អាកាសយាន្តដ្ឋានថ្មីមួយនឹងលេចរូបរាងឡើងនៅខេត្តរតនគិរី លើផ្ទៃដីជិត ២ពាន់ហិកតា

អភិបាលខេត្តរតនគិរី និងរដ្ឋលេខាធិការអាកាសចរណ៍ស៊ីវិល បានចុះពិនិត្យលើទីតាំងគម្រោងសាងសង់អាកាសយានដ្ឋានថ្មី លើផ្ទៃដីប្រមាណជា ១,៩០៥ ហិកតា ស្ថិតក្នុងភូមិសាស្រ្តស្រុកលំផាត់ ខេត្តរតនគិរី ដើម្បីផ្ដល់សារៈសំខាន់ក្នុងការវិនិយោគ និងទេសចរណ៍នៅខេត្តភូមិភាគឦសាន ។

តាមរយៈការចែករំលែកនៅលើបណ្ដាញសង្គមហ្វេសប៊ុក នៅព្រឹកថ្ងៃទី៨ ខែឧសភា ឆ្នាំ២០២៦ លោក តឹក សាលី រដ្ឋលេខាធិការអាកាសចរណ៍ស៊ីវិល និងលោក ញ៉ែម សំអឿន អភិបាលខេត្តរតនគិរី បានអញ្ជើញចុះពិនិត្យជាក់ស្តែងទីតាំងគម្រោងសាងសង់អាកាសយានដ្ឋានថ្មី។ ក្រុមការងារខាងលើនេះមានការចូលរួមពីអភិបាលរងខេត្ត, តំណាងមន្ទីរ-អង្គភាពពាក់ព័ន្ធ, អាជ្ញាធរស្រុកលំផាត់ ព្រមទាំងមានអ្នកជំនាញការបរទេសផងដែរ។

លោក ញ៉ែម សំអឿន បានមានប្រសាសន៍ថា ទីតាំងអាកាសយានដ្ឋានថ្មីនេះស្ថិតនៅកណ្ដាលរវាងខេត្តមណ្ឌលគិរី និងរតនគិរី និងខេត្តស្ទឹងត្រែង ដែលផ្ដល់ប្រយោជន៍ពាក់ព័ន្ធនឹងការជំរុញវិនិយោគនៅខេត្តភូមិភាគឦសាន។

បើតាមអភិបាលខេត្ត បច្ចុប្បន្ន រដ្ឋាភិបាលបានប្រគល់ជូនវិស័យឯកជនក្នុងការវិនិយោគ ហើយបើរកដៃគូឯកជនមិនបានទេ រដ្ឋាភិបាលនឹងអភិវឌ្ឍដោយខ្លួនឯង ខណៈបច្ចុប្បន្នក្រុមហ៊ុនកំពុងសិក្សាផលប៉ះពាល់ផ្សេងៗ ហើយរយៈពេលនៃការសាងសង់ប្រមាណ ៣ ឆ្នាំ អាចដំណើរការបាន។

សូមបញ្ជាក់ថា ព្រលានយន្តហោះថ្មីនេះ មានទីតាំងនៅស្រុកលំផាត់ ខេត្តរតនគិរី។ គម្រោងនេះ គ្រោងសាងសង់លើផ្ទៃដីជាង ១,៩០៥ ហិកតា ដើម្បីតភ្ជាប់ទេសចរណ៍ខេត្តភូមិភាគឦសាន និងការដោះដូរពាណិជ្ជកម្មក្នុង និងក្រៅស្រុកផងដែរ។

ក្រោយបញ្ចប់ព្រលានយន្តហោះថ្មីខាងលើគេរំពឹងថា ខេត្តភូមិភាគឦសានមួយនេះ នឹងអាចកើនចំនួនភ្ងៀវទេសចរ និងវិនិយោគិន ដែលកន្លងមក កត្តារយៈចម្ងាយ ធ្វើឱ្យភ្ងៀវទេសចរ និងអ្នកវិនិយោគ ពុំសូវចាប់អារម្មណ៍នឹងខេត្តនេះទេ។ ខេត្តភូមិភាគឦសាននេះមានវិស័យសំខាន់ៗសម្រាប់ទាក់ទាញការវិនិយោគដូចជា៖ វិស័យធនធានរ៉ែ, វិស័យទេសចរ និងវិស័យកសិកម្ម៕