ទីក្រុងសៀងហៃ ៖ ដើម្បីដើរឲ្យទាន់ទីផ្សារមាសកំពុងឡើងថ្លៃ ប្រទេសចិនបានបើកដំណើរការម៉ាស៊ីន ATM ប្រភេទថ្មីមួយនៅទីក្រុងសៀងហៃ ដែលអាចរំលាយដុំមាស ហើយផ្លាស់ប្ដូរវាទៅជាសាច់ប្រាស់ត្រឡប់ទៅវិញក្នុងរយៈពេលត្រឹមតែ ៣០នាទី ប៉ុណ្ណោះ។

ទូរATM ប្រភេទថ្មីនេះ ត្រូវបានបង្កើតឡើងដោយក្រុមហ៊ុន Kinghood Group នៅក្នុងទីក្រុង Shenzhen។ ម៉ាស៊ីននេះទទួលយកមាសទម្ងន់ចាប់ពី ៣ជី ឡើងទៅ ហើយត្រូវតែជាមាសដែលមានភាពសុទ្ធចាប់ពី ៥០% ឡើងទៅផងដែរ។ លក្ខណៈពិសេសរបស់ទូរATMរំលាយមាសនេះគឺ ៖ ប្រើប្រាស់សីតុ្ហភាពប្រហែល ១,២០០ អង្សាសេក្នុងការរំលាយ, អាចវាស់ទម្ងន់ និងភាពសុទ្ធដោយផ្ទាល់ ព្រមទាំងអាចអនុញ្ញាតឲ្យអតិថិជនដកយកសាច់ប្រាក់ ឬផ្ទេរចូលក្នុងគណនីធនាគារឲ្យតែម្ដង (ប៉ុន្តែវាគិតកម្រៃសេវាមួយចំនួន)។

បច្ចុប្បន្នដោយសារតម្លៃមាសលើទីផ្សាពិភពលោកកំពុងឡើងថ្លៃខ្ពស់ ដូច្នេះសេវាកម្មនេះកំពុងទាក់ទាញការចាប់អារម្មណ៍យ៉ាងខ្លាំង។ មនុស្សជាច្រើន បានមកតម្រង់ជួររង់ចាំដើម្បីធ្វើការយកមាសរបស់ពួកគេដែលបានសន្សុំទុកមករំលាយប្ដូរជាសាច់ប្រាក់ភ្លាមៗ។ ម៉ាស៊ីននេះដំណើរការរយៈពេល១២ម៉ោងក្នុងមួយថ្ងៃ គឺចាប់ពីម៉ោង៩ព្រឹក ដល់ម៉ោង៩យប់។

មនុស្សម្នាដែលបានមកទទួលសេវាកម្មរបស់ទូរATMនេះបាននិយាយថា ៖ ការដាក់ប្រើប្រាស់ទូរATM នេះវាមានភាពងាយស្រួលជាងការយកមាសទៅលក់នៅក្នុងហាងលក់គ្រឿងអលង្ការ ព្រោះពួកគេគ្រាន់តែយកមាសរបស់ពួកគេដាក់ចូលទៅ ម៉ាស៊ីននឹងធ្វើការពិនិត្យគុណភាព និងទម្ងន់បន្ទាប់មកគុណជាតម្លៃទឹកប្រាក់ដែលត្រូវទទួលបានមកឲ្យវិញដោយមិនត្រូវការលិខិតបញ្ជាក់ការទិញ-លក់ ត្រូវចំណាយពេលរង់ចាំយូរ និងបានតម្លៃទាបជាងក្នុងទីផ្សារជាក់ស្ដែងដូចនៅតាមហាងឡើយ។

បើទោះជាម៉ាស៊ីន ATM រំលាយមាសបែបទំនើបនេះមានការគាំទ្រច្រើន និងមានភាពងាយស្រួលក៏ពិតមែន ប៉ុន្តែវាក៏អាចផ្ដល់នូវគុណវិបត្តិបានផងដែរ។ មនុស្សមួយចំនួនបារម្ភពីបញ្ហាអសុវត្ថិភាព ដោយសារវាអាចជាឪកាសល្អសម្រាប់ក្រុមចោរដែលលួ..ចមាសពីគេហើយយកមកដាក់រំលាយយកប្រាក់បានយ៉ាងងាយស្រួលព្រោះវាមិនត្រូវការឯកសារបញ្ជាក់។ មួយវិញពាក់ព័ន្ធនឹងការគ្រប់គ្រងរបស់វានៅមានកម្រិត ប្រសិនបើវាអាចនឹងកើតមានកំហុសបច្ចេកទេសណាមួយហើយការវាស់គុណភាពមាសនោះខុស ដូច្នេះប្រាក់ដែលត្រូវទទួលប្រាកដជាបានតិចជាងតម្លៃជាក់ស្ដែង ព្រោះតែម៉ាស៊ីននេះមិនអាចចរចាតម្លៃបានឡើយ៕

ទីក្រុងបាងកក ៖ អគ្គនាយកដ្ឋានស្ដីពីអាកាសចរណ៍ស៊ីវិលនៃប្រទេសថៃ ហៅកាត់ (CAAT) គ្រោងនឹងចាប់ផ្ដើមសាកល្បងប្រើប្រាស់ដ្រូនសម្រាប់ដឹកជញ្ជូនទំនិញនៅក្នុងទីក្រុងបាងកក ដើម្បីជាជំនួយដល់វិស័យដឹកជញ្ជូន កាត់បន្ថយការកកស្ទះចរាចរណ៍ និងប្រជាជនទទួលបានទំនិញឆាប់រហ័ស។

យោងតាមសារព័ត៌មានក្នុងស្រុកថៃបានឲ្យដឹងថា ៖ គម្រោងនេះនឹងដាក់សាកល្បងចាប់ពីខែមិថុនា ឆ្នាំ២០២៥នេះតទៅ ដោយចំណុចដឹកជញ្ជូនសាកល្បងដំបូងគឺចាប់ពីការិយាល័យអន្តរទូរគមនាគមន៍ជាតិនៅបាងរ៉ាក់ ទៅកាន់តំបន់ អាយខនស្យ៉ាម (ICONSIAM) ដែលជាផ្លូវកាត់មាត់ទន្លេចាវផ្រាយ៉ា។

លោក Manat Chavanaprayoon នាយក CAAT បានថ្លែងក្នុងសន្និសីតកាសែតកាលពីថ្ងៃទី ២៧ ខែមេសាថា ៖ ផែនការនេះនឹងគ្របដណ្ដប់លើគោលនយោបាយការអភិវឌ្ឍន៍នៃបច្ចេកទេសនៃវិស័យដឹកជញ្ជូន ដោយផ្ដោតលើសុវត្ថិភាព និងការការពារព័ត៌មានផ្ទាល់ខ្លួនរបស់អ្នកកម្មង់ទំនិញ។ លោកបានបន្តថា៖ គម្រោងនេះក៏នឹងសហការជាមួយស្ថាប័នពាក់ព័ន្ធជាច្រើនដូចជា ក្រុមហ៊ុនទូរគមនាគមន៍ជាតិ, ក្រសួងប្រៃសណីយ៍, អង្គភាពវិទ្យុអាកាសចរណ៍ថៃ និងក្រុមហ៊ុនផ្ដល់សេវាដឹកជញ្ជូនទំនិញឯកជនមួយចំនួនទៀត ដើម្បីបង្កើតផែនការមេមួយ (Drone Master Plan) ដែលនឹងជំរុញវិស័យដឹកជញ្ជូនតាមរយៈដ្រូនកាន់តែរីកចម្រើន។

អគ្គនាយកដ្ឋានស្ដីពីអាកាសចរណ៍ស៊ីវិលនៃប្រទេសថៃ ក៏បានអំពាវនាវឲ្យពលរដ្ឋក្នុងទីក្រុងបាងកកចូលរួមសាកល្បងប្រើប្រាស់សេវាកម្មដឹកជញ្ជូនថ្មីនេះឲ្យបានច្រើនកុះករ។ ហើយCAAT ក៏មានកម្រោងក្នុងការដាក់ពង្រាយទីតាំងប្រតិបត្តិការរបស់ដ្រូននេះ ឲ្យបានកាន់តែទូលំទូលាយទូទាំងប្រទេស ដើម្បីបន្តអភិវឌ្ឍការដឹកជញ្ជូនដោយដ្រូននៅក្នុងប្រទេសថៃ។

លើសពីនេះថៃបានអះអាងថា ការអនុវត្តចំណុចនេះ គឺជាជំហានដ៏សំខាន់មួយសម្រាប់បញ្ចូលបច្ចេកវិទ្យាដ្រូន ចូលទៅក្នុងប្រព័ន្ធដឹកជញ្ជូនឲ្យសមស្របនឹងតម្រូវការរបស់មនុស្សក្នុងយុគៈសម័យទំនើបនេះ៕

កុមារតូចៗដែលស្ថិតនៅក្នុងវ័យកំពុងរីកចម្រើនខ្លាំងផ្នែកខួរក្បាល ងាយនឹងទទួលយកនិងត្រាប់តាមអ្វីដែលពួកគេឃើញណាស់ ជាពិសេសគឺងាយនឹងកាត់អ្វីដែលពួកគេតែងតែមើលឃើញជាប្រចាំ។ បច្ចុប្បន្នប្រព័ន្ធផ្សព្វផ្សាយកាន់តែទំនើប ការស្វែងរកមាតិកាសម្រាប់មើលកម្សាន្តកាន់តែមានភាពងាយស្រួល។

ជាក់ស្ដែងសម្រាប់កុមារតូចៗមួយចំនួនដែលឪពុកម្ដាយរបស់ពួកគេអនុញ្ញាតឲ្យពួកគេចុចកាន់ទូរស័ព្ទដៃ ឬថេប្លេតបានដោយផ្ទាល់នោះ ពួកគេនឹងមានសេរីភាពយ៉ាងខ្លាំងក្នុងការស្វែងរកមាតិកាកម្មវិធី ឬគំនូរជីវចល ដែលពួកគេចូលចិត្ត និងចង់មើលដោយខ្លួនឯង។ ប៉ុន្តែការផ្ដល់សិទ្ធិបែបនេះ អាចផ្ដល់ផលមិនល្អជាច្រើនដល់ពួកគេ ព្រោះមិនប្រាកដថា អ្វីដែលពួកគេបានមើល ល្អសម្រាប់ពួកគេឡើយ។

អ្នកជំនាញ និងអ្នកមានបទពិសោធជាមួយកុមារបានលើកឡើងដូចៗគ្នាថា៖ កុមារតូចៗជាច្រើនបាន ប្រឈមនឹងបញ្ហាយឺតការនិយាយ ខ្សោយទំនាក់ទំនង រឹងរូស និងភាពឆ្លាតវៃចុះខ្សោយ បន្ទាប់ពីពួកគេតែងតែទស្សនាគំនូរជីវចលទាំងនេះ រួមមាន៖

1. រឿង Happy Tree Friends ៖ ជាគំនូរជីវចលដែលមានពណ៌ចម្រុះមានតួអង្គCute Cute ប៉ុន្តែគ្រប់ភាគនៃរឿងនេះគឺបង្ហាញពីអំពើហិ..ង្សាយ៉ាងព្រៃ..ផ្សៃ។
2. រឿង Shaun the sheep ៖ គ្រប់តួអង្គនៅក្នុងគំនូរជីវចលនេះមិននិយាយគ្នាឡើយ ជាទូទៅពួកគេប្រាស្រ័យទាក់ទងគ្នាដោយកាយវិការប៉ុណ្ណោះ។
3. រឿង Masha and the bear ៖ សម្រាប់រឿងនេះមាននិយាយខ្លះៗ ជាភាសាអង់គ្លេស ឬភាសាផ្សេងទៀត ប៉ុន្តែវាមិនមែនជាគំរូល្អសម្រាប់កុមារទេ ដោយសារតួអង្គក្មេងស្រី Masha មានអត្តចរឹកមិនស្ដាប់បង្គាប់ និងចូលចិត្តធ្វើរឿងគ្រោះថ្នា..ក់។
4. រឿង Larva ៖ជារឿងបែបកំប្លែងៗគួរឲ្យអស់សំណើចស្ទើគ្រប់វគ្គ ប៉ុន្តែមិនសមឲ្យកុមារតូចៗមើលឡើយ ព្រោះតួអង្គមិននិយាយ ហើយបញ្ចេញតែសម្លេងយំ សើច ឬស្រែកប៉ុណ្ណោះ។
5. រឿង Oggy ៖ វាមិនមានតម្លៃអប់រំសម្រាប់កុមារ ហើយតួអង្គសត្វល្អិតតូចៗដែលនាំបញ្ហាដល់តួអង្គសត្វធំបែរជាតែងតែឈ្នះរហូត កត្តានេះអាចនាំឲ្យក្មេងខូច ធ្វើអ្វីតាមចិត្តចង់

ទាំងនេះសុទ្ធតែជាគំនូរជីវចលដែលល្បីៗនិងពេញនិយមខ្លាំងក្នុងពេលបច្ចុប្បន្ន ប៉ុន្តែក្រៅពីនេះ ក៏នៅមានគំនូរជីវចល ដែលមានសកម្មភាពហិ..ង្សា មិនប្រើពាក្យពេជន៍សន្ទនា បញ្ចេញកាយវិការមិនសមរម្យ និងគ្មានតម្លៃអប់រំជាច្រើនផ្សេងទៀត ដែលជំរុញឲ្យមានផលអវិជ្ជមានដល់អត្តចរឹក និងការវិវឌ្ឍន៍ផ្នែកបញ្ញាស្មារតីរបស់កុមារ។ ដូចនេះ ក្នុងនាមជាអាណាព្យបាលលោកអ្នកគួរចេះសង្កេត និងគ្រប់គ្រងលើអ្វីដែលកូនៗរបស់ខ្លួនកំពុងតែមើល ដើម្បីចៀសវាងផលប៉ះពាល់ដែលអាចកើតមាននៅថ្ងៃក្រោយ៕