពុំគួររក្សាទុកវានៅផ្ទះទេ ។

កាលពីឆ្នាំ២០២៤ ល្បីរឿងផ្សិតដុះលើផ្លែប៉ោមរបស់ស្ត្រីម្នាក់នៅខេត្តជឺចៀង ហើយអ្នកស្រាវជ្រាវមកពីស្ថាប័នវិទ្យាសាស្ត្រចិនបានសុំទិញផ្លែប៉ោមនេះពីនាង ។ ចាប់ពីពេលនោះមក ផ្លែឈើដុះផ្សិតទាំងឡាយទទួលបានការចាប់អារម្មណ៍ និងមានការដាក់លក់តាមអនឡាញយ៉ាងច្រើន ។ មនុស្សជាង៦០០នាក់ បានលក់ផ្លែឈើដុះផ្សិតប្លែកៗតាមអនឡាញ និងមានអ្នកចាប់អារម្មណ៍សាកសួរព័ត៌មានពីផ្លែឈើ រហូតដល់ជាង២០០% ។ នេះបើតាមការលើកឡើងរបស់បុគ្គលិកកម្មវិធីលក់ផលិតផលជជុះតាមអនឡាញ ។

ប៉ុន្តែបរិមាណការទិញ-លក់មិនច្រើនប៉ុន្មានទេ វាអាចជាការលេងសើចរបស់អ្នកលេងបណ្តាញសង្គមមួយចំនួន ប៉ុន្តែយើងពុំអាចច្រានចោលនូវការលើកឡើងថា ផ្លែឈើដុះផ្សិតត្រូវបានប្រើប្រាស់សម្រាប់ការស្រាវជ្រាវ ។ ទន្ទឹមនឹងនេះ គ្មានការបញ្ជាក់ច្បាស់លាស់ពីមូលហេតុនៃការទិញ-លក់ផ្លែឈើដុះផ្សិតទេ ៕

សហនាយកប្រតិបត្តិក្រុមហ៊ុន Samsung Electronics លោក Han Jong-Hee បានទទួលមរណភាព ក្នុងអាយុ ៦៣ឆ្នាំ កាលពីថ្ងៃអង្គារ ទី២៥ ខែមីនានេះ ដោយមូលហេតុ ចង្វាក់បេះដូងលែងដំណើរការ។ នេះបើយោងតាម អ្នកនាំពាក្យរបស់ក្រុមហ៊ុនបច្ចេកវិទ្យាដ៏ធំនៅប្រទេសកូរ៉េខាងត្បូងមួយនេះ។

នេះគឺជាដំណឹងដ៏សោកសៅ និងគួរអោយសោកស្ដាយរបស់ក្រុមហ៊ុន Samsung ដោយសារតែលោក Han បានមើលការគ្រប់គ្រងទូទៅលើផ្នែកអេឡិចត្រូនិច និងឧបករណ៍ចល័តរបស់ Samsung អស់រយៈពេលជាង ៤០ឆ្នាំនៅទីនេះ។

គួជម្រាបថា លោក Han Jong-Hee បានកើតនៅក្នុងឆ្នាំ ១៩៦២ ក្រោយបញ្ចប់បរិញ្ញាបត្រ នៅអាយុ២៦ឆ្នាំ លោកបានចូលបម្រើការងារនៅក្រុមហ៊ុន Samsung កាលពីឆ្នាំ ១៩៨៨ ដែលបានន័យថា លោកបានចាប់ផ្ដើមអាជីព ផ្នែកឧបករណ៍អេឡិចត្រូនិច ជាមួយក្រុមហ៊ុន Samsung តាំងពីពេលរៀនចប់ភ្លាម រហូតដល់ទទួលមរណភាព នៅក្នុងវ័យ ៦៣ឆ្នាំ។

លោក Han ត្រូវបានក្រុមហ៊ុន Samsung ផ្ដល់ការគោរពជាខ្លាំងចំពោះគាត់ ដោយកាលពីសប្ដាហ៍មុន ក្រុមហ៊ុនបានលើកឡើងអំពីគុណបំណាច់របស់លោកថា “គាត់បានដើរតួនាទីយ៉ាងសំខាន់ ក្នុងការយកផលិតផលទូរទស្សន៍របស់Samsung ទៅកាន់ទីផ្សារកំពូលរបស់ពិភពលោកដោយលំបាក កាលពីឆ្នាំ២០០៦ ហើយអាចរក្សាតំណែងរបស់វានៅទីនោះបានតាំងពីពេលនោះមក”។

ក្រុមហ៊ុន Samsung បានបន្តសរសើលោក Han ថា៖ លោកគឺជា “ស្នូលដ៏សំខាន់” ក្នុងការដាក់ចេញទូរទស្សន៍ LED របស់ Samsung ដែលរួមជាមួយនឹងការច្នៃប្រឌិតផ្សេងៗទៀតរបស់គាត់ បានជួយដល់ក្រុមហ៊ុនយ៉ាងច្រើន ហើយគាត់ “ បានបន្តបង្ហាញពីភាពជាអ្នកដឹកនាំផ្នែកបច្ចេកវិទ្យា”៕