សហរដ្ឋអាមេរិក ៖ លោក Trump បានកាន់តំណែងជាប្រធានាធិបតីអាមេរិកម្តងទៀតក្រោយទទួលសំឡេងឆ្នោតច្រើនបំផុត ប៉ុន្តែតាមលទ្ធផលការស្ទង់មតិពលរដ្ឋអាមេរិកចំនួន១,៦៧៨នាក់ ចាប់ពីថ្ងៃទី១៧ ដល់ថ្ងៃទី២៤ ខែមេសា ឆ្នាំ២០២៥ ដោយ CNN សម្ភាសន៍តាមអនឡាញ និងទូរស័ព្ទបង្ហាញថា ប្រជាប្រិយភាពរបស់លោក Trump ធ្លាក់ចុះមុនកាន់តំណែងអាណត្តិទី២ បាន១០០ថ្ងៃ ។ លើសពីនេះ ពលរដ្ឋបានផ្តល់ពិន្ទុទាបសម្រាប់ការដោះស្រាយបញ្ហាផ្សេងៗដែលកើតឡើងនៅអាមេរិក ។

ការស្ទង់មតិរបស់ CNN ដែលធ្វើឡើងដោយអង្គការស្រាវជ្រាវ SSRS បានចុះផ្សាយកាលពីថ្ងៃទី២៧ ខែមេសា ឆ្នាំ២០២៥ គឺពលរដ្ឋអាមេរិកទទួលស្គាល់លទ្ធផលការងាររបស់លោក Trump ស្មើត្រឹម៤១% ប៉ុណ្ណោះ ។ វាជាអត្រាទាបបំផុតសម្រាប់ប្រធានាធិបតីអាមេរិកដែលទើបឈ្នះឆ្នោត និងកាន់តំណែងមិនដល់១០០ថ្ងៃ បើគិតចាប់ពីការកាន់តំណែងរបស់ប្រធានាធិបតីអាមេរិក លោក Dwight D. Eisenhower កាលពីជាង៧០ឆ្នាំមុន ។

ការទទួលស្គាល់លទ្ធផលការងាររបស់លោក Trump បានធ្លាក់ចុះ៤% ចាប់ពីខែមីនា ដល់ចុងខែមេសា ឆ្នាំ២០២៥ និងធ្លាក់ចុះ៧% បើគិតចាប់ពីចុងខែកុម្ភៈ កន្លងមក ។ ពលរដ្ឋស្មើត្រឹម២២% ប៉ុណ្ណោះ ដែលទទួលស្គាល់លទ្ធផលការងាររបស់លោក ដែលនេះជាអត្រាទាបបំផុត ខណៈពលរដ្ឋ៤៥% មិនទទួលស្គាល់លទ្ធផលការងារលោក ។

ពលរដ្ឋបានផ្តល់ពិន្ទុទាបសម្រាប់ការដោះស្រាយបញ្ហាផ្សេងៗរបស់លោក Trump ហើយទំនុកចិត្តរបស់ពលរដ្ឋទៅលើសមត្ថភាព និងការដោះស្រាយវិបត្តិសេដ្ឋកិច្ចរបស់លោកក៏ធ្លាក់ចុះដែរ ។ វិធានការដំឡើងពន្ធទំនិញរបស់លោកបណ្តាលឱ្យមានការលក់ចេញក្នុងទីផ្សារភាគហ៊ុន ហើយពលរដ្ឋបារម្ភពីតម្លៃទំនិញកើនឡើង ខណៈពលរដ្ឋត្រឹម៣៥% ទទួលស្គាល់ការដោះស្រាយអតិផរណា ធ្លាក់ចុះ៩% រីឯការទទួលស្គាល់វិធានការពន្ធធ្លាក់ចុះ៤% ។

ពលរដ្ឋឆ្លើយតបការស្ទង់មតិ ស្មើ៥២% មានទំនុកចិត្តលើសមត្ថភាពដោះស្រាយបញ្ហាសេដ្ឋកិច្ចរបស់លោក Trump ដែលធ្លាក់ចុះរហូតដល់១៣% ពីការស្ទង់មតិរបស់ CNN កាលពីខែធ្នូ ឆ្នាំ២០២៤ ។ ការផ្តល់ពិន្ទុរបស់ពលរដ្ឋទៅលើការគ្រប់គ្រងរដ្ឋាភិបាល ធ្លាក់ចុះ៦% នៅសល់ត្រឹម៤២% តាំងពីខែមីនា ឆ្នាំ២០២៥ ដោយសារលោក Trump ព្យាយាមកាត់បន្ថយមន្ត្រីរាជការយ៉ាងច្រើន ។ អ្នកឆ្លើយតបការស្ទង់មតិ៤៣% យល់ថា លោក Trump បានបំពេញការងារសម្រាប់ការផ្លាស់ប្តូររដ្ឋាភិបាល ខណៈអ្នកឆ្លើយ៥៧% យល់ថា លោកពុំចាំបាច់ធ្វើទេ ពីព្រោះនាំឱ្យប្រទេសធ្លាក់ក្នុងវិបត្តិ ។

ចំណែកគោលនយោបាយការបរទេសរបស់លោក Trump ដូចជា៖ អាមេរិកធ្វើជាមិត្តជាមួយរុស្ស៊ីក្នុងការធ្វើសង្គ្រាមនៅអ៊ុយក្រែន, ការឈប់ផ្តល់ជំនួយក្រៅប្រទេស គឺពលរដ្ឋត្រឹម៣៩% ប៉ុណ្ណោះដែលគាំទ្រលោក ខណៈពលរដ្ឋ៦០% ពុំគាំទ្រ ហើយពលរដ្ឋមួយចំនួនតូចមានទំនុកចិត្តលើការដោះស្រាយបញ្ហាការបរទេស ។

ការដោះស្រាយបញ្ហាជនភៀសខ្លួនរបស់លោក Trump ក៏ទទួលការគាំទ្រតិចពីពលរដ្ឋដែរ គឺពលរដ្ឋត្រឹម៤៥% ប៉ុណ្ណោះដែលគាំទ្រលោកឱ្យបណ្តេញជនភៀសខ្លួន ធ្លាក់ចុះ៦% បើធៀបនឹងខែមីនា ឆ្នាំ២០២៥ ។ ប៉ុន្តែលោក Trump ទទួលបានពិន្ទុខ្ពស់ពីពលរដ្ឋ គឺការដោះស្រាយបញ្ហាយេនឌ័រ និងមនុស្សកែភេទ ដែលពលរដ្ឋ៥១% គាំទ្រចំណាត់ការរបស់លោក ។

ពលរដ្ឋយល់ថា លោក Trump បានប្រើប្រាស់អំណាចប្រធានាធិបតីគ្មានការទទួលខុសត្រូវ ពីព្រោះលោកចេញបទបញ្ជាច្រើនដើម្បីផ្លាស់ប្តូររដ្ឋាភិបាល និងប្រឈមជាមួយការប្តឹងក្នុងតុលាការ ។ ពលរដ្ឋជាង៥២% ជឿថា ការកាន់តំណែងអាណត្តិទី២ របស់លោក Trump នឹងធ្វើឱ្យអាមេរិកឈានទៅរកការផ្លាស់ប្តូរយូរអង្វែង ខណៈពលរដ្ឋ៣៦% ជឿថា ការផ្លាស់ប្តូរនានានឹងបញ្ចប់ក្រោយលោក Trump អស់អាណត្តិ ហើយពលរដ្ឋ១២% ជឿថា លោកដឹកនាំប្រទេសពុំរីកចម្រើន ៕

នាយករដ្ឋមន្ត្រីជប៉ុន លោក Shigeru Ishiba មានគម្រោងបំពេញទស្សនកិច្ចនៅវៀតណាម និងហ្វីលីពីន ចំនួន៤ថ្ងៃ ដើម្បីពង្រឹងទំនាក់ទំនងសន្តិសុខ និងសេដ្ឋកិច្ចជាមួយប្រទេសទាំង២ ស្របពេលពិភពលោកមានសង្គ្រាមពាណិជ្ជកម្មដោយសារវិធានការដំឡើងពន្ធទំនិញរបស់ប្រធានាធិបតីអាមេរិក លោក Donald Trump ។ ការបំពេញទស្សនកិច្ចមកកាន់បណ្តាប្រទេសអាស៊ានរបស់នាយករដ្ឋមន្ត្រីជប៉ុន គឺក្នុងបំណងទប់ស្កាត់ការពង្រីកឥទ្ធិពលចិនក្នុងតំបន់អាស៊ានផងដែរ ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី២៨ ខែមេសា ឆ្នាំ២០២៥ ។

នាយករដ្ឋមន្ត្រីជប៉ុនបានផ្តល់សម្ភាសន៍ជាមួយសារព័ត៌មាន Kyodo មុនពេលលោកធ្វើដំណើរទស្សនកិច្ចមកវៀតណាម កាលពីថ្ងៃទី២៧ ខែមេសា ថា ជប៉ុននឹងពង្រឹងសន្តិសុខជាមួយវៀតណាម និងហ្វីលីពីន រួមទាំងស្តាប់មតិយោល់របស់ក្រុមហ៊ុនជប៉ុននៅប្រទេសទាំង២ ដើម្បីជំរុញគោលនយោបាយរបស់រដ្ឋាភិបាលជប៉ុន ក្រោយពីលោក Trump ដំឡើងពន្ធទំនិញ ។

ពេលមកដល់ទីក្រុងហាណូយ លោក Ishiba បានទៅពិនិត្យមើលសួនឧស្សាហកម្ម ដើម្បីស្តាប់ការលើកឡើងរបស់នាយកក្រុមហ៊ុនជប៉ុនជាង១០០ក្រុមហ៊ុន ដែលបានបង្កើតទីតាំងផលិតទំនិញនៅទីក្រុងហាណូយ អំពីផលប៉ះពាល់ដោយសារស្ថានការណ៍សេដ្ឋកិច្ចពិភពលោក ពុំប្រាកដប្រជានាពេលបច្ចុប្បន្ន ។ បន្ទាប់មក នាយករដ្ឋមន្ត្រីជប៉ុនបានជួបពិភាក្សាជាមួយអគ្គលេខាគណបក្សកុម្មុយនិស្តវៀតណាម លោក To Lam ហើយលោកសង្ឃឹមថា ជប៉ុននឹងពង្រឹងទំនាក់ទំនងគ្រប់ផ្នែកជាមួយវៀតណាម ។

លោក Ishiba គ្រោងជួបជាមួយនាយករដ្ឋមន្ត្រីវៀតណាម លោក Pham Minh Chinh នាថ្ងៃទី២៨ ខែមេសា ដើម្បីពិភាក្សាពីផែនការរបស់រដ្ឋាភិបាលជប៉ុនក្នុងការផ្តល់ឧបករណ៍យោធាដល់វៀតណាម ក្រោមគម្រោងសង្គ្រោះផ្នែកសន្តិសុខផ្លូវការទ្វេភាគី ដែលអនុវត្តតាំងពីឆ្នាំ២០២៣ ។ ក្រៅពីនេះ ជប៉ុននឹងសហការផ្នែកសេដ្ឋកិច្ចទ្វេភាគីជាមួយវៀតណាម និងចរចាពីស្ថានការណ៍ពិភពលោក ។

ដោយឡែក នាយករដ្ឋមន្ត្រីជប៉ុនគ្រោងបំពេញទស្សនកិច្ចនៅហ្វីលីពីន នៅថ្ងៃទី២៩ ខែមេសា ដោយជួបជាមួយប្រធានាធិបតីហ្វីលីលីពីន លោក Ferdinand Marcos Jr. នៅទីក្រុងម៉ានីល ។ មេដឹកនាំទាំង២រូប នឹងចរចាពីកិច្ចព្រមព្រៀងចែករំលែកព័ត៌មាន និងគម្រោងធ្វើសមយុទ្ធរួមគ្នានៅសមុទ្រ ។

ជប៉ុនបានព្យាយាមពង្រឹងទំនាក់ទំនងសន្តិសុខជាមួយបណ្តាប្រទេសអាស៊ាន ស្របពេលចិនពង្រីកសកម្មភាពយោធានៅសមុទ្រចិនខាងត្បូងដែលពោរពេញដោយធនធានសមុទ្រ និងធ្វើជាផ្លូវដឹកជញ្ជូនសំខាន់ក្នុងតំបន់ ។ វៀតណាម ហ្វីលីពីន និងប្រទេសផ្សេងទៀតក្នុងតំបន់អាស៊ានមានជម្លោះជាមួយចិនពាក់ព័ន្ធនឹងការគ្រប់គ្រងប្រជុំកោះនៅសមុទ្រចិនខាងត្បូង ដែលចិនអះអាងភាពជាម្ចាស់កម្មសិទ្ធិស្ទើរទាំងអស់ ។ រីឯជប៉ុនក៏បារម្ភពីការពង្រីកដែនសមុទ្ររបស់ចិនដែរ ដោយសារឆ្មាំសមុទ្រចិនបានល្បាតជុំវិញកោះសេនកាគុ របស់ជប៉ុនជាច្រើនលើក ។

ការបំពេញទស្សនកិច្ចមកកាន់បណ្តាប្រទេសអាស៊ានរបស់នាយករដ្ឋមន្ត្រីជប៉ុន គឺក្រោយពីប្រធានាធិបតីចិន លោក ស៊ី ជិនពីង បានបំពេញទស្សនកិច្ចមកកាន់ប្រទេសចំនួន៣ ក្នុងតំបន់អាស៊ាន ដើម្បីពង្រឹងទំនាក់ទំនងក្រោមគំនិតផ្តួចផ្តើមខ្សែក្រវ៉ាត់ និងផ្លូវ (Belt and Road) ស្របពេលចិនមានសង្គ្រាមពាណិជ្ជកម្មជាមួយអាមេរិក ដែលមានផលប៉ះពាល់ដល់ប្រទេសដៃគូពាណិជ្ជកម្ម រួមទាំងសេដ្ឋកិច្ចពិភពលោក ។

រដ្ឋាភិបាលជប៉ុនមានគោលដៅពង្រឹងទំនាក់ទំនងជាមួយបណ្តាប្រទេសអាស៊ានដែលមានសារៈសំខាន់ផ្នែកភូមិសាស្ត្រនយោបាយ និងជាតំបន់សំខាន់មួយដើម្បីជំរុញសេដ្ឋកិច្ចពិភពលោក ។ កាលពីខែតុលា ឆ្នាំ២០២៤ នាយករដ្ឋមន្ត្រីជប៉ុនបានបំពេញទស្សនកិច្ចនៅប្រទេសឡាវ ក្រោយកាន់តំណែងជានាយករដ្ឋមន្ត្រីថ្មីរបស់ជប៉ុន ដើម្បីចូលរួមកិច្ចប្រជុំកំពូលអាស៊ាន ហើយនៅខែមករា ឆ្នាំ២០២៥ លោកបានទៅម៉ាឡេស៊ី និងឥណ្ឌូណេស៊ី ៕

ទីក្រុងហូជីមិញបង្កឲ្យមានការបានភ្ញាក់ផ្អើល និងលាយឡំជាមួយភាពរំភើបនៅព្រឹកថ្ងៃអាទិត្យ ខណៈមនុស្សរាប់ពាន់នាក់បានប្រមូលផ្តុំគ្នាដើម្បីមើលការហាត់សមសម្រាប់ក្បួនដង្ហែបង្រួបបង្រួមដ៏ធំទូលាយរបស់ប្រទេសវៀតណាម។ ព្រឹត្តិការណ៍នេះមានអ្នកចូលរួម ១៣,០០០ នាក់ ដែលរួមមានយន្តហោះចម្បាំង ឧទ្ធម្ភាគចក្រ និងរថយន្តយោធាជាច្រើនផងដែរ។ ព្រឹត្តិការណ៍នេះធ្វើឡើងក្នុងគោលបំណងរៀបចំអបអរសាទរខួបលើកទី ៥០ នៃការបង្រួបបង្រួមនៅថ្ងៃទី ៣០ ខែមេសានេះ។

ក្បួនដង្ហែបានចាប់ផ្ដើមដោយការបាញ់កាំភ្លើងនៅឧទ្យាន Bach Dang Wharf Park។ ភាពស្រស់ស្អាតនៃឯកសណ្ឋានរបស់កងទ័ព នឹងសំឡេងកាំភ្លើងបានធ្វើឲ្យមនុស្សម្នាជាច្រើនស្រែកហ៊ោរកញ្រ្ចៀវ អបអរសារទរលាន់ឮពេញទីក្រុង។ ក្បួនដង្ហែបានបន្តតាមដងផ្លូវក្នុងទីក្រុងជាបណ្តើរៗ ដោយឆ្លងកាត់មុខវិមានឯករាជ្យ។ បន្ទាប់មក កងទ័ពបានបំបែកជាក្រុមតូចៗ ដើម្បីរាក់ទាក់ជាមួយអ្នកទស្សនាជាច្រើននៅក្នុងតំបន់ឧទ្យានផ្សេងៗទូទាំងទីក្រុង។

ទាហានចិនជាង ១០០ នាក់ រួមជាមួយកងកម្លាំងពីឡាវ និងកម្ពុជា បានដើរអមជាមួយកងកម្លាំងវៀតណាម ដោយព្រឹត្តិការណ៍នេះបានក្លាយជា ឆាកចាប់ដៃជាមួយមនុស្សជាច្រើនក្នុងហ្វូងមនុស្សរបស់កងទ័ពឡាវ ដោយបង្ហាញភាពបង្កើតមិត្តភាពដ៏មាំមួនក្នុងតំបន់។

អ្នកទស្សនាឈរតម្រង់ជួរចាំអបអរសាទរ និងថតរូបជាមួយកងទ័ព និងរថយន្តយោធា។ ជាពិសេស យន្តហោះចម្បាំងបានធ្វើឱ្យមនុស្សភ្ញាក់ផ្អើលដោយការបង្ហាញខ្លួននៅលើមេឃ។ ការបង្ហាញលើកដំបូងនេះគ្រាន់តែជាការបង្វឹកសម្រាប់ព្រឹត្តិការណ៍ដ៏អស្ចារ្យដែលនឹងមកដល់នៅថ្ងៃទី ៣០ ខែមេសា។

គួរបញ្ជាក់ផងដែរថា ខាងមុខនេះគឺជាខួបលើកទី ៥០ នៃការបង្រួបបង្រួមប្រទេសវៀតណាមនឹងក្លាយជាការប្រារព្ធដ៏ពិសេស ដែលគោរពដល់ដំណើរដែលបង្កើតសម្ព័ន្ធភាពស្មុកស្មាញ និងរីកចម្រើនយ៉ាងខ្លាំងរបស់ប្រទេសនេះ៕

ប្រទេសហ្វីលីពីន ៖ កាលពីថ្ងៃទី២៨ ខែមេសា ឆ្នាំ២០២៥ វិទ្យាស្ថានភ្នំភ្លើង និងគ្រោះរញ្ជួយដីហ្វីលីពីនរាយការណ៍ថា ភ្នំភ្លើង Bulusan ក្នុងខេត្តស៊ុសសូកូន ស្ថិតនៅភាគអាគ្នេយ៍ទីក្រុងម៉ានីល ប្រទេសហ្វីលីពីន បានផ្ទុះបញ្ចេញផ្សែងឡើងលើមេឃកម្ពស់ជិត៥គីឡូម៉ែត្រ និងផ្ទុះរហូតដល់២៤នាទី ដែលធ្វើឱ្យអាជ្ញាធរបង្កើនការជម្លៀសពលរដ្ឋចេញពីតំបន់គ្រោះថ្នា.ក់ ។ លើសពីនេះ វាបានបញ្ចេញផ្សែងទៅភាគខាងត្បូង និងភាគនិរតី ដែលធ្វើឱ្យប៉ះពាល់ដល់ការរស់នៅរបស់ពលរដ្ឋយ៉ាងខ្លាំង ។

តាមរបាយការណ៍របស់វិទ្យាស្ថានភ្នំភ្លើង និងគ្រោះរញ្ជួយដីហ្វីលីពីន គឺក្រោយភ្នំភ្លើង Bulusan ផ្ទុះ ក៏មានគ្រោះរញ្ជួយដីកើតឡើងរហូតដល់ជាង៥០លើក ត្រឹមតែរយៈពេល២៤ម៉ោង ។ បច្ចុប្បន្ន អាជ្ញាធរហ្វីលីពីនបានតាមដានស្ថានការណ៍ថា តើភ្នំភ្លើងនឹងផ្ទុះខ្លាំងជាងនេះទៀតដែរឬទេ? ការផ្ទុះលើកចុងក្រោយរបស់ភ្នំភ្លើងនេះ គឺនៅខែមិថុនា ឆ្នាំ២០២២ ។

ភ្នំភ្លើងបានបញ្ចេញផេះ កំទេចថ្ម ធូលី និងសារធាតុរ៉ែ ដែលធ្វើឱ្យប៉ះពាល់ដល់សុខភាពពលរដ្ឋ ដូចជា ៖ រលាកភ្នែក ច្រមុះ និងបំពង់ក ហើយអាជ្ញាធរបានណែនាំឱ្យពលរដ្ឋពាក់ម៉ាសការពារប្រភេទ N95 ឬពាក់ម៉ាស់ពេទ្យ ។ ក្រៅពីនេះ អាជ្ញាធរបានហាមឃាត់ពលរដ្ឋនៅឱ្យឆ្ងាយពីតំបន់គ្រោះថ្នាក់ចម្ងាយ៤គីឡូម៉ែត្រ ជាពិសេស ហាមចូលក្បែររណ្តៅភ្នំភ្លើងនៅភាគខាងត្បូង និងភាគអាគ្នេយ៍ ដោយសារអាចមានគ្រោះថ្នាក់ផ្សេងៗដោយសារភ្នំភ្លើង ដូចជា ៖ ថ្មធ្លាក់ បាក់ដី និងគ្រាប់កាំភ្លើង ។

កាលពីថ្ងៃទី៥ ខែមិថុនា ឆ្នាំ២០២២ ភ្នំភ្លើង Bulusan ធ្លាប់បានផ្ទុះរយៈពេល១៧នាទី បញ្ចេញផ្សែងខ្មៅពាសពេញអាកាស ហើយផ្សែងខ្មៅបានគ្របដណ្តប់លើតំបន់ព្រៃ និងលំនៅឋានពលរដ្ឋនៅក្បែរៗ ។ ពេលនោះ អាជ្ញាធរហ្វីលីពីនបានប្រកាសអាសន្នពីគ្រោះថ្នាក់ ក្រោយភ្នំភ្លើងបញ្ចេញផ្សែងពណ៌ប្រផេះឡើងលើមេឃកម្ពស់១គីឡូម៉ែត្រ ដែលប៉ះពាល់ដល់ទីក្រុងចំនួន២ ក្នុងខេត្តស៊ុសសូកូន ស្ថិតនៅឆ្ងាយពីទីក្រុងម៉ានីល ទៅភាគខាងត្បូង ប្រមាណ៥០០គីឡូម៉ែត្រ ។

ចំណែកការផ្ទុះលើកនេះរបស់ភ្នំភ្លើង Bulusan គឺពុំទាន់មានសេចក្តីរាយការណ៍ពីមនុស្សរងរបួស និងស្លាប់ទេ ប៉ុន្តែអាជ្ញាធរបានហាមឃាត់ពលរដ្ឋដែលរស់នៅក្បែរជ្រលងភ្នំ ត្រូវប្រុងប្រយ័ត្ន ពីព្រោះចាប់ពីឆ្នាំ២០១៦ ដល់ឆ្នាំ២០១៧ ភ្នំភ្លើងនេះបានផ្ទុះចំនួន១២លើក ។

គួរបញ្ជាក់ថា Bulusan គឺជាភ្នំភ្លើងមួយស្ថិតក្នុងចំណោមភ្នំភ្លើងសកម្ម ចំនួន២៤ របស់ហ្វីលីពីន ដែលតែងតែផ្ទុះជាបន្តបន្ទាប់ ខណៈប្រទេសហ្វីលីពីនស្ថិតនៅលើខ្សែបន្ទាត់ភ្នំភ្លើងក្នុងមហាសមុទ្រប៉ាស៊ីហ្វិក ដែលជាតំបន់មានភ្នំភ្លើងផ្ទុះ និងរញ្ជួយដីជាញឹកញាប់ ៕

មិនមានអ្វីដែលគួរឱ្យធុញទ្រាន់ជាងការភ្ជាប់ Wi-Fi ដែលកំពុងដំណើរយឺតៗ ធ្វើពិបាកដល់ការធ្វើការងារ និងរំខានដល់ការប្រើប្រាស់កម្មវិធីកម្សាន្តផ្សេងៗដែលអ្នកកំពុងទស្សនានោះទេ។ ប៉ុន្តែថ្មីៗនេះ គេបានរកឃើញនូវល្បិចថ្មីមួយ ដោយប្រើប្រាស់ក្រដាសអាលុយមីញ៉ូមអាំងត្រីមកច្នៃធ្វើជាឧបករណ៍ចាប់សញ្ញា WiFi និងជំរុញឲ្យវាដើរលឿនជាងមុន។

មនុស្សមួយចំនួនដែលមានចំណេះដឹងផ្នែកបច្ចេកវិទ្យា បានខិតខំស្រាវជ្រាវរកវិធីសាស្រ្តក្នុងការដោះស្រាយបញ្ហាWiFi ដើរយឺតនេះ រហូតរកឃើញនូវរបកគំហើញមួយ ដោយគ្រាន់តែយក្រដាសអាលុយមីញ៉ូមមកប្រើប្រាស់ជាជំនួយប៉ុណ្ណោះ។ វិធីសាស្រ្តនេះត្រូវបានគេចែកចាយព្រោងព្រៀតនៅលើអ៊ីនធើណេត ហើយមានមនុស្សជាច្រើនដែលសាកល្បងធ្វើវា ហើយទទួលបានជោគជ័យមែន។

នៅក្នុងនោះ សារព័ត៌មានធំៗរបស់បរទេសដែលមានដូចជា The Daily Mail, Readers Digest និងគេហទំព័រល្បីៗជាច្រើនទៀតបានចុះផ្សាយពីការកែច្នៃនេះ ដោយប្រាប់ពីវិធីធ្វើវាយ៉ាងលម្អិតដើម្បីទទួលបានប្រសិទ្ធភាព។ នៅក្នុងការប្រើប្រាស់ក្រដាសអាលុយមីញ៉ូមនេះ គឺគេយកវាទៅទៅកាត់បត់ជាទម្រង់អក្សរ C មានទំហំធំ និងខ្ពស់ជាងអង់តែនដុំWiFi ហើយដាក់វានៅពីក្រោយដុំWiFiដោយយកផ្នែកកោង និងខាងចាំងផ្លាតនៃក្រដាសអាលុយមីញ៉ូមបែរមករកដុំWiFiនោះដូចដែលបានបង្ហាញ។

ទោះបីជាវាហាក់ដូចជាចម្លែកបន្តិច ប៉ុន្តែតាមការស្រាវជ្រាវបានបង្ហាញថាបន្ទះអាលុយមីញ៉ូមនេះពិតជាអាចជួយជំរុញឲ្យមានភាពខ្លាំងនៃល្បឿនសេវារបស់WiFiពិតមែន។ ក្រៅពីបត់ពត់វាឲ្យទៅជារូបរាងអក្សរC គែក៏អាចច្នៃវាឲ្យទៅជារូបរាងផ្សេងដូចក្នុងរូបដែលបានបង្ហាញ ដើម្បីទាក់ទាញឲ្យមានលំហូរនៃរលកសញ្ញាឆ្លងកាត់បានល្អប្រសើជាងមុន។

គួរបញ្ជាក់ផងដែរថា យ៉ាងណាមិញទោះបីជាមានការលើកឡើងថាការធ្វើបែបនេះមានប្រសិទ្ធភាពក៏ពិតមែនក្ដី ប៉ុន្តែវាមិនមានការធានាថានឹងទទួលបានការជោគជ័យគ្រប់ពេលនោះទេ ខណៈមានមនុស្សជាច្រើនអនុវត្តត្រឹមត្រូវហើយទទួលបានប្រសិទ្ធភាព ប៉ុន្តែមានមនុស្សមួយចំនួនទៀតធ្វើវាមិនបានសម្រេចឡើយ។

លើសពីនេះ ប្រសិនបើអ្នកអនុវត្តវិធីសាស្រ្តនេះ ហើយជោគជ័យដោយទទួលបាននូវបណ្ដាញអ៊ីនធើណេតល្បឿនលឿននៅបរិវេណនៃដុំWiFiនោះ វានឹងបណ្ដាលឲ្យមានការរអាក់រអួលខ្លាំងលើសេវាអ៊ីនធើណេតនៅជ្រុងណាមួយផ្សេងទៀតនៅក្នុងផ្ទះរបស់អ្នកមិនខាន ព្រោះវាជាការចាប់សេវាពីទីតាំងមួយយកទៅបន្ថែមនៅទីតាំងមួយទៀត៕