ប្រទេសថៃ ៖ តាមការផ្សព្វផ្សាយរបស់សារព័ត៌មាន Thai PBS កាលពីថ្ងៃទី១ ខែកញ្ញា ឆ្នាំ២០២៥ ឱ្យដឹងថា លោក វីរៈយុទ្ធ រ៉ាក់ស៊ីន បច្ចុប្បន្នជាមេបញ្ជាការរងយោធភូមិភាគ២ នឹងឡើងកាន់តំណែងជាមេបញ្ជាការយោធភូមិភាគ២ ជំនួសលោក ប៊ុនស៊ីន ផាកក្លាង ដែលនឹងចូលនិវត្តន៍ពីការងារ នៅថ្ងៃទី៣០ ខែកញ្ញានេះ ។ លោក វីរៈយុទ្ធ ​បានចូលរួមភារកិច្ចជាមួយកងទ័ពថៃឈ្លានពានកម្ពុជានៅសមរភូមិមុខកាលពីខែកក្កដា នឹងគ្រប់គ្រងកងទ័ពភូមិភាគ២ ចាប់ពីថ្ងៃទី១ ខែតុលា ។

លោក វីរៈយុទ្ធ រ៉ាក់ស៊ីន នឹងឡើងកាន់តំណែងជាមេបញ្ជាការយោធភូមិភាគ២ ជំនួសលោក ប៊ុនស៊ីន ផាកក្លាង ពុំមែនជាការផ្លាស់ប្តូរមេបញ្ជាការកងទ័ពភ្លាមៗទេ ប៉ុន្តែ ដោយសារអតីតមេបញ្ជាការកងទ័ពជាច្រើនពេញចិត្តនឹងការបំពេញការងាររបស់លោក វីរៈយុទ្ធ ។ អតីតមេបញ្ជាការយោធភូមិភាគ២ ជាច្រើននាក់ទទួលស្គាល់ថា លោក វីរៈយុទ្ធ គឺជាមេបញ្ជាការកងទ័ពល្អ មិនខុសគ្នាពីលោក ប៊ុនស៊ីន ។

លោក វីរៈយុទ្ធ បានទទួលតំណែងជាមេបញ្ជាការយោធភូមិភាគ២ ជំនួសលោក ប៊ុនស៊ីន ដោយសារធ្លាប់ធ្វើការរួមគ្នាជាមួយលោក ប៊ុនស៊ីន រហូតមក ។ កាលពីឆ្នាំ២០២១ លោកកាន់តំណែងជាមេបញ្ជាការកងពលធំថ្មើរជើងលេខ៦ និងជាមេបញ្ជាការកងកម្លាំងស៊ុណារី ដែលគ្រប់គ្រងភារកិច្ចនៅព្រំដែនកម្ពុជា-ថៃ បន្ទាប់មក លោកក៏តំណែងជាមេបញ្ជាការរងយោធភូមិភាគ២ ដោយសារស្គាល់ភូមិសាស្ត្រក្នុងខេត្តភាគឦសាន ។

ពេលសង្គ្រាមរវាងកម្ពុជា-ថៃ ដែលបង្កឡើងដោយសារកងទ័ពថៃបាញ់ប្រហារមុនមកលើកងទ័ពខ្មែរ ចាប់ពីថ្ងៃទី២៤ ដល់ថ្ងៃទី២៨ ខែកក្កដា លោក វីរៈយុទ្ធ បានចូលរួមជាមួយកងទ័ពថៃឈ្លានពានកម្ពុជានៅសមរភូមិមុខ ។ ក្រៅពីនេះ លោកបានឱ្យធ្វើជាតំណាងកងទ័ពភូមិភាគ២ ចូលរួមក្នុងកិច្ចប្រជុំគណៈកម្មការព្រំដែនរួម (JBC) នៅរាជធានីភ្នំពេញ, កិច្ចប្រជុំគណៈកម្មាធិការកិច្ចការព្រំដែនទូទៅ (GBC) នៅប្រទេសម៉ាឡេស៊ី និងកិច្ចប្រជុំគណៈកម្មាធិការព្រំដែនថ្នាក់យោធភូមិភាគ (RBC) ។

កាលពីចុងខែកក្កដា លោក វីរៈយុទ្ធ បានដឹកនាំក្រុមអ្នកសង្កេតការណ៍អន្តរកាល (IOT) ចំនួន៨ប្រទេស ចុះពិនិត្យមើលការខូចខាតក្នុងខេត្តនានាដែលថៃចោទប្រកាន់ថា បង្កឡើងដោយកងទ័ពខ្មែរ ។ ចាប់ពីថ្ងៃទី១ ខែតុលា តទៅ លោកនឹងគ្រប់គ្រងកងទ័ពភូមិភាគ២ ជាពិសេស គ្រប់គ្រងតំបន់ឦសានដែលមានជម្លោះជាមួយកម្ពុជាពុំទាន់បញ្ចប់ ។

ចំណែកលោក ប៊ុនស៊ីន នឹងចូលនិវត្តន៍ពីការងារ នៅថ្ងៃទី៣០ ខែកញ្ញា នេះ ក្រោយពីទទួលបានការគាំទ្រយ៉ាងខ្លាំងពីពលរដ្ឋថៃ ដោយសារចេញមុខធ្វើសង្គ្រាមឈ្លានពានកម្ពុជា និងជាបុគ្គលបង្កជម្លោះព្រំដែនមិនឈប់ឈរ ៕

សហរដ្ឋអាមេរិក ៖ អាមេរិកបានហាមឃាត់ពលរដ្ឋ និងភ្ញៀវទេសចរហែលទឹកនៅឆ្នេរសមុទ្រជាច្រើនកន្លែងទូទាំងសហរដ្ឋ ក្រោយរកឃើញទឹកសមុទ្រលាយឡំជាមួយលាម.កមានបរិមាណលើសកម្រិតស្តង់ដារដែលអាចធ្វើឱ្យអ្នកហែលទឹកឆ្លងមេរោគផ្សេងៗពីទឹកកខ្វក់ ហើយបញ្ហានេះពុំមែនទើបតែកើតឡើងលើកទី១ទេ វាធ្លាប់កើតឡើងដោយសារកត្តាជាច្រើន ។ នេះបើតាមការផ្សព្វផ្សាយរបស់សារព័ត៌មានបរទេស កាលពីថ្ងៃទី១ ខែកញ្ញា ឆ្នាំ២០២៥ ។

អាជ្ញាធរបានដាស់តឿនពលរដ្ឋ និងភ្ញៀវទេសចរ ផ្អាកលេងទឹកសមុទ្រនៅឆ្នេរសមុទ្រជាច្រើនកន្លែងក្នុងរដ្ឋផ្លរីដា រដ្ឋម៉េន និងរដ្ឋហាវ៉ៃ ព្រមទាំងបិទឆ្នេរសមុទ្រមួយចំនួនបណ្តោះអាសន្ន ក្រោយពីទឹកសមុទ្រលាយឡំជាមួយមេរោគហួសកម្រិត និងបារម្ភពីការហែលទឹកសមុទ្រកខ្វក់អាចធ្វើឱ្យពលរដ្ឋប្រឈមផលប៉ះពាល់សុខភាព ។

អាមេរិកតែងតែបិទឆ្នេរសមុទ្រពេលត្រួតពិនិត្យឃើញមេរោគមួយចំនួន ដូចជា ៖ មេរោគ E. Coli និង Enterococcus ក្នុងបរិមាណខ្ពស់ ដែលបណ្តាលឱ្យមានបញ្ហាក្នុងក្រពះពោះវៀន ដូចជា ៖ រាគរូស ក្អួតចង្អោរ ជំងឺផ្លូវដង្ហើម និងឆ្លងមេរោគក្នុងដំបៅ ។ កុមារ មនុស្សចាស់ និងអ្នកមានប្រព័ន្ធការពាររាងកាយខ្សោយ គឺកាន់តែប្រឈមនឹងការឆ្លងមេរោគខ្លាំងជាងមនុស្សទូទៅ ។

នេះមិនមែនជាលើកទី១ទេ ដែលទឹកសមុទ្រនៅអាមេរិកលាយឡំជាមួយមេរោគ ដែលបញ្ហានេះបានកើតឡើងយូរមកហើយដោយសារកត្តាមួយចំនួន រួមមាន ៖

-រោងចក្រកម្ចាត់ទឹកស្អុយជាច្រើនកន្លែងពុំទទួលបានការថែទាំត្រឹមត្រូវ ឬធ្លាយបំពង់បង្ហូរទឹកស្អុយពីទីក្រុង
-បញ្ហាប្រព័ន្ធបង្ហូរទឹក និងកាកសំណល់ពីទូកភ្ញៀវទេសចរ
-ទឹកភ្លៀងហូរលាយឡំជាមួយទឹកស្អុយក្នុងទីក្រុង ឬកាកសំណល់ក្នុងកសិដ្ឋានចិញ្ចឹមសត្វហូរចូលសមុទ្រ និង
-គ្រោះធម្មជាតិកាន់តែញឹកញាប់ និងធ្ងន់ធ្ងរធ្វើឱ្យខូចខាតប្រព័ន្ធបង្ហូរលូ ។

បញ្ហាទឹកសមុទ្រលាយលាមកធ្វើឱ្យអាជ្ញាធរអាមេរិកបង្កើនការត្រួតពិនិត្យគុណភាពទឹកសមុទ្រជានិច្ច ជាពិសេស ក្រោយមានគ្រោះធម្មជាតិកើតឡើង និងរដូវក្តៅដែលមានភ្ញៀវទេសចរច្រើន ។ ក្រៅពីនេះ នឹងមានសេចក្តីប្រកាសឱ្យអាជ្ញាធរក្នុងតំបន់បិទឆ្នេរសមុទ្រជាបន្ទាន់ បើរកឃើញទឹកសមុទ្រលាយលាមកក្នុងកម្រិតគ្រោះថ្នាក់ ។

បើទោះជាមានការហាមឃាត់ចុះលេងទឹកសមុទ្រក្តី ប៉ុន្តែពលរដ្ឋអាមេរិក និងភ្ញៀវទេសចរមួយចំនួនធំនៅតែចុះលេងទឹកសមុទ្រធម្មតា ដោយសារពួកគេជឿថា ខ្សែទឹកតាមធម្មជាតិរបស់មហាសមុទ្រនឹងអាចកាត់បន្ថយគ្រោះថ្នាក់ដោយសារមេរោគក្នុងទឹក ៕

តូក្យូ៖ ក្រុមហ៊ុនផលិតបង្គន់ដ៏ល្បី ឈ្មោះ TOTO នៃប្រទេសជប៉ុន បានបើកដំណើរការសេវាកម្មថ្មីមួយ កាលពីខែសីហា​ ថ្មីៗនេះ ដែលជំនួសឲ្យការឈររង់ជាយូរៗ ទម្រាំបានចូលបន្ទប់ទឹក គឺអនុញ្ញាតឲ្យអ្នកប្រើប្រាស់ អាចស្កែន QR code តាមទូរស័ព្ទដៃ ដើម្បីស្វែងរកទីតាំងបន្ទប់ទឹកសាធារណៈ និងងាចពិនិត្យមើលថាតើមានមនុស្សចូលច្រើនឬអត់ទៀតផង។

ជប៉ុនក៏ដូចជាប្រទេសផ្សេងៗជាច្រើនទៀតដែរ ដែលមានបញ្ហាតម្រង់ជួរនៅខាងក្រៅបន្ទប់ទឹកសាធារណៈ ដើម្បីបានប្រើប្រាស់បង្គន់ ជាពិសេសសម្រាប់ស្ត្រី នៅតាមស្ថានីយរថភ្លើង និងកន្លែងសាធារណៈជាច្រើនទៀត។

បន្ថែមលើនេះ សេវាកម្មថ្មីៗរបស់ក្រុមហ៊ុន TOTO ដែលល្បីដោយសារមានបង្គន់បាញ់ទឹកស្វ័យប្រវិត្ត និងមានតន្ត្រីកំដរអារម្មណ៍នៅក្នុងបង្គន់ ដែលអាចភ្ជាប់ទៅនឹងប្រព័ន្ធគ្រប់គ្រងបង្គន់តាមអ៊ីនធឺណិត។ ប្រព័ន្ធនេះអាចជូនដំណឹងស្វ័យប្រវត្តិទៅកាន់បុគ្គលិកថែទាំ នៅពេលបង្គន់មានភាពកខ្វក់ ឬត្រូវបានប្រើប្រាស់យូរពេក។

លោក Tasuku Miyazaki អ្នកនាំពាក្យក្រុមហ៊ុន TOTO បានប្រាប់សារព័ត៌មាន AFP ថា ក្នុងបង្គន់ក៏មានដាក់ QR code ផងដែរ ដែលអាចអោយអ្នកប្រើប្រាស់រាយការណ៍បញ្ហាដូចជា មិនអាចប្រើទឹកបាន ឬឧបករណ៍ខូច។ពិសេសជាងនេះ សេវាកម្មនេះមានបកប្រែជាភាសាជាច្រើន រួមទាំង អង់គ្លេស ចិន និងកូរ៉េផងដែរ ដើម្បីងាយស្រួលសម្រាប់ភ្ញៀវទេសអន្តរជាតិ។

យ៉ាងណាមិញ នៅសិង្ហបុរី និងចិន ក៏មានកម្មវិធីឆ្លាតវៃសម្រាប់ស្វែងរកបន្ទប់ទឹកផងដែរ តែភាគច្រើនការរាយការណ៍ពីអ្នកប្រើប្រាស់ មិនមានទិន្នន័យជាក់លាក់ ដូចជាប្រព័ន្ធថ្មីរបស់ជប៉ុនទេ។ ខណៈនៅអាមេរិក និងអឺរ៉ុប ក៏មានកម្មវិធី toilet locator apps ដែរ ប៉ុន្តែមិនទាន់អាចបង្ហាញភាពមមាញឹកជាក់ស្តែងឡើយ។ នេះបានធ្វើឱ្យប្រទេសជប៉ុនក្លាយជាប្រទេសដំបូងដែលអនុវត្តសេវាកម្មបង្គន់ឆ្លាតវៃជាផ្លូវការ និងទូលំទូលាយជាងគេ។

ជាមួយគ្នានេះ រដ្ឋាភិបាលជប៉ុនក៏កំពុងពិចារណាដោះស្រាយបញ្ហាជួរវែងៗសម្រាប់ស្ត្រីផងដែរ ដោយក្រសួងដឹកជញ្ជូនកំពុងស្នើសុំថវិកាបន្ថែមសម្រាប់ឆ្នាំហិរញ្ញវត្ថុក្រោយ ដើម្បីដំឡើងអេក្រង់ឌីជីថល និងជញ្ជាំងបង្គន់ចល័ត ដែលអាចបន្ថែមចំនួនបង្គន់សម្រាប់ស្ត្រី តាមការរាយការណ៍របស់សារព័ត៌មានក្នុងស្រុក៕

រាជធានីភ្នំពេញ៖ ឯកឧត្តម António Guterres អគ្គលេខាធិការអង្គការសហប្រជាជាតិបានបញ្ជាក់ថា បច្ចុប្បន្នលោកកំពុងតាមដានស្ថានការណ៍ជម្លោះព្រំដែនរវាងកម្ពុជានិងថៃ ដោយជំរុញឲ្យភាគីទាំងពីរបញ្ជៀសការប្រើប្រាស់កម្លាំងយោធាដាក់គ្នា ដើម្បីដោះស្រាយវិវាទតាមយន្តការព្រំដែនតាមច្បាប់ដែលមានស្រាប់។ នេះបើតាមការឲ្យដឹងរបស់សម្ដេចបវរធិបតី ហ៊ុន ម៉ាណែត។

នៅថ្ងៃទី០១ ខែកញ្ញា ឆ្នាំ២០២៥ សម្ដេចបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា បានសរសេនៅលើទំព័រហ្វេសប៊ុករបស់លោកថា៖ នៅក្នុងជំនួបរវាងសម្ដេច និងឯកឧត្តមអគ្គ António Guterres លេខាធិការអង្គការសហប្រជាជាតិ ឯកឧត្តមបានបញ្ជាក់ថា ឯកឧត្តមផ្ទាល់ បាននិងកំពុងតាមដានយ៉ាងយកចិត្តទុកដាក់បញ្ហាទំនាស់ព្រំដែនរវាងកម្ពុជានិងថៃ។ ឯកឧត្តម បានសម្តែងការស្វាគមន៍ចំពោះបទឈប់បាញ់រវាងកងទ័ពកម្ពុជានិងថៃ និងបន្តជំរុញអោយស្ថានការអាចវិលត្រលប់ទៅរកប្រក្រតីភាពនាពេលឆាប់ៗខាងមុខនៃទំនាក់ទំនងរវាងប្រទេសទាំងពីរ។

ជាមួយគ្នានេះ ឯកឧត្តមក៏បានទទួលយកសំណើ ក្នុងការជំរុញអោយភាគីទាំងពីរជៀសវាងការប្រើប្រាស់កម្លាំងយោធាដើម្បីដោះស្រាយបញ្ហាព្រំដែនដែលមិនទាន់ដាច់ស្រេច ជាពិសេសនៅតំបន់ដែលមានប្រជាពលរដ្ឋរស់នៅ។

ឯកឧត្តម António បានអំពាវនាវឲ្យភាគីទាំងពីរដោះស្រាយបញ្ហាព្រំដែន ដោយសន្តិវិធី តាមរយៈការប្រើប្រាស់យន្តការព្រំដែនដែលមានស្រាប់ (គឺគណៈកម្មការចម្រុះព្រំដែនកម្ពុជា-ថៃ JBC) ដោយផ្អែកលើមូលដ្ឋាននៃកិច្ចព្រមព្រៀងរវាងកម្ពុជានិងថៃដែលមានជាធរមាន សន្ធិសញ្ញាពាក់ព័ន្ធ និងច្បាប់អន្តរជាតិ។

គួរជម្រាបថា ជំនួបពិភាក្សាការងាររវាង ឯកឧត្តម António និង សម្ដេចធិបតី ត្រូវបានធ្វើឡើងនៅឯទីក្រុងធានជីង សាធារណរដ្ឋប្រជាមានិតចិន នាឱកាសចូលរួមកិច្ចប្រជុំកំពូល នៃអង្គការសហប្រតិបត្តិការសៀងហៃ បូក ពីថ្ងៃទី៣០ ខែសីហា ដល់ថ្ងៃទី០១ ខែកញ្ញា ឆ្នាំ២០២៥ ៕

ប្រទេសថៃ ៖ កាលពីថ្ងៃទី៣១ ខែសីហា ឆ្នាំ២០២៥ សារព័ត៌មាន Thairath រាយការណ៍ថា លោក ភូមិថាំ វីឆាយ៉ាឆៃ នាយករដ្ឋមន្ត្រីស្តីទីបានចុះហត្ថលេខាអនុញ្ញាតឱ្យមជ្ឈមណ្ឌលគ្រប់គ្រងស្ថានការណ៍ព្រំដែនកម្ពុជា-ថៃដំណើរការបន្តទៀតដើម្បីដោះស្រាយជម្លោះព្រំដែន ប្រសិនបើស្ថានការណ៍ព្រំដែនត្រឡប់មកប្រក្រតីវិញ មជ្ឈមណ្ឌលនេះត្រូវរាយការណ៍មកកាន់រដ្ឋាភិបាលឱ្យបានជ្រាបដើម្បីរដ្ឋាភិបាលបិទមជ្ឈមណ្ឌល ។

កន្លងមក រដ្ឋាភិបាលថៃបានប្រកាសបិទមជ្ឈមណ្ឌលគ្រប់គ្រងស្ថានការណ៍ព្រំដែនកម្ពុជា-ថៃ ដើម្បីបង្ហាញថា ថៃចង់បានសន្តិភាព និងបញ្ចប់ជម្លោះព្រំដែនជាមួយកម្ពុជាឆាប់ៗ ប៉ុន្តែដោយសារកងទ័ពថៃប្រឌិតរឿងកងទ័ពជាន់មីនជាបន្តបន្ទាប់នៅតំបន់ព្រំដែន និងចោទប្រកាន់កម្ពុជាបង្កប់មីនថ្មី ទើបរដ្ឋាភិបាលថៃសម្រេចចិត្តដំណើរការមជ្ឈមណ្ឌលនេះបន្តទៀត រហូតដល់ស្ថានការណ៍ត្រឡប់មកប្រក្រតីវិញ ។

លោក ភូមិថាំ វីឆាយ៉ាឆៃ នាយករដ្ឋមន្ត្រីស្តីទីបានចុះហត្ថលេខាកាលពីថ្ងៃទី៣១ ខែសីហា អនុញ្ញាតឱ្យមជ្ឈមណ្ឌលគ្រប់គ្រងស្ថានការណ៍ព្រំដែនកម្ពុជា-ថៃដំណើរការបន្តទៀត ដើម្បីបំពេញការងារពាក់ព័ន្ធនឹងស្ថានការណ៍ព្រំដែន និងដោះស្រាយបញ្ហាតានតឹងដែលកើតឡើងតាមបណ្តោយព្រំដែនជាមួយកម្ពុជាក្នុងនាមប្រទេសជាមិត្ត ដោយ ប្រទេសទាំងពីរនឹងស្វែងរកសន្តិភាពតាមយន្តការទ្វេភាគី គោរពគ្នាទៅវិញទៅមក ការពារអធិបតេយ្យ និងផ្សព្វផ្សាយព័ត៌មានត្រឹមត្រូវ ។ រីឯលោក ណាត់ថាផុង ណាកផានិច អនុរដ្ឋមន្ត្រីក្រសួងការពារជាតិ គឺជានាយកមជ្ឈមណ្ឌល ។

មជ្ឈមណ្ឌលនេះមានតួនាទី និងអំណាច ដូចជា ៖ តាមដាន ត្រួតពិនិត្យ វាយតម្លៃស្ថានការណ៍ព្រំដែនកម្ពុជា-ថៃ រាយការណ៍ពីលទ្ធផលអនុវត្តការងារ និងគ្រប់គ្រងស្ថានការណ៍ព្រំដែនទៅកាន់ក្រុមប្រឹក្សាសន្តិសុខជាតិ, នាយករដ្ឋមន្ត្រី ឬគណៈរដ្ឋមន្ត្រី ដើម្បីឱ្យថ្នាក់លើជ្រាប ។ មជ្ឈមណ្ឌលនឹងដោះស្រាយស្ថានការណ៍តានតឹងដែលកើតឡើងដើម្បីឱ្យស្ថានការណ៍ត្រឡប់មកប្រក្រតីវិញ ដោយកម្ពុជា-ថៃប្រកាន់យកការគោរពឯករាជ្យ និងអធិបតេយ្យទៅវិញទៅមក ហើយថៃពុំចង់ឱ្យមានការអន្តរាគមន៍ពីប្រទេសផ្សេង ឬអង្គការអន្តរជាតិ ។

នៅពេលស្ថានការណ៍ព្រំដែនកម្ពុជា-ថៃត្រឡប់មកប្រក្រតីវិញ នាយកមជ្ឈមណ្ឌល (គឺលោក ណាត់ថាផុង ណាកផានិច អនុរដ្ឋមន្ត្រីក្រសួងការពារជាតិ) ត្រូវជូនដំណឹងទៅកាន់រដ្ឋាភិបាលឱ្យបានជ្រាប ដើម្បីរដ្ឋាភិបាលបិទមជ្ឈមណ្ឌលនេះ ។

គួរបញ្ជាក់ថា លោក ភូមិថាំ វីឆាយ៉ាឆៃ បានចូលរួមប្រជុំក្រុមប្រឹក្សាសន្តិសុខជាតិ ចាប់ពីថ្ងៃទី១៣-១៤ ខែសីហា កន្លងមក ដើម្បីពិចារណាបិទមជ្ឈមណ្ឌលគ្រប់គ្រងស្ថានការណ៍ព្រំដែនកម្ពុជា-ថៃ ដោយសារមើលឃើញស្ថានការណ៍ស្ងប់ស្ងាត់ និងមានតែការផ្សព្វផ្សាយព័ត៌មានក្លែងក្លាយប៉ុណ្ណោះនៅប្រទេសថៃ ក្នុងគោលបំណងបង្កើតភាពវឹកវរពាក់ព័ន្ធនឹងស្ថានការណ៍ព្រំដែន ។

គោលបំណងនៃការបង្កើតមជ្ឈមណ្ឌលនេះ គឺផ្សព្វផ្សាយព័ត៌មានពីជម្លោះព្រំដែនទៅកាន់ពលរដ្ឋ ដែលមជ្ឈមណ្ឌលស្ថិតក្រោមការគ្រប់គ្រងរបស់លោក ណាត់ថាផុង ណាកផានិច អនុរដ្ឋមន្ត្រីក្រសួងការពារជាតិ ។ មជ្ឈមណ្ឌលធ្វើការងារផ្តោតសំខាន់លើផលប្រយោជន៍ខ្លាំងបំផុតរបស់ពលរដ្ឋ និងប្រទេសជាតិ ៕

ប្រទេសថៃ ៖ កាលពីថ្ងៃទី៣១ ខែសីហា ឆ្នាំ២០២៥ សារព័ត៌មានថៃ The Better News បានដកស្រង់សម្តីរបស់អ្នកនាំពាក្យគណបក្សថៃសាងថៃថា ពុំទទួលយកបេក្ខជននាយករដ្ឋមន្ត្រីមកពីគណបក្សភឿថៃ ពីព្រោះគណបក្សភឿថៃអស់សិទ្ធិបង្កើតរដ្ឋាភិបាលស្របច្បាប់ ប្រទេសថៃត្រូវការនាយករដ្ឋមន្ត្រីថ្មីមកពីគណបក្សផ្សេងដើម្បីដោះស្រាយបញ្ហាសន្តិសុខ និងសេដ្ឋកិច្ច ។ រីឯអតីតសមាជិកសភាតំណាងរាស្ត្ររបស់គណបក្សកាវក្លៃ ប្រកាសពុំទទួលយកបេក្ខជនគណបក្សភឿថៃដាច់ខាត ពីព្រោះធ្លាប់ក្រឡាស់សម្តីជាមួយគណបក្សកាវក្លៃកន្លងមក ។

លោក ប៉ារិយ៉ត អាំងគូនគិទិ អ្នកនាំពាក្យគណបក្សថៃសាងថៃ បាននិយាយកាលពីថ្ងៃទី៣១ ខែសីហា អំពីតុលាការធម្មនុញ្ញដកតំណែងលោកស្រី ផេថងថាន ស៊ីណាវ៉ាត់ ជាកូនស្រីរបស់លោក ថាក់ស៊ីន ស៊ីណាវ៉ាត្រា អតីតនាយករដ្ឋមន្ត្រីថៃ ដោយសារលោកស្រីខុសក្រមសីលធម៌រដ្ឋមន្មនុញ្ញថៃក្នុងសារសំឡេងបែកធ្លាយជាមួយសម្តេចតេជោ ហ៊ុន សែន ប្រធានព្រឹទ្ធសភាកម្ពុជា ។ នេះបង្ហាញយ៉ាងច្បាស់ថា គណបក្សភឿថៃអស់សិទ្ធិបង្កើតរដ្ឋាភិបាលដោយស្របច្បាប់ទៀតហើយ ។

អ្នកនាំពាក្យគណបក្សថៃសាងថៃបញ្ជាក់ថា សន្តិសុខជាបញ្ហាប្រឈមដ៏ធំរបស់ថៃនាពេលនេះ ហើយពេលនាយករដ្ឋមន្ត្រីមកពីគណបក្សភឿថៃធ្លាក់ពីតំណែងដោយសារអសមត្ថភាពដឹកនាំប្រទេស គឺគណបក្សភឿថៃពុំអាចបង្កើតរដ្ឋាភិបាលដឹកនាំប្រទេសឱ្យឆ្លងផុតពីវិបត្តិឡើយ ។ ប្រទេសថៃត្រូវការនាយករដ្ឋមន្ត្រីថ្មី រដ្ឋាភិបាលថ្មី ដើម្បីដោះស្រាយបញ្ហាសន្តិសុខ ស្តារសេដ្ឋកិច្ច និងជំរុញជីវភាពពលរដ្ឋ ខណៈគណបក្សថៃសាងថៃបានស្នើដំណោះស្រាយដើម្បីឱ្យថៃបន្តដំណើរឆ្ពោះទៅមុខដោយស្ថិរភាព ។

លោក ប៉ារិយ៉ត អាំងគូនគិទិ ក៏បានដាស់តឿនទៅកាន់អ្នកនយោបាយគ្រប់គណបក្សថា ត្រូវតែគិតពីផលប្រយោជន៍ជាតិ កុំគិតតែចង់បានតំណែងនាយករដ្ឋមន្ត្រីមុនការរំលាយសភា ពីព្រោះបើខ្វះភាពស្មោះត្រង់ និងពុំធ្វើអ្វីដើម្បីពលរដ្ឋ គឺពលរដ្ឋនឹងពុំអភ័យទោសឱ្យអ្នកនយោបាយទេ ។

ដូចគ្នានេះ អ្នកស្រី អាំម៉ារ៉ាត ឈូកប៉ាមីតគូន អតីតសមាជិកសភាតំណាងរាស្ត្ររបស់គណបក្សកាវក្លៃ បានសរសេរក្នុងហ្វេសប៊ុកឈ្មោះ «Amarat Chokepamitkul» ថា ពុំឯកភាពឱ្យគណបក្សភឿថៃបង្កើតរដ្ឋាភិបាល និងពុំទទួលយកបេក្ខជននាយករដ្ឋមន្ត្រីមកពីគណបក្សភឿថៃដាច់ខាត ពីព្រោះគណបក្សនេះធ្លាប់ក្រឡាស់សម្តីជាមួយគណបក្សកាវក្លៃកន្លងមក ។

អ្នកស្រីបញ្ជាក់ថា គណបក្សភឿថៃធ្លាប់បំផ្លាញកិច្ចព្រមព្រៀង MOU ជាមួយគណបក្សកាវក្លៃដោយឥតអៀនខ្មាស់ ដែលបន្សល់នូវការឈឺចាប់រហូតដល់បច្ចុប្បន្ន និងបំផ្លាញឱកាសពលរដ្ឋថៃដែលប្រើប្រាស់សិទ្ធិក្នុងការបោះឆ្នោតរំពឹងចង់ផ្លាស់ប្តូរនយោបាយ បែរជាគណបក្សភឿថៃក្បត់ឆន្ទៈពលរដ្ឋ ។ លើសពីនេះ គណបក្សភឿថៃតែងតែវាយប្រហារគណបក្សប្រជាជនជាបន្តបន្ទាប់ និងពុំចាត់ទុកគណបក្សប្រជាជនជាបងប្អូន ។

លោកស្រីបានជំរុញឱ្យគណបក្សនយោបាយផ្សេងបង្កើតរដ្ឋាភិបាល ទើបអាចដោះស្រាយជម្លោះព្រំដែនជាមួយប្រទេសជិតខាង ពីព្រោះរដ្ឋាភិបាលគណបក្សភឿថៃពុំអាចដោះស្រាយជម្លោះព្រំដែន និងកាន់តែធ្វើឱ្យស្ថានការណ៍នេះអូសបន្លាយ ។ ភឿថៃ ពុំមែនជាគណបក្សនយោបាយទេ ភឿថៃគ្រាន់តែជាក្រុមហ៊ុនប៉ុណ្ណោះ ដែលសមាជិកគ្រប់រូប គឺជាបុគ្គលិករបស់លោក ថាក់ស៊ីន ។

គួរបញ្ជាក់ថា គណបក្សភឿថៃបានសុំឱ្យគណបក្សប្រជាជន (គណបក្សប្រឆាំង) ជួយគាំទ្របេក្ខជនរបស់ខ្លួន លោក ឆ័យក្សេម និទិសិរិ ធ្វើជានាយករដ្ឋមន្ត្រីថ្មី និងសន្យាទទួលយកសំណើទាំង៣ចំណុចរបស់គណបក្សប្រជាជន ប៉ុន្តែគណបក្សប្រជាជនពុំទាន់ឆ្លើយតបយ៉ាងណាទេ ។ មានសេចក្តីរាយការណ៍ថា កាលពីថ្ងៃទី៣១ ខែសីហា លោក ថាក់ស៊ីន បានខ្នះខ្នែងជជែកជាមួយអ្នកនយោបាយផ្សេងទៀតដើម្បីសុំសំឡេងគាំទ្រគណបក្សភឿថៃបង្កើតរដ្ឋាភិបាល ៕

ប្រទេសថៃ ៖ តាមការផ្សព្វផ្សាយរបស់សារព័ត៌មានថៃ កាលពីថ្ងៃទី៣១ ខែសីហា ឆ្នាំ២០២៥ ឱ្យដឹងថា ខេត្តពេជ្រឆាប៊ូនរបស់ថៃកំពុងតែលិចទឹកជំនន់ធ្ងន់ធ្ងរបំផុតក្នុងរយៈពេល៥ឆ្នាំ ដោយសាររងឥទ្ធិពលខ្យល់ព្យុះត្រូនិកណងហ្វា ។ ភ្លៀងបានធ្លាក់យ៉ាងខ្លាំងជាប់ៗគ្នា និងទឹកហូរពីតំបន់ព្រៃភ្នំបណ្តាលឱ្យលិចលង់ស្រុកចំនួន៣ រួមមាន ៖ ស្រុកឡុមកៅ ស្រុកណាមណាវ និងស្រុកឡុមឡាក់ ។

ក្នុងចំណោមស្រុកទាំង៣ គឺទឹកជំនន់បានលិចស្រុកឡុមកៅ ខ្លាំងជាងគេ ក្នុងនោះឃុំចំនួន២ ដែលមានពលរដ្ឋរស់នៅជាង៥០០គ្រួសារ បានរងផលប៉ះពាល់ដោយសារទឹកជំនន់ គឺកម្រិតទឹកជំនន់ជាមធ្យម ចាប់ពី៥០សង់ទីម៉ែត្រ ទៅ៨០សង់ទីម៉ែត្រ ។ ហេតុនេះ ធ្វើឱ្យផ្ទះពលរដ្ឋជាច្រើនខ្នងលិចក្នុងទឹក ខណៈហេដ្ឋារចនាសម្ព័ន្ធសំខាន់ៗខូចខាតធ្ងន់ធ្ងរ ផ្លូវធំៗ និងស្ពាន ត្រូវបានទឹកហូរកាត់ផ្តាច់ពុំអាចឱ្យពលរដ្ឋធ្វើដំណើរឆ្លងកាត់ ។

ចៅហ្វាយស្រុកឡុមកៅ លោក ឆាន់ឆ័យផាកថាគូន បានបញ្ជាឱ្យមន្ត្រីពាក់ព័ន្ធក្នុងតំបន់ និងក្រុមសង្គ្រោះស្ម័គ្រចិត្តសហការគ្នាជួយជម្លៀសពលរដ្ឋ រួមទាំងកុមារ មនុស្សចាស់ និងអ្នកជំងឺចេញពីផ្ទះជាបន្ទាន់ ជាពិសេស ជួយពលរដ្ឋក្នុងទឹកតំបន់មានទឹកជំនន់ខ្លាំង ។

តាមសេចក្តីរាយការណ៍របស់មេឃុំតាកក្លយ លោក ផនសាក់ គុនក្រៀង គឺទឹកជំនន់បានលិចផ្ទះពលរដ្ឋរហូតដល់ជាង២០០ខ្នង ស្ថិតក្នុងភូមិចំនួន៦ បរិមាណទឹកជំនន់លើកនេះច្រើនខ្លាំងណាស់ និងហូរខ្លាំងទៀតផង ។ បើគ្មានភ្លៀងធ្លាក់ជាប់ៗគ្នាទេ ស្ថានការណ៍ទឹកជំនន់អាចធូរស្រាល លោកក៏បានផ្តាំផ្ញើទៅពលរដ្ឋឱ្យត្រៀមខ្លួនទប់ទល់ទឹកជំនន់ ។

របាយការណ៍របស់មជ្ឈមណ្ឌលបង្ការ និងកាត់បន្ថយគ្រោះមហន្តរាយខេត្តពេជ្រឆាប៊ូន គឺភ្លៀងធ្លាក់ខ្លាំងជាច្រើនថ្ងៃធ្វើឱ្យតំបន់ជាច្រើនរងផលប៉ះពាល់ ផ្ទះពលរដ្ឋខូចខាតចំនួន៥២ខ្នង ខណៈភូមិជាច្រើនត្រូវបានទឹកជំនន់ហូរកាត់ផ្តាច់ផ្លូវធ្វើដំណើរ ។ អាជ្ញាធរបានវាយតម្លៃការខូចខាតទ្រព្យសម្បត្តិផ្សេងៗដោយសារទឹកជំនន់ ប៉ុន្តែពុំមានពលរដ្ឋថៃរងរបួស ឬស្លាប់ទេ ។

អភិបាលខេត្តពេជ្រឆាប៊ូន លោក សារ៉ាន់យូ មីថងខាំ បានបញ្ជាឱ្យមន្ត្រីពាក់ព័ន្ធ រួមទាំងក្រុមសង្គ្រោះស្ម័គ្រចិត្ត ប្រមូលកម្លាំង និងប្រើប្រាស់ឧបករណ៍ជួយសង្គ្រោះពលរដ្ឋទាំងយប់ ទាំងថ្ងៃ ។ ក្រៅពីនេះ ត្រូវប្រុងប្រយ័ត្នស្ថានការណ៍ទឹកជំនន់ និងជូនដំណឹងទៅពលរដ្ឋជាបន្តបន្ទាប់ រហូតដល់ទឹកជំនន់ស្រកចុះ ៕