ជារឿងដ៏ហួសចិត្ត និងអស់សំណើចម្យ៉ាងដែលម្ចាស់រថយន្តTeslaមួយចំនួន បានក្លែងបន្លំឡានរបស់ពួកគេទៅជាឡានរបស់ក្រុមហ៊ុនផ្សេង ដោយពួកគេបានប្ដូរស្លាក Logo របស់ក្រុមTesla ចោល និងដាក់ជំនួសដោយLogo របស់ក្រុមហ៊ុនផ្សេង ដើម្បីបញ្ជៀសឡានរបស់ពួកគេពីការបំផ្លាញរបស់ក្រុមមនុស្សដែលស្អ..ប់លោក Elon Musk។

មនុស្សម្នារជាច្រើន ជាពិសេសម្ចាស់ឡាន Tesla បានកម្ទេ..ចឡានរបស់ពួកគេចោល ដោយសារតែពួកគេខឹ..ងស.ម្បារនឹងលោក Elon Muskជាខ្លាំង។ ចលនាតវ៉ា បានចាប់ពីថ្ងែទី០៧ ខែមីនា ឆ្នាំ២០២៥ រហូតមក ដោយពួកគេទាមទារអោយលោកElon Mus ឈប់ពាក់ព័ន្ធនឹងរឿងនយោបាយតទៅទៀត។

គួរជម្រាបផងដែរថា ការតវ៉ា និងការបំផ្លិ..ចបំ..ផ្លាញ បានរីករាលដាលពាសពេញសហរដ្ឋអាមេរិកចាប់តាំងពីលោក Elon Musk ចូលបម្រើការងានៅក្រសួងរបស់អាមេរិក និងធ្វើការជាមួយលោកប្រធានាធិបតី លោក Donald Trump។ ក្នុងនោះពាក្យស្លោក “កុំទិញ Tesla” ត្រូវបានគេប្រើស្រែកហ៊ោកញ្ជ្រៀវនៅតាមទីកន្លែងសាធារណៈនានា ដូចជាទីក្រុងBerlin និង Wales ជាដើម។

ដោយឡែក មានម្ចាស់រថយន្តTesla ជាច្រើនផ្សេងទៀត មិនបានចូលរួមក្នុងសកម្មភាពខាងលើនោះទេ ប៉ុន្តែពួកគេក៏មិនពេញចិត្តនឹងសកម្មភាពរបស់លោក Elon Musk ដូចគ្នា ដូច្នេះពួកគេ បានជ្រើសរើសវិធីក្នុងការប្ដូស្លាកសញ្ញា Logo Teslaចេញដោយដាក់ជា Logo រឺអក្សរតំណាងរថយន្តម៉ាកផ្សេងទៅវិញ។ ការធ្វើបែបនេះទី១ គឺក្នុងគោលបំណងបញ្ជៀសឡានរបស់ពួកគេពីការវាយប្រហារ ទី២ គឺដោយសារពួកគេស្អប់Elon Musk ទើបធ្វើបែបនេះដើម្បីបញ្ជាក់ថា ពួកគេមិនចង់ជាប់ពាក់ព័ន្ធនឹងTesla រឺ Elon Muskទៀតឡើយ។

ម្ចាស់រថយន្តTesla មួយចំនួនបានប្ដូររថយន្តរបស់ពួកគេទៅជា Audi Toyotaរឺ Mazdaជាដើម ប៉ុន្តែវាក្លាយជារឿងដែលគួរអោយអស់សំណើច ព្រោះរថយន្តរបស់Tesla វាមានរូបរាងខុសឆ្ងាយពីម៉ាករថយន្ត ដែលម្ចាស់ពួកវាបានព្យាយាមបន្លំនោះ ហើយអ្នកខ្លះថែមបិតStickerជាអក្សរថា “ខ្ញុំបានទិញឡាននេះ មុនពេលដែលខ្ញុំដឹងថាElon Muskឆ្កួ..ត” ដើម្បីជាការបញ្ជាក់ថា ពួកគេមិនបានគាំទ្រTeslaបន្តទៀតទេ ប៉ុន្តែពួកគេគ្មានជម្រើស។

យោងតាមការចុះផ្សាយរបស់ Yahoo News នាថ្ងៃទី២០ ខែមីនា ឆ្នាំ២០២៥ មហាសេដ្ឋី Elon Musk មានការភ្ញាក់ផ្អើលជាខ្លាំង ចំពោះកម្រិតនៃការស្អ..ប់របស់ប្រជាជនមកលើក្រុមហ៊ុន Tesla និងការបំផ្លិ..ចបំ..ផ្លាញដែលបានកើតឡើង។

ថ្លែងក្នុងបទសម្ភាសន៍ជាមួយ Fox News លោក Elon Musk បានលើកឡើងយ៉ាងដូច្នេះថា៖ «វាពិតជាគួរឱ្យភ្ញាក់ផ្អើលសម្រាប់ខ្ញុំដែលបានឃើញកម្រិតនៃការស្អ..ប់ និងអំពើហឹ..ង្សាពីអ្នកប្រកាន់នយោបាយឆ្វេងនិយមជ្រុល។ ក្រុមហ៊ុន Tesla ជាក្រុមហ៊ុនសន្តិភាព យើងមិនដែលធ្វើអ្វីដែលបង្កគ្រោះ..ថ្នា.ក់នោះទេ»។

គួរជម្រាបថា ចលនាតវ៉ា “Tesla Takedown” បានកើតឡើងដំបូងនៅលើបណ្តាញ Bluesky ដែលជាគូប្រកួតប្រជែងនៃវេទិកា X របស់ Elon Musk ដោយបានអំពាវនាវឲ្យម្ចាស់រថយន្ត Tesla លក់រថយន្ត និងភាគហ៊ុនរបស់ពួកគេ ក្នុងយុទ្ធនាការណ៍ “បញ្ឈប់ Musk ឥឡូវនេះ”។ គេហទំព័រនេះ បានរាយបញ្ជីបាតុកម្មសាធារណៈរាប់សិបនៅឯបន្ទប់តាំងបង្ហាញ Tesla ក្នុងប៉ុន្មានសប្តាហ៍ថ្មីៗនេះ៕

សហរដ្ឋអាមេរិក ៖ ឆ្មាពូ.ជ Maine Coon របស់អាមេរិកបានជាប់តំណែងក្នុង Guinness World Records គឺជាឆ្មាមានកន្ទុយវែងជាងគេលើពិភពលោក ដែលកន្ទុយរបស់វាមានប្រវែងរហូតដល់៤៧សង់ទីម៉ែត្រ ។ ឆ្មា១ក្បាលនេះឈ្មោះ «Mr. Pugsley Addams» ដែលឈ្មោះនេះ គឺម្ចាស់របស់វាដាក់តាមឈ្មោះតុក្កតាក្នុងភាពយន្តរឿង «The Addams Family» ។

ឆ្មាឈ្មោះ Pugsley គឺជាឆ្មាពូជ Maine Coon មានរោមពណ៌ប្រាក់ ។ អ្នកស្រី អាមិនដា ខាមេរ៉ន ជាម្ចាស់ឆ្មា និយាយថា កន្ទុយរបស់វាវែងតាំងពីកើតមកម៉្លេះ ។ អ្នកស្រីបានយកឆ្មានេះមកពីរដ្ឋមីនិសូដា ហើយនៅឆ្នាំ២០២៥ វាមានអាយុ២ឆ្នាំ ។

អ្នកស្រី ខាមេរ៉ន នៅចាំបានថា មនុស្សម្នាបានជជែកពីកន្ទុយវែងរបស់ឆ្មា តាំងពីអ្នកស្រីយកវាទៅពេទ្យសត្វជាលើកដំបូង ប៉ុន្តែអ្នកស្រីពុំបានគិតអ្វីច្រើនទេ ។ រយៈពេល៦ខែក្រោយមក អ្នកស្រីក៏បានយកឆ្មាទៅពេទ្យសត្វម្តងទៀត ហើយកន្ទុយវែងរបស់វាកាន់តែល្បីល្បាញខ្លាំងឡើង ។

អ្នកស្រី ខាមេរ៉ន ក៏បានជជែករឿងកន្ទុយវែងរបស់ឆ្មា ជាមួយកូនប្រុស និងកូនស្រី ។ បន្ទាប់មក កូនៗរបស់អ្នកស្រី បានរកមើលទិន្នន័យពាក់ព័ន្ធនឹងឆ្មាកន្ទុយវែងជាប់តំណែងក្នុង Guinness World Records ហើយកូនៗរកឃើញថា ឆ្មា Pugsley នឹងទទួលបានជ័យជម្នះក្លាយជាឆ្មាកន្ទុយវែងជាងគេលើពិភពលោក ។

Pugsley គឺជាសត្វឆ្មាមានចរិតចង់ដឹង ចង់ឃើញ ចូលចិត្តប្រឈមមុខនឹងគ្រោះថ្នាក់ ហើយតែងតែបង្កើតបញ្ហាផងដែរ ។ អ្នកស្រី ខាមេរ៉ន ប្រាប់ថា វាជាឆ្មាឆ្លាតខ្លាំងណាស់ ហើយចិត្តល្អ និងស្រឡាញ់ម្ចាស់ ។ Pugsley រស់នៅជាមួយបងប្អូនរបស់វា ៣ក្បាលទៀត វាមិនត្រូវការអ្វីច្រើនទេ ក្រៅពីការឱបពីម្ចាស់ ។ វាជាសត្វរ៉ូមេនទិក និងចូលចិត្តបង្ហាញក្តីស្រឡាញ់ ។

ក្រុមគ្រួសារអ្នកស្រី ខាមេរ៉ន ប្រាប់ថា ក្រៅពីឆ្មា Pugsley មានកន្ទុយវែងគួរឱ្យស្រឡាញ់ហើយ វាមានទម្លាប់ស្ងប់ស្ងាត់ និងគួរឱ្យស្រឡាញ់ណាស់ ។ ម្ចាស់របស់ Pugsley គិតថា វានឹងអាចជាប់តំណែងផ្សេងទៀត ក្រៅពីតំណែងជាឆ្មាកន្ទុយវែងក្នុង Guinness World Records ហើយម្ចាស់ឆ្មា នឹងរង់ចាំសង្កេតមើលការប្រែប្រួលកន្ទុយរបស់វាទៅមុខទៀត ៕

សហរដ្ឋអាមេរិក ៖ ក្រសួងពាណិជ្ជកម្មអាមេរិកបានចុះបញ្ជីខ្មៅក្រុមហ៊ុនបច្ចេកវិទ្យារបស់ចិនបន្ថែមទៀតស្មើជាង៥០ក្រុមហ៊ុន រួមមាន ៖ ក្រុមហ៊ុនផលិត និងអភិវឌ្ឍន៍បច្ចេកវិទ្យា AI រហូតដល់ក្រុមហ៊ុនផលិតកុំព្យូទ័រទំនើបល្បឿនលឿន ដោយសារក្រុមហ៊ុនបច្ចេកវិទ្យាចិនទាំងនេះដំណើរការខុសពីគោលនយោបាយសន្តិសុខជាតិ និងគោលនយោបាយការបរទេសអាមេរិក គឺយកបច្ចេកវិទ្យាអាមេរិកទៅប្រើប្រាស់ក្នុងផ្នែកកងទ័ព ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី២៦ ខែមីនា ឆ្នាំ២០២៥ ។

ទូរទស្សន៍ CNBC របស់អាមេរិកបានផ្សព្វផ្សាយដោយយោងតាមសេចក្តីថ្លែងការណ៍របស់ការិយាល័យឧស្សាហកម្ម និងសន្តិសុខ ស្ថិតក្រោមក្រសួងពាណិជ្ជកម្មអាមេរិក កាលពីថ្ងៃទី២៥ ខែមីនា កន្លងមក បញ្ជាក់ថា អាមេរិកបានចុះបញ្ជីខ្មៅក្រុមហ៊ុនបរទេសសរុប៨០ក្រុមហ៊ុន ក្នុងនោះមានក្រុមហ៊ុនចិន ជាង៥០ក្រុមហ៊ុន ។ រីឯក្រុមហ៊ុនអាមេរិកត្រូវបានហាមបញ្ជូនផលិតផលពាក់ព័ន្ធនឹងបច្ចេកវិទ្យាទៅឱ្យក្រុមហ៊ុនចិនក្នុងបញ្ជីខ្មៅ បើពុំទទួលការអនុញ្ញាតពីរដ្ឋាភិបាលលោកប្រធានាធិបតី Donald Trump ។

ក្រុមហ៊ុនចិន៥០ នៅក្នុងបញ្ជីខ្មៅ គឺមាន២៧ក្រុមហ៊ុនបានបញ្ជូនផលិតផលបច្ចេកវិទ្យាពីអាមេរិកទៅគាំទ្រការលើកកម្ពស់សមត្ថភាពកងទ័ពចិន ។ ក្រុមហ៊ុនចិន៧ទៀតបានគាំទ្រការអភិវឌ្ឍបច្ចេកវិទ្យាកុំព្យូទ័រ Quantum របស់ចិន ខណៈក្រុមហ៊ុនចិន៦ទៀតប្រកបអាជីវកម្មទាក់ទងនឹង Inspur Group របស់ចិន ដែលផ្តោតលើការផលិត និងអភិវឌ្ឍន៍ប្រព័ន្ធ Cloud computing, Big data, Applications servers និងបច្ចេកវិទ្យា AI ។ ក្រុមហ៊ុនចិនទាំងនេះត្រូវបានអតីតប្រធានាធិបតីអាមេរិក លោក Joe Biden ធ្លាប់ចុះបញ្ជីខ្មៅកាលពីឆ្នាំ២០២៣ ។

លោក Joe Biden បានចុះបញ្ជីខ្មៅក្រុមហ៊ុនចិនផលិតបន្ទះឈីប និងផលិតកុំព្យូទ័រល្បឿនលឿន ដើម្បីទប់ស្កាត់ការបញ្ជូនផលិតផលបច្ចេកវិទ្យាពីអាមេរិក ពីព្រោះក្រុមហ៊ុនចិននឹងយកបច្ចេកវិទ្យាអាមេរិកទៅប្រើប្រាស់ក្នុងផ្នែកកងទ័ព ។ ក្រុមហ៊ុនអាមេរិក២ បាននាំចេញផលិតផលបច្ចេកវិទ្យាទៅឱ្យក្រុមហ៊ុនចិន ហើយរដ្ឋាភិបាលលោក Biden ក៏ដាក់ទណ្ឌកម្មក្រុមហ៊ុនចិន គឺ Huawei និង HiSilicon ដែលផលិតឈីប ។ ការចុះបញ្ជីខ្មៅក្រុមហ៊ុនចិននៅឆ្នាំ២០២៥ គឺដើម្បីទប់ស្កាត់ក្រុមហ៊ុនបរទេស ដែលស្វែងរកប្រយោជន៍ពីបច្ចេកវិទ្យាអាមេរិក ។ នេះបើតាមមន្ត្រីក្រសួងពាណិជ្ជកម្មអាមេរិក ។

រដ្ឋាភិបាលលោក Trump នឹងការពារក្រុមហ៊ុនបច្ចេកវិទ្យាអាមេរិក ដើម្បីកុំឱ្យនាំចេញផលិតផលបច្ចេកវិទ្យាទៅចិន ពីព្រោះចិននឹងយកបច្ចេកវិទ្យាអាមេរិកទៅផលិត និងអភិវឌ្ឍន៍មីស៊ីលលឿនជាងសំឡេង, យន្តហោះសមយុទ្ធ និងរថយន្តបើកបរដោយស្វ័យប្រវត្តិ ។ ប៉ុន្តែការចុះបញ្ជីខ្មៅក្រុមហ៊ុនចិនធ្វើឱ្យពាណិជ្ជកម្មអាមេរិក និងចិន កាន់តែតានតឹង ព្រោះលោក Trump ទើបតែដំឡើងពន្ធទំនិញចិន ស្មើ២០% ព្រមទាំងដំឡើងពន្ធការនាំចូលដែក និងអាលុយមីញ៉ូមចិន ២៥% ចាប់ពីថ្ងៃទី១២ ខែមីនា ។

ដោយឡែក ក្រសួងការបរទេសចិនបានចេញសេចក្តីថ្លែងការណ៍កាលពីថ្ងៃទី២៥ ខែមីនា ថា ការបន្ថែមក្រុមហ៊ុនចិនក្នុងបញ្ជីខ្មៅរបស់អាមេរិក គឺធ្ងន់ធ្ងរណាស់ ។ ចិនសូមអំពាវនាវឱ្យអាមេរិកឈប់យកបញ្ហាសន្តិសុខជាតិមកធ្វើជាលេសដើម្បីទប់ស្កាត់ក្រុមហ៊ុនបរទេស ៕

ប្រទេសជប៉ុន ៖ កាលពីថ្ងៃទី២៦ ខែមីនា ឆ្នាំ២០២៥ សារព័ត៌មានបរទេសរាយការណ៍ថា លោកតា Iwao Hakamata អាយុ៨៩ឆ្នាំ ត្រូវបានតុលាការជប៉ុនសម្រេចឱ្យលោករួចផុតពីទោសប្រ.ហារ ជីវិតកាលពីឆ្នាំ២០២៤ ដោយសារតុលាការរកឃើញថា គ្មានទោសកំហុស ក្រោយពីលោកបានជាប់ពន្ធ.នាគាររហូតដល់៤៨ឆ្នាំ ដើម្បីរង់ចាំសាលក្រមចុងក្រោយរបស់តុលាការ ។ តុលាការបានផ្តល់ប្រាក់សំណងដល់លោក ចំនួន១លាន៤សែនដុល្លារ ឬស្មើ៨៥ដុល្លារក្នុង១ថ្ងៃ បន្ទាប់ពីលោកបានចំណាយពេលអស់ពាក់កណ្តាលជីវិតរស់នៅក្នុងពន្ធ.នាគារ ។

សារព័ត៌មាន CNN របស់អាមេរិកបានរាយការណ៍កាលពីថ្ងៃទី២៥ ខែមីនា ឆ្នាំ២០២៥ ថា លោកតា Hakamata បានទទួលប្រាក់សំណងចំនួន៨៥ដុល្លារក្នុង១ថ្ងៃ ក្រោយពីចំណាយពេលរហូតដល់៤៨ឆ្នាំ រស់នៅក្នុងពន្ធនាគារគ្មានសេរីភាព ។ ការផ្តល់ប្រាក់សំណងនេះ គឺគិតចាប់ពីថ្ងៃដែលលោកតាត្រូវបានតុលាការកាត់ទោសឱ្យជាប់ពន្ធនាគារ ដោយចោទប្រកាន់ថា បានប្រព្រឹត្តបទល្មើស ។

តាមសំណុំរឿងក្តី គឺលោក Hakamata បានធ្វើការក្នុងរោងចក្រកែច្នៃសណ្តែកសៀងមួយកន្លែងនៅខេត្តឈិស៊ុអូកាក់ ស្ថិតនៅភាគកណ្តាលប្រទេសជប៉ុន ក្រោយពីលោកចូលនិវត្តន៍ពីការងារជាអ្នកប្រដាល់ កាលពីឆ្នាំ១៩៦១ ។ រយៈពេល៥ឆ្នាំក្រោយមក សមត្ថកិច្ចក៏ចាប់ខ្លួនលោក និងចោទប្រកាន់ថា ថៅកែរបស់លោក ព្រមទាំងភរិយា និងកូន២នាក់ ត្រូវបានជនល្មើសចាក់សម្លាប់មួយគ្រួសារក្នុងផ្ទះ ។

ពីដំបូង លោក Hakamata សារភាពថា លោកជាជនល្មើសសម្លាប់ថៅកែរបស់ខ្លួន ប៉ុន្តែក្រោយមកទៀត លោកសារភាថា លោកពុំមែនជាជនល្មើសទេ ព្រោះលោកត្រូវបានសមត្ថកិច្ចធ្វើបាបរាងកាយ និងគំរាមបង្ខំឱ្យលោកសារភាពទទួលកំហុស ។ តុលាការបានកាត់ទោសប្រហារជីវិតលោកនៅឆ្នាំ១៩៦៨ បើទោះជាលោកប្រាប់តុលាការជាច្រើនលើកថា លោកជាមនុស្សស្អាតស្អំ ហើយសមត្ថកិច្ចធ្វើភស្តុតាងក្លែងក្លាយទម្លាក់កំហុសលើលោក ។

ក្រោយពីតុលាការកាត់ទោសប្រហារជីវិត លោកត្រូវបានគេបញ្ជូនទៅពន្ធនាគារ និងរស់នៅក្នុងពន្ធនាគាររហូតដល់ពាក់កណ្តាលជីវិត ដើម្បីរង់ចាំសាលក្រមចុងក្រោយរបស់តុលាការ ។ រហូតមកដល់ឆ្នាំ២០២៤ តុលាការបានសម្រេចឱ្យលោករួចទោសប្រហារជីវិត ក្រោយពីទទួលបានភស្តុតាងថ្មី គឺលទ្ធផលការពិនិត្យ DNA ស្នាមឈាមលើសម្លៀកបំពាក់សាកសព ឃើញថា គឺជាស្នាមឈាមដែលគេលាបពីលើក្រោយកើតហេតុ ។

ករណីរបស់លោក Hakamata ធ្វើឱ្យមហាជនរិះគន់តុលាការ និងអំពាវនាវឱ្យលើកលែងទោសប្រហារជីវិតនៅប្រទេសជប៉ុន ។ មេធាវី និងប្អូនស្រីរបស់លោកជឿថា ប្រាក់សំណងដែលលោក Hakamata ទទួលបាន ពុំអាចជំនួសពេលវេលាដែលលោកបាត់បង់ក្នុងពន្ធនាគារឡើយ បើទោះជាប្រាក់សំណងនេះច្រើនក្តី បើធៀបនឹងអ្នកទោសផ្សេងទៀតនៅជប៉ុនដែលត្រូវតុលាការវិនិច្ឆ័យខុស ៕

កាលពីថ្ងៃទី២៦ ខែមីនា ឆ្នាំ២០២៥ គណៈកម្មការសហភាពអឺរ៉ុបបានអំពាវនាវឱ្យពលរដ្ឋ ដែលរស់នៅបណ្តាប្រទេសជាសមាជិកសហភាពអឺរ៉ុប ទិញស្បៀងអាហារស្តុកទុក និងត្រៀមសម្ភារៈប្រើប្រាស់ចាំបាច់ឱ្យបានគ្រប់គ្រាន់ សម្រាប់ការបរិភោគយ៉ាងហោចណាស់៣ថ្ងៃ ឬ៧២ម៉ោង ។ គណៈកម្មការនេះសង្កត់ធ្ងន់ថា ហានិភ័យផ្សេងៗអាចនឹងកើតឡើងគ្រប់ពេលវេលាដោយសារសង្គ្រា.មអូសបន្លាយ ហើយពលរដ្ឋនៅអឺរ៉ុបគួរតែត្រៀមខ្លួនទប់ទល់នឹងស្ថានការណ៍បត់បែន ។

តាមការផ្សព្វផ្សាយរបស់គណៈកម្មការសហភាពអឺរ៉ុប គឺតំបន់អឺរ៉ុបកំពុងប្រឈមនឹងហានិភ័យ និងភាពមិនប្រាកដប្រជា ជាច្រើនដូចជា ៖ ហានិភ័យដោយសារសង្គ្រាមរវាងរុស្ស៊ី និងអ៊ុយក្រែន ដែលធ្វើឱ្យក្នុងតំបន់កាន់តែមានភាពតានតឹងខ្លាំង ព្រមទាំងហានិភ័យពីការបំផ្លិចបំផ្លាញ, ការបំផ្លាញហេដ្ឋារចនាសម្ព័ន្ធ និងសង្គ្រាមអេឡិចត្រូនិក ។ ហេតុនេះ ពលរដ្ឋនៅអឺរ៉ុបគួរត្រៀមខ្លួនទប់ទល់នឹងស្ថានការណ៍អាសន្ន ព្រមទាំងត្រៀមសម្ភារៈចាំបាច់ឱ្យគ្រប់គ្រាន់ និងទិញស្បៀងអាហារសំខាន់ៗស្តុកទុក យ៉ាងហោចណាស់ អាចបរិភោគបាន៣ថ្ងៃ ។

សារព័ត៌មាន CNN រាយការណ៍ថា សង្គ្រាមរវាងប្រទេសរុស្ស៊ី និងអ៊ុយក្រែន បានអូសបន្លាយរហូតដល់ឆ្នាំ២០២៥ ដែលធ្វើឱ្យប្រទេសនានានៅអឺរ៉ុបគិតថា ពលរដ្ឋរបស់ខ្លួនគួរត្រៀមខ្លួនទប់ទល់នឹងសង្គ្រាម ។ លើសពីនេះ ការត្រឡប់មកកាន់តំណែងឡើងវិញរបស់ប្រធានាធិបតីអាមេរិក លោក Donald Trump និងមន្ត្រីរដ្ឋាភិបាលរបស់លោក ដែលបានបង្ហាញគោលជំហរយ៉ាងច្បាស់ថា អាមេរិកចង់ប្រឈមមុខជាមួយតំបន់អឺរ៉ុប ជាពិសេស ការចូលរួមក្នុងអង្គការណាតូ ។ ហេតុនេះ ធ្វើឱ្យបណ្តាប្រទេសអឺរ៉ុបត្រៀមកម្លាំងទ័ពរៀងៗខ្លួន ។

ប្រធានគណៈកម្មការអឺរ៉ុប លោកស្រី Ursula von der Leyen និយាយថា ៖ «យើងគួរតែត្រៀមខ្លួន ពីព្រោះពលរដ្ឋយើង ប្រទេសជាសមាជិករបស់យើងត្រូវការសិទ្ធិការពារខ្លួន និងឆ្លើយតបយ៉ាងឆាប់រហ័ស ពេលអាសន្នមកដល់» ។

គណៈកម្មការសហភាពអឺរ៉ុបបានណែនាំឱ្យពលរដ្ឋក្នុងជាសមាជិកត្រៀមខ្លួន ស្របពេលប្រទេសជាច្រើននៅតំបន់អឺរ៉ុបបង្កើតផែនការថ្មីៗសម្រាប់ត្រៀមខ្លួន ដូចជា ៖ បារាំងបានបង្កើតសៀវភៅណែនាំពលរដ្ឋពីវិធីយករួចខ្លួនពីហេតុការណ៍គ្រោះថ្នាក់ ។ រីឯអាល្លឺម៉ង់បានអប់រំពលរដ្ឋពីវិធីការពារខ្លួន និងគួរធ្វើដូចម្តេចពេលកើតសង្គ្រាមនៅអឺរ៉ុប ឬពេលរុស្ស៊ីឈ្លានពានអឺរ៉ុប ៕