តារាចម្រៀង ចេន ម្ចាស់បទ «ពងទា» បានប្រកាសជាសាធារណៈអំពីការលុបបទចម្រៀង Cover ថៃកាលពីមុនរបស់ខ្លួនចាប់តាំងពីថ្ងៃដំបូង(២៤ កក្កដា) ដែលថៃចូលមកឈ្លានពានកម្ពុជា។ លើសពីនេះតារាចម្រៀងរូបនេះក៏ប្តេជ្ញាឈប់ច្រៀងបទតទៀតព្រមទាំងផ្តាំផ្ញើដល់តារាចម្រៀងផ្សេងទៀតកុំ Cover បទប្រទេសដទៃទៀតជៀសវាងមានបញ្ហាគេយកចំណុចនេះមកវាយប្រហារ។

តារាចម្រៀង ចេន បានសរសេរនៅលើបណ្តាញសង្គមយ៉ាងដូច្នេះថា«មានរឿងមួយទៀតដែលបងប្អូនអ្នកគាំទ្រសំណូមពរខ្ញុំឈប់ច្រៀងបទថៃ បងប្អូនមិនបាច់សុំទេ ខ្ញុំនឹងធ្វើជូនបងប្អូនដោយក្តីគោរពស្រលាញ់ ហើយរាល់វីដេអូបទថៃខ្ញុំបានលុបភ្លាមៗតាំងពីថ្ងៃសង្រ្គាមដំបូងម៉្លេះ ខ្ញុំរាល់ថ្ងៃនិពន្ធបទចម្រៀងគរទុកពេញស្តុកកុំបារម្ភ»។

តារាចម្រៀងប្រុសរូបនេះថាលោកនឹងមិនធ្វើឱ្យប្រទេសជាតិលក់មុខដោយសារបទចម្រៀងឡើយ។ ចេន ក៏បានអំពាវនាវដល់សិល្បករ សិល្បការិនីដទៃទៀតឈប់ច្រៀងបទចម្លងគេទៀតមិនថាប្រទេសណាក៏ដោយ ជៀសវាងមានបញ្ហាគេយកចំណុចនេះមកវាយប្រហារ។ ម្ចាស់បទ«ជូនអូនទៅរកគេ» បានឱ្យដឹងទៀតថាក្នុងប្រទេសកម្ពុជាមានអ្នកមានសមត្ថភាពនិពន្ធច្រើនគ្មានហេតុផលអ្វីត្រូវច្រៀងបទគេទៀតទេ។

ជាមួយគ្នានេះ ចេន ក៏បានស្នើដល់ទស្សនិកជនងាកមកគាំទ្រចម្រៀងស្នាដៃនិពន្ធក្នុងស្រុក កុំឱ្យតម្លៃគេខ្លាំងពេកដល់ថ្នាក់ មើលងាយសិល្បករសិល្បការនីខ្លួនឯងពេក។ ចេន បញ្ចប់សំណេររបស់ខ្លួនជាមួយនឹងពាក្យថា «យើងចាប់ផ្តើមជាថ្មីលើទឹកដីសុវណ្ណភូមិ»។

ជាមួយនឹងសំណេរខាងលើនេះតារាចម្រៀង ចេន ក៏បានបង្ហាញពីការតស៊ូលើអាជីពចម្រៀងរបស់ខ្លួនមិនខុសគ្នាពីកងទ័ពនោះទេ។ លោកសរសេរក្នុងផ្នែកបញ្ចេញមតិយោបល់ថា «តាំងពីថ្ងៃខ្ញុំចូលមកតស៊ូនៅភ្នំពេញដំបូង២០១៤ ខ្ញុំនិពន្ធបទថ្មីមករហូត ១១ឆ្នាំហើយ ហើយពីពេលនេះ២០២៥ ទៅមុខទៀតនៅតែនិពន្ធបទថ្មីរហូតព្រោះវាជាឆន្ទៈខ្ញុំ។ បទដែលសាងឈ្មោះអត់ក្រោម២០បទទេ និពន្ធបទpre-wedding ជាច្រើនជូនដល់គូស្វាមីភរិយា លូវនៅនិពន្ធ៣គូទៀត ដោយសារសង្រ្គាម ទើបអារម្មណ៍អត់មូល»។

លោកបន្ថែមទៀតថា «១១-១២ឆ្នាំមកនេះជួបរឿងរ៉ាវឆ្អែតហើយ បើមិនស៊ូណាស់មិននិពន្ធណាស់អ្នកទាំងអស់គ្នាគិតថា២០២៥នៅឈរជើងបានចឹងទេ តារាចម្រៀងមិនមែនចេះតែធ្វើទៅល្បីគ្រប់គ្នាទេ។ YouTube ខំសាងបទរាប់សិបលានviews ត្រូវគេហែកអត់មាត់មួយម៉ាត់ផង ខាំមាត់ធ្វើពីសូន្យវិញទៀត បើនិយាយរឿងស៊ូឈរជើងវិស័យសិល្បៈខ្ញុំមិនខុសពីបងៗកងទ័ពទេ ធ្វើមិនប្រាកដគេវ៉ៃបាក់ឈប់យូរហើយខ្វះ អីពួកខូចលួចហែកពួកចង់កំទេចឈ្មោះ តែភាពស្មោះត្រង់អំពើល្អជួយសព្វថ្ងៃនេះ…»៕

កាលពីល្ងាចថ្ងៃទី២៨ កក្កដា តារារ៉េបល្បីប្រចាំប្រទេសកម្ពុជា ម៉ាន់ វណ្ណដា បានប្រើសំឡេងរបស់ខ្លួនក្នុងនាមជាប្រជាពលរដ្ឋមួយរូបមិនមែនជាសិល្បករបង្ហាញទៅកាន់ពិភពលោកអំពាវនាវដល់សហគមន៍អន្តរជាតិ ជាពិសេសប្រព័ន្ធផ្សព្វផ្សាយរាយការណ៍ដោយការទទួលខុសត្រូវពីការឈ្លានពានរបស់ថៃហើយចោទមកខាងកម្ពុជាជាអ្នកចាប់ផ្តើមសង្គ្រាមមុន។ មិនត្រឹមតែប៉ុណ្ណោះ វណ្ណដា ក៏បានចោទសំណួរទៅកាន់ប្រជាជនថៃអំពីការបំផ្លិតបំផ្លាញពីកងទ័ពថៃមកលើប្រាសាទព្រះវិហារដែលជាសម្បត្តិបេតិកភណ្ឌពិភពលោក។

ក្នុងវីដេអូរយៈពេល៥នាទីនិង១៣វិនាទី វណ្ណដា បាននិយាយជាភាសាអង់គ្លេស ដោយអំពាវនាវឱ្យពិភពលោកជឿទៅលើការពិតពីព្រោះតែកម្ពុជាត្រូវបានគេលាបពណ៌ថាជាប្រទេសដែលចាប់ផ្តើមសង្គ្រាមមុនមិនត្រូវការសន្តិភាព។ សិល្បករដ៏ល្បីឈ្មោះរូបនេះបានចោទសួរថាហេតុអ្វីបានជាប្រទេសថៃបដិសេធផ្លូវឆ្ពោះទៅរកសន្តិភាព បដិសេធចោលពីដំណោះស្រាយតុលាការយុត្តិធម៌អន្តរជាតិ(ICJ) អាស៊ាន UN បើសិនជាខ្លួនពិតជាស្អាតស្អំមែននោះ។

ជាមួយគ្នានេះ វណ្ណដា ក៏បានបង្ហាញពីការពិតនូររឿងរ៉ាវដែលបានចាប់ផ្តើមកើតឡើងដោយបង្ហាញថាកាលពីថ្ងៃទី២៨ ខែឧសភា សារព័ត៌មានសាកលធំៗដូចជា រ៉យទ័រ AP បានរាយការណ៍ពីទាហានថៃបានសម្លាប់ទាហានខ្មែរម្នាក់ដែលពិភពលោកដឹងពីបញ្ហានេះ ហើយប្រទេសកម្ពុជាព្យាយាមរកដំណោះស្រាយប្រកបដោយសន្តិវិធីទៅ ICJ ប៉ុន្តែថៃបានច្រាលចោល។ ប្រធានប្តូរវេនអាស៊ានក៏បានជួយសម្របសម្រួលលើបញ្ហាជម្លោះនេះ ប៉ុន្តែថៃនៅតែបដិសេធ។ វណ្ណដា ក៏បានរៀបរាប់ជាបន្តទៀតដែលភាគីថៃនៅតែបដិសេធគេចវេសពីការជួយដោយភាគីទី៣។ ក្នុងនោះតារារ៉េបរូបនេះក៏បានបង្ហាញពីទំហំសេដ្ឋកិច្ចរបស់ប្រទេសថៃដែលធំជាងកម្ពុជា១៣ដង និងមានសព្វាវុធទំនើបមួយចំនួនដែលកម្ពុជាមិនមាននោះទេ និងបានថាហេតុអ្វីកម្ពុជាជាអ្នកចាប់ផ្តើមសង្គ្រាមមុនទាំងដឹងថានឹងមិនឈ្នះនោះ។

តារារ៉េបរូបនេះបាននិយាយប្រាប់ពិភពលោកថាអ្វីដែលលោកនិយាយគឺបានធ្វើឡើងនៅថ្ងៃទី២៧ កក្កដា ហើយអ្វីដែលនឹកស្មានមិនដល់នោះកងទ័ពថៃបានចាប់ផ្តើមវាយប្រហារបំផ្លាញប្រាសាទព្រះវិហារ ដែលជាសម្បត្តិបេតិកភណ្ឌពិភពលោក។ ក្នុងនោះ វណ្ណដា បាននិយាយទៀតថា ថៃធ្លាប់ទាមទារប្រាសាទព្រះវិហារជារបស់ពួកគេ ប៉ុន្តែក្នុងឆ្នាំ១៩៦២ ICJ បានកាត់ក្តីឱ្យប្រាសាទព្រះវិហារជារបស់ប្រទេសកម្ពុជាហើយការសម្រេចចិត្តនោះបានមកពីតុលាការអព្យាក្រឹតខ្ពស់បំផុតនៅលើផែនដី។ ប៉ុន្តែនៅថ្ងៃទី២៧ កក្កដា ថៃសម្រេចចិត្តបំផ្លាញទាំងពួកគេតែងតែទាមទារថាប្រាសាទព្រះវិហារជារបស់ពួកគេ ហេតុអ្វីបានជាពួកគេបំផ្លាញប្រាសាទដែលអង្គការបានសម្រេចចិត្តដាក់ចូលជាសម្បត្តិបេតិកភណ្ឌពិភពលោក។

វណ្ណដា ក៏បានលើកឡើងអំពីប្រជាជនថៃបានប្រើអំពើហិង្សាមកលើពលករកម្ពុជា និងបានចោទសួរថាអ្នកណាជាចាប់ផ្តើមមុន នរណាបដិសេធសន្តិភាព ។ វណ្ណដា ថាប្រទេសកម្ពុជាតែងតែជ្រើសរើសសន្តិភាពដោះស្រាយនៅតុលាការយុត្តិធម៌អន្តរជាតិ និយាយអ្វីដែលជាការពិត ហើយប្រទេសកម្ពុជាគឺជាប្រទេសតូចមិនត្រូវការសង្គ្រាមទៀតទេ។

សំឡេងរបស់ វណ្ណដា គឺពិតជាជ្រួលជ្រាបយ៉ាងខ្លាំងនិងបានសាយភាយយ៉ាងច្រើនដែលនឹងអាចឱ្យអន្តរជាតិបានដឹងបានយល់នូវការពិត។ មិនត្រឹមតែប៉ុណ្ណោះ សំឡេងដ៏មានឥទ្ធិពលរបស់សិល្បកររូបនេះគឺបានធ្វើឱ្យអ្នកលេងបណ្តាញសង្គមថៃមួយចំនួនឈឺចិត្តស្អិតទ្រូងមិនខាន និងបានចូលខម្មិនវាយប្រហារមកកាន់ខាង វណ្ណដា ផងដែរ៕

តារាចម្រៀង ថេណា និងតារាចម្រៀង កៅ ពន្លឺ នៃសមាជិកក្មេងខ្មែរ បានបង្ហាញចំណាប់អារម្មណ៍រៀងៗខ្លួននៅលើបណ្តាញសង្គមដោយលើកឡើងថាមេរៀនទុក្ខលំបាកលើកនេះនឹងធ្វើឱ្យប្រទេសជាតិកាន់តែខ្លាំងជាងមុន សាមគ្គីគ្នាជាងមុននិងត្រូវប្រុងប្រយ័ត្នខ្ពស់ ហើយយើងកាន់តែបានដឹងពីទឹកចិត្តប្រជាជនកម្ពុជា។

តារាចម្រៀង ថេណា បានសរសេរនៅលើបណ្តាញសង្គមនៅថ្ងៃទី២៨ កក្កដា ថា «ចាប់ពីពេលនេះទៅ យើងត្រូវរំលឹកខ្លួនឯងជាប្រចាំថា យើងត្រូវមានការប្រុងប្រយ័ត្នខ្ពស់និងចូលរួមពង្រឹងសម្មត្ថភាពខ្លួនឯងនិងចូលរួមជួយជាតិមួយនេះឱ្យបានរឹងមាំ។ ខ្ញុំជឿជាក់ថា បន្ទាប់ពីការហែលឆ្លងទុកលំបាកមួយនេះ យើងនឹងកាន់តែរឹងមាំខ្លាំងជាងមុនក្នុងសន្ទុះមួយដ៏លឿន និងមានការរួបរួមជាតិមួយដែលមិនអាចបំបែកបាន គ្រប់កម្រិត ដែលមិននឹកស្មានដល់ ដែលសម្រាប់ខ្ញុំគឺជាការសងសឹកដ៏អស្ចារ្យបំផុតដែលយើងត្រូវធ្វើ។ យើងត្រូវធ្វើឱ្យបាន»។

សម្រាប់តារាចម្រៀង កៅ ពន្លឺ ដែលជាសមាជិកក្មេងខ្មែរវិញបានបង្ហោះនៅលើបណ្តាញសង្គមហ្វេកប៊ុកដែរថា «នៅពេលសង្រ្គាមចប់ ប្រទេសយើងនឹងខ្លាំងជាងមុន រីកចម្រើនជាងមុន ស្រលាញ់ជាតិជាងមុនខំប្រឹងជាងមុន ស្គាល់ខ្លួនឯងជាងមុន »។ លោកក៏បានបង្ហោះរូបនាយករដ្ឋមន្រ្តីកម្ពុជាចូលរួមកិច្ចប្រជុំនៅប្រទេសម៉ាឡេស៊ី និងបានបន្ថែមខ្លឹមសារថា «កត់ចូលបញ្ជីប្រវត្តិសាស្រ្តប្រទេសកម្ពុជា នៅក្នុងគ្រាលំបាកទើបដឹងពីទឹកចិត្តរបស់បងប្អូនខ្មែរ ខ្មែរចេះស្រលាញ់គ្នា ខ្មែរខ្លាំង និងសូមអរគុណទៅកាន់បងៗកងទ័ពជួរមុខដែលជាវីរៈជនឈរជើងការពារទឹកដីពីសត្រូវ ។ ការលះបង់របស់កងទ័ព ការសាមគ្គីរបស់ប្រជាជន ការបង្ហាញពីការខ្វាយខ្វល់របស់អ្នកទាំងអស់គ្នា បានបង្កើតកម្លាំងសាមគ្គីកាន់តែខ្លាំងសម្រាប់ប្រទេសកម្ពុជា»។

គួរបញ្ជាក់ផងដែរថា ក្នុងរយៈពេល៥ថ្ងៃនៃសង្គ្រាមព្រំដែនរវាងខ្មែរនិងថៃ ដែលភាគីថៃចូលឈ្លានពាននេះគឺគេបានឃើញប្រជាពលរដ្ឋគ្រប់ជាន់ថ្នាក់សាមគ្គីគ្នាជាធ្លុងមួយមិនថានៅវិស័យណានោះទេគឺបានបង្ហាញពីទឹកចិត្តស្នេហាខ្វល់ខ្វាយពីសុខទុក្ខរបស់ជាតិខ្លួន៕

តារាសម្តែងជួរមុខ ស៊ីន យូប៊ីន ត្រូវបានអ្នកលេងបណ្តាញសង្គមវាយប្រហារយ៉ាងចាស់ដៃជាពិសេសនៅតែផ្លែផ្កាពីការបញ្ចាំងវីដេអូនៅលើ billboard នៅទីក្រុងញូវយ៉កអំពីការឈ្លានពានរបស់ប្រទេសថៃ។ ឃើញមានការស្តីបន្ទោសច្រើនមកកាន់ យូប៊ីន តារាសម្តែង ឆឹម សក្កដា បញ្ជាក់ថានាងបានចូលរួមយ៉ាងសកម្មជួយទៅដល់ជនភៀសសឹក រវល់ដាច់បាយ ដាច់ទឹក ។ តារាប្រុសរូបនេះក៏បានស្នើឱ្យទស្សនិកជនមានការយោគយល់ យូប៊ីន និងរួបរួមសាមគ្គីគ្នា។

នៅថ្ងៃទី២៩ កក្កដា លោក ឆឹម សក្កដា បានបង្ហោះរូបភាពមួយសន្លឹកនិងបានរៀបរាប់យ៉ាងដូច្នេះថា «គាត់មានសកម្មភាពជាមួយពួកយើងរហូតមក ពួកយើងរវល់ដាច់បាយដាច់ទឹក សូម្បីតែគេងក៏មិនគ្រប់ មិនចម្លែកទេដែលគាត់មិនទាន់បានចេញវីឌីអូតាមចិត្តបងប្អូនមួយចំនួនចង់បាន តែសង្ឃឹមបងប្អូនយល់ ខ្មែររួបរួមសាមគ្គី»។ តារាសម្តែងរូបនេះក៏បានសរសេរបន្ថែមក្នុងខម្មិនថាដោយសារតែរវល់ពេកអ្នកទាំងពីរពុំអាចឆ្លៀតថតរូបស្អាតជាមួយគ្នាផង។

កាលពីថ្ងៃទី២៧ តារាសម្តែង ស៊ីន យូប៊ីន បានចេញជាវីដេអូមួយនៅលើបណ្តាញសង្គមហ្វេកប៊ុកប្អូនស្រី និងនៅលើគណនី IG ផ្ទាល់ខ្លួនដោយបាននិយាយជាភាសាអង់គ្លេសអំពីជម្លោះព្រំដែនកម្ពុជា-ថៃ។ មុននឹងចេញវីដេអូនេះតារាសម្តែងដែលក្រសោបពានរង្វាន់ជាច្រើនរូបនេះបានចេញមកបញ្ជាក់ទៅកាន់សាធារណជនអំពីបញ្ហាហ្វេកប៊ុករបស់នាងដែលអសកម្មដោយសារតែមានបញ្ហាអស់រយៈពេលជាង១ខែមកហើយ។ ក្នុងនោះតារាសម្តែង ស៊ីន យូប៊ីន ថានាងចេញវីដេអូយឺតដោយសារតែនាងរៀបចំសិក្សាពីប្រភពច្បាស់លាស់ជាពិសេសគឺបានឆាតទៅពឹងពាក់សារព័ត៌មានធំៗរួមទាំងមានការបញ្ចាំងវីដេអូរូបភាពនៅលើ billboard នៅទីក្រុងញូវយ៉កហើយពេលវេលាខុសគ្នាទើបធ្វើឱ្យមានការយឺតយ៉ាវ។

យ៉ាងណាមិញចំពោះពាក្យសម្តីរបស់ ស៊ីន យូប៊ីន ដែលបង្ហាញថានឹងមានការចចារដាក់នៅលើ billboard ក្នុងទីក្រុងញូវយ៉កនេះវាបានក្លាយទៅជាប្រធានបទមួយទៀតសម្រាប់អ្នកលេងបណ្តាញសង្គមដែលផ្លែផ្កាទៅនាងពីព្រោះតែមិនទាន់ឃើញមានការចាក់បញ្ចាំងនៅឡើយ៕