ភរិយា ជា សុជាតិ ចេញទទួលស្គាល់ពីសំណេរនិងបកស្រាយពីមូលហេតុរឹតបន្តឹងប្តីរឿងផឹកស៊ី

ថ្មីៗនេះអ្នកប្រើប្រាស់បណ្តាញសង្គមបានបញ្ចេញមតិវែកញែកជាច្រើនទាក់ទងនឹងសំណេរមួយរបស់ភរិយាតារាចម្រៀង ជា សុជាតិ ដែលខឹងសម្បារទៅកាន់អ្នកដែលបបួលស្វាមី របស់ខ្លួនផឹកស៊ី។ ការបង្ហោះរបស់អ្នកនាង រឹម លក្ម្សី អ្នកមួយចំនួនក៏បង្ហាញការយល់ ចិត្តនាងខណៈអ្នកមួយចំនួនក៏បញ្ចេញមតិរិះគន់ចំពោះសម្តីរបស់នាងដែលប្រើប្រាស់មិនសមរម្យក្នុងនាមជាប្រពន្ធរបស់តារាល្បីឈ្មោះមួយរូប។

ការបញ្ចេញមតិវែកញែកជាច្រើនបានជំរុញឱ្យអ្នកគ្រប់គ្រងសិល្បករ រឹម លក្ម្សី ដែលជាភរិយា ជា សុជាតិ ចេញមកបកស្រាយវែងអន្លាយពីមូលហេតុដែលហាមឃាត់ ការផឹកស៊ីរបស់តារាចម្រៀង ជា សុជាតិ ព្រោះមិនចង់ឱ្យលោកវិលទៅរកសភាពកាលពីមុន ដែលមានជំងឺផ្លូវចិត្តស្ទើរតែបាត់បង់ជីវិត។ អ្នកនាង រឹម លក្ម្សី ក៏បានបញ្ជាក់ទៀតថាស្តីបន្ទោសនាងចុះដែលហាមឃាត់ការផឹកស៊ីរបស់ប្តីព្រោះគ្រប់យ៉ាងនាងចង់ឱ្យប្តីរបស់ខ្លួនល្អតែប៉ុណ្ណោះ។

អ្នកនាង លក្ម្សី បានរៀបរាប់ថា លោក ជា សុជាតិ មានជំងឺផ្លូវចិត្តមួយប្រភេទហៅថា PTSD (post traumatic-stress disorder) ហើយមុនពេលដែលនាងចាប់ផ្តើមចូល ទៅជួយតារាចម្រៀងរូបនេះ ចេញឱ្យផុតពីជំងឺនេះគឺ ជា សុជាតិ ជាមនុស្សញៀនស្រា ញៀនបារី និងមានរឿងជាច្រើនទៀតដែលមិនអាចនិយាយបាន។ នាង បន្តទៀតថា សុជាតិ ក្នុងមួយខែរកបានរាប់ម៉ឺនដុល្លាតែបែរជាអត់មានសល់លុយនៅខ្លួនទេ ហើយនៅជំពាក់គេជុំខ្លួនទៀត និងបានបញ្ជាក់ថាតារាចម្រៀងរូបនេះខានចេញបទចម្រៀងបន្ទាប់ពី COVID គឺ លោកកំពុងធ្លាក់ខ្លួនឈឺជំងឺ PTSD នេះខ្លាំងណាស់ អត់ញុំាបានញុំាទឹក គិតតែពីផឹកនិងជក់បារី ពីមនុស្សគីឡូជាង៧០ ស្រកនៅសល់ជាង៥០ លែង ខ្វល់ការងារអីទាំងអស់។

ភរិយាតារាចម្រៀង ជា សុជាតិ បានបកស្រាយទៀតថា ជំងឺរបស់ សុជាតិ កាន់តែធ្ងន់ធ្ងរគឺក្រោយម្តាយរបស់លោកចែកឋាន ហើយពេលមានជាតិអាល់កុលក្នុងខ្លួន ជា សុជាតិ ជាមនុស្សពីរនាក់ផ្សេងគ្នាក្លាយជាមនុស្សឆេវឆាវ ស្រែកឡូឡា បោកប្រាស់របស់ និយាយផ្តេសផ្តាសមិនដឹងរឿង ជេរគេជេរឯង និងមានរឿងជាច្រើនទៀតដែលមិនអាចនិយាយបានហើយពេលស្វាងមកវិញ ជា សុជាតិ មិនដឹងខ្លួនថាបានធ្វើអ្វីនោះទេ ហើយនៅពេលដុនដាបបំផុតលោកគឺលែងចង់រស់ម្តងៗ។

អ្នកនាង លក្ម្សី ថាពេលដែល សុជាតិ ធ្លាក់ខ្លួនខ្លាំងបំផុតគ្មានអ្នកណាឈឺឆ្អាលនោះទេ សូម្បីតែអ្នកដែលលោកស្រលាញ់ ៦-៧ឆ្នាំក៏ទៅចោល ពេល សុជាតិ បានធូរស្រាលមក វិញក៏ចង់ទាញលោកត្រឡប់ទៅរកសភាពចាស់វិញ។អ្នកគ្រប់គ្រងសិល្បកររូបនេះបាន បញ្ជាក់ទៀតថាទម្រាំ ជា សុជាតិ អាចស្រោចស្រង់គេចពីសុបិនអាក្រក់បាននាងបានលះ បង់ជាច្រើនទាំងលុយកាក់ទាំងកាយ ពេលវេលា ផ្លូវចិត្ត សឹងតែលះបង់ដល់ជីវិតដើម្បីជួយ ជា សុជាតិ។ មិនត្រឹមតែប៉ុណ្ណោះ នាងបានបញ្ជាក់ទៀតថា ក្នុងរយៈពេល២ឆ្នាំដែលនាង បានជួយ ជា សុជាតិ គេចផុតពីជំងឺនោះគឺជាសុបិនអាក្រក់ ដែល បានតាមលងបន្លាចនាងដល់សព្វថ្ងៃនេះ។

អ្នកនាង លក្ម្សី ថា ជា សុជាតិ ធូរស្បើយជិត២ឆ្នាំហើយប៉ុន្តែស្ថានភាពជំងឺអាចរើបានគ្រប់ ពេលប្រសិនជាមានរឿងប៉ះទង្គិចផ្លូវអារម្មណ៍លោក។ អ្នកនាង ថាថ្ងៃដែលមានរឿងនោះគឺ ជា សុជាតិ បានទទួលដំណឹង មួយដែលប៉ះពាល់ដល់ផ្លូវចិត្តហើយនាងមិនបាននៅជិតប្តី របស់ខ្លួនទើប ជា សុជាតិ មិនអាចឃាត់ខ្លួនឯងបានពីការដែលគេហៅលោកទៅហើយទាំង ដឹងពីមូលហេតុដែល សុជាតិ ផ្តាច់ស្រា ប៉ុន្តែនៅតែហៅទៅ។

អ្នកនាង លក្ម្សី ថាអាចថានាងចិត្តចង្អៀតរឹតបន្តឹងប្តី ចុះបើមានរឿងអាក្រក់កើតឡើងលើប្តី នាងអ្នកណាទទួលខុសត្រូវ? កាលពីមុននាងគ្មានកូន នាងមិនហាមឃាត់នោះទេឱ្យផឹកស៊ី ធម្មតាតែត្រូវមានលក្ខខណ្ឌឱ្យនាងទៅជាមួយដើម្បីទប់ស្កាត់រឿងអាក្រក់ប៉ុន្តែពេលនេះនាងមានកូន។ ភរិយា ជា សុជាតិ ថាជេរស្តីថាឱ្យនាងចុះព្រោះអ្វីដែលនាងធ្វើគឺដើម្បីតែប្តីរបស់ នាងល្អតែប៉ុណ្ណោះ៕