ទឹកធ្លាក់បរឡាង ឬ ទឹកធ្លាក់សំឡូតចាស់ ឬក៏អ្នកខ្លះទៀតហៅថា “ទឹកធ្លាក់អេនជេលីណា ជោលី” បាន និងកំពុងឆក់យកបេះដូងភ្ញៀវទេសចរទាំងក្នុងនិងក្រៅតំបន់ឲ្យមកកម្សាន្តអារម្មណ៍ជាមួយបរិយាកាសធម្មជាតិបរិសុទ្ធ រួមទាំងងូតទឹកធ្លាក់ពីលើថ្មលយដ៏ថ្លា ត្រជាក់ អមដោយព្រៃឈើតូចធំពណ៌បៃតងព័ទ្ធជុំវិញយ៉ាងស្រស់បំប្រង។

ទីតាំងនៃទឹកធ្លាក់នេះគឺស្ថិតនៅក្នុងឃុំសំឡូត ស្រុកសំឡូត ចំងាយប្រមាណជាង ៨០គីឡូម៉ែត្រពីទីរួមខេត្តបាត់ដំបង។ មូលហេតុដែលមានអ្នកខ្លះហៅឈ្មោះវាថា “ទឹកធ្លាក់អេនជេលីណា ជោលី” ដោយសារវាជាផ្នែកមួយនៃគំនិតផ្ដួចផ្ដើមមូលនិធិ “ម៉ាដក្ស ជោលីភីត” (MJP) ដែលត្រូវបានបង្កើតឡើងកាលពីឆ្នាំ ២០០៣ ដោយតារាភាពយន្តហូលីវូដដ៏ល្បី គឺលោកស្រី អេនជេលីណា ជោលី ក្នុងគោលបំណងអភិរក្សព្រៃឈើ សត្វព្រៃធម្មជាតិ និងអភិវឌ្ឍន៍សហគមន៍ក្នុងតំបន់ការពារសំឡូត ដែលជាភូមិកំណើតរបស់ ម៉ាដក្ស កូនច្បងរបស់គាត់។

ទោះជាស្ថិតនៅក្នុងដែលការពារ និងអភិរក្សក៏ពិតមែន ប៉ុន្តែភ្ញៀវទេសចរ ឬប្រជាពលរដ្ឋណាដែលចង់ចូលកម្សាន្តនៅទីនោះ គឺចូលបានដោយសេរី និងឥតគិតថ្លៃ។ ហើយអ្នកដែលធ្លាប់បានមកកម្សន្តនៅទីនេះរមែងជាប់ចិត្តជាមួយនឹងសម្រស់ទេសភាពដ៏ស្រស់ស្អាត មានទឹកធ្លាក់ថ្លាខៀវ និងរុក្ខជាតិតូចធំដុះព័ទ្ធជុំវិញបង្កើតបានជាទិដ្ឋភាពប្រៀបដូចគំនូរ ត្បិតវាជាតំបន់ដែលមានការការពារនៅក្នុងព្រៃធម្មជាតិពិតៗ មិនមានការកែច្នៃ ឬបៀតបៀនដោយនរណាឡើយ។

ភាពស្រស់បំប្រងនៃទឹកធ្លាក់បង្កប់ខ្លួននៅក្នុងព្រៃឈើចោលម្លប់ត្រឈឹងត្រឈៃនេះ បាននាំឲ្យអារម្មណ៍ដែលស្មុគស្មាញ និងតានតឹងទាំងប៉ុន្មានរសាយទៅអស់ សល់ត្រឹមភាពស្ងប់សុខជាមួយនឹងបរិយាកាសដ៏បរិសុទ្ធ។ អ្នកមកកម្សាន្តនៅទីនេះមិនដែលរំលងក្នុងការងូតទឹកដ៏ត្រជាក់ និងថ្លាឃើញដល់បាតដីនេះទេ។ អ្វីដែលកាន់តែពិសេសនោះ នៅផ្នែកខាងលើនៃទឹកធ្លាក់នេះ មានរណ្ដៅមួយប៉ុនមាត់លូ និងមានជម្រៅជ្រៅ ដែលល្បីរហូតដល់អ្នកជ្រមុជទឹកអះអាងថា ពួកគេមិនអាចមុជលឹបដល់បាតរណ្ដៅបានទេ។

នៅទីនេះគឺសាកសមខ្លាំងសម្រាប់អ្នកដែលចង់ស្វែងរកទីកន្លែងស្ងប់ស្ងាត់ដើម្បីលំហែរខួរក្បាលជាមួយនឹងធម្មជាតិ ។ ប៉ុន្តែប្រសិនបើចង់មកជាលក្ខណៈគ្រួសារ ឬក្រុមមិត្តភក្តិនោះ នៅទីនេះក៏ជាទីតាំងអំណោយផលផងដែរ ព្រោះមានកន្លែងដែលអាចរៀបចំកន្លែងដើម្បីអាំងសាច់ និងអង្គុយលេងជជែកគ្នាបានយ៉ាងរីករាយ៕

ទំពាំងបាយជូមិនត្រឹមតែជាផ្លែឈើដែលពេញនិយមទូទាំងពិភពលោកប៉ុណ្ណោះទេ ថែមទាំងជាប្រភពនៃសារធាតុចិញ្ចឹមផងដែរ ដែលធ្វើឱ្យវាក្លាយជាអាហារសំខាន់ក្នុងរបបអាហារដែលគិតដល់សុខភាពជាច្រើន។ ខណៈពេលដែលទំពាំងបាយជូខ្មៅ និងបៃតង ផ្លល់នូវអត្ថប្រយោជន៍ជាច្រើន ពួកវានីមួយៗនាំមកនូវគុណភាពពិសេសខុសៗគ្នា។ តោះ! មកស្វែងយល់ពីរបៀបដែលពូជទាំងពីរនេះប្រជែងគ្នាទៅវិញទៅមកទាក់ទងនឹងអត្ថប្រយោជន៍ចំពោះសុខភាព។

ទំពាំងបាយជូខ្មៅមានភាពលេចធ្លោសម្រាប់ភាពសម្បូរបែបនៃសារធាតុប្រឆាំងអុកស៊ីតកម្ម ជាពិសេសសារធាតុ resveratrol ដែលត្រូវបានរកឃើញជាចម្បងនៅក្នុងស្បែករបស់ពួកវា។ Resveratrol ត្រូវបានបានគេដឹងថាមានលក្ខណៈសម្បត្តិប្រឆាំងនឹងការរលាក និងជំងឺមហារីក ហើយអាចជួយការពារ និងប្រឆាំងនឹងជំងឺដូចជា ជំងឺទឹកនោមផ្អែម ភ្លេចភ្លាំង បេះដូង និងជំងឺផាកឃីនសុន។

លើសពីនេះទៀត នៅក្នុងការសិក្សាវិទ្យាសាស្ត្រមួយចំនួនបានរកឃើញថា វាមានឥទ្ធិពលប្រឆាំងនឹងការធាត់ ដែលរួមចំណែកដល់សុខភាពទូទៅ។ វាក៏សំបូរទៅដោយជាតិសរសៃ វីតាមីន C វីតាមីន K និងជាតិស្ករធម្មជាតិដូចជា fructose ជាដើម។ មិនតែប៉ុណ្ណោះពួកវាក៏ជួយដល់សុខភាពបេះដូង និងខួរក្បាលផងដែរ ហើយត្រូវបានគេជឿថាមានអត្ថប្រយោជន៍ប្រឆាំងនឹងការឆាប់ចាស់ទៀតផង។

លោកស្រី Debjani Banerjee ទទួលបន្ទុកផ្នែករបបអាហារនៅមន្ទីរពេទ្យ PSRI ក្នុងទីក្រុង Delhi បានគូសបញ្ជាក់ថា ទំពាំងបាយជូបៃតងក៏សម្បូរវីតាមីន C វីតាមីន K ប៉ូតាស្យូម ជាតិសរសៃ និងសារធាតុប្រឆាំងអុកស៊ីតកម្មដូចជា flavonoids ផងដែរ។ សារធាតុចិញ្ចឹមទាំងនេះត្រូវបានផ្សារភ្ជាប់ទៅនឹងឥទ្ធិពលប្រឆាំងនឹងការរលាក និងប្រឆាំងនឹងជំងឺមហារីក។

ទំពាំងបាយជូបៃតងមានផ្ទុកជាតិស្ករធម្មជាតិ និង fructose ដែលផ្តល់ថាមពលដល់រាងកាយយ៉ាងរហ័ស។ ពួកវាធ្វើឲ្យការគ្រប់គ្រងទម្ងន់មានប្រសិទ្ធភាពជាងមុន និងធ្វើអោយប្រសើរឡើងនូវការគ្រប់គ្រងសម្ពាធឈាម។ ការសិក្សាក៏បានបង្ហាញដែរថា សារជាតិ flavonoids នៅក្នុងទំពាំងបាយជូរពណ៌បៃតងអាចជួយរក្សាទម្ងន់ដ៏មានសុខភាពល្អ និងគ្រប់គ្រងសម្ពាធឈាមផងដែរ។

សរុបមកទាំងទំពាំងបាយជូខ្មៅ និងបៃតងសុទ្ធសឹងតែជាសម្បុកនៃវីតាមីន សារធាតុរ៉ែ និងសារធាតុប្រឆាំងអុកស៊ីតកម្មផ្សេងៗ ដែលជួយដល់សុខភាពទូទៅកាន់តែប្រសើរឡើង។ ការជ្រើសរើសរវាងពូជទាំងពីរនេះភាគច្រើនអាស្រ័យទៅលើចំណូលចិត្តផ្ទាល់ខ្លួន និងគោលដៅសុខភាពរបស់អ្នកប៉ុណ្ណោះ។ ដូចនេះមិនថាអ្វីក៏ដោយដែលអ្នកជ្រើសរើស ការបន្ថែមទំពាំងបាយជូទៅក្នុងរបបអាហាររបស់អ្នកអាចជាការបន្ថែមរសជាតិដ៏ឆ្ងាញ់ ព្រមទាំងមានជីវជាតិបំប៉នដល់សុខភាពរបស់អ្នកជាមួយគ្នាផងដែរ៕

នៅថ្ងៃទី០១ ខែឧសភា ឆ្នាំ២០២៥ វេលា ម៉ោង៩ព្រឹក ភាគីថៃបានបិទច្រកទ្វារព្រំដែនអានសេះ ស្ថិតក្នុងភូមិអានសេះ ឃុំ ជាំក្សាន្ត ស្រុកជាំក្សាន្ត ខេត្តព្រះវិហារ ដោយឯកតោភាគីពីសំណាក់កងកម្លាំងសុរៈណារីថៃ ប្រចាំការនៅ ច្រកទ្វារព្រំដែនអានម៉ា។

ជាធម្មតា ច្រកទ្វារព្រំដែនអានសេះ បើកឱ្យដំណើរការដោះដូរទំនិញ រយៈពេល ២ថ្ងៃក្នុង ១សប្តាហ៍ គឺថៃអង្គារ និងព្រហស្បតិ៍។

ច្រកទ្វារនេះ ជាកន្លែងផ្លាស់ប្តូរទំនិញគ្នាបន្តិចបន្តួចប៉ុណ្ណោះ ដោយក្នុងនោះប្រជាពលរដ្ឋកម្ពុជាច្រើននាំយកកសិ ផល និងអនុផលព្រៃឈើតាមរដូវកាលទៅលក់ឱ្យភាគីថៃ (ចុងផ្តៅ ផ្សិត ផ្លែស្វាយ ល្ពៅ…ល) ខណៈភាគីថៃ មានលក់ទឹកសុទ្ធ ដួង មាន់ និងអីវ៉ាន់ចាបហួយមួយចំនួន។

បើយោងតាមទីស្នាក់ការត្រួតពិនិត្យច្រកទ្វារព្រំដែន អន្តរជាតិអានសេះ ខេត្តព្រះវិហារ បានឱ្យដឹងថា៖”ការបិទច្រកនេះ គឺមិនមានភាគីណាមួយចំណេញនោះទេ ប៉ុន្តែផ្ទុយទៅវិញធ្វើឱ្យអាជីវករ ទាំងសងខាងកម្ពុជា-ថៃ មានការខាតបង់ផលប្រយោជន៍ ដែលតាមការពិនិត្យជាក់ស្តែងឃើញថា អាជីវករថៃ មានការខាតបង់ច្រើនជាង”៕

នៅពេលដែលយើងគិតពីការដោះស្រាយការប្រែប្រួលអាកាសធាតុ យើងច្រើនតែផ្តោតលើការដាំដើមឈើ កាត់បន្ថយឥន្ធនៈហ្វូស៊ីល ឬកាត់បន្ថយកាកសំណល់ជាដើម។ ប៉ុន្តែតើអ្នកដឹងទេថា ត្រីបាឡែន ដែលជាត្រីយក្សនៃមហាសមុទ្រ ក៏មានទំនាក់ទំនងយ៉ាងសំខាន់ផងដែរក្នុងការប្រយុទ្ធនិងការពារផែនដីនេះ? សត្វដ៏អស្ចារ្យនេះមិនត្រឹមតែធ្វើឱ្យមានការភ័យខ្លាចជាមួយនឹងទំហំ និងកាយវិការរបស់ពួកវាប៉ុណ្ណោះទេ ប៉ុន្តែថែមទាំងដើរតួយ៉ាងសំខាន់ក្នុងការថែរក្សាសុខភាពនៃភពផែនដីរបស់យើងផងដែរ។

ត្រីបាឡែនរួមចំណែកក្នុងការប្រយុទ្ធប្រឆាំងនឹងការប្រែប្រួលអាកាសធាតុតាមរបៀបប្លែកៗ និងមិនគួរឱ្យជឿរបស់វា។ ខាងក្រោមនេះជាគុណសម្បត្តិរបស់ត្រីបាឡែនចំពោផែនដីក្នុងការដោះស្រាយបញ្ហាការប្រែប្រួលអាកាសធាតុ៖

១ ត្រីបាឡែនជាធុងកាបូនរបស់ធម្មជាតិ៖ ត្រីបាឡែនផ្ទុកកាបូនយ៉ាងច្រើននៅក្នុងរាងកាយដ៏ធំសម្បើមរបស់ពួកវា។ នៅពេលដែលពួកវាងាប់ ហើយលិចទៅបាតសមុទ្រ កាបូនរបស់ពួកវាត្រូវបានជាប់នៅក្នុងបាតសមុទ្រជ្រៅរាប់រយឆ្នាំ ដោយរារាំងឧស្ម័នកាបូនឌីអ៊ុកស៊ីត ដែលជាឧស្ម័នផ្ទះកញ្ចក់ពីការរត់ចូលទៅក្នុងបរិយាកាស ហើយជំរុញឱ្យមានការប្រែប្រួលអាកាសធាតុ។

២ លាមករបស់ត្រីបាឡែនគឺជាជីសមុទ្រ៖ វាអាចស្តាប់ទៅចម្លែក ប៉ុន្តែលាមកត្រីបាឡែនគឺដូចជាជីដ៏អស្ចារ្យសម្រាប់មហាសមុទ្រចឹងដែរ។ វាសម្បូរទៅដោយសារធាតុចិញ្ចឹមដែលជួយឱ្យរុក្ខជាតិសមុទ្រតូចៗដែលហៅថា phytoplankton លូតលាស់បានល្អ។ Phytoplankton ស្រូបយកកាបូនឌីអ៊ុកស៊ីតពីបរិយាកាស ដូចដើមឈើធ្វើរស្មីសំយោគនៅលើដីដែរ។

៣ លើកកម្ពស់សុខភាពមហាសមុទ្រ៖ នៅពេលដែលត្រីបាឡែនជ្រមុជទឹក និងបណ្ដែតខ្លួនលើផ្ទៃទឹក ពួកវាជួយលាយទឹកសមុទ្រ ចែកចាយសារធាតុចិញ្ចឹម និងបង្កើនការលូតលាស់ដល់ phytoplankton នៅទូទាំងតំបន់ដែលវាកំពុងនៅ។ មហាសមុទ្រដែលមានសុខភាពល្អមានន័យថាកាបូនឌីអ៊ុកស៊ីតកាន់តែច្រើនត្រូវបានស្រូបយកដោយខ្យល់ ដែលជួយពន្យឺតការប្រែប្រួលអាកាសធាតុ។

៤ មានឥទ្ធិពលលើប្រព័ន្ធអេកូឡូស៊ី៖ ត្រីបាឡែនផ្តល់អត្ថប្រយោជន៍មិនត្រឹមតែមហាសមុទ្រប៉ុណ្ណោះទេ ប៉ុន្តែដល់ប្រព័ន្ធអេកូឡូស៊ីសមុទ្រទាំងមូលផងដែរ។ សកម្មភាពរបស់ពួកវា ដូចជាការបំលាស់ទីសារធាតុចិញ្ចឹមតាមរយៈទឹក ជួយរក្សាអ្វីៗគ្រប់យ៉ាងឱ្យរីកចម្រើន។ នៅពេលដែលប្រព័ន្ធអេកូឡូស៊ីមានភាពរីកចម្រើន ពួកវាមានភាពសម្ថភាពក្នុងការដោះស្រាយបញ្ហាដូចជាអាកាសធាតុកើនខ្ពស់ ឬការបំពុល។ នេះធ្វើឱ្យមហាសមុទ្រកាន់តែរឹងមាំ និងអាចការពារខ្លួនពីការប្រែប្រួលអាកាសធាតុ។

សរុបមកពួកវាចាប់យក និងរក្សាទុកកាបូននៅក្នុងរាងកាយដ៏ធំ រហូតដល់ការបង្កកំណើតដល់មហាសមុទ្រជាមួយនឹងកាកសំណល់របស់ពួកវា ព្រមទាំងជួយរក្សាលំនឹងបរិយាកាសរបស់ផែនដីផងដែរ។ ការការពារត្រីបាឡែន និងជម្រករបស់វា មានន័យថាយើងក៏ការពារផ្នែកសំខាន់មួយនៃប្រព័ន្ធធម្មជាតិដែលស្រូបយកឧស្ម័នផ្ទះកញ្ចក់ដែលបង្កគ្រោះថ្នាក់ និងគាំទ្រដល់ប្រព័ន្ធអេកូឡូស៊ីសមុទ្រ៕

កោះតាកៀវ ឬកោះតាគៀវ ជាកោះដ៏ស្រស់ស្អាតមួយ ដែលមានទីតាំងនៅឆ្នេរសមុទ្រនៃខេត្តព្រះសីហនុ ប្រទេសកម្ពុជា។ កោះដ៏ស្ងប់ស្ងាត់នេះគឺជាផ្នែកមួយនៃក្រុមកោះតូចមួយនៅឈូងសមុទ្រថៃ ហើយល្បីល្បាញដោយសារឆ្នេរខ្សាច់សរក្បុសដ៏ស្រស់ស្អាត ព្រៃឈើខៀវស្រងាត់ និងបរិយាកាសស្ងប់ស្ងាត់របស់វា។ កោះតាកៀវផ្តល់ឱ្យអ្នកទស្សនានូវភាពចម្រុះនៃសម្រស់ធម្មជាតិ និងការផ្សងព្រេង ដែលធ្វើឱ្យវាក្លាយជាកន្លែងជាគោលដៅដែលមិនគួររំលង សម្រាប់អ្នកធ្វើដែលចង់គេចចេញពីភាពស្មុគស្មាញ និងអ៊ូអរនៃជីវិតទីក្រុង។

កោះតាកៀវ ស្ថិតនៅចម្ងាយប្រហែល ៤ គីឡូម៉ែត្រពីឆ្នេរអូរត្រេះក្នុងក្រុងព្រះសីហនុ និង ១ គីឡូម៉ែត្រពីឆ្នេរឧទ្យានជាតិរាម។ កោះនេះអាចចូលទៅបានដោយទូក ដោយមានប្រតិបត្តិករជាច្រើនចាំផ្តល់ការធ្វើដំណើរពីខេត្តព្រះសីហនុតែម្ដង។ នៅត្រើយខាងកើតនៃកោះនេះ ក៏មានភូមិនេសាទតូចមួយផងដែរ ដែលភូមិនេះបន្ថែមភាពទាក់ទាញមួយទៀតនៅក្នុងតំបន់កោះនេះ ដោយផ្តល់ឱ្យអ្នកទស្សនានូវទិដ្ឋភាពបែបប្រពៃណីនៃជីវិត។ អ្នកភូមិនៅទីនេះត្រូវបានគេស្គាល់ថាមានបដិសណ្ឋារកិច្ចដ៏កក់ក្ដៅ ហើយវត្តមានរបស់ពួកគេបានបង្កើនបទពិសោធន៍វប្បធម៌ដ៏អស្ចារ្យនៃការទស្សនាកោះតាកៀវនេះ។

អ្នកទស្សនាអាចរីករាយនឹងសកម្មភាពដូចជា៖ ការមុជទឹក ការឡើងភ្នំ បោះតង់ អាំងសាច់ញាំជុំគ្រួសារ គយគន់ថ្ងៃលិច និងការសំរាកលំហែតាមឆ្នេរជាដើម ដែលសម្មភាពទាំងនេះផ្ដល់ឲ្យអ្នកទស្សនានូវអារម្មណ៍ស្រស់ស្រាយ រំសាយអស់ទុកកង្វល់ ដែលមិនអាចបំភ្លេចបាន។

កោះតាកៀវគឺលើសពីកោះមួយទៅទៀត វាជាច្រកផ្លូវទៅកាន់ភាពស្ងប់ស្ងាត់ និងការផ្សងព្រេង។ មិនថាអ្នកចង់រុករកភូមិនេសាទ មុជទឹកថ្លាដ៏ថ្លាឈ្វង់ ឬគយគន់ធម្មជាតិព្រៃប្រឹក្សាដែលមាននៅទីនោះទេ កោះនេះជាជម្រើសដ៏សាកសមបំផុតសម្រាប់អ្នក។ ដូចនេះបើបានទៅលេងហើយអ្នកគួរគប្បីថែរក្សាបរិស្ថានធម្មជាតិដ៏អស្ចារ្យ ក៏ដូចជាអនាម័យនៅតំបន់នេះផងដែរ ដើម្បីឲ្យតំបន់ទេសចរណ៍ដ៏ផូរផង់នេះជាតំបន់ដែលកាន់តែទាក់ទាញ ព្រមទាំងថែរក្សាកោះនេះឲ្យនៅតែមានសម្រស់ស្រស់ត្រកាលផងដែរ៕

ទីក្រុងហូជីមិញបង្កឲ្យមានការបានភ្ញាក់ផ្អើល និងលាយឡំជាមួយភាពរំភើបនៅព្រឹកថ្ងៃអាទិត្យ ខណៈមនុស្សរាប់ពាន់នាក់បានប្រមូលផ្តុំគ្នាដើម្បីមើលការហាត់សមសម្រាប់ក្បួនដង្ហែបង្រួបបង្រួមដ៏ធំទូលាយរបស់ប្រទេសវៀតណាម។ ព្រឹត្តិការណ៍នេះមានអ្នកចូលរួម ១៣,០០០ នាក់ ដែលរួមមានយន្តហោះចម្បាំង ឧទ្ធម្ភាគចក្រ និងរថយន្តយោធាជាច្រើនផងដែរ។ ព្រឹត្តិការណ៍នេះធ្វើឡើងក្នុងគោលបំណងរៀបចំអបអរសាទរខួបលើកទី ៥០ នៃការបង្រួបបង្រួមនៅថ្ងៃទី ៣០ ខែមេសានេះ។

ក្បួនដង្ហែបានចាប់ផ្ដើមដោយការបាញ់កាំភ្លើងនៅឧទ្យាន Bach Dang Wharf Park។ ភាពស្រស់ស្អាតនៃឯកសណ្ឋានរបស់កងទ័ព នឹងសំឡេងកាំភ្លើងបានធ្វើឲ្យមនុស្សម្នាជាច្រើនស្រែកហ៊ោរកញ្រ្ចៀវ អបអរសារទរលាន់ឮពេញទីក្រុង។ ក្បួនដង្ហែបានបន្តតាមដងផ្លូវក្នុងទីក្រុងជាបណ្តើរៗ ដោយឆ្លងកាត់មុខវិមានឯករាជ្យ។ បន្ទាប់មក កងទ័ពបានបំបែកជាក្រុមតូចៗ ដើម្បីរាក់ទាក់ជាមួយអ្នកទស្សនាជាច្រើននៅក្នុងតំបន់ឧទ្យានផ្សេងៗទូទាំងទីក្រុង។

ទាហានចិនជាង ១០០ នាក់ រួមជាមួយកងកម្លាំងពីឡាវ និងកម្ពុជា បានដើរអមជាមួយកងកម្លាំងវៀតណាម ដោយព្រឹត្តិការណ៍នេះបានក្លាយជា ឆាកចាប់ដៃជាមួយមនុស្សជាច្រើនក្នុងហ្វូងមនុស្សរបស់កងទ័ពឡាវ ដោយបង្ហាញភាពបង្កើតមិត្តភាពដ៏មាំមួនក្នុងតំបន់។

អ្នកទស្សនាឈរតម្រង់ជួរចាំអបអរសាទរ និងថតរូបជាមួយកងទ័ព និងរថយន្តយោធា។ ជាពិសេស យន្តហោះចម្បាំងបានធ្វើឱ្យមនុស្សភ្ញាក់ផ្អើលដោយការបង្ហាញខ្លួននៅលើមេឃ។ ការបង្ហាញលើកដំបូងនេះគ្រាន់តែជាការបង្វឹកសម្រាប់ព្រឹត្តិការណ៍ដ៏អស្ចារ្យដែលនឹងមកដល់នៅថ្ងៃទី ៣០ ខែមេសា។

គួរបញ្ជាក់ផងដែរថា ខាងមុខនេះគឺជាខួបលើកទី ៥០ នៃការបង្រួបបង្រួមប្រទេសវៀតណាមនឹងក្លាយជាការប្រារព្ធដ៏ពិសេស ដែលគោរពដល់ដំណើរដែលបង្កើតសម្ព័ន្ធភាពស្មុកស្មាញ និងរីកចម្រើនយ៉ាងខ្លាំងរបស់ប្រទេសនេះ៕

រាជធានីភ្នំពេញ ៖ សេចក្ដីណែនាំថ្មី ស្ដីពីការហាមឃា..ត់ព្រះភិក្ខុ សាមណេ ហាមឃា..ត់ការគង់កម្សាន្តនៅទីសួនច្បារសាធារណៈ ហាងកាហ្វេ កន្លែងកម្សាន្តសប្បាយនានានៅបរិវេណព្រះបរមរាជវាំងមុខទន្លេចតុមុខ និង ផ្លូវថ្មើជើងថ្មី ព្រមទាំងហាមនិមន្តបិណ្ឌបាតនៅតាមទីផ្សា មន្ទីរពេទ្យ រោងចក្រ រួមជាមួយកន្លែងផ្សេងៗមួយចំនួនទៀត ដើម្បីការពារកិត្តិយស សេចក្ដីថ្លៃថ្នូ និងជំនឿនៃព្រះពុទ្ធសាសនា។

យោងតាមការប្រកាសរបស់សាលាគណរាជធានីភ្នំពេញ ដែលបានប្រជុំសម្រេចជាមួយក្រសួងធម្មការ និងសាសនារាជធានីភ្នំពេញ បានចេញសេចក្ដីណែនាំចំនួន ៤ចំណុចធំៗ ដើម្បីទប់ស្កាត់បញ្ហាខាងលើឲ្យមានប្រសិទ្ធភាព និងទទួលបានជោគជ័យមានដូចខាងក្រោម៖

១-ការនិមន្តគោចរបិណ្ឌបាតរបស់ភិក្ខុ សាមណេរគ្រប់រូប ត្រូវប្រកបដោយអភិសមាចារ និមន្តបានតែក្នុងកន្លែងជាទីគោចរតែម្យ៉ាងប៉ុណ្ណោះ។ ហាមការនិមន្តបិណ្ឌបាតនៅមុខមន្ទីរពេទ្យ ក្នុងទីផ្សារ តាមរោងចក្រ សហគ្រាស ចំណតរថយន្ត ឬតាមកម្មវិធីបុណ្យនានា ដែលមិនមានការនិមន្ត ។

២-ហាមភិក្ខុ សាមណេរ គង់កម្សាន្តតាមសួនច្បារមុខព្រះបរមរាជវាំង សួនសាធារណៈ ហាងកាហ្វេនៅតំបន់មាត់ទន្លេចតុម្មុខ និងក្នុងតំបន់ផ្លូវសម្រាប់ថ្មើរជើង ចាប់ពីមុខព្រះបរមរាជវាំង ដល់រមណីយដ្ឋានវប្បធម៌ប្រវត្តិសាស្ត្រវត្តភ្នំ ជាដើម ចាប់ពីម៉ោង ៦:០០ នាទីល្ងាច ដល់ម៉ោង ១១:០០ នាទីយប់ ។
៣-ព្រះចៅអធិការគ្រប់វត្ដ មានភារកិច្ចអប់រំ ណែនាំ និងត្រួតពិនិត្យការសិក្សារៀនសូត្រ និងការបដិបត្តិធម៌វិន័យរបស់ភិក្ខុ សាមណេរក្រោមឱវាទឱ្យស្ថិតក្នុងត្រៃសិក្ខាទាំង៣គឺ សីល សមាធិ បញ្ញា ពិសេស ឱ្យចូលរួមអនុវត្តខ្លឹមសារខាងលើឱ្យបានហ្មត់ចត់បំផុត។ ក្នុងករណីដែលភិក្ខុ សាមណេររូបណាពុំបានគោរពតាមសេចក្ដីណែនាំខាងលើនេះ ត្រូវសហការជាមួយមន្ត្រីសង្ឃសាលាគណ សាលាអនុគណ មន្ទីរធម្មការនិងសាសនារាជធានីភ្នំពេញ និងអាជ្ញាធរមានសមត្ថកិច្ចពាក់ព័ន្ធដោះស្រាយឱ្យបានត្រឹមត្រូវទៅតាមធម៌វិន័យ និងបទប្បញ្ញត្តិផ្សេងៗជាធរមាន ។
៤-សាលាអនុគណគ្រប់ខណ្ឌ ត្រូវរៀបចំក្រុមការកសង្ឃរបស់សាលាអនុគណ របស់វត្តនីមួយៗក្នុងខណ្ឌ ដើម្បីចុះអនុវត្តទប់ស្កាត់ការនិមន្តគោចរបិណ្ឌបាតនៅតាមទីអគោចរដ្ឋាន និងនិមន្តចូលទៅកាន់ទីកន្លែងកំសាន្តសាធារណៈនានា នៅក្នុងមូលដ្ឋានរបស់ខ្លួន ពិសេសសាលាអនុគណខណ្ឌដូនពេញ ត្រូវរៀបចំការកសង្ឃមួយក្រុម ដើម្បីអនុវត្តការងារនេះ ។
ក្នុងនោះផងដែរ នៅក្នុងសេចប្រកាសខាងលើក៏បានបញ្ជាក់ដែរថា គ្រប់សាលាអនុគណ សហការជាមួយមន្ទីរធម្មការ និងសាសនារាជធានីភ្នំពេញឲ្យបានជិតស្និត ដើម្បីជាឧត្តមប្រយោជន៍ក្នុងការលើកតម្លៃព្រះពុទ្ធសាសនា ដែលជាសាសនារបស់រដ្ឋ និងគុណតម្លៃរបស់ព្រះសង្ឃក្នុងពុទ្ធសាសនាកម្ពុជា ៕