ឥណ្ឌូនេសុី ចរចារទិញនាវាដឹកយន្តហោះចម្បាំងពីអុីតាលី

ប្រទេសឥណ្ឌូនេសុី កំពុងចរចារទិញនាវាដឹកយន្តហោះមួយពីប្រទេសអុីតាលី ដើម្បីធ្វើទំនើបកម្មយោធារបស់ខ្លួន និងបង្ហាញសាច់ដុំនៅក្នុងតំបន់អាស៊ាន។

នាវា ដែលឥណ្ឌូនេសុី គ្រោងនឹងទិញនោះមានឈ្មោះថា “Giuseppe Garibaldi” ត្រូវបានអុីតាលី ដាក់ឱ្យប្រើប្រាស់ជាលើកដំបូងនៅឆ្នាំ១៩៨៥។

នាវានេះ មានសមត្ថភាពផ្ទុកយន្តហោះចម្បាំង១៦គ្រឿង ឬក៏ឧទ្ធម្ភាគចក្រ១៨គ្រឿង ដែលបំពាក់មកជាមួយប្រព័ន្ធប្រឆាំងគ្រាប់មីសុីលរយៈចម្ងាយខ្លី និងកាំភ្លើងយន្ត។

បន្ថែមពីនេះ វាក៏បំពាក់មកជាមួយមីសុីលបាញ់ចូលក្រោមទឹក ដែលអាចកម្ទេចនាវាមុជទឹកផងដែរ។

Giuseppe Garibaldi ត្រូវបានអុីតាលីដាក់ឱ្យចូលនិវត្តន៍នៅក្នុងខែតុលា ឆ្នាំ២០២៤។ លុះដល់ឆ្នាំ២០២៥ នាវានេះ ត្រូវបានឥណ្ឌូនេសុីចរចារទិញយកក្នុងតម្លៃប្រមាណជា៣៩០លានដុល្លារ។

គួរបញ្ជាក់ថា ប៉ុន្មានឆ្នាំចុងក្រោយនេះ ឥណ្ឌូនេសុីបានចំណាយថវិការជាច្រើនទៅលើវិស័យយោធា ដោយទើបតែដាក់ពង្រាយនូវប្រព័ន្ធមីស៊ីលប៉ាលីស្ទីកខាន់(KHAN) ដែលមានតែមួយគត់នៅក្នុងតំបន់អាស៊ាន៕