ពលរដ្ឋអាមេរិកចាប់ផ្តើមចាប់អារម្មណ៍នឹងមនុស្សក្រៅភពឡើងវិញ បន្ទាប់ពីអតីតប្រធានាធិបតីអាមេរិក លោក Barack Obama ផ្តល់សម្ភាសន៍ទៅកាន់ពិធីករក្នុងកម្មវិធី Podcast កាលពីថ្ងៃទី១៤ ខែកុម្ភៈ ឆ្នាំ២០២៦ ថា មនុស្សក្រៅភព (Alien) មានពិតមែន ថែមទាំងទាក់ទងមកផែនដីក្នុងអំឡុងពេលលោកកាន់តំណែង ប៉ុន្តែមានឱកាសតិចណាស់ដែលអាចឃើញពួកគេ ។ រីឯលោកប្រធានាធិបតី Donald Trump មិនជឿពីមនុស្សក្រៅភពទេ ទោះជាមនុស្សជាច្រើនប្រាប់ថា មនុស្សក្រៅភពមានមែន និងធ្លាប់ឃើញយាន UFO ជាច្រើនលើកក៏ដោយ ។

លោកប្រធានាធិបតី Trump បញ្ជាឱ្យរដ្ឋមន្ត្រីក្រសួងការពារជាតិអាមេរិកបញ្ចេញឯកសារពាក់ព័ន្ធនឹងមនុស្សក្រៅភព, យាន UFO និងយាន UAP ដែលពលរដ្ឋទាមទារឱ្យបញ្ចេញឯកសារជាច្រើនឆ្នាំមកនេះ ដោយលោកបង្ហោះសារក្នុងបណ្តាញសង្គម Truth Social នៅថ្ងៃទី២០ ខែកុម្ភៈ នេះថា ដោយសារមានការចាប់អារម្មណ៍ខ្លាំងពីមនុស្សក្រៅភព ទើបលោកបញ្ជាឱ្យរដ្ឋមន្ត្រីក្រសួងការពារជាតិ និងមន្ត្រីពាក់ព័ន្ធ ស្វែងរក និងបញ្ចេញឯកសាររបស់រដ្ឋាភិបាលអាមេរិកសរសេរពីមនុស្សក្រៅភព និងយាន UFO គ្មានអត្តសញ្ញាណផ្សេងៗ ។

លោកប្រធានាធិបតី Trump បញ្ជាឱ្យរដ្ឋមន្ត្រីក្រសួងការពារជាតិបញ្ចេញឯកសារមនុស្សក្រៅភព គឺបន្ទាប់ពីអតីតប្រធានាធិបតីអាមេរិក លោក Obama ផ្តល់សម្ភាសន៍ទៅកាន់ពិធីករ លោក Brian Tyler Cohen ក្នុងកម្មវិធី Podcast កាលពីថ្ងៃទី១៤ ខែកុម្ភៈ ថា មានមនុស្សក្រៅភពពិតមែន ប៉ុន្តែលោកមិនធ្លាប់ឃើញ ហើយមនុស្សក្រៅភពមិនត្រូវបានលាក់ទុកនៅតំបន់៥១ (Area 51) លើវាលខ្សាច់ក្នុងរដ្ឋ Nevada ដែលជាទីកន្លែងអាថ៌កំបាំងបំផុតរបស់កងទ័ពអាកាសអាមេរិកទេ ។ លោកក៏បដិសេធការលាក់ទុកមនុស្សក្រៅភពនៅក្រោមដីផងដែរ លើកលែងតែមានការឃុបឃិតគ្នាលាក់បាំងព័ត៌មានមិនឱ្យប្រធានាធិបតីអាមេរិកជ្រាប ។

ពេលធ្វើដំណើរទៅប្រទេសហ្សកហ្ស៊ី កាលពីថ្ងៃទី១៩ ខែកុម្ភៈ លោកប្រធានាធិបតី Trump បានផ្តល់សម្ភាសន៍ជាមួយសារព័ត៌មានពីលោក Obama ថាមនុស្សក្រៅភពមានពិតមែន ដោយលោក Trump ថា លោក Obama មិនគួរនិយាយបែបនេះ លោកខុសធ្ងន់ណាស់ ។ រីឯខ្លួនលោកវិញ (Trump) មិនដឹងថាមានមនុស្សក្រៅភពឬអត់ ពីព្រោះគ្មានភស្តុតាងអ្វីទាំងអស់ដែលបញ្ជាក់ពីមនុស្សក្រៅភពរស់នៅក្រៅផែនដី ។

រយៈពេលប៉ុន្មានឆ្នាំចុងក្រោយនេះ មានការចាប់អារម្មណ៍ពីយាន UFO និងយាន UAP បន្ទាប់ពីរដ្ឋាភិបាលអាមេរិកបានត្រួតពិនិត្យរបាយការណ៍ជាច្រើនពីយានរបស់មនុស្សក្រៅភពដែលគ្មានអត្តសញ្ញាណពិតប្រាកដ ខណៈអ្នកខ្លះបារម្ភពីមនុស្សក្រៅភពអាចបង្ហាញខ្លួនក្នុងនាមជាសត្រូវ ក៏បង្ហោះយានមកតាមដានបច្ចេកវិទ្យាទំនើបរបស់អាមេរិក ។

កាលពីខែមីនា ឆ្នាំ២០២៤ មន្ទីរបញ្ចកោណបានផ្សព្វផ្សាយឯកសារមួយថា គ្មានភស្តុតាងបង្ហាញពីយាន UAP គឺជាបច្ចេកវិទ្យាបង្កើតឡើងដោយមនុស្សក្រៅភពទេ ។ ការប្រទះឃើញយានជាច្រើនគួរឱ្យសង្ស័យនោះ គឺអាចគ្រាន់តែជាបាឡុងពិនិត្យអាកាសធាតុ, យន្តហោះស៊ើបការណ៍ និងផ្កាយរណប តែប៉ុណ្ណោះ ។

គួរបញ្ជាក់ថា ពាក្យសម្តីរបស់លោក Obama ដែលថាមនុស្សក្រៅភពបានទាក់ទងមកកាន់មនុស្សលើផែនដីពិតមែនក្នុងអំឡុងពេលលោកកាន់តំណែងជាប្រធានាធិបតីអាមេរិក គឺត្រូវបានសារព័ត៌មាននានាលើពិភពលោក ព្រមទាំងទស្សនាវដ្តីយកទៅផ្សព្វផ្សាយព្រោងព្រាតបណ្តាលឱ្យផ្ទុះការចាប់អារម្មណ៍ជាថ្មី និងសន្និដ្ឋានថា លោក Obama ជ្រាបពីមនុស្សក្រៅភពស្ថិតនៅទីណា ៕

អតីតមេបញ្ជាការយោធភូមិភាគ២ លោក Boonsin Padklang ត្រូវបានពលរដ្ឋថៃស្គាល់ថា គឺជាបុគ្គលល្បីល្បាញខាងធ្វើសង្គ្រា.មឈ្លានពា.នកម្ពុជាកាលពីឆ្នាំ២០២៥ និងញុះញង់ឱ្យថៃបង្កជម្លោះ ចោទប្រកាន់កម្ពុជាគ្រប់រឿង បិទព្រំដែនជាឯកតោភាគី រហូតដល់ពលរដ្ឋថៃគោរពលើកតម្កើងដូចបុព្វបុរស ។ បុគ្គលនេះក៏ទទួលការកោតសរសើរពីព្រះមហាក្សត្រថៃដែរ និងប្រគល់តំណែងធ្វើជាអង្គរក្សពិសេសដោយសារមានស្នាដៃខាងបង្កសង្គ្រា.ម ទើបពលរដ្ឋថៃចង់ឱ្យលោក Anutin Charnvirakul តែងតាំងបុគ្គលនេះជារដ្ឋមន្ត្រីក្រសួងការពារជាតិ ។

បុគ្គល Boonsin បានធ្វើសង្គ្រាមឈ្លានពានកម្ពុជាកន្លងមក ក្រោមលេសការពារអធិបតេយ្យប្រទេសថៃ និងណែនាំឱ្យមេដឹកនាំថៃយកផែនទីដែលថៃបង្កើតដោយខ្លួនឯងមកប្រើប្រាស់ ជាហេតុធ្វើឱ្យពលរដ្ឋថៃចង់បាន Boonsin ធ្វើជារដ្ឋមន្ត្រីក្រសួងការពារជាតិ និងចង់ឱ្យលោក Anutin កាន់អំណាចដឹកនាំរដ្ឋាភិបាលយូរអង្វែង ពីព្រោះបុគ្គលទាំង២រូបសុទ្ធតែមានជំហរដាច់ខាតប្រឆាំងនឹងកម្ពុជា ដើម្បីតែប្រជាប្រិយភាព និងផលប្រយោជន៍របស់ខ្លួន ។

ការបង្កសង្គ្រាមឈ្លានពានកម្ពុជា គឺជាផែនការរបស់លោក Anutin ជាមួយកងទ័ពដើម្បីកេងចំណេញសន្លឹកឆ្នោត និងកាន់អំណាចបន្ត បន្ទាប់ពីប្រជាប្រិយភាពរបស់មេដឹកនាំថៃរូបនេះធ្លាក់ចុះខ្លាំងដោយសារអសមត្ថភាព ។ រីឯ Boonsin ក៏មិនខុសគ្នាដែរ គឺជាបុគ្គលគ្មានចំណេះដឹងផ្នែកសេដ្ឋកិច្ច ដឹងតែបង្កសង្គ្រាមតែម្យ៉ាង ហើយបានបិទព្រំដែនជាមួយកម្ពុជា ដោយមិនខ្វល់ពីផលប៉ះពាល់សេដ្ឋកិច្ចថៃឡើយ ដូចជា ៖ ពលរដ្ឋថៃនៅព្រំដែនបាត់បង់ចំណូល អាជីវកម្មដួលរលំ គ្មានទេសចរណ៍ វិនិយោគិនបរទេសគ្មានទំនុកចិត្ត ។

ប៉ុន្តែវាជាអ្វីដែលពលរដ្ឋថៃជ្រុលនិយមចង់បានបែបនេះ គឺបិទព្រំដែនផ្តាច់ទំនាក់ទំនងជាមួយកម្ពុជាជារៀងរហូត, ធ្វើរបងព្រំដែន, លុបចោលអនុស្សរណៈនៃការយោគយល់គ្នា (MOU) ឆ្នាំ២០០១ និងបណ្តេញពលរដ្ឋកម្ពុជាទាំងអស់ចេញពីប្រទេសថៃ ពីព្រោះពលរដ្ឋថៃជ្រុលនិយមមិនបាននៅក្បែរព្រំដែន មិនដឹងពីផលប៉ះពាល់ឡើយ ។ លើសពីនេះ បើបុគ្គលណាម្នាក់ហ៊ានទាមទារឱ្យបើកព្រំដែនឡើងវិញ បុគ្គលនោះនឹងរងការចោទប្រកាន់មិនខាន ។

ពលរដ្ឋថៃសំណូមពរឱ្យលោក Anutin ប្រធានគណបក្សភូមិចៃថៃ រក្សាគោលនយោបាយដាច់ខាតជាមួយកម្ពុជា ហើយវាកាន់តែល្អ ប្រសិនបើ Anutin តែងតាំង Boonsin ជារដ្ឋមន្ត្រីក្រសួងការពារជាតិ និងថា Boonsin ស័ក្តិសមនឹងតំណែងនេះ ដើម្បីការពារអធិបតេយ្យនៅគ្រប់តំបន់ព្រំដែន ទាំងជាប់មីយ៉ាន់ម៉ា ម៉ាឡេស៊ី និងកម្ពុជា ។

តាមការចុះផ្សាយរបស់សារព័ត៌មាន Top News នៅថ្ងៃទី២០ ខែកុម្ភៈ ឆ្នាំ២០២៦ ប្រសិនបើ Boonsin ឡើងកាន់តំណែងជារដ្ឋមន្ត្រីក្រសួងការពារជាតិ គឺនឹងប្រកាន់ជំហរម៉ឺងម៉ាត់អាចវាយប្រហារសត្រូវ ប៉ុន្តែការឡើងកាន់តំណែងនេះអាស្រ័យលើគោលនយោបាយរបស់រដ្ឋាភិបាលបច្ចុប្បន្ន ។

គួរបញ្ជាក់ថា រដ្ឋាភិបាលថៃបានបោកប្រាស់ពលរដ្ឋរបស់ខ្លួនឱ្យយល់ខុសថា ទឹកដីកម្ពុជាជាច្រើនកន្លែងនៅព្រំដែនដែលកងទ័ពថៃតម្រៀបទូរកុងទឺន័រ និងរាយបន្លាលួសនេះ គឺជាទឹកដីថៃពីមុន ទាំងដែលការពិតជា គឺជាទឹកដីកម្ពុជាត្រូវបានកងទ័ពថៃកាន់កាប់ដោយខុសច្បាប់ ។

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានបកអាក្រា.តពីទង្វើអសីលធម៌របស់ថៃដល់សារព័ត៌មានអន្តរជាតិ Reuters និង Fox News ធ្វើឱ្យពិភពលោកឃើញពីទង្វើអាក្រក់របស់ថៃកាន់តែច្បាស់ថា កងទ័ពថៃកំពុងកាន់កាប់ទឹកដីកម្ពុជាបន្ទាប់ពីការប្រយុទ្ធគ្នាកាលពីឆ្នាំ២០២៥ ទោះជាមានកិច្ចព្រមព្រៀងសន្តិភាពដែលសម្របសម្រួលដោយលោកប្រធានាធិបតី Donald Trump ក៏ដោយ ៕

ទាំងគណបក្សនយោបាយ ទាំងអន្តរជាតិសុទ្ធតែដឹងថា លោក Anutin Charnvirakul ប្រធានគណបក្សភូមិចៃថៃ អាចបន្តអំណាចរបស់ខ្លួនរហូតដល់ពេលនេះ ដោយសារទិញសន្លឹកឆ្នោត កេងបន្លំលទ្ធផលបោះឆ្នោត និងបំផុសឱ្យពលរដ្ឋមានស្មារតីជាតិនិយមជ្រុលរឿងព្រំដែនកម្ពុជា-ថៃ ថែមទាំងបង្កើតគោលនយោបាយបន្តបិទព្រំដែនជាមួយកម្ពុជា លុបចោលអនុស្សរណៈនៃការយោគយល់គ្នា (MOU) ឆ្នាំ២០០១ និងធ្វើរបងព្រំដែនតាមការទាមទាររបស់ម្ចាស់ឆ្នោត ។ អតីតសមាជិកព្រឹទ្ធសភាម្នាក់និយាយថា រដ្ឋាភិបាលថៃក្រោមការដឹកនាំរបស់លោក Anutin មិនអាចគ្រប់គ្រងប្រទេសយូរអង្វែងទេ ។

អតីតសមាជិកព្រឹទ្ធសភា និងជាមេធាវីនៅប្រទេសថៃ លោក វ៉ាន់ឆ័យ សនស៊ិរី បានផ្តល់សម្ភាសន៍ជាមួយសារព័ត៌មាននៅសប្តាហ៍ទី៣ ខែកុម្ភៈ ឆ្នាំ២០២៦ ថា រដ្ឋាភិបាលថៃក្រោមការដឹកនាំរបស់លោក Anutin Charnvirakul អាចគ្រប់គ្រងប្រទេសថៃត្រឹមតែរយៈពេល២ឆ្នាំប៉ុណ្ណោះ ត្រូវផ្លាស់ប្តូររដ្ឋាភិបាលថ្មីហើយ ដោយសារការខ្វែងគំនិតគ្នាពីអ្នកនយោបាយ ។

ឆ្លើយតបនឹងអ្នកសារព័ត៌មានដែលសួរថា ៖ «តើរដ្ឋាភិបាលថៃនឹងអាចដឹកនាំប្រទេសបានតែ២ឆ្នាំ មែនទេ?» លោក វ៉ាន់ឆ័យ និយាយថា អ្នកដែលមកចូលរួមជាមួយគណបក្សភូមិចៃថៃ របស់លោក Anutin មិនមែនមកដោយសារមានគំនិតដូចគ្នា ឬដោយសារការស្រឡាញ់ ឬមានបំណងល្អជាមួយគ្នានោះទេ ប៉ុន្តែពួកគេមកចូលរួមដោយសារតែអំណាចប៉ុណ្ណោះ ពីព្រោះដឹងថា លោក Anutin នឹងបង្កើតរដ្ឋាភិបាល ។

អ្នកនយោបាយជាច្រើនបានដង្ហែគ្នាមកចូលរួមជាមួយគណបក្សភូមិចៃថៃ ដោយសារចង់បានតំណែងជារដ្ឋមន្ត្រី ហើយតើលោក Anutin អាចផ្តល់តំណែងរដ្ឋមន្ត្រីទៅអ្នកនយោបាយបាន២០តំណែងដែរឬទេ? មិនអាចទេ ពីព្រោះត្រូវផ្តល់តំណែងរដ្ឋមន្ត្រីឱ្យអ្នកនយោបាយក្នុងគណបក្សភូមិចៃថៃផង និងអ្នកនយោបាយមកពីគណបក្សផ្សេងផង ។

នៅឆ្នាំដំបូងដែលរដ្ឋាភិបាលលោក Anutin គ្រប់គ្រងប្រទេស គឺអ្នកនយោបាយមកពីគណបក្សផ្សេងគ្នាព្យាយាមធ្វើការឱ្យចុះសម្រុង ប៉ុន្តែនៅឆ្នាំបន្ទាប់ នឹងពិបាក ។ ប្រសិនបើត្រូវផ្លាស់ប្តូរគណៈរដ្ឋមន្ត្រី ត្រូវទម្លាក់តំណែងរដ្ឋមន្ត្រីមួយចំនួន ធ្វើឱ្យរដ្ឋមន្ត្រីធ្លាក់តំណែងមិនពេញចិត្ត រីឯអ្នកមិនបានតំណែងរដ្ឋមន្ត្រីក៏ខឹងសម្បារ នៅទីបំផុត នឹងមានទំនាស់ផ្ទៃក្នុងគណបក្សខ្លួនឯង (គណបក្សភូមិចៃថៃ) ដែលនេះជាមូលហេតុធ្វើឱ្យរដ្ឋាភិបាលរបស់លោក Anutin មិនអាចកាន់អំណាចបានយូរ ។ នេះបើតាមការលើកឡើងរបស់លោក វ៉ាន់ឆ័យ អតីតសមាជិកព្រឹទ្ធសភា និងជាមេធាវី ។

គួរបញ្ជាក់ថា លោក Anutin បានប្រកាសពីគោលជំហរនយោបាយគណបក្សខ្លួនដើម្បីឱ្យពលរដ្ឋបោះឆ្នោតឱ្យ គឺប្រកាន់គោលជំហរដាច់ខាតជាមួយកម្ពុជា ដូចជា ៖ បិទព្រំដែនរៀងរហូតក្រោមហេតុផលការពារអធិបតេយ្យ ។ ការប្រកាសគោលជំហរដាច់ខាតនេះ ដោយសារខ្លួនលោកអសមត្ថភាពដឹកនាំប្រទេសកន្លងមក និងរងការរិះគន់ខ្លាំងពីពលរដ្ឋរឿងយឺតយ៉ាវក្នុងការជួយសង្គ្រោះពលរដ្ឋពីទឹកជំនន់ភាគខាងត្បូង បណ្តោយឱ្យបទល្មើសឆបោកអនឡាញ ជួញដូរគ្រឿងញៀន កើនឡើងស្ទើរគ្រប់ទីកន្លែង ។

អ្វីដែលធ្វើឱ្យលោក Anutin ទទួលការគាំទ្រខ្លាំងដោយសារបើកដៃឱ្យកងទ័ពថៃធ្វើសង្គ្រាមឈ្លានពានកម្ពុជា លើកទី២ កាលពីថ្ងៃទី៧ ខែធ្នូ ឆ្នាំ២០២៥ ដើម្បីកាន់កាប់ទឹកដីកម្ពុជានៅព្រំដែនដោយខុសច្បាប់ ក្រោមលេសចោទប្រកាន់កម្ពុជាបង្ករឿងដាក់មីនទៅវិញ ​៕