ហានូយ៖ ក្រសួងអប់រំ និងបណ្តុះបណ្តាលវៀតណាម បានដាក់ស្នើសាលារៀនទូទាំងប្រទេសឲ្យចាប់ផ្តើមបង្រៀនភាសាឡាវ ចាប់ពីឆ្នាំ ២០២៦ តទៅ ដើម្បីជាការបន្តអនុវត្តកម្មវិធីបង្រៀនភាសាបរទេសដែលមានរួចទៅហើយ សម្រាប់ភាសាប្រទេសជិតខាង ដូចជា ភាសាខ្មែរ ថៃ និងឥណ្ឌូនេស៊ី ក៏ដូចជាការផ្លាស់ប្ដូរវប្បធម៌ផងដែរ។ នេះបើតាមសារព័ត៌មានក្នុងស្រុក VnExpess ។

គួរឲ្យដឹងថា នេះគឺជាផ្នែកមួយនៃ កម្មវិធីបង្រៀនភាសាបរទេសរយៈពេល ១០ ឆ្នាំ(២០២៦-២០២៣៥) ដែលបានប្រកាសកាលពីចុងសប្តាហ៍មុន។ ក្នុងនោះ ក្រសួងមានផែនការបង្រៀនភាសាខ្មែរនៅឆ្នាំ ២០២៨ និងភាសាថៃ និងឥណ្ឌូនេស៊ីចាប់ពីឆ្នាំ ២០៣០ ដើម្បីជួយសម្របសម្រួលកិច្ចព្រមព្រៀងសហប្រតិបត្តិការណ៍ជាមួយប្រទេសជិតខាង។

លោក Nguyen Kim Son រដ្ឋមន្ត្រីក្រសួងអប់រំវៀតណាម បានលើកឡើងថា កិច្ចប្រឹងប្រែងនេះត្រូវបានពិភាក្សាកាលពីដើមខែមិថុនា ជាមួយលោក Khamphao Ernthavanh ឯកអគ្គរដ្ឋទូតវៀតណាមប្រចាំប្រទេសឡាវ។ យ៉ាងណាមិញ កម្មវិធីនេះនឹងចាប់ផ្តើមសាកល្បងនៅតំបន់ជាប់ព្រំដែនឡាវ ហើយនឹងពង្រីកបន្ថែមនៅពេលមានគ្រូបង្រៀនគ្រប់គ្រាន់។ សព្វថ្ងៃនេះមានសិស្សជាង ១៤ លាននាក់ មកហើយដែលក្នុងនោះចាប់ពីថ្នាក់ទី១ ដល់ទី១២ ដែលបានជ្រើសរើសភាសាបរទេសសម្រាប់រៀន រួមមាន អង់គ្លេស រុស្ស៊ី បារាំង ចិន អាល្លឺម៉ង់ ជប៉ុន និងកូរ៉េជាដើម។

ភាសាអង់គ្លេសត្រូវបានបង្រៀនគ្រប់ខេត្ត-ក្រុង ហើយមាន ៤០ ខេត្តក្នុងចំណោម ៦៣ បានបញ្ចូលកម្មវិធីនេះជាផ្លូវការ ចាប់តាំងពីខែកក្កដាមក។ ខណៈដែលភាសាបារាំងមានចំនួនសិស្សច្រើនបំផុត ៣០,៧០០ នាក់, ជប៉ុន ២០,៨០០ នាក់ និងចិន ១៤,៤០០ នាក់។ សិស្សទាំងនេះរួមមានអ្នកចុះឈ្មោះក្នុងកម្មវិធីសិក្សា ៧ និង១០ឆ្នាំ, អ្នករៀនភាសាបរទេសទីពីរ និងអ្នកនៅក្នុងកម្មវិធីសាកល្បង។

គួរបញ្ជាក់ថា ដើម្បីបន្ថែមភាសាបន្ថែម និងលើកកម្រិតការបង្រៀនភាសាបរទេស ក្រសួងអប់រំវៀតណាមមានផែនការជួលគ្រូបន្ថែម រួមទាំងគ្រូជនជាតិដើមផងដែរផង។ ក្រៅពីនេះ កម្មវិធីនេះក៏មានគោលបំណង ពង្រឹងការប្រើប្រាស់បច្ចេកវិទ្យា និងវេទិកាបញ្ញាសិប្បនិម្មិត ក្នុងការសិក្សាផងដែរ៕

ភ្នំពេញ៖ ប្រជាពលរដ្ឋខ្មែរនៅលើបណ្ដាញសង្គមនាពេលថ្មីៗនេះបានធ្វើការរិះគ.ន់យ៉ាងចាស់ដៃលើនាងប៊ូម ប៉ាណាដា អ្នកនាំពាក្យក្រសួងការពារជាតិថៃជាថ្មីម្ដងទៀត ក្រោយនាងបាននិយាយនៅចំពោះមុខអ្នកកាសែតថៃថា នៅក្នុងអំឡុងពេលមកប្រជុំGBCនៅកម្ពុជា នាងមិនហ៊ានសូម្បីផឹកទឹកដែលកម្ពុជារៀបចំឲ្យ ព្រោះខ្លាចមានអ្វីមិនប្រក្រតីនៅក្នុងនោះ។

តាមរយៈវីដេអូផ្ដល់ការសម្ភាសន៍ដល់អ្នកសារព័ត៌មាននៅក្នុងប្រទេសថៃពាក់ព័ន្ធនឹងការចូលរួមក្នុងកិច្ចប្រជុំ GBC នៅខេត្តកោះកុងក្នុងព្រះរាជាណាចក្រកម្ពុជា កាលពីថ្មីកន្លងទៅ អ្នកនាំពាក្យក្រសួងការពារជាតិថៃថ្មីថ្មោង នាងប៊ូម ប៉ាណាដា បានលើកឡើងយ៉ាងដូច្នេះថា៖ នាងបានកាន់ដងទឹកសុទ្ធCAMBODIA នៅនឹងដៃ ហើយអ្នកនៅក្បែរខ្លួននាងបានប្រាប់ថា កុំផឹកទឹកនោះអីក្រែងមានអីមិនប្រក្រតីនៅក្នុងនោះ។ ហើយនាងក៏បានធ្វើតាម ដោយមិនផឹក ឬបរិភោគអ្វីដែលខាងកម្ពុជារៀបចំទទួលនោះទេ។

អ្វីដែលកាន់តែធ្វើប្រជាពលរដ្ឋកម្ពុជាស្ដាប់ហើយហួសចិត្តនោះគឺនាងបាននិយាយយ៉ាងអស់សំណើចថា នាងស្រេចទឹកខ្លាំងណាស់ទម្រាំចប់ប្រជុំ ហើយបានទៅដល់ប្រទេសថៃវិញ ព្រោះនាងមិនហ៊ានផឹកទឹកនោះ។

ពាក្យសំដី និងឥរិយាបថរបស់អ្នកនាំពាក្យថៃរូបនេះ បានបង្ហាញពីការគិតយ៉ាងអគតិមកលើកម្ពុជា មានចេតនារើសអើងជាតិសាសន៍ ព្រមទាំងជាការមើលងាយផលិតផលកម្ពុជាថាគ្មានគុណភាព មិនដូចផលិតផលថៃដែលមានពលរដ្ឋខ្មែរមួយចំនួននៅតែទុកចិត្តហើយចង់ប្រើប្រាស់នោះទេ។

ទង្វើរបស់នាងប៊ូម ប៉ាណាដា គឺជារឿងដែលប្រជាជនកម្ពុជាមិនអាចទទួលយកបានជាដាច់ខាត ដ្បិតកាលពីកន្លងទៅថ្មីៗនេះ នាងក៏ទើបតែបង្ហាញការមិនគោរពដល់កិច្ចប្រជុំGBC តាមរយៈការចុចទូរស័ព្ទថតវីដេអូ និងប្រកាសស្វែងរកវត្តមានរបស់លោកជំទាវ ម៉ាលី សុជាតា ថាមិនឃើញមកចូលរួម ស្របពេលដែលកិច្ចប្រជុំកំពុងតែដំណើរការ។

អាកប្បកិរិយារបស់នាង គឺប្រៀបបាននឹងការមិនគោរពដល់កិច្ចប្រជុំ(GBC)កម្ពុជា-ថៃ នៅខេត្តកោះកុង ដោយសម្ដែងចេញនូវឥរិយាបថគ្មានការអប់រំ គ្មានវិជ្ជាជីវៈ និងរៀបឫកពារមិនស័ក្តិសមជាមួយតួនាទីក្នុងនាមជាមន្រ្តីដែលបម្រើការក្នុងជួររដ្ឋាភិបាលទាល់តែសោះ៕

ថ្មីៗនេះ សិង្ហបុរី បានដាក់បញ្ចូលបារីអេឡិចត្រូនិកក្នុងបញ្ជីគ្រឿងញៀនថ្នាក់C និងបន្ថែមការដាក់ពិន័យលើអ្នកនាំចូល និងអ្នកប្រើប្រាស់។

សិង្ហបុរី បានរឹតត្បិតខ្លាំងលើបារីអេឡិចត្រូនិកនេះ ដោយអ្នកនាំចូលនឹងត្រូវជាប់ពន្ធនាគារចាប់ពី៣ឆ្នាំ ដល់២០ឆ្នាំ ខណៈអ្នកចាកចែយបន្ត ត្រូវជាប់ពន្ធនាគារ ចាប់ពី២ឆ្នាំដល់១០ឆ្នាំ។

ចំពោះអ្នកប្រើប្រាស់វិញអាចរងពិន័យពី ៣០០ដុល្លារសិង្ហបុរី (ប្រមាណ២៣៤ដុល្លារអាមេរិក) ទៅ៧០០ដុល្លារ(ប្រមាណ៥៤៦ដុល្លារអាមេរិក)។

ដោយឡែកមន្ត្រីរាជការ និងកងកម្លាំង ដែលរពាក់ព័ន្ធបារីអេឡិចត្រូនិក នឹងត្រូវទទួលទម្លាក់ឋានៈនិងបណ្តេញចេញពីក្របខណ្ឌ។

ក្រឡេកមកមើលកម្ពុជាវិញ ប៉ុន្មានឆ្នាំចុងក្រោយនេះ ការប្រើប្រាស់បារីអេឡិចត្រូនិក មានការកើនឡើងគួរឱ្យកត់សម្គាល់ក្នុងចំណោមកុមារនិងយុវជន៕

ប្រទេសចិន ៖ កងទ័ពចិនបានដាស់តឿនហ្វីលីពីនឈប់បង្កហេតុឈានទៅបង្កើនភាពតានតឹងនៅសមុទ្រចិនខាងត្បូងជាបន្ទាន់ រួមទាំងឈប់ដាក់ពង្រាយកម្លាំងកងទ័ពពីក្រៅប្រទេស ហើយចិនចាត់ទុកជាការប្រឹងប្រែងពុំទទួលបានលទ្ធផលរបស់ហ្វីលីពីន ។ ចិនមិនចង់ឱ្យហ្វីលីពីនបង្កហេតុរហូតឈានទៅប្រឈមមុខគ្នានៅសមុទ្រចិនខាងត្បូងដែលកំពុងតានតឹងទេ គឺការដាស់តឿនរបស់ចិនក្រោយពីហ្វីលីពីនទើបធ្វើសមយុទ្ធកងទ័ពនៅសមុទ្រជាមួយអាមេរិក និងជប៉ុន ។

កាលពីថ្ងៃទី១៤ ខែកញ្ញា ឆ្នាំ២០២៥ សារព័ត៌មានបរទេសរាយការណ៍ថា កងទ័ពចិនបានដាស់តឿនហ្វីលីពីនឱ្យឈប់ធ្វើសកម្មភាព ពីព្រោះចិនចាត់ទុកថា បង្កហេតុឈានទៅប្រឈមមុខគ្នានៅសមុទ្រចិនខាងត្បូងដែលកំពុងតានតឹង ខណៈបច្ចុប្បន្ន ខណៈមានការបន្តល្បាតនៅសមុទ្រចិនខាងត្បូង និងអនុវត្តតាមផែនការដើម្បីគ្រប់គ្រងតំបន់នេះ ។

អ្នកនាំពាក្យកងទ័ពចិនដែលគ្រប់គ្រងនៅតំបន់ភាគខាងត្បូងបានចេញសេចក្តីថ្លែងការណ៍ទៅហ្វីលីពីន ក្រោយពីហ្វីលីពីនធ្វើសមយុទ្ធកងទ័ពជាមួយអាមេរិក និងជប៉ុន ក្នុងតំបន់សេដ្ឋកិច្ចពិសេសនៅសមុទ្រចិនខាងត្បូង ចាប់ពីថ្ងៃទី១១ ដល់ថ្ងៃទី១៣ ខែកញ្ញា ឆ្នាំ២០២៥ ។ សេចក្តីថ្លែងការណ៍មានខ្លឹមសារថា ៖ «ចិនសូមដាស់តឿនហ្វីលីពីន ចូរឈប់បង្កហេតុបង្កើនភាពតានតឹងនៅសមុទ្រចិនខាងត្បូងជាបន្ទាន់ រួមទាំងឈប់បង្កើនកម្លាំងកងទ័ពបរទេសក្នុងតំបន់ ពីព្រោះវាជាការប្រឹងប្រែងពុំទទួលលទ្ធផល» ។

ចំណែករដ្ឋាភិបាល និងកងទ័ពហ្វីលីពីន ពុំទាន់និយាយអ្វីពាក់ព័ន្ធនឹងសេចក្តីថ្លែងការណ៍របស់កងទ័ពចិនទេ ប៉ុន្តែកន្លងមក មន្ត្រីអាមេរិកនិយាយថា ការធ្វើសមយុទ្ធកងទ័ពអាមេរិកជាមួយហ្វីលីពីន និងជប៉ុន គឺដើម្បីបង្ហាញឱ្យឃើញថា ប្រទេសទាំងអស់មានសិទ្ធិ និងសេរីភាពបើកកប៉ាល់ ឬយន្តហោះលើដែនអាកាសអន្តរជាតិដោយស្របច្បាប់ ។

សមុទ្រចិនខាងត្បូងជាតំបន់ជម្លោះដែលចិនអះអាងថាខ្លួនជាម្ចាស់កម្មសិទ្ធិស្ទើរទាំងអស់ ដែលធ្វើឱ្យចិនមានជម្លោះជាមួយប្រទេសជាច្រើននៅតំបន់អាស៊ីអាគ្នេយ៍ ដូចជា ៖ ហ្វីលីពីន ព្រុយណេ ម៉ាឡេស៊ី និងវៀតណាម ដែលប្រទេសនេះបានអះអាងកម្មសិទ្ធិលើសមុទ្រចិនខាងត្បូងដូចគ្នា ពីព្រោះវាជាផ្លូវដឹកជញ្ជូនតាមសមុទ្រដ៏សំខាន់ ។ នេះពុំមែនជាការដាស់តឿនលើកទី១ទេ គឺកងទ័ពចិនបានដាស់តឿនហ្វីលីពីនជាច្រើនលើកកន្លងមក ហើយកងទ័ពទាំងពីរធ្លាប់មានបញ្ហាជាមួយគ្នានៅសមុទ្រចិនខាងត្បូងផងដែរ ៕

ប្រទេសថៃ៖ បើទោះជាធូរស្បើយពីព្យុះ ប៉ុន្តែស្ថានភាពទឹកជំនន់នៅក្នុងប្រទេសថៃហាក់មិនទាន់ថមថយទៅណាឡើយ ដោយថ្មីៗនេះទំនប់ចៅប្រាយ៉ាដែលជាទំនប់ទឹកដ៏ធំមួយរបស់ថៃ បានបង្កើនការបញ្ចេញទឹករហូតដល់2,000ម៉ែត្រគូបក្នុងមួយវិនាទី ដែលលើសពីកម្រិតធម្មតារបស់វាត្រឹម 1,400 ទៅ 1,500ម៉ែត្រគូបក្នុងមួយវិនាទីប៉ុណ្ណោះ។ កត្តានេះបានជំរុញឲ្យអាជ្ញាធរថៃប្រកាសឲ្យខេត្តចំនួន 5 ត្រៀមខ្លួនទប់ទល់និងផ្លាស់ទីទៅរកកន្លែងសុវត្ថិភាពជាបន្ទាន់។

យោងតាមការចុះផ្សាយរបស់សារព័ត៌មានថៃ The Nation នៅថ្ងៃទី14 ខែកញ្ញា ឆ្នាំ2025 បានឲ្យដឹងថា នាយកដ្ឋានធារាសាស្ត្រ (RID) បានបង្កើនអត្រាបញ្ចេញទឹកពីទំនប់ Chao Phraya ក្នុងខេត្ត Chainat ដល់ 2,000 ម៉ែត្រគូបក្នុង 1 វិនាទី ដើម្បីគ្រប់គ្រងបរិមាណដ៏ច្រើននៃទឹកជំនន់ដែលចូលមកពីភាគខាងជើងប្រទេសថៃ។

គិតត្រឹមម៉ោង 6:00ព្រឹកថ្ងៃដដែល ការវាស់វែងបានបង្ហាញស្ថានភាពផ្លាស់ប្ដូរចុងក្រោយថា ទឹកនៅផ្នែកខាងលើនៃទំនប់មានកម្ពស់រហូតដល់ទៅ 17.31ម៉ែត្រ ខណៈទឹកខាងក្រោមមានកម្ពស់ 14.68 ម៉ែត្រ។ ជាមួយគ្នានោះនាយកដ្ឋាន RID បានព្រមានថា ទំនប់នៅខាងក្រោមទឹកចំនួន ៥ ដែល នឹងរងមានហានិភ័យនៃទឹកជំនន់មានដូចជា៖

នៅស្រុក Tambon នៅក្នុងខេត្ត Ang Thong, ស្រុក Klong Phong Pheng ខេត្តអាយុធ្យា, ឃុំ Bang Bal និង Hua Wiang នៅក្នុងស្រុក Sena, Talad Chid និង Tha Din Daeng នៅក្នុងស្រុក Phak Hai (Ayutthaya)។

បន្ថែមពីនោះ នាយកដ្ឋាន RID បាននិយាយថា ស្ថានភាពភ្លៀងធ្លាក់ និងទឹកជំនន់នឹងមានបន្តកាន់តែច្រើន ខណៈពេលដែលកិច្ចខិតខំប្រឹងប្រែងកំពុងត្រូវបានធ្វើឡើងទាំងយប់ទាំងថ្ងៃដើម្បីបញ្ចៀសទឹក និងដែរក្សាសុវត្ថិភាពប្រជាជន។

គួរជម្រាបផងដែរថា ក្រៅពីការកើនឡើងនៃទឹកទន្លេ នាយកដ្ឋានឧតុនិយមថៃក៏បានចេញការព្រមានអំពីភ្លៀងធ្លាក់ខ្លាំង និងផ្គររន្ទះខ្លាំងនៅថ្ងៃចន្ទ ទី១៥ ខែកញ្ញា ដោយទីក្រុងបាងកក ភាគខាងកើត និងភាគខាងត្បូងប្រឈមមុខនឹងការធ្លាក់ភ្លៀងរហូតដល់ ៧០%។

ការព្យាករណ៍ចុងក្រោយបង្អស់បានបង្ហាញថា ក្នុងរយៈពេល 24 ម៉ោងបន្ទាប់ ភូមិភាគឦសាន តំបន់កណ្តាល រួមទាំងទីក្រុងបាងកក និងតំបន់ជុំវិញ ខាងកើត និងខាងត្បូងនឹងបន្តមានភ្លៀងធ្លាក់ខ្លាំង ហើយស្ថានភាពនេះគឺបង្កឡើងដោយខ្យល់មូសុងដែលឆ្លងកាត់តំបន់ភាគកណ្តាល ភាគខាងត្បូង និងខាងកើតរបស់ប្រទេសថៃ៕

ប្រទេសថៃ ៖ អ្នកជំនាញថៃម្នាក់បានលើកឡើងពីមូលហេតុ ៧ចំណុចដែលថៃគួរតែបើកព្រំដែនដឹកទំនិញជាមួយកម្ពុជាដើម្បីផលប្រយោជន៍សេដ្ឋកិច្ចរបស់ខ្លួន ហើយអ្នកជំនាញរូបនេះក៏បានដាស់តឿនពលរដ្ឋថៃជ្រុលនិយមផងដែរកុំឱ្យខឹងសម្បារ និងស្ពប់ខ្ពើ.មពលរដ្ឋខ្មែរហួសហេតុ រហូតដល់មើលរំលងផលប៉ះពាល់សេដ្ឋកិច្ចថៃរយៈពេលយូរ ។ នេះបើតាមការផ្សព្វផ្សាយរបស់សារព័ត៌មានថៃ Khaosod នៅថ្ងៃទី១៣ ខែកញ្ញា ឆ្នាំ២០២៥ ។

នៅថ្ងៃទី១២ ខែសីហា អ្នកស្រី ភួងថង ផារ៉ាកផាន់ សាស្ត្រាចារ្យនៅសាកលវិទ្យាល័យជុឡាឡុងកន បានសរសេរក្នុងហ្វេសប៊ុករបស់ខ្លួនដើម្បីសំណូមពរឱ្យពលរដ្ឋថៃយល់ពីការបើកព្រំដែនកម្ពុជា-ថៃដើម្បីដឹកទំនិញរវាងប្រទេសទាំងពីរ គឺជាផលប្រយោជន៍សេដ្ឋកិច្ចរបស់ថៃខ្លួនឯង ។

មន្ត្រីស្ថានទូតជប៉ុនប្រចាំប្រទេសថៃបានសំណូមពរឱ្យរដ្ឋាភិបាលថៃបើកព្រំដែនជាមួយកម្ពុជាដើម្បីដឹកទំនិញ ប៉ុន្តែបែរជាត្រូវក្រុមជ្រុលនិយមថៃរិះគន់យ៉ាងចាស់ដៃ ពីព្រោះយល់ថា ការនាំចេញទំនិញថៃនឹងធ្វើឱ្យកម្ពុជាកាន់តែរឹងមាំ ។ ពលរដ្ឋថៃចង់ដាក់សម្ពាធកម្ពុជាដោយការបំផ្លាញសេដ្ឋកិច្ច ហើយគិតថា ថៃពុំរងផលប៉ះពាល់អ្វីសោះ គឺអ្នកជំនាញថៃថា ការគិតបែបនេះខុសទាំងស្រុង និងលើកឡើងពីមូលហេតុ ៧ចំណុចដែលថៃគួរបើកព្រំដែន រួមមាន ៖

១-ទំនិញដែលក្រុមហ៊ុនជប៉ុនត្រូវការឱ្យឆ្លងដែនកម្ពុជា-ថៃ ពុំមែនជាទំនិញប្រើប្រាស់ប្រចាំថ្ងៃទេ ប៉ុន្តែជាទំនិញឧស្សាហកម្មដែលផលិតនៅប្រទេសមួយ និងនាំចេញទៅដំឡើងនៅប្រទេសមួយទៀត ។ ហេតុនេះ ការបិទព្រំដែនកម្ពុជា-ថៃ បានធ្វើឱ្យក្រុមហ៊ុនជប៉ុនរងផលប៉ះពាល់ ។

២-ស្ថានទូតជប៉ុនថា ក្រុមហ៊ុនជប៉ុនរងផលប៉ះពាល់ដោយសារការបិទព្រំដែន ពីព្រោះក្រុមហ៊ុនជប៉ុនបានវិនិយោគនៅថៃ និងកម្ពុជា តាមគោលនយោបាយ Thailand Plus ដែលបង្កើតតាំងពីឆ្នាំ២០១៩ ឬបង្កើតពេលលោក ប្រាយុទ្ធ ចាន់អូចា ជានាយករដ្ឋមន្ត្រី ។ គោលនយោបាយនេះលើកទឹកចិត្តឱ្យវិនិយោគិនបរទេសដែលរងផលប៉ះពាល់ដោយសារសង្គ្រាមពាណិជ្ជកម្មរវាងអាមេរិក-ចិន ឱ្យងាកមកវិនិយោគនៅតំបន់អាស៊ីអាគ្នេយ៍កាន់តែច្រើន ។

ពេលនោះ ថៃស្នើឱ្យក្រុមហ៊ុនបរទេសផលិតគ្រឿងបម្លាស់ឧស្សាហកម្មនៅកម្ពុជា ពីព្រោះប្រាក់ឈ្នួលនៅថៃខ្ពស់ជាង បន្ទាប់មក ក្រុមហ៊ុនបរទេសអាចបញ្ជូនគ្រឿងបម្លាស់ឧស្សាហកម្មមកដំឡើងនៅថៃដោយទទួលការលើកលែងពន្ធ ដើម្បីទាញយកផលប្រយោជន៍ពីតំបន់ពាណិជ្ជកម្មសេរី ។

៣-កាលពីឆ្នាំ២០២៤ រដ្ឋាភិបាលថៃបាននាំវិនិយោគិនបរទេសជាង២០នាក់ ទៅពិនិត្យមើលតំបន់សេដ្ឋកិច្ចពិសេសរបស់កម្ពុជា ក្នុងគោលបំណងទាក់ទាញវិនិយោគិនបរទេសឱ្យមកវិនិយោគនៅថៃតាមគោលនយោបាយ Thailand Plus ។

៤-ការបិទព្រំដែនកម្ពុជា-ថៃបានប៉ះពាល់ដល់ការផលិតរបស់ក្រុមហ៊ុនផ្សេងៗ ហើយក្រុមហ៊ុនថៃក៏រងផលប៉ះពាល់ដែរ ប៉ុន្តែពួកគេពុំហ៊ាននិយាយ ។ ការបិទព្រំដែនផ្លូវគោកធ្វើឱ្យក្រុមហ៊ុនជប៉ុនងាកទៅដឹកជញ្ជូនតាមផ្លូវអាកាស និងផ្លូវទឹកវិញ ដែលធ្វើឱ្យក្រុមហ៊ុនជប៉ុនចំណាយលើការដឹកជញ្ជូនទំនិញខ្ពស់ជាងមុនរាប់រយលានបាតក្នុង១ខែ ។

ជប៉ុនពុំពាក់ព័ន្ធនឹងជម្លោះទេ ប៉ុន្តែជប៉ុនមកវិនិយោគនៅថៃ ព្រោះជឿថា រដ្ឋាភិបាលថៃនឹងផ្តល់ភាពងាយស្រួលដល់ក្រុមហ៊ុនជប៉ុនតាមការព្រមព្រៀងគ្នា ប៉ុន្តែរដ្ឋាភិបាលថៃបែរជាបិទព្រំដែនធ្វើឱ្យពិបាកដល់ក្រុមហ៊ុនជប៉ុន ក្រោមមូលហេតុជាតិនិយម និងស្ពប់ខ្ពើមពលរដ្ឋខ្មែរ ។ ជប៉ុននឹងធុញទ្រាន់ថៃ ហើយឆាប់ៗនេះ ជប៉ុននឹងយល់ថា ថៃពុំអាចផ្តល់ទំនុកចិត្តដល់ក្រុមហ៊ុនខ្លួនទៀតទេ ។

៥-ការបិទព្រំដែនប៉ះពាល់ដល់ការផលិតទំនិញក្នុងឧស្សាហកម្មថៃ ទោះជាទំនិញរបស់ក្រុមហ៊ុនជប៉ុន ប៉ុន្តែប្រាក់ចំណូលពីការនាំចេញជាប្រាក់ចំណូលរបស់ប្រទេសថៃផងដែរ ពីព្រោះជនជាតិថៃកាន់ភាគហ៊ុនជាមួយក្រុមហ៊ុនជប៉ុន ហើយកម្មករធ្វើការក៏ជាជនជាតិថៃ ។

៦-អ្វីគួរចាប់អារម្មណ៍ គឺលោក ណាត់ថាផុង ណាកផានិច រដ្ឋមន្ត្រីក្រសួងការពារជាតិបានយល់ច្បាស់ពីផលប៉ះពាល់សេដ្ឋកិច្ចថៃ និងមានចំណេះដឹងច្រើន ទើបលោកសុំកម្ពុជាបើកព្រំដែនឡើងវិញ ។ ប៉ុន្តែកូនចៅរបស់លោក គឺលោក ប៊ុនស៊ីន ផាកក្លាង មេបញ្ជាការយោធភូមិភាគ២ ដែលរស់នៅព្រំដែនរហូតមក ពុំយល់ពីផលប៉ះពាល់សេដ្ឋកិច្ចថៃ បែរជាមានគំនិតផ្ទុយពីថ្នាក់លើ ដោយសារលោក ប៊ុនស៊ីន ចេះដឹងផ្នែកសង្គ្រាមច្រើនជាងសេដ្ឋកិច្ច ។ លោក ប៊ុនស៊ីន គួរឈ្វេងយល់ពីសេដ្ឋកិច្ច នយោបាយ និងទំនាក់ទំនងបរទេសឱ្យច្រើនជាងនេះ ។

៧-ថៃនាំចេញទំនិញទៅកម្ពុជាក្នុង១ខែៗស្មើទឹកប្រាក់ជាច្រើនម៉ឺនលានបាត ទោះជាមានការហាមឃាត់នាំចេញទំនិញសម្រាប់ប្រើប្រាស់ប្រចាំថ្ងៃទៅកម្ពុជា ប៉ុន្តែថៃបានរងផលប៉ះពាល់សេដ្ឋកិច្ចខ្លាំងជាង គឺប៉ះពាល់ទាំងម្ចាស់រោងចក្រ និងពលករថៃដោយសារការបិទព្រំដែន ។

កម្ពុជាអាចទិញទំនិញពីវៀតណាម និងចិន ដែលទំនិញប្រទេសទាំងពីរមានតម្លៃថោកជាងទំនិញថៃ គឺថៃបាត់បង់ទីផ្សារនៅកម្ពុជា ខណៈអ្នកជំនាញថៃបានចំណាយពេលរហូតដល់ជាង៣០ឆ្នាំ ទម្រាំអាចបង្កើតទីផ្សារកម្ពុជាបាន ។ តើយើងយល់ព្រមឱ្យបាត់បង់ទីផ្សារកម្ពុជាមែនទេ? តើជនជាតិថៃខឹងសម្បាររហូតមើលរំលងផលប៉ះពាល់សេដ្ឋកិច្ចដែលកើតឡើងមកលើខ្លួនឯងរយៈពេលយូរ ឬក៏យ៉ាងណា?