ប្រទេសថៃ ៖ កាលពីថ្ងៃទី៥ ខែមិថុនា ឆ្នាំ២០២៥ សារព័ត៌មានថៃរាយការណ៍ថា សាលារៀនព្រំដែនកម្ពុជា-ថៃ ស្ថិតនៅស្រុកបានក្រួត ខេត្តបុរីរាំ បានបង្ហាត់កូនសិស្សពីវិធីជម្លៀសខ្លួនដើម្បីត្រៀមទប់ទល់ពេលកើតហេតុអាសន្ន ដោយសារសាលារៀនស្ថិតក្នុងតំបន់ធ្លាប់មានការប៉ះទង្គិចរវាងកងទ័ពកម្ពុជា និងថៃ កាលពីឆ្នាំ២០១១ ខណៈអាណាព្យាបាលសិស្ស និងអ្នកភូមិបារម្ភពីសុវត្ថិភាពកូនៗ ។

សាលារៀននៅព្រំដែនកម្ពុជា-ថៃបានបង្ហាត់សិស្សពីការជម្លៀសខ្លួន ក្រោយពីមានបញ្ហាព្រំដែនរវាងប្រទេសកម្ពុជា និងថៃ នៅចំណុចព្រំដែន៣ប្រទេស គឺកម្ពុជា ថៃ និងឡាវ ដែលជាប់នឹងស្រុកណាមយឺន ខេត្តឧប៊ុនរ៉ាជថានី របស់ថៃ ។ សាលារៀននានានៅស្រុកបានក្រួត បានបង្រៀនសិស្សតាមធម្មតា ប៉ុន្តែជួសជុលលេណដ្ឋានឡើងវិញ និងបង្ហាត់សិស្សពីការលាក់ខ្លួន និងជម្លៀសខ្លួន រួមកំណត់ទីតាំងសម្រាប់រត់ផងដែរ ដោយសារបារម្ភខ្លាចមានហេតុការណ៍ពុំប្រក្រតីកើតឡើង ។

ការប៉ះទង្គិចគ្នារវាងកងទ័ពទាំងពីរប្រទេសធ្វើឱ្យពលរដ្ឋនៅស្រុកបានក្រួត ខេត្តបុរីរាំ ដែលមានព្រំដែនជាប់កម្ពុជា និងមានច្រកព្រំដែនបណ្តោះអាសន្នសាយតាគូ (ខាងកម្ពុជា គឺច្រកជប់គគីរ) ស្ថិតនៅឃុំចាន់ថប់ពេជ្រ ស្រុកបានក្រួត ព្រួយបារម្ភ ដោយសារកងទ័ពកម្ពុជា និងថៃធ្លាប់ប៉ះទង្គិចកាលពីឆ្នាំ២០១១ ។ ការប៉ះទង្គិចកន្លងមកធ្វើឱ្យពលរដ្ឋនៅស្រុកបានក្រួត ជួបការលំបាក ទើបពលរដ្ឋបារម្ភពីការប៉ះទង្គិចលើកនេះ ។

អ្នកស្រី អរ៉ាផារីន កាម៉ុនឈីត នាយកសាលារៀនបានឃោគក្រៈឆាយ ស្ថិតនៅឃុំឃោគក្រៈឆាយ ស្រុកបានក្រួត និយាយថា ពេលនេះ សាលារៀនមានវិធានការយ៉ាងតឹងរ៉ឹង និងប្រុងប្រយ័ត្នតាមការប្រកាសរបស់ក្រសួងអប់រំ និងការិយាល័យអប់រំបឋមសិក្សាបុរីរាំ ដូចជា ៖ កំណត់វិធានការប្រឈមនឹងស្ថានការណ៍អាសន្ន និងវិធានការសុវត្ថិភាព ។ អាណាព្យាបាលសិស្សបានសួរសាលាពីស្ថានការណ៍ព្រំដែន ហើយយើងបានទាក់ទងជាមួយអ្នកដឹកនាំសហគមន៍ និងអាណាព្យាបាលរួចហើយដើម្បីត្រៀមខ្លួន ។

រីឯអាណាព្យាបាលសិស្ស អ្នកស្រី នូទែន សិទ្ធីវង្ស អាយុ៤៥ឆ្នាំ និយាយថា អ្នកស្រីបារម្ភខ្លាចមានការប៉ះទង្គិចកើតឡើង ពីព្រោះវាជាពេលកូនសិស្សបើកបវសនកាល ។ អាជ្ញាធរបានកំណត់ផែនការច្បាស់លាស់ថា តើអ្នកភូមិនឹងរត់ជម្លៀសខ្លួនទៅផ្លូវណា និងគោលដៅនៅកន្លែងណា ដើម្បីកុំឱ្យពលរដ្ឋរត់ទៅប្រមូលផ្តុំគ្នាច្រើនពេកដូចកាលពីឆ្នាំ២០១១ ។ បើមានស្ថានការណ៍អ្វីកើតឡើង ពលរដ្ឋនឹងទាក់ទងគ្នាតាមបណ្តាញសង្គម ៕

ប្រទេសថៃ ៖ លោក Phumtham Wechayachai ឧបនាយករដ្ឋមន្ត្រី និងរដ្ឋមន្ត្រីក្រសួងការពារជាតិថៃឱ្យដឹងថា ប្រទេសថៃនឹងបិទច្រកព្រំដែនជាប់កម្ពុជា បើការចរចាគណៈកម្មការព្រំដែនរួម (JBC) ជាមួយកម្ពុជាពុំទទួលបានលទ្ធផល ហើយលោកបញ្ជាក់ថា បើថៃប្រកាសច្បាប់អាជ្ញាសឹកនោះ មេបញ្ជាការកងទ័ពភូមិភាគទី២ នឹងមានសិទ្ធិបញ្ជាភ្លាម ។ នេះបើតាមការចុះផ្សាយរបស់សារព័ត៌មានថៃ Amarin News នៅថ្ងៃទី៥ ខែមិថុនា ឆ្នាំ២០២៥ ។

លោក Phumtham Wechayachai ឧបនាយករដ្ឋមន្ត្រី និងរដ្ឋមន្ត្រីក្រសួងការពារជាតិបាននិយាយពីការចុះត្រួតពិនិត្យបរិវេណព្រំដែនកម្ពុជា-ថៃ នៅខេត្តឧប៊ុនរ៉ាជថានី កាលពីថ្ងៃទី៤ ខែមិថុនា ថា លោកទទួលបានសេចក្តីរាយការណ៍ពីកងទ័ពភូមិភាគទី២ គឺទិន្នន័យបច្ចុប្បន្នខុសគ្នាពីទិន្នន័យចាស់ ។ លោកបាននិយាយពីមេបញ្ជាការកងទ័ពភូមិភាគទី២ មានបំណងបិទច្រកព្រំដែនជាប់កម្ពុជា បើការចរចាគណៈកម្មការព្រំដែនរួម (JBC) ពុំទទួលបានលទ្ធផល ថៃនឹងអនុវត្តវិធានការបិទច្រកព្រំដែន ។

ក្រៅពីនេះ លោកបានសំណូមពរកុំធ្វើឱ្យប៉ះពាល់ប្រទេសជាតិ និងសូមឱ្យពលរដ្ឋប្រុងប្រយ័ត្នព័ត៌មានក្លែងក្លាយ ពីព្រោះវាបង្កបញ្ហាដល់រដ្ឋាភិបាល ។ រីឯកងទ័ពថៃចោទប្រកាន់ថា កងទ័ពកម្ពុជាចូលក្នុងតំបន់២០០ម៉ែត្រ លោកនិយាយថា ស្ថិតក្នុងដំណាក់កាលប្រើប្រាស់យន្តការចរចាគណៈកម្មការព្រំដែនរួម (JBC) ។ លោកជឿថា ការចរចា JBC នឹងអាចដោះស្រាយបញ្ហាបាន ប៉ុន្តែបើកម្ពុជាពុំទទួលស្គាល់ វានឹងមានបញ្ហា ពីព្រោះកងទ័ពកម្ពុជាចូលក្នុងតំបន់ No Man Land ដែលថៃចាត់ទុកថា គឺល្មើសកិច្ចព្រមព្រៀង ប៉ុន្តែពុំមែនជាការល្មើសចូលទឹកដីថៃទេ ពីព្រោះវាជាបញ្ហាព្រំដែនជជែកគ្នាពុំទាន់ចប់ ។

ការផ្សព្វផ្សាយព័ត៌មានផ្សេងៗ គឺមានបំណងធ្វើឱ្យបែកបាក់ផ្ទៃក្នុងប្រទេសថៃ ឬការយកឈ្នះផ្នែកនយោបាយ ។ ប៉ុន្តែរឿងប្រទេសជាតិ ពុំគួរផ្សព្វផ្សាយរឿងតូចតាចបែបនេះទេ វាជាប្រយោជន៍នយោបាយ ។ លោកបានបញ្ជាឱ្យកងទ័ពត្រៀមខ្លួន ករណីមានស្ថានការណ៍អ្វីកើតឡើង ប៉ុន្តែបើមានការល្មើសកិច្ចព្រមព្រៀង គឺត្រូវចរចាក្នុងគណៈកម្មការព្រំដែនរួម (JBC) នៅថ្ងៃទី១៤ ខែមិថុនា នៅរាជធានីភ្នំពេញ ។ ថៃបានត្រៀមខ្លួនជាច្រើនយ៉ាង ប៉ុន្តែលោកពុំនិយាយ ពីព្រោះពុំចង់ឱ្យគេដឹងថា ថៃត្រៀមអ្វីខ្លះ ។

បច្ចុប្បន្ន កម្ពុជាប្រាប់ថា សម្រេចបញ្ជូនបញ្ហាមុំ៣, បញ្ហាប្រាសាទតាមាន់ធំ, ប្រាសាទតាមាន់តូច និងតាក្របី ទៅតុលាការយុត្តិធម៌អន្តរជាតិ (ICJ) គឺកម្ពុជានិយាយតែម្ខាង វាគ្មានប្រយោជន៍អ្វីទេ ប៉ុន្តែបើថៃនិយាយថា យល់ព្រម ឬមិនយល់ព្រម វានឹងក្លាយជាបញ្ហា ។ បើកម្ពុជាយកបញ្ហាទៅដោះស្រាយនៅតុលាការ ICJ គឺត្រូវមានការទទួលយកពីថៃ យើងនឹងបញ្ចប់បញ្ហាក្នុងកិច្ចប្រជុំគណៈកម្មការព្រំដែនរួម (JBC) ពេលនេះ យើងបានត្រៀមខ្លួនតាមបណ្តោយព្រំដែនដោយផ្តោតលើតំបន់មានបញ្ហា ។ នេះបើតាមការលើកឡើងរបស់លោក Phumtham ៕

ប្រទេសថៃ ៖ កាលពីថ្ងៃទី៤ ខែមិថុនា កន្លងមក លោក ឆៃវ៉ាត់ ជុនធិរ៉ាផុតង អគ្គនាយកនៃនាយកដ្ឋានគ្រប់គ្រងក្រសួងមហាផ្ទៃបានផ្ញើលិខិតបន្ទាន់បំផុតទៅអភិបាលខេត្តចំនួន៧ នៅព្រំដែនកម្ពុជា-ថៃ ដូចជា ៖ ខេត្តត្រាត ចាន់បុរី ស្រះកែវ ឧប៊ុន ស៊ីសាកេត សុរិន្ទ និងបុរីរាំ ឱ្យការពារសុវត្ថិភាពពលរដ្ឋក្នុងខេត្ត និងត្រៀមជម្លៀសពលរដ្ឋចេញ ករណីមានស្ថានការណ៍ពុំប្រក្រតីកើតឡើង ។

ខ្លឹមសារក្នុងលិខិតបញ្ជាក់ថា ក្រោយការប៉ះទង្គិចរវាងកងទ័ពកម្ពុជា និងកងទ័ពថៃ នៅបរិវេណព្រំដែនស្រុកណាមយឺន ខេត្តឧប៊ុនរ៉ាជធានី កាលពីថ្ងៃទី២៨ ខែឧសភា ឆ្នាំ២០២៥ ដែលធ្វើឱ្យច្រកព្រំដែនកម្ពុជា-ថៃ និងតំបន់ផ្សេងៗត្រូវបង្កើនវិធានការបង្ការ និងប្រុងប្រយ័ត្នបន្ថែម គឺនាយកដ្ឋានគ្រប់គ្រងដែលមានភារកិច្ចរក្សាសន្តិភាព សណ្តាប់ធ្នាប់ សន្តិសុខ និងការពារទឹកដីថៃ មានគោលការណ៍ណែនាំសម្រាប់យពលរដ្ឋអនុវត្តតាមពេលមានស្ថានការណ៍ពុំប្រក្រតីកើតឡើងដូចខាងក្រោម ៖

១-អភិបាលខេត្តត្រូវបញ្ជាទៅអភិបាលស្រុក មេឃុំ មេភូមិ ជំនួយការភូមិ និងសន្តិសុខភូមិឱ្យបំពេញភារកិច្ចផ្តល់សន្តិសុខផ្ទៃក្នុង ដោយផ្តោតសំខាន់បំផុតលើការការពារសុវត្ថិភាពពលរដ្ឋ និងវាយតម្លៃស្ថានការណ៍ចំនួនពលរដ្ឋរស់នៅតំបន់ប្រឈម ។ បន្ទាប់មក រាយការណ៍ពីផែនការជម្លៀសពលរដ្ឋ កំណត់តំបន់ប្រមូលផ្តុំ និងជម្រកស្នាក់នៅក្នុងតំបន់សុវត្ថិភាព ព្រមទាំងថែទាំពលរដ្ឋក្នុងជម្រកស្នាក់នៅតាមគ្រប់ជំហ៊ានយ៉ាងមានសុវត្ថិភាព ។

ក្រៅពីនេះ ត្រូវត្រៀមខ្លួនកែលម្អផែនការ កំណត់នីតិវិធីការងាររបស់អាជ្ញាធរ ត្រៀមកងកម្លាំងផ្តល់សុវត្ថិភាពដល់ជីវិតមនុស្ស ទ្រព្យសម្បត្តិពលរដ្ឋ និងគាំទ្រកងទ័ពក្នុងការរក្សាសន្តិសុខក្នុងតំបន់ ។

២-អភិបាលខេត្តក្នុងនាមជាមេបញ្ជាការកងទ័ពស្ម័គ្រចិត្តការពារទឹកដី ត្រូវបញ្ជាទៅមន្ត្រី និងសមាជិកអ្នកស្ម័គ្រចិត្តការពារទឹកដីឱ្យត្រៀមខ្លួនបំពេញភារកិច្ចក្នុងស្ថានការណ៍បន្ទាន់ ពិនិត្យមើលតំបន់មានបញ្ហា គាំទ្រការត្រួតពិនិត្យ និងរៀបចំតំបន់ព្រំដែន ។ ករណីកើតស្ថានការណ៍ខុសប្រក្រតី ត្រូវអនុវត្តតាមគោលការណ៍ណែនាំក្នុងផែនការសន្តិសុខព្រំដែន ការពារតំបន់ខាងក្រោយ និងមានផែនការបញ្ជាឱ្យសមាជិកកងការពារស្ម័គ្រចិត្តបំពេញភារកិច្ចប្រចាំឆ្នាំ នៅឆ្នាំ២០២៥ ។

៣-ប្រកាសជូនដំណឹងឱ្យពលរដ្ឋបានជ្រាបពីស្ថានការណ៍ និងជូនដំណឹងពីព័ត៌មានរបស់រដ្ឋាភិបាលឱ្យពលរដ្ឋជ្រាបជាបន្តបន្ទាប់ ដើម្បីកុំឱ្យពលរដ្ឋភ័យស្លន់ស្លោ និងអាចអនុវត្តតាមពេលកើតស្ថានការណ៍បន្ទាន់ ។

៤-ករណីកើតហេតុការណ៍ចលាចលដែលប៉ះពាល់ដល់សុវត្ថិភាពពលរដ្ឋរស់នៅក្នុងខេត្ត ត្រូវរាយការណ៍ស្ថានការណ៍មកកាន់នាយកដ្ឋានគ្រប់គ្រងយ៉ាងឆាប់រហ័សបំផុត រហូតដល់ស្ថានការណ៍ល្អប្រសើរឡើងវិញ ។

កាលពីថ្ងៃទី៤ ខែមិថុនា រដ្ឋាភិបាលថៃបានចេញសេចក្តីថ្លែងការណ៍ពីស្ថានការណ៍ព្រំដែនកម្ពុជា-ថៃ គឺរដ្ឋាភិបាលសង្កត់ធ្ងន់លើការការពារអធិបតេយ្យភាព និងបូរណភាពទឹកដីថៃ ដោយប្រកាន់យកការដោះស្រាយបញ្ហាដោយសន្តិវិធី ស្របតាមច្បាប់អន្តរជាតិ និងគោលការណ៍មនុស្សធម៌ ។

ថៃក្នុងឋានៈជាប្រទេសជិតខាងកម្ពុជា នឹងដោះស្រាយបញ្ហាផ្អែកលើច្បាប់អន្តរជាតិ សន្ធិសញ្ញា និងកិច្ចព្រមព្រៀងផ្សេងៗ ដូចជា ៖ MOU ឆ្នាំ២០០០, ឯកសារភស្តុតាង និងរូបភាពតាមផ្កាយរណប ។ ថៃនឹងចរចាទ្វេភាគីជាមួយកម្ពុជា រួមទាំងផ្តោតសំខាន់លើការទំនាក់ទំនងជាមួយពលរដ្ឋដើម្បីការពារកុំឱ្យយល់ខុសរវាងពលរដ្ឋទាំង២ប្រទេស ៕

ប្រទេសថៃ ៖ លោក Phumtham Wechayachai ឧបនាយករដ្ឋមន្ត្រី និងរដ្ឋមន្ត្រីក្រសួងការពារជាតិថៃបានចុះសួរសុខទុក្ខកងទ័ពនៅព្រំដែន និងបញ្ជាក់ថា ព័ត៌មានកងទ័ពខ្មែរដាក់គ្រាប់បែ.កនៅព្រំដែន គឺមិនមែនជាការពិតទេ វាជាគ្រាប់បែ.កចាស់ ។ រដ្ឋាភិបាលថៃនឹងចរចាជាមួយកម្ពុជាដើម្បីការពារកុំឱ្យបញ្ហាកាន់តែធ្ងន់ធ្ងរ ចំណែកកងទ័ព និងនយោបាយគ្មានបញ្ហាទេ ដោយយើងត្រៀមខ្លួនការពារមិនឱ្យអ្នកណារំលោ.ភលើអធិបតេយ្យដាច់ខាត ។ នេះបើតាមការចុះផ្សាយរបស់សារព័ត៌មាន Thairath កាលពីថ្ងៃទី៤ ខែមិថុនា ឆ្នាំ២០២៥ ។

លោក Phumtham ឧបនាយករដ្ឋមន្ត្រី និងរដ្ឋមន្ត្រីក្រសួងការពារជាតិថៃបានចុះសួរសុខទុក្ខកងទ័ពនៅស្រុកណាមយឺន ខេត្តឧប៊ុនរ៉ាជថានី ដើម្បីតាមដានស្ថានការណ៍ព្រំដែន និងស្តាប់សេចក្តីរាយការណ៍ពីកងទ័ពពាក់ព័ន្ធនឹងស្ថានការណ៍ព្រំដែនក្រោយការប៉ះទង្គិចរវាងកងទ័ពកម្ពុជា និងថៃ ។ លោកបានផ្តល់សម្ភាសន៍មកកាន់អ្នកសារព័ត៌មានថា លោកទទួលបានសេចក្តីរាយការណ៍រហូត ប៉ុន្តែការចុះតំបន់នេះដើម្បីផ្តល់កម្លាំងចិត្តដល់កងទ័ពជួរមុខ ។ លោកបានពិនិត្យមើលនៅតំបន់ជាក់ស្តែងឃើញថា កងទ័ពខ្មែរពុំបានដាក់គ្រាប់បែកនៅព្រំដែនទេ វាជាគ្រាប់បែកចាស់ ។

បច្ចុប្បន្ន យើងកំពុងស្វែងរកដំណោះស្រាយដែលពិភពលោកចង់ឃើញ ហើយយើងពុំទាន់បាត់បង់អធិបតេយ្យភាពត្រង់ណាទេ ។ អ្វីដែលកើតឡើងក្នុងតំបន់នីមួយៗ យើងចង់ឱ្យស្ថានការណ៍ធូរស្រាល យើងចង់ជជែកនៅតំបន់មានបញ្ហា ។ បច្ចុប្បន្ន យើងចាត់វិធានការការទូត ដោយចាប់ផ្តើមពីតូចទៅធំ និងវិធានការផ្សេងៗ ហើយគិតពីអាយុជីវិតពលរដ្ឋតាមព្រំដែន ។ ចំណុចសំខាន់ កងទ័ពព្រំដែនត្រូវប្រុងប្រយ័ត្ន ពីព្រោះបើប្រើអារម្មណ៍ វាអាចធ្វើឱ្យបញ្ហារាលដាល ។ ដូច្នេះ សូមកងទ័ពអត់ធ្មត់ឱ្យខ្លាំងបំផុត យើងនឹងដោះស្រាយយ៉ាងសន្តិវិធីតាមតែអាចធ្វើបាន ។

លោកបានផ្តាំផ្ញើទៅពលរដ្ឋថា ពេលប្រទេសឈានទៅមានជម្លោះអន្តរជាតិ ចំណុចសំខាន់ ពលរដ្ឋត្រូវប្រើប្រាស់ស្មារតី និងមើលព័ត៌មានផ្សេងៗ ពីព្រោះមានអ្នកចង់ឱ្យកើតជម្លោះ ។ រីឯកងទ័ព និងនយោបាយគ្មានបញ្ហាទេ យើងស្រឡាញ់ជាតិ និងមិនឱ្យអ្នកណាមករំលោភអធិបតេយ្យដាច់ខាត ។ ប្រទេសត្រូវតែរួបរួមគ្នាជាធ្លុងមួយ បើមិនដូច្នោះទេ យើងនឹងទន់ខ្សោយ ។

គួរបញ្ជាក់ថា កាលពីថ្ងៃទី៤ ខែមិថុនា កន្លងមក ហ្វេសប៊ុកផេកថៃឈ្មោះ «UBON NOW อุบลนาว» បានចោទប្រកាន់មកលើកងទ័ពខ្មែរថា ដាក់គ្រាប់បែកនៅបរិវេណព្រំដែន ហើយធ្វើឱ្យមានគ្រោះថ្នាក់ដល់ពលរដ្ឋថៃ បើឈរលើគ្រាប់បែកដោយពុំដឹងខ្លួន ។ ហ្វេសប៊ុកនេះបានដាស់តឿនពលរដ្ឋថៃ ជាពិសេស អ្នកចូលចិត្តដើរចូលព្រៃរកផ្សិត ឬរកអាហារក្នុងព្រៃជិតព្រំដែន សូមប្រុងប្រយ័ត្ន ៕

ភាពរកាំរកូសរវាងលោក ណាវ៉ាត់ ស្ថាបនិក MGI និង បវរកញ្ញាឥណ្ឌា Rachel Gupta នៅតែបន្តទាក់ទាញអ្នកស្នេហាវិស័យនេះឱ្យតាមដានខណៈ Rachel ទើបតែធ្វើសន្និសិទ សារព័ត៌មានមួយ ដើម្បីលាតត្រដាងជាសាធារណៈនូវការយាយីដែលរៀបចំឡើង របស់លោក ណាវ៉ាត់ ហើយ MGI ក៏បានធ្វើសន្និសីទសារព័ត៌មានដើម្បីផ្តល់ពានរង្វាន់ថ្មី ដល់ម្ចាស់ជ័យលាភីលេខ១ផងដែរ។

នៅរសៀលថ្ងៃទី៣ ខែមិថុនា អង្គការ Miss Grand International បានរៀបចំពិធី ប្រគល់មកុដជាផ្លូវការសម្រាប់សម្រស់ Christine Juliane Opiaza ហៅ CJ មកពីប្រទេសហ្វីលីពីនត្រូវបានតែងតាំងជំនួស Rachel Gupta ដែលបានលះបង់មកុដរបស់នាងប៉ុន្មានថ្ងៃមុននេះ។ ពិធីឡើងគ្រងមកុដ Miss Grand International 2024 ថ្មីរបស់ CJ Opiaza ត្រូវបានប្រារព្ធឡើងយ៉ាងអធិកអធម។ នៅលើឆាក CJ ទប់ទឹកភ្នែកមិនបានហើយពិធីនេះក៏មានការច្រៀងបទភ្លេងជាតិហ្វីលីពីន បង្ហាញពីមោទនភាពជាតិផងដែរ។

កន្លងមកនៅអាកាសយានដ្ឋានថៃ CJ ក៏បានបង្ហាញអារម្មណ៍រំភើបរីករាយផងដែរពេលបានជួបលោកស្រី Teresa ។ ជាការកត់សម្គាល់បវរកញ្ញារូបនេះ បានឆ្លើយតបទៅ កាន់អ្នកសារព័ត៌មានថា នាងសុខចិត្តលក់ផលិតផលផ្ទាល់ ដើម្បីរកប្រាក់ចូលអង្គការ MGI។ សេចក្តីថ្លែងការណ៍នេះបានបង្កឱ្យមានភាពចម្រូងចម្រាសភ្លាមៗ ហើយត្រូវបានបញ្ចេញមតិដោយផ្នែកនៃទស្សនិកជនថា «គួរឱ្យភ្ញាក់ផ្អើល» ដោយដាក់កត្តាអាជីវកម្មជាមុនសិន។

ដំណើរឆ្ពោះទៅកាន់តំណែង Miss Grand International នាពេលខាងមុខរបស់ CJ កំពុងទទួលបានការចាប់អារម្មណ៍យ៉ាងខ្លាំងពីសហគមន៍អ្នកគាំទ្រសម្រស់។ គ្រប់គ្នារង់ចាំមើលថា តើនាងអាចនៅ Miss Grand International បានយូរប៉ុណ្ណា ហើយនាងនឹងធ្វើអ្វីនៅពេលខាងមុខ ដើម្បីជំនួសសម្រស់ឥណ្ឌា ជាពិសេសក្នុងបរិបទ MGI ប្រឈមនឹងរឿងអាស្រូវជាច្រើន។

បន្ទាប់ពីត្រូវបានតែងតាំង CJ បានអាប់ដេតភ្លាមៗនូវ Title Miss Grand International 2024 នៅលើបណ្តាញសង្គមរបស់នាង។ ដូច្នេះហើយ CJ បានបង្កើតប្រវត្តិសាស្ត្រដោយក្លាយជាសម្រស់ហ្វីលីពីនដំបូងគេដែលទទួលបានតំណែងជា Miss Grand International ។

កន្លងមកហ្វីលីពីនបានចូលរួមក្នុងកម្មវិធី Miss Grand International ច្រើនលើកមកហើយ ប៉ុន្តែបានត្រឹមតំណែងរងប៉ុណ្ណោះ។ អ្នកគាំទ្រសម្រស់ហ្វីលីពីនពិតជាសប្បាយចិត្តជាខ្លាំង នៅពេលដែលប្រទេសមួយនេះទទួលបានតំណែងជា Miss Grand ជាលើកដំបូងបើទោះបីជំនួសតំណែងម្ចាស់ជ័យលាភីមុនក៏ដោយ៕

អង់តាក់តិច គឺជាទ្វីបមួយមិនមានប្រទេសណាជាម្ចាស់កម្មសិទ្ធនោះទេ ដោយលាតសន្ធឹង១៤.២លានគីឡូម៉ែត្រការ៉េ។

នៅលើទ្វីបនេះការដាក់មូលដ្ឋានទ័ព ត្រូវបានហាមឃាត់ ដោយអនុញ្ញាតឱ្យមានតែការបង្កើតស្ថានីយ៍វិទ្យាសាស្រ្តតែប៉ុណ្ណោះ។

តែយ៉ាងណាមិញថ្មីៗនេះ អាមេរិកយល់ឃើញថាមានភាពមិនប្រក្រតី ដោយឃើញប្រទេសចិនហាក់បង្កើតស្ថានីយ៍វិទ្យាសាស្រ្តច្រើនទៅៗ។

អាមេរិក សង្ស័យថាចិនបានបង្កើតមូលដ្ឋានទ័ព និងតម្លើងក្បាលគ្រាប់មីសុីល ដើម្បីពង្រឹងជំហររបស់ខ្លួនសម្រាប់ការទាមទារផ្នែកមួយនៅលើទ្វីបអង់តាកទិក នាពេលអនាគត។
ជុំវិញបញ្ហានេះចិន បានប្រកាសច្រានចោល ដោយអះអាងថាស្ថានីយ៍ទាំងនោះ គឺសម្រាប់ការស្រាវជ្រាវវិទ្យាសាស្ត្រ ដើម្បីបម្រើដល់មនុស្សជាតិតែប៉ុណ្ណោះ។

គួរបញ្ជាក់ថា នៅក្នុង សន្ធិសញ្ញាអង់តាកទិកឆ្នាំ ១៩៥៩ បានចែងយ៉ាងច្បាស់ថា អង់តាកតិកជាទ្វីបសន្តិភាពដោយហាមឃាត់សកម្មភាពយោធា និងការធ្វើតេស្តអាវុធគ្រប់ប្រភេទ ជាពិសេសនុយក្លេអ៊ែរ៕