ដំណឹងល្អចំពោះអ្នកមានដៃគូ ឬក៏រៀបអាពាហ៍ពិពាហ៍រួច! យោងតាមរបាយការណ៍នៃការស្រាវជ្រាវថ្មីបង្ហាញថា ការរៀបអាពាហ៍ពិពាហ៍អាចជួយកាត់បន្ថយហានិភ័យជំងឺមហារីក ជាពិសេស ស្ត្រី រីឯអ្នកនៅលីវប្រឈមនឹងកើតជំងឺមហារីកក្នុងអត្រាខ្ពស់ ដោយបានលើកពីហេតុផលមួយចំនួន ។ ប៉ុន្តែមានមតិមិនគាំទ្រការស្រាវជ្រាវនេះ ដោយអះអាងថា ប្រទេសនានាបានផ្តល់អាទិភាពខ្ពស់ដល់អ្នករៀបអាពាហ៍ពិពាហ៍ឱ្យទទួលបានសេវាធានារ៉ាប់រងសុខភាព និងការថែទាំសុខភាពផ្សេងទៀត ប៉ុន្តែមិនផ្តល់អាទិភាពដល់អ្នកនៅលីវ ។

ការស្រាវជ្រាវនេះផ្សព្វផ្សាយក្នុងទស្សនាវដ្តីជំងឺមហារីក «Cancer Research Communications» បង្ហាញថា ការរៀបអាពាហ៍ពិពាហ៍អាចជួយកាត់បន្ថយហានិភ័យជំងឺមហារីក ដោយសារមានដៃគូថែទាំសុខភាព និងនាំទៅព្យាបាល ។ ក្រៅពីនេះ ដោយសារអ្នករៀបអាពាហ៍ពិពាហ៍រួចមិនធ្វើអ្វីប៉ះពាល់សុខភាព ដូចជា ៖ មិនជក់បារី មិនផឹកគ្រឿងស្រវឹង ហើយការស្រាវជ្រាវបញ្ជាក់ថា អ្នកនៅលីវប្រឈមនឹងជំងឺមហារីកខ្លាំងជាងអ្នកមានដៃគូ ។

វាស្របគ្នានឹងការស្រាវជ្រាវជាច្រើនទៀតដែលលើកឡើងថា ការរៀបអាពាហ៍ពិពាហ៍ធ្វើឱ្យសុខភាពល្អ ។ ក្រុមប្រុសនៅលីវ (រួមទាំងបុរសលែងលះ) បានកើតជំងឺមហារីកច្រើនជាងក្រុមប្រុសរៀបអាពាហ៍ពិពាហ៍រួចរហូតដល់៦៨% ខណៈស្ត្រីនៅលីវវិញ បានកើតជំងឺមហារីកខ្ពស់ជាងបុរសរហូតដល់៨៣% ។

ការស្រាវជ្រាវផ្សេងៗពាក់ព័ន្ធនឹងការរៀបអាពាហ៍ពិពាហ៍បង្ហាញថា បុរសទទួលបានផលប្រយោជន៍ច្រើនជាងស្ត្រីក្នុងទំនាក់ទំនងផ្លូវភេ.ទ ប៉ុន្តែការស្រាវជ្រាវនេះបង្ហាញថា ការរៀបអាពាហ៍ពិពាហ៍អាចជួយការពារស្ត្រីពីហានិភ័យជំងឺមហារីកច្រើនជាងបុរស ។ បើតាមអ្នកស្រាវជ្រាវ គឺអាចបណ្តាលមកពីកត្តាជាច្រើន ដូចជា ៖ មហារីកមាត់ស្បូន និងមហារីកអូវែ អាចពាក់ព័ន្ធនឹងប្រព័ន្ធបន្តពូ.ជ ក្នុងនោះស្ត្រីមិនធ្លាប់មានកូន គឺប្រឈមនឹងជំងឺមហារីកខ្លាំង ។

ការស្រាវជ្រាវនេះបង្ហាញទៀតថា សម្រាប់បុរសស្បែកខ្មៅទទួលបានប្រយោជន៍ពីការរៀបអាពាហ៍ពិពាហ៍ខ្លាំងបំផុត ដោយសារស្ត្រីស្បែកខ្មៅជាភរិយាមានតួនាទីសំខាន់ក្នុងការជំរុញឱ្យស្វាមីទៅត្រួតពិនិត្យសុខភាព ។

មានចម្ងល់ជាច្រើនថា ហេតុអ្វីការរៀបអាពាហ៍ពិពាហ៍មានប្រយោជន៍អាចជួយកាត់បន្ថយហានិភ័យជំងឺមហារីក? តើការរៀបអាពាហ៍ពិពាហ៍ធ្វើឱ្យសុខភាពល្អជាងមុន ឬអ្នកមានសុខភាពល្អចង់រៀបអាពាហ៍ពិពាហ៍? ចម្លើយ គឺអ្នករៀបអាពាហ៍ពិពាហ៍រួចនឹងមានដៃគូជួយថែទាំ និងនាំទៅត្រួតពិនិត្យសុខភាព ។ ក្រៅពីនេះ ពួកគេមិនជក់បារី មិនផឹកគ្រឿងស្រវឹង ឬគ្មានដៃគូច្រើន ផ្ទុយពីអ្នកនៅលីវ គឺមានដៃគូច្រើនប្រឈមនឹងកើតជំងឺមហារីកសួត មហារីកមាត់ស្បូន និងនៅដាច់ដោយឡែកពីសង្គមធ្វើឱ្យមានឱកាសតិចក្នុងការត្រួតពិនិត្យ និងការពារជំងឺ ។

ទោះយ៉ាងណា ក៏មានមតិខ្លះមិនគាំទ្រការស្រាវជ្រាវនេះ ដោយអះអាងថា ប្រទេសនានាបានផ្តល់អាទិភាពខ្ពស់ដល់អ្នករៀបអាពាហ៍ពិពាហ៍ក្នុងការទទួលបានសេវាធានារ៉ាប់រងសុខភាព និងការថែទាំសុខភាពផ្សេងទៀត ប៉ុន្តែមិនផ្តល់អាទិភាពដល់អ្នកនៅលីវ ។

អ្នកជំងឺមហារីកបំពង់ទឹកប្រមាត់ម្នាក់ថា នាងនៅលីវ មិនទទួលបានសេវាកម្មសុខភាពដូចអ្នកមានប្តី-ប្រពន្ធទេ និងសំណូមពរឱ្យប្រទេសនានាផ្តល់សេវាថែទាំសុខភាពដល់អ្នកនៅលីវ និងឱ្យគ្រូពេទ្យណែនាំពីវិធីថែទាំសុខភាព ។ អ្នកជំងឺរូបនេះថា សាច់ញាតិ មិត្តភក្តិ និងអ្នកជិតខាង ក៏អាចជួយថែទាំសុខភាព និងផ្តល់កម្លាំងចិត្តដល់អ្នកនៅលីវបានដែរ ហើយការថែទាំសុខភាពរបស់ក្រុមមនុស្សទាំងនេះមានប្រសិទ្ធភាព មិនខុសពីអ្នករៀបអាពាហ៍ពិពាហ៍ដែលមានដៃគូជួយថែទាំសុខភាពនោះទេ ៕

អ្នកវិភាគនានាសន្និដ្ឋានថា ត្រូវរង់ចាំរយៈពេលយូរទៀតចាប់ពី៣ឆ្នាំ ទៅ៤ឆ្នាំ ទើបតម្លៃប្រេងឥន្ធនៈ និងហ្គាសធ្លាក់ចុះដូចក្នុងអំឡុងពេលមុនសង្គ្រា.មវិញ បើទោះជាអាមេរិក និងអ៊ីរ៉ង់បានប្រកាសពីកិច្ចព្រមព្រៀងឈប់បា.ញ់រយៈពេល២សប្តាហ៍ឈានទៅចរចាបញ្ចប់សង្គ្រា.មក្តី ប៉ុន្តែកិច្ចព្រមព្រៀងនេះផុយស្រួយខ្លាំងណាស់ ។ តម្លៃប្រេង-ហ្គាសធ្លាក់ចុះបាន លុះត្រាតែនាវាផ្សេងៗអាចឆ្លងកាត់ច្រកសមុទ្រ Hormuz ដោយគ្មានការហាមឃាត់ ។

អាមេរិក និងអ៊ីស្រាអែលបានវាយប្រហារអ៊ីរ៉ង់អស់រយៈពេលជាង១ខែហើយបណ្តាលឱ្យច្រកសមុទ្រ Hormuz ដែលជាផ្លូវដឹកជញ្ជូនប្រេង និងទំនិញដ៏សំខាន់លើពិភពលោក ស្មើប្រមាណ២០% ត្រូវបិទហាមនាវាផ្សេងៗឆ្លងកាត់ ។ ការបិទច្រកសមុទ្រនេះជំរុញឱ្យមានវិបត្តិថាមពលនៅទូទាំងពិភពលោក ជាពិសេស តំបន់អាស៊ី និងអឺរ៉ុប ។

ទោះជាកិច្ចព្រមព្រៀងឈប់បាញ់រយៈពេល២សប្តាហ៍រវាងអាមេរិក និងអ៊ីរ៉ង់ ត្រូវបានប្រកាសកាលពីពេលថ្មីៗនេះ ប៉ុន្តែអ្នកវិភាគសន្និដ្ឋានថា កិច្ចព្រមព្រៀងមានភាពផុយស្រួយយ៉ាងខ្លាំង ហើយប្រទេសនានាត្រូវរង់ចាំរយៈពេលជាច្រើនឆ្នាំទៀត ទើបតម្លៃប្រេង និងហ្គាសធ្លាក់ចុះវិញ ។ នេះបើតាមការចុះផ្សាយរបស់សារព័ត៌មានបរទេសកាលពីថ្ងៃទី១០ ខែមេសា ឆ្នាំ២០២៦ ។

ក្រៅពីតម្លៃប្រេង និងហ្គាសកើនឡើង ពិភពលោកបានរងផលប៉ះពាល់ជាច្រើនទៀតដោយសារសង្គ្រាម រួមមាន ៖ ប៉ះពាល់វិស័យឧស្សាហកម្ម ជាពិសេស ការផលិតបន្ទះឈីប, ជីកសិកម្ម ខណៈបណ្តាប្រទេសនៅមជ្ឈិមបូព៌ាបាននាំចេញជីកសិកម្មច្រើនជាងគេ ។

ផលប៉ះពាល់ទាំងនេះបានធ្លាក់មកលើពលរដ្ឋទូទាំងពិភពលោក ជាពិសេស ពលរដ្ឋនៅប្រទេសកំពុងអភិវឌ្ឍន៍ក្នុងតំបន់អាស៊ី និងអាហ្វ្រិក ដែលប្រឈមមុខនឹងការខ្វះខាតជីកសិកម្ម និងតម្លៃទំនិញកើនឡើងគ្រប់មុខ ។ សំណួរសួរថា តើតម្លៃប្រេង-ហ្គាសនឹងធ្លាក់ចុះវិញពេលណា ពីព្រោះអាមេរិកបានធ្វើកិច្ចព្រមព្រៀងឈប់បាញ់ជាមួយអ៊ីរ៉ង់រួចហើយ?

ទោះមានកិច្ចព្រមព្រៀងឈប់បាញ់ក្រោមលក្ខខណ្ឌឱ្យអ៊ីរ៉ង់បើកច្រកសមុទ្រ Hormuz ឱ្យនាវាផ្សេងៗឆ្លងកាត់ដោយសុវត្ថិភាព ប៉ុន្តែដោយសារអ៊ីស្រាអែលវាយប្រហារតាមផ្លូវអាកាសយ៉ាងធ្ងន់ធ្ងរលើប្រទេសលីបង់ បណ្តាលឱ្យមនុស្សស្លាប់ជាង២០០នាក់ និងរងរបួសរាប់ពាន់នាក់ ធ្វើឱ្យអ៊ីរ៉ង់បិទច្រកសមុទ្រនេះវិញ និងមានផែនការប្រមូលប្រាក់ពីនាវាឆ្លងកាត់ ។ ដូច្នេះ តម្លៃប្រេង និងហ្គាស អាចនឹងធ្លាក់ថ្លៃក្នុងរយៈពេលយូរទៀត ។

ប្រធានាធិបតីអាមេរិក លោក Donald Trump បានបង្ហោះសារក្នុង Truth Social កាលពីថ្ងៃទី៩ ខែមេសា ថា អ៊ីរ៉ង់មិនគួរប្របមូលប្រាក់ពីនាវាឆ្លងកាត់ច្រកសមុទ្រ Hormuz ទេ ប្រសិនបើអ៊ីរ៉ង់ចង់ធ្វើបែបនេះ គួរតែបញ្ឈប់ភ្លាម ។

តាមសេចក្តីរាយការណ៍ គឺអ៊ីរ៉ង់មានផែនការឱ្យនាវាដែលឆ្លងកាត់ច្រកសមុទ្រ Hormuz ត្រូវបង់ប្រាក់ប្រមាណ ២លានដុល្លារក្នុង១គ្រឿង ដែលអ្នកវិភាគមើលឃើញថា ការបង់ប្រាក់របស់នាវាឆ្លងកាត់ច្រកសមុទ្រមិនប៉ះពាល់ដល់តម្លៃប្រេងកើនឡើងទេ ប្រសិនបើមិនចង់ឱ្យតម្លៃប្រេងកើនឡើង លុះត្រាតែនាវាអាចដឹកប្រេងឆ្លងកាត់ច្រកសមុទ្រនេះ ។

គួរបញ្ជាក់ថា តម្លៃប្រេងកើនឡើងធ្វើឱ្យពិភពលោករងផលប៉ះពាល់យ៉ាងខ្លាំង ពីព្រោះតម្លៃដឹកជញ្ជូន ទំនិញ អាហារ និងសេវាកម្ម ក៏កើនឡើងដែរ ទោះជាប្រទេសមួយចំនួនបានបញ្ចេញប្រេងបម្រុងក្នុងស្តុកក៏ដោយ ។ ស្ថានការណ៍ពិភពលោកពេលនេះ គឺឈានចូល «វិបត្តិទំនិញសកល» ដែលបណ្តាលមកពីតម្លៃថាមពលកើនឡើងប៉ះពាល់គ្រប់ប្រទេស ៕

រដ្ឋមន្ត្រីក្រសួងការបរទេសថៃ លោក Sihasak Phuangketkeow នៅថ្ងៃទី១១ ខែមេសា ឆ្នាំ២០២៦ បានផ្តល់សម្ភាសន៍ជាមួយសារព័ត៌មាន ដោយបដិសេធការចូលរួមកិច្ចប្រជុំ JBC នៅខែមេសា ក្រោមហេតុផលដូចមុន គឺរង់ចាំនីតិវិធីផ្ទៃក្នុងសិនដើម្បីតែងតាំងសមាសភាព JBC ថ្មី ហើយពេលថៃត្រៀមនីតិវិធីផ្ទៃក្នុងរួចរាល់ នឹងនិយាយម្តងគ្នាទៀត ។ នេះជាការបដិសេធជាថ្មីរបស់ថៃ បន្ទាប់ពីបានបដិសេធកន្លងមកជាច្រើនលើក បើទោះជាបច្ចុប្បន្ន ថៃមានរដ្ឋាភិបាលថ្មីជាផ្លូវការក្តី ។ ក្រៅពីនេះ លោកនិយាយពីការលុបអនុស្សរណៈនៃការយោគយល់គ្នា (MOU) ឆ្នាំ២០០១ ថា នឹងពិភាក្សាក្នុងកិច្ចប្រជុំក្រុមប្រឹក្សាសន្តិសុខជាតិដើម្បីឱ្យគណៈរដ្ឋមន្ត្រីពិចារណា ។

គណៈកម្មការចម្រុះខណ្ឌសីមាព្រំដែនគោក (JBC) កម្ពុជាបានបញ្ជូនកំណត់ទូតជាច្រើនលើកទៅគណៈកម្មការ JBC ថៃ ដើម្បីស្នើរៀបចំកិច្ចប្រជុំពិសេសរបស់គណៈកម្មការ JBC ប៉ុន្តែថៃបានឆ្លើយតបដោយស្នើលើកពេលជាបន្តបន្ទាប់ ក្រោមហេតុផលរង់ចាំនីតិវិធីផ្ទៃក្នុងដើម្បីតែងតាំងសមាសភាព JBC ថ្មីរបស់ខ្លួន ក្រោយពីបង្កើតគណៈរដ្ឋមន្ត្រីថៃថ្មី ។ គណៈកម្មការ JBC កម្ពុជាបានស្នើសាជាថ្មីទៅគណៈកម្មការ JBC ថៃ តាមរយៈកំណត់ទូតចុះថ្ងៃទី៧ ខែមេសា ឆ្នាំ២០២៦ ដើម្បីរៀបចំកិច្ចប្រជុំពិសេសបន្ទាន់ JBC និងជំរុញឱ្យបន្តអនុវត្តការងារលើដីជាក់ស្តែងដែលភាគីទាំងពីរឯកភាពគ្នាកន្លងមក ដោយកម្ពុជាស្នើរៀបចំកិច្ចប្រជុំពិសេសរបស់គណៈកម្មការ JBC កម្ពុជា-ថៃ នៅកាលបរិច្ឆេទសមស្របណាមួយចន្លោះពីថ្ងៃទី១៧ ដល់ថ្ងៃទី២២ ខែមេសា ឆ្នាំ២០២៦ នៅខេត្តសៀមរាប ស្របតាមស្មារតីនៃកំណត់ហេតុកិច្ចប្រជុំពិសេសរបស់គណៈកម្មការ JBC កម្ពុជា-ថៃ ចុះថ្ងៃទី២២ ខែតុលា ឆ្នាំ២០២៥ នៅខេត្តចន្ទបុរី ។

តាមការចុះផ្សាយរបស់សារព័ត៌មានថៃ The Reporters នៅថ្ងៃទី១១ ខែមេសា លោក Sihasak ឧបនាយករដ្ឋមន្ត្រី និងរដ្ឋមន្ត្រីក្រសួងការបរទេសថៃថា ថៃនឹងមិនចូលរួមកិច្ចប្រជុំ JBC ដែលគ្រោងរៀបចំឡើងចាប់ពីថ្ងៃទី១៧ ខែមេសាទេ រីឯអនុស្សរណៈនៃការយោគយល់គ្នា (MOU) ឆ្នាំ២០០១ ថៃនឹងរៀបចំកិច្ចប្រជុំក្រុមប្រឹក្សាសន្តិសុខជាតិសិន មុននឹងសម្រេចចិត្តលុបចោល ។

នៅថ្ងៃទី១១ ខែមេសា លោក Sihasak រដ្ឋមន្ត្រីក្រសួងការបរទេសថៃបាននិយាយពីគណៈកម្មការ JBC កម្ពុជាផ្ញើកំណត់ទូតមកកាន់ថៃឱ្យចូលរួមកិច្ចប្រជុំ JBC ក្នុងចន្លោះចាប់ពីថ្ងៃទី១៧ ដល់ថ្ងៃទី២២ ខែមេសា ថា ថៃធ្លាប់ជូនដំណឹងទៅកម្ពុជារួចហើយពីកិច្ចប្រជុំ JBC គឺថៃត្រូវរង់ចាំនីតិវិធីផ្ទៃក្នុងសិនដើម្បីតែងតាំងសមាសភាព JBC ថ្មី ហើយនៅពេលថៃត្រៀមនីតិវិធីផ្ទៃក្នុងរួចរាល់ ចាំនិយាយគ្នាទៀត ។

លោកមិនធ្វើជាប្រធានគណៈកម្មការ JBC ថៃទេ ពីព្រោះគណៈកម្មការ JBC ត្រូវផ្តោតខ្លាំងលើផ្នែកបច្ចេកទេស ហេតុនេះ ថៃត្រូវស្វែងរកអ្នកជំនាញច្បាប់អន្តរជាតិ និងព្រំដែនមកធ្វើជាប្រធាន ព្រមទាំងមានភ្នាក់ងារសំខាន់ៗផងដែរ ។ កម្ពុជាបានអញ្ជើញថៃឱ្យចូលរួមកិច្ចប្រជុំពិសេសបន្ទាន់ JBC ប៉ុន្តែថៃជូនដំណឹងរួចហើយថា ត្រូវត្រៀមខ្លួនជាមុនសិន ហើយលោកនឹងជជែកជាមួយរដ្ឋមន្ត្រីក្រសួងការបរទេសកម្ពុជាក្នុងកិច្ចប្រជុំកំពូលអាស៊ាននាដើមខែឧសភា ខាងមុខ ។

ចំណែកការលុបអនុស្សរណៈនៃការយោគយល់គ្នា (MOU) ឆ្នាំ២០០១ គឺរដ្ឋាភិបាលថៃបានប្រកាសពីគោលនយោបាយរួចហើយនឹងលុបចោល ហើយក្រសួងការបរទេសថៃនឹងដំណើរការលុប MOU ដោយត្រូវប្រជុំក្រុមប្រឹក្សាសន្តិសុខជាតិជាមុនដើម្បីឱ្យគណៈរដ្ឋមន្ត្រីពិចារណា ។ សម្រាប់ការលុបអនុស្សរណៈនៃការយោគយល់គ្នា (MOU) ឆ្នាំ២០០០ ថៃនឹងពិចារណាឱ្យច្បាស់លាស់ កន្លងមក បានដំណើរការខ្លះៗហើយ ប៉ុន្តែការធ្វើអ្វីមួយត្រូវឯកភាពគ្នា ។ ហេតុនេះ ក្រសួងការបរទេសចង់ឱ្យពិភាក្សា និងស្តាប់មតិយោបល់ផ្សេងៗមុនពេលសម្រេចចិត្ត ។ នេះបើតាមការលើកឡើងរបស់លោក Sihasak ។

គួរបញ្ជាក់ថា គណៈកម្មការ JBC កម្ពុជាប្រកាន់ជំហរយ៉ាងម៉ឺងម៉ាត់ក្នុងការតវ៉ាប្រឆាំងយ៉ាងដាច់អលង្ការនឹងសកម្មភាពឈ្លានពានកាន់កាប់ទឹកដីកម្ពុជាដោយខុសច្បាប់របស់យោធាថៃ និងការបន្តធ្វើសកម្មភាពបំពានលើបូរណភាពទឹកដី និងអធិបតេយ្យកម្ពុជា ។ គណៈកម្មការ JBC កម្ពុជាប្រកាសមិនទទួលស្គាល់ជាដាច់ខាតនូវការកែប្រែខ្សែព្រំដែនណាមួយដែលកើតចេញពីការប្រើប្រាស់កម្លាំង ទាំងពេលកន្លងមក ទាំងបច្ចុប្បន្ន និងអនាគត ។

ពាក់ព័ន្ធនឹងថៃទាមទារលុបអនុស្សរណៈនៃការយោគយល់គ្នា (MOU) ឆ្នាំ២០០១ វាជារឿងគួរឱ្យសោកស្តាយយ៉ាងខ្លាំង ប្រសិនបើភាគីថៃសម្រេចដកខ្លួនជាឯកតោភាគី ដែលនេះជាជំហ៊ានមួយងាកចេញពីស្មារតីសហប្រតិបត្តិការដែលជាមូលដ្ឋានគ្រឹះនៃឯកសារនេះ ។ កម្ពុជាវិញ នៅតែប្រកាន់ខ្ជាប់យ៉ាងមុតមាំ និងឥតងាករងចំពោះខ្លឹមសារ និងស្មារតីនៃអនុស្សរណៈ ព្រមទាំងចំពោះសុច្ឆន្ទៈ និងភាពស្មោះត្រង់ដែលបាននាំឱ្យអនុស្សរណៈនៃការយោគយល់គ្នានេះសម្រេចបានកាលពីឆ្នាំ២០០១ ៕

មិនមែនចិន, មិនមែនអាមេរិក ហើយក៏មិនមែនកូរ៉េខាងជើង! បើតាមការរាយការណ៍ពីទីក្រុងមូស្គូ បានឲ្យដឹងថាប្រទេសអាល្លឺម៉ង់អាចមានសមត្ថភាពផលិតគ្រាប់បែ.កនុយក្លេអ៊ែរដ៏ខ្លាំងក្លាមួយគ្រាប់បានក្នុងរយៈពេលដ៏ខ្លី ពោលគឺត្រឹមតែ ៣០ថ្ងៃប៉ុណ្ណោះ។ សេចក្តីថ្លែងការណ៍នេះ បង្កឲ្យមានការជជែកវែកញែកកាន់តែខ្លាំងឡើងអំពីភាពរីកចម្រើននៃវិទ្យាសាស្រ្ត អាចបង្កទៅជាវិនាសកម្មនៃពិភពលោក។

យោងតាមរបាយការណ៍ពីសារព័ត៌មាន WION ចារកម្មរុស្ស៊ីបានចោទប្រកាន់ថា ប្រទេសអាល្លឺម៉ង់មានហេដ្ឋារចនាសម្ព័ន្ធវិទ្យាសាស្ត្រដ៏ជឿនលឿនក្នុងការផលិតសម្ភារៈកម្រិតអាវុធបានយ៉ាងឆាប់រហ័ស ដោយអះអាងជាពិសេសថា ពួកគេអាចអភិវឌ្ឍអាវុធនុយក្លេអ៊ែរក្នុងរយៈពេលត្រឹមតែ ១ខែប៉ុណ្ណោះ ប្រសិនបើពួកគេជ្រើសរើសក្នុងការធ្វើវា។

របាយការណ៍នេះបានគូសបញ្ជាក់ថា មន្ទីរពិសោធន៍អាល្លឺម៉ង់អាចទទួលបានសារធាតុផ្លាតូញ៉ូមគ្រប់គ្រាន់សម្រាប់បង្កើតឧបករណ៍នុយក្លេអ៊ែរក្នុងរយៈពេលមួយខែ ខណៈកម្រិតសារធាតុអ៊ុយរ៉ាញ៉ូមដែលពួកគេចម្រាញ់បាន នឹងជំរុញសមត្ថភាពបន្ថែមឲ្យអាចផលិតនុយក្លេអ៊ែរមួយគ្រាប់បានក្នុងរយៈពេលត្រឹមតែមួយសប្តាហ៍ប៉ុណ្ណោះ។

គួរជម្រាបថា ក្នុងនាមជាប្រទេសជឿនលឿនខ្លាំងដែលមានមូលដ្ឋានវិស្វកម្មរឹងមាំ ប្រទេសអាល្លឺម៉ង់មានសមត្ថភាពបច្ចេកទេសក្នុងវិស័យដូចជាការស្រាវជ្រាវនុយក្លេអ៊ែរ និងថាមពលយ៉ាងទូលំទូលាយ។ តែទោះជាយ៉ាងណា នេះមិនមានន័យថាពួកគេអាចផលិតអាវុធនុយក្លេអ៊ែរតាមតែចិត្តចង់នោះទេ ព្រោះប្រទេសនេះបានចុះហត្ថលេខាលើសន្ធិសញ្ញាមិនរីកសាយភាយអាវុធនុយក្លេអ៊ែរ ដែលហាមឃាត់ស្របច្បាប់ពីការអភិវឌ្ឍអាវុធនុយក្លេអ៊ែរ។

ខណៈពេលដែលប្រទេសអាល្លឺម៉ង់ពិតជាមានសមត្ថភាពវិទ្យាសាស្ត្រខ្លាំងក្លាបែបនេះមែន ប៉ុន្តែការអះអាងថាពួកគេអាចសាងសង់គ្រាប់បែកនុយក្លេអ៊ែរក្នុងរយៈពេលត្រឹមតែមួយខែនេះ ត្រូវបានគេមើលឃើញយ៉ាងទូលំទូលាយថាជាសារនយោបាយជាជាងសេណារីយ៉ូជាក់ស្តែង ដ្បិតការអះអាងទាំងនេះមានប្រភពមកពីចារកម្មរបស់រុស្ស៊ី ហើយមិនលើកយកពីភស្តុតាងណាមួយដើម្បីបញ្ជាក់ច្បាស់នោះទេ។

ជាមួយគ្នានេះដែរ អ្នកជំនាញបានគូសបញ្ជាក់ថា ទោះបីជាអាល្លឺម៉ង់មានចំណេះដឹងកម្រិតខ្ពស់ក៏ដោយ ប៉ុន្តែការបង្កើតអាវុធនុយក្លេអ៊ែរទំនងជាចំណាយពេលយូរជាង 30 ថ្ងៃ ជាពិសេសនៅពេលដែលប្រទេសនេះស្ថិតក្រោមការត្រួតពិនិត្យ និងរឹតបន្តឹងពីអន្តរជាតិ៕