បរទេស ៖ មហាសេដ្ឋីលំដាប់ថ្នាក់ពិភពលោក គឺលោក Bill Gates បានធ្វើការព្យាករណ៍ទុកមុនថា ៖ នៅក្នុងរយៈពេល១០ឆ្នាំទៅមុខទៀត បច្ចេកវិទ្យាបញ្ញាសិប្បនិមិត្ត (AI) នឹងអាចដើរតួនាទីជំនួសឲ្យគ្រូបង្រៀន វេជ្ជបណ្ឌិត និង នៅក្នុងការងារជាច្រើនផ្សេងទៀត។

ការលើកឡើងរបស់ស្ថាបនិកក្រុមហ៊ុន Microsolf រូបនេះត្រូវបានធ្វើឡើងនៅក្នុងបទសម្ភាសន៍មួយនៃកម្មវិធី “The Tonight Show” ជាមួយពិធីករដ៏ល្បីលោក Jimmy Fallon កាលពីខែកុម្ភៈកន្លងទៅនេះ។

នៅពេលត្រូវបានសួរនាំអំពីផ្នែកបច្ចេកវិទ្យា លោក Bill Gates បាននិយាយថា ៖ លទ្ធផលនៃភាពជឿនលឿនយ៉ាងឆាប់រហ័សនៅក្នុងបច្ចេកវិទ្យាដែលដំណើរការដោយ AI បានអនុញ្ញាតឲ្យមានការប្រើប្រាស់ស្ទើរតែគ្រប់ទិដ្ឋភាពនៃជីវិតរបស់យើង រួមទាំងផ្នែវេជ្ជសាស្រ្ត ដែលរាប់ចាប់តាំងពីថ្នាំសង្កូវ និងការធ្វើរោគវិនិច្ឆ័យ មានភាពប្រសើរឡើង រហូតដល់ AI អាចក្លាយជាជំនួយការនិម្មិតដល់ក្រុមគ្រូពេទ្យ និងអាចក្លាយជាអ្នកបង្រៀនបានផងដែរ។

ក្នុងនោះផងដែរ លោក Jimmy បានសួរទៅកាន់លោក Bill Gates ថា ៖ “តើមនុស្សនៅតែជាតម្រូវការសម្រាប់ការងារទៀតដែរ ឬទេ?” លោក Bill Gates បានឆ្លើយវិញថា ៖ តម្រូវការគឺនៅតែមាន ប៉ុន្តែនឹងមិនមានច្រើនឡើយ ព្រោះAI នឹងអាចបំពេញបានស្ទើគ្រប់ភារកិច្ច ជាពិសេសវាមិនមានគិតថ្លៃឡើយ។

នៅក្នុងបទសម្ភាសន៍មួយទៀត មហាសេដ្ឋីរូបនេះបាននិយាយថា ៖ វាមានភាពស៊ីជម្រៅ និងគួរឱ្យខ្លាចបន្តិច ព្រោះវាកំពុងកើតឡើងយ៉ាងលឿន ហើយមិនមានព្រំដែនកំណត់ទេ។

ដោយឡែក CEO របស់ Microsoft AI លោក Mustafa Suleyman បានប្រឆាំងនឹងការបន្តការរីកចំរើនផ្នែកបច្ចេកវិទ្យា ដែលក្នុងរយៈពេលប៉ុន្មានឆ្នាំខាងមុខនឹងផ្លាស់ប្តូរតែគ្រប់ឧស្សាហកម្ម ហើយនឹងផ្ដល់ផលប៉ះពាល់ “អស្ថិរភាពយ៉ាងខ្លាំង” លើកម្លាំងពលកម្មរបស់មនុស្ស។

យ៉ាងណាមិញ ការជជែកវែកញែកអំពីរបៀបដែលភារកិច្ចជាច្រើននឹងត្រូវបានជំនួសដោយAI នាពេលអនាគតនេះកំពុងបន្ត ដោយមានទាំងគុណសម្បត្តិ និងគុណវិបត្តិ។ ប៉ុន្តែអ្នកជំនាញខ្លះបាននិយាយថា AI នឹងជួយមនុស្សឱ្យធ្វើការកាន់តែមានប្រសិទ្ធភាព ជាជាងការយកវាមកជំនួសមនុស្សទាំងស្រុង និងជំរុញកំណើនសេដ្ឋកិច្ចដែលនាំទៅរកភាពមានការងារធ្វើកាន់តែច្រើន៕

ប្រទេសថៃ ៖ ព្យុះរដូវក្តៅបានបោកបក់មកលើបណ្តាខេត្តជាច្រើនរបស់ថៃ ដូចជា ៖ ខេត្តប៉ាធុមថានី នគរាជសីម៉ា តាក និងពិស្នុលោក ក្នុងនោះខេត្តមួយចំនួនមានដុំទឹកកកតូចៗធ្លាក់លើដំបូលលំនៅឋាន រួមទាំងរថយន្តខូចខាតជាច្រើន ដែលពលរដ្ឋចាត់ទុកថា វាជាខ្យល់ព្យុះមានកម្លាំងខ្លាំងបំផុតក្នុងរយៈពេលជាច្រើនឆ្នាំ ។ រីឯការិយាល័យធនធានទឹកជាតិបានណែនាំពលរដ្ឋរស់នៅខេត្តកាឡាស៊ីន ខនគែន រ៉យអេត និងឆ័យភូមិ ប្រុងប្រយ័ត្នទឺកជំនន់ហូរពីតំបន់ព្រៃភ្នំ នៅខែឧសភា ។

សារព័ត៌មានថៃរាយការណ៍ថា កាលពីថ្ងៃទី២៧ ខែមេសា ឆ្នាំ២០២៥ ព្យុះរដូវក្តៅបានបោកបក់មកលើបណ្តាខេត្តរបស់ថៃ ដែលធ្វើឱ្យមានជំនន់ទឹកភ្លៀងក្នុងតំបន់ជាច្រើន ដូចជា ៖ បរិវេណមុខផ្សារផូនសាប់ នៅតាមផ្លូវរាំងស៊ីតប៉ាធុមថានី ស្ថិតក្នុងឃុំបានក្លាង ស្រុកមឿង ខេត្តប៉ាធុមថានី មានទឹកហូរលិចផ្លូវយ៉ាងខ្លាំងបណ្តាលឱ្យការធ្វើដំណើរកកស្ទះ ។ ពលរដ្ឋដែលធ្វើដំណើរតាមផ្លូវនេះភ័យខ្លាចពេលបើកបរឆ្លងកាត់ព្យុះភ្លៀង ដោយសារពុំធ្លាប់មានខ្យល់ខ្យុះបែបនេះពីមុនមក ។

សារព័ត៌មានថៃបានទទួលសេចក្តីរាយការណ៍ពីលោក ស៊ុមសាក់ ចាន់ថេវី អាយុ៤៨ឆ្នាំ រស់នៅខេត្តប៉ាធុមថាវី ថា ពេលភ្លៀងខ្លាំង លោកបានចតរថយន្តនៅស្ថានីយចាក់ប្រេងមួយកន្លែងដើម្បីផឹកកាហ្វេរង់ចាំឱ្យមេឃឈប់ភ្លៀង ។ ពេលនោះ លោកឮសំឡេងខ្លាំងៗលើដំបូល ក៏ចេញមកមើលឃើញថា មានដុំទឹកកកតូចៗប៉ុនមេដៃលាយឡំជាមួយទឹកភ្លៀងធ្លាក់លើដំបូល ។ លោកភ្ញាក់ផ្អើលយ៉ាងខ្លាំង ហើយក៏យកទូរស័ព្ទថតរូប និងថតវីដេអូ ពីព្រោះលោករស់នៅខេត្តប៉ាថុមថានីយូរហើយ ពុំធ្លាប់ឃើញសោះ» ។

ដោយឡែក ពលរដ្ឋរស់នៅខេត្តនគរាជសីម៉ា រាយការណ៍ថា កាលពីថ្ងៃទី២៧ ខែមេសា មានខ្យល់ព្យុះយ៉ាងខ្លាំងបណ្តាលឱ្យមានភ្លៀងធ្លាក់លាយជាមួយដុំទឹកកកតូចៗប្រមាណ ៣០នាទី ដែលពួកគេពុំដែលឃើញខ្យល់ព្យុះខ្លាំងបែបនេះទេ ។ រីឯដំបូលផ្ទះពលរដ្ឋជាច្រើនខ្នងបានបាក់រលំដោយសារខ្យល់ព្យុះ ខណៈដំបូលផ្ទះខ្លះទៀតបាក់សង្កត់លើរថយន្តចតនៅមុខផ្ទះ ។

លើសពីនេះ ព្រះពុទ្ធរូប និងអគារក្នុងបរិវេណវត្តព្រះប្រាងស៊ីដា ស្ថិតក្នុងស្រុកស៊ីដា ខេត្តនគរាជសីម៉ា បានបាក់រលំទាំងស្រុងដោយសារខ្យល់ព្យុះ ។ ព្រះចៅអធិការវត្តព្រះប្រាងស៊ីដា បានស្នើទៅអាជ្ញាធរមកជួយអន្តរាគមន៍ ដោយសារវត្តត្រូវប្រើប្រាស់អគារនេះ ។

ចំណែកនៅស្រុកមេស៊ត ខេត្តតាកវិញ ក៏មានភ្លៀងធ្លាក់ខ្លាំងលាយជាមួយដុំទឹកកកដែរ បន្ទាប់ពីខេត្តនេះមានអាកាសធាតុក្តៅយ៉ាងខ្លាំង ។ ក្រៅពីនេះ បង្គោលភ្លើង និងមែកឈើបានបាក់រលំនៅតាមផ្លូវជាច្រើនកន្លែងបណ្តាលឱ្យកកស្ទះការធ្វើចរាចរណ៍ និងដាច់ចរន្តអគ្គិសនី ។ បន្ទាប់មក ភ្នាក់ងារសង្គ្រោះបានចុះបញ្ជូនកម្លាំងមកជួយអន្តរាគមន៍ពលរដ្ឋក្នុងតំបន់រងឥទ្ធិពលដោយសារខ្យល់ព្យុះ ក្រោយពីសីតុណ្ហភាពនៅស្រុកមេស៊ត ខេត្តតាក បានកើនឡើងខ្ពស់រហូតដល់៣៩អង្សាសេ ។

ភ្លៀងធ្លាក់ខ្លាំងលាយឡំជាមួយដុំទឹកកក កាលពីថ្ងៃទី២៧ ខែមេសា កន្លងមក ធ្វើឱ្យពលរដ្ឋថៃភ្ញាក់ផ្អើលយ៉ាងខ្លាំង និងថតរូបបង្ហោះក្នុងបណ្តាញសង្គម ដោយសារពួកគេទើបតែឃើញទិដ្ឋភាពបែបនេះជាលើកដំបូង ។ អាជ្ញាធរបានប្រកាសឱ្យពលរដ្ឋចៀសវាងការបើកបរតាមផ្លូវដែលមានបង្គោលភ្លើង និងមែកឈើបាក់រលំ និងសូមឱ្យប្រុងប្រយ័ត្នក្នុងការធ្វើដំណើរ ៕

ប្រទេសអូស្ត្រាលី ៖ យុវតីម្នាក់អាយុ១៧ឆ្នាំ រស់នៅរដ្ឋឃ្វីនឡែន ប្រទេសអូស្ត្រាលី បានរៀបរាប់ពីហេតុការណ៍គួរឱ្យតក់ស្លុ.តបំផុតក្នុងជីវិត គឺពេលនាងកំពុងតែលេង TikTok សុខៗ ស្រាប់តែមានរន្ទះបា.ញ់ដំបូលផ្ទះបណ្តាលឱ្យបាក់ដំបូលចុះក្រោម និងឆេះឧបករណ៍ផ្សេងៗនៅជុំវិញខ្លួននាង ។ លើសពីនេះ នាងមានអារម្មណ៍ដូចខ្សែភ្លើងឆក់ និងត្រូវបានក្រុមគ្រួសារបញ្ជូនទៅមន្ទីរពេទ្យ ។

កាលពីថ្ងៃទី២៥ ខែមេសា ឆ្នាំ២០២៥ យុវតីអូស្ត្រាលីម្នាក់ឈ្មោះ Bloom Kermode កំពុងលេង TikTok យ៉ាងសប្បាយចិត្តនៅក្នុងផ្ទះរបស់ខ្លួន ហើយភ្លាមនោះ ស្រាប់តែមានរន្ទះបាញ់ដំបូលផ្ទះនាង ។ វាធ្វើឱ្យនាងភ័យខ្លាចយ៉ាងខ្លាំងចំពោះហេតុការណ៍ដែលកើតឡើង ខណៈឧបករណ៍នៅជុំវិញខ្លួននាងបានផ្ទុះឡើងព្រមៗគ្នា ។ នេះបើតាមការចុះផ្សាយរបស់សារព័ត៌មានបរទេស ។

យុវតីរូបនេះរៀបរាប់ថា ៖ «ខ្ញុំឮសំឡេងយ៉ាងខ្លាំង ហើយអ្វីៗគ្រប់យ៉ាងក្លាយជាពណ៌ស ខ្លួនខ្លួនក៏ចាប់ផ្តើមភ័យញ័រ ។ ពេលនោះ ខ្ញុំកាន់ទូរស័ព្ទក្នុងដៃ ទើបចរន្តភ្លើងឆ្លងចូលដៃខ្ញុំ ធ្វើឱ្យដៃខ្ញុំស្ពឹក ។ ខ្ញុំមានអារម្មណ៍ថា វាដូចគ្នានឹងខ្សែភ្លើងឆក់ ។ អ្វីៗទាំងអស់នៅជុំវិញខ្លួនខ្ញុំ ក៏ចាប់ផ្តើមឆេះខ្ទេចខ្ទី ទើបខ្ញុំប្រញាប់រត់ចេញពីផ្ទះជាមួយឆ្កែ» ។

បើតាមសេចក្តីរាយការណ៍ គឺក្រោយពេលរន្ទះបាញ់នោះ ដំបូលផ្ទះរបស់នាងបានបាក់ធ្លាក់ចុះមកក្រោម ហើយគ្រែរបស់នាងត្រូវភ្លើងឆេះ ខណៈកុងតាក់ភ្លើងរបូតផ្ទុះជាបន្តបន្ទាប់ ។ បន្ទាប់មក ក្រុមគ្រួសារក៏បានបញ្ជូនយុវតីរូបនេះទៅកាន់មន្ទីរពេទ្យ នាងរងរបួសស្រាល ។

ហេតុការណ៍នេះពុំទាន់មានការបញ្ជាក់ពីមន្ត្រីជំនាញថា តើវាបណ្តាលមកពីមូលហេតុអ្វីទេ ទើបបណ្តាលឱ្យមានរន្ទះបាញ់កើតឡើង ប៉ុន្តែមន្ត្រីជំនាញបានសំណូមពរឱ្យអ្នកលេងទូរស័ព្ទទាំងអស់ប្រុងប្រយ័ត្ន ជាពិសេស ពេលមេឃកំពុងភ្លៀង ឬមេឃខ្មៅ ។ ការប្រើប្រាស់ទូរស័ព្ទពេលអាកាសធាតុមិនល្អ គឺប្រឈមនឹងគ្រោះថ្នាក់ខ្លាំង ដូចជា ៖ បាត់បង់ទ្រព្យសម្បត្តិ និងអាយុជីវិត ៕

កាលពីថ្ងៃ ទី២៤ ខែមេសានេះ ក្រុមហ៊ុន Meta បានចេញសេចក្ដីប្រកាសនៅលើផេកផ្លូវការរបស់Facebook ពាក់ព័ន្ធនឹងការហាមទៅលើរបៀបចែករំលែកមួយចំនួន និងការដាក់ពិន័យទៅលើគណនី ឬផេកណាមួយដែលល្មើសនឹងគោលការណ៍របស់ខ្លួន។ គោលបំណងក្នុងការបង្កើតច្បាប់ហាមប្រាមថ្មីទាំងនេះ គឺដើម្បីហាមឃា..ត់សកម្មភាព និងការចែករំលែកពីគណនី ឬផេកទាំងឡាយណា ដែលបង្ករជាផលរំខាន បំពានសិទ្ធិ និងប៉ះពាល់អារម្មណ៍ដល់អ្នកប្រើប្រាស់ទូទៅ។

ទាំងនេះគឺជាការបង្ហោះដែលFacebook ចាត់ទុកថាមិនត្រឹមត្រូវតាមគោលការណ៍ និងជាការរំខានដល់អ្នកប្រើប្រាស់ផ្សេងទៀត៖
១. ការបង្ហោះ និងចំណងជើងមិនស៊ីគ្នា ៖ ការបង្ហោះរូបភាព ឬវីដែអូ ដោយភ្ជាប់ជាមួយការសរសេចំណងជើង (caption) មិនពាក់ព័ន្ធគ្នា នឹងនាំឲ្យមានការភាន់ច្រលំ បាត់បង់ចំណាប់អារម្មណ៍សម្រាប់អ្នកទស្សនា។ ដូចនេះវាជារឿងដែលមិនគួរធ្វើឡើយនៅលើ Facebook។
២. បង្ហោះមាតិការជារូបភាព ឬវីដេអូដូចគ្នាជាមួយអ្នកដទៃជាច្រើន ៖ វាសំដៅដល់រូបភាព ឬវីដេអូតែមួយ ប៉ុន្តែត្រូវបានបង្ហោះដោយគណនីខុសៗគ្នាជាច្រើន។ ការបង្ហោះរូបភាព ឬមាតិកាដែលដូចនឹងមនុស្សជាច្រើនផ្សេងទៀតនឹងត្រូវជាប់ការពិន័យរបស់Facebook ព្រោះគេចាត់ទុកថាវាជា “មាតិការរំខាន (Spammy Content) ។
៣. ការដាក់ Hashtag ច្រើន និងមិនពាក់ព័ន្ធ ៖ ការបង្ហោះមាតិកាដោយដាក់Hashtag នៅលើចំណងជើងច្រើន និងមិនមានន័យពាក់ព័ន្ធ ក៏ចាត់ទុកថាជាការផុសរំខានផងដែរ។ ផេក ឬគណនីណាដែលបង្ហោះមាតិការដោយប្រើប្រាស់វិធីសាស្រ្តបែបនេះ នឹងត្រូវដាក់ក្នុងការពិន័យរបស់ Facebook។

គួរបញ្ជាក់ថា ប្រសិនអ្នកប្រើប្រាស់ល្មើសនូវគោលការណ៍ណាមួយដែលបានកំណត់ដូចខាងលើ នោះFacebook នឹងចាត់វិធានការដាក់ពិន័យដូចជា៖
-រឹតបន្តឹងគណនី ដោយមិនឲ្យគេមើលឃើញពីការបង្ហោះ ឬហាមឃា..ត់គណនីនោះមិនឲ្យបង្ហោះ និងបញ្ចេញមតិ
-បិទមុខងាររកប្រាក់ មិនឲ្យរកចំណូលពីផេក ឬគណនីនោះទៀតឡើយ
-ក្នុងករណីធ្ងន់ធ្ងរខ្លាំង Facebook នឹងបិត ឬលុប គណនីនោះចោលតែម្ដង៕

បរទេស ៖ មានការបែ..កធ្លាយ និងនិយាយដល់ជាបន្តបន្ទាប់ពាក់ព័ន្ធនឹងប្រធានបទ កាបូបប្រណីតរបស់ប្រេនលំដាប់ពិភពលោកជាង 80% គឺផលិតនៅក្នុងប្រទេសចិន ហើយនាំចូលទីកាន់ប្រទេសនៅអឺរ៉ុបដើម្បីវាយស្លាកថាផលិតនៅប្រទេសទាំងនោះ និងដាក់លក់ក្នុងតម្លៃថ្លៃកប់ពពកទៅកាន់អតិថិជន។

នៅលើបណ្ដាញសង្គមTiktokមួយរយៈចុងក្រោយនេះ មានការផ្ទុះខ្លាំងពាក់ព័ន្ធនឹងការចោទប្រកាន់យីហោល្បីៗលំដាប់ពិភពលោកដូចជា Hermes, Chanel, Louis Vuitton និងប្រេនជាច្រើនទៀត ថាបានបោកប្រាស់អតិថិជន ដោយការដាក់លក់កាបូបក្នុងតម្លៃខ្ពស់ខ្លាំង ទាំងដែលជាក់ស្ដែងវត្ថុធាតុដើម និងការផលិតគឺធ្វើនៅក្នុងប្រទេសចិន និងមិនសាកសមនឹងតម្លៃនោះឡើយ។

ការចោទប្រកាន់នេះត្រូវបានធ្វើឡើងបន្ទាប់ពីមានម្ចាស់គណនីTikTok ម្នាក់បានចេញមុខមកអះអាងថា គាត់គឺជាអ្នកធ្វើការនៅក្នងរោងចក្រមួយក្នុងប្រទេសចិន ដែលផលិតនិងតម្លើងកាបូបប្រណីតឲ្យម៉ាកយីហោល្បីៗ និងបញ្ជូនទៅលក់នៅប្រទេសក្នុងប៉ែកអឺរ៉ុបដូចជា អាមេរិក អ៊ីតាលី និងបារាំងជាដើម។

បន្ទាប់មកក៏មានអ្នកចេញមកនិយាយជាបន្តបន្ទាប់ពីរឿងនេះ ដោយលើកឡើហស្រដៀងៗគ្នាថា ៖ ភាគច្រើននៃទំនិញប្រណីតៗរបស់ប្រេនធំៗដែលដាក់លក់នៅតាមបណ្ដារប្រទេសនៅអឺរ៉ុប រួមទាំងសហរដ្ឋអាមេរិក បានតម្លើងស្ទើរួចរាល់នៅក្នុងរោងចក្រប្រទេសចិន បន្ទាប់មកទើបបញ្ជូនចេញទៅប្រទេសទាំងនោះធ្វើការវេចខ្ចប់សារជាថ្មី និងធ្វើការវាយតែមLogoរបស់ពួកគេ។ អ្នកផលិតមាតិកានៅក្នុងTikTok ទាំងនោះថែមទាំងបានណែនាំទៅកាន់អ្នកនិយមទិញកាបូបប្រេនៗទាំងអស់ថា៖ យល់ល្អអ្នកគួរតែស្វែងរកទិញវានៅលើគេហទំព័រទំនិញចិន ឬមកទិញនៅចិនផ្ទាល់តែម្ដងទៅ ព្រោះថាទំនិញទាំងនេះមានការផលិត និងប្រើប្រាស់វត្ថុធាតុដើមដូចគ្នាទេ ខុសគ្នាតែមួយមុខគត់ នោះគឺ “តម្លៃ”។

ក្រោយមកមានមនុស្សជាច្រើន ដែលជាអតិថិជនរបស់ប្រេនល្បីៗទាំងនោះ បានស្នើសុំឲ្យមានការបកស្រាយពីក្រុមហ៊ុនថាតើវាជាការពិតដែរ ឬក៏អត់ ព្រោះថាបើវាជាការពិតនោះ ពួកគេមានការខកចិត្តខ្លាំងណាស់។ ក្នុងន័យនេះ ពួកគេមិនមែនចង់ថាទំនិញដែលផលិតនោប្រទេសចិនមានគុណភាពអន់នោះទេ ប៉ុន្តែគេចង់សំដៅដល់ការដែលប្រើប្រាស់វត្ថុធាតុដើមរបស់ចិនគឺមានតម្លៃសមរម្យ ហើយបើផលិតនៅចិននោះថ្លៃកម្លាំងពលកម្មរបស់កម្មករទាំងនោះ ក៏មិនបានខ្ពស់ដែរ ដូច្នេះប្រសិនបើពួកគេយកមកលក់ដោយដាក់តម្លៃក្នុងកាបូបមួយរាប់ពាន់ រាប់ម៉ឺនដុល្លាបែបនេះវាមិនសមហេតុផលឡើយ។ យ៉ាងណាមិញគេនៅមិនទាន់ឃើញមានប្រេនធំៗណាមួយបានចេញមកបកស្រាយចំពោះការចោទប្រកាន់នេះឡើយទេ ដោយវានៅតែស្ថិតនៅក្នុងមន្ទិលសង្ស័យរបស់មនុស្សជាច្រើនដដែល៕

រដ្ឋអូហាយ៉ូ ៖ វគ្គបណ្ដុះបណ្ដាលពាក់ព័ន្ធនឹកការគេងឲ្យបានត្រឹមត្រូវមិនមែនអនុវត្តសម្រាប់តែទារកនោះទេ ថ្មីៗនេះនៅរដ្ឋអូហាយ៉ូ នៅតាមសាលារៀនមួយចំនួនបានបន្ថែមម៉ោងថ្មីដែលបង្រៀនសិស្សក្នុងការគេងឲ្យបានលក់ស្កប់ស្កល់ជាមួយនឹងគ្រូជំនាញ ជាពិសេសគេផ្ដោតសំខាន់ទៅលើសិស្សវ័យជំទង់។

វគ្គសិក្សាថ្មីនេះ ត្រូវបានលើកឡើងនៅវិទ្យាល័យ Mansfield Senior High School គឺជាប្រធានបទមួយដែលក្មេងជំទង់ទូទាំងប្រទេសកំពុងមានបញ្ហាជាមួយ “ ការគេង ” ដោយភាគច្រើននៃក្មេងជំទង់ទាំងនោះ មិនអាចចូលគេងដោយងាយៗឡើយ។ សិស្សថ្នាក់ទី៩ម្នាក់បាននិយាយថា ៖ ជារៀងរាល់យប់គេត្រូវការមើលTikTok និងអូសមើលរហូតដល់គេគេងលក់តែម្ដង។ ដោយឡែក មានសិស្សម្នាក់ទៀតលើកឡើងថា៖ នាងតែងតែគេងលក់ខណៈពេលកំពុងជជែកគ្នាលេងជាមួយមិត្តភក្តិនៅក្នុង Group Chat ពេលយប់ជ្រៅ ។

គ្រូបង្រៀនពីសុខភាពនៅ Mansfield លោក Tony Davis ដែលបានដាក់បញ្ចូលកម្មវិធីសិក្សាថ្មីអំពីដំណេកនៅក្នុងថ្នាក់សុខភាពវិទ្យាល័យបាននិយាយថា “វាប្រហែលជាស្ដាប់ទៅរៀងចម្លែកបន្តិចក្នុងការនិយាយថាក្មេងៗនៅវិទ្យាល័យត្រូវតែរៀនជំនាញក្នុងការគេង ប៉ុន្តែអ្នកនឹងភ្ញាក់ផ្អើលបន្ទាប់ពីដឹងថាមានមនុស្សប៉ុន្មាននាក់ដែលមិនដឹងថាត្រូវគេងយ៉ាងម៉េច”។

សាស្ត្រាចារ្យជាន់ខ្ពស់នៅសាលា Stanford Graduate School of Education និងអ្នកជំនាញជាច្រើន បានណែនាំទៅកាន់អាណាព្យាបាលអំពីសារៈសំខាន់នៃការគេងបានគ្រប់គ្រាន់របស់ក្មេងជំទង់។ ការគេងគឺទាក់ទងដោយផ្ទាល់ជាមួយសុខភាពផ្លូវចិត្ត ដោយក្មេងជំទង់ត្រូវការការគេងពី 8 ទៅ 10 ម៉ោងជារៀងរាល់យប់សម្រាប់ខួរក្បាល និងរាងកាយដែលកំពុងលូតលាស់របស់ពួកគេ ប៉ុន្តែស្ទើរតែ 80% នៃក្មេងជំទង់ទាំងនោះគឺគេងបានតិចជាងនេះ។

ការស្រាវជ្រាវបង្ហាញថា ការគេងមិនគ្រប់គ្រាន់ផ្សាភ្ជាប់ដោយផ្ទាល់ជាមួយអារម្មណ៍ សុខភាព និងស្មារតីផ្លូវចិត្ត។ បច្ចុប្បន្នក្មេងៗវ័យជំទង់ជាច្រើនកំពុងជួបប្រទះនឹងការធ្លាក់ទឹកចិត្ត ការថប់បារម្ភ និងការគិតច្រើន និងចង់ធ្វើអ..ត្តឃា..ត។ ដែលកត្តាទាំងអស់នេះអាចបណ្ដាលមកពីការរីកចម្រើននៃបច្ចេកវិទ្យា កម្សោយក្នុងការគ្រប់គ្រងរបស់ឪពុកម្ដាយ រួមទាំងកត្តាសង្គមមួយចំនួនទៀត។

មូលហេតុទាំងនេះហើយ ទើបធ្វើឲ្យតាមបណ្ដារសាលារៀនមួយចំនួន ជាពិសេសក្នុងរដ្ឋOhio សហរដ្ឋអាមេរិក សម្រេចបន្ថែមម៉ោងសិក្សាថ្មីនេះ ដើម្បីឲ្យកុមារយល់ដឹងពីសារសំខាន់ក្នុងការគេង របៀបចូលគេងឲ្យបានត្រឹមត្រូវ។ ក្រៅពីរដ្ឋOhio ក៏មានសាលានៅរដ្ឋផ្សេងទៀតដូចជា Mennesota ក៏កំពុងសាកល្បងកម្មវិធីសិក្សាថ្មីនេះ ដើម្បីជួយសិស្សឲ្យបានសម្រាកគ្រប់គ្រាន់ កាត់បន្ថយអវត្តមាន សិស្សមានស្មារតីរឹងមាំ និងបង្កើនលទ្ធផលសិក្សា៕

ប្រទេសចិន ៖ ក្នុងការអភិវឌ្ឍន៍ដ៏ជឿនលឿន និងឆាប់រហ័ស នាពេលថ្មីៗនេះប្រទេសចិនបានដាក់ដំណើរការនូវបណ្ដាញអ៊ីនធើណេតល្បឿនលឿនបំផុត ជាប្រភេទបណ្ដាញអ៊ីនធើណេតពាណិជ្ជកម្ម (Commercial Network) ដែលធ្វើឲ្យប្រទេសនេះក្លាយជាប្រទេសដំបូងគេបង្អស់ដែលមានអ៊ីនធើណេតល្បឿនរហូតដល់ 10GB។

របកគំហើញនេះត្រូវបានធ្វើឡើងដោយក្រុមហ៊ុន Huawei និង China Unicom បានចាប់ផ្តើមបង្កើតរួមគ្នានូវបណ្តាញអ៊ីនធឺណេត 10GB ដំបូងបង្អស់នៅក្នុងខោនធី Sunan ដែលមានទីតាំងនៅក្នុងខេត្ត Hebei ប្រទេសចិន នេះបើតាមការរាយការណ៍របស់ Azernews ដោយដកស្រង់ចេញពីគេហទំព័របច្ចេកវិទ្យាក្នុងស្រុក Mydrivers ។

បណ្តាញនេះប្រើប្រាស់បច្ចេកវិទ្យា 50G Passive Optical Network (PON) ដែលមានល្បឿនទាញយកជិត 10GB ពោលគឺ 9,834 Mbps និងល្បឿន Upload រហូតដល់ 1,008 Mbps ដែលវាមានល្បឿនលឿនខ្លាំងជាងបណ្ដាញអ៊ីនធើណេតទូទៅ។

ល្បឿននេះអនុញ្ញាតអោយអ្នកប្រើប្រាស់អាច Download ភាពយន្តកម្រិត 4K ដែលមានទំហំ 20G ក្នុងរយៈពេលតឺជាង ២០វីនាទីប៉ុណ្ណោះ ។ អ្វីដែលរឹតតែអស្ចារ្យសម្រាប់បច្ចេកវិទ្យាមួយននេះ គឺវាត្រូវបានបង្កើតឡើងជាពិសេសសម្រាប់តម្រូវការប្រើប្រាស់លើវិស័យ Livestream, Gaming , ឧបករណ៍ VR/AR, បច្ចេកវិទ្យា Cloud និងប្រព័ន្ធអេកូឡូស៊ី។

ចំពោះការដាក់ឱ្យដំណើរការដំបូងនេះ គឺការសាកល្បងដែលគ្របដណ្តប់លើទីតាំងមួយចំនួននៅក្នុងប្រទេសចិនរួមមាន៖ Huawancheng Park និង Xiong’an High-Tech Zone។ ហើយសម្រាប់ Xiong’an គឺជាទីក្រុងអនាគត ដែលគេបានកំណត់សម្រាប់ការធ្វើតេស្តបច្ចេកវិទ្យាកម្រិតខ្ពស់។ លើសពីនេះ រដ្ឋាភិបាលគ្រោងនឹងពង្រីកបណ្តាញ 10G ទៅកាន់ទីក្រុងធំៗផ្សេងទៀតដូចជា ប៉េកាំង សិនជិន សៀងហៃ និងក្វាងចូវ ប្រសិនបើមានតម្រូវការច្រើននៃអ្នកប្រើប្រាស់។

ប្រទេសចិនឈានមុខគេនៃបច្ចេកវិទ្យា broadband សកល តាមរយៈការសាក់ប្រើប្រាស់សាកល្បងនេះ ដោយវ៉ាដាច់ប្រទេសផ្សេងទៀតដូចជា កូរ៉េខាងត្បូង អារ៉ាប់រួម និងកាតា ដែលសុទ្ធតែជាប្រទេសមានកម្រិតអ៊ីនធឺណេតកម្រិតខ្ពស់។ ហើយចិនថែមទាំងបានសន្យាថា នឹងផ្តល់សេវាអ៊ីនធើណេតដែលលឿនបំផុត និងអនុញ្ញាតឱ្យមានយុគសម័យថ្មីនៃកម្មវិធីឌីជីថលសម្រាប់អ្នកប្រើប្រាស់ និងឧស្សាហកម្មនានា៕