ការផឹកទឹក និងបរិភោគអាហារក្រោយដុសធ្មេញរួចភ្លាមៗនឹងធ្វើឱ្យប្រសិទ្ធភាពសារធាតុ Fluoride ធ្លាក់ចុះ

យើងពុំគួរប្រញាប់ផឹកទឹក និងបរិភោគចំណីអាហារក្រោយទើបដុសធ្មេញរួចភ្លាមៗទេ ដើម្បីឱ្យថ្នាំដុសធេ្មញបំពេញតួនាទីជួយធ្មេញរឹងមាំល្អ និងការពារធ្មេញពុក ។ មនុស្សភាគច្រើនមានអារម្មណ៍ស្រស់ថ្លាក្រោយពេលដុសធ្មេញរួច ហើយតែងតែផឹកទឹក និងបរិភោគចំណីអាហារភ្លាមៗ ប៉ុន្តែតើដឹងទេថា ទម្លាប់បែបនេះអាចធ្វើឱ្យប៉ះពាល់ដល់សុខភាពមាត់ធ្មេញរបស់យើងដោយពុំដឹងខ្លួន ។

ក្រោយដុសធ្មេញរួច ជាពិសេស ពេលប្រើប្រាស់ថ្នាំដុសធ្មេញមានសារធាតុផ្សំពីផ្លអឺរៃ (Fluoride) គឺសារធាតុនេះត្រូវការពេលវេលាថែទាំស្រទាប់ក្រៅរបស់ធ្មេញឱ្យរឹងមាំ ពីព្រោះវាមានតួនាទីសំខាន់សម្រាប់ធ្មេញ ។ ការផឹកទឹក និងបរិភោគចំណីអាហារភ្លាមៗក្រោយដុសធ្មេញរួច នឹងធ្វើឱ្យបាត់បង់សារធាតុផ្លអឺរៃក្នុងមាត់ ហើយប្រសិទ្ធភាពការពារធ្មេញពុកនឹងធ្លាក់ចុះ ។

ទន្តពេទ្យនិយាយថា បើយើងមានទម្លាប់ផឹកទឹកត្រជាក់ខ្លាំង និងបរិភោគចំណីអាហារក្រោយដុសធ្មេញពេលយប់ យើងនឹងឆាប់ស្រៀវធ្មេញ ឬធ្មេញចាប់ផ្តើមពុក ។ ហេតុនេះ គួររង់ចាំរយៈពេល៣០នាទីក្រោយដុសធ្មេញរួច ទើបអាចផឹកទឹក និងបរិភោគអាហារបាន ដើម្បីឱ្យសារធាតុផ្លអឺរៃក្នុងថ្នាំដុសធ្មេញជួយការពារធ្មេញយ៉ាងមានប្រសិទ្ធភាព ។

សារធាតុផ្លអឺរៃ នឹងជួយការពារធ្មេញ និងការពារសំណឹកដោយសារអាស៊ីតដែលបង្កឡើងពីបាក់តេរីក្នុងមាត់ ហើយការទុកឱ្យសារធាតុផ្លអឺរៃ នៅក្នុងមាត់កាន់តែយូរ វានឹងជួយឱ្យធ្មេញរឹងមាំល្អ ។ ក្រៅពីការយកចិត្តទុកដាក់ថែទាំសុខភាពមាត់ធ្មេញក្រោយដុសធ្មេញរួច គួរមានទម្លាប់ដុសធ្មេញឱ្យត្រឹមត្រូវ យ៉ាងហោចណាស់ ២ដងក្នុង១ថ្ងៃ ។ ការដុសធ្មេញជាប្រចាំ និងត្រួតពិនិត្យសុខភាពមាត់ធ្មេញជាមួយទន្តពេទ្យរៀងរាល់៦ខែម្តង នឹងជួយឱ្យយើងមានសុខភាពមាត់ធ្មេញល្អរយៈពេលយូរ រួមទាំងកាត់បន្ថយហានិភ័យជំងឺធ្មេញ ។

ហេតុនេះ បន្ទាប់ពីដុសធ្មេញរួច សូមកុំប្រញាប់ផឹកទឹក ឬបរិភោគចំណីអាហារ គួររង់ចាំ៣០នាទីសិន ដើម្បីឱ្យថ្នាំដុសធ្មេញជួយការពារធ្មេញ១០០% ។ យើងនឹងមានសុខភាពមាត់ធ្មេញល្អ និងបង្ហាញស្នាមញញឹមប្រកបដោយភាពស្រស់ស្រាយ ។

ម្យ៉ាងទៀត ការដុសធ្មេញខ្លាំងៗជាមួយច្រាសធុសធ្មេញមានសរសៃរឹង នឹងធ្វើឱ្យដំបៅអញ្ចាញធ្មេញ ឬមានស្នាមរហែកតូចៗដោយសារការដុសធ្មេញខ្លាំង ។ វានឹងធ្វើឱ្យមេរោគចូលតាមអញ្ចេញធ្មេញទៅក្នុងឈាម និងសឹកធ្មេញ ។ បើតាមការណែនាំរបស់សមាគមទន្តពេទ្យអាមេរិក គឺគួរចំណាយពេលដុសធ្មេញ ២នាទីក្នុង១លើក ប៉ុន្តែមនុស្សភាគច្រើនដុសធ្មេញពុំដល់២នាទីទេ ។

ទន្តពេទ្យជាច្រើនអះអាងថា ការដុសធ្មេញឱ្យបាន២នាទី គឺគ្រប់គ្រាន់សម្រាប់ការសម្អាតធ្មេញទាំងមូល ។ រីឯអ្នកមានជំងឺអញ្ចាញធ្មេញ និងមានបញ្ហាសុខភាពមាត់ធ្មេញ គួរដុសធ្មេញយូរជាង២នាទី ដើម្បីកម្ចាត់មេរោគឱ្យអស់ ៕