ប្រទេសជប៉ុន ៖ កាលពីថ្ងៃទី៧ ខែកក្កដា ឆ្នាំ២០២៥ សារព័ត៌មាន Reuters រាយការណ៍ថា រដ្ឋាភិបាលជប៉ុននឹងលក់នាវាពិ.ឃាត Abukuma ចំនួន៦គ្រឿងឱ្យហ្វីលីពីន ដែលនាវានេះបានប្រចាំការនៅកងកម្លាំងការពារដែនសមុទ្ររបស់ជប៉ុនអស់រយៈពេលជាង៣០ឆ្នាំហើយ ដើម្បីទប់ទល់នឹងការពង្រីកឥទ្ធិពលដែនសមុទ្ររបស់ចិន ។ ការលក់នាវាបង្ហាញពីការព្យាយាមរបស់ប្រទេសទាំងពីរជាមិត្តជាមួយអាមេរិករួមគ្នាទប់ស្កាត់ការគំរា.មកំហែងពីចិននៅដែនសមុទ្រនានា ។

លោក Gen Nakatani រដ្ឋមន្ត្រីក្រសួងការពារជាតិជប៉ុន និងលោក Gilbert Teodoro រដ្ឋមន្ត្រីក្រសួងការពារជាតិហ្វីលីពីន បានធ្វើកិច្ចព្រមព្រៀងបញ្ជូននាវាពិឃាត ពេលរដ្ឋមន្ត្រីទាំង២រូប ជួបគ្នានៅប្រទេសសិង្ហបុរី កាលពីខែមិថុនា ឆ្នាំ២០២៥ ។ ទាហានជើងទឹកហ្វីលីពីននឹងពិនិត្យមើលសភាពនាវាក្នុងរដូវក្តៅឆ្នាំនេះដើម្បីត្រៀមប្រើប្រាស់ ។

កាលពីថ្ងៃទី៦ ខែកក្កដា ទាហានជើងទឹកហ្វីលីពីនឱ្យដឹងថា ក្រុមអ្នកជំនាញផ្នែកនាវាហ្វីលីពីននឹងពិនិត្យមើល រួមទាំងវាយតម្លៃស៊ីជម្រៅពីស្ថានភាពនាវា ក្រោយទទួលបានការអញ្ជើញជាផ្លូវការពីក្រសួងការពារជាតិជប៉ុន ។ លទ្ធផលការពិនិត្យនឹងយកទៅពិចារណាបន្ថែមទៀតពាក់ព័ន្ធនឹងការទិញ ព្រមទាំងស្របតាមផែនការទាហានជើងទឹកហ្វីលីពីន ។ ការទិញនាវាបង្ហាញពីកិច្ចសហការជាយុទ្ធសាស្ត្រស៊ីជម្រៅកាន់តែខ្លាំងរវាងហ្វីលីពីន និងជប៉ុន ។

ចំណែកអ្នកនាំពាក្យក្រសួងការពារជាតិជប៉ុនបានបដិសេធរឿងជប៉ុនលក់នាវាឱ្យហ្វីលីពីន ខណៈមន្ត្រីក្រសួងការបរទេសចិនក៏ពុំបាននិយាយអ្វីពាក់ព័ន្ធនឹងការលក់នាវា ។ ប៉ុន្តែជប៉ុន និងហ្វីលីពីននិយាយដូចគ្នាថា ពួកគេកំពុងប្រឈមនឹងការឈ្លានពានកាន់តែខ្លាំងពីចិនក្នុងដែនទឹក គឺហ្វីលីពីនរងការឈ្លានពាននៅសមុទ្រចិនខាងត្បូង ខណៈជប៉ុនរងការឈ្លានពាននៅសមុទ្រចិនខាងកើត ។

ជប៉ុនបង្កើនទំនាក់ទំនងទ្វេភាគីជាមួយហ្វីលីពីនទាំងផ្នែកកងទ័ព ការធ្វើសមយុទ្ធ និងការចរចាយុទ្ធសាស្ត្រកម្រិតខ្ពស់ ។ កាលពីឆ្នាំ២០២៤ ប្រទេសទាំងពីរបានចុះហត្ថលេខាលើកិច្ចព្រមព្រៀងពាក់ព័ន្ធនឹងកងទ័ព វាជាកិច្ចព្រមព្រៀងដំបូងសម្រាប់ជប៉ុនក្នុងតំបន់អាស៊ីដែលអនុញ្ញាតឱ្យជប៉ុន និងហ្វីលីពីនបញ្ជូនកងទ័ពឱ្យគ្នាទៅវិញទៅមក ។

តាមគេហទំព័រកងកម្លាំងការពារដែនសមុទ្រជប៉ុន គឺនាវាពិឃាត Abukuma មានទំហំតូចសម្រាប់នាវិកប្រមាណ១២០នាក់ និងបំពាក់ដោយកាំជ្រួចប្រឆាំងនាវាមុជទឹក កាំជ្រួចប្រឆាំងនាវា បំពង់ Torpedo និងកាំភ្លើង ។ ទាហានជើងទឹកហ្វីលីពីនពុំទាន់មាននាវាពិឃាតប្រចាំការទេ គឺមានត្រឹមនាវា Frigates និង Corvettes ទំហំតូច និងបំពាក់អាវុធធុនស្រាលប៉ុណ្ណោះ ៕

សហរដ្ឋអាមេរិក ៖ សារព័ត៌មាន BBC បានរាយការណ៍ពីស្ថានការណ៍ទឹកជំនន់ភ្លាមៗដែលកើតឡើងនៅតំបន់កណ្តាលរបស់រដ្ឋតិចសាស់ សហរដ្ឋអាមេរិក កាលពីថ្ងៃទី៤ ខែកក្កដា កន្លងមក បានធ្វើឱ្យពលរដ្ឋអាមេរិកស្លា.ប់ រហូតដល់៥១នាក់ ក្នុងចំនួននេះមានកុមារស្លា.ប់ ចំនួន១៥នាក់ ។ មន្ត្រីឧតុនិយមបានជូនដំណឹងទៅកាន់ពលរដ្ឋឱ្យប្រុងប្រយ័ត្ន ពីព្រោះទឹកជំនន់នឹងកើតឡើងម្តងទៀត ។

លើសពីនេះ ភ្នាក់ងារសង្គ្រោះបានប្រមូលកម្លាំងស្វែងរកកុមារចំនួន២៧នាក់ផ្សេងទៀត ដែលបានបាត់ខ្លួនពី Camp Mystic គឺជាជម្រកស្នាក់នៅរបស់យុវជនគ្រីស្ទានស្ថិតនៅមាត់ទន្លេហ្គួតាលូបេ ។ ជម្រកស្នាក់នៅនេះមានសិស្សស្រី ចំនួន៧៥០នាក់ មកស្នាក់នៅដើម្បីរៀបចំកម្មវិធី ភ្នាក់ងារសង្គ្រោះសន្យាថា នឹងព្យាយាមស្វែងរកជនរងគ្រោះឱ្យទាល់តែឃើញ ។

លោក Larry Letha អាជ្ញាធរតំបន់ខោនឌោនធី និយាយថា ពេលនេះ ភ្នាក់ងារសង្គ្រោះបានជួយសង្គ្រោះជនរងគ្រោះដោយសារទឹកជំនន់បានជាង៨៥០នាក់ ។ រីឯអាជ្ញាធរក្នុងតំបន់នៅតែប្រកាសពីគ្រោះទឹកជំនន់ភ្លាមៗរហូតដល់ថ្ងៃទី៦ ខែកក្កដា ។

លោក Greg Abbott អភិបាលរដ្ឋតិចសាស់ឱ្យដឹងថា ភ្នាក់ងារសង្គ្រោះនៅតែព្យាយាមស្វែងរកជនរងគ្រោះគ្រប់រូបមិនឈប់ឈរ ហើយយើងនឹងបញ្ឈប់ការស្វែងរកពួកគេ រហូតដល់បញ្ចប់ការរៀបចំកម្មវិធី ។ ក្មេងស្រីដែលបាត់ខ្លួនជាច្រើននាក់ គឺមានអាយុក្រោម១២ឆ្នាំ ។

ជម្រកស្នាក់នៅរបស់យុវជនគ្រីស្ទានស្ថិតនៅមាត់ទន្លេហ្គួតាលូបេ ពោរពេញទៅដោយភក់ និងសម្ភារៈបាក់បែកក្រោយទឹកជំនន់ ។ បើតាមសេចក្តីរាយការណ៍ គឺក្មេងៗជាច្រើននាក់បានសម្រាកលង់លក់ក្នុង Camp Mystic ដោយពុំដឹងថា កម្រិតទឹកក្នុងទន្លេបានកើនឡើងខ្ពស់រហូតដល់ជាង៨ម៉ែត្រក្នុងរយៈពេលមិនដល់១ម៉ោង កាលពីព្រឹកព្រលឹមថ្ងៃទី៤ ខែកក្កដា ។

ប្រធានាធិបតីអាមេរិក លោក Donald Trump ថ្លែងថា រដ្ឋាភិបាលបានធ្វើការយ៉ាងជិតស្និទ្ធជាមួយអាជ្ញាធរមូលដ្ឋានដើម្បីដោះស្រាយបញ្ហាដែលកើតឡើងដោយសារទឹកជំនន់នេះ ហើយរដ្ឋាភិបាលនឹងបញ្ជូនឆ្មាំសមុទ្រទៅជួយស្វែងរកមនុស្សបាត់ខ្លួន ។

តាមការជូនដំណឹងរបស់ការិយាល័យឧតុនិយមជាតិ គឺមានទឹកជំនន់ភ្លាមៗកើតឡើងនៅរដ្ឋតិចសាស់ម្តងទៀត និងមានភ្លៀងធ្លាក់ចាប់ពី៥០ទៅ១២៧មីល្លីម៉ែត្រ កាលពីថ្ងៃទី៥ ខែកក្កដា ។ រីឯតំបន់ខ្លះមានបរិមាណទឹកភ្លៀងរហូតដល់ជាង២៥០មីល្លីម៉ែត្រ ៕

ប្រទេសថៃ ៖ កាលពីថ្ងៃទី៤ ខែកក្កដា ឆ្នាំ២០២៥ សារព័ត៌មានថៃរាយការណ៍ថា លោក ភូមិថាំ វីឆាយ៉ាឆៃ ឧបនាយករដ្ឋមន្ត្រី និងរដ្ឋមន្ត្រីក្រសួងមហាផ្ទៃ ត្រូវបានចាត់ឱ្យកាន់តំណែងជានាយករដ្ឋមន្ត្រីស្តីទីបំពេញភារកិច្ចជំនួសលោកស្រី ផេថងថាន ស៊ីណាវ៉ាត់ ដែលតុលាការសម្រេចព្យួរ និយាយថា ភ្នាក់ងារសន្តិសុខជាតិនៅតែកំណត់យកវិធានការបិទព្រំដែនកម្ពុជា-ថៃដដែល គ្មានការបន្ធូរបន្ថយការឆ្លងដែនចេញ-ចូលទេ ដោយសារស្ថានការណ៍នៅតែតានតឹង ។

លោក ភូមិថាំ ឧបនាយករដ្ឋមន្ត្រីទទួលបន្ទុកសន្តិសុខ និងជារដ្ឋមន្ត្រីក្រសួងមហាផ្ទៃបានធ្វើជាប្រធានកិច្ចប្រជុំភ្នាក់ងារសន្តិសុខជាតិឱ្យដឹងថា អនុរដ្ឋមន្ត្រីក្រសួងការពារជាតិ លោក ណាតថាផុន ណាកផានិត មានតួនាទីជាប្រធានមជ្ឈមណ្ឌលគ្រប់គ្រងស្ថានការណ៍ព្រំដែនកម្ពុជា-ថៃបានសរុបស្ថានការណ៍ព្រំដែននៅតែមានភាពតានតឹង ។ ហេតុនេះ ថៃនឹងអនុវត្តវិធានការបិទព្រំដែនទាំងអស់ជាមួយកម្ពុជាបន្តទៀត ។

ភ្នាក់ងារសន្តិសុខជាតិបានទទួលសេចក្តីរាយការណ៍ពីស្ថានការណ៍ព្រំដែន និងក៏អរគុណមជ្ឈមណ្ឌលគ្រប់គ្រងស្ថានការណ៍ព្រំដែនកម្ពុជា-ថៃ ដែលបំពេញការងារជាបន្តបន្ទាប់ ហើយប្រគល់អំណាចឱ្យលោក ណាតថាផុន អនុរដ្ឋមន្ត្រីក្រសួងការពារជាតិ មានតួនាទីទទួលខុសត្រូវជជែកជាមួយកងទ័ព រួមទាំងចាត់វិធានការរកវិធីដោះស្រាយបញ្ហាព្រំដែន ។

ការជជែកពីការបន្ធូរបន្ថយវិធានការឆ្លងព្រំដែនកម្ពុជា-ថៃឬអត់នោះ លោក ភូមិថាំ បញ្ជាក់ថា គ្មានការជជែកគ្នាពីរឿងការបើកព្រំដែនឡើយ ថៃនៅតែអនុវត្តវិធានការបិទព្រំដែនដូចមុន គ្រាន់តែប្រគល់អំណាចឱ្យលោក ណាតថាផុន ហើយពុំចាំបាច់រាយការណ៍លម្អិតទេ លោកនឹងធ្វើជាអ្នកតំណាងរដ្ឋាភិបាលថៃ ។ រីឯការសម្រេចចិត្តបើក ឬបិទព្រំដែនកម្ពុជា-ថៃ គឺត្រូវពិភាក្សាក្នុងប្រជុំភ្នាក់ងារសន្តិសុខជាតិ ពីព្រោះភ្នាក់ងារនេះមានអំណាចពិចារណាដោយផ្ទាល់ ។

ក្រៅពីនេះ លោក ភូមិថាំ ក៏បាននិយាយពីហ្វេសប៊ុកផេកកងទ័ពថៃឈ្មោះ «Army Military Force» ចោទប្រកាន់ថា កងទ័ពខ្មែរព្យាយាមចូលមកក្នុងទឹកដីថៃម្តងទៀត ហើយត្រូវបានទាហានឈុតខ្មៅថៃរារាំងរហូតដល់មានការប្រកែក ហើយក៏បំបែកផ្លូវគ្នា ដោយលោកថា លោកពុំជ្រាបពីព័ត៌មាននេះទេ ពីព្រោះពុំទទួលបានសេចក្តីរាយការណ៍ ។

គួរបញ្ជាក់ថា ក្រោយពីលោកស្រី ផេថងថាន ប្រគល់អំណាចឱ្យកងទ័ពមានសិទ្ធិសម្រេចបិទព្រំដែនកម្ពុជា-ថៃ កងទ័ពថៃក៏បានបិទព្រំដែនជាមួយកម្ពុជាទាំងអស់ជាឯកតោភាគីក្រោមមូលហេតុការពារសន្តិសុខពលរដ្ឋខ្លួន និងចោទប្រកាន់ថា កម្ពុជា គឺជាទីតាំងឧក្រិដ្ឋកម្មឆ្លងដែន និងការឆបោកអនឡាញ ។ ប៉ុន្តែគោលបំណងពិតប្រាកដដែលថៃបិទព្រំដែន គឺចង់ដាក់សម្ពាធឱ្យកម្ពុជាយល់ព្រមទទួលយកយន្តការចរចាទ្វេភាគីបញ្ចប់ជម្លោះ ៕