តើអ្នកធ្លាប់សង្កេតដែរឬទេ? នៅពេលមានគ្រោះធម្មជាតិកើតឡើងដូចជារញ្ជួយដី បន្ទុះភ្នំភ្លើង និងខ្យល់ព្យុះ គឺតែងតែមានសត្វចម្លែកៗផុសចេញពីសមុទ្រ ឬស្លា.ប់អណ្តែតលើសមុទ្រ។ ហើយពេលខ្លះទៀតក៏មានសត្វស្លាបជាច្រើនប្រមូលផ្តុំគ្នាហោះហើរពេញផ្ទៃមេឃ ដើម្បីរត់ចេញពីតំបន់ទាំងនោះផងដែរ។

នេះជាប្រថ្នូរឱ្យមនុស្សយើងដឹងថានឹងមានគ្រោះមហន្តរាយកើតឡើងនាពេលខាងមុខ។ ដូច្នេះហើយតើអ្នកដឹងទេថា ហេតុអ្វីបានជាសត្វតែងតែដឹងមុនរហូតបែបនេះ តើពួកវាមានសមត្ថភាពពិេសសឬយ៉ាងណា? យោងតាមគេហទំព័របរទេស IFL Science សត្វពិតជាមានសមត្ថភាពពិសេសមែន ដោយវាអាចមានអារម្មណ៍រសើបជាងយើងទៅទៀត ទោះបីវាមិនមានញ្ញាណទី ៦ ដូចមនុស្សយើងក៏ដោយ។

តាមពិតទៅ មនុស្សក៏អាចមានសមត្ថភាពទាំងនេះដែរ ប៉ុន្តែនៅពេលដែលយើងចាប់ផ្តើមពឹងផ្អែកលើបច្ចេកវិទ្យាកាន់តែច្រើន សមត្ថភាពធម្មជាតិរបស់យើងក៏អាចថយចុះតាមហ្នឹងផងដែរ។ លើសពីនេះ សត្វមួយចំនួនមានរចនាសម្ព័ន្ធរាងកាយដែលត្រូវបានរចនាឡើងដើម្បីដឹងពីការផ្លាស់ប្តូរនៅក្នុងបរិយាកាសរបស់វាប្រសើរជាងយើង។

ហេតុនេះប្រសិនបើអ្នកឃើញសត្វចិញ្ចឹមរបស់អ្នកចាប់ផ្តើមបង្ហាញអាកប្បកិរិយាចម្លែកៗ ដូចជាការរត់ចេញ ការស្រែកយំ ឬធ្វើឱ្យមានសំឡេងប្លែកៗ កុំគិតថាវាគ្រាន់តែជារឿងធម្មតាឱ្យសោះ ប្រហែលជាវាកំពុងព្យាយាមប្រាប់អ្នកថានឹងមានអ្វីខុសប្រក្រតីហើយ។

ជាក់ស្តែងមុនពេលព្យុះ ឬព្យុះទីហ្វុងធំកើតឡើង សម្ពាធខ្យល់ប្រែប្រួលភ្លាមៗ ហើយវានឹងមានសំឡេងប្រេកង់ទាប (Infrasound) ដែលមនុស្សមិនអាចស្តាប់បាន ប៉ុន្តែសត្វដូចជាសត្វស្លាប ឬសត្វសមុទ្រគឺវាអាចដឹងអ្វីៗមុនយើង នេះជាមូលហេតុដែលសត្វស្លាប ឬសត្វសមុទ្រ តែងតែបង្ហាញខ្លួន ដូចជាស្លា.ប់អណ្តែតលើសមុទ្រ ឬហើរចេញឱ្យឆ្ងាយពីតំបន់មួយមុនពេលព្យុះបោកបក់៕

ប្រទេសចិន ៖ បញ្ហាធំរបស់រថយន្តអគ្គិសនីដែលមនុស្សភាគច្រើនបារម្ភ គឺចម្ងាយផ្លូវបើកបរ និងរយៈពេលសាករថយន្តយូរជាងការចាក់ប្រេងឥន្ធនៈ ប៉ុន្តែយើងនឹងលែងបារម្ភពីបញ្ហានេះទៀតហើយ ពីព្រោះក្រុមហ៊ុនផលិតរថយន្តអគ្គិសនីចិន BYD បង្ហាញប្រព័ន្ធសាកថ្មរថយន្តថ្មីចំណាយពេលត្រឹមតែ៥នាទីប៉ុណ្ណោះ ប៉ុន្តែអាចបើកបរបានឆ្ងាយរហូតដល់៤០០គីឡូម៉ែត្រ ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី២៤ ខែមីនា ឆ្នាំ២០២៥ ។

បច្ចេកវិទ្យាសាករថយន្តអគ្គិសនីនេះឈ្មោះ «Super e Platform» ហើយក្រុមហ៊ុន BYD បញ្ជាក់ថា បច្ចេកវិទ្យានេះឆាប់រហ័សជាង Supercharger របស់ក្រុមហ៊ុន Tesla រហូតដល់៣ដងឯណោះ ។ ដូច្នេះ វាធ្វើឱ្យការចំណាយពេលសាករថយន្តអគ្គិសនី ប្រហាក់ប្រហែលគ្នានឹងការចាក់ប្រេងឥន្ធនៈ ។ បច្ចេកវិទ្យាថ្មីរបស់ BYD អាចសាករថយន្តអគ្គិសនីពេញយ៉ាងឆាប់រហ័សជាមួយល្បឿនលឿនបំផុតរហូតដល់១មេហ្គាវ៉ាត់ ដែលជួយឱ្យម្ចាស់រថយន្តឈប់បារម្ភពីការចំណាយពេលយូរក្នុងការសាករថយន្ត ។

ជំហ៊ានដំបូង បច្ចេកវិទ្យាថ្មី Super e Platform នឹងត្រូវប្រើប្រាស់ជាមួយរថយន្តថ្មីរបស់ BYD ដូចជា ៖ រថយន្តម៉ាក Han L និង Tang L ដែលក្រុមហ៊ុនមានគ្រោងលក់នៅចិនមុនគេ ។ ក្រៅពីនេះ ក្រុមហ៊ុនក៏មានគម្រោងដំឡើងស្ថានីយសាករថយន្តអគ្គិសនីចំណាយពេលខ្លី ស្មើជាង៤,០០០កន្លែងនៅចិន ប៉ុន្តែពុំទាន់កំណត់ពេលច្បាស់លាស់ថា តើនឹងដំឡើងរួចរាល់នៅពេលណា ។

ចំណែកបណ្តាប្រទេសនៅអាស៊ីអាគ្នេយ៍ត្រូវរង់ចាំមើលថា តើក្រុមហ៊ុន BYD នឹងដំឡើងស្ថានីយសាករថយន្តអគ្គិសនីចំណាយពេលឆាប់រហ័សដែរឬទេ ពីព្រោះការសាករថយន្តត្រឹមតែ៥នាទី ដោយប្រើប្រាស់បច្ចេកវិទ្យា Super a Platform គឺត្រូវសាកជាមួយរថយន្ត BYD ថ្មី ។

គួរបញ្ជាក់ថា ព័ត៌មានការដំឡើងស្ថានីយសាករថយន្តអគ្គិសនីលឿនបំផុតរបស់ក្រុមហ៊ុន BYD បានធ្វើឱ្យភាគហ៊ុនរបស់ក្រុមហ៊ុន Tesla ដែលជាគូប្រជែងក្នុងទីផ្សាររថយន្តអគ្គិសនីធ្លាក់ចុះភ្លាមៗ ។ នេះឆ្លុះបញ្ចាំងពីការបារម្ភរបស់វិនិយោគិនលើបច្ចេកវិទ្យាជឿនលឿនរបស់រថយន្ត Tesla ។

ទោះជា Tesla នៅតែគ្រប់គ្រងតំណែងជាក្រុមហ៊ុនលក់រថយន្តអគ្គិសនីច្រើនជាងគេលើទីផ្សារ ប៉ុន្តែការលក់រថយន្តអគ្គិសនី BYD បានតាមប្រកិត Tesla ។ កាលពីឆ្នាំ២០២៤ BYD បានលក់រថយន្តអគ្គិសនី ចំនួន១លាន៧សែន៦ម៉ឺនគ្រឿង ខណៈការលក់រថយន្តអគ្គិសនី Tesla ស្មើនឹង១លាន៧សែន៩ម៉ឺនគ្រឿង ។ ការលក់រថយន្តអគ្គិសនី BYD ជាង៩០% គឺលក់នៅចិន ហើយរថយន្តលក់ដាច់ច្រើនជាងគេ គឺម៉ាក Hybrid ។

ចំណែក Tesla បានលក់រថយន្តអគ្គិសនីកើនឡើងនៅទីផ្សារមួយចំនួន ប៉ុន្តែក្រុមហ៊ុននេះត្រូវប្រឈមនឹងការប្រកួតប្រជែងពីរថយន្តអគ្គិសនីផ្សេងទៀតក្នុងទីផ្សាររថយន្តអគ្គិសនីទូទាំងពិភពលោក ។ នាថ្ងៃអនាគត បើយើងអាចសាករថយន្តអគ្គិសនីដោយចំណាយពេលប្រហាក់ប្រហែលនឹងការចាក់ប្រេងឥន្ធនៈ វានឹងធ្វើឱ្យរថយន្តអគ្គិសនីទទួលបានការពេញនិយមកាន់តែខ្លាំង ៕

បច្ចុប្បន្ននេះរថយន្តអគ្គិសនីគឺមានការពេញនិយមខ្លាំងណាស់ ដោយសារវាមិនប៉ះពាល់ដល់បរិស្ថាន ដូចជារថយន្តប្រើឥន្ធនៈឡើយ ហើយវាក៏ចំណាយតិចលើការបញ្ចូលថាមពលថ្មជាងការចាក់ប្រេងឥន្ធនៈផងដែរ។

ក្រៅពីអត្ថប្រយោជន៍ទាំងនេះ រថយន្តអគ្គិសនីក៏ផ្តល់អត្ថប្រយោជន៍ជាច្រើនទៀតផងដែរដូចជា៖

១.ជួយដល់បរិស្ថានលើភពផែនដី៖ រថយន្តអគ្គិសនីជារថយន្តមួយប្រភេទ ដែលមិនប៉ះពាល់ទៅដល់បរិស្ថាននោះទេ ព្រោះថាវាមិនមានបញ្ចេញជាផ្សែងពុលផ្សេងៗ មកកាន់បរិយាសកាសឡើយ។ ហេតុនេះហើយទើបរថយន្តអគ្គិសនីកាន់តែរីកដុះដាលឡើង ដោយវានឹងជួយកាត់បន្ថយខ្យល់មិនល្អចេញពីផែនដីយើងបានមួយផ្នែកធំ។

២.ល្អសម្រាប់ការបើកបរ៖ រថយន្តអគ្គិសនីសព្វថ្ងៃនេះត្រូវបានក្រុមហ៊ុនផលិតយកចិត្តទុកដាក់ខ្ពស់មែនទែន ជាក់ស្ដែងដូចជារថយន្តអគ្គិសនីរបស់ Tesla និង Porsche ជាដើម ដោយគេអាចផលិតវាឱ្យមានល្បឿនស្ទុះឡើងបានរហ័សជាងរថយន្តប្រើឥន្ធនៈធម្មតាទៅទៀត។ មិនត្រឹមតែប៉ុណ្ណឹងទេ រថយន្តអគ្គិសនីក៏ត្រូវបានគេរកឃើញថា មានលំនឹងល្អជាងរថយន្តទូទៅ ដោយសារតែវាមានផ្ទុកថ្មជាច្រើននៅផ្ទៃបាតខាងក្រោមរថយន្ត ដូច្នេះវាមិនត្រឹមតែជួយឱ្យរថយន្តនឹងល្អទេ តែវាក៏ជួយឱ្យការបើកបរមានផាសុខភាព ព្រមទាំងមានសុវត្ថិភាពផងដែរ។

៣.ចំណាយតិច៖ ប្រាកដណាស់ថា អគ្គិសនីគឺចំណាយតិចជាងការប្រើប្រាស់ប្រេងឥន្ធនៈ ហើយអគ្គិសនីក៏មានតម្លៃថេរល្អជាងប្រេងឥន្ធនៈដែរ ដែលនេះជាចំណុចទូទៅមួយហើយសម្រាប់រថយន្តអគ្គិសនី។ ប៉ុន្តែអ្វីដែលសំខាន់ទាក់ទងនឹងចំណាយតិចទៀតនោះ គឺថាការថែទាំ និងការជួសជុលតែម្ដង ព្រោះគ្រឿងក្នុងរបស់រថយន្តអគ្គិសនី មានមិនច្រើនដូចរថយន្តប្រើឥន្ធនៈនោះទេ ដូច្នេះចំណុចដែលអាចខូច និងត្រូវផ្លាស់ប្តូរចេញ គឺមានតិចបំផុត ឧទាហរណ៍ជាក់ស្ដែងដូចជាទៅលើប្រេងម៉ាស៊ីនជាដើម ដោយរថយន្តឥន្ធនៈធម្មតា ត្រូវការផ្លាស់ប្តូរជាប្រចាំ ខណៈរថយន្តអគ្គិសនី មិនត្រូវការប្រេងម៉ាស៊ីននោះទេ។

៤.គ្មានសម្លេងរំខាន៖ រថយន្តអគ្គិសនីមិនមានម៉ាស៊ីនទេ ដូច្នេះវាមិនមានសម្លេងរំខានចេញមកឡើយ ជាក់ស្ដែងទោះជាកំពុងបើកបរក៏ដោយ សម្លេងម៉ូទ័ររបស់វាគឺបញ្ចេញមកស្ងាត់ល្អបំផុត មិនដល់ថ្នាក់រំខានដូចរថយន្តប្រើឥន្ធនៈនោះទេ។ ក្រៅពីនេះ រថយន្តអគ្គិសនីនៅមានចំណុចពិសេសមួយចំនួនទៀត ជាក់ស្ដែងសម្រាប់ទីផ្សារធំៗដូចជាសហដ្ឋអាមេរិកជាដើមនោះ ទីផ្សារនៃការលក់រថយន្តអគ្គិសនីមួយទឹកៗ គឺទទួលបានតម្លៃខ្ពស់ជាង បើធៀបនឹងទីផ្សារតម្លៃរថយន្តប្រើឥន្ធនៈមួយទឹកៗដូចគ្នា ដូច្នេះមានន័យថា អ្នកដែលទិញរថយន្តអគ្គិសនីហើយចង់លក់វិញ គេអាចនឹងទទួលបានតម្លៃល្អជាង៕

Atlantis The Royal គឺជាសណ្ឋាគារលំដាប់ជាន់ខ្ពស់ដ៏ល្អប្រណីតនៅមជ្ឈិមបូព៌ា ដែលសម្ភារៈនៅទីនោះដូចជា ក្រាស់សិតសក់ ច្រាសដុសធ្មេញ ឡាម និងរបស់របរផ្សេងទៀតសុទ្ធតែស្រោបដោយមាសទាំងអស់។
សណ្ឋាគារនេះបានបើកដំណើរការដំបូងនៅឆ្នាំ ២០២៣ បើគិតមកដល់បច្ចុប្បន្នគឺមានរយៈពេលពីរឆ្នាំហើយ។ យោងតាម CNN សព្វថ្ងៃសណ្ឋាគារនេះគឺស្ថិតក្នុងបញ្ជីសណ្ឋាគារល្អបំផុតទាំង ៥០ របស់ពិភពលោក។

សណ្ឋាគារ Atlantis The Royal មានគ្រឿងបរិក្ខារដែលស្រោបដោយមាសក្នុងបន្ទប់ចំនួន ៧៥៩ និងមានបន្ទប់ស្ប៉ាដ៏ធំមួយទំហំ ៣,០០០ ម៉ែត្រការ៉េ ផ្តល់ជូននូវការតុបតែងមុខមាស និងការម៉ាស្សាមាសជាមួយនឹងថ្មភ្នំភ្លើងដែលជ្រលក់ពណ៌មាស និងប្រេងក្រអូបដែលធ្វើពីមាស ដើម្បីព្យាបាលភ្ញៀវ។ លើសពីនេះសណ្ឋាគារក៏មានអាងហែលទឹកចំនួន ៩០ ដែលផ្តល់ឱ្យអ្នកទស្សនានូវទិដ្ឋភាពដ៏ធំទូលាយនៃតំបន់ Palm Island ដ៏ល្បីល្បាញ។

នៅជាន់ទី ២២ ក៏ជាអាផាតមិន VIP ដែលធ្លាប់ជួលដោយកំពូលតារាម៉ូដែល Kendall Jenner ដើម្បីរៀបចំពិធីជប់លៀងសម្ពោធម៉ាកយីហោផ្ទាល់ខ្លួនរបស់នាង ជាមួយនឹងអាងហែលទឹកដ៏ប្រណីត កន្លែងអង្គុយពីរ និងអាងងូតទឹកក្រោមកញ្ចក់។ នៅក្នុងវីឡា និងបន្ទប់ស្ទីលដ៏ល្បីរបស់រមណីយដ្ឋាន ភ្ញៀវក៏អាចរីករាយជាមួយអាងហែលទឹករាបស្មើឯកជនរហូតដល់ជាន់ទី ៤៣ ផងដែរ។

អ្នកតំណាងសណ្ឋាគារបាននិយាយថា រមណីយដ្ឋានភាគច្រើនតែងតែត្រូវបានសាងសង់ដោយផ្ដេក ខណៈដែល Atlantis ត្រូវបានសាងសង់បញ្ឈរ ដោយបង្កើតនូវលក្ខណៈពិសេសមួយ ដែលភ្ញៀវទេសចរអាចរីករាយនឹងទិដ្ឋភាពដ៏ធំទូលាយនៃកោះ Co និងផ្ទៃមេឃនៃកោះឌូបៃ។ ទន្ទឹមនឹងនេះសណ្ឋាគារក៏មានអាងចិញ្ចឹមត្រីបញ្ឈរពីជាន់ទៅពិដានចំនួន ៣ ដែលពោរពេញទៅដោយជីវិតសត្វសមុទ្រចំនួន ៧,២០០ ប្រភេទ។

អ្វីដែលកាន់តែពិសេសនោះភ្ញៀវក៏នឹងទទួលបានការដឹកជញ្ជូនតាមអាកាសយានដ្ឋានដោយឥតគិតថ្លៃ ហើយផលិតផលពីម៉ាក Graff និង Valentino ក៏នឹងត្រូវបាននាំយកមកក្នុងបន្ទប់សម្រាប់ភ្ញៀវដើម្បីទទួលបានបទពិសោធន៍ទិញទំនិញឯកជនផងដែរ។ មេចុងភៅល្បីឈ្មោះមកពីភោជនីយដ្ឋានរបស់សណ្ឋាគារនឹងធ្វើម្ហូបសម្រាប់ភ្ញៀវនៅក្នុងផ្ទះបាយឯកជន ដោយមានសេវាកម្មមេចុងភៅ និងអ្នកក្រឡុកស្រាតែងតែត្រៀមខ្លួនធ្វើតាមរាល់សំណើរបស់ភ្ញៀវ ២៤/៧ ទៀតផង៕

បើនិយាយអំពីមេដឹកនាំប្រទេសនីមួយៗ យើងតែងសង្កេតឃើញថាពួកគាត់គឺជាមនុស្សជាមនុស្សដែលម៉ឺងម៉ាត់ ហ្មត់ចត់ ជាពិសេសគឺមេដឹកនាំរបស់ប្រទេសកំពូលដូចជាមហាអំណាចជាដើម។ តាមពិត នៅពីក្រោយការដឹកនាំ ពួកគាត់ក៏ជាមនុស្សទន់ភ្លន់ ដែលមានក្ដីស្រលាញ់ ជាពិសេសនោះមានមេដឹកនាំខ្លះស្រលាញ់សត្វឆ្កែរបស់គាត់លើសពីសត្វចិញ្ចឹមទៅទៀត ពោលគឺប្រៀបដូចជាសមាជិកគ្រួសារអញ្ចឹង។ តើមេដឹកនាំប្រទេសណាខ្លះដែលស្រលាញ់សត្វឆ្កែខ្លាំងនោះ?

៥. លោក Moon Jae In៖ អតីតប្រធានាធិបតីប្រទេសកូរ៉េខាងត្បូងរូបនេះ បានទទួលចិញ្ចឹមសត្វឆ្កែមួយក្បាល ដែលត្រូវបានគេបោះបង់ចោល និងផ្ដល់ជីវិតដែលល្អបំផុតអោយវា ព្រមទាំងដាក់ឈ្មោះអោយវាថា Tori ។ លោកក៏ធ្លាប់ទទួលបានកាដូរជាសត្វឆ្កែ ពីមេដឹកនាំកូរ៉េខាងជើង គីម ជុងអ៊ុនផងដែរ។ ក្នុងអាណត្តិនៃការដឹកនាំរបស់លោក លោកបានផ្សព្វផ្សាយពីការថែរក្សាសុកមាលភាពសត្វ និងព្យាយាមលុបបំបាត់ការជួញដូរសាច់ឆ្កែ។

៤. លោក Emmanuel Macron ៖ ជាប្រធានាធិបតី របស់ប្រទេសបារាំង។ លោក និងភរិយាជាមនុស្សដែលស្រលាញ់សត្វឆ្កែដូចគ្នា ដូចនេះកាលពីឆ្នាំ២០១៧ នាក់ទាំង២ បានយកឆ្កែមួយពីមជ្ឈមណ្ឌលថែទាំសត្វអនាថា និងដាក់ឈ្មោះអោយវាថា Nemo។ លោកបានជម្រុញអោយមានការការពារសិទ្ធិសត្វ ហាមឃាត់ការលក់ដូរសត្វឆ្កែ និងសត្វឆ្មានៅក្នុងប្រទេសបារាំង ហើយសម្រាប់នរណាម្នាក់ដែលចង់ចិញ្ចឹមសត្វទាំងនេះ គឺត្រូវទៅទទួលចិញ្ចឹមពីមជ្ឍមណ្ឌលជួយសង្រ្គោះសត្វអនាថា។

៣. ម្ចាស់ក្សត្រី Elizabeth II ៖ ពេញមួយជីវិតរបស់គាត់ គាត់ចិញ្ចឹមឆ្កែ ដែលសរុបមានប្រហែលជាង ៣០ក្បាល។ ជីវិតឆ្កែនីមួយៗ របស់ម្ចាស់ក្សត្រី គឺប្រើជីវិតមានលក្ខណៈបែបជាខ្សែររាជវង្ស ដោយអោយពួកវារស់នៅក្នុងភូមិគ្រឹះ មានចុងភៅផ្ទាល់ខ្លួន និងអាចធ្វើដំណើរជុំវិញពិភពលោកបានជាមួយទ្រង់។

២. លោក Barack Obama ៖ អតីតប្រធានាធិបតីទី៤៤ របស់សហរដ្ឋអាមេរិករូបនេះ មានឆ្កែចំនួន២ក្បាល ដែលមានឈ្មោះថា Bo និង Sunny។ នៅឆ្នាំ ២០០៩ Bo បានក្លាយជាឆ្កែដំបូង (The First Dog) ដែលបានរស់នៅ និងចេញចូលសេតវិមានដោយសេរី។ Bo និង Sunny តែងតែចូលរួមក្នុងកម្មវិធីសប្បុរសធម៌ផ្សេងៗ ហើយបានក្លាយជាសត្វចិញ្ចឹមដែលល្បីល្បាញនៅក្នុងប្រវត្តិសាស្រ្តអាមេរិក។

១. លោក Vladimir Putin៖ ប្រធានាធិបតីរបស់មហាអំណាចរុស្ស៊ីរូបនេះ ជាមនុស្សដែលស្រលាញ់សត្វឆ្កែណាស់។ លោកតែងបង្ហាញក្ដីស្រលាញ់របស់គាត់ តាមរយៈការចំណាយពេលវេលាលេងជាមួយពួកវា អនុញ្ញាតអោយចូលក្នុងកិច្ចប្រជុំ និងសមយុទ្ធយោធាមួយចំនួន ។ ក្រៅពីនេះ គាត់តែងលើកកម្ពស់សិទ្ធិសត្វ និងការពារសត្វអនាថាផងដែរ៕

ប្រទេសថៃ ៖ គណៈកម្មការគ្រប់គ្រងមូលនិធិប្រេងឥន្ធនៈប្រទេសថៃបានកាត់បន្ថយអត្រាមូលនិធិប្រេងឥន្ធនៈ ដើម្បីឱ្យតម្លៃលក់រាយប្រេងសាំង និងប្រេងម៉ាស៊ូត ធ្លាក់ចុះ១បាតក្នុង១លីត្រ (ឬធ្លាក់ចុះ១០០រៀលក្នុង១លីត្រ) ចាប់ថ្ងៃទី២៨ ខែមីនា ឆ្នាំ២០២៥ តទៅ ។ ការបញ្ចុះតម្លៃប្រេងឥន្ធនៈនឹងជួយសម្រាលបន្ទុកការចំណាយរបស់ពលរដ្ឋដែលធ្វើដំណើរទៅតាមបណ្តាខេត្ត និងដើរកម្សាន្តក្នុងថ្ងៃចូលឆ្នាំថ្មីខាងមុខ ស្របពេលតម្លៃប្រេងឥន្ធនៈលើពិភពលោកធ្លាក់ចុះ ។

កាលពីថ្ងៃទី២៤ ខែមីនា ឆ្នាំ២០២៥ លោក Phiraphan Salirathaviphak ឧបនាយករដ្ឋមន្ត្រី និងរដ្ឋមន្ត្រីក្រសួងថាមពល ក្នុងឋានៈជាប្រធានគណៈកម្មការគ្រប់គ្រងមូលនិធិប្រេងឥន្ធនៈ និយាយថា គណៈកម្មការបានប្រជុំកំណត់គោលការណ៍គ្រប់គ្រងតម្លៃលក់រាយប្រេងឥន្ធនៈនៅថៃឱ្យធ្លាក់ចុះ ខណៈតម្លៃប្រេងឥន្ធនៈលើពិភពលោកធ្លាក់ចុះ ។

កិច្ចប្រជុំបានសម្រេចអនុម័តកែសម្រួលអត្រាមូលនិធិប្រេងឥន្ធនៈសម្រាប់ប្រេងសាំង និងប្រេងម៉ាស៊ូត ដែលធ្វើឱ្យការលក់រាយប្រេងធ្លាក់ចុះ១បាតក្នុង១លីត្រ ដើម្បីជួយកាត់បន្ថយការចំណាយរបស់ពលរដ្ឋ ។ ការបញ្ចុះតម្លៃប្រេងឥន្ធនៈនឹងធ្វើឡើងជា២ដំណាក់កាល រួមមាន ៖ ដំណាក់កាលទី១ នឹងបញ្ចុះចំនួន៥០រៀលក្នុង១លីត្រ ចាប់ពីថ្ងៃទី២៨ ខែមីនា និងដំណាក់កាលទី២ នឹងបញ្ចុះចំនួន៥០រៀលទៀតក្នុង១លីត្រ ចាប់ពីថ្ងៃទី៤ ខែមេសា ។

ការបញ្ចុះតម្លៃប្រេងឥន្ធនៈនេះ គឺជារង្វាន់សម្រាប់ពលរដ្ឋធ្វើដំណើរទៅតាមបណ្តាខេត្ត និងដើរកម្សាន្តក្នុងថ្ងៃចូលឆ្នាំថ្មីខាងមុខ ដោយសារចូលឆ្នាំថ្មីនឹងមានការធ្វើដំណើរច្រើន ជាពិសេស រថយន្តចាក់ប្រេង ។ វាជាការជួយសម្រាលបន្ទុកចំណាយរបស់ពលរដ្ឋ ដើម្បីឱ្យពួកគេអាចធ្វើដំណើរទៅស្រុកកំណើតជួបជុំគ្រួសារ និងដើរកម្សាន្តក្នុងប្រទេសពេលចូលឆ្នាំ ។

សូមពលរដ្ឋមានទំនុកចិត្តថា គណៈកម្មការគ្រប់គ្រងមូលនិធិប្រេងឥន្ធនៈនឹងរក្សាតម្លៃប្រេងឥន្ធនៈឱ្យសមរម្យសម្រាប់ពលរដ្ឋ ពីព្រោះយើងធ្វើការនៅក្រោមគោលការណ៍ «បើកចំហ, តម្លាភាព និងអាចត្រួតពិនិត្យបាន» សម្រាប់ជាប្រយោជន៍ដល់ពលរដ្ឋ និងគ្រប់វិស័យ ។ នេះបើតាមការលើកឡើងរបស់លោក Phiraphan ។

គួរបញ្ជាក់ថា ប្រទេសថៃតែងតែបញ្ចុះតម្លៃប្រេងឥន្ធនៈជាបន្តបន្ទាប់ ជាពិសេស ក្នុងថ្ងៃបុណ្យទានធំៗ ដើម្បីជួយសម្រាលបន្ទុកការចំណាយរបស់ពលរដ្ឋ ដែលត្រូវធ្វើដំណើរទៅស្រុកកំណើត ។ វាក៏ជាការជួយជំរុញសេដ្ឋកិច្ចថៃផងដែរ ដើម្បីឱ្យពលរដ្ឋធ្វើដំណើរទៅបណ្តាខេត្តកាន់តែច្រើន ហើយចំណាយប្រាក់ទិញចំណីអាហារ និងទំនិញតាមផ្លូវ ។ ជំហ៊ានបន្ទាប់ ក្រសួងថាមពលនឹងទប់ស្កាត់តម្លៃហ្គាសកុំឱ្យឡើងថ្លៃ គឺធុងហ្គាសទម្ងន់១៥គីឡូក្រាម នឹងរក្សាតម្លៃត្រឹមតែ៤២៣បាត (ឬប្រមាណ៤ម៉ឺន៨ពាន់រៀល) ៕

ប្រទេសចិន ៖ កាលពីថ្ងៃទី២៤ ខែមីនា ឆ្នាំ២០២៥ សារព័ត៌មានបរទេសរាយការណ៍ថា រដ្ឋាភិបាលចិនបានហាមពលរដ្ឋបង្ហោះអួ.តទ្រព្យសម្បត្តិហូរហៀរក្នុងបណ្តាញសង្គម និងបិទគណនី Influencer ជាង៤ពាន់នាក់ ដោយសារបង្ហាញពីទ្រព្យសម្បត្តិ និងការរស់នៅហ៊ឺហារលើគំនរមាសប្រាក់ក្នុងបណ្តាញសង្គម ។ ការហាមឃាត់ពលរដ្ឋរបស់រដ្ឋាភិបាលចិន គឺក្នុងគោលបំណងកាត់បន្ថយគម្លាតសង្គម និងគម្លាតប្រាក់ចំណូលពលរដ្ឋ ។

សារព័ត៌មាន South China Morning រាយការណ៍ថា កន្លងមក រដ្ឋាភិបាលចិនបានបិទគណនី Influencer ឬបុគ្គលល្បីល្បាញក្នុងបណ្តាញសង្គមចំ នួន៣នាក់ ដែលមានអ្នកតាមដានរាប់លាននាក់ ពីព្រោះគណនីទាំងនេះតែងតែបង្កើតមាតិកាអួតទ្រព្យសម្បត្តិសម្បូរបែបរបស់ខ្លួន ។ Influencer ទាំងនេះថែមទាំងបង្ហោះពីជីវិតស៊ីវិល័យ ហ៊ឺហារក្នុងបណ្តាញសង្គម ដូចជា ៖ Weibo, Tencent, Douyin និង Xiaohongshu ។

ការបង្ហោះពីទ្រព្យសម្បត្តិ លុយកាក់ និងមាសប្រាក់ ដើម្បីក្លាយជាតារាល្បី ឬអយដលក្នុងបណ្តាញសង្គមនឹងត្រូវបញ្ចប់ ក្រោយពីរដ្ឋាភិបាលចិនបញ្ជាឱ្យបិទបណ្តាញសង្គមទាំងអស់របស់ Influencer ទាំង៣រូប ព្រមទាំងហាមឃាត់ការប្រើប្រាស់បណ្តាញសង្គម ។ លើសពីនេះ គណនីបណ្តាញសង្គមរបស់ Influencer ចិនជាច្រើននាក់ទៀតត្រូវបានបិទចោលទាំងអស់ ដោយសារពួកគេបង្ហោះរូបភាពពីជីវិតរស់នៅលើគំនរមាសប្រាក់ ។

រដ្ឋាភិបាលចិនបានចេញវិធានការគ្រប់គ្រងការបង្ហោះទ្រព្យសម្បត្តិក្នុងបណ្តាញសង្គម គឺក្នុងគោលបំណងកាត់បន្ថយគម្លាតសង្គម និងគម្លាតប្រាក់ចំណូល ។ វិធានការនេះពុំបានបញ្ជាក់ថា «ហាមពលរដ្ឋអួតទ្រព្យសម្បត្តិ» ទេ ប៉ុន្តែវាជាការគ្រប់គ្រងយ៉ាងតឹងរ៉ឹងលើការបង្ហោះខ្លឹមសារពុំសមរម្យក្នុងបណ្តាញសង្គមនានា ដូចជា ៖ Weibo, Douyin និង Xiaohongshu ។

បច្ចុប្បន្ន រដ្ឋាភិបាលចិនបានលុបចោលការបង្ហោះអួតទ្រព្យសម្បត្តិ និងបង្ហោះខ្លឹមសារពុំសមរម្យ រហូតដល់ជាង៦ម៉ឺនមាតិកា, បិទការផ្សាយផ្ទាល់ ១,១៧៤លើក និងបិទគណនី Influencer ជាង៤ពាន់នាក់ ។ រីឯកម្មវិធី Weibo បានលុបចោលការបង្ហោះខ្លឹមសារពុំសមរម្យ រហូតដល់ជាង១,១០០មាតិកា ខណៈកម្មវិធី Douyin និង Xiaohongshu ក៏បានលុបចោលការបង្ហោះខ្លឹមសារពុំសមរម្យជាច្រើន និងលុបគណនីអ្នកប្រើប្រាស់ផងដែរ ៕

ប្រទេសថៃ ៖ កាលពីថ្ងៃទី២១ ខែមីនា ឆ្នាំ២០២៥ សារព័ត៌មានថៃរាយការណ៍ថា នាយកដ្ឋានពន្ធដារប្រទេសថៃបារម្ភពីក្រុមយុវជនដែលប្រកបមុខរបរជា Influencer និងលក់ផលិតផលអនឡាញ ប្រឈមមុខនឹងការផាកពិន័យខ្ពស់ពីរដ្ឋ ដោយសារតាមការពិនិត្យមើលឯកសារការបង់ពន្ធឃើញថា ក្រុមយុវជនជាច្រើននាក់ដែលទទួលបានប្រាក់ចំណូលខ្ពស់ស្របតាមការកំណត់ ប៉ុន្តែពុំព្រមបង់ពន្ធប្រាក់ចំណូលជូនរដ្ឋ ។

នាយកដ្ឋានពន្ធដារថៃបានកំណត់ឱ្យពលរដ្ឋដែលទទួលបានប្រាក់ចំណូលពីការប្រកបមុខរបរទាំងអស់ ត្រូវមកបង់ពន្ធប្រាក់ចំណូលជូនរដ្ឋ ចាប់ពីថ្ងៃទី២១ ខែមីនា រហូតដល់ថ្ងៃទី៣១ ខែមីនា ឆ្នាំ២០២៥ ប៉ុន្តែបើពលរដ្ឋបង់ពន្ធប្រាក់ចំណូលតាមអនឡាញ គឺអាចបង់រហូតដល់ថ្ងៃទី៨ ខែមេសា ឆ្នាំ២០២៥ ។

លោក ពីនសាយ ស៊ូរ៉ាត់សាវ៉ាឌី ប្រធាននាយកដ្ឋានពន្ធដារនិយាយថា បច្ចុប្បន្ន ការប្រមូលពន្ធប្រាក់ចំណូលពីពលរដ្ឋធម្មតា គឺជាប្រាក់ចំណូលលំដាប់ទី៣ របស់នាយកដ្ឋានពន្ធដារ ។ នាយកដ្ឋានពន្ធដារបានប្រមូលពន្ធប្រាក់ចំណូលពលរដ្ឋ ស្មើប្រមាណ៤សែនលានបាតក្នុង១ឆ្នាំ ហើយនៅឆ្នាំ២០២៥ នាយកដ្ឋានពន្ធដារបានប្រមូលពន្ធប្រាក់ចំណូលពលរដ្ឋ ជិត៣ខែហើយ ។

តាមទិន្នន័យគិតត្រឹមថ្ងៃទី១៣ ខែមីនា ឆ្នាំ២០២៥ ពលរដ្ឋថៃបានបង់ពន្ធប្រាក់ចំណូល ស្មើនឹង៧លាន៤សែនបាត និងខ្ពស់ជាងឆ្នាំ២០២៤ ១៣% ដែលស្មើត្រឹមតែ៣លាន៥សែនបាត ។ បច្ចុប្បន្ន នាយកដ្ឋានពន្ធដារបានទទួលការបង់ពន្ធប្រាក់ចំណូលពលរដ្ឋ ស្មើនឹង៨២% ហើយពលរដ្ឋ១៨% ទៀត ពុំទាន់បង់ពន្ធប្រាក់ចំណូល ដោយសារមានបញ្ហាឯកសារ ព្រោះពួកគេមានប្រាក់ចំណូលផ្សេងទៀតក្រៅពីការងារ ។ នាយកដ្ឋានពន្ធដារសង្ឃឹមថា ពលរដ្ឋនឹងមកបង់ពន្ធប្រាក់ចំណូលបន្តទៀត ។

លោក ពីនសាយ បន្តថា ពលរដ្ឋជាអ្នកធ្វើការបានបង់ពន្ធប្រាក់ចំណូលរបស់ខ្លួនធម្មតា និងគ្មានអ្វីគួរឱ្យបារម្ភទេ ប៉ុន្តែអ្វីគួរឱ្យបារម្ភ គឺក្រុមយុវជនដែលមានប្រាក់ចំណូលខ្ពស់ស្របតាមការកំណត់ ពុំបង់ពន្ធជូនរដ្ឋ ។ តាមទិន្នន័យកាលពី៣ឆ្នាំកន្លងមក បង្ហាញថា ពលរដ្ឋពុំបង់ពន្ធប្រាក់ចំណូល គឺជាក្រុមយុវជនដែលធ្វើការពាក់ព័ន្ធនឹងឌីជីថល ដូចជា ៖ អ្នកលក់ផលិតផលអនឡាញ និង Influencer ។ ហេតុនេះ មន្ត្រីនាយកដ្ឋានពន្ធដារបានពិភាក្សាគ្នាផ្តល់ភាពសំខាន់លើការបង់ពន្ធប្រាក់ចំណូលរបស់ក្រុមយុវជន ។

តាមការពិនិត្យមើលក្នុងបណ្តាញសង្គម គឺយុវជនថៃជាច្រើនបានប្រកបមុខរបរជា Influencer និងលក់ផលិតផលអនឡាញ ហើយលោក ពីនសាយ ក៏បានស្រង់ឈ្មោះក្រុមយុវជនមកឱ្យមន្ត្រីពន្ធដារពិនិត្យមើលក្នុងឯកសារ ព្រោះចង់ដឹងថា តើពួកគេបានបង់ពន្ធប្រាក់ចំណូលឬនៅ? ប៉ុន្តែតាមការពិនិត្យឃើញថា ពួកគេពុំបានបង់ពន្ធប្រាក់ចំណូលទេ តាំងពី៣ឆ្នាំ-៤ឆ្នាំមុន មកម្ល៉េះ ។ នាយកដ្ឋានពន្ធដារមានអំណាចឱ្យយុវជនបង់ពន្ធប្រាក់ចំណូលកាលពី២ឆ្នាំកន្លងមក ហើយនាយកដ្ឋានពន្ធដារមានសិទ្ធិពិនិត្យឯកសារបង់ពន្ធរបស់យុវជន កាលពី៥ឆ្នាំមុន ។

បើនាយកដ្ឋានពន្ធដារពិនិត្យឃើញថា យុវជនដែលមានប្រាក់ចំណូលខ្ពស់ស្មើនឹងការកំណត់របស់រដ្ឋ ប៉ុន្តែពុំព្រមបង់ពន្ធ គឺពួកគេនឹងតម្រូវឱ្យបង់ពន្ធប្រាក់ចំណូល ព្រមទាំងបង់ប្រាក់ការផាកពិន័យ ។ ឧទាហរណ៍ ៖ បើយុវជនម្នាក់លក់ផលិតផលអនឡាញ ឬជា Influencer ត្រូវបង់ពន្ធចំនួន១ម៉ឺនបាត គឺនាយកដ្ឋានពន្ធដារនឹងតម្រូវឱ្យពួកគេបង់រហូតដល់៥ម៉ឺនបាត (រួមទាំងប្រាក់ពិន័យ) នាយកដ្ឋានពន្ធដារពុំចង់ឃើញយុវជនបង់ប្រាក់ពិន័យបែបនេះទេ ៕