យោងតាមការចាត់ថ្នាក់ចំពោះ «រាជវាំងដែលស្រស់ស្អាតបំផុតទាំង១០ សម្រាប់ការធ្វើដំណើរកំសាន្តបែបព្រេងនិទាននៅក្នុងអាស៊ី» ប្រចាំឆ្នាំ២០២៤ ព្រះបរមរាជវាំងនៃប្រទេសកម្ពុជា បានទទួលបានចំណាត់ថ្នាក់លេខ៩ នៅទូទាំងអាស៊ី។ ការចាត់ថ្នាក់ត្រូវបានធ្វើឡើងដោយ Tripzilla ដែលជាគេហទំព័រផ្សព្វផ្សាយពីគោលដៅទេសចរណ៏ធំបំផុតនៅអាស៊ី។

នៅក្នុងអត្ថបទមួយដែលលើកឡើងអំពី រាជវាំងដែលស្រស់ស្អាតបំផុត និងស័ក្តិសមសម្រាប់ការទៅទស្សនាកម្សាន្តក្នុងពេលវិស្សមកាល ដោយក្នុងនោះមានស្ថាបត្យកម្មចំនួន ១០ ត្រូវបានTripzillaទទួលស្គាល់ថាមានភាពលេចធ្លោទាំងសម្រស់ និង ប្រវត្តិវានីមួយៗរួមមាន ៖ ទី១ និងទី២ បានទៅលើរាជវាំង Himeji និងវិមានអធិរាជតូក្យូ របស់ជប៉ុន, ទី៣ និងទី៤ បានទៅលើរាជវាំង Mysore និង Mehrangarh Fort ប្រទេសឥណ្ឌា, ទី៥ រាជវាំង Gyeongbokgung ប្រទេសកូរ៉េខាងត្បូង, ទី៦ វិមាន Istano Basa Pagaruyung របស់ឥណ្ឌូនេស៊ី, ទី៧ រាជវាំងម៉ាន់ដាឡេ របស់ប្រទេសមីយ៉ាន់ម៉ា, ទី៨ The Summer palace នៅប្រទេសចិន, ទី៩ ព្រះបរមរាជវាំងចតុមុខ របស់កម្ពុជា និងទី១០ The Grand Royal Palace ប្រទេសថៃ។

គួរជម្រាបថា ក្រៅពីការផ្ដល់ចំណាត់ថ្នាក់លេខ៩ សម្រាប់ព្រះបរមរាជវាំងចតុមុខ គេថែមទាំងបានលើកសរសើរពីស្ថាបត្យកម្មខ្មែរមួយនេះ ថាមានភាពល្អប្រណីតដោយសាងសង់ដំបូលរាងខ្ពស់ស្រឡះ មានក្បាច់ចម្លាក់លេចធ្លោ និងការរចនាផ្ទៃដំបូលឲ្យមានពណ៌មាសយ៉ាងគួរឲ្យទាក់ទាញ។

លើសពីនេះគេហទំព័រ Tripzilla ក៏បានរំលេចឲ្យឃើញផងដែរថា ចំណុចដែលសំខាន់បំផុតនៅក្នុងបរិវេណនៃព្រះបរមរាជវាំងនេះរួមមាន៖ សាលប្រជុំដែលមានរាជបល្ល័ងសម្រាប់ព្រះមហាក្សត្រគង់ប្រថាប ប្រាសាទទេវាវិនិច្ឆ័យ ព្រះវិហារព្រះកែវមរកត ។ល។

គួររំលឹកថា ព្រះបរមរាជវាំងចតុមុខបានសាងសង់ឡើងដោយបែរមុខទៅទិសខាងកើត គឺបែរទៅរកទន្លេចតុមុខ មានកំពែង ព័ទ្ធជុំវិញប្រវែង ១៧៧២ម ដែលលំអទៅដោយសន្លឹកសីមានៅខាងមុខ ត្រូវបានកសាងឡើង នៅឆ្នាំ១៨៦៦ – ១៨៧០ ក្នុងរជ្ជកាលព្រះបាទនរោត្ដម។ សំណង់ទាំងឡាយ ក្នុងព្រះបរមរាជវាំង ត្រូវបានគេកសាងឡើងទៅតាម ស្ថាបត្យកម្មប្រពៃណីជាតិ ដោយអ្នកឧកញ៉ាទេពនិម្មិត ម៉ក់ ជាស្ថាបត្យករដ៏ឆ្នើម។

ព្រះបរមរាជវាំង ត្រូវបានចាត់ទុកជាតំណាងប្រទេសជាតិទាំងមូល ហើយនៅក្នុងបរិវេណនៃព្រះបរមរាជវាំង មានប្រាសាទជាច្រើន ដែលបង្អួតរាងសង្ហារ ទៅតាមក្បូរក្បាច់រចនា មានដំបូលច្រើនជាន់ ប្រក់ក្បឿងពណ៌មាស និងកំពូលស្រួចបាញ់ទៅលើ ដែលជានិមិត្តរូបនៃ ការរីកចម្រើនមិនចេះចប់៕

ថ្ងៃនេះ ជាថ្ងៃទិវាជាតិនៃការចងចាំ ២០ ឧសភា ដែលជាថ្ងៃប្រជាជនកម្ពុជាគ្រប់ៗរូបចងចាំមិនអាចបំភ្លេចបាន ក្នុងរបបកម្ពុជាប្រជាធិបតេយ្យ ឬហៅថារបបប្រល័យពូជសាសន៍ ប៉ុល ពត (១៧ មេសា ១៩៧៥ – ៦ មករា ១៩៧៩)។

ទិវាជាតិនៃការចងចាំ គឺជាទិវាបុណ្យជាតិផ្លូវការដែលត្រូវបានកំណត់ដោយ រាជរដ្ឋាភិបាលកម្ពុជាតាមរយៈអនុក្រឹត្យលេខ១៩ ចុះថ្ងៃទី១៤ ខែកុម្ភៈ ឆ្នាំ២០១៨។

ទិវានេះ ជាការរំលឹកដល់វិញ្ញាណក្ខន្ធដល់ជនរងគ្រោះជាង៣លាននាក់ ដែលបានស្លាប់បាត់បង់ជីវិត និងជនរងគ្រោះ ពីឧក្រិដ្ឋកម្ម ដែលកើតមានក្នុងរបបកម្ពុជាប្រជាធិបតេយ្យ។

ដើមឡើយ រដ្ឋសភានៃសាធារណរដ្ឋប្រជាមានិតកម្ពុជាបានអនុម័តយក ថ្ងៃទី២០ ខែឧសភា ជា”ទិវាចងកំហឹង” កាលពីថ្ងៃទី១៨ ខែសីហា ឆ្នាំ១៩៨៣ ដើម្បីជាការចងកំហឹងចំពោះ “បនប្រល័យពូជសាសន៍ ប៉ុល ពត អៀង សារី និងខៀវសំផន”។

ក្រោយមក ឆ្នាំ១៩៩៣ រាជរដ្ឋាភិបាលកម្ពុជាបានប្តូរពី “ទិវាចងកំហឹង” មកជា “ទិវាចងចាំ” រហូតដល់ថ្ងៃទី១៤ ខែកុម្ភៈ ឆ្នាំ២០១៨ រាជរដ្ឋាភិបាលកម្ពុជា កំណត់យកថ្ងៃទី២០ ខែឧសភា ជា “ទិវាជាតិនៃការចងចាំ” វិញ៕

ទោះជាការចែករំលែកជារឿងល្អក្តី ប៉ុន្តែសម្ភារៈប្រើប្រាស់ផ្ទាល់ខ្លួនមួយចំនួន ហាមឱ្យអ្នកដទៃខ្ចីដាច់ខាត ទោះជាអ្នកនោះជាមិត្តភក្តិជិតស្និទ្ធ ឬសាច់ញាតិក្តី ពីព្រោះយើងអាចបាត់បង់ទ្រព្យសម្បត្តិ ឬត្រូវគេលួ.ចយកទិន្នន័យ ទីបំផុត យើងនឹងបាត់បង់មិត្តភាព ហើយមានអារម្មណ៍ស្តាយក្រោយ ។ តើសម្ភារៈទាំងនេះមានអ្វីខ្លះ?

១-ទូរស័ព្ទដៃ ៖ ទូរស័ព្ទដៃ ជាកន្លែងផ្ទុកទិន្នន័យផ្ទាល់ខ្លួនសំខាន់ៗ ថែមទាំងមាន App គណនីធនាគារ ដែលអាចឱ្យអ្នកប្រើប្រាស់ផ្ញើប្រាក់ ដកប្រាក់ និងទូទាត់ថ្លៃទំនិញ ឬសេវាកម្មផ្សេងៗ ។ បើឱ្យអ្នកដទៃខ្ចីទូរស័ព្ទដៃ គឺវាមិនត្រឹមតែចែករំលែកទិន្នន័យផ្ទាល់ខ្លួនប៉ុណ្ណោះទេ ប៉ុន្តែគេនឹងលួចប្រើប្រាស់ App ធនាគារក្នុងទូរស័ព្ទដៃ ។

២-កាតឥណទាន ៖ ទោះជាយើងមិនបានឱ្យអ្នកដទៃខ្ចីប្រាក់ដោយផ្ទាល់ ប៉ុន្តែបើគេខ្ចីកាតឥណទាន មានន័យថា យើងប្រគល់ប្រាក់ទាំងអស់ឱ្យគេ ។ ការធ្វើបែបនេះ ក្រៅពីបាត់បង់ប្រាក់ហើយ គឺប្រឈមនឹងការលួចទិន្នន័យធនាគារទៀតផង និងហាមដាច់ខាត ប្រាប់លេខសម្ងាត់ឱ្យគេដឹង ។

៣-កុំព្យូទ័រ ៖ កុំព្យូទ័រ ឬលេបថបនីមួយៗសុទ្ធតែផ្ទុកទិន្នន័យផ្ទាល់ខ្លួន បើទោះជាឱ្យគេខ្ចីមិនយូរក្តី ក៏យើងប្រឈមនឹងការលួចទិន្នន័យដែរ ។ ហេតុនេះ កុំឱ្យអ្នកដទៃខ្ចីវាដាច់ខាត ។

៤-ឯកសារផ្ទាល់ខ្លួន ៖ រួមមាន អត្តសញ្ញាណប័ណ្ណ ប័ណ្ណបើកបរ សៀវភៅបញ្ជីធនាគារ សៀវភៅគ្រួសារ ប្លង់ដី ឬឯកសារផ្សេងៗដែលបញ្ជាក់ទិន្នន័យផ្ទាល់ខ្លួន ក៏ពុំគួរឱ្យអ្នកដទៃខ្ចីដែរ ពីព្រោះប្រឈមនឹងការលួចយកទិន្នន័យផ្ទាល់ខ្លួនទៅប្រើប្រាស់ក្នុងគោលបំណងអាក្រក់ ។

៥-អ៊ីម៉ែល ៖ អ៊ីម៉ែលមានសារៈសំខាន់យ៉ាងខ្លាំង ជាពិសេស ការចុះឈ្មោះក្នុងបណ្តាញសង្គមផ្សេងៗ ឬប្រើប្រាស់ App គឺចាំបាច់ត្រូវប្រើប្រាស់អ៊ីម៉ែលជានិច្ច ។ អ្នកដទៃអាចយកអ៊ីម៉ែលយើងទៅបង្កើតគណនីហ្វេសប៊ុកក្លែងក្លាយដើម្បីបោកប្រាស់ ខ្ចីប្រាក់ ឬប្រព្រឹត្តទង្វើខុសច្បាប់ ។

៦-រថយន្ត និងម៉ូតូ ៖ មិនថារថយន្ត ឬម៉ូតូ ហាមឱ្យគេខ្ចីដាច់ខាត ព្រោះគេអាចយករថយន្តរបស់យើងទៅដឹកថ្នាំញៀនខុសច្បាប់ ឬបើកបុកមនុស្សស្លាប់ ឬគ្រោះថ្នាក់ចរាចរណ៍បណ្តាលឱ្យរថយន្តខូចខាត ។ មុននឹងគេខ្ចី ត្រូវគិតពីបញ្ហាទាំងនេះ ព្រោះគ្រោះថ្នាក់អាចកើតឡើងគ្រប់ពេលវេលា ដែលធ្វើឱ្យម្ចាស់យានជំនិះក្តៅក្រហាយ ។

ក្រៅពីនេះ របស់ប្រើប្រាស់ផ្ទាល់ខ្លួនផ្សេងទៀត ដូចជា ៖ ម៉ាស់ កន្សែងជូតខ្លួន សម្លៀកបំពាក់ និងច្រាស់ដុសធ្មេញ ក៏ហាមឱ្យគេខ្ចីដែរ ដើម្បីសុវត្ថិភាព និងបង្ការការឆ្លងមេរោគ ៕

ពេលក្រុមហ៊ុនសម្ភាសន៍ចូលធ្វើការ បេក្ខជនគួរប្រុងប្រយ័ត្នពាក្យសម្តីរបស់ខ្លួន និងពុំគួរនិយាយពាក្យទាំងនេះដាច់ខាត ពីព្រោះវានឹងបាត់បង់តម្លៃ ឬពុំទទួលបានការងារធ្វើ ។ ផ្នែកធនធានមនុស្សអាចចាប់ចំណុចខ្សោយរបស់បេក្ខជនភ្លាមៗពេលបេក្ខជនឆ្លើយតបសំណួរ ហើយពួកគេនឹងវាយតម្លៃថា អ្នកដាក់ពាក្យធ្វើការគ្មានសមត្ថភាពបំពេញការងារទេ ។ ហេតុនេះ កុំឆ្ងល់ថា ហេតុអ្វីក្រុមហ៊ុនពុំជ្រើសរើសឱ្យចូលធ្វើការ ។

១-ហាមនិយាយអាក្រក់ពីក្រុមហ៊ុនចាស់ ៖ បេក្ខជនខ្លះនិយាយអាក្រក់ពីក្រុមហ៊ុនចាស់ឱ្យអ្នកសម្ភាសន៍ស្តាប់ ដូចជា ៖ នាយកក្រុមហ៊ុនចាស់មើលពុំឃើញតម្លៃរបស់ខ្ញុំ ហើយតែងកែតម្រូវការការងារខ្ញុំជាច្រើនលើក នៅតែពុំឯកភាព ។ ការនិយាយបែបនេះនឹងធ្វើឱ្យអ្នកសម្ភាសន៍គិតថា បេក្ខជនរូបនេះនឹងនិយាយអាក្រក់ពីក្រុមហ៊ុនថ្មីទៅឱ្យក្រុមហ៊ុនផ្សេងទៀតស្តាប់ ។

២-ហាមសួរអ្នកសម្ភាសន៍វិញ ៖ ហាមសួរអ្នកសម្ភាសន៍ថា តើក្រុមហ៊ុនធ្វើការងារអ្វីខ្លះ ឬប្រកបអាជីវកម្មអ្វី ឬលក់ទំនិញអ្វី? ដោយសារបេក្ខជនពុំសូវស្គាល់ពីក្រុមហ៊ុន ។ ការសួរទៅក្រុមហ៊ុនវិញបង្ហាញថា បេក្ខជនពុំចាប់អារម្មណ៍ជាមួយក្រុមហ៊ុន ឬពុំដឹងថា ក្រុមហ៊ុនលក់ទំនិញអ្វីខ្លះ ។

៣-ហាមអួតខ្លួនឯងឆ្លាត ៖ បេក្ខជនភាគច្រើនតែងអួតថា ខ្លួនបានបញ្ចប់ការសិក្សាពីសាកលវិទ្យាល័យក្រៅប្រទេស និងជាមនុស្សឆ្លាតជាងមិត្តភក្តិ ឬឆ្លាតជាងគេបង្អស់ ដូច្នេះ ក្រុមហ៊ុនត្រូវតែទទួលខ្លួនឱ្យចូលធ្វើការ ។ ពុំគួរអួតអាងបែបនេះទេ ពីព្រោះអ្នកឆ្លាតពិតប្រាកដនឹងបង្ហាញតាមរយៈលទ្ធផលការងារ ហើយក្រុមហ៊ុនមានវិធីដើម្បីដឹងថា បេក្ខជនឆ្លាតពិតប្រាកដឬអត់?

៤-ហាមសួរពីប្រាក់ខែ ៖ កុំសួរពីប្រាក់ខែ ពីព្រោះក្រុមហ៊ុនគិតថា បេក្ខជនពុំផ្តោតលើការងារ ហើយនិយាយពីប្រាក់ខែមុនគេ ។ ប៉ុន្តែអាចនិយាយពីប្រាក់ខែពេលក្រោយ ពេលក្រុមហ៊ុនទទួលឱ្យចូលធ្វើការ ។

៥-ហាមចង់បានតួនាទីរបស់អ្នកសម្ភាសន៍ ៖ ពេលក្រុមហ៊ុនសួរថា តើប្អូនមានគោលដៅបែបណារយៈពេល៥ឆ្នាំខាងមុខ? បេក្ខជនបែរជាឆ្លើយថា ចង់ធ្វើការងារជាធនធានមនុស្សនាថ្ងៃអនាគត ប៉ុន្តែការនិយាយបែបនេះធ្វើឱ្យអ្នកសម្ភាសន៍មានអារម្មណ៍ថា បេក្ខជនចង់ដណ្តើមតួនាទីខ្លួន ។ បេក្ខជនគួរនិយាយថា ខ្ញុំចង់អភិវឌ្ឍន៍សមត្ថភាពជាបន្តបន្ទាប់ និងចង់រៀនសូត្រការងារពីអ្នកសម្ភាសន៍ ។

៦-ហាមសួរពីថ្ងៃសុំឈប់សម្រាក ៖ ការសួរពីថ្ងៃឈប់សម្រាកបង្ហាញថា បេក្ខជនចាប់អារម្មណ៍ពីថ្ងៃឈប់សម្រាកតែម្យ៉ាង ។ បេក្ខជនគួរនិយាយពាក្យនេះ បើខ្ញុំមានធុរៈចាំបាច់ពេលមកធ្វើការដំបូង តើខ្ញុំអាចជូនដំណឹងក្រុមហ៊ុនជាមុនពីថ្ងៃឈប់សម្រាកបានទេ?

៧-បើក្រុមហ៊ុនសួរថា តើបេក្ខជនមានសំណួរអ្វីឆ្ងល់ទេ? បេក្ខជនពុំគួរនិយាយថា ខ្ញុំគ្មានសំណួរអ្វីទេ ។ ការនិយាយបែបនេះ ក្រុមហ៊ុននឹងគិតថា បេក្ខជនពុំចាប់អារម្មណ៍នឹងតួនាទីការងារ ។ បេក្ខជននឹងបាត់បង់ឱកាសនេះ ដូច្នេះ គួរតែសួរ ចាប់ពី២ ទៅ៣សំណួរ ទៅក្រុមហ៊ុនវិញ ។

៨-ហាមសួរថា តើដឹងលទ្ធផលពេលណា? សំណួរនេះបញ្ជាក់ថា បេក្ខជនពុំចេះអត់ធ្មត់ ឬពុំចេះរង់ចាំ ហើយគ្រាន់តែមកសម្ភាសន៍ដើម្បីសាកល្បងសមត្ថភាព ពុំចាប់អារម្មណ៍ក្រុមហ៊ុន ។ ក្រុមហ៊ុនអាចនឹងជ្រើសយកបេក្ខជនផ្សេងវិញ ប៉ុន្តែបើក្រុមហ៊ុនចាប់អារម្មណ៍ ពួកគេនឹងប្រញាប់ទាក់ទងយើងមកធ្វើការឱ្យបានឆាប់បំផុត ៕