មន្រ្តីបរិស្ថានស្រែពក កំពុងប្រឈមនឹងការបាញ់តដៃអ្នកបរបាញ់សត្វព្រៃ ដោយពួកគេបានប្រើអាវុធអាកា៤៧ ខណៈមន្ត្រីបរិស្ថានកំពុងដើរល្បាត។

បើយោងតាម មន្រ្តីបរិស្ថានដែនជម្រកសត្វស្រែពក បានឱ្យដឹងថា៖” អ្នកបរបាញ់សត្វព្រៃប្រដាប់អាវុធ ចំនួន២ទៅ៣ក្រុម បានប្រើអាវុធស្វ័យប្រវត្តិ អាកា ៤៧ បំពាក់ដោយឧបករណ៍តម្រង់គោលដៅ ដែលបាញ់តទៅមិនខ្លាចមន្ត្រីឧទ្យានុក្ស”។

ហេតុការណ៍ផ្ទុះអាវុធកើតឡើង ក្រោយពីមន្ត្រីឧទ្យានុក្ស បានហៅអ្នកបរបាញ់សត្វព្រៃឱ្យឈប់ ដើម្បីសាកសួរ និងត្រួតពិនិត្យ។

នៅក្នុងហេតុការណ៍នេះ មិនបានបង្កឱ្យមន្ត្រីបរិស្ថានស្រែពកណាម្នាក់រងរបួសនោះទេ ក៏ប៉ុន្តែវាបានបង្កជាក្តីកង្វល់ដល់សុវត្ថិភាពមន្ត្រីនៅទីនោះ។

គួរបញ្ជាក់ថា ដែនជម្រកសត្វព្រៃស្រែពកជាបេះដូងនៃតំបន់ព្រៃទេសភាពខ្ពង់រាបភាគខាងកើតនៃប្រទេសកម្ពុជា ដែលមានវត្តមានសត្វកម្រជាច្រើនរស់នៅទីនោះ៕

ការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុបឆ្នាំ២០២៥ ក្រសួងអប់រំ នឹងដាក់បញ្ចូលសំណួរ PISA ដោយផ្ដោតលើមុខវិជ្ជាភាសាខ្មែរ និងប្រវត្តិវិទ្យា។

យោងតាម ឯកឧត្តមបណ្ឌិតសភាចារ្យ ហង់ជួន ណារ៉ុន បានលើកឡើងថា៖”ការបញ្ចូលសំណួរ PISA នេះ មិនមែនបញ្ជូលទាំងស្រុងនោះទេ ដោយយើងបញ្ចូលបន្តិចម្ដងៗចាប់ផ្ដើមពីសំណួរមួយចំនួនតែប៉ុណ្ណោះ”។
តេស្ត PISA គឺជាកម្មវិធីវាយតម្លៃអន្តរជាតិដែលរៀបចំឡើងដោយអង្គការសហប្រតិបត្តិការ និងការអភិវឌ្ឍសេដ្ឋកិច្ច (OECD)។

គោលបំណងចម្បងរបស់ PISA គឺដើម្បីវាយតម្លៃ និងកែលម្អប្រព័ន្ធអប់រំទូទាំងពិភពលោកដោយផ្តោតលើការធានាថា សិស្សទាំងអស់មានសមត្ថភាពគ្រប់គ្រាន់ក្នុងការចូលរួមយ៉ាងមានប្រសិទ្ធភាពក្នុងសង្គម និងសេដ្ឋកិច្ច។

ជាទូទៅ កម្មវិធីនេះត្រូវបានរៀបចំឡើងជារៀងរាល់៣ឆ្នាំម្តង ដើម្បីវាយតម្លៃចំណេះដឹង និងជំនាញរបស់សិស្សអាយុ១៥ឆ្នាំ ក្នុងវិស័យគណិតវិទ្យា វិទ្យាសាស្ត្រ និងការអាន។

ហើយនៅក្នុងឆ្នាំនេះ ក្រសួងអប់រំ ក៏បានដាក់បញ្ចូល PISA ទៅក្នុងការប្រឡងសញ្ញាបត្រមធ្យមសិក្សាទុតិយភូមិ ដែលជាលើកទីមួយមិនធ្លាប់មាន៕

នៅឆ្នាំនេះ ទេវតាឆ្នាំថ្មី ឆ្នាំម្សាញ់ នឹងយាងចុះមកជម្ពូទ្វីបនាវេលាទៀបភ្លឺ ថ្ងៃចន្ទ ២រោច ខែចេត្រ ត្រូវនឹងថ្ងៃទី១៤ ខែមេសា ឆ្នាំ២០២៥ វេលាម៉ោង ០៤ៈ៤៨ នាទីព្រឹក។

តាមទំនៀមទម្លាន់ ការផ្លាស់វេនទេវតាចាស់ ចូលឆ្នាំថ្មី នៅក្នុងពិធីបុណ្យចូលឆ្នាំប្រពៃណីខ្មែរ គឺតម្រូវឱ្យបុត្រីទាំង ៧អង្គ ផ្លាស់វេនគ្នាដង្ហែព្រះសិរសាកបិលមហាព្រហ្ម ដែលជាបិតា ចុះទៅបំពេញភារកិច្ចរក្សាមនុស្សលោក។

ចំពោះឆ្នាំនេះ ទេវតាឆ្នាំថ្មី ទ្រង់មានព្រះនាម គោរាគៈទេវី ជារាជបុត្រីទី២ នៃកបិលមហាព្រហ្ម គង់នៅចាតុម្មហារាជិកា ទ្រង់អម្ពរពណ៌លឿង លម្អនៅព្រះកាណ៌ដោយសៀតផ្កាអង្គារបុស្ស អភរណៈ កែវមុក្តា ភក្សាហារទ្រង់តេលំ (ប្រេងធញ្ញជាតិ មានប្រេងសណ្តែក និង ប្រេងល្ងជាដើម) ព្រះហស្តស្តាំទ្រង់ព្រះខ័ន្ធ ព្រះហស្តឆ្វេងទ្រង់ឈើច្រត់ ទ្រង់គង់ផ្ទំបិទព្រះនេត្រលើខ្នងសេ្តចព្យាគ្ឃៈ (ខ្លា) ជាយានពាហនៈ។

ជាទូទៅ រាល់ពេលដែលទេវធីតាផ្លាស់វេនគ្នា គឺត្រូវកាន់គុហាកែវធម្មមាលី ភ្នំកៃលាស ខេត្តហិមពាន្ត ជាទីតម្កល់ទុកនូវព្រះសិរសា កបិលមហាព្រហ្ម ជាមួយនឹងភាលៀងមួយសែនកោដិ ដង្ហែប្រទក្សិណភ្នំព្រះសុមេរុរាជ តាមផ្លូវព្រះអាទិត្យចរចំនួន ៦០នាទី មុននឹងចុះមកជម្ពូទ្វីប៕

ពិតជាប្លែកខុសពីរាល់ៗឆ្នាំ ដើម្បីអបអរសាទរកម្មវិធីសង្រ្កាន្តឆ្នាំនេះ អភិបាលខេត្តកំពង់ចាមបានត្រៀមឳ្យមានការដាក់តាំងបង្ហាញលៀសហាលប្រវែង ១ពាន់ម៉ែត្រ ដែលគិតជាបរិមាណប្រហែល៣តោន និងអាចអោយអ្នកមកលេងម្សាន្តនៅសង្រ្កាន្តខេត្តកំពង់ចាមយកបរិភោគបានដោយឥតគិតថ្លៃ។

លោក អ៊ុន ចាន់ដា ជាអភិបាលខេត្តកំពង់ចាម បានថ្លែងនៅក្នុងឳកាសដែលលោកអញ្ជើញចុះសួរសុខទុក្ខ និងនាំយកអំណោយចែកជូននាយទាហាន នាយទាហានរង និងពលទាហាន កងពលតូច ស្ថិតនៅភូមិថ្នល់កែង ឃុំត្រពាំងប្រាសាទ ស្រុកត្រពាំងប្រាសាទ ខេត្តឧត្តរមានជ័យ កាលពីព្រឹកថ្ងៃទី០៥ ខែមេសា លោកអភិបាលបានមានប្រសាសន៍ថា៖ “សង្រ្កាន្តកំពង់ចាម” នឹងមានរយៈពេល៣ថ្ងៃ លោកកំពុងតែនឹករកវិធីសាស្រ្តផ្សេងៗដើម្បីរៀបចំឳ្យមានការទាក់ទាញ បង្ករបរិយាកាសសប្បាយដល់ប្រជាពលរដ្ឋឋ ដូចនេះឆ្នាំនេះកំពង់ចាម នឹងរៀបចំលៀសហាលចំនួន៣តោន នៅថ្ងៃទី១៥ ខែមេសា ពោលគឺថ្ងៃចូលឆ្នាំខ្មែរថ្ងៃទី២ ចាប់ពីម៉ោង ២:៣០នាទីរសៀលតទៅ នៅបរិវេណមុខសាលាខេត្តកំពង់ចាម រហូតដល់ទីតាំងវេទិកាអុំទូក។

សូមជម្រាបថា លៀសហាលខេត្តកំពង់ចាម គឺមានកេរ្តិ៍ឈ្មោះល្បីទូទាំងប្រទេស ដោយមានទាំងគុណភាពសាច់ល្អ ការច្នៃគ្រឿងផ្សុំអោយមានឳជារសឆ្ងាញ់ ព្រមទាំងមានច្រើនជម្រើស ច្រើនរសជាតិថែមទៀតផងសព្វថ្ងៃនេះ។ ដូចនេះ ការរៀបចំតាំងបង្ហាញលៀសហាលប្រវែង ១ពាន់ម៉ែត្រ ដែលមានទម្ងន់ប្រមាណ៣តោននេះ នឹងក្លាយជាចំណុចទាក់ទាញមួយផ្នែកទៀតនៅក្នុងកម្មវិធីសង្រ្កាន្តខេត្តកំពង់ចាមឆ្នាំ២០២៥នេះ។

គួរបញ្ជាក់ថា សង្រា្កន្តខេត្តកំពង់ចាមក្នុងឆ្នាំនេះនឹងមានរៀបចំនូវកម្មវិធីសប្បាយៗ និងការតាំងបង្ហាញប្លែកភ្នែកជាច្រើនរួមមាន៖ លៀសហាល៣តោនញាំដោយឥតគិតថ្លៃ, ពាងទឹចំនួន២៤១ , មានWiFi ប្រើដោយសេរី, ល្បែងប្រជាប្រិយច្រើនអនេក, ការបាញ់ពពុះសាប៊ូលេង, ការប្រគុំតន្រ្តីខ្នាតយក្ស, ការប្រកួតប្រដាល់, ការតាំងពិពណ៌ ។ល។

ចំណាយពេលធ្វើដំណើរប្រហែលជាង 40នាទី ពីទីក្រុងភ្នំពេញ យើងនឹងមកដល់ភ្នំប្រសិទ្ធ ដែលនៅលើភ្នំប្រសិទ្ធត្រៃត្រឹងមានប្រាសាទដ៏ចំណាស់មួយមានឈ្មោះថា “ប្រាសាទស្រីគ្រប់លក្ខណ៍” ដែលកំពុងសង្ញំខ្លួនយ៉ាងស្ងប់ស្ងាត់ ព្រោះពុំសូវមានភ្ញៀវទេសចរទៅទស្សនាច្រើនឡើយ។

“ប្រាសាទស្រីគ្រប់លក្ខណ៍” មានទីតាំងស្ថិតនៅភូមិតាពេជ្រ ឃុំឃ្លាំង ស្រុក ពញាឮ ខេត្តកណ្តាល ដែលមានចម្ងាយប្រមាណ ២៧ គីឡូម៉ែត្រ ភាគអាគ្នេយ៍រាជធានីភ្នំពេញ។ តាមរយៈការចារទុកនៅលើសិលាចារឹក ប្រាសាទនេះត្រូវបានសាងសង់ឡើងក្នុងរជ្ជកាលរបស់ព្រះបាទជ័យវរ្ម័នទី ១ (៦៥៥-៦៨១ នៃ គ . ស ) ដើម្បីឧទ្ទិសដល់ព្រហ្មញ្ញសាសនា ( សិវនិកាយ ) ។

ប្រាសាទស្រីគ្រប់លក្ខណ៍ សាងសង់ដោយថ្មឥដ្ឋ មានក្បាច់រចនាយ៉ាងល្អប្រណិត ប៉ុន្តែដោយសារការញាំញីដោយសង្រ្គាម បូជនីយដ្ឋានដ៏សំខាន់នេះ ត្រូវបានសង្គ្រាម និងជនទុច្ចរិតបំផ្លាញខ្ទេចខ្ទីអស់សូម្បីតែគ្រឹះប្រាសាទធ្វើអំពីថ្មបាយក្រៀម ក៏ត្រូវគេគាស់រំលើងដែរ ។

ក្រុមអ្នកជំនាញបានឃើញមានសំណល់ស្ថាបត្យកម្មប្រាសាទថ្មធំមួយទៀតស្ថិតនៅប្រមាណជា ១៥ ម៉ែត្រពីខ្លោងទ្វារប្រាសាទឥដ្ឋខាងលើនេះ ។ តាមការសិក្សាដោយក្រុមជំនាញប្រាសាទថ្មនោះជា សំណង់ស្ថាបត្យកម្មសម័យអង្គរ ស្ថិតក្នុងរចនាបថកោះកេរ ។ ប្រាសាទគ្រាន់តែបានបន្សល់ទុកនូវចម្លាក់មួយចំនួន ជាពិសេសបំណែកក្បាច់ ផ្តែរ សសរស្តម្ភ ជើង ទេវរូប ធំៗ ប្រកបដោយក្បាច់រចនា គួរឲ្យចាប់អារម្មណ៍ ។

ទិដ្ឋភាពនៅជុំវិញប្រាសាទ គឺមានដើមរុក្ខជាតិតូចធំដែលដុះនៅលើភ្នំ មានសម្រស់ស្រស់បំប្រងគួរអោយចង់គយគន់។ មិនតែប៉ុណ្ណោះ នៅទីនេះមិនមែនត្រឹមជាកន្លែងសម្រាប់ទេសចរមកទស្សនាកម្សាន្តប៉ុណ្ណោះទេ ប៉ុន្តែប្រាសាទ និងភ្នំនៅទីនេះ ថែមទាំងជាទីកន្លែងសក្ការៈដែលស័ក្តិសិទ្ធមួយផងដែរ ដែលមិនថាតែប្រជាជនក្នុងតំបន់នោះទេ លើសពីនេះក៏មានអ្នកមកពីចម្ងាយស្កាត់មកបន់ស្រន់ផងដែរ។

ជារឿងគួរសោកស្ដាយ ដោយសារដំបូលខាងលើ ជញ្ជាំង និងផ្នែកខាងក្នុងនៃប្រាសាទនេះខូចខាតយ៉ាងធ្ងន់ធ្ងថនៅសម័យខ្មែរក្រហម ហើយត្រូវបានគេសាងសង់គ្រោងដែកគ្របដោយស័ង្កសីជំនួសវិញ។

ប្រសិនបើអ្នកមិនទាន់ដឹងថាគួរធ្វើដំណើរកម្សាន្តទៅទីណានាឳកាសពិធីបុណ្យចញលឆ្នាំខាងមុខនេះទេ អ្នកអាចមកកម្សាន្តនៅតំបន់នេះបាន ព្រោះក្រៅពី “ប្រាសាទស្រីគ្រប់លក្ខណ៍” នេះ នៅលើភ្នំក៏មានក្យូសសម្រាប់អង្គុយ និងស្រស់ស្រូបអាហារបស់បងប្អូនអាជីវករក្នុងតំបន់ផងដែរ៕