បណ្តាខេត្តជាច្រើនរបស់ថៃប្រឈមនឹងការបាក់ដី និងទឹកជំនន់ហូរពីព្រៃភ្នំ

ប្រទេសថៃ ៖ នាយកដ្ឋានធនធានធម្មជាតិ ស្ថិតក្រោមក្រសួងធនធានធម្មជាតិ និងបរិស្ថានប្រទេសថៃ បានដាស់តឿនពលរដ្ឋរស់នៅខេត្តជាច្រើន ដូចជា ៖ ខេត្តឈៀងម៉ៃ ឈៀងរ៉ៃ ផាយ៉ៅ ព្រែ អ៊ុតារៈឌីត ណាន មេហុងសន ឡាំផូន ពិស្នុលោក និងអ៊ុថៃថានី ឱ្យប្រុងប្រយ័ត្នគ្រោះថ្នា.ក់ដោយសារការបាក់ដី និងទឹកជំនន់ហូរពីព្រៃភ្នំ ចាប់ពីថ្ងៃទី២៩ ខែមេសា ដល់ថ្ងៃទី១ ខែឧសភា ឆ្នាំ២០២៥ ពីព្រោះថៃរងសម្ពាធខ្យល់ខ្ពស់ពីប្រទេសចិន ។

កាលពីថ្ងៃទី២៩ ខែមេសា កន្លងមក នាយកដ្ឋានធនធានធម្មជាតិរបស់ថៃបានចេញសេចក្តីប្រកាសមួយទៅកាន់ពលរដ្ឋថា ប្រទេសថៃអាចមានការបាក់ដី និងទឹកជំនន់ហូរពីព្រៃភ្នំ ដែលពលរដ្ឋត្រូវបង្កើនការប្រុងប្រយ័ត្នឱ្យបានខ្ពស់ ជាពិសេស អ្នករស់នៅតំបន់ប្រឈមនឹងបាក់ដី ដូចជា ៖

-ស្រុកមេអាយ មេឌែង មេជែម វៀងហ៊ែង និងឈៀងដាវ ខេត្តឈៀងម៉ៃ
-ស្រុកមេសាយ មេហ្វាហ្លួង ថើង ឈៀងស៊ែន ឈៀងខង និងវៀងគែន ខេត្តឈៀងរ៉ៃ
-ស្រុកប៉ង មឿងផាយ៉ៅ និងឈៀងមួន ខេត្តផាយ៉ៅ
-ស្រុករ៉ងក្វាង និងសង ខេត្តព្រែ
-ស្រុកមឿងអ៊ុតារៈឌីត ណាំប៉ាត និងបានខូក ខេត្តអ៊ុតារៈឌីត
-ស្រុកណាម៉ឺន សងឃែវ វៀងសា ណាណយ ថាវាំងផា មឿងណាន បួ បរក្លឿ និងឆាឡឺមព្រះគៀត ខេត្តណាន
-ស្រុកប៉ាយ មឿងមេហុងសន ប៉ាមៈផា មេសៈរៀង និងសបម៉ឺន ខេត្តមេហុងសន
-ស្រុកលី មេថា និងបានហូង ខេត្តឡាំផូន
-ស្រុកណៈខនថៃ និងឆាតិត្រៈកាន ខេត្តពិស្នុលោក
-ស្រុកបានរ៉ៃ និងឡានសាក់ ខេត្តអ៊ុថៃថានី ។

ការបាក់ដី និងទឹកជំនន់ហូរពីព្រៃភ្នំ គឺបណ្តាលមកពីថៃរងសម្ពាធខ្យល់ខ្ពស់ពីប្រទេសចិន ដែលសម្ពាធខ្យល់ខ្ពស់បានបក់គ្របដណ្តប់លើប្រទេសវៀតណាម និងសមុទ្រចិនខាងត្បូង ហើយធ្វើឱ្យបណ្តាខេត្តភាគខាងជើង និងកណ្តាលរបស់ថៃមានខ្យល់ព្យុះរដូវក្តៅកើតឡើង ព្រមទាំងមានភ្លៀងធ្លាក់ខ្លាំងជាបន្តបន្ទាប់ ។ សូមពលរដ្ឋប្រយ័ត្នគ្រោះថ្នាក់ដោយសារភ្លៀងធ្លាក់ខ្លាំងជាប់ៗគ្នា បើកើតហេតុការណ៍បាក់ដី និងទឹកជំនន់ នាយកដ្ឋានធនធានធម្មជាតិនឹងជូនដំណឹងឱ្យពលរដ្ឋបានជ្រាប ។

ពលរដ្ឋត្រូវតាមដានព័ត៌មានអាកាសធាតុ និងបរិមាណទឹកភ្លៀង ជាពិសេស អ្នករស់នៅតំបន់មានភ្លៀងធ្លាក់ខ្លាំង ឬតំបន់ទំនាប គួរតែប្រមូលសម្ភារៈប្រើប្រាស់ និងសត្វទៅកន្លែងខ្ពស់ ឬកន្លែងមានសុវត្ថិភាព ។ គួរចៀសវាងការធ្វើដំណើរតាមផ្លូវទឹក ឬរកត្រី ឬចាប់សត្វផ្សេងៗក្នុងទឹក ព្រមទាំងត្រៀមពិល ឬឧបករណ៍បំភ្លឺឱ្យគ្រប់គ្រាន់ ៕