ណារ៉ាធីវ៉ាត់៖ ភាពអសន្តិសុខនៅក្នុងតំបន់ភាគខាងត្បូងរបស់ប្រទេសថៃ ជាពិសេសក្នុងខេត្តណារ៉ាធីវ៉ាត់កាន់តែរីធំឡើងៗ ក្រោយក្រុមបះបោរមូស្លីមកាន់តែអុកឡុកពីមួយថ្ងៃទៅមួយថ្ងៃ ជាមួយការដាក់គ្រាប់បំផ្ទុះតាមមូលដ្ឋានត្រួតពិនិត្យតឥស្រាកស្រាន្ត បណ្ដាលឲ្យកម្លាំងប៉ូលីសរបស់រដ្ឋាភិបាលរងរបួសជាច្រើននាក់នៅប៉ុន្មានរយៈចុងក្រោយនេះ។

បើយោងតាមការចេញផ្សាយដោយសារព័ត៌មាន Amrin News និង The Nation របស់ថៃបានឲ្យដឹងថា ក្នុងពេលត្រឹមតែមួយយប់ថ្ងៃទី៣១ ខែសីហា រំលងអាធ្រាតឈានចូលថ្ងៃទី១ ខែកញ្ញា ក្រុមបះបោរផ្ដា.ច់ទឹកដីបានដាក់គ្រាប់បែ.កបំផ្ទុះលើទីតាំងសំខាន់ៗនៃស្រុកចំនួន៥ផ្សេងគ្នាក្នុងខេត្តណារ៉ាធីវ៉ាត់ បង្ករឲ្យពលមានការភ័យស្លន់ស្លោរ និងប៉ូលីសក្នុងតំបន់រត់ពេញមួយយប់។

បើតាមរបាយការណ៍ដែលចេញផ្សាយនៅថ្ងៃបន្ទាប់បានឲ្យដឹង ការបំផ្ទុះដំបូងបានចាប់ផ្ដើមឡើងនៅម៉ោងប្រហែលជាង ៧យប់ នៅលើផ្លូវហាយវ៉េលេខ៤០៥៦ ក្នុងស្រុក Su-ngai Padi បណ្ដាលឲ្យមនុស្ស២នាក់រងរបួស និងខូចខាតរថយន្តមួយគ្រឿង។ ក្រោយមកនៅម៉ោង១១:៥៥នាទីយប់ ក្នុងស្រុក Cha-nai ការផ្ទុះ២លើកទៀត បានអង្រួនវិហារឥស្លាម Dusongno និងផ្សារមួយកន្លែង។ នៅម៉ោងប្រហាក់ប្រហែលគ្នានេះ ការផ្ទុះមួយទៀតត្រូវបានគេរាយការណ៍ថា បានកើតមាននៅស្រុក Ba Cho លើផ្លូវ Phetkasem ខាងមុខធនាគារមួយ ប៉ុន្តែមិនមាននរណាម្នាក់រងរបួសនោះទេ។ លុះរំលងមកដល់ម៉ោងប្រមាណ ១២:០៥ រំលងអាធ្រាត្រ គ្រាប់បែកមួយគ្រាប់ទៀត បានផ្ទុះនៅមុខទូ ATM របស់ធនាគារដដែលខាងនេះក្នុងស្រុក Cho Airong។ និងចុងក្រោយនៅម៉ោង ១២ និង៣០នាទីយប់ មានករណីផ្ទុះនៅមុខទូ ATM មួយទៀតបានកើតឡើងទល់មុខរដ្ឋបាលឃុំ Tambon Tamayung។

ជាមួយនឹងឧប្បត្តិហេតុបំផ្ទុះគ្រាប់បែ.កផ្ទួនៗគ្នានឲក្នុងពេលតែមួយយប់របស់ក្រុមបះបោរនេះ បានបង្ហាញពីភាពចលាចលដែលមិនអាចដោះស្រាយបានតាំងពីច្រើនទសវត្សន៍មុននិងនៅបន្តរហូតមកដល់បច្ចុប្បន្ន ចំពេលដែលអស្ថិរភាពនយោបាយកំពុងកើនឡើង តាមរយៈការរុះរើគណៈរដ្ឋមន្រ្តីដើម្បីផ្លាស់ប្ដូមេដឹកនាំថ្មី។

គួរជម្រាបផងដែរថា ចាប់តាំងពីឆ្នាំ២០០៤មក អំពើហិង្សានៅខេត្តភាគខាងត្បូងរបស់ថៃ បានក្លាយជាជម្លោះប្រដាប់អាវុធដ៏រ៉ាំរ៉ៃរវាងរដ្ឋាភិបាលថៃ និងក្រុមបះបោរផ្តាច់ខ្លួន ដោយបើយោងតាមក្រុមស្រាវជ្រាវ Deep South Watch ជម្លោះនេះបានបណ្តាលឱ្យមនុស្សជាង ៧,៥០០នាក់ស្លាប់ និងជាង ១៣,៥០០នាក់ផ្សេងទៀតរងរបួស៕

ហ្សាកាតា៖ ការតវ៉ាទ្រង់ទ្រាយធំបានផ្ទុះឡើងនៅទូទាំងប្រទេសឥណ្ឌូនេស៊ីបន្ទាប់ពីអ្នកដឹកជញ្ជូនម្ហូបអាហារវ័យក្មេងម្នាក់បានស្លា.ប់ដោយសារស្នាដៃរបស់ប៉ូលីស ហើយវាបានក្លាយជាសោ.កនាដកម្មដុតបញ្ឆេះនៃកំហឹងប្រជាជនទូទាំងប្រទេស ឲ្យខឹងស្អ.ប់រដ្ឋាភិបាល ព្រមទាំងដាក់គោលដៅលើផ្ទះអ្នកនយោបាយ និងក្រុមអភិជនមួយចំនួនធ្វើជាទីតាំងវា.យលុកសម្រុកចូល ដោយពួកគេយល់ថាក្រុមមនុស្សទាំងនេះហើយគឺជាប្រភពដើមនៃអំពើពុករលួយ កេងចំណេញលើកម្លាំងញើសឈា.មរបស់ប្រជាជនស្លូតត្រង់។

យោងតាមការចុះផ្សាយរបស់សារព័ត៌មានអន្តរជាតិធំៗជាច្រើនបានឲ្យដឹងថា គិតមកត្រឹមថ្ងៃទី១ ខែកញ្ញានេះ បាតុ.ក.ម្មដែលបានចាប់ផ្ដើមឡើងកាលពីថ្ងៃចន្ទ ទី២៥ ខែសីហា សប្ដាហ៍មុន បានរីករាលដាលទៅជាកុប្បកម្ម ដែលមានអំពើហិ.ង្សារវា.យប្រហារ ដុតបំផ្លាញទីតាំងមួយចំនួន រួមទាំងការចូលលុកលុយក្នុងផ្ទះរបស់អ្នកនយោបាយប្រមូលយកសម្ភារៈមានតម្លៃមកក្រៅផងដែរ។ សកម្មភាពនេះ បានធ្វើឲ្យរដ្ឋាភិបាលឥណ្ឌូណេសុីដឹកនាំដោយលោកប្រធានាធិបតី Prabowo Subianto រង្គោះរង្គើរកាន់តែខ្លាំង។

នៅទីក្រុងហ្សាកាតា ក្រុមបាតុករត្រូវបានគេរាយការណ៍ថាបានលួ.ចឆ្មក់ចូលក្នុងលំនៅដ្ឋានរបស់រដ្ឋមន្ត្រីផ្នែកហិរញ្ញវត្ថុ Sri Mulyani Indrawati ដើម្បីវា.យកម្ទិច និងប្រមូលយករបស់របរមួយចំនួនចេញមកក្រៅ។ សកម្មភាពនេះត្រូវបានគេមើលឃើញថាឆ្លុះបញ្ចាំងពីការអាក់អន់ចិត្តយ៉ាងខ្លាំងចំពោះឥស្សរជននយោបាយ និងសេដ្ឋកិច្ចនៅក្នុងប្រទេសឥណ្ឌូណេសុី។

ភាពតានតឹងដែលបានបានផ្ទុះឡើងកាន់តែខ្លាំងនេះ ជំរុញឲ្យលោក Prabowo Subianto បានប្រកាសលុបចោលដំណើរទស្សនកិច្ចផ្លូវការទៅកាន់ប្រទេសចិន ដើម្បីបន្តដោះស្រាយ និងគ្រប់គ្រងវិបត្តិនៅក្នុងប្រទេសនេះ ជាមួយនឹងការសន្យាថា នឹងមានការស៊ើបអង្កេតពេញលេញលើការស្លា.ប់របស់អ្នកដឹកជញ្ជូនម្នាក់ដែលត្រូវបានប៉ូលីសបើករថយន្តបំបុ.កផ្ដាច់ជីវិតនោះ។

គួរជម្រាបថា ការតវ៉ាដែលក្រោយមកបានរីកធំរហូតក្លាយជាអំពើហិង្សាសម្លា.ប់ជីវិតប្រជាជនអស់យ៉ាងហោចណាស់ ៦នាក់បើគិតមកទល់ពេលនេះ គឺបណ្ដាលមកពីការមិនពេញចិត្តចំពោះគោលនយោបាយថ្មីៗដែលកំណត់ដោយរដ្ឋាភិបាល លោក Prabowo ជាពិសេសការតម្លើងប្រាក់ឧត្ថម្ភប្រចាំខែចំនួន ៣ពាន់ដុល្លារក្នុងម្នាក់ ដល់សមាជិកសភាជាង ៥០០នាក់ ដែលលើសពីប្រាក់ខែគោលរបស់ពលរដ្ឋទូទៅស្ទើគុណនឹង១០ ទើបធ្វើឲ្យពលរដ្ឋដែលខិតខំរកចំណូលបង់ពន្ធចូលរដ្ឋទាំងលំបាកលំបិនកើតការផ្ទុះកហឹ.ងទាមទាររកយុត្តិធម៌សម្រាប់ខ្លួនឯង៕

មនុស្សភាគច្រើនអស់សំណើចពេលសរសេរពាក្យថា «សូម» ឬ «អរគុណ» ក្នុងកម្មវិធី ChatGPT ដោយសារវាគ្រាន់តែជាបច្ចេកវិទ្យាគ្មានអារម្មណ៍ដូចមនុស្ស ។ ប៉ុន្តែការសរសេរពាក្យទាំងនេះក្នុងកម្មវិធី ChatGPT បានឆ្លុះបញ្ចាំងពីអត្ថន័យស៊ីជម្រៅ ពីព្រោះវាមិនត្រឹមតែពាក់ព័ន្ធនឹងការធ្វើការរបស់បច្ចេកវិទ្យា AI ប៉ុណ្ណោះទេ ប៉ុន្តែពាក់ព័ន្ធនឹងចិត្តវិទ្យាមនុស្ស និងការប្រព្រឹត្តចំពោះគ្នាទៅវិញទៅមកជាក់ស្តែង ។ នេះជាការលើកឡើងរបស់អ្នកស្រី Gabrielle Wasco ជា Content Lead របស់ The Decision Lab នៅប្រទេសកាណាដា ។

អ្នកស្រី Gabrielle Wasco តែងតែគិតថា កម្មវិធី ChatGPT មានអារម្មណ៍ដូចមនុស្សជានិច្ច ពេលវាឆ្លើយតបមកអ្នកស្រីដោយប្រើប្រាស់ពាក្យពេចន៍អាណិតអាសូរ ឬយល់ចិត្ត វាកាន់តែធ្វើឱ្យអ្នកស្រីគិតថា ChatGPT ដូចគ្នានឹងមិត្តរួមការងារដែរ ។ ម្យ៉ាងវិញទៀត ការប្រើប្រាស់ពាក្យពេចន៍សុភាព និងគួរសម គឺជាទម្លាប់របស់មនុស្សម្នាក់ៗតាំងពីតូចមកដោយសារការអប់រំពីអាណាព្យាបាល ទើបធ្វើឱ្យមនុស្សនិយាយពាក្យ «សូម» និង «អរគុណ» ចេញមក សូម្បីតែពេលកំពុងសរសេរក្នុងកម្មវិធី ChatGPT ក្តី ។

ការប្រើប្រាស់ពាក្យពេចន៍សុភាព និងគួរសមក្នុងកម្មវិធី ChatGPT គឺ AI នឹងឆ្លើយតបមកយើងវិញនូវពាក្យសុភាព និងគួរសមដូចគ្នា ឬវាបញ្ចុះបញ្ចូលមនុស្សនៅជុំវិញឱ្យធ្វើអ្វីមួយឱ្យយើង ។ ការប្រើប្រាស់ពាក្យសមរម្យជាមួយបច្ចេកវិទ្យា តើវានឹងឆ្លើយតបតាមការចង់បានរបស់អ្នកប្រើប្រាស់ដែរឬទេ?

ការស្រាវជ្រាវរបស់សាកលវិទ្យាល័យ Waseda ប្រទេសជប៉ុន បង្ហាញថា ការប្រើប្រាស់ពាក្យពុំសុភាពជាមួយបច្ចេកវិទ្យា AI គឺយើងនឹងពុំទទួលបានលទ្ធផលល្អទេ AI នឹងផ្តល់ចម្លើយពុំត្រឹមត្រូវ ឬបដិសេធមកវិញ ។ រីឯការប្រើប្រាស់ពាក្យគួរសមប្រមាណ៥០% ជាមួយ AI វានឹងផ្តល់ចម្លើយវែង និងកាន់តែមានប្រយោជន៍ ប៉ុន្តែបើប្រើពាក្យសុភាពជាមួយវាខ្លាំងពេក នឹងធ្វើឱ្យ AI ភាន់ច្រឡំ ខណៈពាក្យសុភាពមានភាពខុសប្លែកគ្នាអាស្រ័យលើវប្បធម៌ ភាសា និងសង្គម ។

សរុបមក ការនិយាយសុភាពជាមួយកម្មវិធី ChatGPT មិនគ្រាន់តែជាការបង្ហាត់វាប៉ុណ្ណោះទេ ប៉ុន្តែជាការបង្ហាត់អ្នកប្រើប្រាស់ខ្លួនឯងឱ្យមានទម្លាប់និយាយពាក្យ «សូម» ឬ «អរគុណ» ជាមួយមនុស្សក្នុងសង្គមជាក់ស្តែង មិនមែននិយាយសុភាពតែនៅមុខកញ្ចក់កុំព្យូទ័រ ។ ការនិយាយសុភាព និងគួរសមជាមួយ AI ពុំមែនជារឿងគួរឱ្យអស់សំណើចឡើយ ប៉ុន្តែជាការរក្សាតម្លៃមនុស្សក្នុងពិភពឌីជីថល ៕