ប្រទេសថៃ ៖ អាជ្ញាធរថៃបានចាប់ឃាត់ខ្លួនមេការសំណង់ជនជាតិចិនម្នាក់ ពាក់ព័ន្ធនឹងការសាងសង់ខុសបច្ចេកទេសដែលបណ្ដាលឲ្យមានការដួលរលំអគាររដ្ឋាភិបាលដែលកំពុងសាងសង់នៅក្នុងសង្កាត់ Chatuchak ទីក្រុងបាងកក ប្រទេសថៃ បន្ទាប់ពីមានការរញ្ជួយដី កាលពីចុងខែមីនាកន្លងមកនេះ។

តាមប្រភពសារព័ត៌មានថៃ The Bangkok Post បានឲ្យដឹងថា មេការសំណង់ខាងលើមានឈ្មោះថា Zhang Chuanling ជនជាតិចិន មានតួនាទីជាអ្នកគ្រប់គ្រងទូទៅលើផ្នែកសាងសង់នៃគម្រោងអគាររដ្ឋាភិបាល ដែលដួលរលំនោះ។ លោក Zhang គឺជាមនុស្សម្នាក់ក្នុងចំណោមមនុស្សចំនួន ៤នាក់ដែលមានដីកាឃាត់ខ្លួន ដោយមនុស្ស ៣នាក់ទៀត គឺជាជនជាតិថៃ បានពាក់ព័ន្ធក្នុងការស៊ើបអង្កេតរបស់ក្រុមប៉ូលីសថៃទាក់ទងនឹងការដួលរលំនៃអគារ ។

បើតាមការស៊ើបអង្កេតរបស់ក្រុមជំនាញប្រទេសថៃ (DSI) បានបង្ហាញថា ការប្រើប្រាស់សម្ភារៈក្នុងការសាងសង់អគារនេះគឺមិនបានធ្វើតាមស្តង់ដាមាត្រដ្ឋានឡើយ ដោយដែកថែបសម្រាប់ចាក់គ្រឹះជើងសរស និងសម្ភារៈមួយចំនួនទៀតត្រូវបាននាំចូលដោយក្រុមហ៊ុនចិនមួយដែលគ្មានគុណភាព។

លើសពីនេះទៅទៀត ក្រុមហ៊ុន China Railway No.10 ដែលមានលោក Zhang ជាអ្នកតំណាងទទួលការសាងសង់នេះ ក៏ត្រូវបានតុលាការថៃចោទប្រកាន់ពីបទបំពានច្បាប់លើការគ្រប់គរងអាជីវកម្មជនបរទេសនៅក្នុងប្រទេសថៃ ដោយគេរកឃើញថា ក្រុមហ៊ុនមិនមានការធ្វើតេស្តគម្រូដើម្បីធានាភាពរឹងមាំនៃអគារទេ ថែមទាំងមានការប្រើប្រាស់ហត្ថលេខាក្លែងក្លាយរបស់វិស្វករ នៅក្នុងកិច្ចសន្យាត្រួតពិនិត្យសំណង់ផងដែរ ។

គួរជម្រាបថា ការរញ្ជួយដីនៅប្រទេសថៃកាលពីកន្លងទៅ គឺជាការរញ្ជួយដែលទទួលរងឥទ្ធិពលមកពីប្រទេសមីយ៉ាន់ម៉ាប៉ុណ្ណោះ ប៉ុន្តែវាបានបណ្ដាលអគារដែលកំពុងសាងសង់មួយដួលរលំទាំងស្រុង ព្រមទាំងបង្ករឥ្យមនុស្សចំនួន ៤៧នាក់ត្រូវបានរកឃើញថាស្លា..ប់ និង ៤៧នាក់ផ្សេងទៀតបាត់ខ្លួនស្ថិតនៅក្នុងការស្វែងរកនៅឡើយ។ ដូចនេះការបា..ក់រលំនៃអគារខាងលើ បានបង្ករជាមន្ទិលសង្ស័យថាអាចមានភាពមិនប្រក្រតីនៅក្នុងការសងសង់ ព្រោះវាជាអគារខ្ពស់កប់ពពកតែមួយគត់ នៅក្នុងរាជធានីថៃ ដែលបានដួលរលំ នៅក្នុងគ្រោះមហន្តរាយរញ្ជួយដីកាលពីថ្ងៃទី ២៨ ខែមីនាឆ្នាំ២០២៥៕

សហរដ្ឋអាមេរិក ៖ ពលរដ្ឋអាមេរិកបានប្រមូលផ្តុំគ្នាធ្វើបាតុ.កម្មនៅ៥០រដ្ឋ កាលពីថ្ងៃទី១៩ ខែមេសា កន្លងមក ដើម្បីប្រឆាំងនឹងគោលនយោបាយដឹកនាំប្រទេសរបស់លោកប្រធានាធិបតី Donald Trump ដែលប៉ះពាល់លទ្ធិប្រជាធិបតេយ្យ និងបណ្តេញប្រធានាធិបតីឱ្យចុះចេញពីតំណែង ដោយសារប្រើប្រាស់អំណាចផ្តា.ច់ការ ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី២០ ខែមេសា ឆ្នាំ២០២៥ ។

កាលពីថ្ងៃទី១៩ ខែមេសា ពលរដ្ឋអាមេរិកបានឈរតវ៉ានៅក្រៅសេតវិមានក្នុងទីក្រុងវ៉ាស៊ីនតោន, ទីតាំងលក់រថយន្ត Tesla និងតវ៉ានៅទីក្រុងនានាក្នុង៥០រដ្ឋ ដែលការតវ៉ានេះធ្វើឡើងជិត៧០០កន្លែង នៅទូទាំងប្រទេស ។ ការតវ៉ារបស់ពលរដ្ឋស្របនឹងថ្ងៃខួបលើកទី២៥០ឆ្នាំ នៃការចាប់ផ្តើមសង្គ្រាមបដិវត្តអាមេរិក ដើម្បីប្រឆាំងគោលនយោបាយផ្សេងៗរបស់លោក Trump ។

ពលរដ្ឋអាមេរិកយល់ថា គោលនយោបាយរបស់លោក Trump គឺរំលោភសិទ្ធិពលរដ្ឋ និងរដ្ឋធម្មនុញ្ញ ដូចជា ៖ ការបណ្តេញជនអន្តោប្រវេសន៍, ការកាត់បន្ថយចំណាយរដ្ឋាភិបាល, ការបញ្ឈប់មន្ត្រីរាជការពីការងារ ស្មើជាង២សែននាក់, ការលុបចោលស្ថាប័នមួយចំនួន, ការចាប់ខ្លួននិស្សិតបរទេសជាច្រើននាក់ និងឈប់ផ្តល់ប្រាក់ឧបត្ថម្ភសាកលវិទ្យាល័យសម្រាប់គម្រោងភាពចម្រុះ និងសមភាព ។

ក្រុមអ្នកតវ៉ាបានលើកស្លាកសញ្ញាផ្សេងៗដើម្បីប្រឆាំងការអនុវត្តអំណាចផ្តាច់ការរបស់លោក Trump និងលោកមហាសេដ្ឋី Elon Musk ដែលមានតួនាទីទទួលខុសត្រូវការងារក្នុងក្រសួងប្រសិទ្ធភាពរដ្ឋាភិបាល និងកាត់បន្ថយការចំណាយថវិការដ្ឋាភិបាល ។ ក្រៅពីនេះ ក្រុមអ្នកតវ៉ាថែមទាំងកាន់ស្លាកសញ្ញាសរសេរថា «Trump ឆាប់ចុះចេញពីតំណែង» ខណៈនៅកន្លែងផ្សេងទៀត ក្រុមអ្នកតវ៉ាបានកាន់ទង់ជាតិអាមេរិកដាក់ក្បាលចុះក្រោម ។

កាលពីដើមខែមេសា ឆ្នាំ២០២៥ ពលរដ្ឋអាមេរិកបានធ្វើបាតុកម្មទ្រង់ទ្រាយធំជាងនេះ ស្មើជិត១,៤០០កន្លែងក្នុង៥០រដ្ឋ ដើម្បីប្រឆាំងនឹងគោលនយោបាយដឹកនាំប្រទេសរបស់លោក Trump និងលោក Elon Musk ។

លោក Thomas Basford អាយុ៨០ឆ្នាំ អតីតកម្មករសំណង់នៅរដ្ឋ Maine និយាយថា ៖ «នេះជាពេលគ្រោះថ្នាក់ណាស់សម្រាប់សេរីភាពនៅអាមេរិក ។ ខ្ញុំចង់ឱ្យកូនចៅដឹងថា អាមេរិកចាប់ផ្តើមដូចម្តេច ពេលខ្លះ យើងត្រូវតែក្រោកឈរឡើងតស៊ូដើម្បីសេរីភាព» ។ ពលរដ្ឋអាមេរិកខ្លះទៀតបារម្ភពីការប្រើប្រាស់អំណាចហួសព្រំដែន ព្រមទាំងលើកស្លាកសញ្ញា «No Kings» ។

ការតវ៉ាលើកចុងក្រោយរបស់ពលរដ្ឋអាមេរិកកើតឡើងស្របពេលមានលទ្ធផលការស្ទង់មតិរបស់ស្ថាប័ន Gallup កាលពីពេលថ្មីៗថា ពលរដ្ឋអាមេរិកមានសិទ្ធិបោះឆ្នោតតែ៤៥%ប៉ុណ្ណោះ ពេញចិត្តនឹងការបំពេញការងាររយៈពេល៣ខែដំបូងរបស់ Trump ។ វាជាភាគរយប្រហាក់ប្រហែលនឹងការស្ទង់មតិពេល Trump កាន់តំណែងអាណត្តិទី១ គឺមានពលរដ្ឋតែ៤១% ពេញចិត្តនឹងការបំពេញការងារ៣ខែដំបូងរបស់ Trump ។

ហេតុនេះ មានពលរដ្ឋអាមេរិកតិចតួចប៉ុណ្ណោះ ដែលពេញចិត្តនឹងលទ្ធផលការងាររបស់ Trump បើធៀបនឹងការស្ទង់មតិការបំពេញការងាររបស់អតីតប្រធានាធិបតីជាច្រើនរូបឃើញថា ពលរដ្ឋអាមេរិករហូតដល់៦០% ពេញចិត្តនឹងការបំពេញការងាររបស់ប្រធានាធិបតីមុនៗ ចាប់ពីឆ្នាំ១៩៥២ ដល់ឆ្នាំ២០២០ ៕

ប្រទេសអេហ្ស៊ីប បាននឹងកំពុងសាងសង់ទន្លេសិប្បនិម្មិតវែងជាងគេបំផុតនៅលើលោក ដែលមានប្រវែង១១៤ គីឡូម៉ែត្រ ដោយគ្រោងចំណាយថវិកា៤.៩ពាន់លានដុល្លារ។

គម្រោងនេះ មានឈ្មោះថា “New Delta Project” បង្កើតឡើងសម្រាប់បម្រើលើវិស័យកសិកម្ម ដែលអាចបង្កបង្កើនផល លើផ្ទៃដីកសិកម្មប្រមាណ ៩ ២០០ គីឡូម៉ែត្រការ៉េ។

ទន្លេសិប្បនិម្មិតនេះ មានសមត្ថភាពផ្គត់ផ្គង់ទឹក បានប្រមាណ ៧,៥ លានម៉ែត្រគូបក្នុងមួយថ្ងៃ ដោយទាញប្រភពទឹកចេញពីទន្លេនីល។

តាមរយៈគម្រោង The New Delta រដ្ឋាភិបាលប្រទេសអេហ្ស៊ីប រំពឹងថានឹងអាចជួយដោះស្រាយ បញ្ហាស្បៀងអាហារ និងបង្កើតការងារដល់ប្រជាជនប្រមាណ៥លាននាក់ ដែលរស់នៅជុំវិញតំបន់ទន្លេសិប្បនិម្មិតនេះ។

គួរបញ្ជាក់ថា គម្រោងនេះ ត្រូវបានចាប់ផ្តើមសាងសង់តាំងពីឆ្នាំ២០២១ ដោយគ្រោងចំណាយពេល១០ឆ្នាំ ដើម្បីបញ្ចប់ការសាងសង់៕

សហរដ្ឋអាមេរិក៖ សង្រ្គាមពាណិជ្ជកម្មរវាងអាមេរិក និងចិនដែលកំពុងបន្តកើតមានបានធ្វើឱ្យមានការចាប់អារម្មណ៍នៅគ្រប់ប្រព័ន្ធផ្សព្វផ្សាយ។ ជាពិសេសអ្នកលេងបណ្ដាញសង្គមនៅចិន ហើយថ្មីៗនេះមានសកម្មជនចិនម្នាក់បានចេញមុខអះអាងថា រ៉ូបដែលរដ្ឋលេខាធិការសេតវិមាន Karoline Leavitt ពាក់ចូលរួមក្នុងបទសម្ភាសន៍មួយ គឺជារ៉ូបដែលត្រូវបានផលិតនៅក្នុងនៅក្នុងប្រទេសចិន។

សកម្មជនចិនលោក Zhang Zhishen បានបង្ហោះនៅលើបណ្ដាញសង្គម X ដោយចោទប្រកាន់រដ្ឋលេខាធិការលោក Trump ថា នាងជាមនុស្សលាក់ពុត ដោយសារនាងបានបង្ហាញខ្លួនធ្វើសេចក្ដីរាយការណ៍ពីភាពចម្រូងចម្រាស់នៃពន្ធគយចិន ខណៈពេលដែលនាងកំពុងស្លៀកសម្លៀកបំពាក់ដែលផលិតនៅចិន។

លោក Zhang បានចំអកពីភាពផ្ទុយគ្នារវាងជំហរដ៏តឹងតែងរបស់រដ្ឋបាល Trump មកលើប្រទេសចិន ប៉ុន្តែរដ្ឋលេខាធិការសេតវិមានរបស់លោកបែរជាកំពុងគាំទ្រផលិតផលចិនទៅវិញ ។ លោក Zhang ក៏បានបន្ថែមថា “វាជារឿងហួសចិត្តចំពោះសេតវិមានក្នុងការរិះគន់មកកាន់ប្រទេសចិន ខណៈដែលមន្ត្រីរបស់ខ្លួនប្រើប្រាស់ផលិតផល ដែលផលិតនៅក្នុងប្រទេសចិន”។

ក្រៅពីនេះ អ្នកប្រើបណ្ដាញសង្កមក្នុងប្រទេសចិនម្នាក់បានអះអាងថា៖ រ៉ូបរបស់ Karoline Leavitt គឺជាផលិតនាំចេញពីរោងចក្រមួយ នៅក្នុងទីក្រុង Mabu ប្រទេសចិន ដែលជាកន្លែងពួកគេធ្វើការ។ មានមនុស្សមួយចំនួនទៀតបានលើកឡើងថា៖ Leavitt បានវា..យប្រ..ហារផលិតចិន ខណៈពេលកំពុងស្លៀកសម្លៀកបំពាក់ដែលផលិតនៅប្រទេសចិន ហេតុអ្វីក៏នាងពូកែសម្ដែងយ៉ាងនេះ?

ដោយឡែក ក៏មានអ្នកគាំទ្រខាងអាមេរិកមួយចំនួនចេញមុខមកការពារអ្នកស្រី Leavitt ដោយលើកឡើងថា៖ បើតាមគេពិនិត្យមើល រ៉ូបនេះមិនមែនមានដើមកំណើតនៅប្រទេសចិនឡើយ ជាក់ស្ដែងវាត្រូវបានរចនាឡើងដំបូងនៅក្នុងប្រទេសបារាំងទោវិញទេ។ មានអ្នកខ្លះទៀតបានបញ្ចេញមតិថា៖ ជនជាតិ និងប្រទេសចិនល្បីខាងពូកែចម្លងម៉ូតសម្លៀកបំពាក់ កាបូប ស្បែកជើង ពីប្រ៊េនធំៗល្បីៗរបស់អឺរ៉ុបណាស់ ដូចនេះវាមិនចម្លែកទេ ដែលពួកគេច្រលំថានេះគឺជាផលិតផលចិននោះ។

គួររំលឹកថា មកទល់បច្ចុប្បន្នបញ្ហាពន្ធគយលើទំនិញរវាងចិន និងអាមេរិកនៅមិនទាន់មានការជួបពិភាក្សាដើម្បីដោះស្រាយដោយសន្តិវិធីនៅឡើយទេ ដោយចិនបានតម្លើងអត្រាពន្ធត្រូវយកពីសហរដ្ឋអាមេរិកដល់ ១២៥% ខណៈដែលអាមេរិកបានតម្លើងមកកាន់ចិនរហូតដល់ ១៤៥% និងបានប្រកាសផ្អាករយៈពេល 90 ថ្ងៃលើពន្ធគយសម្រាប់ប្រទេសជាង 75 ផ្សេងទៀត ដែលធ្វើឲ្យភាពតានតឹងខ្លាំងផ្នែកសេដ្ឋកិច្ចជាមួយទីក្រុងប៉េកាំង ប្រទេសចិន៕

ទីក្រុងប៉េកាំង៖ ទីក្រុងប៉េកាំងកំពុងរៀបចំវគ្គបណ្តុះបណ្តាលផ្នែកបញ្ញាសិប្បនិមិត្ត (AI) និង chatbots ដល់សិស្សកម្រិតបឋមសិក្សា ដោយកំណត់វាជាផែនការនៃកម្មវិធីសិក្សាថ្មី។

តាមរយៈការចុះផ្សាយរបស់សារព័ត៌មាន Fortune បាននិយាយថា៖ នៅទីក្រុងប៉េកាំង កុមារដែលមានអាយុចាប់ពី ៦ ឆ្នាំឡើង នឹងត្រូវបង្រៀនឲ្យចេះប្រើប្រាស់ chatbots, យល់ដឹងពីគោលគំនិត AI ជាមូលដ្ឋាន និងស្វែងយល់ពីក្រមសីលធម៌ក្នុងការប្រើប្រាស់ AIផងដែរ ។

ប្រភពដដែលបានបង្ហាញតៀតថា៖ គិតចាប់ពីខែកញ្ញា ឆ្នាំ២០២៥ខាងមុខនេះតទៅ គណៈកម្មាធិការអប់រំក្រុងប៉េកាំងបានប្រកាសថា នៅតាមសាលារៀនអាចដាក់បញ្ចូលម៉ោងបង្រៀន AI ទៅក្នុងមុខវិជ្ជាដែលមានស្រាប់ដូចជាវិទ្យាសាស្ត្រ និងបច្ចេកវិទ្យាព័ត៌មាន ឬផ្តល់ជូនវាជាវគ្គសិក្សាដាច់ដោយឡែកតែម្ដង។

ប្រទេសចិនចាត់ទុកការបង្រៀន AI ពីដំណាក់កាលដំបូងដល់កុមារ គឺជាធាតុសំខាន់ក្នុងការជំរុញការប្រកួតប្រជែងរបស់ចិននៅក្នុងឧស្សាហកម្ម AI ពិភពលោក។ កាលពីខែធ្នូ ក្រសួងអប់រំចិនបានជ្រើសរើសសាលារៀនចំនួន 184 នៅទូទាំងប្រទេស ដើម្បីសាកល្បងកម្មវិធី AI ដែលក្រោយមកបានឲ្យដាក់នៅទូទាំងប្រទេស។ ចំណែករដ្ឋមន្ត្រីក្រសួងអប់រំរបស់ប្រទេសចិនលោក Huai Jinpeng បានសង្កត់ធ្ងន់លើសារៈសំខាន់របស់ AI ដោយហៅវាថាជា “គន្លឹះមាស” សម្រាប់ប្រព័ន្ធអប់រំរបស់ប្រទេស។

តាមរយៈការបញ្ចូល AI ទៅក្នុងកម្មវិធីសិក្សារបស់សាលារៀន ប្រទេសចិនមានគោលបំណងអភិវឌ្ឍអ្នកជំនាញ AI ជំនាន់ក្រោយ ឲ្យយល់ដឹងអំពី AI ពីវ័យក្មេងទៅ ដើម្បីអាចមានគំនិតច្នៃប្រឌិតថ្មីៗបានឆាប់រហ័ស និងអាចក្លាយជាស្ថាបនិកដូចជាលោក Liang Wenfeng អ្នកបង្កើត DeepSeek និងលោក Wang Xingxing ស្ថាបនិក Unitreeជាដើម។

ក្រៅពីប្រទេសចិន ក៏មានប្រទេសមួយចំនួនផ្សេងទៀតក៏កំពុងបញ្ចូល AI ទៅក្នុងការអប់រំផងដែរដើម្បីតាមឲ្យទាន់ជាមួយនឹងការរីកចម្រើនផ្នែកបច្ចេកវិទ្យាដូចជា ប្រទេសកាណាដា អាមេរិក អង់គ្លេស កូរ៉េខាងត្បូង និងជាពិសេសប្រទេសអេស្តូនីបានចាប់ដៃគូជាមួយ OpenAI ដើម្បីណែនាំមុខងារ ChatGPT Edu សម្រាប់សិស្ស និងគ្រូបង្រៀនវិទ្យាល័យផងដែរ។ គំនិតផ្តួចផ្តើមនេះ គ្រោងនឹងចាប់ផ្តើមនៅខែកញ្ញាខាងមុខ ដើម្បីផ្តល់ការគាំទ្រលើការសិក្សាដែលដំណើរការដោយ AI ស្វ័យប្រវត្តិកម្មក្នុងកិច្ចការរដ្ឋបាល និងឧបករណ៍ធ្វើផែនការមេរៀននៅតាមសាលារៀន៕

សហរដ្ឋអាមេរិក ៖ រដ្ឋាភិបាលរបស់ប្រធានាធិបតីអាមេរិក លោក Donald Trump មានគម្រោងបិទស្ថានទូត និងស្ថានកុងស៊ុលអាមេរិកនៅបណ្តាប្រទេសជាច្រើន ព្រមទាំងរួមបញ្ចូលស្ថានកុងស៊ុល ដើម្បីឱ្យស្របគោលនយោបាយរបស់រដ្ឋាភិបាលអាមេរិក និងស្របតាមសំណើរបស់រដ្ឋមន្ត្រីក្រសួងការបរទេសដើម្បីកាត់បន្ថយការចំណាយថវិកា ៥០% ។ នេះបើតាមការចុះផ្សាយរបស់សារព័ត៌មាន The New York Times កាលពីពាក់កណ្តាលខែមេសា ឆ្នាំ២០២៥ ។

បើតាមកំណត់ត្រាផ្ទៃក្នុងរបស់ក្រសួងការបរទេសអាមេរិក គឺរដ្ឋាភិបាលអាមេរិកមានគម្រោងបិទស្ថានទូតនៅប្រទេសជាច្រើន រួមមាន ៖ ស្ថានទូតនៅអាហ្វ្រិកកណ្តាល, អេរីទ្រា, ហ្គាំប៊ី, ឡេសូតូ, រដ្ឋកុងហ្គោ, ស៊ូដង់ខាងត្បូង, លុចសំបួរ និងម៉ាល់តា ព្រមទាំងលុបចោលតួនាទីរបស់មន្ត្រីតំណាងអចិន្ត្រៃយ៍អាមេរិកនៅប្រទេសហ្គ្រីនដា និងម៉ាល់ឌីវ ផងដែរ ។

រដ្ឋាភិបាលអាមេរិកក៏មានគម្រោងបិទស្ថានកុងស៊ុល ចំនួន១៧កន្លែង រួមមាន ៖ ស្ថានកុងស៊ុលនៅបារាំង ៥កន្លែង, ស្ថានកុងស៊ុលនៅអាល្លឺម៉ង់ ២កន្លែង រួមទាំងស្ថានកុងស៊ុល ២កន្លែង នៅបូស្នៀ និងហឺហ្សេហ្គោវីណា ។ ក្រៅពីនេះ រដ្ឋាភិបាលអាមេរិកគ្រោងបិទស្ថានកុងស៊ុលនៅប្រទេសក្រិក, អ៊ីតាលី, ព័រទុយហ្គាល់, ស្កុតឡែន, កាមេរូន, ឥណ្ឌូណេស៊ី, អាហ្វ្រិកខាងត្បូង និងកូរ៉េខាងត្បូង ។

កំណត់ត្រាផ្ទៃក្នុងរបស់ក្រសួងការបរទេសអាមេរិកបញ្ជាក់ថា គួរតែលុបចោលតួនាទី ឬបិទស្ថានទូតអាមេរិកនៅប្រទេសសូម៉ាលី និងបិទមជ្ឈមណ្ឌលជំនួយការទូតនៅអ៊ីរ៉ាក់ ព្រមទាំងកាត់បន្ថយការចំណាយថវិកាការទូតនៅអ៊ីរ៉ាក់ ។ អាមេរិកអាចនឹងរួមបញ្ចូលស្ថានកុងស៊ុលនៅជប៉ុន និងកាណាដា ឱ្យក្លាយជាស្ថានកុងស៊ុលតែមួយ ។

មន្ត្រីវិទ្យាស្ថាន Lowy ដែលវិភាគពីនយោបាយបរទេសនៅទីក្រុងស៊ីដនី ប្រទេសអូស្ត្រាលី យល់ឃើញថា បើរដ្ឋាភិបាលអាមេរិកសម្រេចចិត្តបិទស្ថានទូត និងស្ថានកុងស៊ុលនៅក្រៅប្រទេស គឺតួនាទីការទូតរបស់អាមេរិកនៅតំបន់អឺរ៉ុប អាហ្វ្រិក និងអាស៊ីបូព៌ា នឹងធ្លាក់ចុះបើធៀបជាមួយចិន ខណៈបច្ចុប្បន្ន នៅអាហ្វ្រិក និងអាស៊ីបូព៌ា គឺចិនមានមន្ត្រីទូតច្រើនជាងអាមេរិក ។

អាមេរិកមានគម្រោងកាត់បន្ថយចំនួនមន្ត្រីទូតឱ្យតិចជាងមុន ប៉ុន្តែមន្ត្រីទាំងនៅសេសសល់អាចធ្វើការងារច្រើន ដើម្បីឱ្យស្របតាមផែនការកាត់បន្ថយការចំណាយរបស់ក្រសួងប្រសិទ្ធភាពរដ្ឋាភិបាល (DOGE) ដែលកំណត់គោលដៅថា នឹងកាត់បន្ថយការចំណាយថវិការដ្ឋាភិបាលឱ្យបាន៣ម៉ឺនលានដុល្លារ នៅឆ្នាំ២០២៦ ។ ក្រសួង DOGE ធ្លាប់ស្នើឱ្យកាត់បន្ថយថវិកាស្ថានទូត និងថវិកាជួយសង្គ្រោះប្រទេសនានា ១ផ្នែកក្នុងចំណោម៣ផ្នែក ។ ប៉ុន្តែការកាត់បន្ថយការចំណាយថវិកាជួយប្រទេសនានា និងលុបចោលតួនាទីអាមេរិកនៅក្រៅប្រទេស នឹងប៉ះពាល់ដល់ឥទ្ធិពលអាមេរិកនៅក្រៅប្រទេស ដែលប្រទេសនានាយល់ថា ការផ្តល់ជំនួយរបស់អាមេរិកជា «Soft Power» ដ៏រឹងមាំអស់រយៈពេលជាច្រើនឆ្នាំ ។

ប៉ុន្តែលោក Trump បែរជាចាត់ទុកថា តួនាទីអាមេរិកនៅក្រៅប្រទេសពុំសូវមានសារៈសំខាន់ ហើយលោកផ្តោតលើការសន្សំសំចៃថវិការបស់អាមេរិកច្រើនជាង ។ ប្រទេសនានាស្វែងរកផលប្រយោជន៍ពីអាមេរិក និងដើរខ្សែលើពលរដ្ឋអាមេរិក ហើយលោកពុំយល់ព្រមឱ្យអាមេរិកចំណាយថវិកាច្រើនជាងនេះទេ បើអាមេរិកពុំទទួលបានប្រយោជន៍អ្វីមកវិញ ៕