ទន្ទឹមនឹងតារាថៃបង្ហាញទង្វើហាក់ដូចជាសើចចំអកមកខាងកម្ពុជាតារាចម្រៀង ណុប បាយ៉ារិទ្ធ ថាកន្លងមកនេះយើងឱ្យតម្លៃតារាផ្ទះលេខ២រហូតលែងឃើញតម្លៃតារាខ្លួនឯង ប៉ុន្តែពេលនេះគ្មានអាយដលអ្វីទៀតទេ និងចងចាំមួយជីវិត។ តារាចម្រៀងរូបនេះក៏លើកចំណុចមួយចំនួនដែលទទួលបានពីការឈ្លានពានថៃលើកនេះ។

លោក ណុប បាយ៉ារិទ្ធ បានសរសេរនៅលើបណ្តាញសង្គមយ៉ាងដូច្នេះថា «កន្លងមកយើងឱ្យតម្លៃតារាប្រទេសនោះលើសលុបពេកហើយ រហូតពេលមើលលែងឃើញតម្លៃតារាខ្លួនឯង ។ ល្មមៗគេទៅជួលថៃ គេអត់យកយើងទេ ហើយជួលថៃអត់តថ្លៃមួយម៉ាត់ទេ ជួលហើយតថ្លៃដូចទិញនំ។ ទទួលស្គាល់អាចថាយើងមិនស្អាតដូចគេ សមត្ថភាពមិនដល់គេ តែកាលៈទេសៈនេះឃើញច្បាស់និងភ្នែកហើយ ដូច្នេះបើបងប្អូន អូនៗនៅតែស្រលាញ់តារាគេជាងតារាប្រទេសខ្លួនឯង ក៏ស្រលាញ់ចុះ ខ្ញុំមិនច្រណែន មិនអន់ចិត្តទេ តែសម្រាប់ខ្ញុំសូមគូសហើយ។ Rip no more Idol no more favorites អីទៀតទេ តែប៉ុណ្ណឹងចោះខួរចាំមួយជីវិត អត់បានញុះញុងអ្នកណាឱ្យរើសអើងជាតិសាសន៍ជាមួយខ្ញុំទេ តែពិចារណាខ្លួនឯង»។

ជុំវិញមន្ទីរពេទ្យថៃមួយចំនួនបានប្រកាសផ្អាកទទួលអ្នកជំងឺជាប្រជាជនកម្ពុជា តារាចម្រៀងប្រចាំផលិតកម្មរស្មីហង្សមាសរូបនេះបានលើកឡើងថា «សៀមប្រកាសឈប់ទទួលអ្នកជំងឺកម្ពុជា កម្ពុជាប្រកាសថាឈប់ឈឺទៀត ទុកឱ្យប្រជាជនសៀមឈឺឱ្យច្រើន»។

រយៈពេល៥ថ្ងៃចាប់តាំងពីថ្ងៃទី២៤ កក្កដា ដល់ថ្ងៃទី២៨ កក្កដា ដែលថៃឈ្លានពានទឹកដីខ្មែរ តារាចម្រៀង ណុប បាយ៉ារិទ្ធ បានចែករំលែកថាសង្គ្រាមមួយនេះបង្រៀនយើង៖
បណ្តុះឆន្ទៈជាតិនិយមឱ្យកាន់តែខ្លាំង។ គោរពដឹងគុណនិងកាន់តែជឿជាក់លើប្រមុខថ្នាក់ដឹកនាំកំពូល។ គោរពដឹងគុណពីវិរៈភាពរបស់កងទ័ព។ ទោះមិនបានកាន់អាវុធក្នុងសមរភូមិ តែក៏ត្រូវតែក្លាហានធ្វើសមរភូមិប្រយុទ្ធទៅតាមចំណេះជំនាញ។ រួមកម្លាំង រួមស្មារតី កម្លាំងសាមគ្គីជាតិខ្មែរ ខ្មែរតែមួយ។ មិនបោះបង់ចោលគ្នាក្នុងគ្រាលំបាក។ ក្លាហានក្នុងការបង្កើតជាសម្លេងពិតទៅកាន់ពិភពលោក។

លោក ណុប បាយ៉ារិទ្ធ បានលើកឡើងថា «បើទោះជាស្ថិតក្នុងកាលៈទេសៈណាក៏ដោយឱ្យតែយើងរួមគ្នា ចេះស្រលាញ់គ្នា ចេះជួយគ្នា សាមគ្គីគ្នា នោះគ្មានសត្រូវណាមួយអាចយកឈ្នះយើងបានឡើយ ។ ការដឹងគុណគឺជាកាតព្វកិច្ចដ៏មិនអាចខ្វះបាន មកដល់ពេលនេះម៉ោងនេះទោះសម្លេងគ្រាប់កាំភ្លើងបានស្ងាត់ ស្ថានភាពវឹកវរបានស្រាកស្រាន្ត តែយើងនៅតែត្រូវការនៅភាពយុត្តិធម៌សម្រាប់ប្រទេសដ៏កម្សត់របស់យើង សូមឱ្យកម្ពុជាទទួលបាននៅភាពយុត្តិធម៌ សូមឱ្យពិភពលោកបែងចែកនិងកាត់សេចក្តីប្រកបដោយគុណធម៌ និង យុត្តិធម៌ រវាង ជនឈ្លានពាន និង ជនរងគ្រោះ៕

កញ្ញា ឡូរ៉ា ម៉ម CEO ផលិតកម្មបារមី បានលើកឡើងនៅលើបណ្តាញសង្គមថាអាវុ.ធដ៏អស្ចារ្យបំផុតរបស់ប្រទេសកម្ពុជាគឺសាមគ្គីភាព ហើយសង្គ្រាមឌីជីថលនេះ ដែលត្រូវបានធ្វើឡើងយ៉ាងឃោរឃៅពីខាងមួយទៀតនោះមានគោលដៅមួយគឺបំបាក់ដួងព្រលឹងរបស់យើង ធ្វើឱ្យយើងសង្ស័យគ្នាទៅវិញទៅមក ធ្វើឱ្យយើងឈ្លក់ក្នុងកំហឹង និងធ្វើឱ្យយើងបែកបាក់សាមគ្គីពីខាងក្នុង ហើយការភ័យខ្លាចដ៏ធំបំផុតរបស់ពួកគេគឺសាមគ្គីភាពរបស់យើង។

នៅព្រឹកថ្ងៃទី៣១ កក្កដា កញ្ញា ឡូរ៉ា ម៉ម បានបង្ហោះរូបភាពពីរសន្លឹកក្នុងន័យតំណាងពីការសាមគ្គីគ្នា និងបានរៀបរាប់យ៉ាងដូច្នេះថា «កាលពីម្សិលមិញ នាងខ្ញុំបានអង្គុយនៅក្នុងបន្ទប់មួយជាមួយនឹងបុគ្គលិកទាំងអស់ របស់ផលិតកម្ម បារមី។ បុគ្គលម្នាក់ៗ គឺជាអ្នកដឹកនាំ អ្នកបង្កើត អ្នកដែលមានក្ដីស្រមៃ។ ពួកគាត់បានចែករំលែកពី អម្រែកនៃការឈឺចាប់នៅក្នុងចិត្ត ការខកចិត្ត និងកំហឹងដែលកប់ក្នុងជម្រៅចិត្ត។ ពួកយើងមានការសន្ទនាចេញពីបេះដូង ដោយឥតលាក់បាំង។ ហើយក្នុងពេលនោះ មានអ្វីមួយដែលស្រស់ស្អាតបានកើតឡើង។ ក្រោមទំហំនៃអារម្មណ៍ឈឺចាប់របស់យើង យើងបានរកឃើញភាពធូរស្រាល។ ហើយនៅក្នុងភាពធូរស្រាលនោះ ខ្ញុំបានរកឃើញភាពច្បាស់លាស់មួយ។

សង្គ្រាមឌីជីថលនេះ ដែលត្រូវបានធ្វើឡើងយ៉ាងឃោរឃៅពីខាងមួយទៀតនោះ មានគោលដៅមួយ៖ គឺបំបាក់ដួងព្រលឹងរបស់យើង ធ្វើឱ្យយើងសង្ស័យគ្នាទៅវិញទៅមក ធ្វើឱ្យយើងឈ្លក់ក្នុងកំហឹង និងធ្វើឱ្យយើងបែកបាក់សាមគ្គីពីខាងក្នុង។ ប៉ុន្តែអ្វីដែលខ្ញុំបានឈ្វេងយល់ បានចែករំលែកជាមួយក្រុមការងាររបស់ខ្ញុំ និងឥឡូវនេះ ចង់ប្រាប់ទៅកាន់បងប្អូនជនរួមជាតិខ្មែរទាំងអស់គ្នា គឺ៖ ការភ័យខ្លាចដ៏ធំបំផុតរបស់ពួកគេគឺសាមគ្គីភាពរបស់យើង»។

កញ្ញាបន្តទៀតថា «រាល់ពេលដែលយើងជ្រើសរើសការឈរតតាំងរួមគ្នាពោរពេញទៅដោយគោលដៅ និងគោលជំហររឹងមាំ ការគាំទ្រគ្នាទៅវិញទៅមក ដើម្បីរៀបចំផែនការ និងតតាំងទៅពួកគេវិញ ពួកយើង គឺកំពុង តែបំផ្លាញមូលដ្ឋាននៃអំពើយង់ឃ្នងរបស់ពួកគេ។នៅពេលដែលពួកគេឃើញ យើងពួតដៃគ្នា លើកតម្កើងគ្នា និងពង្រឹងចំណងមិត្តភាព និងទំនាក់ទំនងជាមួយសហគមន៍របស់យើង ឯនាយសមុទ្រ និងជុំវិញពិភពលោក ពួកគេមើលឃើញ ការពិតនៃអត្តសញ្ញាណយើង។ ហើយពួកគេចាប់ផ្តើមភ័យខ្លាច។ ពីព្រោះគ្មានព័ត៌មានបន្លំ ក្លែងក្លាយ ឬការរំលោភបំពានណាមួយអាចលុបចោលអំណាចនៃប្រជាជនមួយដែលសាមគ្គី និងដឹងពីតម្លៃរបស់ខ្លួនបានឡើយ»។

ជាមួយគ្នានេះដែរ កញ្ញា ឡូរ៉ា ម៉ម បានអំពាវនាវទៅកាន់ជនរួមជាតិខ្មែរទាំងអស់គ្នាសូមធ្វើ អោយពួកគេ មើលឃើញយើងស្រលាញ់គ្នាឱ្យខ្លាំងជាងនេះ។ ឱ្យពួកគេឃើញយើងប្រឹងប្រែងធ្វើការរួមគ្នាឱ្យខ្លាំងជាងនេះ។ ដើម្បីយុត្តិធម៌ ដើម្បីវប្បធម៌ ដើម្បីសេចក្ដីពិត។ ឱ្យពួកគេឃើញថា សាមគ្គីភាពរបស់យើងមិនងាយបំបែកបំបាក់បានឡើយ។
ហើយដូចឃ្លាដែល Khmer Renaissance តែងតែនិយាយថា៖ បន្តដំណើរទៅមុខទៀត កូនខ្មែរ។ពីព្រោះរាល់ជំហានដែលយើងដើររួមគ្នា គឺជាជំហានខិតកាន់តែជិតទៅរកសេរីភាព និងសុខសន្តិភាព »។

គួរបញ្ជាក់ផងដែរថា ភាគីថៃតែងតែបង្កើតព័ត៌មានចោទប្រកាន់មកកាន់ខាងកម្ពុជា ហើយតារាល្បីៗក្នុងប្រទេសនេះគឺបានចូលរួមយ៉ាងសកម្មភាពក្នុងការទម្លាក់កំហុសមកកាន់ខាងកម្ពុជាបើទោះបីមានបទឈប់បាញ់ក៏ដោយ៕

តារាម៉ូដែលខ្មែរកាត់បារាំង មាលា បានលើកឡើងចំៗទៅកាន់បេក្ខភាពបវរកញ្ញាចក្រវាលថៃដែលយកវេទិកានេះមកបញ្ឆេះកំហឹងមិនរកផ្លូវសន្តិភាព ខណៈដែលកម្ពុជាត្រូវការសន្តិភាពមិនត្រូវការប្រយុទ្ធឡើង។ ក្នុងនោះមាលាក៏បានលើកឡើងដែរថាប្រទេសទាំងពីរគឺបាត់បង់ជីវិតគ្រប់គ្រាន់ហើយប៉ុន្តែពេលនេះព័ត៌មានក្លែងក្លាយបានជំរុញឱ្យស្អប់គ្នាកាន់តែច្រើនជារៀងរាល់ថ្ងៃ។

កាលពីល្ងាចថ្ងៃទី៣០ កក្កដា មិនត្រឹមតែ ណាវ៉ាត់ ប៉ុណ្ណោះទេយកវេទិកាស្ថិតក្រោមការគ្រប់គ្រងរបស់ខ្លួនវាយប្រហារមកកាន់ថ្នាក់ដឹកនាំកម្ពុជាក្នុងនោះបេក្ខភាពនៅក្នុងកម្មវិធីនេះក៏បាននិយាយចោទប្រកាន់មិនបានគិតពិចារណាឡើយ។ ឃើញបេក្ខភាពរបស់ប្រទេសថៃនិយាយស្តីមិនសមទំនង មាលា ស្រាប់តែបានបញ្ចេញទស្សនៈតែម្តង។ មាលាបានលើកឡើងថា គួរឆ្លៀតពេលដើម្បីអប់រំខ្លួនឯងអំពីការពិត មុននឹងនិយាយក្នុងនាមប្រជាជាតិទាំងមូល។ នាងថា នាងពិតជាគោរពប្រជាជនថៃ ប៉ុន្តែនាងមិនអាចគាំទ្រការផ្សព្វផ្សាយការស្អប់ខ្ពើម ឬព័ត៌មានមិនពិតបានទេ។ ការនិយាយឡើងគឺសំខាន់ ប៉ុន្តែវាគួរតែផ្អែកលើការពិត មិនមែនការសន្មត់នោះទេ។ ខ្មែរមិនដែលចង់ប្រយុទ្ធទេ មិនចង់ផ្សព្វផ្សាយការស្អប់យើងគ្រាន់តែចង់បានសន្តិភាព។ហើយយើងបានបញ្ជាក់យ៉ាងច្បាស់តាំងពីដើមដំបូង។

មាលា បានបន្តទៀតថា នាងយល់ថាអាចមានការភ័ន្តច្រឡំលើភាគីទាំងសងខាង ការយល់ខុសដែលបង្កឡើងដោយអារម្មណ៍ និងព័ត៌មានក្លែងក្លាយ សម្រាប់ភាគីទាំងពីរ។ប៉ុន្តែនេះមិនមែនជាការប្រកួតប្រជែងទេ។ហើយវាពិតជាគួរឱ្យសោកស្ដាយណាស់ ដែលមិនមានការជឿជាក់ចង់ស្វែងយល់ពីភាគីម្ខាងទៀត…ហើយជាធម្មតាក្នុងនាមជាបេក្ខនារី
តើពួកគេមិនគួរឈរដើម្បីសន្តិភាពឬ? នាងពិតជាមិនយល់ទាល់តែសោះ តើអាចបញ្ឈប់ការមិនសមហេតុផលទាំងអស់នេះបានទេ?»។ មាលា ថាប្រទេសទាំងពីរ(ខ្មែរ-ថៃ) បានបាត់បង់ជីវិតគ្រប់គ្រាន់ហើយ។ ហើយឥឡូវនេះ ជាមួយនឹងព័ត៌មានក្លែងក្លាយទាំងអស់បានរីករាលដាលដូចជាភ្លើងឆេះព្រៃ។យើងត្រូវបានជំរុញឱ្យស្អប់គ្នាកាន់តែច្រើនជារៀងរាល់ថ្ងៃ។សើចចំអកពីភាគីទាំងពីរ,ការឈឺចាប់ទាំងសងខាងគ្មាននរណាម្នាក់ឈ្នះពិតប្រាកដទេ។អ្វីគ្រប់យ៉ាងត្រូវបានសាងឡើងដោយការកុហក និងមោទនភាព។ ទន្ទឹមនឹងនេះជនស្លូតត្រង់ត្រូវបានទុកឱ្យឈឺចាប់ និងបង្ខំឱ្យកើតទុក្ខ៕

បន្ទាប់ពីប្រធានស្ថាប័នសម្រស់ MGI និង MUT ចេញមកនិយាយយ៉ាងគន្លើនពីថា្នក់ដឹកនាំខ្មែរ ពេជ្រ វត្តីសារ៉ាវឌ្ឍី មិនអាចអត់ធ្មត់តទៅទៀតចេញមកថ្កោលទោសយ៉ាងដាច់អហង្ការចំពោះបុគ្គលអគតិណាវ៉ាត់។ មិនត្រឹមតែប៉ុណ្ណោះ ភឹម ស្រីនោ និងពេជ្រ វត្តីសារ៉ាវឌ្ឍី បបានពួតដៃគ្នាដាក់មួយចាស់ដៃទៅកាន់បុគ្គលនេះខណៈ វត្តី ក៏បានបកស្រាយអំពីរឿងកុងត្រាផងដែរ។

កាលពីយប់ថ្ងៃទី៣១ តាមរយៈការ Live នៅលើហ្វេកប៊ុកផ្ទាល់ខ្លួនរបស់ ពេជ្រ វត្តីសារ៉ាវឌ្ឍី នាងបានបកស្រាយរឿងរ៉ាវមួយចំនួនដែលពុំធ្លាប់បាននិយាយកាលពីកន្លងមក ខណៈនាងមិនអាចស្ងប់ស្ងាត់បន្តទៀតបានដោយសារតែបុគ្គលម្នាក់នោះហ៊ានប៉ះពាល់ដល់ថ្នាក់ដឹកនាំ។ បវរកញ្ញារូបនេះថា កាលពី ណាវ៉ាត់ ចង់រៀបចំកម្មវិធី Miss Grand International 2024 ដោយកម្ពុជាធ្វើជាម្ចាស់ផ្ទះពាក់កណ្តាលគឺនាងមិនចង់ឱ្យរៀបចំនោះទេ ព្រោះគេឆ្វែលអស់ហើយមិនថាវៀតណាម ឥណ្ឌូនេស៊ី និង មីយ៉ាន់ម៉ា សុទ្ធតែមកចង់រៀបចំ។ ពេជ្រ វត្តីសារ៉ាវឌ្ឍី ថា ណាវ៉ាត់ ចង់រៀបចំនៅប្រទេសដទៃគឺមិនចង់ចំណាយលុយច្រើននៅលើប្រទេសរបស់ខ្លួន ហើយសូម្បីតែរឿងបន្តិចបន្តួចនាងមិនទៅគេងសណ្ឋាគារ ដោយសារតែផ្ទះជិតហ្នឹងក៏ ណាវ៉ាត់ ខឹងរឿងចំណុចតូចៗ។

ពេជ្រ វត្តីសារ៉ាវឌ្ឍី ក៏បានបញ្ជាក់ថាបន្ទាប់ពីប្រទេសមានរឿងភ្លាមគឺនាងលុប Title តែម្តងហើយការទុកនោះគឺនាងមោទនភាពអ្វីដែលនាងខិតខំមិនមែនមោទនភាពដោយសារតែឈ្មោះកម្មវិធីនោះទេ។ មិនត្រឹមតែប៉ុណ្ណោះបវរកញ្ញារូបនេះថាប្រជាជនថៃមួយចំនួនគឺមិនគាំទ្រ ណាវ៉ាត់ នោះទេ។

ជាមួយគ្នានេះ ពេជ្រ វត្តីសារ៉ាវឌ្ឍី ក៏បានបកស្រាយអំពីរឿងកុងត្រារបស់ ណាវ៉ាត់ គឺមានចំនួនពីរគឺ Miss Grand Thailand និង Miss Grand International ។ ចំណុចនេះ ពេជ្រ វត្តីសារ៉ាវឌ្ឍី ក៏បានបន្ទោសខ្លួនឯងថាល្ងង់ជាប់ក្នុងកម្មវិធីគេហើយគេឱ្យស៊ីញ៉េក៏ស៊ីញ៉េ ទៅក្នុងស្ថាប័ន Miss Grand Thailand ដែលអាចកាត់លុយនាងបានចំនួន៦៥%ទាំងពន្ធចូលទៅក្នុងរដ្ឋាភិបាល។ ពេជ្រ វត្តីសារ៉ាវឌ្ឍី ថានាងមិនអាចយកកុងត្រាមកតវ៉ាអ្វីបានទេពីព្រោះតែនាងស៊ីញ៉េរួចហើយ ហើយកុងត្រានោះគឺមិនមាននៅក្នុងដៃនាងនោះទេគឺនៅជាមួយនឹង ណាវ៉ាត់។

ជាមួយគ្នានេះដែរ ភឹម ស្រីនោ បានប្រើសំឡេងរបស់ខ្លួនដែលនាងចេះភាសាថៃ គឺបានព្រលះចាស់ដៃទៅកាន់ ណាវ៉ាត់ យ៉ាងឈឺៗនិងបង្ហើបរឿងអាស្រូវរបស់បុគ្គលអគតិរូបនេះផងដែរ៕