បទចម្រៀង Baby Mama របស់តារាចម្រៀង វណ្ណដា បានក្លាយជា Trend នៅលើ បណ្តាញសង្គមទិកតុកឡើងវិញបន្ទាប់ពីការប្រគំតន្រ្តីនៅពហុកីឡដ្ឋានជាតិអូឡាំពិក។ អំឡុងពេលការប្រគំតន្រ្តីនោះ ទស្សនិកជនបានឃើញអ្នករាំស្រីម្នាក់បានហុចផ្កា កុលាបពណ៌ក្រហមឱ្យ វណ្ណដា ខណៈនារីរូបនេះទើបទម្លាយថ្មីៗនេះថា នេះជាការ បន្ថែមដោយគ្មានការព្រៀងទុកជាមុនឡើយ។
កាលពីថ្ងៃទី៦ មិថុនា ខេ បានបង្ហោះវីដេអូមួយនៅលើបណ្តាញសង្គមហ្វេកប៊ុក ទិកតុក ដែលមាននារីម្នាក់នៅក្បែរខ្លួនមានឈ្មោះថា Pichy ហើយនាងជាអនុប្រធានក្រុមរាំឈ្មោះ SPICY NAMES ។ គួរកត់សម្គាល់ថានាងគឺអ្នករាំម្នាក់ដែលបង្ហាញខ្លួននៅក្នុងការ ប្រគំតន្រ្តីរបស់ វណ្ណដា កាលពីកន្លងមកនេះទៅលើបទចម្រៀង Baby mama ដែលបច្ចុប្បន្នក្បាច់រាំបទនេះមានភាពពេញនិយមនៅលើបណ្តាញសង្គមទិកតុក។ 
ក្នុងវីដេអូសម្ភាសន៍នេះ Pichy បានទម្លាយពីហេតុការណ៍នៅពេលហុចផ្កា កុលាបពណ៌ក្រហមឱ្យ វណ្ណដា ខណៈពេលនោះនាងមានការព្រួយបារម្ភខ្លាច វណ្ណដា មិនយកផ្កាដែលនាងហុចឱ្យ។
អ្នករាំរូបនេះបាននិយាយថា ដើមឡើងមិនមានគម្រោងផ្កាកុលាបនោះទេ ហើយ director stage បានឱ្យអ្នករាំឡើងទៅមើលឆាកម្តងទៀតហើយគាត់ក៏បានយកផ្កាកុលាប ហើយមាន Script ថ្មីត្រូវយកផ្កាកុលាបឱ្យ វណ្ណដា ។ រួចមកនាងគឺជាអ្នកហុចផ្កា កុលាបឱ្យ វណ្ណដា ដោយស្មានថា វណ្ណដា បានដឹងពី Script ថ្មីនេះដូចគ្នា។ នៅពេលជិតឡើងសម្តែងនាងមានការព្រួយបារម្ភថា វណ្ណដា នឹងយកផ្កានាងដែរឬទេ ដោយសារតែ វណ្ណដា ពាក់វែនតាផង ប៉ុន្តែចេះសំណាង វណ្ណដា បានទទួលផ្កាពីនាង។
ជាមួយគ្នានេះដែរ ខេ បានបន្ថែមដែរថាប្រហែលជា វណ្ណដា មិនបានដឹងនោះទេ ខណៈ Pichy បានទម្លាយបន្តទៀតថា វណ្ណដា គឺខ្យូត រួសរាយរាក់ទាក់ មានសេចក្តីរីករាយ ចំពោះក្រុមរាំដែលបានខិតខំនៅក្នុងការប្រគំតន្រ្តីរបស់ខ្លួនហើយពេលដែលចប់ កម្មវិធីប្រគំតន្រ្តី វណ្ណដា មកនិយាយអរគុណថតរូបជាមួយគ្នា៕
