តារាចម្រៀងរ៉េបវ័យក្មេង អូជី ហ្គូលឌិន បានបង្កឱ្យអ្នកលេងបណ្តាញសង្គមបញ្ចេញមតិ វែកញែកជាថ្មីបន្ទាប់ពីម្ចាស់ពានរូបនេះបង្ហោះវីដេអូមួយជាមួយនឹងសម្តីកាប់ចាក់គ្នាដោយសារតែមនុស្សស្រី។ ជារឿយៗសកម្មភាព អូជី តែងតែរងនូវមតិប្រតិកម្មចម្រុះពី សាធារណជន។
កាលពីពេលថ្មីៗនេះ អូជី ហ្គូលឌិន បានបង្ហោះវីដេអូរាំមួយនៅលើបណ្តាញសង្គមទិកតុក ដោយបានដាក់អក្សរនៅលើវីដេអូថា «ស្រលាញ់ក៏ស្រលាញ់ទៅ កុំស្រលាញ់សង្សារអញ ប្រយ័ត្ន៣៦ (រូបEmoji ពូថៅ) ចូលដល់ផ្ទះ។ ចំណែកឯចំណងជើងការបង្ហោះវីដេអូនេះ អូជី បានដាក់ថា «ស្រួលបួលលូវកាចហា»។
ពាក្យសម្តីរបស់តារារ៉េបវ័យក្មេងជាម្ចាស់ពាន RAPPER FIGHTER បានធ្វើឱ្យអ្នកលេង បណ្តាញសង្គមជាច្រើនរិះគន់ អូជី ចំពោះសកម្មភាពនិងពាក្យសម្តីរបស់តារារ៉េបរូបនេះ។ គណនីទិកតុកជាច្រើនបានលើកឡើងថា «មិនសមម្ចាស់ពាន, OG យើងឡើងខ្ពស់ ហើយបើចង់ឱ្យគេចូលចិត្តច្រើនគួរប្រយ័ត្នពាក្យសម្ដី, ចង់បានបាន OG ពីមុនវិញ, គាំទ្រយូរៗទៅដូចមិចៗទេ និងមានមតិយោបល់ផ្សេងៗទៀតទាំងការខម្មិនលេងសើច និងការរិះគន់»។
បន្ទាប់ពីវីដេអូរាំរបស់ខ្លួនអមដោយពាក្យសម្តីកាប់ចាក់នេះ អូជី បានខម្មិនបញ្ជាក់នៅក្នុង វីដេអូរបស់ខ្លួនថា «សកម្មភាពនេះគ្រាន់តែជាការលេងសើចប៉ុណ្ណោះ»។
គួរឱ្យដឹងថា ក្នុងនាមជាម្ចាស់ពានក្នុងរយៈពេលប៉ុន្មានខែមកនេះ អូជី ហ្គូលឌិន តែងតែ រងនូវរឿងអាស្រូវចម្រូងចម្រាសជាបន្តបន្ទាប់៕
