សហរដ្ឋអាមេរិក ៖ នៅថ្ងៃទី២៩ ខែកក្កដា ឆ្នាំ២០២៥ សារព័ត៌មាន BBC រាយការណ៍ថា ប្រធានាធិបតីអាមេរិក លោក Donald Trump បានកំណត់រយៈពេលខ្លីជាងមុនឱ្យរុស្ស៊ីយល់ព្រមបញ្ចប់សង្គ្រាមជាមួយអ៊ុយក្រែន ក្នុងរយៈពេល១០ថ្ងៃ ឬ១២ថ្ងៃ គិតចាប់ពីថ្ងៃទី២៨ ខែកក្កដា ពីព្រោះវាគ្មានមូលហេតុអ្វីដែលរុស្ស៊ីត្រូវរង់ចាំទៀតទេ ។ រុស្ស៊ី និងអ៊ុយក្រែន នៅតែពុំអាចបញ្ចប់សង្គ្រាម ខណៈប្រធានាធិបតីអ៊ុយក្រែន លោក Volodymyr Zelensky ចាត់ទុកការអន្តរាគមន៍របស់អាមេរិកមានសារៈសំខាន់យ៉ាងខ្លាំង ។

កាលពីពាក់កណ្តាលខែកក្កដា ឆ្នាំ២០២៥ លោក Trump ថ្លែងថា ប្រធានាធិបតីរុស្ស៊ី លោក Vladimir Putin មានរយៈពេល៥០ថ្ងៃក្នុងការបញ្ចប់សង្គ្រាម បើពុំដូច្នោះទេ រុស្ស៊ីនឹងប្រឈមជាមួយវិធានការពន្ធធ្ងន់ធ្ងរ ។ នៅប្រទេសស្កុតឡេន លោក Trump បានបញ្ជាក់ពីការកំណត់ពេលវេលាជាថ្មី ប៉ុន្តែលោកថ្លែងពីការដាក់ទណ្ឌកម្ម និងកំណត់ពន្ធជាមួយរុស្ស៊ី ។

លោក Trump នឹងដំឡើងពន្ធទំនិញខ្ពស់រហូតដល់១០០% សម្រាប់ប្រទេសណាធ្វើពាណិជ្ជកម្មជាមួយរុស្ស៊ី ។ ការដំឡើងពន្ធនឹងធ្វើឱ្យទំនិញឡើងថ្លៃរហូតដល់អាជីវកម្មនៅអាមេរិកងាកមកទិញទំនិញប្រទេសផ្សេងៗដែលមានតម្លៃថោកជាង ហើយធ្វើឱ្យរុស្ស៊ី និងដៃគូពាណិជ្ជកម្មបាត់បង់ចំណូល ។

ចំណែកប្រធានាធិបតីអ៊ុយក្រែន លោក Volodymyr Zelensky បានអរគុណលោក Trump ចំពោះការដាក់សម្ពាធលើរុស្ស៊ី ដោយលោកសរសេរក្នុងបណ្តាញសង្គម X ថា «ដល់ពេលល្មម» ។ លោកក៏បានសរសើរពីគោលជំហរច្បាស់លាស់ និងការតាំងចិត្តរបស់ប្រធានាធិបតីអាមេរិកក្នុងការជួយជីវិតមនុស្ស និងបញ្ចប់សង្គ្រាមដ៏អាក្រក់នេះ ។

ក្រោយកិច្ចប្រជុំជាមួយនាយករដ្ឋមន្ត្រីអង់គ្លេស លោក Keir Starmer នៅប្រទេសស្កុតឡេន លោក Trump បានបង្ហាញការមិនពេញចិត្តម្តងទៀតចំពោះទង្វើរបស់លោក Putin នៅអ៊ុយក្រែន ។ លោកនិយាយពីភាពខុសគ្នារបស់ប្រធានាធិបតីរុស្ស៊ីពេលសន្ទនាផ្ទាល់ និងការបាញ់មីស៊ីលរបស់រុស្ស៊ីទៅកាន់ទីក្រុងនានារបស់អ៊ុយក្រែនស្ទើររាល់យប់ ។

លោក Trump ពុំចាប់អារម្មណ៍ការចរចាទៀតទេ ដោយសាររុស្ស៊ីពុំឆ្លើយតបនឹងពេលវេលាបញ្ចប់សង្គ្រាម ។ កន្លងមក អាមេរិកបានកំណត់រយៈពេល៥០ថ្ងៃដើម្បីឱ្យរុស្ស៊ីបញ្ចប់សង្គ្រាម ប៉ុន្តែអ្នកនាំពាក្យរដ្ឋាភិបាលរុស្ស៊ីថា រុស្ស៊ីត្រូវការពេលវេលាពិចារណា ។ បើតាមសមាជិកសភារុស្ស៊ី គឺលោក Trump កំណត់ពេលឱ្យរុស្ស៊ីបញ្ចប់សង្គ្រាមគ្មានប្រសិទ្ធភាពទេ ខណៈរុស្ស៊ីមានអាវុធ និងគោលការណ៍របស់ខ្លួន ៕

សហរដ្ឋអាមេរិក ៖ មុនពេលជួបពិភាក្សាជាមួយនាយករដ្ឋមន្ត្រីអង់គ្លេស លោក Keir Starmer នៅទីក្រុង Turnberry ប្រទេសស្កុតឡេន ប្រធានាធិបតីអាមេរិក លោក Donald Trump បានថ្លែងពីកម្ពុជា-ថៃសម្រេចកិច្ចព្រមព្រៀងឈប់បា.ញ់បន្ទាន់ដោយឥតលក្ខខណ្ឌនៅម៉ាឡេស៊ីក្នុងឋានៈជាប្រធានអាស៊ានថា អាមេរិកបានបង្កើតសន្តិភាពជំរុញឱ្យមានកិច្ចព្រមព្រៀងឈប់បា.ញ់រវាងកម្ពុជា-ថៃ វាជាសន្តិភាព ពីព្រោះរឿងនេះអាចជាសង្គ្រាមយ៉ាងធ្ងន់ធ្ងរ ។ នេះបើតាមការផ្សព្វផ្សាយរបស់សារព័ត៌មានបរទេសកាលពីថ្ងៃទី២៨ ខែកក្កដា ឆ្នាំ២០២៥ ។

ប្រធានាធិបតីអាមេរិក លោក Trump ថ្លែងបន្តថា ៖ «សង្គ្រាមលើកនេះអាចអូសបន្លាយរយៈពេលជាច្រើនឆ្នាំ និងអាចមានមនុស្សស្លាប់បាត់បង់ជីវិតរាប់លាននាក់ ប៉ុន្តែយើងបានបញ្ឈប់សង្គ្រាម ហើយយើងរីករាយខ្លាំងណាស់ដែលប្រទេសទាំងពីរមានសន្តិភាព» ។

លោក Trump បានជជែកតាមទូរស័ព្ទជាមួយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងលោក ភូមិថាំ វីឆាយ៉ាឆៃ នាយករដ្ឋមន្ត្រីស្តីទីថៃ កាលពីថ្ងៃទី២៦ ខែកក្កដា ថា អាមេរិកពុំអាចរចាពាណិជ្ជកម្មជាមួយកម្ពុជា-ថៃបានទេ ប្រសិនបើប្រទេសទាំងពីរនៅតែធ្វើសង្គ្រាមជាមួយគ្នាបែបនេះ ។

កាលពីថ្ងៃទី២៨ ខែកក្កដា លោក Trump បានហៅខ្លួនលោកជាប្រធានាធិបតីសន្តិភាព (President of Peace) ហើយលោកសរសេរក្នុងបណ្តាញសង្គមថា លោកជំរុញឱ្យកម្ពុជា-ថៃសម្រេចកិច្ចព្រមព្រៀងឈប់បាញ់បន្ទាន់ដោយឥតលក្ខខណ្ឌ ហើយរយៈពេល៦ខែនេះ លោកបានបញ្ឈប់សង្គ្រាមជាច្រើនលើក ។

លោក Trump សរសេរក្នុងបណ្តាញសង្គម TruthSocial ថា ៖ «ខ្ញុំទើបតែបានជជែកជាមួយនាយករដ្ឋមន្ត្រីកម្ពុជា និងនាយករដ្ឋមន្ត្រីស្តីទីថៃ ហើយខ្ញុំមានអារម្មណ៍រីករាយដែលមានការប្រកាសថា ក្រោមគំនិតផ្តួចផ្តើមរបស់ខ្ញុំធ្វើឱ្យប្រទេសទាំងពីរបសម្រេចកិច្ចព្រមព្រៀងឈប់បាញ់បន្ទាន់ និងទទួលបានសន្តិភាព ។ ខ្ញុំសូមបង្ហាញក្តីរីករាយទៅកាន់ប្រទេសទាំងពីរផង» ។

ការបញ្ឈប់សង្គ្រាមលើកនេះបានជួយជីវិតមនុស្សរាប់ពាន់នាក់ ហើយខ្ញុំបានបញ្ជាឱ្យក្រុមការងារចរចាពាណិជ្ជកម្មរបស់ខ្ញុំចាប់ផ្តើមការចរចាម្តងទៀត ។ រយៈពេលត្រឹមតែ៦ខែ ខ្ញុំបានបញ្ឈប់សង្គ្រាមជាច្រើនលើក ខ្ញុំមានមោទនភាពដែលបានធ្វើជានាយករដ្ឋមន្ត្រីសន្តិភាព ៕

ប្រទេសបារាំង ៖ កាលពីថ្ងៃទី២៨ ខែកក្កដា ឆ្នាំ២០២៥ រដ្ឋមន្ត្រីក្រសួងការបរទេសអាមេរិក លោក Marco Rubio បានសរសើរ និងរីករាយចំពោះកម្ពុជា-ថៃសម្រេចកិច្ចព្រមព្រៀងឈប់បា.ញ់បន្ទាន់ដោយឥតលក្ខខណ្ឌ ហើយអាមេរិកក៏សូមអរគុណដល់ប្រទេសម៉ាឡេស៊ីផងដែរ ដែលបានធ្វើជាម្ចាស់ផ្ទះក្នុងជំនួបចរចារបស់នាយករដ្ឋមន្ត្រីកម្ពុជា-ថៃ ។ អាមេរិកសង្ឃឹមថា ប្រទេសទាំងពីរនឹងអនុវត្តតាមកិច្ចព្រមព្រៀងឈប់បា.ញ់បន្ទាន់ដោយឥតលក្ខខណ្ឌនេះ ។

រដ្ឋមន្ត្រីក្រសួងការបរទេសអាមេរិក លោក Marco Rubio និយាយថា អាមេរិកសូមសរសើរចំពោះការប្រកាសឈប់បាញ់រវាងប្រទេសកម្ពុជា និងថៃ នៅថ្ងៃទី២៨ ខែកក្កដា នៅទីក្រុងកូឡាឡាំពួរ ប្រទេសម៉ាឡេស៊ី ។ ប្រធានាធិបតីអាមេរិក លោក Donald Trump និងខ្លួនលោកបានប្តេជ្ញាបញ្ចប់អំពើហិង្សាភ្លាមៗ ហើយសង្ឃឹមថា រដ្ឋាភិបាលកម្ពុជា-ថៃ នឹងអនុវត្តតាមកិច្ចព្រមព្រៀងឈប់បាញ់បន្ទាន់ដោយឥតលក្ខខណ្ឌរបស់ខ្លួនដើម្បីបញ្ចប់ជម្លោះ ។

សហរដ្ឋអាមេរិកសូមអរគុណនាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម ក្នុងនាមជាប្រធានអាស៊ាន ដែលបានធ្វើជាម្ចាស់ផ្ទះក្នុងជំនួបចរចាបញ្ចប់ការឈប់បាញ់គ្នា ។ យើងសូមអំពាវនាវឱ្យគ្រប់ភាគីអនុវត្តតាមកិច្ចព្រមព្រៀងរបស់ខ្លួន ហើយអាមេរិកនៅតែប្តេជ្ញាចិត្តបញ្ចប់ជម្លោះនេះ ។

ដោយឡែក នៅថ្ងៃទី២៩ ខែកក្កដា សារព័ត៌មានបរទេសរាយការណ៍ថា ប្រធានាធិបតីបារាំង លោក Emmanuel Macron បានសរសេរក្នុង Instagram ឈ្មោះ «@emmanuelmacron» ដែលមានអ្នកតាមដានប្រមាណ៥លាន២សែននាក់ ជាភាសាខ្មែរ និងភាសាថៃ ក្រោយពីប្រទេសទាំងពីរសម្រេចកិច្ចព្រមព្រៀងឈប់បា.ញ់បន្ទាន់ដោយឥតលក្ខខណ្ឌនៅទីក្រុងកូឡាឡាំពួរ ប្រទេសម៉ាឡេស៊ី ថា «ពេលវេលាមកដល់ហើយដែលត្រូវផ្អាកអាវុធនៅតំបន់ព្រំដែនរវាងកម្ពុជា និងថៃ» ។

ប្រធានាធិបតីបារាំង លោក Emmanuel Macron បានសរសេរក្នុង Instagram ទៀតថា ៖ «នាយករដ្ឋមន្ត្រីទាំងពីរបានបង្ហាញភាពរឹងមាំដោយជួបជាមួយគ្នានៅថ្ងៃនេះ ដើម្បីឱ្យមានការពិភាក្សាសន្តិភាព ។ ខ្ញុំសូមលើកស្ទួយយ៉ាងពេញទំហឹងចំពោះការចរចាកំពុងបន្តនៅម៉ាឡេស៊ី ដែលមានគោលបំណងបញ្ចប់ជាមួយនឹងកិច្ចព្រមព្រៀងឈប់បាញ់យ៉ាងចាំបាច់ដើម្បីដោះស្រាយវិវាទនេះដោយសន្តិវិធី» ៕

សូរិន្ទ៖ ព្រឹកថ្ងៃអង្គារ ទី២៩ កក្កដា កងទ័ពថៃបានចោ.ទប្រកាន់កម្ពុជា ថាបានរំលោ.ភលើបទឈប់បា.ញ់ ដោយនៅតែបន្តសកម្មភាពបា.ញ់បោះដោយអាវុ.ធជាបន្តបន្ទាប់បើទោះបីជាមានកិច្ចព្រមព្រៀងមានគោលបំណងបញ្ចប់ការប្រយុទ្ធបង្ហូរឈាមហើយក៏ដោយ។ នេះបើសារព័ត៌មានអន្តរជាតិ CNA បានចុះផ្សាយ។

ប្រភពខាងលើបានឲ្យដឹងថា បន្ទាប់ពីកិច្ចចរចាសន្តិភាពនៅប្រទេសម៉ាឡេស៊ីកាលពីថ្ងៃចន្ទម្សិលមិញ ភាគីទាំងពីរបានព្រមព្រៀងគ្នាថាបទឈប់បា.ញ់ដោយគ្មានលក្ខខណ្ឌ នឹងចាប់ផ្តើមចូលជាធរមាន«នៅពាក់កណ្តាលអធ្រាត្រដើម្បីបញ្ចប់ការប្រយុទ្ធគ្នាជុំវិញប្រាសាទបុរាណនៅតំបន់ជម្លោះនៅតាមព្រំដែន 800 គីឡូម៉ែត្ររបស់ពួកគេ។

បើតាមអ្នកនាំពាក្យកងទ័ពថៃ លោក Winthai Suwaree បាននិយាយថា “នៅពេលកិច្ចព្រមព្រៀងចូលជាធរមាន ភាគីថៃបានរកឃើញថា កងកម្លាំងកម្ពុជាបានបើកការវា.យប្រហារដោយអាវុធចូលទៅក្នុងតំបន់ជាច្រើនក្នុងទឹកដីថៃ”។ លោកបានបន្ថែមនៅក្នុងសេចក្តីថ្លែងការណ៍មួយថា “កត្តានេះបង្កើតជាការបំពានដោយចេតនានៃកិច្ចព្រមព្រៀង និងការប៉ុនប៉ងច្បាស់លាស់មួយដើម្បីបំផ្លាញទំនុកចិត្តគ្នាទៅវិញទៅមក”។

អ្នកនាំពាក្យកងទ័ពថៃខាងលើនេះបានអះអាងថា «ដូច្នេះថៃត្រូវបានបង្ខំចិត្តឆ្លើយតបដោយសមរម្យ ដោយអនុវត្តសិទ្ធិស្របច្បាប់ក្នុងការការពារខ្លួន»។

ប៉ុន្តែបើតាមពាក្យសំដីរបស់ភ្នាក់ងារសារព័ត៌មាន AFP ម្នាក់ ដែលចាំយកការណ៍នៅក្នុងក្រុងសំរោងខាងទឹកដីកម្ពុជា ដែលមានចម្ងាយប្រមាណ ២០គីឡូម៉ែត្រពីព្រំដែនបាននិយាយថា សំឡេងនៃការបំផ្ទុះបានឈប់ក្នុងរយៈពេល 30នាទី មុនឈានដល់ពេលពាក់កណ្ដាលអាធ្រាត ហើយភាពស្ងប់ស្ងាត់នេះបានបន្តរហូតដល់ពេលទាបភ្លឺ។

គួរជម្រាប់ថា ការចោ.ទប្រកាន់ជាថ្មីពីសំណាក់ភាគីថៃមកលើកម្ពុជានេះ ត្រូវបានធ្វើឡើងបន្ទាប់ពីមានកិច្ចព្រមព្រៀងទទួលយកការឈប់បា.ញ់ជាបន្ទាន់ដោយគ្មានលក្ខខណ្ឌពីសំណាក់ភាគីទាំងពីរ។ លើសពីនេះ នៅព្រឹកថ្ងៃអង្គារ ទី២៩ កក្កដានេះផងដែរ កម្ពុជានិងថៃ ក៏បានឯកភាពរៀបចំឲ្យមានការជួបប្រជុំក្រៅផ្លូវការមួយរវាងមេបញ្ជាការយោធភូមិភាគ១ និងទី២ថៃ ជាមួយយោធភូមិភាគទី៤និងទី៥កម្ពុជា នៅម៉ោង៧:០០នាទីព្រឹក។ ប៉ុន្តែដោយសារមានការចោ.ទប្រកាន់បែបនេះ ការប្រជុំខាងលើក៏ត្រូវបានពន្យាពេលរហូតដល់ម៉ោង ១០ព្រឹក នៅថ្ងៃដដែល៕

ប្រទេសថៃ ៖ កាលពីថ្ងៃទី២៨ ខែកក្កដា ឆ្នាំ២០២៥ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជាបានចរចាពីការបញ្ចប់ឈប់បា.ញ់បន្ទាន់ដោយឥតលក្ខខណ្ឌរវាងកងទ័ពកម្ពុជា និងកងទ័ពថៃ ជាមួយនាយករដ្ឋមន្ត្រីស្តីទីថៃ លោក ភូមិថាំ វីឆាយ៉ាឆៃ នៅប្រទេសម៉ាឡេស៊ី ដោយមានការសម្របសម្រួលពីនាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម ក្រោមគំនិតផ្តួចផ្តើមរបស់ប្រធានាធិបតីអាមេរិក លោក Donald Trump ។

កិច្ចព្រមព្រៀងបញ្ចប់ការឈប់បា.ញ់គ្នាបានចាប់ផ្តើមចូលជាធរមានត្រឹមម៉ោង០០និង០១នាទី ថ្ងៃទី២៩ ខែកក្កដា ដែលបានសង្គ្រោះជីវិតមនុស្សរាប់ពាន់នាក់ពីសង្គ្រាមកម្ពុជា និងថៃ ប៉ុន្តែកងទ័ពថៃបែរជាចោទប្រកាន់ថា កម្ពុជាល្មើសកិច្ចព្រមព្រៀងបញ្ចប់ការឈប់បា.ញ់គ្នានៅម៉ាឡេស៊ី ។

នៅថ្ងៃទី២៩ ខែកក្កដា សារព័ត៌មាននានារបស់ថៃរាយការណ៍ថា កងទ័ពថៃបានចោទប្រកាន់កម្ពុជាពុំព្រមឈប់បា.ញ់ និងល្មើសកិច្ចព្រមព្រៀងបញ្ចប់ការឈប់បា.ញ់គ្នា ហើយចោទប្រកាន់ថា កងទ័ពកម្ពុជាបានផ្ទុះអាវុធនៅភ្នំទ្រព្យ រួមទាំងបើកឆាកបាញ់នៅតំបន់ប្រាសាទតាក្របីម្តងទៀត ។ កងទ័ពថៃថា កម្ពុជាបំផ្លាញទំនុកចិត្ត ខណៈថៃប្រកាន់ខ្ជាប់យ៉ាងម៉ឺងម៉ាត់ ប៉ុន្តែចាំបាច់ត្រូវការពារខ្លួន ។

នាវេលាម៉ោង៧និង៣០នាទី ថ្ងៃទី២៩ ខែកក្កដានេះ នៅទីបញ្ជាការកងទ័ពជើងគោក លោកឧត្តមសេនីយ៍ វីនឆ័យ សុវ៉ារី អ្នកនាំពាក្យកងទ័ពថៃចោទប្រកាន់ថា កម្ពុជាល្មើសកិច្ចព្រមព្រៀងបញ្ចប់ការឈប់បា.ញ់គ្នានៅម៉ាឡេស៊ី ។ វាខុសពីអ្វីដែលរដ្ឋាភិបាលកម្ពុជា-ថៃបានព្រមព្រៀងឈប់បាញ់គ្នានៅតំបន់ព្រំដែនប្រទេសទាំងពីរចូលជាធរមានត្រឹមម៉ោង០០និង០១នាទី ថ្ងៃទី២៩ ខែកក្កដា ដើម្បីបង្កើតសន្តិភាព កាត់បន្ថយភាពតានតឹង និងជំរុញកិច្ចសហការរវាងប្រទេសទាំងពីរ ។

កងទ័ពថៃសូមប្រកាសថា ភាគីថៃនឹងអនុវត្តតាមកិច្ចព្រមព្រៀងបញ្ចប់ការឈប់បាញ់គ្នាយ៉ាងម៉ឺងម៉ាត់នៅតំបន់ព្រំដែនកម្ពុជា-ថៃតាមពេលវេលាកំណត់ ក៏ដូចជាប្រកាន់ខ្ជាប់នូវការប្តេជ្ញាចិត្តរួមគ្នារបស់រដ្ឋាភិបាលកម្ពុជា-ថៃ ។ ប៉ុន្តែកងទ័ពថៃសោកស្តាយយ៉ាងខ្លាំង គឺដល់ពេលវេលាកំណត់ឈប់បាញ់គ្នា ភាគីកម្ពុជាបានប្រើប្រាស់អាវុធវាយប្រហារមកលើតំបន់ជាច្រើនរបស់ថៃ ។ ថៃចាត់តុកថា ជាការល្មើសកិច្ចព្រមព្រៀងបញ្ចប់ការឈប់បាញ់គ្នា ដោយកម្ពុជាមានចេតនាបំផ្លាញទំនុកចិត្តរវាងគ្នា ហើយថៃចាំបាច់ត្រូវអនុវត្តវិធានការក្រោមសិទ្ធិស្របច្បាប់ក្នុងការការពារខ្លួន ។

ចុងក្រោយ លោកឧត្តមសេនីយ៍ វីនឆ័យ សុវ៉ារី អ្នកនាំពាក្យកងទ័ពថៃបញ្ជាក់ថា ជំនួបរវាងថ្នាក់មេបញ្ជាការយោធភូមិភាគកម្ពុជា-ថៃ នឹងពន្យាររហូតដល់ម៉ោង១០ ថ្ងៃទី២៩ ខែកក្កដា ខណៈពេលវេលាកំណត់ដំបូងនៅម៉ោង៧ព្រឹក ៕

បើគិតមកដល់ថ្ងៃទី ២៨​ ​ខែ​កក្កដា ​នេះស្ថានការណ៍នៅតាមព្រំដែនកម្ពុជា-ថៃ នៅមិនទាន់បានធូរស្រាលនៅឡើយទេ ដោយភាគីថៃនៅតែបន្តប្រើប្រាស់អាវុធធន់ធ្ងន់វាយប្រហារមកកាន់កម្ពុជាឥតឈប់ឈរ បើទោះបីជាការចូលតុចរចានៅម៉ាឡេស៊ី នៅថ្ងៃជាមួយគ្នាក៏ដោយ។

ជាមួយគ្នានេះផងដែរ គេឃើញថាមានបងប្អូនប្រជាពលរដ្ឋខ្មែរជាច្រើន មិនបន្ថយដៃនោះឡើយ ក្នុងការពាំនាំយកជំនួយជួយដល់បងៗកងទ័ពជួរមុខ ដែលកំពុងតែតស៊ូយ៉ាងអង់អាចក្លាហានការពារបូរណភាពទឹកដីពីចោរឈ្លានពាន ព្រមទាំងជួយប្រជាជនភៀសសឹករាប់ម៉ឺននាក់នៅជំរំភៀសខ្លួន មិនថាជាថវិកា ស្បៀងអាហារ ថ្នាំសង្កូវ សម្ភារៈចាំបាច់មួយចំនួន និងអ្វីដែលខ្វះមិនបានគឺកម្លាំងចិត្ត។

ដោយឡែក នៅក្នុងស្ថានការណ៍ប្រទេសកំពុងតែជួបទុក្ខបែបនេះ បងប្អូនជនរួមជាតិខ្មែរគ្រប់រូបគូរតែបញ្ឈប់ ឬផ្អាកសកម្មភាពខាងក្រោមនេះសិន ដើម្បីជាការផ្ដល់កម្លាំងចិត្តដល់បងៗកងទ័ពជួរមុខ ក៏ដូចជាទុកជាការចូលរួមកាន់ទុក្ខដល់កងវីរៈជនកម្ពុជាដែលបានពលីជីវិតជូនជាតិមាតុភូមិ ការពារទឹកដីពីការឈ្លានពានយ៉ាងគឃ្លើនរបស់ថៃ:

១.ផ្អាកការជួបជុំផឹកស៉ីសប្បាយទាំងឡាយ: ស្របពេលដែលបងៗកងទ័ពជួរមុខកំពុងតែតស៊ូការពារអធិបតេយ្យភាពទឹកដី ព្រោះវាប្រៀបដូចជាមិនផ្ដល់តម្លៃដល់ការលះបង់របស់វីរៈជនកម្ពុជាឡើយ។

២.ផ្អាកបង្ហាញរូបភាព ឬវីឌីអូពីម្ហូបអាហារសម្បូរហូរហារក្នុងបណ្ដាញសង្គមសិន: មិនហាមឃាត់ទេប្រសិនបងប្អូនបរិភោគឆ្ងាញ់ គេងស្រួល តែក្នុងកាលៈទេសៈនេះ ងាកទៅកាន់បងៗកងទ័ព និងពលរដ្ឋភៀសសឹកវិញ ពួកគាត់ស្ទើរតែគ្មានពេលទទួលទានអាហារឲ្យបានសមរម្យឡើយ ឬមួយចំនួនមិនមានសូម្បីទីជម្រកស្នាក់នៅ​ និងអាហារហូបចុកគ្រប់គ្រាន់ឡើយ។

៣.ផ្អាកការបង្ហាញរូបភាពសើចសប្បាយរីករាយខុសកាលៈទេសៈ ស្របពេលដែលប្រជាជនខ្លះ​ត្រូវបាត់បង់ផ្ទះសម្បែង បាត់បង់សមជិកគ្រួសារ និងខ្វះខាតស្បៀងអាហារ ប៉ុន្តែងាកទៅកាន់បងប្អូនឈាមខ្មែរមួយចំនួន បែរជាមានទឹកមុខរីករាយពោរពេញទៅដោយស្នាមញញឹមទៅវិញ នេះស្ដែងឱ្យឃើញថាដូចជាគ្មានមនុស្សធម៌ក្នុងខ្លួនបន្តិចសោះឡើយ។

យ៉ាងណាមិញ សកម្មភាពខាងលើមិនមែនជាការបំបិទសិទ្ធិក្នុងការប្រើប្រាស់សកម្មភាពប្រចាំថ្ងៃឡើយ គ្រាន់តែជាការក្រើនរំលឹកថា ពេលប្រទេសជាតិជួបការលំបាក ប្រជាជនខ្មែរគួរចេះសាមគ្គីគ្នា ទាំងកម្លាំងកាយ និងកម្លាំងចិត្ត មិនមែនជាពេលដែលត្រូវសប្បាយសារទេនឹងសង្រ្គាមឡើយ។ ម៉្យាងវិញទៀត វាគ្រាន់តែតែជាសកម្មភាពដែរគួរផ្អាកសិន មិនមែនជាការបិទទាំងស្រុងឡើយ ដូច្នេះបងប្អូនអាចបន្តសកម្មភាពទាំងនេះវិញជាធម្មតា នៅពេលណាដែលប្រទេសជាតិមានសុខសន្តិភាពឡើងវិញ៕