បន្ទាយមានជ័យ៖ នៅរសៀលថ្ងៃទី14 ខែសីហា ឆ្នាំ2025 គណៈប្រតិភូតំណាង 7 ប្រទេស ដឹកនាំដោយអនុព័ន្ធយោធាម៉ាឡេសុីប្រចាំនៅកម្ពុជា បានចុះត្រួតពិនិត្យដោយផ្ទាល់នៅចំណុចទីតាំងដែលទាហានថៃបានព័ទ្ធបន្លាលួស និងគរសំបកកង់ឡាន ស្ថិតក្នុងឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ លើទឹកដីកម្ពុជា។ 
បើតាមលោក អ៊ុ រាត្រី អភិបាលខេត្ដបន្ទាយមានជ័យ ដែលអមដំណើរចុះត្រួតពិនិត្យនោះបានឲ្យដឹងថា ក្រុមអ្នកសង្កេតការណ៍បណ្តោះអាសន្ន (IOT) ដឹកនាំដោយលោកវរសេនីយ៍ឯក Nazlee Bin Abdul Rahim អនុព័ន្ធយោធាម៉ាឡេស៊ីប្រចាំកម្ពុជា និងមានអនុព័ន្ធយោធាប្រទេសផ្សេងទៀត ដែលមាននិវេសនដ្ឋានក្នុង និងក្រៅប្រទេសកម្ពុជារួមមាន៖ ប្រទេសប្រ៊ុយណេ ឥណ្ឌូនេស៊ី ឡាវ មីយ៉ាន់ម៉ា ហ្វីលីពីន និងវៀតណាម សរុបចំនួន ៧ប្រទេស បានធ្វើការពិនិត្យសកម្មភាពថៃ ដែលរាយបន្លាលួស និងដាក់កង់ឡានបិទផ្លូវ និងព័ទ្ធផ្ទះប្រជាជនក្នុងទឹកដីកម្ពុជា។
បន្ថែមពីពិនិត្យនៅទីតាំងឃុំអូរបីជាន់ ស្រុកអូរជ្រៅ ក្រុមសង្កេតការណ៍ IOT ក៏បានចុះទៅពិនិត្យព្រំដែនត្រង់ចំណុចបឹងត្រកួន ដើម្បីសង្កេតមើលលក្ខខណ្ឌនានា បន្ទាប់ពីបទឈប់បាញ់នាពេលថ្មីៗនេះ។
គួររំលឹកឡើងវិញថា ចាប់តាំងពីថ្ងៃទី12 ខែសីហាមក យោធាថៃដែលពាក់ឯកសណ្ឋានប៉ារ៉ាមានប្រដាប់ដោយអាវុ.ធ និងបន្លាលួស បានចូលមកធ្វើសកម្មភាពដាក់ពង្រាយវាទីក្នុងដែនអធិបតេយ្យកម្ពុជា ស្ថិតនៅភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ក្រោយបទឈប់បាញ់ និងសេចក្តីថ្លែងការណ៍រួម នៃកិច្ចប្រជុំវិសាមញ្ញនៃគណៈកម្មាធិការព្រំដែនទូទៅ កម្ពុជា-ថៃ បានចូលជាធរមាន។
សកម្មភាពនេះ ហាក់ផ្ទុយនឹងកិច្ចព្រមព្រៀងដែលបានឯកភាពគ្នាចំនួន 13 ចំណុច ជាពិសេសទៅលើចំណុចដែលហាមប្រាមភាគីទាំងពីរមិនឲ្យធ្វើចលនាយោធា និងហាមត្រូវឈរជើងតែនៅទីតាំងរបស់ខ្លួនក្នុងពេលបច្ចុប្បន្ន។ 
ទោះជាយ៉ាងណា កងទ័ពកម្ពុជានៅតែមានភាពអត់ធ្មត់ជាអតិបរមា មិនពង្រីកបញ្ហាឲ្យឈានដល់ការល្មើសបទឈប់បា.ញ់ជាដាច់ខាត។ ជាមួយគ្នានេះ ក្រសួងការពារជាតិ នៅតែប្តេជ្ញាចិត្តជានិច្ច ក្នុងការអនុវត្តកិច្ចព្រមព្រៀងបទឈប់បាញ់ឲ្យបានម៉ឺងម៉ាត់បំផុត ចំពោះគោលការណ៍ច្បាប់អន្តរជាតិ ការដោះស្រាយវិវាទដោយសន្តិវិធី និងរក្សាឱ្យបាននូវអធិបតេយ្យបូរណភាពទឹកដីរបស់ខ្លួន ទោះក្នុងតម្លៃណាក៏ដោយ៕
