ប្រទេសថៃ ៖ កងទ័ពថៃកាលពីថ្ងៃអង្គារនេះ បាននិយាយថា ព្រំដែនកម្ពុជា-ថៃត្រង់តំបន់«ចុងបូក» ខេត្តអ៊ូប៊ុនរ៉ាត់ថានី ប្រទេសថៃ ត្រូវបានឈ្លានពានចូលដោយភាគីកម្ពុជាចំនួន 651ដង ដោយមានទាំងការឡើងទៅច្រៀងភ្លេងជាតិនៅប្រាសាទតាមាន់ធំជាចំណុចចាប់ផ្តើម និងនាំទៅដល់ការដុតព្រះពន្លាត្រមូក ការជីកលេណដ្ឋាន និងការប៉ះទង្គិចគ្នា មុនពេលដែលកងទ័ពទាំងពីរបានចរចារត្រឡប់ទៅទីតាំងដើមវិញនៅថ្ងៃទី 1 មិថុនា។ នេះបើតាមការចុះផ្សាយរបស់សារព័ត៌មានថៃ Khaosod ។

ប្រភពដដែលបានបន្តទៀតថា ចាប់ពីដើមឆ្នាំ ២០២៥ មក ភាពតានតឹងកើនឡើងនៅតំបន់ព្រំដែនរវាងថៃ–កម្ពុជា ជាពិសេសនៅចំណុច ចុងបូក។ ថៃបានរាយការណ៍ថា ភាគីកម្ពុជាបានរំលោ.ភអនុស្សរណៈការយោគយល់ឆ្នាំ 2000 (MOU 43) រហូតដល់ ៦៥១ ដង។ ករណីរំលោ.ភចូលអធិបតេយ្យភាពថៃនេះ បានចាប់ផ្តើមនៅថ្ងៃទី 13 កុម្ភៈ 2025 នៅពេលដែលពលរដ្ឋ និងទាហានកម្ពុជា នាំគ្នាឡើងទៅប្រាសាទ តាមាន់ធំ (ដែលស្ថិតក្នុងដែនដីថៃ) ហើយបានច្រៀងបទជាតិរបស់កម្ពុជា។ រដ្ឋាភិបាលថៃបានបង្ហាញការតវ៉ាយ៉ាងផ្លូវការទៅនឹងសកម្មភាពនេះ។

បន្ទាប់មក ស្ថានភាពកាន់តែតានតឹងនៅចុងខែកុម្ភៈ បន្ទាប់ពីកម្ពុជាបានដាក់ពង្រាយកងទ័ពនៅតំបន់នោះ។ ដល់ថ្ងៃទី 1 មីនា «សាលាត្រីមុខ» ដែលជានិមិត្តសញ្ញានៃមិត្តភាពថៃ-ឡាវ-កម្ពុជា ត្រូវបានឆាបឆេះ និងក្រោយមកកងយោធាថៃបានទទួលព័ត៌មានថា ទាហានកម្ពុជាបានបញ្ចូលកម្លាំង និងជីកលេណដ្ឋាននៅក្នុងដែនដីថៃប្រហែល 150 ម៉ែត្រ។

មកដល់ថ្ងៃទី២៨ ខែឧសភា ការប៉ះទង្គិចមួយបានកើតឡើង បន្ទាប់ពីកងទ័ពកម្ពុជាបានបា.ញ់លើកងកម្លាំងល្បាតឈ្លបរបស់ថៃ។ មួយថ្ងៃក្រោយមក មេដឹកនាំយោធាកំពូលនៃប្រទេសទាំងពីរ ក៏បានជួបប្រជុំគ្នា និងបានយល់ព្រមលើវិធានការកាត់បន្ថយ រួមទាំងការកែសម្រួលទ័ព និងការប្រើប្រាស់គណៈកម្មាធិការព្រំដែនរួម (JBC) ដើម្បីដោះស្រាយបញ្ហា។ ទោះយ៉ាងណាក៏ដោយ ក្រោយមកកម្ពុជាបានបរាជ័យក្នុងការអនុវត្តតាមកិច្ចព្រមព្រៀងនេះ ដោយបដិសេធមិនព្រមដកថយ និងបន្តការទន្ទ្រានកាន់កាប់លើដែនអធិបតេយ្យភាពថៃដដែល។

ប្រទេសថៃបានបង្ហាញការតវ៉ាម្តងហើយម្តងទៀត នៅពេលដែលកម្ពុជាបានសាងសង់ផ្លូវថ្នល់ កែលម្អទីតាំងកាំភ្លើង និងជីកលេណដ្ឋានក្នុងតំបន់ដែលកំពុងមានវិវាទ។ នៅថ្ងៃទី៤ ខែមិថុនា នេះប្រទេសថៃបានបញ្ជាក់ជាថ្មី នូវអធិបតេយ្យភាពរបស់ខ្លួនលើប្រាសាទចំនួន ៤ និងបានរិះគន់ការប៉ុនប៉ងរបស់កម្ពុជាក្នុងការយកបញ្ហានេះទៅកាន់តុលាការយុត្តិធម៌អន្តរជាតិ។

ដើម្បីឆ្លើយតបទៅនឹងភាពតានតឹងដែលបន្តកើតមាន នៅថ្ងៃទី 7 ខែមិថុនា ប្រទេសថៃបានដាក់បទប្បញ្ញត្តិថ្មីលើការឆ្លងកាត់ព្រំដែន ដោយកាត់បន្ថយម៉ោង និងការរឹតបន្តឹងច្រកទ្វារអន្តរជាតិ ។ កងកម្លាំងភារកិច្ចយោធាត្រូវបានរដ្ឋាភិបាលផ្តល់សិទ្ធិក្នុងការត្រួតត្រាលើចំណុចចេញ-ចូលព្រំដែន ហើយយុទ្ធសាស្ត្របួនដំណាក់កាលត្រូវបានណែនាំ ចាប់ពីការរឹតបន្តឹងការចូលប្រទេស រហូតដល់ការបិទព្រំដែនពេញលេញប្រសិនបើស្ថានការណ៍កាន់តែអាក្រ.ក់។

នៅថ្ងៃទី 8 ខែមិថុនា ការពិភាក្សារកចំណុចកណ្ដាលមួយបានកើតឡើង គឺភាគីទាំងពីរបានយល់ព្រមកែសម្រួលកងទ័ពទៅកាន់ទីតាំងដើមឆ្នាំ 2024 រៀងៗខ្លួន ដើម្បីស្ដារស្ថានការណ៍ និងរក្សាទំនាក់ទំនងតាមរយៈគណៈកម្មាធិការព្រំដែនក្នុងតំបន់។ កិច្ចខិតខំប្រឹងប្រែងទាំងនេះមានគោលបំណងកាត់បន្ថយភាពតានតឹងមុនពេលកិច្ចប្រជុំ JBC ដែលគ្រោងធ្វើនៅថ្ងៃទី 14 ខែមិថុនា ឆ្នាំ 2025៕

ប្រទេសចិន ៖ កាលពីថ្ងៃទី៧ ខែមិថុនា ឆ្នាំ២០២៥ សារព័ត៌មានបរទេសរាយការណ៍ថា យុវតីចិនជាច្រើនបានចំណាយប្រាក់ប្រមាណជាង៥ដុល្លារ ដើម្បីជួលមនុស្សប្រុសឱបរយៈពេល៥នាទី ដែលសេវាកម្មនេះឈ្មោះ «Man Mums» ។ ការចំណាយប្រាក់របស់យុវតីចិន ដោយសារពួកនាងចង់កាត់បន្ថយភាពតានតឹងផ្លូវចិត្ត និងទទួលបានភាពកក់ក្តៅ ។

សេវាកម្មឱបទទួលបានការពេញនិយមយ៉ាងខ្លាំងក្នុងចំណោមយុវតីចិន គឺការជួលមនុស្សប្រុសឱបម្តងត្រូវចំណាយប្រាក់ប្រមាណ៥០យាន់ (ឬជាង៥ដុល្លារ) ដើម្បីជាការលួងលោមផ្លូវចិត្តរយៈពេល៥នាទី ។ កាលពីមុន Man Mums សំដៅលើមនុស្សប្រុសមានសាច់ដុំធំៗ ប៉ុន្តែបច្ចុប្បន្ន Man Mums សំដៅលើមនុស្សប្រុសមានរាងកាយរឹងមាំ ទន់ភ្លន់ និងកក់ក្តៅ ដែលអាចឱបមនុស្សស្រីឱ្យអស់កង្វល់ និងមានអារម្មណ៍រីករាយ ។

សេវាកម្មឱបបង់ប្រាក់នេះធ្វើឡើងតាមរយៈ App និងផ្ញើសារជជែកគ្នា បន្ទាប់មក ក៏ណាត់ជួបគ្នានៅទីសាធារណៈ ដូចជា ៖ ហាងលក់ទំនិញ និងស្ថានីយរថភ្លើងក្រោមដី ដើម្បីឱ្យយុវតីសប្បាយចិត្តក្នុងពេលពួកនាងមានអារម្មណ៍តានតឹង និងឯកោ ។

ថ្មីៗនេះ មាននិស្សិតស្រីម្នាក់បានប្រឈមនឹងភាពតានតឹងក្រោយពីធ្វើនិក្ខេបបទ ហើយនាងបានសរសេរក្នុងបណ្តាញសង្គមថា ៖ «ខ្ញុំចង់ជួល Man Mums ចិត្តល្អ និងរូបរាងសង្ហាមកឱបដើម្បីជួយបន្ធូរភាពតានតឹងក្នុងជីវិត ។ ខ្ញុំធ្លាប់ឱបពេលរៀនថ្នាក់មធ្យមសិក្សាមានអារម្មណ៍ថាមានសុវត្ថិភាពណាស់ គ្រាន់តែឱបត្រឹម៥នាទីនៅស្ថានីយរថភ្លើងក្រោមដី គឺគ្រប់គ្រាន់ហើយ» ។

ការបង្ហោះរបស់នាងបានល្បីល្បាញភ្លាមៗ និងមានអ្នកចូលបញ្ចេញយោបល់រហូតដល់ជាង១សែននាក់ ។ ពេលសរសេរពាក្យថា Man Mums ក្នុងបណ្តាញសង្គម យើងនឹងឃើញការបង្ហោះរបស់យុវតីចិនជាច្រើននៅទីក្រុងធំៗស្វែងរកមនុស្សមកឱប ដែលមនុស្សប្រុសត្រូវមានអត្តចរិតល្អ គ្មានចិត្តឆេវឆាវ រូបសង្ហា និងមុខមាត់ស្អាត ។ រីឯស្ត្រីដែលមានកម្ពស់ខ្ពស់ និងរាងកាយរឹងមាំ ក៏អាចធ្វើជា Man Mums បានដែរ ។

នារីម្នាក់ប្រាប់ថា ក្រោយពីនាងបានធ្វើការលើសម៉ោងចំនួន៣ម៉ោង នាងក៏ណាត់ជួប Man Mums ម្នាក់មកឱបរយៈពេល៣នាទី ហើយនាងក៏រៀបរាប់ពីភាពតានតឹងនៅកន្លែងធ្វើការ ។ នារីម្នាក់ទៀតថា គ្រាន់តែមានអ្នកណាម្នាក់ឱបយ៉ាងណែនដោយពុំចាំបាច់សួរនាំអ្វី វាជួយឱ្យខ្លួនមានអារម្មណ៍ថា ពុំបាននៅតែម្នាក់ឯង ។

ទោះជាមនុស្សខ្លះយល់ថា ការជួលមនុស្សមកឱបជារឿងចម្លែកនៅតាមទីក្រុងធំៗ ប៉ុន្តែសម្រាប់យុវតីចិនជាច្រើនមានអារម្មណ៍ថា មានសុវត្ថិភាពក្រោយបានឱបមនុស្សប្រុសណាម្នាក់ដើម្បីព្យាបាលផ្លូវចិត្តពេលឯកោ រងសម្ពាធ និងតានតឹង ៕

ប្រទេសចិន ៖ យោងតាមការចុះផ្សាយរបស់សារព័ត៌មានបរទេសកាលពីថ្ងៃទី១០ ខែមិថុនា ឆ្នាំ២០២៥ ឱ្យដឹងថា យុវជនចិនដែលស្វែងរកការងារធ្វើពុំទាន់បាន ឬគ្មានការងារធ្វើហ៊ានចំណាយប្រាក់ឱ្យក្រុមហ៊ុនផ្តល់សេវាកម្មទទួលបុគ្គលិកក្លែងក្លាយ ហើយពួកគេក៏ធ្វើដំណើរទៅធ្វើការដូចបុគ្គលិកពិតប្រាកដ ។ យុវជនចិនចំណាយប្រាក់ឱ្យក្រុមហ៊ុន ដោយសារចង់បន្លំ ឬចង់ឱ្យគេដឹងថា ខ្លួនរកការងារធ្វើបាន ឬជាបុគ្គលិកក្នុងក្រុមហ៊ុន ។

ក្រុមហ៊ុនផ្តល់សេវាកម្មដ៏ចម្លែកនេះមានជម្រើសជាច្រើនសម្រាប់អតិថិជន ដូចជា ៖ ផ្តល់បរិយាកាសការងារ, មានតុ-កៅអីធ្វើការ, បន្ទប់អាហារ, ផ្តល់អាហារថ្ងៃត្រង់ និងផ្តល់ Wifi អ៊ីនធើរណេត ដោយអតិថិជនគ្រាន់តែបង់ប្រាក់ចាប់ពី៣០យាន់ ទៅ៥០យាន់ (ឬពីជាង១ម៉ឺន ទៅជាង២ម៉ឺនរៀល) នឹងទទួលបានបរិយាកាសការងារក្នុងការិយាល័យដូចបុគ្គលិកក្រុមហ៊ុនពិតប្រាកដ ។

យុវជនចិនជាច្រើនបានបង់ប្រាក់ឱ្យក្រុមហ៊ុន គឺគ្រាន់តែចង់បានកន្លែងសម្រាកផ្ទាល់ខ្លួនប៉ុណ្ណោះ ខណៈអ្នកខ្លះទៀតចង់ឱ្យមិត្តភក្តិមើលឃើញថា ខ្លួនមានការងារធ្វើ ។ បន្ទាប់ពីបង់ប្រាក់រួច ក្រុមហ៊ុននឹងរៀបចំសេវាគ្រប់យ៉ាង មិនថាការងារក្លែងក្លាយ នាយកគ្រប់គ្រងក្លែងក្លាយ ហើយក្រុមហ៊ុនក៏អាចរៀបចំព្រឹត្តិការណ៍តវ៉ារបស់បុគ្គលិកផងដែរ ប៉ុន្តែជាការតវ៉ាក្លែងក្លាយ ។ បច្ចុប្បន្ន សេវាកម្មទទួលបុគ្គលិកក្លែងក្លាយមកធ្វើការកំពុងពេញនិយមយ៉ាងខ្លាំងនៅប្រទេសចិន ដោយសារយុវជនចិនកាន់តែច្រើនគ្មានការងារធ្វើ ។

កាសែតអេស្ប៉ាញ EI Pais បានផ្សព្វផ្សាយពីសេវាកម្មចម្លែកនេះនៅចិន និងបានទៅមើលក្រុមហ៊ុនមួយកន្លែងដែលផ្តល់សេវាកម្មទទួលបុគ្គលិកក្លែងក្លាយដើម្បីរកមូលហេតុថា ហេតុអ្វីយុវជនចិនសុខចិត្តបង់ប្រាក់ឱ្យក្រុមហ៊ុនបែបនេះ ។

បុគ្គលិកក្លែងក្លាយ ឬយុវជនដែលបង់ប្រាក់ឱ្យក្រុមហ៊ុនដើម្បីបន្លំជាបុគ្គលិកនិយាយថា ពួកគេមកទីនេះ គ្រាន់តែគិតថា វាគួរឱ្យចាប់អារម្មណ៍ ខណៈយុវជនខ្លះប្រាប់ថា បើបានទៅសម្រាកនៅកន្លែងណាមួយក្នុងតម្លៃថោក គឺល្អជាងការនៅផ្ទះទំនេរ ។ យុវជនខ្លះសង្ឃឹមថា បទពិសោធន៍នេះអាចជួយឱ្យខ្លួនទទួលបានការងារពិតប្រាកដនាពេលឆាប់ៗ ។

បើតាមក្រុមហ៊ុនផ្តល់សេវាកម្មទទួលបុគ្គលិកក្លែងក្លាយ គឺទោះជាយុវជនខ្លះចង់ធ្វើពុតថាខ្លួនមានការងារធ្វើក្តី ប៉ុន្តែយុវជនភាគច្រើនមកទីនេះ ដោយសារគិតថា ក្រុមហ៊ុនមានទីកន្លែងគួរឱ្យចាប់អារម្មណ៍សម្រាប់ការសម្រាក ។

ទិន្នន័យខែមីនា ឆ្នាំ២០២៥ បង្ហាញថា អត្រាគ្មានការងារធ្វើរបស់យុវជនចិនបានកើនឡើងរហូតដល់១៦.៥ភាគរយ សម្រាប់យុវជនអាយុពី១៦ឆ្នាំ ទៅ២៤ឆ្នាំ និងកើនឡើង៧.២ភាគរយ សម្រាប់យុវជនអាយុពី២៥ឆ្នាំ ទៅ២៩ឆ្នាំ ។ ក្រុមហ៊ុននៅទីក្រុងប៉េកាំងបានផ្តល់សេវាកម្មទទួលបុគ្គលិកក្លែងក្លាយ ដោយសារក្រុមហ៊ុនជួលទីតាំងក្នុងតម្លៃថោកជាងហាងកាហ្វេ ៕

ប្រទេសថៃ ៖ សារព័ត៌មានថៃ Matichon បានរាយការណ៍កាលពីថ្ងៃទី៨ ខែមិថុនា ឆ្នាំ២០២៥ ថា ក្រុមអាជីវករថៃត្អូញត្អែរពីកម្ពុជាបើកទ្វារច្រកព្រំដែនយឺតជាងថៃ១ម៉ោង បណ្តាលឱ្យប៉ះពាល់ដល់ការដឹកជញ្ជូនទំនិញថៃរយៈពេលយូរ គឺថៃបើកទ្វារច្រកព្រំដែននៅម៉ោង៨ព្រឹក ប៉ុន្តែកម្ពុជាបើកម៉ោង៩ព្រឹក ។ ក្រុមអាជីវករថៃចោទប្រកាន់ថា កម្ពុជាពុំផ្តល់ដំណឹងមកថៃជាមុនអំពីការបើក-បិទទ្វារច្រកព្រំដែន ហើយធ្វើឱ្យពួកគេឈររង់ចាំហាលភ្លៀងអស់ជាង១ម៉ោង ។

កាលពីថ្ងៃទី៨ ខែមិថុនា កន្លងមក មានភាពរញ៉េរញ៉ៃកើតឡើងនៅច្រកព្រំដែនអចិន្ត្រៃយ៍បានហាតឡិក នៅស្រុកឃ្លងញ៉ៃ ខេត្តត្រាត (ឬច្រកទ្វារអន្តរជាតិចាំយាម ខេត្តកោះកុង) ក្រោយពីមានការផ្លាស់ប្តូរម៉ោងបើក-បិទទ្វារច្រកព្រំដែនទាំងខាងថៃ និងកម្ពុជា គឺថៃបើកនៅម៉ោង៨ព្រឹក បិទម៉ោង៤ល្ងាច រីឯកម្ពុជាបើកម៉ោង៩ព្រឹក បិទម៉ោង៤ល្ងាច ។ ការបើក-បិទទ្វារច្រកព្រំដែនខុសគ្នានេះបណ្តាលឱ្យអាជីវករថៃ រថយន្តដឹកជញ្ជូនទំនិញថៃ និងភ្ញៀវទេសចរឈរហាលភ្លៀងអស់ជាង១ម៉ោង ។ នេះបើតាមការចុះផ្សាយរបស់សារព័ត៌មានថៃ ។

លោក អភិឆាតិ សាប់ប្រាសឺត មេបញ្ជាការកងកម្លាំងការពារព្រំដែនចាន់បុរី បានបញ្ជាឱ្យផ្លាស់ប្តូរម៉ោងបើក-បិទទ្វារច្រកព្រំដែនអចិន្ត្រៃយ៍បានហាតឡិក ខេត្តត្រាត និងច្រកព្រំដែននៅខេត្តចាន់បុរី គឺបើកទ្វារច្រកព្រំដែននៅម៉ោង៨ព្រឹក និងបិទម៉ោង៤ល្ងាចជារៀងរាល់ថ្ងៃ ខណៈកាលពីមុន ច្រកទាំងនេះបើកម៉ោង៦ព្រឹក និងបិទម៉ោង១០យប់ ។ រីឯច្រកព្រំដែនបណ្តោះអាសន្នផ្សេងៗ ក៏បើកនៅម៉ោង៨ព្រឹក និងបិទម៉ោង៤ល្ងាចដូចគ្នា ។

ការផ្លាស់ប្តូរម៉ោងបើក-បិទទ្វារច្រកព្រំដែនអចិន្ត្រៃយ៍បានហាតឡិក ខេត្តត្រាតរបស់ប្រទេសថៃ បានធ្វើឱ្យក្រុមអាជីវករថៃ និងរថយន្តរបស់ក្រុមហ៊ុនដឹកជញ្ជូនទំនិញពីទីក្រុងបាងកក និងខេត្តត្រាត ជាច្រើនគ្រឿងត្រូវផ្លាស់ប្តូរពេលវេលាដឹកជញ្ជូនជាថ្មី ដោយសារពុំអាចដឹកជញ្ជូនទំនិញពេលព្រឹកដូចមុន ។ លើសពីនេះ រថយន្តដឹកទំនិញថៃទាំងនេះប្រឈមនឹងការត្រឡប់មកវិញពុំទាន់ពេលច្រកព្រំដែនបិទនៅម៉ោង៤ល្ងាច ។

លោក សាក់ រ៉ាយ៉ាបស៊ី អ្នកបើកបររថយន្តដឹកទំនិញថៃនិយាយថា តាមធម្មតា លោកបានដឹកទំនិញឆ្លងដែនតាំងពីព្រឹកព្រលឹមរហូតដល់យប់ ប៉ុន្តែការផ្លាស់ប្តូរម៉ោងបើក-បិទទ្វារច្រកព្រំដែននេះធ្វើឱ្យលោកត្រូវរៀបចំកាលវិភាគការងារទាំងអស់ ជាពិសេស បញ្ហាកម្ពុជាបើកទ្វារច្រកព្រំដែនយឺតជាងថៃ១ម៉ោង ។

ចំណែកអ្នកស្រី យីង អាជីវករនៅព្រំដែននិយាយថា ថ្ងៃដំបូងអាចដោះស្រាយបញ្ហាបាន ប៉ុន្តែបើត្រូវរង់ចាំបែបនេះរាល់ថ្ងៃមិនបានទេ ហើយវាអាចប៉ះពាល់ដល់អាជីវកម្មរយៈពេលយូរ ។

សារព័ត៌មានថៃរាយការណ៍បន្តថា នៅព្រឹកថ្ងៃទី៨ ខែមិថុនា ក្រោយពីកងទ័ពថៃបើកទ្វារច្រកព្រំដែននៅម៉ោង៨ព្រឹក ក្រុមអាជីវករថៃក៏នាំគ្នាដើរទៅកាន់ការិយាល័យអន្តោប្រវេសន៍ខេត្តកោះកុង ប៉ុន្តែខាងកម្ពុជាពុំទាន់បើកទ្វារច្រកព្រំដែន ហើយឱ្យរង់ចាំរហូតដល់ម៉ោង៩ព្រឹក ទើបធ្វើឱ្យអាជីវករថៃឈររង់ចាំ ។ ទោះយ៉ាងណា មន្ត្រីកម្ពុជាអនុញ្ញាតឱ្យពលរដ្ឋថៃជ្រកភ្លៀងក្នុងអគារ ៕

សហរដ្ឋអាមេរិក ៖ លោកយាយម្នាក់រស់នៅរដ្ឋញូវហាំសៀ សហរដ្ឋអាមេរិក ពុំធ្លាប់លះបង់ក្តីសុបិនរបស់ខ្លួនទេ ដោយលោកយាយបានទទួលសញ្ញាបត្របរិញ្ញាបត្រពីសាកលវិទ្យាល័យនៅអាយុ៨៨ឆ្នាំ ក្រោយពីមានឧបសគ្គធ្វើឱ្យលោកយាយពុំអាចបន្តការសិក្សា ។ កាលពីជាង៦០ឆ្នាំមុន លោកយាយបានឈប់រៀនសាកលវិទ្យាល័យដោយសារមានផ្ទៃពោះកូនដំបូង ទើបសាកលវិទ្យាល័យពុំអនុញ្ញាតឱ្យលោកយាយរៀនបន្ត ដែលជាច្បាប់នាសម័យនោះ ។

លោកយាយឈ្មោះ Joan Alexander គួរតែទទួលបានសញ្ញាបត្របរិញ្ញាបត្រនៅឆ្នាំ១៩៥៩ ឬកាលពីជាង៦០ឆ្នាំមុន ប៉ុន្តែពេលនោះ លោកយាយពុំទទួលបានការអនុញ្ញាតឱ្យរៀននៅសាកលវិទ្យាល័យបន្ត ដែលជាច្បាប់កំណត់សម្រាប់បញ្ចប់ការសិក្សា ដោយសារលោកយាយមានទម្ងន់កូនដំបូងកូនស្រី ។ បច្ចុប្បន្ន លោកយាយ និងស្វាមីមានកូនទាំងអស់៤នាក់ ។

នាដើមឆ្នាំ២០២៥ កូនស្រីម្នាក់របស់លោកយាយបានទាក់ទងទៅសាកលវិទ្យាល័យដើម្បីសាកសួរពីការទទួលសញ្ញាបត្ររបស់ម្តាយ ។ លោក Justin Dimmel ព្រឹទ្ធបុរសរងរបស់សាកលវិទ្យាល័យនិយាយថា បទពិសោធន៍របស់លោកយាយដែលបានធ្វើជាជំនួយការគ្រូមត្តេយ្យកាលពីដើមឆ្នាំ១៩៨០ គឺគ្រប់គ្រាន់ហើយសម្រាប់ការទទួលសញ្ញាបត្របរិញ្ញាបត្រដែលលោកយាយត្រូវបានបដិសេធកាលពីមុន ។ វាធ្វើឱ្យលោកមើលឃើញពីការលះបង់ក្នុងការងារ ទើបសាកលវិទ្យាល័យសម្រេចប្រគល់សញ្ញាបត្របរិញ្ញាបត្រវិទ្យាសាស្ត្រអប់រំដល់លោកយាយ ។

លោកយាយ Joan បាននិយាយពីអារម្មណ៍របស់ខ្លួនថា ៖ «អរគុណសាកលវិទ្យាល័យដែលប្រគល់សញ្ញាបត្រដល់ខ្ញុំ ខ្ញុំដឹងថា ការទទួលបានសញ្ញាបត្រនេះមានអត្ថន័យខ្លាំងប៉ុនណា ។ ខ្ញុំមានអារម្មណ៍ថាប្រហោងក្នុងបេះដូងបានព្យាបាលហើយ» ។

ទោះជាលោកយាយពុំអាចដើរឡើងលើវេទិកាដើម្បីចូលរួមពិធីទទួលសញ្ញាបត្របរិញ្ញាបត្រ ប៉ុន្តែកូនស្រី និងចៅស្រីលោកយាយបានឡើងទទួលសញ្ញាបត្រជំនួសក្នុងពិធីប្រគល់សញ្ញាបត្រ ។ កូនស្រីលោកយាយប្រាប់ថា ៖ «វាពិសេសខ្លាំងណាស់ បើម្តាយខ្ញុំអាចចូលរួមពិធីដោយខ្លួនឯងបាន ប៉ុន្តែគាត់មកនៅទីនេះជាមួយចៅ គឺវារំភើបណាស់ហើយ ។ មនុស្សគ្រប់គ្នារំភើប និងចងចាំ ដែលម្តាយខ្ញុំបានសម្រេចក្តីសុបិន» ។

បច្ចុប្បន្ន លោកយាយ និងស្វាមីរស់នៅរដ្ឋញូវហាំសៀជាមួយកូនស្រីម្នាក់ ហើយលោកយាយនៅតែស្ម័គ្រចិត្តធ្វើការក្នុងព្រះវិហារ បណ្ណាល័យ និងសាលារៀនបឋមសិក្សាផងដែរ ៕