មនុស្សភាគច្រើនគិតថា ការពុំងូតទឹកមុនពេលចូលសម្រាន្តគ្មានបញ្ហាអ្វីទេ ប៉ុន្តែតើជ្រាបទេថា វាមានផលប៉ះពាល់ដល់រាងកាយ និងសុខភាពលើសពីការគិត ។ យោងតាមការស្រាវជ្រាវបង្ហាញថា ការពុំងូតទឹកមុនពេលចូលសម្រាន្តប្រឈមនឹងផលប៉ះពាល់សុខភាពជាច្រើន រួមមាន ៖
១-ប្រមូលផ្តុំមេរោគ និងមានបញ្ហាស្បែក ៖ ការស្រាវជ្រាវរបស់ American Academy of Dermatology បង្ហាញថា ការពុំងូតទឹកមុនពេលសម្រាន្ត គឺជាការប្រមូលផ្តុំមេរោគ និងធ្វើឱ្យរលាកស្បែករយៈពេលយូរ ពីព្រោះមេរោគដែលប្រមូលផ្តុំពេលថ្ងៃនឹងកើនឡើងរហូតដល់៣២ភាគរយ ជាពិសេស អ្នកមានបញ្ហាស្បែក ។
២-ប៉ះពាល់គុណភាពការសម្រាន្តលក់ ៖ ការស្រាវជ្រាវក្នុង Journal of Sleep Medicine បង្ហាញថា ការងូតទឹកក្តៅឧណ្ឌៗមុនពេលចូលសម្រាន្តជួយឱ្យរាងកាយស្រស់ថ្លា កាត់បន្ថយភាពតានតឹង និងបង្កើនគុណភាពការសម្រាន្តលក់រហូតដល់២០ភាគរយ ។ ផ្ទុយទៅវិញ ការពុំងូតទឹកមុនសម្រាន្តនឹងធ្វើឱ្យពិបាកសម្រាន្តលក់ និងភ្ញាក់កណ្តាលយប់ជាញឹកញាប់ ។.png)
៣-បង្កើនហានិភ័យអាឡែស៊ីស្បែក ៖ តាមការស្រាវជ្រាវរបស់សាកលវិទ្យាល័យ Manchester គឺបើយើងពុំងូតទឹកមុនពេលសម្រាន្ត សារធាតុផ្សេងៗដែលបង្កជាអាឡែស៊ីស្បែក ដូចជា ៖ ធូលីដី និងកំទេចផ្សេងៗនឹងប្រមូលផ្តុំនៅលើកម្រាលពូកដែលយើងសម្រាកបណ្តាលឱ្យមានហានិភ័យអាឡែស៊ីស្បែក ឬធ្វើឱ្យបញ្ហាអាឡែស៊ីកាន់តែធ្ងន់ធ្ងរ ។
ហេតុនេះ កុំភ្លេចងូតទឹកមុនចូលសម្រាន្ត ពីព្រោះការងូតទឹកពេលនេះមិនត្រឹមតែធ្វើឱ្យរាងកាយស្រស់ថ្លាប៉ុណ្ណោះទេ ប៉ុន្តែវាកាត់បន្ថយការប្រមូលផ្តុំមេរោគផ្សេងៗ ជួយឱ្យឆាប់សម្រាន្តលក់ និងការពារអាឡែស៊ីស្បែក ៕
