បរទេស ៖ បន្ទាប់ពីការតម្លើងអត្រាពន្ធសងសឹកគ្នាទៅវិញទៅមក ពេលនេះចិន និង អាមេរិក បានសម្រេចធ្វើការណាត់ជួបគ្នាដើម្បីការពិភាក្សា និងឈានដល់កិច្ចព្រមព្រៀងមួយ ដើម្បីកាត់បន្ថយអត្រាពន្ធគយដែលបានតម្លើងដាក់គ្នាកន្លងមក មកនៅត្រឹមកម្រិតទាបមួយជាបណ្ដោះអាសន្ន ព្រមទាំងសម្រេចកំណត់ពេល ៩០ថ្ងៃ ដើម្បីចរចារគ្នាសម្រេចបន្ថែមនៅពេលខាងមុខបន្តទៀត។

យោងតាមសារព័ត៌មានបរទេស CNBC កាលពីថ្ងៃចន្ទ ទី១២ នេះ មន្រ្តីជាន់ខ្ពស់នៃប្រទេសហាអំណាចសេដ្ឋកិច្ចទាំងពីរ គឺលោក Scott Bessent រដ្ឋមន្រ្តីក្រសួងរតនាគារអាមេរិក និង លោក He Lifeng ឧបនាយករដ្ឋមន្ត្រីចិន បានជួបពិភាក្សាគ្នាទ្វេភាគី នៅទីក្រុង Geneva ក្នុងការចរចាស្វែងរកដំណោះស្រាយលើបញ្ហាពន្ធគយខ្ពស់ ដែលបានធ្វើឱ្យប្រទេសមហាអំណាចសេដ្ឋកិច្ចទាំងពីរ មានការខាតបង់យ៉ាងធ្ងន់ធ្ងរកន្លងមក។

បើតាមលោក Scott Bessent បានថ្លែងប្រាប់អ្នកកាសែតថា ភាគីទាំងពីរ បានសម្រេចដាក់លក្ខខណ្ឌផ្អាកវិធានការពន្ធគយជាបណ្ដោះអាសន្នរយៈពេល៩០ថ្ងៃសិន និងបញ្ចុះពន្ធដែលបានដំឡើងដាក់គ្នាទៅវិញទៅមកចំនួន ១១៥ភាគរយរៀងៗខ្លួន។ ផ្អែកលើការលើកឡើងនេះ ដូច្នេះបានន័យថា អាមេរិកនឹងបន្ថយពន្ធចិនពី ១៤៥% មកនៅត្រឹម ៣០% រីឯចិនក៏នឹងទម្លាក់ពន្ធរបស់អាមេរិកពី ១២៥% មកសល់ត្រឹម ១០% និងកណត់អត្រាពន្ធនេះក្នុងរយៈពេល ៩០ថ្ងៃ នឹងចាប់ផ្តើមអនុវត្តនៅពីថ្ងៃទី១៤ខែឧសភាតទៅ។ ចន្លោះពេលនេះ ភាគីទាំងពីរនឹងបន្តការពិភាក្សាបន្ថែមទៀត ដែលអាចធ្វើឡើងនៅប្រទេសចិន ឬអាមេរិក ឬប្រទេសទីបី អាស្រ័យលើការព្រមព្រៀងគ្នា។

គួរជម្រាបថា ការពិភាក្សារវាងរដ្ឋមន្រ្តីជាន់ខ្ពស់នៃប្រទេសចិន និងអាមេរិកនេះ បានចាប់ផ្តើមជាលើកដំបូង ដើម្បីបន្ថយកម្តៅសង្រ្គាមពាណិជ្ជកម្មរវាងប្រទេសទាំងពីរ តាំងពីថ្ងៃទី ០៩ខែឧសភា ក្រោយដំឡើងពន្ធដាក់គ្នាទៅវិញទៅមកដល់កម្រិតកំពូល ដែលនាំឲ្យមានភាពតានតឹងផ្នែកពាណិជ្ជកម្មជាខ្លាំង។

គួររំលឹកផងដែរថា ចាប់តាំងពីលោក Donald Trump បានឡើងកាន់តំណែង ជាប្រធានាធិបតីអាមេរិកនៅខែមករាឆ្នាំ២០២៥ មក លោកបានដំឡើងពន្ធលើទំនិញនាំចូលពីប្រទេសចិនជាបន្តបន្ទាប់ សរុបចំនួន១៤៥ភាគរយ និងប្រទេសជាដៃគូរពាណិជ្ជកម្មផ្សេងៗទៀតជាច្រើន ដែលកត្តានេះបានជំរុញឲ្យមានការរង្គោះរង្គើរដល់សេដ្ឋកិច្ចនៃពិភពលោកទាំងមូល៕

ប្រទេសថៃ ៖ យោងតាមទិន្នន័យរបស់ក្រសួងសុខាភិបាលថៃ គឺចាប់ពីថ្ងៃទី១ ខែមករា រហូតដល់ថ្ងៃទី៨ ខែឧសភា ឆ្នាំ២០២៥ មានអ្នកឆ្លងកូវីដចំនួន៤១,១៩៧នាក់ និងស្លា.ប់១៥នាក់ ។ ការឆ្លងជំងឺកូវីដរាប់ម៉ឺននាក់នេះបានធ្វើឱ្យពលរដ្ឋបារម្ភយ៉ាងខ្លាំង ជាពិសេស អាណាព្យាបាលសិស្ស ពីព្រោះជិតដល់ពេលសាលារៀនបើកបវសនកាល ប៉ុន្តែរដ្ឋាភិបាលថៃថា ស្ថានការណ៍ជំងឺកូវីដនៅប្រទេសថៃអាចគ្រប់គ្រងបាន និងសំណូមពរឱ្យពលរដ្ឋថែទាំខ្លួនតាមការណែនាំរបស់ក្រសួងសុខាភិបាល ។

រដ្ឋាភិបាលថៃបញ្ជាក់ពីស្ថានការណ៍ជំងឺកូវីដ-១៩ នៅប្រទេសថៃបច្ចុប្បន្ន គឺអាចគ្រប់គ្រងបាន បើទោះជាមានពលរដ្ឋឆ្លងជំងឺកូវីដរាប់ម៉ឺននាក់ក្តី និងសំណូមពរឱ្យពលរដ្ឋទាំងអស់អនុវត្តតាមវិធានការបង្ការជំងឺឱ្យបានម៉ឺងម៉ាត់ដើម្បីការពារការឆ្លងរាតត្បាត ។ កូវីដបានក្លាយជាជំងឺក្នុងតំបន់នៅប្រទេសថៃ ដែលមានអ្នកឆ្លងជំងឺនេះពេញមួយឆ្នាំ ជាពិសេស ពេលសាលារៀននានាជិតបើកបវសនកាល ។ នេះបើតាមការចុះផ្សាយរបស់សារព័ត៌មានថៃ TNN Thailand ។

កាលពីថ្ងៃទី១១ ខែឧសភា ឆ្នាំ២០២៥ អ្នកនាំពាក្យការិយាល័យនាយករដ្ឋមន្ត្រីថៃ លោកស្រី សាស៊ីកាន វឌ្ឍនៈចាន់ និយាយថា តាមទិន្នន័យរបស់ក្រសួងសុខាភិបាល គឺស្ថានការណ៍ឆ្លងរាតត្បាតជំងឺកូវីដនៅប្រទេសថៃបច្ចុប្បន្ន បានធ្លាក់ចុះជាបន្តបន្ទាប់ ។ នៅសប្តាហ៍ទី១៩នេះ (ចាប់ពីថ្ងៃទី៤ ដល់ថ្ងៃទី១០ ខែឧសភា ឆ្នាំ២០២៥ ) មានអ្នកឆ្លងកូវីដថ្មី ចំនួន១២,៥៤៣នាក់ ខណៈសប្តាហ៍មុន មានអ្នកឆ្លងកូវីដរហូតដល់១៤,៣៤៩នាក់ ។

រីឯចាប់ពីថ្ងៃទី១ ខែមករា រហូតដល់ថ្ងៃទី៨ ខែឧសភា ឆ្នាំ២០២៥ ប្រទេសថៃមានអ្នកឆ្លងកូវីដចំនួន៤១,១៩៧នាក់ និងស្លាប់១៥នាក់ ។ នេះចាត់ទុកថា គឺជាចំនួនតិចជាងពេលវេលាដូចគ្នាកាលពីឆ្នាំ២០២៤ ដែលមានអ្នកឆ្លងកូវីដរហូតដល់៧សែននាក់ ។

បច្ចុប្បន្ន កូវីដបានក្លាយជាជំងឺក្នុងតំបន់រួចហើយ ដែលមានអ្នកឆ្លងជំងឺនេះពេញមួយឆ្នាំ ជាពិសេស នៅរដូវវស្សា និងពេលសាលារៀនបើកបវសនកាល ដែលមានការប្រមូលផ្តុំមនុស្សជាច្រើន ។ ហេតុនេះ សូមពលរដ្ឋទាំងអស់អនុវត្តតាមវិធានការបង្ការជំងឺឱ្យបានម៉ឺងម៉ាត់ ដោយលាងដៃជាមួយសាប៊ូ និងទឹកស្អាត ឬប្រើប្រាស់អាល់កុលដែលមានកំហាប់ យ៉ាងហោចណាស់៧០%, ពាក់ម៉ាស់ពេលស្ថិតនៅទីប្រជុំជនមានមនុស្សចង្អៀត, បរិភោគអាហារទើបចម្អិនឆ្អិនថ្មីៗ និងប្រើប្រាស់ចាន-ស្លាបព្រាផ្ទាល់ខ្លួន ។

បើមានអាការៈគួរឱ្យសង្ស័យ ដូចជា ៖ ក្តៅខ្លួន ក្អក និងឈឺក ចូរត្រួតពិនិត្យជំងឺកូវីដជាមួយឧបករណ៍តេស្ត ATK ហើយនៅដាច់ដោយឡែកពីអ្នកដទៃ ។ បើមានអាការៈធ្ងន់ធ្ងរ ដូចជា ៖ ពិបាកដកដង្ហើម ត្រូវប្រញាប់ទៅជួបគ្រូពេទ្យជាបន្ទាន់ ។

រដ្ឋាភិបាលថៃសូមបញ្ចាក់ថា ស្ថានការណ៍ជំងឺកូវីដនៅប្រទេសថៃស្ថិតក្នុងកម្រិតអាចគ្រប់គ្រងបាន និងសំណូមពរពលរដ្ឋចូលរួមសហការអនុវត្តវិធានការបង្ការជំងឺឱ្យបានម៉ឺងម៉ាត់ ដើម្បីការពារជំងឺឆ្លងរាតត្បាត ជាពិសេស ក្រុមងាយឆ្លង រួមមាន ៖ មនុស្សចាស់ អ្នកមានជំងឺប្រចាំកាយ កុមារតូចៗ និងស្ត្រីមានផ្ទៃពោះ ។ ករណីសង្ស័យ ពលរដ្ឋអាចសាកសួរព័ត៌មានទៅកាន់លេខទូរស័ព្ទបន្ទាន់របស់នាយកដ្ឋានគ្រប់គ្រងជំងឺ រយៈពេល២៤ម៉ោង ៕

ប្រទេសប៉ារីស ៖ រយៈពេល២០ឆ្នាំកន្លងមក ទីក្រុងប៉ារីស ប្រទេសបារាំង ត្រូវបានកែលម្អផ្លូវនានាដោយផ្លាស់ប្តូរពីផ្លូវសម្រាប់បើកបររថយន្ត ទៅជាផ្លូវថ្មើជើង ផ្លូវជិះកង់ និងបង្កើតតំបន់បៃតង ព្រមទាំងបំបាត់ចំណតរថយន្ត ចំនួន៥ម៉ឺនកន្លែង ។ ក្រោយការកែលម្អប៉ារីសទៅជាតំបន់បៃតង បានធ្វើឱ្យពលរដ្ឋរស់នៅទីក្រុងនេះទទួលបានអាកាសធាតុល្អ គ្មានខ្យល់ពុល និងពុំស្ទះចរាចរណ៍ ។

កាលពីថ្ងៃទី១១ ខែឧសភា ឆ្នាំ២០២៥ សារព័ត៌មានបរទេសរាយការណ៍ថា Airparif ជាភ្នាក់ងារឯករាជ្យតាមដានគុណភាពខ្យល់នៅទីក្រុងប៉ារីស ឱ្យដឹងថា ចាប់ពីឆ្នាំ២០០៥ រហូតមក កម្រិតភាគល្អិតធូលី (PM 2.5) នៅទីក្រុងប៉ារីស បានធ្លាក់ចុះ៥៥% ដោយសាររដ្ឋាភិបាលបារាំងអនុវត្តបទប្បញ្ញត្តិ និងគោលនយោបាយសាធារណៈ ព្រមទាំងកាត់បន្ថយផ្លូវចរាចរណ៍ និងហាមប្រើប្រាស់យានជំនិះដែលបង្កខ្យល់ពុលខ្លាំងបំផុត ។

បើមើលផែនទីបង្ហាញខ្យល់ពុលលើអាកាសនៅទីក្រុងប៉ារីស ឃើញថា កាលពី២០ឆ្នាំមុន ទីក្រុងប៉ារីសទាំងមូលពោរពេញទៅដោយខ្យល់ពុលលើអាកាសស្ទើរគ្រប់កន្លែង ហើយកម្រិតខ្យល់ពុល គឺខ្ពស់ជាងការកំណត់របស់សហភាពអឺរ៉ុបទៅទៀត ដោយសារការដុតប្រេងឥន្ធនៈហ្វូស៊ីល ។ ប៉ុន្តែនៅឆ្នាំ២០២៣ ខ្យល់ពុលក្នុងទីក្រុងត្រូវបានកាត់បន្ថយច្រើន ។

តាំងពីឆ្នាំ២០១៤ អភិបាលក្រុងប៉ារីស លោកស្រី Anne Hidalgo បានជំរុញឱ្យអនុវត្តគោលនយោបាយទីក្រុងបៃតង ដើម្បីឱ្យប៉ារីសក្លាយជាទីក្រុងមានខ្យល់អាកាសល្អបរិសុទ្ធ គ្មានខ្យល់ពុល និងគួរឱ្យរស់នៅ ។ ចាប់ពីពេលនោះមក ផ្លូវនានាក្នុងទីក្រុងបានផ្លាស់ប្តូរទាំងស្រុង ហើយពលរដ្ឋក៏បានធ្វើដំណើរដោយថ្មើជើង និងធាក់កង់ជំនួសការបើករថយន្ត ហើយផ្លូវសម្រាប់ធាក់កង់រាប់រយគីឡូម៉ែត្រត្រូវបានបង្កើតជាបន្តបន្ទាប់ ។

ទោះពីដំបូង អ្នកនយោបាយស្តាំនិយម សមាគមម្ចាស់រថយន្ត និងអ្នកធ្វើដំណើរនៅជាយក្រុង បានប្រឆាំងនឹងគោលនយោបាយទីក្រុងបៃតងរបស់លោកស្រី Hidalgo ហើយពួកគេអះអាងថា គោលនយោបាយនេះធ្វើឱ្យការធ្វើដំណើររបស់ពួកគេកាន់តែលំបាក ប៉ុន្តែកាលពីខែមេសា ឆ្នាំ២០២៥ ពលរដ្ឋនៅទីក្រុងប៉ារីស បានបោះឆ្នោតឯកភាពឱ្យផ្លាស់ប្តូរផ្លូវ នួន៥០០ខ្សែទៀត ទៅជាផ្លូវថ្មើជើង ។

នៅឆ្នាំ២០២៤ ទីក្រុងប៉ារីស បានដំឡើងថ្លៃចំណតរថយន្តយ៉ាងឆាប់រហ័ស គឺតម្រូវឱ្យម្ចាស់រថយន្តបង់ថ្លៃចំណតលើសមុន៣ដង ខណៈផ្លូវជាង១០០ខ្សែ បានដាក់ស្លាកសញ្ញាហាមរថយន្តចូល ។ ចំណតរថយន្តជាច្រើនលែងដំណើរការ ហើយក៏ក្លាយជាកន្លែងដាំដើមឈើ និងជំនួសដោយតំបន់បៃតង ។ លោកស្រី Hidalgo អនុវត្តតាមគំនិត «15-Minute City» គឺជួយឱ្យពលរដ្ឋក្នុងទីក្រុងងាយស្រួលទទួលបានសេវាសំខាន់ៗនៅម្តុំលំនៅឋានពួកគេ ឬអាចធាក់កង់ទៅធ្វើការ ឬដើរចេញពីលំនៅឋានទៅធ្វើកិច្ចការផ្សេងៗ ។

ការអនុវត្តគោលនយោបាយទីក្រុងបៃតងបានជួយឱ្យពលរដ្ឋក្នុងទីក្រុងមានសុខភាពល្អជាងមុន ដោយសារគ្មានខ្យល់ពុលលើអាកាស ដែលជាមូលហេតុធ្វើឱ្យពលរដ្ឋកើតជំងឺបេះដូង មហារីកសួត និងជំងឺហឺត ។ ពលរដ្ឋដែលធ្លាប់បើករថយន្តបានងាកមកធាក់កង់ រីឯអ្នកជិះរថយន្តក្រុងក៏ ងាកមកធាក់កង់ដូចគ្នា ។ តាំងពីឆ្នាំ២០១៨ រហូតដល់បច្ចុប្បន្ន នៅថ្ងៃអាទិត្យដំបូងរបស់ខែនីមួយៗ គឺតំបន់មួយចំនួនក្នុងទីក្រុងប៉ារីស និងផ្លូវសងសេ លីសេ បានកំណត់ជាថ្ងៃគ្មានរថយន្តបើកតាមផ្លូវ ដើម្បីឱ្យពលរដ្ឋអាចដើរមើលទីក្រុងយ៉ាងសប្បាយចិត្ត ពុំបារម្ភពីខ្យល់ពុល ៕

ប្រទេសវៀតណាម ៖ សារព័ត៌មានបរទេសបានរាយការណ៍កាលពីថ្ងៃទី១០ ខែឧសភា ឆ្នាំ២០២៥ ថា សមត្ថកិច្ចវៀតណាមសហការជាមួយក្រុមមន្ត្រីពាក់ព័ន្ធនៅខេត្តប៊ិញហ្វឿក ចុះពិនិត្យរោងចក្រផលិតទឹកអប់ក្លែងក្លាយដ៏ធំបំផុត ដែលផលិតទឹកអប់ដោយប្រើប្រាស់ម៉ាស៊ីនវាយស៊ុតមាន់ក្នុងឆ្នាំងធំៗ ប៉ុន្តែដាក់ស្លាកសញ្ញាផលិតនៅក្រៅប្រទេស ហើយរោងចក្រនេះបានលក់ទឹកអប់ក្លែងក្លាយលើទីផ្សារ ស្មើទឹកប្រាក់រហូតដល់៥ម៉ឺនលានដុង (ឬស្មើជិត២លានដុល្លារ) ។ បន្ទាប់មក ក្រុមមន្ត្រីក៏បានរឹបអូសទឹកអប់ក្លែងក្លាយប្រមាណ២ម៉ឺនដប និងដកហូតឧបករណ៍ផលិតទឹកអប់ជាច្រើនទៀត ។

កាលពីថ្ងៃទី៩ ខែឧសភា កន្លងមក ស្នងការដ្ឋាននគរបាលខេត្តប៊ិញហ្វឿក បានរៀបចំពិធីប្រគល់រង្វាន់ពិសេសដល់មន្ត្រីមកពីស្ថាប័នពាក់ព័ន្ធដែលបានបំពេញការងារល្អ គឺសហការជាមួយសមត្ថកិច្ចចុះឆែកឆេររោងចក្រផលិតទឹកអប់ក្លែងក្លាយ ប៉ុន្តែដាក់ស្លាកទឹកអប់ម៉ាកល្បីៗផលិតនៅក្រៅប្រទេស ។ រោងចក្រនេះបានផលិតទឹកអប់ក្លែងក្លាយជាទ្រង់ទ្រាយធំអស់រយៈពេលជាច្រើនខែ និងមានបណ្តាញលក់ចែកចាយ ។

តាមទិន្នន័យរបស់សមត្ថកិច្ចវៀតណាមកាលពីដើមឆ្នាំ២០២៤ គឺសមត្ថកិច្ចបានពិនិត្យឃើញគណនី TikTok ជាច្រើនបង្ហោះលក់ទឹកអប់ក្លែងក្លាយជាច្រើន ដែលបន្លំដាក់ស្លាកសញ្ញាជាទឹកអប់ម៉ាកល្បីៗផលិតនៅក្រៅប្រទេស ។ សមត្ថកិច្ចក៏បានបញ្ជាក់អត្តសញ្ញាណម្ចាស់គណនីទាំងនេះថា អ្នកលក់ជាបងប្អូននឹងគ្នា គឺអ្នកស្រី ឡៃធិ ទូយិត អាយុ៣៥ឆ្នាំ និងលោក ឡៃធិ ទិញ អាយុ២៤ឆ្នាំ ហើយអ្នកទាំង២ រស់នៅទីក្រុងដងសាយ ខេត្តប៊ិញហ្វឿក ។ ពួកគេមិនត្រឹមតែលក់ទឹកអប់តាមអនឡាញប៉ុណ្ណោះទេ ប៉ុន្តែ ក៏បាន Live លក់ទឹកអប់ផងដែរ ទើបធ្វើឱ្យមានអតិថិជនច្រើន ។

កាលពីថ្ងៃទី២៣ ខែឧសភា ឆ្នាំ២០២៤ សមត្ថកិច្ចខេត្តប៊ិញហ្វឿក សហការជាមួយមន្ត្រីពាក់ព័ន្ធបានចុះត្រួតពិនិត្យរោងចក្រ២កន្លែង ព្រមទាំងទីតាំងផលិតទំនិញរបស់អ្នកស្រី ឡៃធិ ទូយិត និងស្វាមី ព្រមទាំងលោក ឡៃធិ ទិញ ត្រូវជាប្អូនប្រុស ។ សមត្ថកិច្ចបានពិនិត្យឃើញទឹកអប់ប្រមាណ២ម៉ឺនដប បិទស្លាក «Ivy Dubai» និង «Ivy Parfum» ព្រមទាំងបិទស្លាកទឹកអប់ល្បីៗជាច្រើនទៀត ។ ក្រៅពីនេះ ក៏មានដបទឹកអប់ទទេ ស្លាកសញ្ញាទឹកអប់ និងសារធាតុគីមីសម្រាប់ផ្សំជាមួយទឹកអប់ ។

ជនជាប់ចោទសារភាពថា ពួកគេបានទិញដបទឹកអប់ទទេ និងស្លាកសញ្ញាទឹកអប់ល្បីៗតាមអនឡាញ ហើយពួកគេក៏ផលិតទឹកអប់ផ្សំជាមួយសារធាតុគីមីក្នុងឆ្នាំងលោហៈធំៗ ដោយប្រើប្រាស់ម៉ាស៊ីនវាយស៊ុតមាន់ដើម្បីកូរគ្រឿងផ្សំក្នុងចូលគ្នា ។ បន្ទាប់មក ពួកគេយកគ្រឿងផ្សំចេញពីឆ្នាំងមកច្រកក្នុងកាន ឬដបធំៗ ទើបច្រកក្នុងដបទឹកអប់ ហើយបិទស្លាកផលិតនៅក្រៅប្រទេស ដូចជា ៖ «Made in U.A.E» ដើម្បីកុហកអតិថិជន ។ ទឹកអប់ភាគច្រើនបានដាក់លក់តាមកម្មវិធីផ្សេងៗក្នុងអនឡាញ និង Live លក់ផ្ទាល់ ។

ចាប់ពីខែមករា ឆ្នាំ២០២៣ រហូតដល់ពេលសមត្ថកិច្ចចាប់ខ្លួន ជនជាប់ចោទបានលក់ទឹកអប់ក្លែងក្លាយអស់ជាច្រើនដប ស្មើទឹកប្រាក់៥ម៉ឺនលានដុង (ឬស្មើជិត២លានដុល្លារ) ។ សមត្ថកិច្ចខេត្តប៊ិញហ្វឿក ឱ្យដឹងថា វាជាការផលិតទឹកអប់ក្លែងក្លាយមានទ្រង់ទ្រាយធំបំផុតក្នុងតំបន់ ហើយការចាប់ខ្លួនជនល្មើស គឺដើម្បីដាស់តឿនអ្នកចូលចិត្តប្រើប្រាស់ទឹកអប់ ឱ្យប្រុងប្រយ័ត្នទំនិញក្លែងក្លាយលើទីផ្សារ ។

អ្នកលក់ទំនិញក្លែងក្លាយតែងតែ Live លក់ដោយផ្ទាល់ដើម្បីឱ្យអតិថិជនមានទំនុកចិត្ត ហើយពួកគេអះអាងថា វាជាទំនិញម៉ាកល្បីៗផលិតនៅក្រៅប្រទេស ប៉ុន្តែលក់ក្នុងតម្លៃពិសេស ។ អតិថិជនគួរប្រយ័ត្ន និងទិញទំនិញពីបណ្តាញចែកចាយផ្លូវការ ឬពិនិត្យប្រភព និងម៉ាកឱ្យបានល្អិតល្អន់មុនពេលប្រើប្រាស់ ជាពិសេស គ្រឿងសម្អាង ចំណីអាហារ និងថ្នាំពេទ្យ ដែលប៉ះពាល់សុខភាពដោយផ្ទាល់ ៕

សារព័ត៌មានថៃរាយការណ៍ថា ក្រោយកើតរញ្ជួយដីយ៉ាងខ្លាំងក្លានៅមីយ៉ាន់ម៉ា ធ្វើឱ្យពលរដ្ឋថៃបារម្ភយ៉ាងខ្លាំងពេលទទួលបានព័ត៌មានរញ្ជួយដីកើតឡើងនៅប្រទេសជិតខាងថៃ ដោយសារមាន Aftershock កើតឡើងនៅថៃជាបន្តបន្ទាប់ ។ កាលពីថ្ងៃទី១១ ខែឧសភា ឆ្នាំ២០២៥ ភ្នាក់ងារតាមដានគ្រោះរញ្ជួយដីប្រទេសថៃរាយការណ៍ថា មានរញ្ជួយដីកើតឡើងនៅភាគខាងជើងកោះស៊ូម៉ាត្រា ប្រទេសឥណ្ឌូណេស៊ី ស្មើកម្រិត៦.៣រិចទ័រ ជម្រៅ៤៧គីឡូម៉ែត្រ ដែលមានចំណុចកណ្តាលស្ថិតនៅភាគនិរតីស្រុកមឿង ខេត្តសាទូន របស់ថៃ ប្រមាណ៤៩២គីឡូម៉ែត្រ ធ្វើឱ្យពលរដ្ឋថៃបារម្ភពីស៊ូណាមិ ។

តាមការវាយតម្លៃបឋម រញ្ជួយដីនេះពុំបានធ្វើឱ្យប៉ះពាល់ដល់ប្រទេសថៃទេ ប៉ុន្តែពលរដ្ឋរស់នៅខេត្តភាគខាងត្បូងជាច្រើនរបស់ថៃ ដូចជា ៖ ខេត្តសុងក្លា សាទូន ភូកេត និងត្រាំង បានទទួលកម្លាំងរំញ័រដូចៗគ្នា ។ ទោះយ៉ាងណា នៅពុំទាន់មានសេចក្តីរាយការណ៍ពីការខូចខាតទ្រព្យសម្បត្តិ និងមនុស្សស្លាប់ទេ ហើយភ្នាក់ងារតាមដានគ្រោះរញ្ជួយដីថៃ នឹងតាមដានស្ថានការណ៍ រួមទាំងពិនិត្យទិន្នន័យបន្ថែមទៀត ហើយបើទទួលបានព័ត៌មានបន្ថែម ភ្នាក់ងារនឹងជូនដំណឹងភ្លាមៗឱ្យពលរដ្ឋថៃបានជ្រាប ។

ពលរដ្ឋរស់នៅខេត្តភាគខាងត្បូងថៃ ដូចជា ៖ ភូកេត សុងក្លា និងត្រាំង រាយការណ៍ថា ពួកគេទទួលបានកម្លាំងរំញ័រដូចៗគ្នា ដោយសាររញ្ជួយដីកើតឡើងនៅភាគខាងជើងកោះស៊ូម៉ាត្រា ប្រទេសឥណ្ឌូណេស៊ី ៖

-នៅឃុំផៈវង់ ស្រុកមឿងសុងក្លា ខេត្តសុងក្លា ៖ ពលរដ្ឋរស់នៅអគារទី៤ មានអារម្មណ៍ថា ញ័រខ្លួន រីឯទឹកក្នុងធុងផ្អៀងទៅមក
-នៅឃុំហាតយ៉ៃ ស្រុកហាតយៃ ខេត្តសុងក្លា ៖ ពលរដ្ឋសម្រាកនៅមន្ទីរពេទ្យជាន់ទី៥ មានអារម្មណ៍ថា គ្រែរង្គើតិចៗ ។ រីឯពលរដ្ឋរស់នៅអគារជាន់ទី៦ មានអារម្មណ៍ស្រាលខ្លួន ហើយទឹកក្នុងធុងផ្អៀងទៅមក
-នៅឃុំកៈធូ ស្រុកកៈធូ ខេត្តភូកេត ៖ ពលរដ្ឋរស់នៅខុនដូជាន់ទី៤ រង្គើបន្ទប់ ចាប់ពី៣វិនាទី ទៅ៤វិនាទី និងរង្គើទូរសម្លៀកបំពាក់
-នៅឃុំតាឡាតយ៉ៃ ស្រុកមឿងភូកេត ខេត្តភូកេត ៖ ពលរដ្ឋរស់អគារជាន់ទី៣ ម្តុំស្ពានថ្ម ដែលសម្រាកលើសាឡុងមានអារម្មណ៍សាឡុងរង្គើ ខណៈភ្លើងនៅលើពិដានរំកិលតិចៗ
-នៅឃុំរ៉ាជឆាដា ស្រុកមឿងភូកេត ខេត្តភូកេត ៖ ពលរដ្ឋនៅអគារមន្ទីរពេទ្យខេត្តភូកេត មានអារម្មណ៍វិលមុខ ចង់សន្លប់
-នៅឃុំថាប់ថៀង ស្រុកមឿងត្រាំង ខេត្តត្រាំង ៖ ពលរដ្ឋនៅខុនដូជាន់ទី៩ រាយការណ៍ថា អំពូលភ្លើង វាំងនន និងសាឡុង រង្គើទាំងអស់ ។

ភ្នាក់ងារតាមដានគ្រោះរញ្ជួយដីប្រទេសថៃរាយការណ៍ថា ក្រៅពីប្រទេសឥណ្ឌូណេស៊ី រញ្ជួយដីបានកើតឡើងនៅថៃ និងប្រទេសជិតខាងជាញឹកញាប់ ។ ជាក់ស្តែង ចាប់ពីថ្ងៃទី១០ ដល់ថ្ងៃទី១១ ខែឧសភា ឆ្នាំ២០២៥ មានរញ្ជួយដីកើតឡើងមានចំណុចកណ្តាលនៅប្រទេសមីយ៉ាន់ម៉ា ចំនួន១៦លើក និងចំណុចកណ្តាលនៅប្រទេសថៃ ចំនួន១លើក ដែលមានកម្រិតស្រាល និងគ្មានផលប៉ះពាល់ប្រទេសថៃទេ ៕